قصة كوميدية عائلية خفيفة ظريفة ومليئة بالاحاسيس المرهفة🌸
قصة: أبو عائشة ♥️
شخصية مستلهمة من والدي، استقامة ظهري بطلي وحبيبي الأول والاخير وإهداءا ليه ♥️ بما اني الفتاة الوحيدة بين تلات دكور، كانت معاملتو ليا دائما خاصة وتربيتو وكلامو كدالك وهاد النوع من الآباء عليهم غادة نتحدت ونتعمق بطريقتي واسلوبي الخاص وكدلك غانوضف معاه الكوميديا باش تنال اعجابكم إن شاء الله .
قالوا ناس زمان:يمشي زمان ويجي زمان الجيب عامر والراس فرغان..اللسان معسل والقلب ڨطران..تولي الڨربة عود..الراي للنسا والحكم لليهود
يولي زمان مهماج وتكثر فيه لهماجة..وفي اخر زمان يعلا البنيان..وتكثر لفتان ويقل الإيمان..تقل النصايح وتكثر لفضايح..ولي جاي كثر من لي رايح
تكثر النسا وتغلا اللبسة..والقلوب على بعضاها تقسى ..يولو الرجال كي النخل والنسا كي النحل قاالو على اخر زمان يقل فيه الحياء ويكثر الريا
يولي الخير مشتت والراي مفركت..والحي يغير من الميت
يولي الخير ياسر..ومول المال واصل..ومول العلم حاصل..تجي ذرية كي المدفع.... في الدنيا ماتنفع وفي الآخرة ماتشفع
يولي الراجل هايم ونسا بلاكمايم،مابقالك في الدنيا ماتلايم
يولي كل واحد وكاسو...وكلها ونعاسوا،وكل واحد هز الهمو فوق راسوا..لخوات يدابزو كي لحناش تقساح لقلوب ولمحبة ماتبقاش..والطبة طب والناس ماتبراش..
.............
فواحد الوقت ..وقت ناس الحق والوقت الزينة..فقبيلة من القبالي .. تزاد وكبر سي بوبكر العورابي، وسط عائلة صغيرة فيها مو وباه وخوه الكبير.. وعلى الصح و الحق والمعقول تربا ورعا
عاش حياة بسيطة كإنسان بسيط وفاش كبر ووصل لتمنطاش لعام بغا انسانة بسيطة بحالو من أول لحظة شافها جنب الواد كتصبن
..رجع لدويرتهم وهو عازم للحلال معول وعلى مو لسق باش تخطبهالو.. سولات وسقسات على فصل ومفصل الدرية..وغير عرفتها يتيمة لانسب لاتالي لاوالي وقفات غاضبة لا هي لابوه قدامو.. هازة صبعها وتحلف باللي عمر ديك الولية تكون عروستها
حزن قلب بوكبر على اللي بغاها ومابغاوها ليه واليديه..وواخا هاكاك صمم وعزم باللي غير ديك البنت ماياخد
دازت عام فيها الواليدين ماتو ومول الامانة دا أمانتو ..زادوه حزن على غبينة واللي زاد طيح ليه الحيل هو خوه اللي هرف على الورت وخلاه الله كريم مايكساب مايعلام ..وحيت بوبكر رجل عندو العائلة فوق كلشي ومحتارم موت باه وميمتو مابغاش يوصل معاه للقضاء ودعاه لله ياخد ليه حقو
..خدم لوحدو ودمر حتا دار شوية الفليسات ورجعات عندو عشرين عام ..وحتا قلبو رجع كايفكر فالمرا اللي بغاها والوقت نساتو فيها
..قصدها وحدو ومقصودو الحلال، لقاها يتيمة فحالو ومايعلم بالقلب غير القلب اللي فحالو
..قبلات عليه وقبل عليها وكانو الراس على الراس ضد الزمان ..هي بوه ومو وخوه الطماع اللي دفنو معاهم ..وهو ليها جامع كلشي ..
دازت يوم ورا يوم شهر بعدو شهر وعام جايب معاه عام حتا فات على زواجهم عشر سنين لا ولاد لا جوج..ماخلاو طبة ماخلاو فقهة ماخلاو حجابات ..حتا بداو اصحاب الحسنات كايحلو فامهم ويوسوسو ليه يتزوج على هاينة ويجيب مرا تانية تولد ليه ..طنش مرة وجوج غضب وبعد لدويرتو مابقا ليه فين يخرج قدام فام عباد الله
ناض ووگف وگفة وحدة قايل لمرتو بصرامة: نووضي دروك جممعي شرااوطنا غانرحلو من هنااا..مابقا عدنا مانديرو مع هاد القوم
وكان قولو فعل..وفعلا رحلو ..رجلها برجلو مدينة بمدينة حتا شدو الرحال لدوار حد السوالم ..حط رحالو بين ناس جداد مكايعرفهم مكايعرفوه، شرا دويرة على قد الحال وارض جنبها يزرع فيها مايتباع ومايتكال ..
بدا بالقليل وبيه بدا يعلي ويكتار الخير ..عمرو عطا راس الخيط لشي حد ولا عرفوه شكون هو ..وعمرو ضسر عليه شي حد باش يسولو علاش باقي ماعدك ولاد؟ واخا عاد وصل لتلاتة وتلاتين سنة ولكن عشر سنين بلا تريكة كاتقطع ليه القلب وتخليه كل ليلة تحت سما تسيدي ربي راكع كايدعي ويطلب الدرية الصالحة فأقرب
حال..ومرتو هنية كاتسمع ودموعها على خدودها سيالة
حتال واحد النهار..بعدما مرضات هنية ورجعات شادة الفراش بالسخفة، قرر باش يديها للطبيبة ديال القبيلة ..فحصاتها وزفات ليهم خبار وااشمن خبار..وهي انو مراتو هنية، حاملة، وقريب تولي عندها وليد ولا بنية
وواخا هاكاك جر مرتو ومشاو للمدينة قلب على الكلينيك المخير ودخلها دير التحاليل تما باش قلبو يزيد يهنا ويرتاح..واللي كان كان ..انو فعلا غايولي اب بعد گاع هاد السنين
فرح وفرحتو مايعطيها لحد..رجعات هنية بحال السلطانة وعلى الما القليل كاتمشي..الطيااب من يد شكون؟ بوبكر ..الصابون من يد شكون؟ بووبكر ..التسياق من يد شكون؟ بوووبكر ..الحرت والزرع وخدمت الزنقة من يد شكون؟ بووووبكر ..
رجع منو هنا وهنا ويااخوفو تنوض تململ من مكانها، عد بالو الوليد غايتقاص ولا غايتقصح ولا گاع يموت، واخا عيااو الناس مايفهمو فيه ويگولوليه ياللي المرا الحاملة مزيان ليها تتحرك، لكن اللي فدماغو رااه فدماغو وراسو كتر من الحجرة فالقصوحية وحتا هنية فرييو متبعاه لايزعف وزعافتو عليها خايبة
شاف فيها كاينفخ وتم خارج كايبرگم..هز السطيلة من المراح دخلها لبيت الما فين كاينة بوطة صغيرة فوقها مقراش حديدي تقليدي وكبير..عمرو بالما ودارو يسخن وخرج طل عليها مرة خرا اللي فيه ممهنيه..لقاها بركات كاتحرك يدها فوق كرشها هو يقفز من بلاصتو ومشا ليها كايجري ويتفتف: ا اشنوو غاااتولدي يااكما ضااراك
بوبكر: تغووتيش راغاتخلعي الدري ونعسي نعسي لاتفيقييه "عوجات فمها وهو خرج كايستغفر ويشد لساانو المليط على وجه اللي فكرشها حايف يعصبها ويعصبو ..مشا لبيت الما لقا المقراش سخن كبو فالسطيلة طفا للبوطة وبرك يتوضا نية صلاة الفجر ..غير غسل رجليه تلاتة المرات ضار للطواليط البلدية عاد حيد سرواالو يبول هو
يسمع غواتها اللي واصلو لداخل..تحلو عينيه ويديه طلقو السروال وخرج كايجري هوكاك كونما الجلابة اللي سترات ماستر الله، كايجري للبيت وسروالو كايعكلو حتا دخل عليها ولقا شي جارات عندها تما سمعوها وحلو باب القزدير ودخلو، شافوه وحلو عينيهم كايتفرجو فالسروال الطايح ووجهو المخطوف منو اللون على فمو كللمة
وحظة: غااتولد واااش صاافي غااتولد؟؟؟
الراجل 1: يااسي بوبكر گلس راغادوخ بالمشي والمجي
الراجل 2: نعل الشيطان اسي بوبكر راكلشي غايدوز هو هاداك
الراجل 3: يااودي ماترفد هم اسي بوبكر المرا عدي والدة قشلة ديال العتارس راها كاتنقز بحال بوفالة ماوقع ليهم واالو المضروور هو تا سحابك التريكة سااهلة ههه
الراجل 4: كايتزاادو برزقهم اسي جامع مالك سااير تخلع فالسيد
الراجل 3: انا غااگلت
الكلام من هنا وهنا وبوكبر ماهوش اصلا هنا..السروال حيدو ولاحو لشي قنت وبقا بالجلابة غادي جاي عليهم حامية فيه البيضة وقلبو حامية فيه العافية اكترية من صوت غوات مرت..هي تغوت وهو كون صاب يبكي..هي تبكي وهو كون صاب يطج مايرجع تايتقصا الغاراص ..وماولداتها القابلة تاتقلب ليه الراس للساس وعلى بونت
كان غايسكت ليه القلب
بعد صمت رهيب صدمو سمع صراخ ملائكي صغيور..رد فيه الروح رعش ليه القلب ورعد ليه ليدين والرجلين
..الرجال وراه ضاحكين كايطبطبو على كتفو ويباركو وهو عينيه خارجين فالخامية، حتا خرجات منها مرا شارفة قصيرة هازة تريبية مگمطة فزيف بيض مطرز ولابسة قميس كاشف هازاه من الرجلين تابان سروال القندريسي اللي لابسة
مدات ليه التريبية ضاحكة ببشاشة وهو تايترعد وقالتتتربا فعزك اسي بوبكر جاتك بنية مزينااتها كاضوي ههه
شاف فيها وعينيه بغاو يطيحو الدموع من الفرحة: هادي ب بنتي؟؟
القابلة: ومالها بنتي هههه أدن ليها أدن راا ربي رزقك قمر مضوي ما شاء الله عليها
شاف ببسمة فوجه بنيتو الصغير والرطب وبصوت متفتف ومرعد قال: ماشاء الله.. ماشاء الله على الحبيبة ديال باها ماشاء الله
قربها لوجهو متمعن فيها مزيان وهي حالة عوينااها الحور بصعوبة، كلا مرة تسدهم وتشوف فيه وتلعب بفمها الحميمر على شكل نقيطة وبيدها الصغيرة شادة فصبعو..نزلات منو دمعة تربعات على خدها الابيض الناعم وقرب بفمو المرتاعش جيهة ودنها، بصوت هادئ باش مايخلعهاش شرع التكبير والنسا كايدوزو عليه داخلين يديرو
الصواب مع جارتهم اللي عاد ولدات ..طلع هو راسو مبتاسم ماشايف حد ومزير بنيو عندو كايشوف فيه.. طل على البيت ديالهم اللي عمر بالعيالات وشاف فمرتو اللي مبتاسمة ليه والدموع فعينيها..رد ليها البسمة مع تحريكة رأسو كايوريها بنتهم بين ايديه..بعدها خرج كايضحك لبرا الدار واللي دوا معاه وبارك ليه حدو كايحرك ليه راسو
ماساخيش من شوفتها وفدقيقة وحدة ..رجعات المحور اللي عليه دايرة حياتو ..وصبحات هي كل حياتو ..تسمعات فودنو كلمة مادارش عند من قالقا حدو بسم بسمة غريبة مرسومة لبنتو فقط ..الراجل ظن باللي ماسمعوش ورجع قال كايضحك: ااسي بووبكر گلت ليك شناوي تسميها اتاا الولاد داو لك السمع هههه
شاف فيها مزيان وبصوت هامس ليها قال: عائشة..سميتك عائشة
عائشة ..اسم تسمات بيه 18 سنة هادي من طرف باها..انيسها ومساندها لسنوات مرت، وسنوات ستمر ..
تحت شجرة خلابة بجدايلها النازلين كانت مستريحة ورادة ظهرها عليها..شجرة بيدها غرساتها وهي بنت تلت سنين..وكانت يد باها سي بوبكر فوق يدياتها بوجهو البشوش.. ضحكات باش جا فبالها داك اليوم ومن دون ليام عمرها نساتو والا نسات فرحتها العارمة فيه كجل دكرياتها مع باها
نوضات ضهرها مطلعة راسها للسما كاتاخد نفس وشعرها وراها كايلعب ..بنت فالتامن عشر من عمرها..شعر كحل مسبسب وعيون عسلية مجبدة، فم صغير حميمر ونيف منگاد طويل، بنت بحالها بحال گاع البنات مسرارة وزينها يريح القلب..زينة فأفعالها وقلبها طيب..مرحة والضحكة ديما فوجهها مرسومة بحال حماسها فأي
حاجة بغات ديرها..وفاش تتعصب تتولي بحال باها دوز على الخضر واليابس
ضارت ليها: عااائشة مااشي عااايشة اوووف شحال قدي نصححها لك
هنية: واااشووري نمشييو بجووح ياهااد الهاااايشة
خلاتها وكملات طريقها..وصلات لدارهم وتلاقات مع سيارة باباها عاد كيف فرانات قدام الباب وقبل ماينزل زمر ليها كايضحك
خلاتها وكملات طريقها..وصلات لدارهم وتلاقات مع سيارة باباها عاد كيف فرانات قدام الباب وقبل ماينزل زمر ليها كايضحك ..حل باب الطوموبيل البسيطة اللي اصلا كايتزعزع وهبط بفيستة گرية وقاميجة بيضة لداخل بحال طاگيتو اللي متخطاهش فالخروج ..سروال فيستة گري وصباط كحل هاز كرطونة فيدو ويضحك
تقدمات عندو وتلاحت على حضنو فرحانة برجوعو: باااباا
عنقاتو كاضحك وهو بحرارة مزيرها ..باس على راسها وقال بصوت خشن: الله يرضي عليك اعويشتي توحشتي بووك ياك هههه
شافت فيه: عاائشة ابابا عاااائشة
بوبكر: عويييشتي ههه..تعالي ندخلو ابنيتي، فين مك
"درعها داخلين"
عائشة: هاهي جاية..عييتي ياك؟
خنزر ورد كايتشكا: مااشي غاعييت، نهار واحد فالمدينة دگدگو ليا العظام الله يغبر لبوهم الشقف.. على جوج ورقات واحد يلوحك لواحد ويالااطيف ممعاهم هضرة..خزيت على قوم
دخلو لدارهم المكونة من مراح كبير قدام الباب عليه گليسة ديال السدادر بخدادي وطلامط حمرين ..حط الكرطونة من يدو حيد صباطو كايتنهد وكلا مرة يگول "اللاااه..دگدگت دگدگت ولاد الكلاب دگدگوني" رجليه ضروه بكترت الوقيف بدا يمسدهم وهي فوق راسو كاتلعب بصباعها وتشوف فيه تحت عينيها
رد اللور مسرح على المخاد بالجنب وكايتنهد بعياء: اللللله ... شي ميهة ابنيتي الله يرضي عليك
_بحالا طلقات ليه الجعبة للهضرة هز ايديه وبدا: كي اللفعة ابنتي ماااتسوا ماتصلاح والنااس كون صاابو يهربو منها كون دااروووها..قووم مامعاهم عيشة ممعاهم هضررة ووااااحد زاد من قدامي كايشقلم في هاديك اللي معااه بلا حشما بلا حاااية هااكا بعينيااا شتهم، وفااش تجي دوي معااه يهلل علييك..قلاال التراابي خزييت على قوم
فحين عائشة بقات باركة حتا جنابها ضروها..ناضت مشطات شعرها كاتزفر وعينيها مرة فالشرجم مرة فالمراية اللي قدامها.. تنهدات حاطة يدها على خدها وفالشجاري ساهية..وهاد الگلسة هاكا ابدا لوحدة بحالها ممواتية..عائشة بنت طموحة باغة دير بزاف ديال الحوايج وتكون شي حاجة بارزة..والگلسة وسط ربعة ديال الحيوط طول
اليوم ممناسباهاش بتاتا وماشي تاعها
ناضت جمعات شعرها اللور حلات پلاكارها وجبدات منو كسوة باج طويلة كم ومشدودة من الخصر..لبساتها ولبسات دجين تحتها من عادتها ديما تهز طرف الكسوة فاش تكون كاتتمشا..خرجات من البيت طلات على باها لقاتو ناعس، هزات سبرديلتها البيضة لبساتها قدام الباب وطلقات رجليها تاني دايعة من هنا وهنا تتلاهي الوقت وبين
الجنانات طلقاتهم، اللي شافها يعطيها السلام وهي ببشاشة تتردو..معروفة بصوابها وطيبوبتها عند كل ناس الدوار وكل من حتاجها كايلقاها،ولكن باها حجارو يشدوه..بوبكر مايضلم مايتعدا غير فمو مبري منو وقيسو فعينو حسن ليه من بنتو..عدوه وعدو عدوه اللي يجي باغيها للزواج كايهز دوك القوالب اللي جاب ويلوحهم ليه لقدام
الباب ويكملها بالمعاطية بالكلام المالح والمسوس حتا يكره النهار اللي بغا يتناسب فيه مع شي واحد سميتو بوبكر..السيد اللي دار بزاف على قبل بنتو وأهمها بنا مدرسة وسماها على إسمها واخا غاعلى قد الحال..يمشي للسوق يديها معاه يكون كايزرع رجلو برجلها تبغي تمشي لقرايتها تلقاه وراها تابعها..حتا صبحو جل ناس الدوار
بجدية وصوت حنون قال: وانا عمري نسيتو انوارتي..خاصك تعرفي ابنتي باللي بوك هو اللي عمرو ينسا شي حاجة كاتتعلق بيك
عائشة: الله يخليك ليا ابابا ويطول ليا فعمرك
...نزلات راسها بحزن وهو مد يدو لشعرها كايدوز عليه: مال عويشتي مقلقاها شي حاجة
عائشة: النتيجة ابابا.. خايفة نكون منجحتش ولا جبت شي نقطة خايبة
حنحن وشوفت نظرة الاسى فعينيها كاضرو..خايف وخوفو من أنها تبغي تمشي للمدينة وتتغرب تما مسيطر عليه ومخليه يدير معاها اللي عمرو دار بحال يكدب ويخبي ..شافتو سكت و زادت كاترمش فيه وتبوحط وكل مرة تتنهد كأنها هازة جبال فوق الكتاف وغير هي اللي هازة الهم فهاد الدنيا ..
تاعيا وحكو عليها قلبو وقال لسانو بلا مايحس: ه هي فالصراحة گبيلة وصلات نتيجتك
وسعات عينيها: بصصح؟؟ عنندك داابا؟؟
جر قبو وجبدها منو خداتها حالة فمها وبالفرحة تلاحت عنقاتو وهو بضحكة صفرة كايدوز على ضهرها
هنية: الاا ااخويي يااك ديما كتگول مدخليش بيني وبين بنتي؟ دابا بييينك وبين بنتك انا مبررية منكم
بدا يسايس معاها ويرطب: اهنية راه اللسان نعل بووه ماااافيه عظم.. ونتي عجبك بنتنا وعوينتنا لوحييدة تمشي تقرا داك الباكور فالمدينة تبعد علينا فهاد العمر ونبقاو تاني وحدانيين
هنية: سميتها لافاك
بوبكر: الزعتر المززمر اناا هادا اللي بنااها داعيه الى يوم الدين.. واا دوي معاها رطبي معاها شوي ياك هي بنتك وشتي ياك غيير هاد القراية اللي فيها البعد حنا مبغيناهاااش ماعدنا مانديرو بيها
خرجات فيه عينيها: نتااا اللي مابغيتيهااش ونتا المفششهاا سحاابلك كاتسمع ليا ولا كادير بريي؟ اسييير خررج فيها عينيك وگوليها القراااية اووهو تگلس فالداار بحالها بحال گراناتها تايجي زمانها يديها
تقلبات ليه النقشة على سيرة الزواج ورد: واداابا مالنااا على هاد الهضررة العووجة شمن زماان ولا زممر ااش ااش..گلناا لك دوي مع الدررية صاافي دوي معااها راك مها زعما
عائشة: اامي دوك المسلسلات التركية راغايخرجو انا گلت لللك، وفييين عدي نمشي أصلا.. بنات الدوار غالمكلخة على ختها عقلهم فيه غير وصفات تكبير المؤخرة والزوبير ولد القايد ولا براهش الدواار..اللهم نمشي نسرح رجليا حسن
بعدم تصديق دورات راسها: احياانا لابسة الحمر ياختي وماشطا الشعر ههه شتي لاكان غاشيحد مطيحك ااابنيتي ها ميمتك توقف معااك من غدا نزوجك ليه
ميقات بعينيها وتمات خارجة: بااركة على گلبك الااطيف.. انا شوية ونجي بلا ماتگوليها لبا
عيشة وقفات حاضياه حتا غبر بعدها هزات الطيلي ديالها دخلات للفيس فين مصدعها واحد من العنيبات الكتار فالدوار..لقاتو كاتب ليها جرائد كالعادة مقرات منهم تاحرف حدها جاوباتو ب"اللي بغا الحلال.. يقصد الباب" طفاتو ودارتو فجيبها عاضة شفتها التحتانية ومكملة طريقها لمقصدها الماكر
...فدار سي بوبكر ..بجلابة بيضة مخططة بالحمر مع قاميجة كايبان منها الكول ووالكمام فقطو وطربوش فوق راسو الشايب اللي فيه شعيرات قلال ، وقف وسط الدار وبدا تايدور عينيه بين القناات ديال ويعيط: هنيية..واااهنية ..هنية..يااهاد المرااا فييينك
نزلات من السطح هازة فيدها النشير: هااانا هاانا اماالك تتغوت
خنزر فيها بوبكر والمرا ردات بالنفخة: ربي يخليك اختي رقية
الراجل والضحكة فوجهو: الله يكبر بيك الالة ههههه سي بوبكر هيهييه
مد يدو لبوبكر ومطلع عندو راسو.. من فوق النفس ومن باب الصواب سلم عليه ودار ليهم الطريق منين يدوزو للصالون..غاهوما دخلو ودار لهنية طالق القرطاس من عينيه ويشالي بيديه: هاادو لاش جايين عدي اجااابهم
حل فمو تايفرنس ليه وهنية ناضت فرفارة للكوزينة، خلات بوبكر جامع يدو مخنزر والسكات فداك الصالون، العريس رد داك المشموم قدام وجهو وزقل قاطع الحس ومو كادور غير عينيها مطلعة نيفها للسما ويدها كلا مرة تحركها بالدهوبات ..رجعات هنية ضاحكة وفيدها صينية تاع اتاي ومن باب الصالون كاترحب وتعاود: مرحبااا
بيكم ياجيراني العزااز مرحبا والف مرحبا هههه
حطات الصينية فوق الطبلة وقبل مادور تجيب الصواني شافت جيهتو ولقاتو ضارب فيها تخنزيرة ديال الغدايد بركاتها بلا هواها تتسرط الريق وتغمز فيه يبرد: ا ابوبكر كب كب اتاي ههه
عبد الله: اسي بوبكر داكشي بين العيالاات هههه حنا هضرتنا بووحدها
بوبكر: و...ماخلاو ليه حتا فين يهضر زادو فيه و دخلو بحالا الدار دارهم والعريس غايتسطا غابالفرحة من غير بوبكر اللي الشياط غايخرجو من ودنيه..خبط داك الباب وتم غادي ليهم شوية عاود تدق الباب حلو وخنزر: وتا لاااش جااي
مد ليه محماد مول الحانوت دوك قوالب السكر وسلم عليه بوسة لهاد الحنك وبوسة لداك الحنك: هههه مقصوودي شرييف اعمي بوبكر شرييف شريييف هههه زيد زييد ندوي معاك
دخل تاهو عارف الصالون فين جا وبوبكر صدرو كايطلع وكاينزل ..عينيه حمارو تاحمارو بحال الشيطاان وضار ضورة وحدة لداك الصالون
المرا مسكتاتش من الهضرة والضحك لاهي لاراجلها لاولدهم ولا حتا مول الحانوت من غير هنية اللي تحاشيمتها تحاشيييمة مع جيرانها
دخل بوبكر وتركنو بجوج گالسين ..بدا يدور عليهم دك العينين مخرجهم وقال كاينهج: شووفو ياااااه..غاتحطو داكشي اللي فيديكم وغااديرو جوج جوج وتمو خارجين مع هااد الباب.. ولا رااامغايعجبكم حال
تحنا للبلغة والراجل خرج عينيه: لا لاااا انا متااايب ااعمي متااايب
ناض حفياان وطار كيالزوااق دويرتهم ..بوبكر شاف هنا وهنا لايكون جاي شي حد مازال عاد دخل خابط الباب: مزياان تبارك الله لاهييلا مزيااااان..غاللي سخن عليه الرااس يتم قااصد بووبكر مسخوط الواليديين انااا
دخل للصالون خبط داك القالوب فوق داكشي اللي خلااو الناس وگلس مغدد كاطلع فيه الفقسة وتنزل وهنية لا اقل عليه كون مخافتو يتكب عليها كون ناضت لييه
سكت تااسكت تايزفر وينغص فالاخير ضرب يدو مع رجلو بالفقصة وقال: ااميمتي ياااميمتي وااش غاابنتي اللي تتبان ليهم ؟؟؟..عويينة وحدة اللي نكسااب ااعباد الله بغااو يطيرووها ليا وبلا حشما بلا حاايا مجمعيين بقشلة فنهار واااحد.. دابا هادو مايسطييوكش..مااايخليوكش خاارج بلا حواايج
ضار حمر فيها: فيين لهييه فيين..تيوااش كاطفي ولا كاتزندي هاادي هي داارها وغاتبقا داارها الى يوم الديين
هنية: و وااييه مگلناشااي. ولكن ماحدها بااركة لا شغل لامشغاال راه كل نهاار غاتلقا هاادو قدام داارك..فكر فعقلك اااخيي وعرف الخير لبنتك فين كااين ربي لاما گللس فكررر وخمم فهادشي
بوبكر دور وجهو حال شوية فمو وهنية فاش شافتو زقل قربات زاعمة وبدات تنطق:ابوبكر.. راواخة كااره وماباغيش هاادشي ولكن ماعدك ماادير..سحابك اناا باغاها تبعد عليا؟؟ راتانا عوينة وحدة اللي نكساب وتنفكر فهمها صباح وليل وبغيت نتهنا عليها
رمش ساااااكت بعدها قال بسهوة: عندك الحق..هاد ولاد الحرام مغايفرقوش عليهم بنتي، اليوم الى مشا واحد غدا يجيو مية..بنتي قاارية وزينة ومتبتة لقاوها دجاجة بكاامونها وبغاو يهرفو عليها الله يعطيهم غباارة
هنية: وييه يعطيهم غباارة وغايجيو وحدين خرين سحاابك غايتقاداو؟ فكر غااابيعقلك اخيي راه لابقات هوك غادايعة هنا وهنا عممرها نساليو من صداع الراس
ضارت هنية طفي على الغدا وعائشة تغيرو ملامحها كلها وحزنو فخطرة..ضارت كاتجر رجليها لبيتها ساهية وتتفكر..واش غلطات؟ واقلة زادت فيه ومكانش خاصها تعصبو لديك الدرجة..يمكن ماشي بديك الطريقة ومتستغلش انها نقطة ضعفو
..باباها عندو معزة خاصة مكايعلا عليها حد وحتا هي مساخياش بيه، ولكن و مستقبلها؟ حلم الاستقلالية اللي صباح وعشية تتفكر فيه؟ المدينة والتحرر من هاد الدوار اللي ديما تتحلم بيه؟ شنو غاديك فهادشي كاامل وكيفاش تمحيه من بالها بسهولة..
تكات على السرير موجهة عينيها للسقف وتنهيدات خفاف كايعبرو على حيرتها
..حلامها وطموحاتها كلهم فكفة..ووالدها اللي عليه حلات عينها ومعاه طلعات خطوة خطوة فكفة خراا.. المشكل شكون من الكفات تختار..شكون اللي وزنها تقل من التانية، وفراقها تأتيرو أقل من التانية ..
.. القصة لحد الساعة عرفتكم فيها غيير على الكراكطير ديال الشخصيات الرئيسية واخا باقين غايبانو وحدين خرين من بينهم "البطل"
..الصح عااد غاندخلو فيه وعاد غانبداو فالاحدات ديال بصح ..
قصة أبو عائشة
محتوى القصة
التنقل بين الأجزاء