أبو عائشة الجزء الرابع

من تأليف Soukaina Ahnani
2020

محتوى القصة

رواية أبو عائشة

..فات الصالون شويا وتحنا بلال طل عليه بان ليه غادي عاطيه بالظهر تايتسكل للباب ..قرب بالشويا وغير حس بوبكر بشي حد وراه عطاه للراس تاطاح مجبد: اااااي

غاطاح دخل تاج الدين لابس بانطوفة بالمقلوب والتيشورت كدلك فاق عوج وزاد وسع عينيه فاش شاف داك المنظر شعل الضو وقال مخرجهم: تاااشدرتي المسخوط

بلال صغر عينيه و حقق الشوفة فبوبكر اللي طايح كايرمش فالخوا وكاينين

بلال: اجي هادا ماشي عمك؟؟

رد بعصبية وهو غادي عند عمو يعاونو: العمااا اولديي العماااا

حك راسو وحتا هو مخنزر: واصاحبي يسحابلي شي شفار دخل باش غانعرفو سكن هنا

تاج وقف بوبكر اللللي كاينين الدووخة شداتو: آااي اراسي ..ااي اراسي اعباد الله .. اشبغيتي عندي اعدو الله .. بااغي تقتلني يافرطوطو باولد الحراام ..اااي ..اااااي

بلال قلب عينيه وتاج غادي ببوبكر للصالون وقبل مايوصلو ضار فيه: خررج خررررج الله يخرك فحيط خرجتي ليا فعودي

لاح ديك البلانشة من يدو وتايشوف حالتو..واخا هاكاك عز عليه ومشا يبوسليه راسو ويطلب منو السماحة لكن غير قرب عندو بدا يغوت وسط ايدين تاج الدين: حجااارك يشدوووك ياااولد الحرااام عطيني بالتيساااع ماتمسني ماتحاديني

رد بهدوء تابت بلاصتو: والله مادرتها بلعاني اعمي تخلعت فاش شفتك نازل فداك الظلام وصافي

تاج الدين: بلااال سير غيير خررج 


بوبكر: وضرربني بحديدة اولد الحراااام المجريييم قد جدك وضرربني ماحشمتي مارااعيتي 

سكت كايقشر شنايفو وهو بالغدايد شاف هنا وهنا باغي غير باش يضربو حيت يديه مااتو بالدوخة وبان ليه شال نسوي احمر شدو ولاحو ليه على وجهو: خروووج درگ عليااا زلاافتك لانعيط لك على البولييس براااا
....
عائشة كمشات حجابنها وصداع باها فودنها كايلعب ..حلاتهم كاترمش قدامها سااااهية وبهطة النعاس شاداها وتتحاول تفرز الصووت

.......

بلال: وااا خليوني غير نشرح انا فاش طليت وشفتك نازل فالظلام خلعتيني وسحابتك شي شفار. كنتي على الاقل تشعل الضو باش نشوفك

خنزر تاج وبوبكر بغا يطير عليه لكن ماعدو جهد: واااش شغغغلك سووووقك مااحالي هااادا نمشييي تاعلى القنديل اااشااوا تاتساالني وكااين شي شفاار قدك المجرييييم

زيراك الفولار فيدو وضار لايكمل زبلتو بشي كلام ماهواش..خرج مع الباب ومن الدروج نزلات عائشة تتجمع شعرها مخلوعة..شافت فديك الحالة وتاج گالس حداه هي تشهق مخرجة عينيها بصدمة: هييييه اااويلي بااااا



صباح جدييد..

قدام المراية واقفة تتقاد اخر اللمسات وتزوق..لوك جديد حوايج جداد واينيرجي جديدة بحالا معرفت فين غادة و الاهم انها عمرات طاقة ايجابية

الحوايج الكلاص تايزيدو نخوة للشخص ويكبرو ليه الشان كتر، اكترية لاجاو ماه هوما هادوك بحال حالة عائشة اللي كيف البلارة مضوية وتادور قدام المراية تشوف راسها شحال تبدلات وتضحك
..بودي اسور مزير فوقو شوميز شيبية مطرزرة بوريدات كحلين جيها الصدر كاتجي محلولة وطويلة للفخاض..دجين بيض طاي هوت خاشية فيه البودي ومطلعاه للىكرش مبين ليها لاطاي تاحاجة عندها مافايضة كلشي بقياسو ومواتي جسدها الصغير المتناسق
..شعرها صاوباتو بالبلاك الي شرات مابقاش متموج رجع مسرح تسريحة وحدة ضور ضور وتلعب بيه وفينما تحركات هاهو غادي معاها

..بعد ساعة من الملاحظة ومن فرحتها براسها وبحوايجها مشات هزات ساكادو وردي بارد زانتوي بامتياز
.. حطات فيه الطيلي ورجعات للبلاكاى هزات سبرديلة بيضة عاد حلات الباب وخرجات نازلة لتحت حتال باب الدار عاد لبسات فرجليها وبدات تعيط

عائشة: بابا..بااباا

مسمعاتش حسو ومن لتحت كاتلتاقط صوتو مجهد 
قادات ساكها سدار الباب ونزلات مع الدروج لقاتو واقف على المعلم كايبدل ليه القفل تاع البلب وعلى راسو دايرة بانضة بيضة ببقعة حمرة فالجنب نتيجة البيطادين اللي عمرها بيها واخا غابوقالة مادات مجابت، مخنزر على الصباح هاز شوكتو للسما وغير مركز معاه
..نزلات باست ايدو وقال

بوبكر: الله يرضي عليكشافت فالمالم وهو 

قال كايطلع فيها وينزل: انمشيو دروك

عائشة: اه ابا يالله نساليو الاجرائات ديال التقياد ونشوف لي پروف اللي عندي

بوبكر: وهاكي ابنيتي طلعي للطومموبيل هانا جاي

عائشة: واخا

مشات لوطو حلات الباب وطلعات حاضياه اتايدوي مع المعلم ويأكد عليه يزير القفل مزيان..جرات ساكها جبدات منو تيليفونها ودوزات رقم كريمة وعينيها على باباها مصغرين

كريمة: الو ختي

عائشة: الو كريمة..مسالية من دابا لنص ساعة

كريمة: انا تگولها لماما..واش غاتجي عندي

عائشة: لا من الاحسن تختاري شي بلاصة نتلااقاو فيها حسن

كريمة: واخا احبيبتي انا شوية غانسيفط لك العنوان

عائشة: واخا..كيف بقيتي بعدا شوية


تنهدات: الحمد لله على كل حال

عائشة: كاديريش فبالك دابة تلقاة الحل

كريمة: إن شاء الله اعائشة هادشي اللي كانتمنى

سافت بوبكر جاي وقالت: بابا جاي حتا نعاود نعيط لك

كريمة: واخا.. شكرا بزاف

عائشة: مابيناتناش احبيبة


قدام مرايت بيتو الطويلة حتا هو واقف ..بكومپلي كلاص من داكشي، شوميز 
زرقة على فصالتو غاطرطق مع سروال توب ازرق وگرافاطة زوينة مقادة غير مضارب معاها.. ماشط شعرو اللور وصباط اسود فرجليك زايدو هبة على هبة وبينو فشكل على اللي موالف

...حبس تايشوف فداكشي فالاخير خربق شعرو وقادو بايديه حيد الكرافاط لاحها على السرير طوا كمام الشوميز وحل الصدايف الفوقانيين يتهوا عنقو عاد ارتاح شوية وهز الطيلي خارج من بيتو للتحت..الشهامة والرجولة منو تتفوح وكريزمة غير عادية زادو بيها الرسمي واخا مكايحملوش وكايحسو ماشي الستيل تاعو لكنو واتاه
..لقا ماماه عاد كاتحط الفطور باسها فراسها وگلس كايهز بالزربة وهي مبتاسمة ليه تطلع وتنزل

هيام: جا معاك الكلاس

بدا كاينقب من هنا وهنا: وعلى مبان ليا انا اللي ماجيتش معاه ههه

ردت كاضحك: نو بالعكس واتاك احبيبي

باس يدها ببسمة خفيفة: يخليك ليا..فين الواليد والدراري

هيام: هاهو طالع، وخوتك فمدراستهم "كمشات حجبانها بفضول" اجي البارح مالكم جيتو مصادعين ؟

رداتو الداكرة لاحدات البارحة وشد الضحكة كايحرك راسو

هيام: مالك

حبسها بزز: والو الغزالة والو

هيام: وعلاش فقتي كاتغوت ودق علينا؟؟

غمزها وتم واقف: ضربني حمار الليل..الواليد فالبيرو ديالو ياك؟

حركات راسها بسها فجبهتها وتم نازل مع الدروج مبسم حتال مكتب باه دق بخفة ودخل

بلال: صباح النور

رد تاج الدين: صباح الزفت اكبير المصائب

سد الباب كايضحك ويدو فجيبو: وياك اسي العورابي ماشي حشومة

تاج الدين: واش باغي تقتلو غير فهمني داك عمي مالك معاه

شداتو الضحكة: ممزهاارش وصافي واش كانديرها بلعاني هههه

خنزر وهو بسرعة قال: ارا ارا سوارت اللوطو نطلو على خدمتنا الى بقينا تاابعين داك عمك بتنا هنا

رد بشك: غانعطيهم ليك ولكن الشغل يتقضا

غمزو بتقة: بلال هادا واجرك على الله ماتخافش الكونطرا اليوم غاتسنا هي اليوم غاتسنا

دارها فيد الله حل الكوفر فور جبد منو السوارت لاحهم ليه وبلال شدهم كايضحك: الله شحال زوينة الخدمة معاك هههه 

هز فيه صبعو: واايااك تندمني واياااك

بلال: امالنا دراري "ضار يخرج" اديوص الواليد


خرج من الادارة بعدما نهاو إجراءات التسجيل وهي شادة فيه بابتسامة عريضة كادور عينيها فالارجاء وبؤبؤهم تايبريو من السعادة.. يدها بيد باها حققات اول خطوة فحلمها الوردي، وهي الجامعة.. الطلبة داخلين خارجين دراري وبنات هالمبوگص هالزين هالتوت الشلات كلها وفين مركن، كاين اللي جاي يقرا واللي غير كايتفلا، كاين 
منهم المحتاج ومول التاج، كاين اصناف واصناف جامعهم باب واحد..باب الجامعة


دار الوراق فالجيب الدخلاني تاع الفيستا..خنزر تايشوف فيها وموحش جليلباتو اللي كايزيدوه وقار فوق وقار الشيب اللي فلحيتو

بوبكر: هاد الڤيستا هي اللي عدي بدات تكشف واقلة غانبدا تاني نلبس جلالبي 

شافت فيه وقلبها بالفرحة طاير: آه ابابا اصلا اي حاجة تجي معاك ماشاء الله ههه

ضحك ليها تاتسدو عينيه: احياني عليك اشويطينة سايرة تسبغبني تاني

باست ليه يدو وضحكة حلوة فشفايفها؛ لهلا يخطيك عليا..ماتصورش شحال فرحانة اليوم ابابا 

طبطب على يدها برضى وفرحتها من فرحتو: الله يرضي عليك ابنتي ونوصيك.. قراي مزيان ونتابهي مع الاستاد لادوا معاك شي حد مادويش معاه گوليها للاستاد ديالك ولا سيري عند المدير ولا جي عد بوك انا نتفاهم معاه..وقيدي الادوات اللي خاصينك باش نشريهم ليك

حركات راسها بآه وهو ربت على كتفها: الله يضري عليك ابنيتي واسيري ماتعطليش على الدرس سيري

عائشة: واخا ابا تهلا فراسك فاش نقرب نخرج غانصوني لك

قرنهم فالبلاصة: والتيليفون اش كايدير عدك تي جاية تقراي ولا تلعبي فيه

عائشة: لا راه ماشي بحال المدرسة، هنا مسموح نجيبو معايا غير خاصني نديرو صيلونص فلومڤي

بوبكر: شناهوا هادا؟؟.

عائشة: القسم ابابا القسم، زايدون ماتعرف نحتاج شي حاجة ولا نبغي نصوني ليك

دورها فدماغو وقال: ايه عدك الصح ابنيتي ماتعرفي الوقت اش تجيب..كيف تخرجي من قيسمك صوني ليا 

بابتسامة: واخا كون هاني

باست ايدو مرة تانية والغادي والجاي حاضيهم وهي الامر ماعطاتوش أهمية المهم هو تقرا وبالفرحات عليها غير مللي قبل..دخلات للكافيايرية دوزات رقم كريمة اللي جاوباتها فالحين وقالت: الو عائشة

عائشة: كريمة فينك

كريمة: شوفي راه عمي هو اللي غايوصلني لواحد المطعم فالصونطر..انا غانسيفط ليك العنوان تقدري تجي

فركات صبعانها وتتشوف لبرا: واش متقدريش تجي اعندي نتي.؟

كريمة: والله مكرهت واخا عييت نطلبو مابغاش وحتا ياسر مكايجاوبنيش..هاد المطعم عندو فيه شي شغال وبزز باش بغا يجيبني معاه گلت نديرها سبة وتجي نشوفك

تنهدات وناضت واقفة تخرج: صافي ماشي مشكيل غير هو مخاصنيش نتعطل.. " تأكدات باللي باها مشا عاد خرجات تاتقلب على طاكسي" سيفطي ليا العنوان ديالو 
........

بلال: المطعم اللي حدا الرومپوا ديال البوليس ياك؟

....: اه اسي بلال تما فين درنا معاهم ..واش قربتي توصل؟

ضور الڤولون وبجدية قال: هاأنا جاي وإلى تعطلت ضايفهم بينما وصلت 

...: واخا اسي بلال

بلال: تهلا ...قطع وكمل طريقو بسرعة


وسط الطريق العام تقلبات كرويلة عامرة بالليمون حتاتشتت فالشانطي كامل ومولاها شاد راسو و دايخ ماعرف منين يبدا الجميع فهاد الحرارة وزادوه الطاموبيلات اللي فراناو اضطراريا وصدعوه بالكلاكسون كلاا واحد مخرج ايدو من السرجم كايتهز ويتحط..
گاع اللي عندو شي شغل ولا شي موعد هام راه طلع ليه الخز للراس بحال حالة بلال اللي وقف حتا هو مزير فكو بعصبية..قليل فين تايتعصب حيت عصبيتو خايبة فايتة گاع خوتو بلادوز وماأمكن كايحاول يبرد دمو، واخا كل دقيقة كادوز ماشي فصاليحو

..حداه تماما وقف طاكسي صغير فيه راكبة عائشة، قارنة حجبانها للقدام وقالت بفضول: اشنو واقع علااش هاد الزحام كامل

رد عليها: واحد الكرويلة تاع الليمون طاحت وعمرات الدنيا.. مابقا لينا منين ندوزو

ردت بحزن: مسكين كونرا مولاها غايتسطا

رد: هاد الشوافرية اللي غايتسطاو وعلى شوية غايخرجو يعصيوه ههه

رضات ضهرها للكرسي تتنهد وتشوف فساعتها اليدوية 
..ضورات وجهها صدفة وبانو ليها اطفال الشوارع اللي تايبيعو كلينيكس ولا گارو والشكلاط باركين كايرتاحو من الشمس الحارقة بعدما باعو اللي باعو..كمشات وجهها تتفكر وتعاود حلات الساكادو وهزات من بزطامها خمسين درهم وببسمت خفة قالت: انا جاية 

رد بسرعة: اخلصيني بعدا

طلعات حاجب: هاهو ساكي فاالطوموبيل راه مغانهربش 

سكت ونزلات سادة الباب بالجهد وصوتو تار انتباه بلال اللي ضار جيهاها..مشات عاطيياه بالضهر مزروبة عند الوليدات وهو فيها قارن حجبانو وممحيدش عينيه

وصلات عندهم وبضحكتها الحلوة قالت:: السلااام

ردو عليها دقة وحدة: وعليك بمتلها

عايشة: هههه بغيتو هادي 

..وراتهم خمسين درهم وعينيهم فيها تحلو ..نطق الكبير وقال مخنزر: وعلاش غاتعطيها لينا

عائشة: غانعطيها ليكم الى جمعتو داك الليمون كامل فخمسة ديال الدقايق بلا ماتخليو حتا حبة.. ولكن الى تعطلتو غير دقيقة وحدة غايتلغا الاتفاق مفاهمين؟

ناض وضار ليهم نافخ صدرو الرقيق: الدرااري..الاطااك.. زاكريا سير كلم ليا ولاد السيكتور ربعة گوليهم عبيقة بغاكم

مشا الولد كايجي بسنضالة الميكة وعائشة قالت مبسمة: يالله تبعوني

توجهات بيهم للشانطي كاطوي كمام الشوميز وتحناو تايجمعو كاملين يد وحدة ويحطو فديك الكرويلة..الناس اللي فطموبيلاتهم معصبين بداو يتهدنو و صاحب الليمون داير يدو معاهم يضكر ويعاود
ابتاسمات ملامحو ببشاشة حاضيها وحاضي الوليدات كايهزو بسرعة وجاو وحدين خرين كايعاونوهم.. حبة ورا حبة ورا حبة حتا تنقات الدنيا من الليمون ومول الكرويلة فرحان جرها مبعدها من الطريق باش السيارات يدوزو وهي ضارت راجعة للطاكسي تركب والكل عجبو تصرفها ودكاءها اللي خدمات بهدف نبيل..وهو منهم .. حاضيها وملامحها اللي وضاحو قدام عينيه خلاوه يمحي ضحكتو شيئا فشيئا ويصغر عينيه كأنو كايتدكر شي حاجة وصبعو على حاجبو تايحكو فحيرة ..حتا طلعات قدام عينيه عاد بدا يتبسم تدريجيا والطيلي تايصوني رد وقال كايضحك من قلبو: هههه وي 

خالد: هههه والضحك لاش


زاد ضحك مديماري والطاكسي قدامو غادة: توحشت صوتك ازين

خالدءة اتجمع گاالاك كون راك مقنت شي تفاحة وتتكركر

زاد فالكسيراتور فاش تفكر راسو معطل وقال: كركرت غانتا اللي جات معات..ههه جراو عليك تاني

خالد: شكون گالها لك؟؟

بلال: قدرت ..سير سير راعندي مايتقضا تانسالي ونتلاقاو

خالد: ههه اييه بتزاكر من ورايي.. زوينة بعدا؟

بسم بعينيه و قطع ..فرانا بسيارتو قدام المطعم نزل وتم داخل كايزرب ويقاد الكول
..وراه توقفات الطاكسي ديال عائشة، خلصاتو ونزلات هازة الصاكادو ديالها وعينيها مجبدين فالمطعم بانبهار..اول مرة تشوف شي مطعم مباشرة ولا دخل ليه.. جاها التعجب والضحك والفرحة فنفس الوقت..دخلات بابتسامة تترمش وتسقي عينيها فالناس والطوابل والديكورات حتا شيرات ليها بنت عشرينية طويلة وزينها هادئ، من ملامحها باينة الطيبوبة والراحة

..بسعادة توجهات عندها كاضحك وكيف وصلات خداتها بالاحظان ودموع كريمة كاينزلو 

كريمة: ههه ياختي تاتباني فنة كتر من التصاور

عائشة: حتا نتي هههه

كريمة: گلسي گلسي شنو تشربي

گلسات وعينيها كايضورو: هادشي وااعر سعداتكم نتوما ناس المدينة والله

كريمة: هههه دابا يطلع ليك فالراس..شنو تشربي؟

ردت بسرعة: لا لا لا والله مافيا وخاصني نمشي دغيا راك عارفة

بامتنان شدات يدها وقالت: شكرا بزاف احبيبة.. فرحتيني مللي شفتك والله

بسمات: خلينا من هادشي وعاودي ليا المهم


...گلس مكانو بابتسامة بعدما سلم عليهم
..تلاتة الاشخاص منهم مرا كبيرة فالعمر هي مديرة الشركة السياحية والشخص الرابع اللي منظم لقاءهم قال بابتسامة: هادة هو بلال العوماري..سي بلال هادا سي عتمان ..سي بن عيسى ولالة فاطمة مديرة الشركة

ببسمة جدية قال: متشرفين..وكانعتادر على التأخير اللي مكانش فيدي 

ردت المرا ببشاشة: ماعليش اسي العورابي حنا عارفين لومبوطياج ديال كازا ههه

بلال: ميغسي..ايبون ..نبداو؟

......

كريمة: وفوق كلشي رجع بحالا حتا حاجة ماوقعات هءهءهء وبدا يدير ليا فالمشاكل مع ياسر علاش هاكا علاااش انا شنو درت ليه هءهءهء

عطاتها كلينيكس وقالت: گلت ليك راه ولد الحرام مقطر..صافي عافاك متبقايش تبكي غير بلاتي غانلقاو شي حل

ردت كاتنخصص: اشمن حل اعائشة وهو كايلوح عليا الباطل قدام خطيبي هءهءهؤ علم الله شنو گال ليه حتا تعصب لديك الدرجة

عائشة: هو خاصو يتيق فيك ويسمع للقصة من طرفك..داك الكلب فاش جاتو الفرصة كون راه قال اللي كاين واللي مكاين

كريمة: هءهءهءهء

عائشة: وصافي عافاك البكا ورا الميت خصاارة دابة خاصنا نفكرو فشي حل..هاكي شربي 

خدات منها الما تتسرب وشوية داوها عينيها للجنب ..سرطات الما مخرجة عينيها وغير تأكدات من الوجه شهقات مصدومة والهوف راكبها: هييييه ويلي على موصيييبة

عائشة: ماالك؟؟


خرجو عينين كريمة ورعدة الخوف راكباها من صبعها الصغير، بقا وجهها مخطوف منو اللون وعينيها مركزين على شاب تلاتيني لابس شوميز زرقة وگالس مع مرا كايدويو ومن ملامحو باينة فيه بو بنات من طينة اللي مايتأمنش ليهم ماحسات حتا نطقات بهلع: ااويلي قفرتها

ضورات وجهها دغيا كاتقاقي بالخوف وعائشة عيات ضور وجهها فالمقهى لكن مابان ليها حد: كرييمة ماالكي ؟؟؟ واش شفتي لؤي؟؟

مضورة وجهها ومخبياه بالمونو: هو هو ولد الحراام..

ضورات وجهها بعصبية كاتقلب: فين هو الكللب فيين؟؟

كريمة: ويلي الى شاافني غايدير ليا الشووهة وعمي كاين الفوق هءهؤ

عائشة: غيير وريييه ليا فيين وانا نتكللف 

كريمة: عائشة يالله نمشييو فحالاتنا عافاااك هءهءهء

خرجات فيها عينيها: ماتبكيييش سككتي وورييني الكللب فين گاالس

....اتناء كلامهم ناض الشاب يجاوب على اتصال وخلا البنت كاتشرب فقهوتها وتتسناه

كريمة: م منقدرش ندور..شوفي راه لابس شوميز زرقة وگالس مع واحد خيتي

بداو عينيها تايضورو هنا وهنا ومابان ليها الا بلال هو الوحيد اللي لابس شوميز زرقة ..گالس وبملامح جدية عطاتو سحر خاص كايدوي مع مديرة الشركة السياحية وتايشرح بايديه وبالوراق اللي قدامو وعلى وجه المرأة باين الرضا والارتياح

كمشات حجبانها فيه: واش بارك حدا الزاج وباركة قدامو مرا؟

بهلع قالت: ااه وانوضي نمشييو

صغرات عينيها مزياان فملامحو الوسيمة وجادبيتو الرجولية: والله مباينة فيه شماتة؟ ياختي فشكل كايبان

ردت كاتبكي: هادااك راه دييب هءهءهء كنت معمية فيه معمية هءهء

عائشة: شفتو كايوريها شي وراق بحالا كاين فاجتماع لا؟

كريمة: نوضي الله يستر عليه نمشيو راغايشوفني وخاصاه غير منين يشدني

عائشة: بلاتي بلاتي "شافت فيها بهدوء" تفرجتي فالفلم الجديد ديال بريانكا وسيف علي خان؟

باستغراب تام قالت: لا علاش؟

عائشة: ياربي تاهو مايكونش مفرج

ناضت متوجهة لطاولتو وكريمة عينيها خرجو: ويلي فين غاادة..عااائشة..عاائشة


شافتها كريمة لإينا طبلة غادة هي تشهق: ااويلي هاادي فيين غادة 

..بان ليها لؤي راجع كايرد الطيلي لجيبو هي تهز ساكها وزادت خلفة مع الطريق كاتويل وتحاول تشير لعائشة باش تبعها

فحديت عملي وبعد مناقشات وعطي ودي فالكلام قال بلال ببسمة راد ضهرو للكرسي: والقرار الأخير ليكم..متنساوش باللي الاستفادة غاتكون من نصيبنا مجموعين الالة فاطمة، خاص غير اليد اللي تحط فيدك تكون صحيحة

برضى ضكات: تبارك الله عليك..كايعجبوني الشباب بحالك عندهم حماس للخدمة وطموحين 

حرك راسو بمجاملة ورد: وهاد الحماس هو بيه غازيدو نكبرو خدمتنا ونطلعوها لأعى المستويات "ببسمة جانبية" حيت مأكد غانربحو من هاد الشراكة بزاف ...

شافت فمساعديها حركو راسهم وصارت عندو باش تهضر لكن قاطعاتها عائشة اللي قالت: بونجوغ

بلال: بون ج..."وسع عينيه فاش شافها قدامو واقفة بهدوء" جوغ

رمش وقاد الگلسة وجهو مدهوش من شوفتها وانها كاتشوف فيه هو بالدات..نزلات عينيها تترمش والحزن طاغي عليها تتحاول تحبس البكية وقالت ببسمة بزز وصوت رقيق كايقطع القلب: ياكما قاطعتك؟

جمع حجبانو وضار وراه لاتكون كادوي مع شي حد اخر، عاد رجع شاف فيها وشير لراسو بتساؤل: داوية معايا؟؟

المرا قوصات حجبانها وقالت: سي العورابي شكون هاد البنت؟؟

ضار عندها محرك فمو بماعرفت وشاف فيها تاني.. عائشة بسمات بانكسار وفمقلتيها تجمعو الدموع، دهشوه وطلع حجبانو ولاخرين اللي معاه فالطبلة حاضين الفيلم واحد يشوف فواحد مافهمو والو من غير أن منظرها كايقطع القلب

عائشة: انا ماجيتش باش نعاود نطلبك..ولا نتحنا على رجليك باش ترحمني ..ماجيتش باش نهين كرامتي مرة خرا ونتا دير فيا مابغيتي انا ج...

قاطعها شاداه الضحكة: من نيتك اختي..تتعرفيني؟

نزلو دموعها وشفايفها تايرجفو ومعاها حل فمو وعينيه بالله ماقشبل شي وزة: ماعليش ولفت منك تنكرني كلا مرة هءهء انا جيت نگولك حاجة خرا

قاطعها تاني بيديه: لا لا بلاتي واش..واش شوية صاڤا نتي شمن ولفتي ولا مرض انا فين عمري شفتك ؟

المرا بدات تنيرڤا وحالت عائشة ماعجباتهاش: سي العورابي مال البنت؟

شاف فيها مطلع حاجب: واشكون هي ااصلا

نطق السيد الواسطة بينو وبين الشركة: ا ا بنتي سي العورابي ممساليش دابة ممكن تتسنايه لهيه فاش يسالي غايجي حتال عندك

ضار ليه مخنزر والخز بدا يطلع ليه قبل مايدوي نطقات عائشة بحصرة: انا بزز باش لقيتو، من ورا مالاحني للزنقة ومافكرش يدور وراه.. مافكر حتا فالولد اللي فكرشي فدشنو غايوقع ليه "بلال وسع عينيه الباطل برجليه جاي حتال عندو" هءهء انا صاافي ضعت كللشي ضااع مني حيت تقت فيه هءهؤ باسم الحب عطيتو كلشي ولكن "تتفكر دموع كريمة وتتزير راسها تزيد تبكي" 

حركات راسها نافية تتسوف فعينيه وهو حالهم وتكميشة خفيفة فحجبانو بالبهطة ماقدر حتا ينطق: ولكن حبي مكانش كافي.. ماعمرو كان كافي ليك..ومعمرك قدرتيه.. وماعمرك غاتلقا شي وحدة كاتبغيك بحالي


بقاو كايشوفو فيها متأترين الا بلال اللي كان جامد حال فمو فهاظ الفلم..وفعلا فلم واشمن فلم حتا خلعهم فاش ضرب يد بيد وشاف فالمرا كايضحك عااد تفكر شمن فلم: كووكتييل

المرا: شنوو؟؟؟؟

عائشة دورات عينيها كاتحنحن وهو ناض كايضحك ويقلب بعينيه: كاامييرة خفية هاادي بلا مادهشو هههه..احم احم خاالييد خرج خرج ااصااحبي خررج

عائشة كمشات حجبانها بحالهم كاملين وهو تايضور راسو على المقهى ويقلب متأكد انو مقلب من صحابو: واخااليد خررج المرررض 

المرا شافت فيهم هازة يديها: انا مفهمت واالو

شاف فيها مبسم: هاادي لقطة ففلم كوكتيل الالة فاطمة ههه "شاف فعائشة كايصحم ودرعها عندو تاجا على صدرو راسها، خرجاات عينيها تابغاو يتفرقعو وهو كايضحك مع المرا ويدو التانية على كتف عائشة محطوطة

بلال: ههه فلم ديال الهنود الالة فاطمة وصحابي بغاو يشدو فيا شوية ههه ساعة جاب الله كانتفرج فبوليود 

بدات كاتنتر وسط ايديه: حييد عليا شمن هنوود انا دااوية بصح

كايقلب وراه: ششش ..خااليييد واازمر خررج راعقنااا بك ابناادم "شاف فيها مصغر عينيه ببسمة جدابة" مبايناش فيك عندك مع التحرميات ءء؟؟ ..غمزها ببسمة ساحرة وعينيها فيه مشرعين فعفعها كاملة من الداخل

عائشة: ء ب ب شمن تحرميات وشكون هاد خاليد

ضحك وبحنية مسح دمعة نازلة من عينها والمرا قالت

المرا: اناا مابقييت فااهمة واالو والله تااادخت.. وااش بصح كاضحكي ابنتي؟؟

بعدات من ايديه بارتباك وشافت فيه من معدة بخطوات: انا كاندوي بصح وهو بغا يتاهمني بالخياانة.. مكاانعرف حظ بهاد السمية وبلا ماتخاف ولدي قادة بيه بووحدي سممعتي أصلا ماتستاهلش تكوون اب

شهقات المرا وضارت للمساعدين كاتشوف فيهم

..بدات هضرتها كاتنيرڤيه وقال مطلع حاجب الفوووق: راه بديتو كاطلعو ليا الخز وفخبارك فين اانا؟؟ فاجتماع عمل هي بلعي فمك وعرفي وقت الضحك ايمتا "ضار بنرفسة" خررج اولد الق**** خرررج بالله تانفررعك 

المرا: لا لا هاادشي بزااف..هااد الناس انا يستحييل نخدم معاهم " بغات تنوض وهو شرع عينيه صافي النقشة بدات طلع" 

بلال: كيفااش ناس؟؟ حنا جيينا مجموعين على خدمة الالة المديرة هااد الزعتتر اللي داز مااشي بصح، وحتا لو كان كايبقا شي حاجة شخصية كاتخصني انااا مدام

المرا: انا عندي النزاهة هي كللشي اسي العورابي ..وللاسف هاد الصفة ماتملكهااش نتا قليل التراابي

هز صبعو بعصبية: جممعي فمك وخليني محتارك كبر سنك وااخا

المرا: لا ااجي ضرربني اسيدي هاادشي اللي بقا

قاطعهم الواسطة اللي ناض كايبرد السوق: مدام فاطمة بلا ماتعصبي سي العورابي راه مكايناش بحال خدمتو واكيد اللي وقع مع البنت كان سوء فهم بينهم

خرج فيه عينيه مكشكش: شكاااتخ*** عليا حتا نتا زمم فممك الله يرحم باااك

الواسطة: ا انا غير على قبل الولد اللي...

قاطعو: واا ماكانعرفهاااش الق**** فين عمري تادوييت معاها بقا ليا غاانحملها 

ضار بعصبية فين كانت واقفة عائشة لقاها طارت ماليها اتر ولوكان حصلها وراه يفلعصها بين ايديه ..المرا هزات ساكها وتمات خارجة والمساعدين وراها..تما خنزر وقندش حتا رجعو عروقو باينين ووجهو البرونزي حماار 

ضار للطبلة يهز سوارتو شافو الواسطة وخلعو بداك المنظر وبنبرة صوتو الحادة: هادشي مايوصلش للواليد

رد كايقفقف: و ولكن مايمكنش اسي بلال

خنزر وتحت سنانو قال: وصلها ليه لاكنتي راجل راه كانقلب غير معامن

ضار مزغف خارج من المقهى وعينيه كايضورو بحال الشيطان ماربما يلمحها فشي جيهة


قدام الجامعة حبسات طاكسي صغيرة عليها كانت راكبة عائشة..خلصات ونزلات كاترد النفس، قلبها بالخلعة سخف وزعامتها بدات تختافي ويرجع عليها داكشي اللي دارت،

گلسات فالكافيتيريا وبسرعة صيفطات لباها اوديو يجي يديها وغير رسلاتو صونا تيليفونها اللي ماسكتش من مكالمات كريمة ..ردات عليها كاتزفر 

عائشة: ااالو

تكبات عليها: واااش حممقة نتيي قتلتيني بالخللعة عليك

حكات شعرها مقوصة حجبانها: انا بيخير..نااري والله تا شداتني الخلعة

كريمة: بالسييف اااويلي شديك الحاالة دررتي مااخفتيش ينووض يقبررك ولا توقع فيك شي حاجة

خنزرات: درت اللي خااسو يدار وبا كايگول ليا الحيلة حين من العار..علاش غاهو اللي يعرف يلوح على بنات الناس الباطل ويفارقهم مع اللي يستاهلهم، مزيان تبارك الله..انا كون صبت ندير ليه الشوهة فكازا كاملة باش يتعلم يضحك على بنات الناس 

كريمة: وطيحي عليه البااطل گلستي كاادمعي وتنخصصي تماا اشنو كنتي كاتگوولي ليه؟؟

جاتها الضحكة فاش تفكرات تمتيلها: دخلت فالدور نيت والهيلا تيقت رانا حاملة ههههه

كريمة: وآآش جاب الحمل للهضرة ؟؟.

عائشة: ههه والو والو..نتي فين مشيتي مازال؟؟

كريمة: هرربت بجلدي اختي عييت نشير لك تخرجي عندي وواالو بقيت كانتسنط شوية شفت داك بنادم خارج وانا نهرب فيحالاتي للداار

عايسة: اينا بناادم؟؟

كريمة: اينا بنادم؟ شووفي نتي نييت اختي ماخليتيني حتا ندوي ونضتي عدو كااتجري 

سكتات تترمش مقوصة حجبانها وقالت فسهوة: اجي بلاتي..عمرك گلتي ليا باللي داك الشماتة عندو نفس كنيتي

شهقات كريمة: اويلي كنيتو العوراابي؟ كاايماا كايجيك الزغبية

قلبات عينيها : علاه حنا عدنا شي عائلة بعدا بقا غير يجيني..غابا ماعندو لا تالي لا والي وماما مقطوعة من شجرة، ماكاين لا خال لا عم لاجد لاجدة

بارتباك قالت: و و يقدر يكون ولد داك السيد اللي سكنتو عدو يااك عدو الولاد

هزات صوتها: لهلااااا يحييه انا عمي خاصك تشوفيه كي داير شمنك اصواب وياكلام..اما مو خلاااص ويطلع هادا ولدهم ؟؟؟ واخا تكون مرضعاه كلبة

كريمة: وارااك غلطتي فالنمرة يااعييشة غلطتي

ردت: أولا عااائشة..تانيا على اينا نمرة داوية؟

كريمة: هادااك اللي مشيتي عندو...

بوبكر: السلاام عليكم

عائشة حيدات الطيلي من ودنها مبسمة لهدوء لباها وقالت: وعليكم السلام ههه

ضحك وقال: يالله ابنيتي نمشيو


ردات تيليفونها للساك وناضت شادة فيدو اللي مرجع اللور ويشوف هنا وهنا وهي جنبو ساقلة وتعض فمها حابسة الضحكة فاش تتفكر عملتها السودة.. عينين بوبكر اللي مازگاوش من هنا وهنا, الجامعة فالصبااح مللي جا يقيد عائشة كانت شبه خالية مابرگگ فيها ماوالو اما دابة رجعات كاتصبب بولا وبنات منهم الكبير ومنهم المراهق وغير يشوف شي وحدة واقفة مع ولد يخنزر ويبدا بفمو يتمتم استغفر الله العظيم من كل ذنب عظيم، اما لاساف حس المقزب والتزيار هاديك حاجة خرا والدخان من نيفو كايخرج واللي زاد مزندو هو بنتو اللي وسطهم كاتقرا..نوارتو اللي بيديه زهرها وسقاها، دابا حطها وسط ناس ماشي من سهمها وخايف لاتولي وحدة بحالهم وتبغي تعري وتزير ودوي مع دا وداك
شاف فيها بنص عينيه كايحنحن بصوتو الحرش مطلع حاجبو ويخنزر فكل دكر داز من حداه: قريتو شي حاجة اليوم

وساعو عينيه والعرق فجبينها كايتصببط: ا الا ابابا

قوصهم وشاف فيها: وعلاش؟ مللي ماتايقريوكم والو علاش يگولو ليكم تجيو االعب الدراري هادا
ردت: ا الا ابا غير هو دابا الاستاد تعطل وحنا بقيتا فلومڤي ..ا زعما القسم بقينا فالقسم كانتسناو..ا ايوا سالات الحصة وخرجت صونيت علك

ضور وجهو مكملين الطريق و مزير حجبانو..وصلو لطوموبيلتو طلعات بلاصتها وهو لمكانو وديمارا غادي ويخمم 
..اللي عندو البنات همو مامات وهم بوبكر تقال فاش شاف الناس اللي كاتشوف كل يوم وغاتبدا كل ساعة تقرا معاهم..ماهموش باللي طينة الانسان هي الاهم وافعالو اللي كاتزينو من برا، همو هو هاد التفتح الخارج على اللزوم اللي صبح فالانسان، ممتعصبش دينيا ومافارضش على مرتو وبنتو لا حجاب لا نقاب باغيها هي وريها هي وشوارها وعينو اللي يكساب هي بنتو الوحيدة عائشة..لكن الوضع صبح خالعو والوساويس كاتلعب عليه..انو شي نهار يلقا بنتو تبدلات..وولات تابعة التصاحيب والولاد واصحاب السوء حتا تصبح غارقة فيه للقاع

عائشة: بااباا..باابااا

ضار ليها ملهوط: ه هاا؟ 

عائشة: راه وصلنا وفتي الدار مالك سهيتي

فرانا السيارة وهي حيدات السمطة كاتسرق منو الشوفات وقبل ماتنزل قال بهدوء مضيوم: طلعي ابنتي للدار انا غانمشي نجيب لبنا ماناكلو

باست ايدو وقال كايتنهد: الله يرضي عليك انوارتي الله يرضي عليك

بسمات ونزلات راجعة لدارهم اللي فاتو وهو كدلك نزل سد الباب بالساروت وتم غادي يديه ورا ضهرو كايخمم وساهي قدامو فالطريق
..الطريق اللي منو جاية سيارة بلال وفيها كان راكب عاقد حجبانو شوية وساهي حتا هو ..وقف بوبكر فبلاصتو كايحقق فيه ويشوف واش هو ولا لا فحين بلال فرانا ونزل كايحك حاجبو وجاي على رجليه ماشافوش بتاتا.. كحل بوبكر بالعما وكشاكشو طلعو ضار كايقلب منين يدوز ويغبر، عاد خطا خطوة هو يسمع تصفيرة مجهدة وإسمو وراه خلاه يسد عينيه مغدد ويتمتم: صبحنا على الله والنبي رسول الله


ضار لقاه عاد كيف وقف وراه وقال مخرج فيه دوك العينين: ااشكااين شبااغي

حنحن بجدية وبملامح جامدة قال بهدوء: بغيت نطلب منك السماحة..البارح ماشي بلعاني ضربتك ولكن زربت ومافكرتش مزيان..سمح ليا 

طلعو ونزلو مخنزر نافخ صدرو للقدام واللي فيه ماهناه حس الشعرة مايحملها فيه
..بلال طلع حاجبو وبسم شوية كايشوف فيه..عارف طينتو كيف دايرة وعارف راسو دوزها عليه بالمعقول فاش كان مراهق ..

بسم وقال بمباغتة: واراه قلبك كبير زعما وتتسامح دغيا ..ديرني تانا بحال ولدك وسمح ليا 

بسرعة رد: الله ينجيني تايكون عدي گرن بحالك

طلع وجهو كايضحك وبوبكر قال منرڤس: دابا طلقني راعدي مايتقضا

ربع ايديه بضحكة و قال: من هنا اسيدي ممحرك الى ماسمحتيش ليا 

رد : على اينا وحدة اولدي..ديك الحرقة اللي گبصت وراها يدي شهر ولا التفليقة اللي هااهي باقا ببانظتها ولا على زباالك اللي دوزتي عليا، غااگوولي اينا وحدة فيهم

حك رقبتو مبسم وحشمان منو: واكنا صغار و غير كانضحكو معاك وسع قشابتك شوية 

رد: كاضحك معاايااا؟؟..علاه الضحك عدك هو تخلي بنادم تاايقيم الصلاة وتلوح عليه الحرام ديال القنبول وجهك هاداك وگفاك بغيتي تسكت ليا القلب 

رد كايطنز: شوفها بعدا من الجانب الايجابي، حتا كون سكت ليه القلب غاتمشي راكع موضي من صلايتك للجنة نيشان هههههه

مصبرش وطلقها ضحك، بوبكر شاف تاشاف حرك راسو بلا حول وبغا يدوز كونما هو اللي شدو: هههه غير ضاحك والله اعمي لاراك عزيز عليا

تنتر منو: وحييبد عليا الهيه مانعزااز عدك ماتعزااز عليا

بلال: واصاافي اعمي سمح لينا راه ولينا جيرااان زعما وعار الجار على جارو.. ياك؟

سكت كايخنزر بطرف عينو وكايبرد السوق شوية حشومة يدير راسو فراس البراهش حشومة..خنزر فيه بجنب عينو وقال بصوت خرش: تاتعرف شي سناك هنا؟

بسم وقال: كانعرف واحد كايدير داكشي ديال الدار، نقي وبنين ولكن جا فالدرب التحتاني..انا نوصلك زيد

شاف فيه من الفوق للتحت: و تاماعدك شغل؟

تنهد وضحك مفقوس: ااودي دعوتك خرجات فيا هههه طلع طلع


طلعات للدار نيشان حطات السكادو ديالها فالبيت دارت الطيلي يتشارجا وخرجات تاني للصالون،خدمات التلفازة تتفرج وتتسنا باها يجي ومرة مرة ترمي عينها للزنقة تشوف الغادي والجاي
درب سلطان كأي درب شعبي فيه فين تسقي عينيك وتمتعيهم التواتز لا من البنات والا الدراري، اكترية لاكانو ولد الشعب الدم الحار والكلمة الحرشة .. حتا كاتسرح فشي حد وفيه تسها بلا ماتشعر ولا تدرا كاتلقا صورتو كاتصور قدامها وعينيه المجبدين وصغوريتهم فاش تايضحك..زارتها الغمزة اللي غمزها وهو مدعها وصط ايدو والغمزة اللي تغمزات فأول نهار حطات رجليها فكازا..حلات عينيها شوية بشوية تتفكر العينيه، الطولة والتجريدة والشك واكلها من ساسها 
...التلفازة شاعلة قدامهة. الناس برا غادة جاية والجارات منهم اللي مجموعات قدام الدفة ..الا هي، بقات مبلوكية تتتشوووف وضرب أخماس فاسداس..بصدفة ضارو عينيها لدار تاج الدين وخرجو فاش قشعات الموطور كحل محطوط تما..نفظات دماغها فيساع وبدات تتمتم

عائشة: لا لا ااويلي لا..ويلي لا

ناضت فحالها للكوزينة تشرب وتسرح الحلق اللي نشف ليها بالخوف

.......

دخلو لمطعم بسيط فيهم كراسي قلال معدودة وتبسيمة بلال سابقة تخنزيرة بوبكر..يضور يضور ويطلق القرطاس خصوصا فاش يشوف شي حد وقف على بلال وبدا يسلم باحترام كبير وهو تواضعو وقشوبيتو معاهم تاتخلي النفس مرتاحة ليه
.. إنسان طيب وقلبو بيض مكايعرفش يشد فقلبو ولا حس الكره شناهو وواخا يكون فقمة العصبية يمكن بدورة وحدة يرجع ضاحك متناسي الموضوع ومخليها فيد الله

وقف على الكونطوار وقال كايحنحن: با العربي

طلع فيه الراس راجل كبير فالعمر رقيق تابانو عضامو والشيب فلحيتو ..زادو تكمشو ملامحو فاش بسم ببشاشة لبلال وقال بفمو الممحي من السنان

با العربي: مرحبا مرحبا بولدي بلال هههه آش حب الخاطر كيف ديما تاني هاا

ضحك بامتنان وقال: كيداير بعدا كيغادي مع الصحيحة شرفتي ولا مازال شاد

با العربي: من فضلك اولدي بارك الله وفيك وفالوالد الله يطول لينا فعمرو راحناا بيييخير ومك حليمة تاضل تسول عليك

بلال: الله يحفظك ابا العربي وصل ليها سلامي 

با العربي: مبلغ ههه آاش حب الخاطر

ضار شاف فبوبكر وقال: عمي شنو تاخد

حنحن مقرب عندهم وقال: السلام عليكم الشريف

با العربي: واعليكم السلاام

بوبكر: عطيني واحد ربعة الكسكروطات ديال الكفتة مشوية.. وواحد قرعة الموناضة وشي جوج كواعط ديال الفريت


بلال طلع حاجب باستغراب وبا العربي قال: مرحبا اسيدي مرحبا دابا يحضر

بوبكر: الله يكبر بيك الشريف 

بلال: زيد نبركو بينما وجدهم لك

تبعو للكراسا، گلس حاط تيليفونو وسوارتو قدامو وبوبكر حداه شاف فيه وقال كايحاول يحيد بيناتهم التشاش ويقاد الخواطر: هي صافي نويتي تسكن فالمدينة

رد عاقدهم لبعيد: الى كتب الله

بلال: مزيان..بعدا جيتي بوحدك ولا جايب معاك المدام

تفكر عائشة هو يخرج فيه عينيه: تاسووقك ..اييه جاي مع مررتي اشمشالك

طلعو ونزلو: آه آه آه على نقشة الله يستر ههه برد برد رالطونسيو غايطلع

هز فيه صباعو بجوج: نتا غااطلع ليا السكاار والملحة والزييت خلي علك بنتي فالتيقار..اداااك بو بنات فرق علك بنتي ولا را مغايعجبك حال

بقا مهدن فگلستو وباستغراب قال: علاش نتا عندك البنات؟

رد: شمن بنااات؟؟

جاتو الضحكة: دابا گلتي بنتي

خرج عينيه كايتمتم: م مررتي گلت مررتي شمن بننت 

بلال: عمي زگي معايا عافاك وبرد. تادابة ماگلنا والو نتا اسيدي ماعدك بنات هههه صافي بردتي

بوبكر: عرفتي ااش دير ..دااك الشوااا كوولو تانييت تاكل فيه جغدييد

ناض وخلاه كايضحك ويدور فراسو بلا حول..ناض مهدن هز مسائلو ومشا للكونطوار قال: با العربي.. داكشي وجد

بدا كايجمعو فميكات: هاهو منضي هههه

جبد بزطامو خرج ربعة الزرقات، طواهم وحطهم على الكنوار وهز داكشي: الله يحفظ وسلم على الميمة

خرج وخلا العربي من وراه كايدعي ..شاف هنا وهنا هو يبان ليه غادي قاطع الشانطي كايتمتم و يديه ورا ضهرو ..ضحك وتبعو بشوية كايعيط ويعاود وهو حلف لاضار


رجليه برجلو تاوصلو للدرب مد ليه الميكة بلا كلام وزاد خلفة لدارهم ..دخل وخلا بوبكر غاكايشوف حل ديك الميكة وضرباتو ريحة الشوا مجهدة رجع سدها عاقدهم وتمشا تاهو لدارو معاجبو حال أنو يخلص عليه، ومالقاهاش من الصواب يدق ويمدها ليه قدام والديه اللي تايحتارمهم ولو انو فرطوطو ولدهم

بلال طلع للفوق داز على الصالون فين بارك باه هاد الاخير غير شافو حيد الپيسي وقال: أمضرااا؟

دخل للكوزينة: ممممم

تاج الدين: كيفاش امممم

حل التلاجة جبد منها قرعة باردة طاح عليها طيحة وحدة وغير ضار لقا باه واقف قدامو

بلال: غاتوحلها لينا اصاحبي

كمش حجبانو: مالك معصب

بلال: ممعصبش..نتا معصب؟

رد: لا

بسم ليه: مزيان
رد القرعة وضار عندو طبطب ليه على كتفو وتم خارج يطلع لبيتو

تاج ضور معاه عينيه: ايه ايه ايه ااجي بااقي مدوينا فداكشي

جاوبو بلا مايوقف: گلت غانتكلف هي غانتكلف رتاح الواليد

دخل لبيتو سد وراه الباب وتم غادي للسرير ..جبد تيليفونو مقوصهم كايدوز أبيل وحطو فودنو..رجعات ليه التغوبيشة ورجعو ملامحها الكادبة لدماغو نيرڤاوه تاني وفخاطرو بدا يتحلف

خالد: الو

رد: خرجتي ليا الڤيديو

خالد: وعليكم السلام..الحمد لله دابا راك مبرد عرفتي كبيلة كيف كنتي اعاافية وشعلات

بلال: واطفا نتا وگول واش خرجتي الفيديو

ضحك وقال: مشيت للكافي وطلبت السيدي ديال الكاميرة اللي كاتصور لداخل.. هاني دابا كانتفرج فيهم

بلال: مزيان ..قطع اللقطة فين بانت وسيفطها ليا..وحنزز مزيان لايبان لك هادا اللي مسيفطها

خالد: صاافي تهنا هههه باطل أسود بيوم أبيض زهرك واعر

رد مغدد: من داكشي الرفيع..خاصها غير طيح بين ايديا وتشوف زهرها هي كيداير

خالد: دابا علاش غاتكون دارت ديك الحالة كاملة زعما بصح مكاتعرفهاش؟

فرس سنانو بعصبية: يا شي حد سيفطها..يا كاتفلا "سكت شوية وقال" واخا مبايناش فيها برهوشة

خالد: من دوك الفعايل راها برهووشة "سكت وضحك قائل" با با با اتيتيزة هاا ههه الشعر والخديدات والفي..

قاطعو مغوت: تجمع الميكروب مالك ماتاتفرق بين الضحك والمعقوول 

رد كايضحك: واتيتييزة من دوك بريئات بنت مامب..والله كون ماشفت بعيني لاتيقت

بلال: سيفط المرض دغيا وكولها تاگاع

قطع ولاحو على السرير عاد ضار كايحيد الشوميز ديالو ..حل الپلاكار جبد تيشورت بيض وشورط گري خفيف حطهم على السرير وبدا ينصل صدايف الشوميز مصغر عينيه ودماغو كايفكر


سي بوبكر حتا هو دخل لدارو ولكوزينتو، حل ديك الميكة وجبد الطباسل فين يحط الكسكروطات ديال الشوا بالفريت والريحة منتاشرة فالدار كاملة، واصلة حتال عند عائشة اللي كانت مقردة فالارض قدام بلاكارها تاطوي فالحوايج اللي حلفو لاساو ..خشاتهم دغيا تاتكمل اللي بقا وخلاتو محلول يتهوا شوية، ناضت لبسات پانطوفتها وتمات نازلة عندو ومع الدخلة شمشمات وقالت: الللله ههه توحشت القطيبات ابا الله يعطيك الصحة

ضحك وجهو المكشر تاتكمشو جناب عينيه وتسدو

بوبكر: يااشتي لاتگولي باك متيتهلاش فيك

عنقاتو من اللور بامتنان: مكاينش اللي كايتهلا فيا قدك ابا..لهلا يخطيك عليا

رد متنهد ببسمة: الله يرضي عليك ابنيتي "ضار باس ليها راسها ورضاتو عليها ديما ففمو ..هز الطباسل مدهم ليها وبابتسامة شداتهم" دي هادو ابنتي للصالون وانا غانجيب الموناصة والكيسان 

عائشة: واخا ههه

خداتهم للطبلة اللي فالصالون ..حلات السرجم تدخل شميشة ربي وگلسات عاطياه بالضهر، الطلامط ملاسقين مع الحيط والسرجم محدور ملاسقها نيشان..

...

نزل التيشورت على كرشو وبخطوات تقال مشا وحل السرجم يتنفس شوية الهوا ويقاد المجاج اللي تزاوط ليه فهاد النهار..نهار بدا كحل من داكشي المعتبر وباطل صحيح تلاح بين رجليه

شاف لقدامو نيشان وصغرهم بتعجب فالبيت الانتوي اللي كايبان قدام وجهو مباشرة وحوايج ديال البنات مزلغين تايبانو ليه..منهم شوميزات ودجينز وكسيوات موردين الوان واطوال، خلاو حاجبو يطلع والفضول فدماغو كايزنزز
..سمع الدقان فباب غرفتو وقبل مايدور نزلو عينيه لسرجم الصالون ديال دار بوبكر ولمح شعرها اللي تايبان منو شوية..تقادات بلاصتها فاش جا باها وتسوخرات كتر حتا صبح شعرها كلو كايبان قدام انظار بلال ..اللي ضار بهدوء جيهة الباب حلو ولقا باه مخنزر فيه ومزير تيليفونو 

غمزو وايديه فجياب الشورط: مالك؟

رد بعصبية: ممااليش ..ماالك نتا وماال السيد اللي سيفطت معاك ضاربين الطم..ساكتين على خزيت بالسلاامة غير گول گررر ماحد الهضرة ماوصلاتنيش من شي قرينة هرا

بلال: باغي تسمع شي حاجة ماتعجبكش؟ 

تاج الدين: ديرها غازوينة توصل توصل

رد: بااقي مادرت عاد ناوي

تاج الدين: اشناوي دير بالسلامة

زفر وقال بنبرة تقيلة جدية: الواليد..درنا صفقة بيناانا ياك؟ انا غانجيب لك كونطرا مع ديك الشركة وكونطرا صحيحة.. ونتا ..غاتعطبني الطوموبيل اللي شريتي الصيف الفايت ..زممنا وتافقنا دابة لاش مصدع ليا راسي؟

سرط لسانو مغدد ورد: واخا هاهو ساكت..الله يحضر السلامة وصافي

بلال: أمين

ضار تاج الدين نازل وبلال وراه بعدما سد بيتو..حنحن وقال مقوصهم بحيرة: بغيت نسولك..داك عمك عندو البنات

ضار ليه بحال الجن مطلع حاجبو: علاش كاتسول؟

ضحك وقال: بغيت غير نعرف مالكم واش منسولش؟

تاج الدين: يسولو كاملين إلا نتاا

طلع حاجب: علاش؟

تاج الدين: حيت بو بنات..بعد من عمي راه غايتيري فيك

مشا وخلاه بلاصتو ..تبعو وقال: هي عندو البنات


تاج الدين: ونتا اش مشالك

دار راسو مسمعوش: ولكن زوينة "ضار عندو وبلال گلس"غير من شعرها باينة متوتزة

بحذر هز فيه صبعو" اهيا اهيا راه باها باقي مكتعرفوش مزيان بالله تايتيري فيك

بلال: هههه داك عمك واللهيلا مضروب فراسو 

گلس قدامو وهز البيسي تاعو: عطي بالتيسااع للسيد را والله ومشا تاشكا بيك لاتدخلت مانعرفك ماتعرفني

بلال: عارفك اسي العورابي عارفك الله اودي

تاج الدين: واهاودني

تحل البابودخلات هيام هازة تقدية وبالعيا تتنهج ..حيدات المونطو الخفيف وسرحات شعرها بصباعها

هيام: بلال

بلال: وي "حط التيليكومونض وناض عندها..باس على راسها وهز داكشي للكوزينة تليقلبو

بلال: عاد ناوية ديري الغدا !

دخلات عندو تتگفض: طفيت عليه عاد خرجت..درت الگغاطان اللي تايعجبك وپيتزات صغار

بلال: مزيان..انا غانحط هادو بلاصتهم و ناخد شوية ندوقو

هيام: عاارفة تدويقتك كيدايرة تسنا حتا نحطو كلشي

ضار بوجهو عندها وهو كايستف الخضرة فالتلاجة: كرشي مكنتحكمش فيها امي 

ضرباتو لكتفو: ماما اشمن مي 

بلال: هههه ماما بنتلك عندي ربع سنين

هيام: ومالك كبرتي.

بلال: لا ههه

هيام: هاكاك ههه

غوت تاج الدين من الصالون: وابغينا نقسيو باراكة من التكركير نتي وداك ولدك

بلال ضار عندها بهمس: بغبت غير نعرف فين كان عقلك حتا ديتي هادا

تاج الدين: راه سمعتك ابن الحمار لاخر تاتخرج ونتفاهمو

بلال: والهيلا حمار على ودنين عدو اه اه اه

هيام: هههه سير سير

خدا طبسيل حط فيه تلاتة الپيتزات وكاس ديال عاصير وخرج فحالو تايضحك وباه مخنزر فيه من اللور
طلع لبيتو وسد الباب برجلو، هز الطيلي ومشا گلس فالفوطوي اللي جنب السرجم والطبسيل والكاس حطهم حداه..لقا ميساجات كتار واصلينو وفيديو جاي من عند صاحبو، خلاه تايتيليشارجا وبدا يخشي ففمو ماكلة السبوعة وحدة ورا وحدة حتا سالاهم نفض ايديه كايندغ وهز الطيلي مرة خرا مخدم الڤيديو من أول ماوقفات عليه، تايشوف ويغزز الپيتزات بسنانو ويخنزر فيها: تاع اللي ياكلك على هاد الفعايل "كبر صورتها وزاد خنزر" ولكن بنت الحرام زوينة


عائشة: بابا يالله

بوبكر: هاانا ابنتي هانا

..خرج عندها كايقاد جلابتو الخضرة على كتافو وهي واقفة تتشوف فيه..لابسة تريكو خفيفة شيبية طويلة للركبة ودجين زرق غامق مع سپادرية بيضة خفيفة ..جامعة شعرها كوت شوفال وفعنقها سليسلات نازلين على التريكو بشكل انتوي

عائشة: دابا مزيان حسن لك من داك الكومپلي ههه

شاف فيها ضاحك: ياك بعدا

عائشة: معلووم

ضحك عاجبو الحال وغير شاف فدوك السلاسل اللي دايرة بدا يمحيها: الله ابنتي اش داكشي قاجة بيه راسك

شافت فيهم: هادو سلاسل

رد وهو كايشوف فيهم: سلاسل؟..علاه السلاسل هوك تايكونو

عائشة: هادو هاكة دايرة لاموض ديالهم

بوبكر: حيدي حيدي ابنتي دوك الجوالق راغايقجوك ومتقلة بيهم عاد قرجوتك كلها غاتزراگ

قالت دايرة ليه خاطرو: وااخا ابا هاهوما 

حيداتهم ودارتهم فالساك عاد قال: الله يرضي عليك.. يالله ابنتي

عائشة: هههه زيد

نزلو بجوج للتحت و خرجو، الطموبيل مافراناهاش حدا الباب داكشي باش تمشاو على رجليهم حتال راس الدرب فين مركونة..دار ايديه فجيبو تايقلب وكمش حجبانو بالفقصة

بوبكر: الله يفكرنا فالشهادة يخخخ

قوصات حجبانها: مالك ؟

بوبكر: نسيت السوارت

ردت: فين نسيتيهم ؟

بوبكر: فجيب داك الحرامي ديال الكومبلي ..بقاي نتي هنا ماتحركيش انا غانرجع نجيبهم

عائشة: واخا ابا

مشا راجع فحالو للدار وخلاها واقفة تتشوف هنا وهنا .. داز من حداها واحد من ولاد الدرب المشومرين اللي حاضين غير هادي وهاديك 
سكاناها مزيان بعينيه وقاد الصوفيطمة مقرب ليها وبفمو الخانز قال: اافيين التوت صافاتوون

بجمود ضارت هاكا وهاكا وشافت فيه كاتشير لراسها: معايا اخوها؟


طلعها ونزلها مهبلو صوتها: بانت لك شي فراولة هنا من غيرك

خنزرات مطلعة حاجب: سير سير اخويا را مغايعجبك حال 

رد طانز: هههه اش غاديري..شوفي عطيني غالنمرة انا را ناوي المعقول

خسرات وجهها بقرف: تاتكون داير كمارتو عاد دوي عليه..گلب السيكتور الله يستر عليك

رد: تارا من هنا مامحرك لاماديتش النمرة

شافت وراه ووسعات عينيها: صافي هادشي اللي بغيتي هاهو جاي

رد: شكون جاي؟؟

ترفع من اللور بشنقة وحدة من بوبكر ودورو عندو قاجو من الكول بدوك الخباطات اللي يكساب عائشة رجعات اللور تتقفقف والدري ولا الدري يطلب ويشوف الموت قدامو: ا العاار اعمي العاار

خرج فيه عينيه بحاال قباط الروااح: يعععمي لباابااك العينيك اعوورااجة ااااش موووقفك هنا لشمكااار تاع بوووك

رد بتمتمة مقجوج: و والله تاراني ناوي العقول ه هانتا راكنت كانسول على الدار باش نجيب الوليدة ونخطب بنتك والله اعمي

داه وجابو حتا داخ وغوت فووجهو: وشكووون گااالك عدي البناات ياولد الحراام ..انااا ماااعدي بناات للشمكاار تاع بوووك ترجلتي بعدااا بقاااا لك غاتخطب بغيتلك خبااااااطة تخبطك

الدري ولا باغي غير السلاكة من يديه ووجهو رجع حمررر: ا اااه المدام ديالك هادي ههه م ماعرفتهاش والله ماعرفتها سمحليا اعمي سمحليا

بغا يبوسليه كتفو ودفعو عايف' كحز علياااا فمك الخانز لهيييه الله يتبعك للبلاااا

عائشة شدات فيه كاتبرد السوق وقالت: صافي ابا يالله عافاك بلا ماتعصب راسك معاه

هز فيه صباعو كاينهج: والله ونعااود نشووفك كاتبسل على شي ولية حتا نجيب العتلة ونحفر ليك داك الراس كتر ماهو متقووب "غوت تاقفزو" كاااااتسمع

حرك راسو ومشا تايزرب يدور يدور ويشوف فيه حتا تساطع مع عشيرو: ههه ابشويا علك مالك مخلوع

جاوبو كايلهت: نااري اساط واحد الشاارف مصطي ماتفكيت منو غابزز

-...: تاشكون هادا نمشيو نغيزو ليه

الدري: الا لا هادا راه ولد الدرب عاد سكن

-....: عاد سكن؟ فين هادشي

الدري: على ماسمعت راه من فاميلت ولد الدار الكبيرة

وسع عينيه بهلع: ومالقيتي معامن توحل غامع فاميلة بلال بغيتيه يقبرك

الدري: وماشي معاه مع مرتو 

....: نااري قودتيها

الدري: تارا ماكنتش عارفها مرتو عرفتي كبدايرة ويلي ويلي

غمزو وقال: كيدايرة؟

جمع صباعو وباسهم: قووقة ومتوتزة..ولكن داها الشارف 

....: هههه زهرهم اخاي زهرهم

الغظري: يالله تهلا نمشي نشرب شحفت

....: سيير سيير ههه

مشا فحالو مرعود وخلاه كايضحك ويضور راسو مكمل طريقو حتال حدا مول الحانوت فين واقفة شلة الدرب.. منهم النقي ومنهم المبلي جامعاهم حومة وحدة وولاد سيكتور واحد..سلم وكان بلال جاي فالطريق بلا ماينتابه ليه وبدا يقول: ادرااري ههه عصيبيصة كلا قتلة تاني اليوم فراسكم علاش؟


بلال: ارا شي قرعة هاواي باردة 

مول الحانوت: هي اللولة

مشا يجيبها ليه وبقا هو واقف كايقرقب صباعو مع الكونطوار حتا طاحت فودنو: مع من بعدا؟

رد عليهم الدري عاطي بضهرو لبلال اللي داير معاهم ودنو

الدري: مع داك الشارف اللي عاد سكن فالدرب ههه

...: وشكون هادا؟

.....: سكن فدار مي عيشة اصاحبي ههه

....: اوااه اللي من فاميلت العورابي هههخ مسخووط مو هاداك

الدري: ههه مسخوط مو وباه تا كون عرفتي اش دار بعدا

...:اش دار؟

الدري: تبسل ليه على مرتو هههه ماحسو حتا شنق عليه هههه

....: سالا من برهوشات افين وداز للميمات

الدري: ااشمن ميمة راختك قدامها تبان مها

....: ايه ايه ايه اجااب ختي للهضرة

الدري: وغامتاال اساط مالك شعلتي..الدرية بااقة صغيرة وتيتييزة ولايني داها الشاارف ههه

....: بقات فالشيب تارالموطور هو كلشي

الدري: الموطور عدنا حنا اما هي مسكينة تلقاها كاتقدي غالبشمع

بلال خبط يدو على كتفو: هوا اللي غانبركك عليه اولد زوبيدة


بداو كايكحو الدراري ووقادو الوقفة شي تفرتك لدارهم وشي بقا يتفرج والدري مول الخبار دار عند بلال بوجه مخطوف وضحكة صفرة: ه ههه خويا بلال

خنزر وطلع داك الحاجب حتال السما: عاود شنو گلتي شكون هادا اللي تبسل؟

الدري: و والله ماأنا اخويا بلال عصيعيصة هو اللي دار

جرو عندو مزيان تاتهز من الارض ملااوط، شاف فيه من الفوق للتحت كلو رقيق مافيه مايهز الدقة اصلا وفمو كاياكلو ...خنزر كتر وقال بنفس حارق: غانعاود نسمع فمك جبد شي حد من عائلتي..غانجي حتا لداركم ونهبط لخويا السروال "غمزو" ياك فهمتي

والرعدة شاداه جاوب: ف فهمت اخويا فهمت

....: خوويا بلال واش غاتدي على هادا صاافي اصاحبي طلق الميكروب

الدري: الله يرحم الواليدين اخويا بالله تاكت غاضاحك

دفعو تارجع اللور: روول يالله

....: فمو كاياكلو اخاي ماديش عليه

ضار للحانوت بلا مايجاوب حد هز القرعة بالنترة وبدا كايقلب حتا بان ليه دري صغير دايز صفر ليه وقال: دي هادي للدار وگوليهم هانا جاي

مشا الدري كايجري وهو ضار من الطريق لخرا غادي لخزيت، وقفو اللي كانو باركين وقالو: نمشيو معاك نربيوه اخاي بلال

رد بلا مايصور: مايتبعني حد

گلسو بلاصتهم ودار واحد عند لاخر: قودها البرهوش عمرو مازال يدور بشي وحدة هههه
....
فدار سفلية فوقها باقي طوب وبابها قزديق..خبط جوج خبطات تا تزعزع وسمع صوتو كايغوت من الداخل: اماالنا على الخبيط واخا تكوونو الحناااش

حل وقبل ماطلعو الصدمة شنق عليه ودفعو لداخل دارهم على الحيط ووجهو كايخلع قدامو: البنت اللي وقفتي عليها اليوم

رد مخنووق وضهرو وراه مقسوم: عمرري نشووف فيها بالله تانقلب السكنة انا گااع اخااي بلال

رد كايفرس سنانو: ياغاتجمع معايا.. ياعينيك غانجبدهم ليك

حرك راسو بسرعة قرب يسخف من التزييرة اللي دار ليه، دفعو من يدو جا طايح كايكح ويرد النفس..وهو خرج من تما قاصد دارهم والعصبية طالعة ليه من بعيد كايبان ماشي على برجو..وصل للباب وصونا ليه الطيلي وقف وفتح الخط: الو

...
طوات ماتبقا من الحوايج وسدات البلاكار كاتتنفس براحة..ضارت للشرجم حلاتو والهوا داخل يهوي ليها البيت ..شافت الفوق وللتحت والجنب بسرعة ردات عينيها للتحت وعينيها بالصدمة كايوساعو حتا قربو يخرجو


طلع راسو صدفة وتخبات بسرعة كاترعد بالخلعة فحين هو عينيه تقوصو وقال: صافي خلي حتال غدا دابة مشغول

ردت كاتحلون وصوتها رقيق هامس: ومالك معصب

زفر: ممعصبش اسارة ساعة لله

سارة: ممم هي لقيتي البديل اسي العورابي

رد: بلوكيتك؟

ضحكات برنة: لا ههه

بلال: ادن باقي

قطع وحل الباب طالع لدارهم.. عائشة زادت خرجات عينيها فداك الباب وماحسات الا وهي نازلة لتحت كاتعيط بالجهد

عائشة: بااااا..بااا

خرج عندها كايجري هاز معلقة باش كايحرك الروز ومخرج عينيه: ااشكااين مااالك

ردت كاتمتم: و و ولد خوك

زاد خرجهم: مااالو!!!!!؟؟؟؟

عائشة: عندو ولد كبير طويل شعرو مازعر ماشهب مگلضم وزين فوجهو؟

زاد خرج عينيه وقالت بسرعة متدارية شنو قالت: غ غير ح حيت ديك المرة فلافاك شفتو وماعرفتوش

بوبكر: دواا معاااك؟

نفات بايديها بجوج: لا لا لا مادواني ماحاداني

هز فوجهها ديك المعلقة حتا طارت عليها حبة ديال الروز: نهااار يجي يدوي معااك عطييه حتا يدور ودوري ليا نجي لييه..انااا غداااا عالنبووري غانمشي نبدلك من ديك لفااك ماااتبقايش تم

ولات حمرا وتترمش لتحت: ويلي ابا ا اشمن فاك راه سميتها لافااك

غوت كايشير بيدو: فاااك مااتسوا ماتصلاح غاملي كايقرا فيهااا دااك فرطوطووو

عائشة: لا لا لا راه ماتايقرااش تم غير جا صدفة والله ابا متايقرااا تم

سكت تاينهج ورجع قال: وتعااودي تشووفيه گوليها ليااا

عائشة: ااه اه والله

ضار للكوزينة كاينهج ويبرگم وهي جرات حنكها البكية شداتها: ناري قفرتها قفرتها دعيتك الله اكريمة هءهؤ

طلعات كاتخبط فالدروج وتويل الشوهة لاشدها شي نهار وطاحت بين ايدو..تادابة كيفاش مايشدهاش وهي ساكنة غير قبالتو الدار مقابلة مع الدار


داز هاد النهار وجا نهار جديد مليئ بالاحدات
..وقفات طموبيلت بوبكر قدام باب لافاك نزلات منها عائشة بشعرها مكريبي كل شعرة ولابسة شوميز دجين گري طويلة كالعادة مع دجين زرق وسپادري بيضة وساكادو خفيف فالظهر

بوبكر: يالله ابنتي

باستغراب: ف.... قبل ماتكمل لقاتو غادي سابقها ايديه ورا ضهرو..فوضات امرها لله وتبعاتو غادي داخل بيها للجامعة والأمر كايحرجها قليلا خصوصا نظرات الطلبة مللي دخلات للومڤي وهو داخل معاها..رجعات حمرة وماقدات حتا تهضر معاه ولا تگول ليه راه غير قانوني

بركات ساكتة وقال مخنزر هاز صبعو: لا عاودتي شفتي داك خينة عيطي ليا ياك ابنتي

عائشة: اه ابا صافي غير سير

بوبكر: الله يرضي عليك واقراي مزيان

مشا خارج والبعض وراها بدا يضحك ضارت خنزرات فيهم مزياان عاد تلفتات فاش دخل البروف وخرجات كتابها كاتصفي تركيزها معاه

....
نازل من الدروج للباب وليزيات بلوتوت فودنيه كايدوي فالطيلي مقوص حجبانو: متأكد تاواحد فيهم

رد عليه من الخط الاخر خالد صاحبو: لا اصاحبي تاواحد من الشلة ماسيفطها..كانت معاها بنت هي اللي بدات توشوش ليها 

قوص حجبانو وهو خارج من الدار: البنت بعدا عرفتيها شكون "بدا يلبس الجاكيط وتركيزو مع صاحبو"

خالد: لا الصراحة اول مرة نشوفها لا انا لاهوما..يقدر تكون كاتعرفك ودارت لك داك البلان

زغر وقال: صافي خلي تانشوفك وندويو فهادشي

خاليد: ا ا خويا بلال ههه صاحبي الغالي..محتاجك

هز حاجبو: واش نتا باك تايجري عليك توحل فيا اناا 

خالد: وابغا يزوجني ببنت خووه اصااحبي وااش بزز آاو

بلال: تزوج يالله تربي العقل مالها بنت عمك منك وفيك

خالد: وتاراها عمي عمي محطووط فوطو كوپي شي مرات تانگوليها عمي وهي تتفرنص

بلال: شتي ياك غير دارنا بلا ماتحلم الواليد ديك المرة گاليا ماتعاودش دخل عليا داك الكوامانجي

خالد: شكون الكوامانجي ؟

رد: انا! وا تاا ابنادم خليتك ناعس فالصالون وصوت شخيرك واصل حتال بيت الواليد والواليدة


خالد: واشوف ليا فين الله يستر عليك

زفر ودخل للدار تاني حل البلاكار المعلق فين تايحطو السوارت جبد منو پورطكلي فضي وقال: غانديپاني لك فدار عز الديك اللي فالخرجة ديال كازا

تصدم: اوااااه

هز صبعو خارج: لييلة وحدة مانفوتهاش لك راه يسيق لك الخبار بايت فيها غاخسر علك طيارة وحدة يسلخك ويرجع لشغالو

ركب فالموطو بعدما دار الكاسك وخالد تايضحك: كوون هااني اساط يتووب علك

ديمارا: فينك دابا

خالد: قريب للشاريع العام تانتجولق فالطريق

بلال: بقا بلاصتك ندوز علك

خالد: صافي سير

....
خرجات من لومڤي تاضور عينيها وباقي الجو غريب وجديد عليها..وقفات واحد البنت وسولاتها على الحصة التانية خبراتها باللي الپروف ماجاش من الصباح بسمات ليها وجبدات الطيلي تعيط لباها وخارجة برا الجامعة

...وقف بلال ركب خالد وراه ونير تاني فحالو غادي ويزيگزاگي فالطريق منينما داز متبعين ليه العين، حتا بعينين الصقر لمحها واقفة فالجهة التانية ديال الشاريع كادوز رقم فتيليفونها..فرانا فالبلاصة مصغر عينيه وحجبانو مقوصين بحدة كايتاكد ويعاود

خالد: امالك حبستي؟

رد بسرعة: نزل نزل نزل

خالد: علاش؟؟؟

مد ليه يدو: ارا ارا دوك السوارت

خالد: اينا سوارت

صار ليه مخنزر: طلق السوارت لهنا

خداهم ليه وخالد هبط قرب يبكي: وعلااش اصااحبي انا فين غانبات 

بلال: تزوج بعمك وفوتني

ديمارا وخلاه واقف بلاصتو ..ضرب دورة شرقاوية حتا وصل عليها وفرانا يالله دارت الطيلي فودنها نزل طيرو ليها وطفاه.. ضارت تهلل ساعة تحلو ليها الغينين وتصدمات صدمت عمرها ركابيها فشلو وعينيها خرجو..بسم مزيااان التبسيمة ديال حصلتي وهي هزات صبعها كايترعد طلبو وبدات تمتم 

عائشة: م ماشي انا اخويا والله ماأنا

رد : صباح الخير احبيبتي الفنة البووحاااطية " شد حنكها مزيان تاوعتها وتحت سنانو قال" امت وليدااتي اللي تتحبني بزااف..مزياان ياك صاڤا هانية ماناقصك تاخير

برعشة الخوف ردت: ب بيخير ب بغيت نگول والله ماأنا ختي هاديك ختي

شد يدها بهدوء: اجي الحبيبة دياالي طلعي نمشيو نتفاهمو طلعي

خرجات عينيها فاش شافت الموطور عرفات راسها وحلات وحلة الفار فيد مول الحانوت ومالقات الا تجر تيليفونها بسرعة وتبغي تهرب سادة جرها مدرعها كايضحك: هاالعب اللي مابغينااش شتي دابة غاتعصبيني

طلقات حلوقها بالجهد تاصمكاتو: واعتقووو الرووح اعبااد الله وااابغا بخطفني عتقوووني


عائشة: واعتقوو الرووح عبااااد الله عتقووني "الناس بداو يتلفتو ليها وهو مورك على سنانو ومزيرها بدرااعو" وااعاتقووني بغا يخطفني اعباد الله

طلع حاجبو: ساليتي؟

وقفات حداه مرا كبيرة بلابتها وفولارها تتساعف معاه: اوليدي.. اوليدي بالمفااهمة تايتحل المشكيل ماشي هوك الله يرضي عليك

تنترات منو دغيا ومشات ورا المرا تتجري وهو زاد وسع داك الحاجب

عائشة: و والله تا كنت واقفة مابيا ماعليا حتا هبط عليا كي الباطر

بسم بزز وتحت سنانو قال: بروسيطو.. الزين دياالي، ياك كاانگولك امراتي الحلوة هااد الضحك حيدييه منك راه الناس غايتيقو

وسعات عينيها فيه والمرا كمشات حجبانها مفاهمة والو والناس غادة جاية وتشوف فيهم 

المرا: اينا ضحك اولدي علاه الناس تايضحكو هوك

قبل مادوي عائشة قطع فيها الحس وقال: ههه لا لا هي دابة حاملة والهرمونات عندها مخربقين..ولات تتوحم على الكدوب

خرجو عينين المرا: هااويلي؟؟

عائشة: كيفااااااش؟ ش شمن حمل شمن انا ااصلا فين عمري شفتك

شاف فالمرا: شفتي هاهي دارت راسها عمرها شافتي.. اجي الغزالة ديالي ااجي نمشيو لدارنا ونحلو مشاكيلنا فهدوووووء تعاالي

تنترات منو راجعة اللور: وااطلق مني "ضارت للمرا" والله اخالتي متانعرفو وااشكوون نتااا شكووون

رد بهدوء كايزيد يفقسها: بروسيطوو، هانتي غاتعصبيني واش كاينة المرا اللي تتنكر راجلها حشوومة 

بداو الناس يتجمعو والطلبة خارجين ويشوفو فيهم..هنا خرجات عينيها وحماارت

بلال: تهدني ويالله لدارنا نحلو مشاكلنا تما..داابا ولدنا لا بنتنا توقع ليهم شي حاجة؟ "خنزر" دييك السااعة هضرة خرا

البنات بداو يتغامزو عليه يطلعوه ويهبطوه وهي تتبيض فيهم عينيها وبدات تمتم ماعرفات حتا شنو تگول: ك كداااب والله تا غير كايكدب هادا مااشي رااجلي ا انا ماشي مررتووو

وقف مصدوم وقرب عندها جار رجليه وتايشير لراسو: على مشكل بسيط دابا نكرتيني؟ صافي هانت عليك العشرة؟ على قبل الخلصة اللي مشاات نكرتي حبنا ونكرتيني أنا اللي درت عليك المستحيل..سمحت فأملاكي وعائلتي اللي مكانتش باغاك حيت بنت العساس و اناا گلت لاا لااا "شهقو البنات دابو وفيه طااحو بالمعقول ونبرة صوتو الخشنة المعاتبة كاتزيد الباهية" گلت اناا كانبغي هاد البنت وحراام نضيعها معاايا واخا فأي لحظة كنت قاادر نمحي لك الااتر "قرب بوجهو عندها وهي مشرعاهم فيه" نسيتي شحال كنتي كاتموتي عليا؟ وباللي عطيتيني كلشي وعلى قبلي تخليتي على عائلتك؟ نسيتي شحال من مرة كنتي غاتنتاحري على قبلي؟ صافي نسيتي كلشي احبيبتي "هبط عينيه لشفتيها ونفسو سخونة تتسارا ملامحها المدهوشة" نسيتيني؟

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.