قصة سيدها

من تأليف سناء الصنهاجي
2020قصة كاملة سفالة نادرة

محتوى القصة

قصة سيدها

غانسافرو لعالم ثااااني عالم مغاير على لي كنعرفوه ... قصة غاتخليكم ديزاكتيفاو على  الواقع وتعيشو فبحرها ... أحداث كلهم جداد ... فقصة بساطتها لي مزيناها .. " سيدها ".. كلنا كنسمعو نعام اسيدي .. واخا اسيدي ... ولكن تاحد فينا معارف حقيقة الاسياااد وموراء اللقب ... روااااية حب الاسيااااد عشق الاسياااااد .... فطياتها العناااااد و العناااااد الحب التضحييية وكل معااايير العشق العنيد ... لي غانقوليكم هو 

القصة مختلفة على كل كتابااااتي ... هادي افضل ما خط قلمي وزمم ... نبغي كلكم تستعدو نبحرو كلنا فسفييينة " سيدها"❄❄

كنواعدكم بلي قصتنا لي كتحمل فطياتها عناد كبرياء تحدي عشق شجاعة تضحية والكثير من المشاعر الدافئة...

~~~~~
🍃 اذا هواك شبل الاسياد تمردي 
واذا غضب ابتعدي 
واذ نظر فيك تمختري 
واذ أحن توهجي 
فشبل الاسياد في حبه مريض 
اذا بادلته الهوى طلب المزيد..🌸🍃💫

★الحياة كورقة بيضاء خططت فيها لأحقق أحلامي و أهدافي و رسمت عليها طريقي ..أقمت علاقات و صداقات ...٭ شعرت فيها بالحزن ...و فقدت فيها أشخاصا ارتبطت روحي بهم ...و أصبحت وحيدة في هذه المتاهة ...
و شعرت فيها بالسعادة ...حين ودعت نفسي ووهبتها لروح بريئة ...روح ارتبطت بروحي ...و اصبحت جزء مني ...
....★ الحياة قدر غير طريقي ...لطريق لم تكن في الحسبان ...علمتني الحب...علمتني التضحية....علمتني أن أهب روحي لملاك طاهر
القدر علمني معنى كلمة الشجاعة ...معنى كلمة الأمل ...و معنى كلمة الحب و العشق ...
القدر خاضني لتجربة حب ربما كان مستحيل ..او ربما اعتبرته مستحيل ...خاضني لحرب حب عنيفة ..استسلمت فيها لمشاعري ..و انفجر فيها بركان أحاسيسي الميتة ...استسلمت لذلك الشخص العنيف ..لذلك الشخص المتسلط ..استسلمت لعيونه الغامضة ... استسلمت لعنادي المدمر و لقلبه المتمرد ...استسلمت فيها لعشق بنسبة 

لي عشق ممنوع ...



- سونات الساعة على 7:30 ديال الصباح... هاد الوقت لي مكنحملش نفيق فيه وكتكون فيه المانطة سخونة ويلاه كتحلى نعسة عينيا مسدودين بحال الى مديور ليهم سكوتش مديت إيدي وسكت ليها الحس شي نهار انهرسها... رجعت نعست ديك 5 دقايق لي كتجي زوينة وكتحسي بحال إلى نعستي فيها سوايع هوما ولكن بحال 

كل مرة 5 دقايق كتحول ل10 دقايق وزيد كثر حليت عيني وقفزت من بلاصتي ويلي قفرتها اليوم عندي إمتحان طرت من بلاصتي كنجري لطواليط دغية دغية طرفت حالتي وخرجت لبست حوايجي وجمعت شعري لي حالفة أيجي نهار وغادي نكرج والديه من جدر غير بلاتي هزيت كتوبتي درتهم فسكادو ديالي ديال الجلد درتو 

فظهري تيليفوني فجيب وفلوس طوبيس طوبيس لي شيبني وديما كايزيد على مابيا بتعطال ديالو إيوا معندي مندير لافاك بعيدة على المدينة جات قبل الخرجة ديال أسفي فسيدي بوزيد خرجت وسديت الباب ورايا لقيت عمي محمد مول الحانوت حال :
محمد : ماريا صباح نور البنتي
ماريا :صباح الخير أعمي عفاك واحد منعش او واحد الفاسية الله يعطيك الستر( الفاسية هيا ميلفوي ديال درهم)
محمد :أيااه أبنتي هيا الولة ...حل تلاجة جبد منها منعش حطو على الكونتوار ورجع لكارطونة ديال ميلفاي حلها وجبد منها وحدة حطها ليها 
ماريا :قيدهم على الواليد بحال ديما أعمي
محمد :سي أحمد مزال مجاش؟
ماريا :كتحل فمنعش)لا أعمي هاد المرة عطلو عليه كونجي
محمد :إيوا الله يجيبو على خير أبنتي
ماريا :أمين أعمي يلاه الله يعاونك..غادية فطريق كنفطر حيت هذا هو فطوري كنعكز نطيب خصوصا يلاه بديت فطياب غير شوية أغلبية كناكول على برة ولا فالخدمة إياااه الخدمة صباح لافاك وفالعشية خدامة فواحد سناك ديال البيتزا كنوصل لي كموند ديال البيتزا لناس عايشة بوحدي فعمري 18 عام بابا مسكين خدام فبني ملال 

فلوزين ديال الليمون أما ماما سمحات فالواليد هادي شحال ومشات هاجرات لفين الله أعلم خلاتني عندي عماين عمرها هزات حتى تيليفون ولا سولات فيا بابا مسكين لي كبرني وقراني وسهر على راحتي عيا معايا نسكن معاه فبني ملال ولكن انا ولفت أسفي ولفت مدينتي كيجي يشوفني مرة مرة فالأعياد ولا فالكونجي أنا خدامة بلا 

علمو حتى هو عيا وخاصو لعوين.... وقفات ماريا فتيرمينيس حتى وقف الطوبيس طلعات خلصات وشدات ورقة وكلسات فالكرسي الأول حدا زاج ساهية شحال من واحد كيكوليها باز ليها عايشة بوحدها واش مكتوحش مها بالعكس كنتوحشها ولكن كون كنت كانعرفها فعلا كبرات محتاجة لأم ولكن سي أحمد عوض داك الفراغ قريب 

من بنتو لواحد درجة كبيرة نهار لي جاتها الدورة الشهرية هو لي مشا وجاب ليها أولويز وفهمها تطورات ديال البنت منين كتبلغ وفمراهقتها كان احسن صديق ليها يخرجو بجوج يدخلو بجوج نعم الأب ونعم صديق تجمع فيه كولشي... وصلات لافاك داخلة كتقلب بعينيها حتى بانت ليها نجوى صاحبتها ماشي شي صحبة ديك صحبة لي 

كتوقف برات لافاك صحبة غير وسط لافاك...
-نجوى :تعطلتي أماريا يلاه نبريباريو شوية قبل لا تبدا الحصة بقات لينا 5دقايق يلاه خلاص
ماريا :أصاحبتي راكي عارفة من حي أناس حتى لتيرمينيس وطوبيس كيدير روطار غير الله يعفو علينا من هاد البلاد وصافي
نجوى :مالها كيجاتك هاد البلاد جوج دراهم درايبي ودرهم ميلفوي مفطرينك وبيخير
ماريا :سكتي..
على أساس دابا حنا منين اندوزو عاد 4سنين فلافاك كلها أنخرجو نلقاو الخدامي كايتسناو ومالين شاريكات هازين الافيتات وكيعيطو بسمياتنا
نجوى :شوفي بلاما تبقاي تهضري بحال رشيد وكريم ولاو هاد الأيام كيهضرو غير على الحريك ويهربو من هنا
ماريا :ضحكات) أنا والله وكونما الواليد لي عارفاه والله لا بغا كون وامشيت
نجوى :كتشوف فيها مخرجة عينيها) واش كتهضري من نيتتك نييت ولا سايرة تفلاي؟؟؟..جراتها ماريا من إيديها وهيا كضحك
ماريا : تي زيدي زيدي خاص بويا الحريك يلاه راكي عارفة الأستاذ الشرقاوي وجملتو المشهورة من تأخر لا تقبل منه شكوة...

داز الأمتحان كيف كنت متوقعاه مشنشط راسي ضرني وحنوكي حمرين بكترت ما الأستاد واقف ليا على راسي غير خرجت انا ونجوى كنهضرو على الأسئلة حتى كيبان لينا كريم واقف هو ورشيد وشي دراري كيهضرو جراتني نجوى وهضرات ليا فودني :
نجوى :يا فخبارك رشيد وكريم ناويين يحركو؟
ماريا :وراه كلتيها ليا فصباح واش وليتي تنساي
نجوى :ياختي راه راسي داخ مع هاد الامتحان والله مزال مافطرت شداني دوخة
ماريا :والعقل محاضر)اجي معرفتيش بشحال كيحركو؟
نجوى :واش انت كنشكي عليك زعمة تفوبري عليا ابشي مونجيس وانت كتكولي ليا بشحال كيحركو وانت أش حرك شطاطك؟
ماريا :شزفي البروفيتاج ممعناش الله يرحم جدك زعمة راه باك مدير ديال المدرسة وماماك رئيسة ديال الجمعية وطامعة فيا أنا لي با خدام أفوزين ليمون وكنخدم على راسي حتى من فلوس لابورس مكتقدنيش ولايني وجهك قاصح أختي
نجوى :ومالك أختي أش فيها مافراسيش قرزازة
ماريا :نخسر على لي معندوش اختي بحالي بحالو اما انت راه انت خاصك تخسري عليا ودابا دوزي بخير تابعاني الخدمة الله يعاون...
ماريا : كتمشى بزربة وتبغم) لا والله حتى زوينة..منين نولي نخسر عليك ولدتك ونسيتك بنادم يتيري فيهم ويجي يضحك عليك أنت..
وقفت فتيرمينيس ديال طوبيس حتى جا طلعت خلصت وكلست فنفس البلاصة لي كنكلس فيها ديما صراحة عييت من هاد سيستيم خدمة دار لافاك عام و3شهور وانا خدامة مول شي راجل الله يعمرها دار كنساليو الخدمة مع 10:30 كيوصل البنات لديورهم باش مايتعدا عليهم حتى واحد ساهية وكنفكر جامعة شوية ديال الفلوس 

شي كنخسرو فالحوايج لي كناخدهم من بوتيك جوجو(جوطيا) باش منطيحش من قيمتها كندلعها ومكوليها بوتيك جوجو فيها بياسات واعرين والمباقي كنخبيه دنيا وزمان هدا معرفنا من هنا لغدا شنو أيكون حطني طوبيس قدام الخدمة نزلت ودخلت نيشان سلمت على لبنات لي معايا لي مكطربطني بيهم غير الخدمة أنا بطبعي مكنربطش 

علاقات بزااف لبست قميجة حمرا وكسكيطة وخديت ورقة ديال الطلبات وبديت ستفت الكراطن فوق البيكالة لي كنوصل بيها طلبات وخرجت بديت بأول دار الكليان كيختالفو من واحد لتاني وطلقات ناس لي هاي كلاص والبنات لي ساكنين فسكن الجامعي ولي ساكنات بوحدهم كل واحد هو يعني مكتسالي حتى يغفر ليك ربي دنوب وخلي 

لي كيتبسل ولي كيحتارم خاصك اتعرفي كيفاش تعاملي مع ساليت أخر طلب راجعة لسناك بدا تيليفوني كيسوني وقفت فواحد زنقة جبدت تيليفون كان بابا :
ماريا :ألو بابا لباس عليك؟
أحمد :الحمد لله ابنتي وانت كيدايرة مع قرايتك كولشي مزيان؟
ماريا :الحمد لله كولشي بيخير إمتا اتجي عطاوك الكونجي؟ أحمد سرط ريقو وطول فسكاتو عاد نطق
احمد :تنين جاي أنا عندك أبنتي المهم عندي ليك شي خبار
ماريا :عقدت غوباشتها)ياك لاباس أبابا؟
أحمد :عمتك خديجة تزوجات
ماريا :أواااه بصح وكاع معرضات علينا ولا كالتها لينا مكالت ليا والو ومتكوليك ماريا نور عينيا
أحمد :بنتي كل واحد وحالو وراجلها شرط عليها متعرف حتى واحد فعايلتها مزال وتقطع معاهم 
ماريا :وعلاش هادشي؟
أحمد :حيت سيد لاباس عليه وكاليها تقطع مع عايلتها حيت عارفها على قد الحال وعمتك كبرات مسكينة فين اتلقى بحالو ومن فوق لاباس عليه مديريش فبالك ابنتي وعدريها راه هضرات معايا ابتخبية ودموعها هابطين واكترية عليك انت حيت كنتي بحال بنتها وكثر
ماريا :حابسة البكية)إيوا الله يتبت غرسها ويسهل عليها بشي وليد ولا بنية لي يعمرو عليها
أحمد :أمين ابنتي يلاه تهلاي فراسك الله يرضي عليك حتى نجي
ماريا :واخا أبابا بسلامة...قطعت مع بابا الخط درت تيليفون فجيبي وكملت طريقي غادية ساهية فرحت لعمتي ونفس الوقت بقا فيا الحال حيت متليتش انشوفها مزال علاش كنتحرمو من ناس لعزاز علينا غير كاليها قطعي تقطع اش ايكون فملك الله هذا لي كوليا متعرفيش عائلتك بحال الى هوما مخلوقين فسما وحنا فالواد لا حول ولاقوة 

إلا بالله...

رجعت لخدمتي حتى وصلات ل10ونص سدينا ركبنا مع سي خالد الباطرون ديالنا راجل فالخمسينات من عمرو وصلني انا لولة حيت على طريقو حطني وكمل طريق ديال البنات شادو فسكادو ديالي ومكملة طريقي حتى وقف عليا واحد خونا معرفتو منين خرج ليا كيتبسل ريحة الكارو تعطي منو :
- زين فين غادي فنص ليل يكما نوصلو لدارو؟
ماريا :شوف الله يرحم باك أتمشي تبدل ساعة بخرا ولا مايعجبك حال
- أيهاي على لخويبة كتعرف تهضر دايرة فيها شريفة عفيفة بنات ناس راه داخلين لديورهم
ماريا :وقفات )وانت شغلك با خويا كتصرف عليا من جيبك وسير حسن ليك قبل مندير صباعي فودنية ونجم عليك جيران....تم جاي أناس ولد الحومة كبر مني بشي 5سنين هكاك
أناس :ماريا اشنو واقع تماك (شاف فشخص تاني) أسامة خويا ياك لباس راه بنت سيكتور هادي وبنت دارهم وكولشي عارفها هنا وخدامة سير عطيها بتيساع ولا نخلي دار عش خويا
ماريا :بنادم كيداير انا لي كتهضر وتحل عليا فداك الفم الخانز مكتنوض حتى يحماض بولك وتسنا والديك يعطيوك 5دراهم باش تشري كارو انا كنعري على كتافي كنقرا ونخدم وتجي انت تبندر عليا تصاحبني انخاف منك ولا راه مزال مكتعرفنيش
اناس : صافي أختي ماريا دخلي لداركم...راه جديد على سيكتور داكشي باش...صافي سمحيليا اختي ومسحيها فوجهي دخلي لداركم دابا...حدرت راسي ودخلت لدار لحت سكادو ديالي وتلاحيت على نموسيتي بفف حتى لامتا ياربي وخدمت ليل حتى حاجة مابقات عاجباني
ماريا :هزات إيديها لسما)ياربي دير لي تويل دالخير ياربي تكون مخبي ليا الخير ياربي...
-دازت سيمانة غير لافاك ولخدمة قبل ميجي بابا طلبت عطلة سيمانة من الخدمة باش بابا ميعيقش بيا وسي خالد مسكين متفهمني بحال كل مرة صبح تنين وعندي خاوي صبحت ناعسة مع نعاسي خفيف سمعت صوت ساروت كيدور فالباب قفزت من بلاصتي خرجت لمراح لقيت بابا نقزت عليه عنقتو
أحمد :ناري هههه خلعتيني
ماريا :وبابا راه انت لي خلعتيني مكلتيش ليا اشمن وقت أتجي
أحمد :مابقا حد يدير مفاجأة لبنتو(معنقها)بلاتي نشوفك واش ضعافيتي ولا صفاريتي
ماريا :كضحك)اويلي أبابا دوز كلس نوجد ليك الفطور...خلاتو ودخلات لكوزينة كتوجد فالفطور وكتهضر معاه
ماريا :واخيرا عطاوك كونجي شحال عطاوك فيه بعدا؟؟
احمد :يوماين...جات وقفات عند الباب مصدومة
ماريا :اويلي أبابا على يوماين ممالفاش ليهم واش تسطاو ولا مالهم
أحمد :داكشي باش بغيت نهضر معاك أبنتي اجي كلسي عندي منكول ليك....

بقيت كنشوف فيه كنشف فبابا لي أول مرة كنحس بيه متوتر وخايف من لي بغا يكولو كلست حداه وكنتسناه بهضر...بلل شواربو وشاف فيا :
أحمد :معمل ليمون لي خدام فيه ايتسد!
ماريا :بابا كيفاش أيتسد مافهمتش ومني ايتسد لاش اتبقى انت تم رجع هنا وشوف خدمة جديدة
أحمد :غير صبري أيتسد وأيتحل المعمل جديد فسبانيا وغادي يديو الخدامة لي قدام ومعاهم هادي 20 عام وأيزيدهم فصالير ويعجيوهم سكنة
ماريا :بابا بغيتي تكوليا بلي اتمشي لسبانيا وتخليني وعلاش مدينيش معاك
أحمد :ماريا أنا كرهت فيه ولكن ميمكنش انت فتي سن لقنوني لي يخليني نديك راه 18 رعام ليعندك كون كان قل انحطك معايا فالوراق ونديك ولكن معندي مندير ومنقدش نسمح فخدمتي لي كنكلو منها طرف ديال الخبز
ماريا :بابا وعندك عادي تخليني بوحدي اه انا بوحدي ولكن على الأقل كنتي كتجي لعندي وتكلس معايا ماشي دابا منشوفك على شحال
أحمد :ماريا غير صبري أبنتي مابقا قد مافات وغادي نشد لانتريت ونكلس معاك بمرة
ماريا :حتى تولي عندي 28عام ياك ابابا لانتريت مغاتشدو على 10 سنين حتى تولي عندك 60 عام شوف أبابا أنا مغاديش نشدك ماشي موشكيل أنا والفت نبقى بوحدي وهانية معندي موشكيل ومزيان نيت نعتامد على راسي حتى واحد مكيدوم لحد ناس كيخليوني واحد بواحد من مي وجبد
أحمد :بنتي أنا مكرهتش ندير بين سناني ونديك هاني رفضت وكلست فين انلقى خدمة وانا فهاد العمر لقاوها حتى صغار خلي الكبار أنا اندير المستحيل نجيبك لعندي وتيليفونات دابا كيوصلو لبعيد نولي نهضر مع بنتي كل نهار..
مابغاتش تبين ليه بلي بقا فيها الحال ضحكات ليه فوجهو ونطقات :
ماريا : وامتى اتمشي؟
أحمد :تنهد)جيت نجمع شي حوايج ديالي وشي وراق غدا إن شاء الله انرجع بليل وبعدو عندنا طيارة أنا غير نوصل نعطيك لادريسة ونمرة جديدة باش نبقاو على تصال إن شاء الله ونصور ليك دار كنواعدك أبنتي انجيبك لعندي مغاديش نخليك ورايا...شيرات ليه براسها وعنقاتو ناضت كملات توجاد الفطور وبالها مشغول باها أيمشي 

عمتها تزوجات لالا خاسني شي تفوسيخة باينة انكون يا منحوسة يا ضاربني شي عفريت صومالي واه كل شوية واحد يمشي بزااف هادشي واش انا فيا شيحاجة كتخلي ناس تهرب مني وهاتعاويد نصارة....حطيت الفطور فطرت انا وبابا بحال إلى حتى حاجة مكاينة دخل وراها بابا يدوش ويرتاح جمعت دار ودوشت حتى أنا وخرجت أنا 

وبابا نتغداو على برا داز خلص عمي محمد مول الحانوت ومشينا تغدينا دوزنا العشية فضحك ورجعنا لدار غير كنتفكر بلي بابا أيمشي كتجيني الغمة على قلبي وكنتزير....الغد ليه فقت بكري بحال كل نهار مشيت لافاك مكانش عندي لكانة نجوى شافتني دورات وجها عند بالها مشوكة فيها أنا غير فهمي بابا العشية أيمشي شوف إيمتا 

أنشوفو أسالات الحصة خرجت حادرة راسي ماشي كيف عوايدي كنخرج مضحك مع هذا ونجمع مع هذا غادية مع الحيط متسنيتش طوبيس قررت نتمشى على رجليا حادرة راسي سارحة وكنفكر حتى كنحس براسي دخلت فشي واحد عليت عيني كيبانو ليا عينين خضرين جنابهم مكمشين دوك الملامح لي واخا الواحد كيكبر كيبقى زينو 

شعر نصو بيض ونصو كحل طوانك ديال نقرة فالودنين طوال ودبالج كبار دنقرة الحجبان كحلين تكول مرسومين بالكحل هادشي يا أتكون شي لاجئة سروية يا شي نصرانية عايشة فالمغرب خاصني نطلب سماحة المرة كبر مني داخلة فيها كيف ثور الهايج :
ماريا :مع بتسامة)سمحي ليا الالة والله ماشفتك...ضحكات ليا وحطات إيديها على دراعي
**ماشي مشكيل أبنتي كتوقع غير بلاما تبقاي تفكري وعقلك يحير شفتي المكتوب راه مقدر ومامنو هروب واخا طلعي وتهبطي أتشوفيه أتشوفيه
ماريا :حالة فمها فيها)مافهمتش أخالتي علاياش كتهضري....ضحكات المرة وجرات ماريا من دراعها وبقات غادية معاها
**الواحد كيبقى يفكر ويكول أشنو اندير شنو أيوقع غدا وهو راه مدبرها حكيم معندك علاش تبقاي تخمي أبنتي(وقفاتها)الخير جاي القدام وخير كبير وطريق لي فبالك عندك فيها خير كبير وهاد طريق أبنتي أتغير حوالك غير هو نوصيك مكتابك راه مقدر ليه غير متحنيش راسك ليه تحزمي ورزمي وكوني مرة هادشي لي أنكوليك أبنتي 

وعنداك تفرطي عنداك تفرطي....كتعاود نفس الكلمة وهيا غادية ومخلياني فحيرة شكون هادي ياسيدي ياربي لالا أنا صافي وليت كنتأكد بلي انا من سيدي حمر مافيها شك عندك أيوقع ليا بحال دوك الافلام الهندية لي خارجين عليا حتى وليت مكنعرف راسي من رجليا وحتى انا تلبس بيا شي جنية عيشورية قاطعة إيديها من رحمة ونولي 

نأدي لي عزيز عليا تف تف(كتنفخ فصدرها)دكرنا سمن والعسل أنا كنتيق بهادشي أعوذ بالله.... ماحسيت حتى لقيت راسي حدا دارنا دخلت لقيت بابا كيجمع فحوايجو حطيت كتوبتي وكلست شديت حناكي كنشوف فيه على راسو شاف فيا
أحمد :أتبقاي تشوفي فيا تاني دوك شوفات؟
ماريا : مكنسخاش ابابا والله عارفني معندي صحابات كيشدني غير الملل
أحمد :مابقى والو وتكملي قرايتك وتخدمي شي خدمة زينة وتعرفي على ناس جداد وتزوجي وتولدي
ماريا :أبابا الله يهديك شكون أيقبل على هبيلة بحالي دابا كولشي...

كولشي باغيها تحني راس وتكول أه لا بحال شي روبو مالنا عليها عايشين فالعهد الحجري
أحمد :كيضحك)أغير كتكولي أهاد المسطية دابا يجي الوقت وديري دارك وكانونك
ماريا :من تما لتما يحن الله
أحمد :حط ساكو فالأرض) يلاه أبنتي خاص نمشي يلاه نوصل طيارة عندنا مع الوحدة....وقفات وغرغرو عينيها بدموع جمعات فمها حابسة البكية
ماريا :صافي ابابا أتمشي(نزلات دمعة سخونة من عينيها)
أحمد :عنقها)متبكيش أشنو كلنا راكي راجل مخلي ورايا راجل هادشي لي علمتك من صغر
ماريا :مقاداش نحبسها صافي مديرش فبالك انا غير بغيت نسيق وجهي حيت مغسلتوش هاد الصباح وصافي....شد وجها بين إيديه كيضحك ويشوف فيها
أحمد :أنا غادي ولكن أيبقى عقلي معاك عندك ديري هكا ولا هكا أنا تايق فبنتي ولي هضر معاك عطيه علاش كيقلب
ماريا :كون هاني أبابا متخافش عليا يلاه يلاه أيمشي عليك الحال...عنقها باباها بجهد لصدرو حتى هو الغصة فحلقو ومباغيش يبين هز ساكو وخرج متلفتش وراه غير خرج وماريا عطاتها لبكا ماسكتاتش دموعها غير هابطين كتمسحهم ويهبطو كتفكر أيامها مع باباها واخا هيا كتبقى بوحدها وموالفة بهادشي ولكن على الاقل راه باها 

فمدينة فبلادها الكار يوصلو ولا يوصلها لعندو ماشي بحال فبلاد خرى خاصها شحال باش توصل ليه خاصها توالف هاد الوضع لي تحطات فيه تقرا ودمر باش تحقق داتها ومستقبالها...
-رجعت لنفس سيستيم الخدمة دار لافاك مزال نجوى كانت كتفوج عليا دابا سدات سدة وحدة ولات دوز كدير راسها مكتعرفنيش ناري على بنادم طماع المنافق يخليها سلعة ويخليها ماركة... وءنا كالسة كنتسنى البيتزات يوجدو تفكرت بابا لبارح فاش هضر معايا هادي 10يام باش وصل لسبانيا عاجبو الحال فرحان ومرتاح وراني 

دارو فالواتساب زوينة بزاااف سيفط ليا نمرتو ولادريسة ديالو باش حتى إلى سيفط ليا شيحاجة نعرف بعدا منين جايا ساليت خدمتي ورجعت لدار كليت بيتزا لي جبت معايا وتخشيت تحت المانطة الأيام بحالها بحال ختها حياة مملة لي أيزيد يعقد الأمور هو نهار لي :
سي خالد :شباب تجمعو عندي هنا واحد شوية عندي منكول ليكم...كلشي ستغرب تجمعنا عند سي خالد كنتسناوه شنو أيكول لينا
سي خالد :هاد المطعم صغير درتو سنين هادي تفتحو بسبابو بيوت وكان مصدر رزق شحال من عائلة ولكن حتى أنا عييت او ولادي مابغاونيش نبقى حالو داكشي باش أوليداتي أنبيعو أنمشي نحج ونتسنط لعضامي ءما انتوما فراه كل واحد أنعطيه حسابو سمحوليا بزاااف.... ولكن رجاف الله معندي مندير حتى انا كبرت حتى ليمتا أنبقى 

خدام براكة.... كنتو ولادي وربي شاهد الله يسهل عليكم ويعاونكم قبل متخرجو دوزو عندي نعطيكم حسابكم كمالت شهر.... تفرقنا وكل واحد كيوشوش ويخطط فين أيخدم والخدمة قليلة هنا مالقيت هاد الخدمة غير بزز طلع ليا دم وتعصبت معندك معاكن تشاوري ولا استاشري شي واحد وحتى صحابات معندك لي تخرجي ولا تفوجي 

معاهم.....
***فصباح كان الجو بارد خارجة من القاعة كانشوف دراري مجموعين كيهضرو معاهم رشيد وكريم مافيا لي يمشي لدار دابا كلت نجمع معاهم شوية مشيت عندهم وسلمت
ماريا :دراري لباس عليكم علاياش مجمعين؟
كريم :علاياش انتجمعو عاجبك هاد الوضعية لي هنا فيها كونماشي فلوس لابورس كون هزنا الما وضربنا تريسينتي
رشيد :أنا كتليكم الحل نكدب عليكم أدراري انا قررت وشفت لي سوفينا ولي بغا يتبعني مرحبا
ماريا :علاياش كيهضر رشيد
رشيد :على الحريك الهريب من البلاد أساطا مابقا مايعجب نمشي ياربحة يادبحة المهم نجرب حظي ومنبقاش بارك متقل على والديا وزايدهم بهمي
ماريا :وقرايتك؟
رشيد :الله يهديك أماريا قرايتي هاني كاع قريت الى بغيتي بوسط مزيان خاصك لعاقة الحبة تخدميها وتاخدي بوسط المزيان الله يهديك
كريم :رشيد عندو الصح انا بعدا جامع واحد شوية وأنا معاك
ماريا :وشحال كيطلبو بغيت نكول هادا لي كيحرك شحال كيطلب؟
رشيد :160ألف ريال يكما باغية تحركي اماريا حتى أنت(كيطنز وكيضحك)ماريا سكتات وسهات رجعات شافت فيهم
ماريا :حتى أنا بغيت نحرك....

شافو فيها دراري مصدومين منها
كريم :ماريا هادشي مافيهش ضحك واش عارفة هادشي خطار
ماريا :عارفة كلشي حتى ءنا بغيت نمشي معندي مندير هنا
رشيد :أنت بنت وهادشي خطار حنى دراري الى وصلنا شارع نعسو فيه هانية
ماريا :انتوما خرجكم سوق انمشي معاكم هيا انمشي غدا نجيب ليكم الفلوس....خلاتهم ومشات متبعينها حتى غبرات..
كريم :واش انخليوها تمشي؟
رشيد :ضبر راسها هيا بغات تمشي مغاديش نمنعوها ومغاديش نهزوها على ريوسنا أنا انتاصل بسيد ونكوليه تزاد معانا تالت...
***كيفاش جاتني هاد الفكرة معرفتش اشنو أنبقى ندير هنا كريم عندو صح هاني قريت الما حركت الفلوس والله لاخدمت اللهم بعدا نمشي نخلط على بابا ونكون معاه ونشوف شنو اندير دخلت لدار مكنهضر مع حد بحال إلى دايرة شي جريمة ولا ناوية نديرها مشيت لماريو ديالي جبدت صندوقة وبديت كنحسب نحسب لقيت عندي 

20000 ألف درهم جوج ديال المليون هزيت منهم 160ألف ريال حطيتهم حدا راسي أواحد البركة خبيتها فجيبي باش نقدي بيها نشري لي أيخصني ولي أندي معايا....ليل كولو وانا كنتقلب ونخمم شحال كنسمع على الحريك كاين لي كيمشي وميرجع كاين لي كيغرق وياكلو الحوت وكاين لي كيوصل كل واحد وزهرو ولكن 

انا تعلمت منفكرش فالحوايج الخايبة نفكر فالحوايج زوينة ونتفائل مغادي نكول لبابا والو حتى نوصل إن شاء الله وديك ساعات يحن الله وخاصني نصرف شي فليسات لأورو باش الى بغيت نشد بعدا طاكسي نلقى باش نخلصو ونتعلم كيفاش نشد طاكسي بالإسبانية وكيفاش نكوليه يديني لهاد لادريسة هادشي كاملو خاص نتعلم 

ليه....
***ماريا لصقات ليها الفكرة فراسها ومستحيل تحيد ليها من دماغها لغد لأول مرة اتنوض بكري بلا ساعة لبسات حوايجها هزات الفلوس دارتهم فسكادو خدات منعش من عند سي محمد وميلفوي كيف العادة ومشات لتيرمينيس وقفات حتى جا طوبيس وركبات عقلها غير مع هاد الخطوة لي أدير مابغاتش تفكر بلي يقدر تموت فيها 

لا كتفكر بلي أتوصل وتحقق داتها فبلاد الغربة وتقدر بلاد ناس تعطيها كثر من بلادها وبلي أتقرب لباها وماتبقاش بوحدها ولات كتخاف من الوحدانية ونعاس مابقاش كيجيها خايفة يهجم على دار شي واحد يعرفها بوحدها ويبغي يستغل الفرصة او ولاد الحرام كثار... وصلات لافاك دخلات كتقلب بعينيها على كريم ورشيد مبانوش ليها 

دخلات الحصة كملاتها وعقلها محاضرش كتسنى غير آيمتا تخرج مع سلات الحصة هزات سكادوها وخرجات هي الولة خارجة كتجري بانو ليها رشيد وكريم داخلين عاد جايين مشات نيشان لعندهم وقفات عليهم بحال البوليسي..
ماريا :دراري جبت الفلوس...شافو فبعضياتهم وفيها
رشيد :كيحسابلي غير كضحكي والغد اتجي ناسية كولشي
ماريا :أنا مكنتفلاش الفلوس فالكارطابل عندي إيمتا أيخصنا نشدو طريق
رشيد :الهضرة ماشي هنا اجي معانا....مشات معاهم دايزة نجوى وكتشوف فيهم بشك مشاو ورا واحد شجرة وكلسو
رشيد :سمعيني اليوم الخميس نهار السبت أيخصنا نشدو طريق لطنجة لمرسة ايتلكا لينا سيد لي مكلف ايعطينا بلاصة فين انتخباو بينما وصل الوقت دابا عطيني الفلوس...جبدات الفلوس مداتهم ليه
رشيد :منين انخرجو من هنا انمشيو نشريو ليخاصنا من الكاشتي كولو(السلعة دالماكلة لي اتخصهم)تفاهمنا
ماريا :تفاهمنا... 
*** العالم لن ينتهي لأنك انطفأت و الشمس لن تتوقف عن الشروق لأنك منهك من داخل 
لديك خياران إما أن تبقى في غرفتك المملة باكيا تائها و مكتئبا دون محاربة أو أن تضع خيبتك و ألمك على وسادتك و تحارب من أجل يوم أفضل...
وأسفاه على #شباب يعيش #الخيبة.......اختار #قوارب_الموت للهربة(للفرار)

فرّ هاربا من معيشته الصعبة ......أملا في جنة خضراء و مزرعة خصبة

اختار #الهجرة و فراق الأهل و الأحبة.........يكابد حنين الأم و شوق الصحبة

نفسك غالية و روحك ليست لعبة........فلا تغامر بالإنتحار في سبيل #الغربة

كن قويا فالحياة تحتاج إلى الرغبة....لا الإحباط و اليأس، و لا تفقد الهيبة !

غير خرجنا من لافاك مشينا انا وكريم ورشيد نتقداو بقا لينا نهار ونشدو طريق طنجة انا مابقيتش عارفة راسي شكون أنا كنتصرف بحال دراري مغامرة وعاطية فلوسي ومخلياها على الله وصافي ماخلينا ماخدينا باطي ديال طون كاشير الفرماج تكول انمسي لبوليزاريو ولا أيديونا لكوانتانامو تافقنا باش نهار سبت نتلاقاو مع 6

ديال صباح فالمحطة رجعت لدار وانا كنتمشى بحال شي روبو هزيت كتوبتي كاملة درتهم فواحد صندوق إيه الخدمة ديال ايام وسنين هزيت الباك ديالي لي كان مكتوب فيه حسن حيت فعلا كنت كنخدم مزيان كنت كنحلم نكون يا مهندسة ديكور يا مهندسة فلاحية علم الله واش انحقق أحلامي فالبر ولا فأعماق البحر حيدت الافكار الخايبة من 

راسي وكملت شغالي هزيت سكادو ديالي كبير كنت كنجمع فيه حوايجي فاش كنمشي لرحالات جمعت فيه لي خاصو يتلبس والباقي خليتو جبت كرطونة صغيرة كتبت فيها نمرت بابا والأدريسة ديالو درت عليهم سولوفان ولويت عليهم سكوتش حتى الى كانو البوليس وتلاحينا فالبحر مايفزكوش ليا ونصدق حاطة كرطونة ونطلب فبرسلونة 

كنهظر بحال إلى ضامنة راسي انوصل حطيت كولشي قدامي وكنشوف فيه ونتفكر واش مزال خاص شيحاجة ولا نسيتها لا مابقى خاص والو كولشي هو هداك تكيت فبلاصتي ودغية داتني عيني.....
****
فبلاصة أخرى الخريف فيها كيكون من نوع خاص سويسرا المغرب إفران أحسن بلاصة فيك يالمغرب وقفات طوموبيل كحلة من نوع فورد نزل منها شاب فالعشرينات من عمرو ملامحو زعرة وبشاشتو مرحة ضحكتو كتفتن طويل وسنانو مستفين بايضين لابس تجاكيط كحلة وسؤوال فنفس لون مع كاط فالقهوي دخل للقهوة لي كانو 

ناس ديالها قلال كيقلب بعينيه حتى بانت ليه كالسة فالقنت ديال القهوة شعرها الرطب الكحل مغطي عينيها دورات وجها غير بان ليها وقفات وتبسمات فتحات ليه إيدها ماهمهاش ناس لي كانو قلال كالسين عنقاتو بكل قوة ونطقات :
-كنت خايفة لامتجيش خايفة لانمشي بحال المرة لي فاتت ومنشوفكش
هو : منقدرش نخليك ومنقدرش نتصور راسي تمشي ومنشوفك (كيقلب وجها بعينيها لي عامرين حب وشوق ليها وحزن حيت اتمشي تاني وتفرق عليه وتخليه بوحدو ولكن مايسمحش لي كان ليه حيلة وسباب واخا ولداتو وكبراتو ولكن الحقد والبغض عامي ليها عينيها مايسمحش ليها حيت واقف عقبة فطريقو وعندها طبقات والمستوى 

والحسب والنسب هوما كولشي واخا تكون هاد البنت لي مافحالهاش من دمها ولحمها مكيهمهاش كيهمها راسها وناس خاصهم يكولو فلان خدا بنت عائلة فلان ولكن هادشي قريب ايدير ليه حد خاصو غير شوية دالوقت وقت لي يولي مسؤول وقاد براسو وبيها.....
****
داز نهار جمعة عندي تقيل لبست فيه قبيتي وخرجت دزت عند عمي محمد شديت معاه جماعة وضحك شوف واش نشوفو ولالا من عندو دزت لفين كنت خدامة المحال مسدود مخليت فين مشيت داوني رجليا لدار عمتي لقديمة فين كانت ساكنة عليت عينيا فيراجم مطرقين إيييه بحال إلى عمرها كانت شحال جريت فهاد الحومة ونقزت 

وشحال طلات عليا من سرجم تخاصم عليا ندخل لدار خلاص أودي كيدوزو شي أيام توحش غير تعاودهم مكيتعاودوش حدرت راسي وكملت طريقي كلست فواحد جردة مكابلة لي غادي ولي جاي حتى كال المغرب الله أكبر نضت فحالاتي ندخل لدار جبدت الباسيةر ديالي يلاه شهرين باش قادو ليا بابا هو ولاكارط بحال إلى علمو الله كان 

كاليا :
أحمد :والواحد ايصايب ويخبي متعرفي ابنتي شنو تجيب الوقت ومحدي بعدا كونجي نصايبهم ليك أنا...
** وهاهوما دابا معرفت الوقت شنو تجيب ينفعوني جبدت الفلوس لي بقاو لويت عليهم سولوفان وسكوتش وحزمت بيهم كرشي اما لي حولت لأورو درتهم فسلوفان ودرهتم غجيب ديال تجاكيط لي غادي نلبس لبست كولون ديال صوفة وتريكوه باش الغد فصباح غير نلحك نلبس عليهم تجاكيط وسروال تجين فتحت الكونيكسيون 

ودخلت كنقلب على شي كلمات بالاسبانية كيفاش نشد طاكسي وكيفاش نعطيه العنوان وبزاف ديال الحوايج غير باش نسلك راسي بقيت هكاك حتى حسيت بعينيا كيتسدو عمرت تيليفون على 5:30 ونعست فالمراح....منين كتبغي ساعة تسوني مكاتسونيش والعكس صحيح مع سونات ساعة كمزت من بلاصتي قلبي كيضرب أو واحد 

الخلعة شداني معرفتهاش ديالاش نضت توضيت وصليت جوج ركعات طلبت ربي مايحاشمنيش لبست سروال دجين وتجاكيط على البرد طاكية فوق راسي شفت فالمرايا طلعت راسي وهبطو كولشي مزيان هزيت سكادو على ظهري الفلوس لاصقين معايا وكولشي مزيان....سديت شراجم من على الغبرة سديت الما وطيحت المكانة ديال 

الضو وخرجت سورت دار مزيان درت ساروت فساكي وشديت طاكسي لمحطة غادية لمصير معرفتوش كيفاش أيكون وصلت لمحطة بقيت واقفة كنشوف فجنابي نتسنى دراري عندك يكونو داروها بيا وداو الفلوس اناري لا وجهي بدا كيبرد والخلعة كتشدني... نباني صوت ورايا
--ههههه وسبقتينا أجنية...درت بان ليا كريم ورشيد
ماريا :على سلامة من صباح وانا كنتسنى فيكم
كريم :عطلنا هاد بوراص هدا
رشيد :أنا انمشي نقطع ونجي....مشا رشيد يقطع لينا وبقينا انا وكريم
كريم :أجي فطرتي بعدا؟
ماريا :معنديش منين يدوز الخلعة شداني....

كريم : معندك مناش تخافي غير توكلي على الله وحنى معاك حسبي خوتك معاك متخافي من حتى حاجة...تبسمات ليه ماريا وحدرات راسها رجع رشيد هاز فيديه 3دالورقات
رشيد :الكار راهو بقات ليه 5دقايق ويقلع...طلعنا لكار شدينا بلايصنا مكملات 5 دقايق حتى كان قلع الكار وخرج من المحطة غاديين وكنشوف شوارع لي كنت كندوز منهم كندير باي باي لمدينتي من سرجم يامدينتي معرفت راسي انرجع ليك ولالا كنحقق فكل بلاصة ونلصقها فالميموار ديالي شد الكار طريق وخرج من مدينتي 

أسفي....
****
#بعد_بضع_ساعات
وصلنا أخيرا لطنجة العالية كان الجو بارد شوية ماشي بزااف...شير رشيد لطاكسي وركبنا بتلاتة بينا كاليه يدينا لمرسا فين انتلاقاو بسيد دغية وصلنا.... نزلنا خلص مول طاكسي مشا جبد رشيد تيليفون سونا لسيد وعلمو بلي وصلنا 10 دقايق كان عندنا غادي هو ورشيد القدام وانا وكريم اللور هبطنا مع واحد الهبطة بينا وبين البحر غير 

شبر صغير كاينة واحد دخلة كبيرة مابيناش مضلمة فيها شي 40 واحد وحنا كمالت 43 هو كامل اتهزهم الفلوكة نبانا السيد لي كان سميتو حسان :
حسان : اتبقاو هنا ليلة قبل الفجر اتخرج الفلوكة كولشي يكون واجد وباش نعلمكم من هنا قبل منوصلو لخط ديال البوليس ديال البحر اتلاحو لي كيعرف يعوم مرحبا لي مكيعرف غير يرجع لدارهم انا علمتكم...
ماريا :علاش انخرجو دابا؟
حسان :اليوم السبت الاغلبية مخدامش حسن من الايام لوخرا يلاه نتشاوفو...خلانا ومشا دورت وجي كيبان ليا الأغلبية دراري شي جوج ديال البنات لي كاينات شي كيشوف فشي ومعانا شي أفارقة حتى هوما كلسنا وتمخششنا حداهم واحد المنظر صعيب تفهمو خاص حتى تحط فيه أش بقا منين شباب كيغامرو براسهم ويكلسو هاد الكلسة 

ديال الذل علاش حيت مالقاوش لي بغاو بلادهم كتجري عليهم اودي سكات خياار...
كريم :ماريا اتكلسي وسطنا انا ورشيد باش مايتحكك بيك حتى واحد واخا
ماريا واخا...ساعة كدوز بسوايع كدوز تقيلة بزااف وكلما بدا الحال يظلام والخلعة كتركبك من راسك لرجليك... لي معانا كل واحد جابد طرف ديال الخبز وكياكول فيه قاتلهم جوع انا بالخلعة لي راكباني تسدات ليا شهية كنشوف قدامي ومقابلة الماج وماهم لي كيترش على وجهي....ظلام الحال وليل طاح 12 ديال ليل بضبط كاع 

المجموعة تحزمت وتسلحت وجمعات وطوات ومستعدة باش طلع لفلوكة ضربات لوحدة ديال الليل كنسمعو صوت ديال خطوات شي واحد هابط فدروج طلع علينا راس حسان وشير لينا بيديه نخرجو هاز بيل مضوي علينا بيه :
حسان :تبعوني ومتلفتوش وراكم وتحركو بشوية ودغية...سبقنا وتمينا تابعينو من اللور بزربة كاتبان لينا واحد زودياكة(الفلوكة ديال الحريك) واقف كيلعبو بيها المواج طلع حسان فيها هو اللول وتبعوه دراري واحد تابع تاني وقفات وحدة فالبنات لي كانو معانا وهيا تنطق:
-أنا انا منقدش نمشي معاكم رجع ليا فلوسي مابغيتش أخويا مابغيتش(بخوف)
حسان :مكنلعبوش هنا فلوسك باح اماما مابغيتي تمشي شغلك هداك مغانبززش عليك وأنتوما يلاه معندناش الوقت...طلع كريم مد ليا إيديه بقيت كنشوف فيه وقلبي كيضرب سرط ريقي ومديت ليه إيدي جرني لعندو وكلسني حداه وحدايا رشيد شي مزاحم مع شي ولي شاط كلس فوسط الفلوكة همست لكريم:
ماريا :كريم عفاك ديرني قدامك أندوخ الى كلست على الحافة
كريم :واخا أجي بين رجليا...نضت وكلست بين رجليه درت القب ديال تجاكيط على طاكية ولبست صباعيات وعنقت صكادويا كولشي طلع حرك حسان الموطور ديال الفلوكة بدات كتحرك وكتخرج على المرسا شوية بشوية غمضت عينيا وبديت كنقرا فالقرآن ونستغفر ونشهد واها تكون قوي حتى تعيا فهاد الموقف مايحس بيه غير لي 

مجربو ولي فبلاصتي دابا شدني جوع حليت ساكي وجبدت خبيز والكاشير وسظيت جوعي كنشوف غير عند رجليا مغمضة عينيا باش منشوفش فالبخر وندوخ.....كولشي ساكت حد مكيهضر مع حد كولشي يقرا فالقرآن وكيتمنى يوصل على خير وميطرا والو حتى واحد مكينعس ولا يسد عينيه تغفل هك ولا هك مشيتي من غير البنت لي 

كانت معانا ولي بقات خدات فانيد دوخة وشرباتو معنقها واحد دري يمكن صاحبها.....ليل كولو والفلوكة كضرب بينا حتى صبح الصباح كيبان ليك واحد المنظر فشكااال غير انت وسما والبحر داز نهار تاني وحنى الماج كيضربو بينا غير طلعك شي موجة بجهد كتكول صافي هاد الاخيرة ليا وصل ليل ضو باهت بدا كيبان لينا نطق 

حسان لي مهضرش معانا منين ركبنا
حسان :حنا قربنا والبوليس ديال سواحل كيدورو غير نقربو نكوليكم تلاحو تلاحو....جاب الله بعدا كنعرف نعوم أما كون واداني البحر وكلاني 
رشيد : ماريا كتعرفي تعومي...ماهضرتش وميت براسي بمعنى أه
رشيد :مزيان....الضو غادي وكايوضاح وكيقرب دراري لي تم كولشي موجد يتلاح وقفات بينا زودياكة وعطانا حسان لورد نتلاحو بداو دراري واحد تابع تاني كيتلاح كاليا كريم :
كريم :ماريا انتلاح انا ورشيد وتبعينا وطريق لي ماشيين فيها تبعينا واخا
ماريا :واخا....تلاح رشيد تبعو كريم حسبت ل3 وشهدت وتلاحيت مع ساكي لي كنت دايراه على ظهري محزمة بيه تبعت رشيد وكريم....

كيعومو وانا تابعاهم الما كان بارد كولي وليت نترعد كنغطسو حتى كنحتاجو لهوى ونعليو راسنا فواحد الوقت هزيت راسي ضربت شيحاجة بجبهتي كاتبان ليا قرعة دزاج فيها شيحاجة لوسط مع خفت دراري يفوتو هزيتها وخشيتها فصدري وكملت العومان كيبان لينا ضو ديال الفارو كيدور على البحر كولو او واحد الفلوكة 

فيها البوليس كدور تخبينا عند واحد الحيط ديال صور دالمرسا كان مظلم جمدنا تم بينما دخلو لبحر مزيان
كريم :انعوما حتى لراس تما كيبان ليا مكاين حد ونطلعو صافي
ماريا :واخا...تبعت دراري إيديا عياو وسكادو لي هازة صافي فشلت عمنا حتى لفين كالينا كريم أو وقفنا تعلى كريم هو لول تبعو رشيد عاد مدو ليا إيديهم هزوني كنكطر والبرد فيا....
كريم :شاف فماريا)ختي ماريا لي علينا درناه دابا مكاين حتى واحد البوليس فتناهم والحمد لله على سلامتك وسلامتنا ولكن حنا دراري انضيبانيو فزنقة بينما جا واحد صاحبنا عندنا وأنت كلت بلي اضيباني راسك
ماريا :شكرا بزااف ادراري... درتو معايا كثر من جهدكم.... الله يسهل عليكم أنا عندي فين نمشي دابا نتلاقاو فياعة الخير إن شاء الله
رشيد :كيضحك)وهذا الما شدونا ورجعونا يلاه اماريا تهلاي اختي الله يعاون...تسيفطت مع دراري مشاو وخلاوني كنشوف فجنابي خاصني نشد الكار من الخزيرات لبرسلونة وظاكشي لي كان غادية بحالتي حتى لقيت شي دراري كانو معايا حتى هوما كيركبو فالكار طلعت معاهم خلصت تيكيت وديمارا الكار الشيفور لي سايك بينا كان 

مغريبي الى ماخفت نكدب حتى هو عندو علاقة بحسان والله أعلم وصلنا اخيرا لبرسلونة هبطنا جبدت من جيبي الكارطونة لي فيها لادريسة ديال بابا حليتها من سكوتش والميكا وجبدت الفلوس لي صرفت وتميت خارجة لزربة جيهت شارع واقفة كنشوف فليمن وشمال على وعسا دوز طاكسي كنحفظ شنو انكول لا نغلط حتى بانت ليا 

طاكسي جايا هزيت إيدي وشيرت ليها
ماريا: ¡Taxi! طاكسي..وقف عند رجلي هبط زاج وشاف فيا.... 
Taxista: ¿A dónde
señorita? طاكسيسطا: فين غادية أمدموزيل؟
ماريا: A esta dirección pof favor لهاد عنوان الله يخليك....ركبت ومديت ليه العنوان جبد جيبي أيس ودار فيها العنوان وقبط الطريق غادية وكنشوف فالأحياء عالم تاني ويد دنيا نقية وزوينة حتى فليل خلي نهار بقينا غاديين مسافة حتى وقف قدام شي ديور شاف فيا وكال :
taxista: esta es la dirección, طاكسيسطا: هدا هو عنوان
ماريا ¿Cuánto será? شحال ثمن
Taxista: 30 eurosطاكسيسطا: 30 € 
ماريا: Aquí tiene هاهي )
Taxista: Ten el cambio
طاكسيسطا: هك صرف
ماريا: Gracias, que tanga una buena noche شكرا كنتمنى لك ليلة سعيدة 
Taxista: A ti طاكسيسطا : حتى انت
من بعد مامشا طاكسي تنهدت وحمدت الله منين سلكوني هاد جوج كليمات وعرفت نشد طاكسي واقفة كنشوف فديور بابا وراني دار من برا فين هيا فين هيا بان ليا ضو شاحل فوحدة بابها زرق جبدت تيليفون وجبدت تصويرة كنقارن كلت ندق وامري لله... تمشيت حتى لقدامها ودقيت تسنيت شوية ورجعت دقيت مرة تانية سمعت حس 

المشية وساروت ديال الباب كيدور تحل الباب عليت راسي فوجه بابا لي واقف كيمسح راسو بالفوطة بقا مكوانسي ومخرج عينيه معرف يهضر ولا يبقا ساكت جاتو دوخة..
أحمد :ماريا!!!!....
*****
كالسة ماريا على الفوطوي مبدلة حوابجها بيجامة ديال باها جامعة رجليها وساكتة وكتسنط لغوات باها... لي مسكتش منين دخلات كاع هضرتها متقبلهاش
أحمد :واش تسطيتي ولا مال طاسيلك غير كولي ليا أ عند بالي البنت كتقرا وهيا كتخطط ورا ظهري كيفاش تقطع البحر وتحرك وليتي ظوفري اماريا على اخر ياكي وليت والد زوفري ماحشمتي مكلتي هاد سلكة لي سلكتي يدي البحر شنو أيوقع ليا ماكتفكريش طايشة والعقل معندكش دايرة راسك فدراري هادوك دراري انت راه بنت واش 

عارفة شحال من واحد كيموت وهو جاي لهنا ولالا
ماريا :ولكن....
مخلاهاش تكمل
أحمد :غادي تسكتي وتسنطي ليا دابا أنا شنو أندير معاك عرفتي إلى حصلتي أيسيفطوك مع اول طيارة فخبارك ولالا كون اكنتي تحت سن القانوني بعدا تشدك الخيرية تقريك ودير ليك وراقك اغير كولي ليا اماريا أش هادشي درتي سمحتي فقرايتك ابنتي بغيتك تكوني هما وشان وجايا تجلوقي هنا
ماريا :أنا قريت انا كملت كاع قرايتي الما كان باك صاحبي وعندي فلوس صحيحة والله لا شديت بوسط مزيان جاتك هانية تخلي بنت بوحدها عندها 18 عام معرفتي حد يدخل عليها ولا يغتصبوها ولا يخطفوها كاع وحدة أولداتني وهربات علم الله فين كاينة ولا اش كدير عمتي تزوجات راهيا مشات تبرع مع راستها وانت ابابا تغربتي لا 

حنين لا رحيم لا فميلة لا صحاب اللهم حتى انا نشزف راسي ياربحة يادبحة وانت لي علمتيني منخاف غير من لي خلقني وغير تهنا أبابا الى مكنتيش باغيني صبر عليا غير نخدم ونشوف فين نسكن....شاف فيها مجاوبهاش حيت عنرها هضرات معاه بهاد طريقة كلامها ضرو نصو عندو الحق فيه ونصو مكانش عليها تكولو خلاها واقفة 

ومشا لبيتو سد عليه كلس جامع إيديه وكيخمم...
@فلاش_باك

أحمد :كيغوت)انت ام أنت لي مخلية بنتك بلا ماكلة وخارجة دوري على صحاباتك فديورهم البنت ماكلات من صباح جيت كنلاقا سخانتها طالعة.... قاطعاتو بصوتها لي كيضر فراس
حورية :صافي صافي ضريتيني فراسي لا انت لا ديك البعلوكة العيالات لي والداهم مواتهم فخرقة بيضة عايشات كل مرة وفين مسافرات ها دهوبات ها شراتل هالحوايج وانا من نهار خديتك سلسلة لاخرة معنديش شايفا معاك ادل والقهرة مالي أخويا على حالتي مزال ظيني وجايبة العين شوف الله يعطيك ستر هاد دار ربح بيها بغيتها 

تريب علك وبلاصتي زرع فيها الحبق وبراتي توصلني وعنرك توريني وجك راه بنتك ربح بيها كولها انت كاع....ضربات فيه ودخلات لبيتها فين كانت هازة حوايجها ومعولة على خزيت هزات ساكها وضربات لباب من تم عمرو شاف وجها حتى من طلاق طلقها غيابي المحكمة ومحضراتش ليها....
#الحاضر
تنهد أحمد وتكا فبلاصتو كيخمم كي ايدير مع ماريا وهاد الحريرة معليه غير يعنق بنتو ويخليها فحصانو ويوقف معاها حتى دير مستقبالها وتكون راسها.... ناض من بلاصتو فتح الباب وخرج عندها لقاها كالسة فبلاصتها فين خلاها قرب لعندها وكلس حداها جبدها لعندو وعنقها وحتى هيا كانت على سبة تخشات فيه وعنقاتو..
ماريا :سمح ليا ابابا مقصدتش نغوت عليك
أحمد :حتى انت سمحيليا أبنتي لي خليتك بوحدك وخليت هاد الحريك يدخل راسك دابا لي فات فات ولي وقع وقع معندنا منديرو اتكلسي معززة مكرمة بينما شفت شنو نديرو عطيني الوقت بينما سخنت بلاصتي هنا ونطلب الباطرون يعاوني نصايب ليك الوراق واخا صعيب وكياخد وقت كبير ولكن نصبرو معندنا منديرو
ماريا :بغيت نخدم
أحمد :واماريا فين اتخدمي راه قليل لي يقبلك بلا وراق
ماريا :شافت فيه)بابا تيق فيا امرة وحدة فحياتك وخليني ندير لي بغيت ولا عاليك انا بعقلي وعارفة اشنو كندير
أحمد :ناض) أنت تعرفي أبنتي يلاه تصبحي على خير رتاحي البيت لي بدلتي فيه هو بيتك حوايجك صباح اتلقايهم ناشفين....مشا بابا ينعس وبقيت انا كالسة فبلاصتي فين كنت وفين وليت لبست صندالة فرجلي ومشيت لبيت مدكدكة وبغيت أنعس يلاه انتخشا فبلاصتي تفكرت القرعة حطيتها على طبلة رجعت لطبلة لقيتها مزال محطوطة 

هزيتها ودخلت لبيت كانت قرعة بحال ديال الافلام لي كيديرو فيهم البراوات ويلوحوهم فالبحر سدادة ديالها ديال الخشب قرعة صغيرة فالكحل حليتها بزز باش تحلات وبديت نخبط فيها طاحت منها ورقة صغيرة فالبيج تعجبت حطيت القرعة من إيدي وشديت الورقة حليتها كنقرا شنو مكتوب فيها وايلي زعمة هادي غير صظفة ولا كيفاش 

الورقة مكتوب فيها جوج سميات ماريا و نيفان(maria & nivan) باين أيكونو هادو شي عشاق لاحو سمياتهم فالبحر
ماريا :نخبيها ومحتافض بيها تبقى دكرى تفكرني بهاد المغامرة لي دوزت فحياتي وعمري نسا هاد المرحلة لي غامرت فيها....شديت القعة ورجعت ليها الورقة وحطيتها ديكور فالبيت ديالي تخشيت تحت المانطة وطفيت ضو ولأول مرة من بعد هاد الأيام لي دازو أنعس وأنا مرتاحة....
****
بابا مسكين كان غير كيجي وكيخرجني يدورني باش نحفض المدينة حتى لواحد نهار كنت خارجة انا وياه دخل لسوبير مارشي وبقيت على برا كانتسناه حتى كيبان ليا محال مكتوب فيه محتاجين لوحدة دير الميناج المحال كان عبارة على صالون ديال العيالات كلت ندخل ونتوكل على الله هزيت ورقة لي كانت فجيبي كمت مقيدة فيها شي 

كلمات نهار على نهار كنتعلم لإسبانية عدغير فدار قاديت حالتي دقيت فالباب دورت ساقتة ودخلت كندور فراسي المحال كيداير صالون غير كل صالونات مجهز احسن تجهيزات البنات لي خدامات لاحضو دخول ديالي ولكن كملو خدمتهم حتى وقفات قدامي مرة فربعينات طويلة رقيقة شعرها صفر وعينيها بحال لوز تبسمات ليا وكالت 

hola.. buenos días
María: Hola, buenos días
ماريا : سلام ،صباح الخير 
Peluquera: Hola guapa, ¿en qué te puedo
ayudar?
الكوافورة: سلام زين ،باش يمكن لي نعاونك
María: He visto el cartel de fuera y me
preguntaba si todavía buscas alguien para limpiar.
ماريا: شفت الورقة على برا وجيت نسولك واش بقي محتاجين حد للميناج 
Peluquera: Ay sí hija, por supuesto. Déjame el
DNI para fotocopiarlo.
كوافورة : اه ابنتي طبعا ، اعطيني بطاقة إقامة ديالك باش نعملها فطوكوبيا 
María: Emmm... Perdona, sólo tengo 
pasaporte.
ماريا: اممممممم..... سمحيليا عندي غير باسبور ( جواز سفر )😔 
Peluquera: ¿Entonces no tienes papeles?
كوافورة : ادن معندكش الوراق 
María: No, acabo de llegar aquí y necesito un trabajo urgente.
ماريا : لا ، انا عاد جيت لهنا ومحتاجة خدمة بزربة 
Peluquera: Vale, te voy a hacer un favor, voy a darte el trabajo, pero si alguien que te parezca raro entra, actúa 

como si fueras una clienta.
كوافورة : وخا ، انا غدي ندير فيك معروف ، غدي نعطيك خدمة ، ولكن الى شي حد غريب دخل ، غدي تتصرفي بحال كليانة دلمحل 
María: Sí, sí, por supuesto.
ماريا: وخا وخا بتأكيد
Peluquera: Y, ¿cuánto quieres a la hora?
كوافورة : وشحال خصك لساعة ؟
María: No tengo problema, necesito el trabajo y el dinero, pero como tu veas.
ماريا: معنديش مشكل، انا محتاجة للخدمة ،ومحتاجة للفلوس، لشفتي انتي.. 
Peluquería: ¿Qué te parece 5 euros la hora?
كوافورة :؟ شنو بانلك خمسة أورو ساعة ؟ 
María: Sí, perfecto. ¿cuándo puedo comenzar?واخا ، مزيان ؟وامتى نقدر نبدا؟
Peluquería: A partir de ahora si quieres. Ven
conmigo y te enseño el armario con los productos de limpieza.
كوافورة : من دبا ادا بغيتي ، اجي معايا باش نوريك ماريو ل فيه مواد التنظيف...طلبت منها تخليني نمشي نعلم بابا ونرجع....خرجت عند بابا لقيتو واقف كيتسنى فيا ومخلوع
أحمد : الله أبنتي فين كنتي؟
ماريا :بابا لقيت خدمة(بحماس)
أحمد :فين؟؟...عاودت ليه كولشي واخا ماعجبو حال ولكن خلاني واخا كدبت وكتليه انشد الحساب
أحمد :ولغة؟
ماريا :متخافش ابابا مسلكة راسي او وقتما رجعت لدار انتعلم نبقى هكا حتى نولي نعرف يلاه ابابا هاني مشيت 
أحمد :واخا أبنتي غير تخرجي شدي طاكسي نيشان لدار حضي راسك الله يعاونك....مشا بابا ورجعت لصالون داتني الباطرونة لفيستير وراتني بلاصت سطل وكاع مواد تنظيف جافيل تيد سانيكروا الما دزاج كولشي ومشات لخدمتها خدمتي كتبظا منين يقرب يتسد المحال وفصباح فاش ندخل كلست فالفيستير كنقلب فتيليفوني حتى دخلات 

عليا بنت لابسة كسوة فالغوز ومكتوب فيها سميت المحال شعرها طويل كحل وزوينة عينيها كبار مشفرين وحروفها كحلين تبسمت ليها واشرت ليها براسي وهيا تنطق :
- أنت مغربية؟؟ وقفت وشفت فيها فرحانة
ماريا :أه مغربية واش حتى انت مغربية؟؟(بحماس)....ضحكات :
- هههه شنو بان ليك؟
ماريا :أنا ماريا وانت؟؟؟مدات ليها إيديها وإبتسامة خجولة على فمها وعينيها كيبريو
- أنا وردة ومسمييني فصالون روساليندا....☺☺

ماريا :مشرفين فرحتيني منين لقيت بعدا مغربية
وردة :واش معندكش الوراق؟
ماريا :هههه لا جيت حاركة
وردة :بصدمة)كتفلاي حلفي
ماريا :والله مكنتفلى والله حتى جيت حاركة
وردة :كلسات) والله معندي مانسالك برافو عليك
ماريا :وأنت كيفاش جيتي لهنا
وردة :قصة طويلة نكونو خارجين ونعاود ليك...
**** 
وهوما خارجين من الخدمة غاديين فطريق
ماريا :إيوا معاودتيش ليا شنو جابك لهنا شحال فعمرك وسمحيليا كنسول بزااف
وردة لالا بالعكس هههه انا فعمري 21 سنة جيت لسبانيا مع والديا كان عندي 14 سنة يعني عندي وراق ديالي وكولشي ديالي من صغري إيوا توفات ماما وانا فعمري 16 سنة
ماريا :الله اكبر سمحيليا
وردة :لا عادي إيوا وبابا تزوج واحد صباح فقت مالقيتوش فدار لا هو لا حوايجو من غير ورقة كاتب فيها بلي أيتزوج وبلي مابقاش قاد يصرف عليا ولا يربيني او من تماك ليومنا هدا ماشفتوش
ماريا : واو معرفت منكول والله وبقيتي هنا كتخدمي؟
وردة :لالا حنا قبل كنا عايشين فاس بابا فاسي وماما من إيموزار بغاو بعضهم وتزوجو إيوا منين مابقى عندي حد هنا قلت نهبط المغرب هبط وانا بنت 17 عام بوحدي شادة طيارة ومجرجرة فالكيران هههه(كضحك بحصرة) باش زعمة نمشي عند عائلة ماما يحضنوني ياعة حتى هوما نكروني داروني مكيناش شحال وانا كنقلب على 

خدمة حتى لقيت خدمة فواحد لاصال ديال العيالات وخدمت معلمة ديال الرقص الشرقي واخا هكاك معجبتنيش مكنديرش حاجة خايبة ولكن ماسي داكشي لي بغيت إيوا قلت نرجع جددت الوراق ديالي ورجعت لسبانيا وهانتي كيف كتشوفي دابا..
ماريا :انت بحالي معندك زهر مع الفاميلة انت ماماك ماتت اما انا راه سمحات فيا بنت عامين وهربات بابا لي رباني وعندي عنة وحدة حتى هيا تزوجات وعلم الله فين مشات..
وردة :باش توصلي لشي حاجة زوينة فهاد دنيا ضروري خاصك تعاني معندك مديري من غير صبر
ماريا : وقفات)جماعة معاك حلوة ولكن خاصني نشد طاكسي 
وردة :فين كتسكني؟
ماريا :والله مظال محفضت لادريسة بلات نوريك...جبدات ماريا الورقة مداتها لوردة شافتها وهيا تبسم
وردة :أنشدو طاكسي واحد حتى انا ساكنة فنفس الكارتيي غير بعيدة عليا انت بشي ثلاتة ديال زنقات
ماريا :صدفة زوينة شفتي...شيرات وردة اطاكسي وقف طلعنا عطاتو 5 اورو وعاد عطاتو العنوان.... وقفني انا لولة نزلت شيرت لوردة وكمل طاكسي طريقو يوصلها فين بغات دخلت لدار لقيت بابا موجد سباكيتي مسكين
ماريا :بابا علاش عدبتي راسك خليني حتى انجي ونوجد العشا أنا
أحمد :دنيا هانية ابنتي شحال هادي ماكليتي طيابي
ماريا :كتحيد فالمونجو ديالها وكتعلق فيه)تلاقيت بواحد البمت مغربية معانا فالخدمة اسميتها وردة ضريفة بزااف
احمد :وعنداك أبنتي متيقيش ناس ماشي بحالك كوني على بال
ماريا :جرات الكرسي وكلسات)لالا متخافش ابابا درية ضريفة باينة من وجها كيكوليك سيماهم على وجوههم
أحمد :شحال دارت معاك بعدا مولات صالون؟
ماريا :كدور سباكيتي بالفرشيطة وكتخشي فوجها) 5اورو لساعة
أحمد :إيوا مزيان هضرت مع المدير على قبل الوراق خاصني غير نعطيه الباسبور والوراق ديالك تبوتية وديال الازدياد وشي وراق اخرين وهو أيعاوني
ماريا :دابا على شحال عاد يخرجو ليا؟
أحمد :انت وزهرك على حساب كاين لي كيخرجو ليه على 3 سنين على 4 خمسة ستة وكاين لي حتى 10 كل واحد وهو
ماريا :إيوا على الله يكون عندنا شي زهر ويخرجو لينا قبل
أحمد :كلشي ممكن خاص غير صبر وربي يدير لي فيها الخير....
****
الغد ليه فقت بكري باش نعطي إنطباع مزيان عند مولات شي خديت باسبور معايا لبست حوايجي جمعت شعري هزيت دوبل ساروت او واحد طرف دالخبز فيه زبدة خليت لبابا ورقة بلي راني مشيت لخدمة وخرجت غادية وكناكول شديت طاكسي نيشان لي واخا هكاك مكانش بعيد دقيت ودخلت كولشي كيسلم عليك ويتعاملو معاك بحال الى 

وحدة منهم لقيتهم حاطين كرواصة وكيسان ديال الحليب بشكلاط مدو ليا واحد طاس مع واحد بتي بان كلينا واخا كلام كنفهمو وكلام لا خليتهم مجموعات فالفيستير ديال صالون وهزيت مسائلي وبديت بالميناج مسيح المرايات والبوطاجي تشطاب عاد تجفاف كولشي رضيتو نفي وكيشعل دخلات الباطرونة لي كان سميتها لوسييا شافت 

المحال أشرات ليا براسها بمعنى مزيان تبسمات وطلعات للبيرو ديالها لي حتى هو منسيتوش من مقى ساليت رديت المسائل ديالي لبلاصتهم ورجعت لفيستير كالسة حتى دخلات وردة سلمات علينا وجات لعندي
وردة :كلت انتلقاو فطريق ساعة انت سبقتيني
ماريا :إيوا هادي البدية ديال الخدمة خاص نبين حداكة إيديا
وردة :كتحيد حوايجها)مزيان الالة ريحة عطات العربون...لبسات وردة كسوتها وشافت فماريا
وردة :لوسييا كتعطينا ساعتين ديال الغدا انا عارضة عليك واحد سناك فدورة كيدير واحد البيتزا منعاودش ليك
ماريا :وانا مغاديش نكوليك ألا مرحبا ههههه....

وصل وقت لغدا لبسات وردة مونطو على الكسوة ديال الخدمة وخرجنا انا وياها درنا مع شارع فين جا صالون كاتبان لينا بلاكة ديال طرف البيتزا
ماريا :هداك هو؟
وردة :هو هداك هههه
ماريا :ريحة الفرماج واصلة لهنا سيحات ليا ريوكي
وردة :زانا جيت طالباك ديما كناكول هنا حتى مول شي ولا حافضني...فعلا غير دخلنا الباطرون سلم على وردة وكيضحك معاها خدينا طبلة خدات هيا بيتزا طون وأنا ديال فخوي دوميغ.... منين حطها قدامنا مهزيناش الراس هههه بحالها بحالي سبحان الله وحنا كناكلو سونا ليها تيليفون هزيت فيها عيني كيبانو ليا عينيها كيبريو 

وملامحها تبدلو لفرحة فتحات الخط وكالت:
وردة :ألو..أحم ههه الحمد لله وأنت... ممم اه لاباس الحمد لله،،شوية وجها ولا حمر من الحشمة شدات على وجها وكالت :
- حتى أنا احم انا دابا خارجة نتغدا حتى نمشي لدار فالعشية ونهضرو واخا ... حتى أنا وبزااااف... قطعات الخط حطات تيليفون بشوية بحال الى خايفة عليه يتهرس وهو وسطو وجها وفمها بقاو مبسمين وساهيين حتى قاطعاتها ماريا وهيا كتاكول
ماريا :الحب الصعيب والعشق موصيبة خلاوها مالين الراي
وردة :هاه هههه كيفاش؟
ماريا :كيفاش هههه اودي معامن كنهضر انا غايبة على الوعي اح فيك أشنيولة
وردة :كنبغيه بزااف اماريا بزاااف كتر متصوري والله
ماريا :الله ياختي الله شكون هذا؟عاودي ليا الى بغيتي؟
وردة :بطبيعة الحال انعاود ليك رتاحيت ليك بزااف خصوصا معندي صحابات هنا هذا امين ولد خالتي تقدري تقولي حب صغر هو كبر مني بعام واحد عندو 22 عام دابا
ماريا :باقي صغير
وردة :أه كيقرا ولكن تشوفيه متعطيهش عمرو هو ظريف وقاري واعي وراجل جينتيل مان كيف كيكولو الله عمري فحياتي كنت نظن نبغي شي واحد بهاد درجة والله
ماريا :كتاكل لا إحساس لا مشاعر حبها هو هاد رويضة لي قدامها)مممم هو كاين هنا؟
وردة :لا هو فالمغرب
ماريا :مزيان واش باغي المعقول ولا تفلية الى بغا غير تفليات كوليه أخويا حنى معندناش بنات لتفلية بغا المعقول مرحبا كرطونة دسكر قاضية الغراض
وردة :كضحك)ههههه ضحكتيني اماريا الله يعطيك الخير هو باغيني كونما باغيني ميحاربش على قبلي
ماريا :علاش حتى الحب فيه الحرب انا عاهدي بالحرب كاينة غير فتاريخ الحرب العالمية الاولى وتانية الى زادو حرب الحب سمحيليا ماقريتهاش
وردة :كاريا كنهضر بصح
ماريا :والله اختي حتى انا كنهضر بصح كيفاش كيحارب علاش مالو
وردة :خالتي رافضة نتجمع انا وياه...شافت فيها ماريا هازة حاجب ومهبطة تاني
ماريا :خالتك خالتك هادي اخالتك واش خلات لبراني؟
وردة :وتلقاي الخير فالبراني ومناقايهش لي فدمك ولحمك اماريا اش كنعاود ليك انا من صباح 
ماريا :وعلاش زعمة انت بنت ختها وهيا لي خاصها تحضنك من بعد موت ختها
وردة :نبك لاواه ماشي اتحضني هاد خالتي طاغية وعند بالها ماعرفت شكون هيا اول حاجة كتليه متديش ليا رقاصة واخا أنا راه كنت معلمة فلاصال هيا مابغاتش تفهم هادشي عندهم هادشي ديال الاعراف وتقاليد فوق كولشي كاتليه ماتجيبش ليا وحدة مكحطة ماتكساب متعلام
ماريا :حطات لي فيديها)واش هاد خالتك شوية لاباس باينة شي وحدة معندها عشا ليلة بغات تبروفيتي فبنات ناس
وردة :أشمن انت مكتعرفيش شكون هيا الحاجة سعدية مرات سيدي الحاج عبد الرحمان الإبراهيمي....بدات ماريا كترمش بعينيها
ماريا :واش الإبراهيمي الابراهيمي لي كنيتو مطبوعة على ليمون وتفاح وديسيرات؟؟
وردة :أياااه الالة نص فإيموزار ديالو الفيرمات والخيل خلي الفيرمات لي فبني ملال ورمان وشجر ليمون وشجر لوز وشجر ديال زيتون خلي البكر والبهايم كل بلاد فأوروبا حاط فيها إيدو شركات ديال الحليب كيتعاملو معاه وشركات ديال سيرو ديال الرمان هادشي غير القليل لكبير وصغير كيحتارمو ومايقد حتى واحد يعطس قدامو 
ماريا :ولاواه بزاااف مالو اش كيكون كاع؟
وردة :كنكوليك كل بلاد حاط فيها سميتو وكاع المنتوجات ديالو كيتصدرو لأوروبا نص كيتصدر المغرب وكيتباع فسواق الكبيرة الحليب ديالو نص كيمشي لأفريقيا ونص لأوروبا غير فيرماتو كداش تحلي فمك تشوفي القصر ديالو قداش فإفران اماريا تحلي فمك
ماريا :ومنين ضبرات عليه خالتك؟
وردة :كانت كتخدم فشي فيرما عند باه وشافها كالت ليا ماما كانت زوينة بزاااف وعاطية العين خداها صاحبة ليه حيت كان لي حط عليها عينو كتكون ديالو معرفتش كيفاش دارت ليه...
ماريا :على ماعودتي ليا خالتك كادة بكدودها ياختي مشكات عليا باينة شريرة معصعصة وانت مالك بهاد المشاكل اختي عطا الله الرجال....

وردة :نهار دوقي الحب ايبقى يبان ليك غير واحد الوجه او واحد الشخص
ماريا :لالا اختي الله يحفظني شكيكو البلا الى كان نبغي ونصدق فالمشاكل بحال هكا وشد ليا نقطع ليك كالنا عليها وحتى ليمتا اتبقاو هكا شي فشرق وشي فالغرب 
وردة :مغاديش نبقاو بحال هكا خاصو اشوية ديال الوقت يكمل قرايتو ويتخرج وغايجي ونتزوجو وديك ساعات مكاين حتى واحد لي يتحكم فيه
ماريا : إيوا هكاك يكون راجل أجي بعدا وصفيه ليا كيداير؟
وردة :نوصفو ليك فطريق راه مشا الحال ساعتين سلات... خلصات وردة الغدا وخرجنا من السناك غادين وهيا توصف حبيبها والفرحة فعينيها
وردة :هو طويل وشعرو رطب وزعيعر ماشي زعزرية الفاتحة الا او عينيه فالخضيضر المهم زوين
ماريا :زيدي احنينتي تخدمي صافي أمين لحس ليك دماغ... رجعنا لخدمة بضحك واللعب أنا او وردة نهار على نهار كنزيدو نتقربو لبعضياتنا كنخرجو بجوج وندخلو بجوج جات عندي مامرة ماجوج لدار وحتى انا هكاك 18 رعام بلا صحابات جات بنت او ولات فيها صاحبتي وختي اسرارها كتقاسمهم معايا عايشة فرحانة ومرتاحة 

فخدمتي الحمد لله حتى نهار لي بابا ايخبرني بواحد القرار...
أحمد :ماريا بنتي كلسي شوية بغيت نهضر معاك... كلست وكنتسنا فيه يهضر كالس كيلعب بيديه وحادر راسو انا نطقت بلاما نفكر
ماريا :بغيتي تزوج؟ هز راسو فيا مصدوم كيرمش بعينيه بزربة
أحمد :باش باش عرفتيها؟
ماريا :عقت بيك ابابا هاد اليام كولها وانت ماشي على برجك ومن حقك لاش حشنان وكترعد انت عودتيني على الصراحة وراه فعلا خاص تزوج الايام غير كتجري انا خدامة يجي نهار نكاد وراقي ونقد براسي ونسكن بوحدي ايخصك الونيس
احمد :وفين مشيت أنا لي تسكني بوحدك
ماريا :بابا كل مرة كتبغي تستقل بوحديتها وانا مابقيتش صغيرة شحال باش جيت راه طالعة فعام دابا قفلت 19 وطالعة ف20 عام ماتخافش عليا شكون هادي بعدا
أحمد :احم واحد سيدة خدامة معايا فلوزين عندها ولد عندو 15 رعام أسميتها مليكة مرة الله يعمرها دار داكشي باش مغاتلقايش مشكل معاها
ماريا :بابا كاين جوج بيوت واحد ليكم او واحد لولدها انا نيت عرضات عليا وردة نسكن معاها كتبقى بوحدها مسكينة وهيا بعيدة علينا ب3زناقي قريبة ليك انبقى نجي نشوفك ديما غير توكل على الله من حقك تفرح فحياتك وتعوض لي فات حياتك كلها دوزتيها وانت مقابلني انا كبرت صافي...شاف فيها وناض عندها عنقها
احمد :الله يرضي عليك أبنتي والله يكملك بعقلك ياربي ويفرش ويغطيك برضا
ماريا :أميييين ياربي....
#فالخدمة
وردة :فرحتيني وحق الله واخيرا مغانبقاش ساكنة بوحدي
ماريا :بشرط متقاسمو المصاريف راه كنعرفك كولشي كتبغي ديريه بوحدك
وردة :عنقاتها)أودي غير اجي لي بغيتي ديريه ديريه شفتي بعدا مرات باك؟
ماريا :أه جات تغدات معانا البارح مرا الله يعمرها دار حتى هيا شحال طلباتني نبقى ولكن حين تيقار نبقا بعزي ونبقاو مزيانين بابا من حقو يفرح ويرتاح فحياتو ماشي يتنغص ودوام هدا يوقع شي مشكيل نصدقو واحلين
وردة :إيمتا اتجيبي حوايجك؟
ماريا :سيمانة جايا إن شاء الله
وردة :كتنقز )يوبي واسعدي وافرحي
ماريا :ههههه هبيلة....
****
هكا كانت حياتنا انا او وردة كثر من الخواتات خصوصا كاع فاش سكنت معاها ضحك ولعب لقات فيا الام والأخت وحتى انا هكاك من بعد 6سنين أتا الفرج وخرجو ليا الوراق ديالي والإقامة لوراق لي خلاوني نلقى خدمة خرى وبصالير مزيان مربية عند عائلة لباس عليهم مقابلة ليهم جوج وليدات كنجي مع 8 ونمشي مع 5 ديال 

العشية....
وردة :أووووه جاك اللوك وااااعر 
ماريا :معرفتش منين جاتك هاد الفكرة هادي؟
وردة :إيوا خاصك تبدلي ستيل بمناسبة عيد ميلادك ال25 ولكن راه طوب فنة فنة وليلونتي جاوك خاواررر
ماريا :فخبارك شحال وأنا باغية نقطع شعري ونردو بحال هكا واووو مدة هادي ودابا جا الوقت
وردة :عيد ميلادك انديروه عندنا فصالون وحتى لوسييا أتكون معانا وعرفتي شكون اخور جاي؟
ماريا : كتاشر بعينيها)شكوون؟؟
وردة :قلعي؟(بحماس)
ماريا :بابا وخالتي مليكة؟
وردة :ولااااا
مارياا :وشكون؟
وردة :تنهدات ونطقاتها من فمها بحال العسل) حبيبي أمييين.....

ماريا : وايلي أمين جاي هيا اليوم انشوفو هاد العاشق الولهان ديالك
وردة :تنهدات) توحشتو ياختي توحشتو
ماريا :ويلاه يلاه لايمشي الحال ونتعطلو عليهم...خرجنا انا وردة من دار شيرنا لطاكسي دانا لصالون ديال لوسييا مع دخلنا كولشي مزوق نفاخات والموسيقى خدامة البنات كولشي لي كانو خدامات معايا كيباركو ليا بمناسبة عيد ميلادي خدمنا أغنية لابامبا وكنشطحو عليها ونغنيو معاها
" بلالالا لابامبا بلالالا لابامبا سيني سيسيتا اونا بوركا ديكراسيا انوبوركا ديكراسيا بارمي باراميا ياريبة ياريبة أوووه ياريبة ياريبة بوركي سيري بوركي سيري بوركي سيري...... دخل بابا ومعاه خالتي مالية او ولدها أدم كملنا الإحتفال ديالنا ودخلو طارطة كنقلب فجنابي على وردة مالقيتها تفتح الباب وهيا دخل ومعاها امين عرفتو 

من تصويرة غير جاني تبدل على تصاور ضحكة على وجهو البريئة جاراه حتى لقدامي وكالت ليه :
وردة :أمين هادي....قاطعها ومد ليا إيديه
أمين :ماريا صاحبتي وختي وكولشي فحياتي من بعدك ياك
ماريا :ههههه مشرفين خويا أمين وردة ظل فارعة ليا راسي امين فسما أمين فالأرض 
أمين :وحتى أنا ماريا فسما ماريا فالأرض أغلبية ديال هضرتنا ولات عليك
ماريا :إيوا سموحات ههههه...طفينا شمع وقطعنا لاطارط كل واحد وشنو جابلي سالة كولشي مع ديك ل 11 طلبني بابا نمشي معاه لدار عندو مايكول ليا مشيت عند وردة نكولها ليها
ماريا :وردة أنمشي معا بابا لدار واخا سبقيني انت بينما جيت واخا
وردة :واخا...سلمت على أمين وشكرت لبنات ولوسييا على الحفلة وخرجت معا بابا دخلنا لدار دخل أدم لبيتو وانا وبابا مشينا لصالون
ماريا :نعام أبابا ياك لباس؟؟
أحمد :بنتي اليوم فصباح خديت لانتريت ديالي مابقا عندي مندير هنا أنرجع أنا وخالتك مليكة لمغرب وادم ايبقى هنا يكمل قرايتو
ماريا :اترجع المغرب ابابا ولكن ولكن وأنا؟
أحمد :انت بخدمتك أبنتي وبحياتك مابقيتيش صغيرة براكة عليا من الغربة قنعت وشبعت سبعسنين باركة الله يخلف
ماريا :وخالتي أش كتكول؟؟
أحمد :مكتكول والو هيا فينما كنت اتكون وحتى هيا ملات بغات ترجع
ماريا :وإمتا عوالين تمشيو؟
أحمد :هاد سيمانة إن شاء الله 
ماريا :شنو أنكوليك ابابا معندي منكوليك أنبات هاد الليلة عندكم واخا
أحمد :مرحبا بيك أبنتي....دخل عندك مليكة كالها ليها جابت ليها ماتلبس والغطا ومشات... هزيت تيليفون تاصلت بوردة كلتها ليها باش متسنانيش طفيت ضو وبقيت كنفكر فمشية بابا كيبان ليا هاد 25 عام وهاد عيد ميلاد وبداية حياة جديدة أتوريني العجب وطريقي لي كنت غادية فيها وكاتباها لراسي أيتبظلو فيها بزااف ديال الحوايج 

وفعلا توقع ديالي كان فمحلو....
- مشا بابا ورجع المغرب بقا فيا بزااف ولكن ماشي بحال نهار لي خلاني حيت عندي ونيس لي هيا وردة رجع أمين لمغرب ورجعات وردة لخدمتها وأنا لخدمتي خويا أدم لي كان بمتابة خويا كمل قرايتو وديما كنتواصل معاه كولشي غادي مزيان حتى لنهار لي غانتلقى خبر لي أيصدمني فحياتي ويزعزعها...
وردة كتحط فالعشا حتى كتبان ليها ماريا كانت واقفة حتى طاح تيليفون من إيديها ودموعها هايطة كيف شلال جات عندها كتجري وتنخض فيها
وردة :مخلوعة) ماريا ماريا شنو واقع ماريا ماريا
ماريا : عع عم عمتي عمتي ماتت أوردة عمتي ماتت😭😭
وردة :كيفاش عاودي ليا غير بشوية وتهدني...
#فالمغرب
أحمد هاز ورقة فيدو دموعو هابطة وهو كيقرا فيها :
" خويا حمد من بعد موت راجلي جيت قلبت عليطم حتى عييت مالقيت حتى واحد فيكم لا أنت لماريا حسيت براسي بقيت بوحدي مرضت بزااف أخويا وعرفت راسي حتى انا أجالي قرب خصوصا مرضي لي تكتاشف فالمدة الأخيرة مارزقنيش الله بالولاد معندي مندير هادي سنة الحياة ترحمو عليا اخويا وتفكروني متنساونيش وراني 

وصيت المحامي بكاع الاملاك لي كنملك ولي خلى ليا المرحوم كتبتهم بسميت ماريا حيت كانت بحال بنتي وكتر وحرمتها مني المحامي ايفهمكم كولشي سمحوليا بزااف أخويا حيت بعدت عليكم الفلوس والو قدام العائلة دعاو معايا بالرحمة والمغفرة ختك خديجة.....
****
#إسبانيا
وردة معنقة ماريا وكطبطب عليها
وردة :الله يرحمها ويوسع عليها كلنا ليها أختي مديريش فبالك ترحمي عليها متبكيش وتعدبيها فقبرها
ماريا :تمنيت غير نشوفها وحق الله مشات بلاما نشوفها بقا فيا الحال بزاااف
وردة :مسكينة منساتكش وخلات ليك كاع لي كتملك
ماريا :والله مهامني داكشي بقات فيا عمتي بزااف والله😢😢....عنقاتها وردة كتسكت فيها من داك نعار وحال ماريا هكاك مابقاتش كضحك ولا والو من الخدمة لدار نعاس صافي بقات فيها الغصة ديال عمتها وقررات عن قريب تاخد كونجي وتهبط المغرب تزور قبر عمتها باش ديك الحرقة لي فقلبها... تبرد داز شهرين على 

موت عمتي بديت كنرجع لحياتي طبيعية شوية بشوية ساليت الخدمة بكري حيت مالين شي ايسافرو مالفة كنسافر معاهم لفرنسا ولكن هاد المرة قررو نبقى مزيان نيت انتهنى ونرتاح شوية فطريق دار طركت مخبازة جبت معايا بتيبان والكومير ووالحليب تشهيت الماكلة دالمغرب الرفيسة اللوبيا...

الحريرة توحشت بزااف ديال الحوايج رجعت لدار حليت بساروت ودخلت نوجد كاسكروط بينما جات وردة حيدت تجاكيط ديالي حطيتو وسوارت علقتهوم حتى كتبان ليا وردة كالسة معنقة رجليها وكتشوف فسرجم وساهية
ماريا :بتعجب) وردة شفتك جيتي اليوم بكري لدار ياك لباس...شافت فيا ومسحات دمعة كانت هابطة من عينيها اغير شفت دموعها ضرني راسي مشيت بزربة عندها دورتها عندي كنشوف فيها بشك
ماريا :اويلي كتبكي ياك لاباس واش جراو عليك من الخدمة مالك هضري خلاص شوشتيني
وردة :بلعات ريقها وعلات فيا عينيها كترمش)ماريا أنا أنا حاملة
ماريا :الصمت😲كترمش وبقات شحال ساكتة عاد هضرات
ماريا :كتفلاي ياك
وردة :والله مكنتفلى أماريا أنا حاملة درت تيست صباح وخرجو ليا تحاليل أني حاملة وكاتليا طبيبة حاملة بشهرين
ماريا :وقفات) ولكن كيفاش وإيمتا انا انا مكنتفرقش عليك و وأمين جا مرة و....شفت فيها
ماريا :نهار بت عند بابا ياك؟
وردة :أه ماريا أنا عارفة راسي غلط ولكن انا كنبغيه اوو.....
ماريا :كتغوت) والله يعملك تكوني كتموتي عليه كاع مديريهاش أوردة واش انت عارفة خالتك مابغياكش ومشيتي عطيتيه راسك واش انت حمارة ولا مالك يلاه دابا أشنو أديري أ شنو أديري
وردة :كتبكي )معرفتش انا كنبغيه وهو كيبغيني وغادي نتزوجو
ماريا :كضحك وضرب فخاضها) إيمتا العام لي معندو خوه وباه وجدو 7سنين وانا معاك هنا ونفس الكاسيطة كتعاود إيمتا إيمتا
وردة :راه مابقا والو هو هو لبارح مشا لكندا عندو 9شهور ديال ستاج وأيتخرج دكتور وأيجي ونتزوجو ونمشيو نعيشو تما جميع وحتى انت انديوك معانا عفاك اماريا معنديش غيرك عفاك😭😭...شافت فيها ماريا وجات عندها عنقاتها وخشاتها فصدرها
ماريا :صافي ششش متبكيش متبكيش وأمين كلتيها ليه؟
وردة :لا الى كلتها ليه ايجي كيجري وانا مابغيتوش يخلي ستاج ويجي بغيتو يوصل لي بغاه
ماريا :اويلي على غدايدي ندب حناكي أنا ولا نتف شعري وراه خلص يعرف
وردة :عفاك اماريا الله يعطيك منويتي متكولي ليه والو بغيتو يكمل على طريقو وانا انتحمل مسؤولييتي بينما سالة انا عارفاه كيموت عليا وأيفرح بهاد البيبي ولكن خليه يكمل ماسي جا حتى لهنا ويوقف عفاك اماريا....سلمت امري لله وسكت كنشوف هادشي لي وقع وشنو مزال مخبي ليا الله يستر وصافي...
***وردة جاها الوحم صعيب لي كلاتو تردو بدات كريشتها كتبان شوية بشوية وكتكبر.... المصايب الله يستر فاش كيجيو كيجيو دقة وحدة لوسييا سيفطات وردة تكلس دقة وحدة فدار وعطاتها حساب حيت مابقاتش خدامة ليها بكرشها وكل دقيقة ترد تحملت المسؤولية أو وليت انا لي هازة حمل دار وحملها هيا الحاجة لي تشهاتها 

نخرج نجري نجيبها واخا تكون فنصاصات ليا صاحبتي وختي ومعندها من غيري 
وردة :سمحيليا اماريا معدباك معايا
ماريا :أخر مرة تكولي هاد الهضرة انت راك ختي وداكشي لي فكرشك أنا خالتو تفاهمنا...عنقاتها وردة ونعسات بين إيديها... وليت كنجي من الخدمة نقوم بدار ونقابل وردة انا نديها لطبيب ونجيبها اليوم الحمد لله كالينا طبيب اتولد طبيعي بقات ليها سيمانة بضبط وتولد إيه الأيام غادية وكتجري البارح كانت حاملة وكرشها صغيرة واليوم 

قربات تولد كنت موجدة ليها كولشي الحوايج سيدة لي خدامة عندها عطاتني كاع حوايج وليداتها فشيبي وصفر حيت معرفناش وردة واش حاملة بنية ولا وليد هيا ختارت متعرفش... كنا كالسين انا وياها كناكلو فالبطاطا فريت وكنتفرجو
ماريا :كرشك ولات قد دلاعة وليتي تغطي علينا تلفازة....حسيت بالمخدة جاتني لوجهي
وردة :هههههه انهرس ليك وجهك مكتحشميش
ماريا :أمين كيتاصل؟
وردة :أخخخ فكرتيني كاليا بغاني نهبط لمغرب ايسيفك لينا انا وياك فلوس البيي
ماريا :وعلاش؟؟
وردة : هضر مع باه فالموضوع ديالنا وكاليه إلا ماقبلوش بيا ايتزوجني وعمر وجهو مايشوفوه مزال ودابا باه بغا يشوفني ويهضر معايا 
ماريا :أيتصدمو منين دخلي عليهم بولدك ولا بنت تمنيت نشوف وجهم خصوصا خالتك مكنحملهاش ياختي
وردة :كاليا أمين بلي عيانة شوية سيدة كبرات ومابغاتش تراجع الله يستر المهم عندي هو نتجمع انا وأمين وو ااااااااااااااااااه.... نقزت من بلاصتي لعند وردة
ماريا :وردة مالك مالك؟؟
وردة :كتهز وتخبط) وامييييييييي كنموووووت عتقييييني اماريا أااااااااااي
ماريا :تنفسي تنفسي فين فين حوايجك؟؟
وردة :فالبيت فالبيت سربييييي....خليت وردة كتغوت وانا تالفة مع جلايلي هزيت ساكها او وراقها وساكي والفلوس وخرجت فتحت الباب او وقفت وسط شارع كنشير لطاكسي تلكيت ليه وقفتو بلهلى يكزيه ليه رجعت عند وردة هزيتها وغادية بيها وهيا كتغوت لربي لي خلقها غير شافني مول طاكسي خرج كيجري هزها معايا دخلها 

لطاكسي لور رجعت سديت الباب وطلعت حداها طار بينا لسبيطار طول طريق او وردة تغوت
وردة :الله الله الله ماسمحت ليك ماسمحت ليييييييك
ماريا :ماسمحتي ليه هو مالي أنا لي حملتك
وردة :كتقرص فيا)ماشيييي معاااااااك معااااه هو سبابي فعدااااابي وامييييييي واكوااااااااااااك واااااااااااااه....وصلنا لسبيطار خليت مول طاكسي

بلا خلاص ودخلت وردة غير شافوها جابو الباياص طلعوها عليه مديت ليهم وراقها وساكها ودخلو بيها لبيت الولادة رجعت عند مول طاكسي خلصتو ورجعت لغرفة الإنتظار غادية جايا شفت فحالتي لقيت راسي خارجة بانطوفة ولبسة ديال نعاس فالبيض ماديتهاش فراسي غادية جايا عرقانة بحال انا لي أنولد كنطلب الله 

ونستغفر ينوضها على خير ويرجع كولشي بيخير دقيقة كدوز سوايع ماسمعت صوت البيبي كيغوت حتى غفر ليا الله دنوب رجلي فشلو كونما الكورسي لي هزني كنت انطيح عمري تحطيت فبحال هاد الموقف فحياتي كلها ولاكنت ضانة انتحط فيه نص ساعة من ورا الغوات خرجات طبيبة لي وقفتها وسولتها
ماريا :دكتورة أمضرا كيف بقات صاحبتي؟
دكتورة :مع إبتسامة) هيا بيخير لا هيا ولا البنية مبروك....واحد الفرحة حسيت بيها واحد الفرحة عمري فحياتي ماحسيت بيها بغيت نزغرت بغيت نشطح دموع سخونين هبطو من عينيا...تفتح الباب وخرجو وردة وفالكرسي وهيا هازة ملاك صغير فيديها بطويكية شافتني وتبسمات ليا وعينيها عامرين دموع داوها لبيتها نعسوها وحطوها 

حداها جيت كنطل عليها بست ليها راسها
ماريا :على سلامتك
وردة :سخفانة) الله يسلمك شوفيها لكن كتشبه
ماريا :هههه مزال مغادي يبان ولكن من شعير لكحل لي خارج كيبان ليا اطلع غير لماماها شنو اتسميها
وردة :أتسميها خالتها ماشي أنا...شفت فيها وانا فرحانة وبغيت نبكي
ماريا :شنو بان ليك ف ليليا
وردة :ليليا زوين صافي ليليا.... من بعد تلاتيام خرجت وردة من سبيطار بيخير وعلى خير رجعنا لدار او وردة طايرة من الفرحة حيت ولات أم وأنا كثر منها ولينا كندابزو على ليليا شكون أيهزها فينا ههههه تنوض تلقاها ناعسة حدايا هزيتها ليها نوض انا نلقاها وهزاتها ليا... قربنا نهبطو لمغرب مشيت لخدمتي وقدمت إستقالتي خديت 

حسابي ورجعت لدار وردة كتجمع فحوايجها وفرحانة
ماريا :واش كلتي لأمين بلي غدا انشدو طريق؟
وردة :لا بغيت حتى نفاجأو أنا....الغد ليه كنا فالمطار دزنا من الأجراءات كلها وكنا على طيارة أنا هازة ليليا دايراها فالحمال دايراها قدامي او وردة حدايا عينيها كيبريو بالفرحة دورت وجهي لجيهت زاج وسهيت جيت حاركة فالبحر ودابا أنا راجعة فالجو بعزي وبوراقي فرق كبير سبحان مبدل الأحوال أنشوف مدينتي تاني وبلادي 

الفرحة كتبكيك صراحة هاد الايام وليت عاطفية بلا قياس تحطات طيارة فمطار محمد الخامس غير نزلنا وخرجنا على برة شدينا طاكسي
ماريا :فيا جوع شنو بان ليك نمشيو شي قهوة ناكلو شوية ومن بعدها نمشيو لمحطة ناخدو ساتيام مزيان؟
وردة :حتى انا فيا جوع بغيت شي طاجين مغريبي فاعل تارك...كلنا لمول طاكسي يديني لشي قهوة تكون قريبة لمحطة داكشي لي كان دخلنا دوموندينا على طاجين كلينا عطيت ليليا الحليب فرضاعة ورجعت نعستها..
وردة :انا انمشي ناخود كارط نركبها باش نعيط على أمين
ماريا :واخا متعطليش...مشات وردة تاخود كارطة وانا بقيت فالقهوة خلصت الغدا وبقيت نتسنا كنشوف فساعتي وردة تعطلات كنشوف ناس كينوضو من القهوة ومجموعين على برا
ماريا :شيرات لسرباي)خويا شنو واقع؟
سرباي :شي بنت مسكينة ضرباتها طوموبيل..
ماريا :ياربي سلامة عفا خويا حضي ليا هاد البالز انا جايا...قلبي كيضرب ورعدة شداني معرفتش علاش وقفت فشارع كنقلب على وردة مكايناش رجليا داوني لبلاصت الكسيدة لا لا لا لالالالالالا ميمكنش كنغوت على حر جهدي وندفع فناس وردة وردة مليوحة وشعرها طاير ودمايات هابطة من راسها ونيفها معرفت مندير ولا نكول 

كنسمع صوت ناس والحسرة ديالهم
"مسكينة على مزيناتها سويرتي تعيش
"هاديك يمكن ختها مسكينة معرفت كيفاس حتى ضربها..رجال شادين مول طوموبيل وانا تالفة ومصدومة كنسمع لاومبيلونص وصوتها جاي حيدو طريق ناس وقفات ونزلو البومبية هزوها وانا تابعاها وسرباي تابعني بالبالز مسكين طلعوها وبغيت نطلع معاها
الوقاية :كتجيها؟
ماريا :اه اه ختها..طلعت وسرباي حط بالزي حدايا ديمارات لومبيلونص بجرا عقلي طاير ومعارفة مندير ليليا فصدري وختي وصاحبتي مجبدة فدماياتها حدايا وصلنا لقدام سبيطار هبطوها ودخلوها لسبيطار وانا كنجري وراها تمو جايين الفرملية دخلوها نيشا ليرجونص او وقفوني كنتسنا غادية جايا غادية جايا تفتح الباب ودخل طبيب 

شوية خرج ومخرجينها غاديين بيها لبلوك انا غير كنجري تابعاهم معارفة مندير...

ولا شنو نقدم ولا نوخر وقف عليا واحد من الوقاية مد ليا بالز :
ختي هادو كانو معاك وميكون عندها باس
ماريا :كتشير ابوجها تزنزلات... دازت ساعة وساعتين خرج طبيب عندي
طبيب :انت ماريا.؟؟
ماريا :بخوف)أه انا ادكتور شنو واقع كيف بقات صاحبتي؟؟
طبيب :الحالة حرجة شوية دابا راه فاقت وطلبات تشوفك عندك 5 دقايق المريضة خاصها ترتاح عندها كسر فاليد ديالها وإرتجاج على مستوى الرأس
ماريا :واخا واخا انا دغية نخرج...دفعتو ودخلت عندها لقيت الفرملية كتعلق ليها صوية ضربات زرقين فوجها وتحت عينيها زرق غير شافتني وتبسمات ليا جيت حداها مديت ليها إيديا
ماريا :بتوبيخ ودموعها هابطة) فين كانو عينيك واش عارفة المغرب ماشي بحال برا وكازا فيها زحام
وردة :صوتها تقيل)ششش الهبيلة سمعيني انا انا كنبغيك والله ومعرفتش واش انعيش ولالا
ماريا :برات الباس متكوليش هكاك اتبراي وتخرجي وتقابلي هاد القملة دبنتك راه بالت عليا
وردة :ههه ششش نوصيك عفاك عفاك الى كنتي كتبغيني سيري (كتسرك ريقها) سيري لدار خالتي فإفران دي ليليا لعند عائلتها وعند باها هاديك هيا بلاصتها أنا معرفتش واش انعيش لغدا ولالا وإلى جاب الله خالتي ماقبلاتش بنتي والى طرا غير مسكيل صغير وحتى واحد فيهم ماقبلش ليليا ربيها أماريا متخليها لحد ديريها بين سنانك عفاك 

انت خالتها وفبلاصت ماماها عفاك اختي عفاك كولي أه كولي أه بنتي امانة عندك اوك بالوما(بالوما لقب ديال ماريا فإيبانيا هو الحمامة)
ماريا :فزكات وجها وردة بالبكة)واخا كوني هانية انديرها فعينيا وكثر غير انت نوضي بسالمة...تبسمات وردة وغمضات عينيها
ماريا :وردة وردة كتسمعيني وردة وردة...درت عند الفرملية
ماريا :ختي مالها عيطو لطبيب مالها مالها...خرجات الفرملية شوية رجعات ومعاها طبيب خرجوني على برا وبقاو معاها وليت بحال الحمقة انتسطا الى طرات ليها شيحاجة منتصورش حياتي بلا بيها انموت انموت اعباد الله الأخت لي عطاني الله ضيع من إيديا والله حتى نحماق... تفتح الباب وخرج طبيب طرت عليه
ماريا :ماماتش ياك لا عفاك نبوس ليك رجليك ويديك متكولهاش
طبيب : ماماتتش ولكن للأسف المريضة دخلات فغيبوبة الضربة جاتها فراسها وسببات ليها فغيبوبة
ماريا :غيبوبة كيفاش وشحال عاد تفيق منها ياك هيا عايشة يااك؟
طبيب :أه عايشة وكتنفس ولكن المخ ديالها واقف غايبة على العالم الخرجي بالكامل
ماريا :وعلى شحال عاد تفيق؟
طبيب :منقدرش نكوليك كل واحد وشحال يبقى فيها كاين لي سيمانة شهر عام وكاين حتى لي كيبقى فغيبوبة 8سنين و10 سنين
ماريا :بصدمة )8 سنين و10؟؟......

ماريا :دكتور واش منقدرو نديرو ليها والو؟
دكتور :حنى درنا لي علينا الحمد لله لي معندهاش نزيف داخلي كان ايخصنا نديرو ليها عملية ولكن الارتجاج لي جاها فراسها خلاها دخل فصدمة عصبية ودخل فغيبوبة...
ماريا :واش واش نقدر نخرجها؟
دكتور :المريضة خاصها عناية فائقة داكشي باش كنصحك تديها لكلينيك تما أيقابلوها حسن من هنا...خلاني طبيب فحيرة كلينيك ههه زوينة هادي عارفين ناس غير كيموتو عندهم معندهم ميديرو غير كيخافو يكوليك لكلينيك شنو أندير ياربي ياربي الحبيب شنو غادي ندير أمين أمين أه نعيط عليه عندي نمرتو هزيت تيليفوني وخرجت من 

الكولوار لي عامر ناس هالي جاي يشوف عائلتو هالي مرتو ولدات كترت الهصرة وصداع وداخل كتر من الخارج غير مكيزيدو يمرضو ناس وهوما مساطن منقصين شاي خرجت على برا دوزت نمرة مابغاتش تشد ليا
ماريا :مال هاد الويل مابغا يتشد...تعصبت عاد تفكرت بلي ممركباش نمرت المغرب بقيت كنشوف جنابي بان ليا السكيريتي لي فالباب مشيت عندو
ماريا :عفاك أخويا الله يرحم والدين شي كيوسك ولا شي واحد كايبيع ليكارت نمرة ديال تيليفون
- أنا نجيبها ليك معايا انا نيت مسخر تم
ماريا :شحال أخويا؟
- 30درهم أختي تصالات ولا إينوي ولا ميديتيل؟
ماريا :لي كان أخويا الله يعطيك ستر...مديت ليه الفلوس وبقيت كنتسنى سهيت ليزم فين حنا ولبارح فين كنا ضاحكين فرحانين كنت عايشو حياة زوينة تفكرت سميت بالوما وتفكر نهار....
#فلاش_باك
وردة :هاكي هادا الكادو ديال 22 بطولت لعمر إن شاء ويخلينا ديما مجموعين
ماريا :أمين وردتي شنو جبتي ليا؟
وردة :وقلبي بالومتي....فتحت الكارطونة لقيت كسوة طويلة وعند صدر مطروزة حمامة بيضا ومكتوبة تحتها بالوما.... بالوما هو لقب لي كيعيطو ليا بيه فالخدمة مكاينش لي كيقولي ماريا كولشي بالوما بالوما كان أحسن كادو جاني داك نهار وعمري نساه فحياتي....
#الحاضر
- ختي هاكي جبت ليك تصالات
ماريا :نتابهات ليه)أه شكرا أخويا
- راه سجلها فسميتي حيت معطيتينيش لاكارط ومافيا لي يرجع عطيتو ديالي وكاليك متخدم حتى من هنا لساعة
ماريا :واخا خويا شكرا بزااف...ركبت لابيس ورجعت حدا باب سبيطار كلست على واحد الحيط وكنتسنى دوز ساعة حاضية داخلين والخارجين كالسة حدايا واحد سيدة هازة وليدها وهيا تكوليا :
-بنتك؟
ماريا :لا بنت صاحبتي
- أه والله يخليها ليها ويخليكم لبعضكم وفين ماماها؟
ماريا :فنفسي)ناري على دخول شبوقات)ماماها لداخل دارت كسيدة
- الله أكبر أختي سمحيليا حتى أنا جبنا واحد بنت عمي اتفتح على الراس
ماريا :إيو ا الله يشافيها ليكم أختي وينوضها بسلامة
- أمين ياربي....سكتات ورجعات هضرات
- وأنت مزوجة؟
ماريا :لا عندك ليا شي عريس؟
- إيوا مكرهت انت بنت سمحيليا غير مع شعرك وكدا كنسول 
ماريا :لا أنا ماشي بنت أنا كنت راجل وتحولت البنت ودابا ماشكيت عليك عزازين عليا العيالات خصوصا لي شهبات ومدبزات بحالك هكا....رمشات جوج ترميشات وهزات ولدها ومشات
ماريا :يخخ بنادم مكيدخلش سوق جواه ضسارة ديال والو...هزيت تيليفون كلت نجرب ندوز نمرة دوزتها فعلا خدمات بقات مدة كتسوني ورجعات تقطعات قفلت الخط ورجعات سونيت من جديد تفتح الخط وكلت :
ماريا :ألو ألو أمين هادي أنا ماريا جاوبني سوط مرة 
- ماشي أمين أمين خرج ونسا تيليفونو فدار أنا ختو شكون انت؟
ماريا :شوفي عفاك إلى رجع كوليه يتاصل بيا كوليه وردة طرات ليها كسيدة ودخلات فغيبوبة وأنا معاها حنا فكازا عفاك كوليها ليه الله يعطيك ستر.... تقطع الخط معاها لي عليا درتو الى جا ايعرف ويتاصل بيا دورت لبابا لنمرتو وعاودت ليه كولشي كاليا بلي أيجي عندي فاقت ليليا كتبكي ايخصني نبدل ليها ليكوش هزيتها ودخلتها لداخل 

طلبت واحد الفرملية توريني شي شومبر غير فين نبدل لبنيتة داتني لواحد البيت بدلت ليليا ليكوش لي كنت هازة معايا فساكي عطيتها بيبرونة ديالها حتى شربات وقنعات ودرتها فالحمال خاصني نشوف شي أوطيل يكون قريب لهنا باش تجيني ساهلة لمجية لسبيطار جريت باليزتي انا او وردة وخرجت على برا حطيتهم حدايا أو وقفت كنشير 

لطاكسي حتى واحد مابعى يوقف وقفت وسط شارع مع وقفت مع كيبانو ليا البالز طارو ولي داوهم طلقو رجليهم لريح كنغوت على حر جهدي تابعهم أش غانتبع لي طرا طرا ولي سرق ركب فواحد الخردة وطار هرب بقيت واقفة وكنشوف جاب الله غير شراوط لي تم الوراق والفلوس كامل فسكادو صغير ديالي بقيت واقفة تجمعو عليا 

ماس مالك مالك يكما فيهم الفلوس يكما حاجة مهمة أودي صافي مكاين لاش تجمعو البالز دارو جنحين وطارو
ماريا :صافي ماوقع والو فيهم الحوايج لي وقع وقع دابا...مافيا لي يتسنط لتبرزيط لي طرا ليا اليوم كافي أو وافي شيرت لطاكسي وقف كةلشي بالعكس طلعت وكتليه :
ماريا :عفاك شي أوطيل قريب غير فهاد نواحي
مول طاكسي :واخا الالة...

وصلني طاكسي قدام باب الاوطيل خلصتو وهبطت دخلت خديت شومبى وخلصت المستلزمات كلهم عطاوني ساروت ديال البيت مع دخلت لحت ساك لي كان فكتافي حيدت الحمال حطيت ليليا فوق نموسية وقفت عند راسها كنشوف فيها بحال الملاك حبيبة ديالي حسيت بالبكية واقفة ليا مابغيتش نبكي مابغيتش نضعاف خلصني 

نكون قوية فهاد الوقت دخلت لدوش حيدت حوايجي لي كنكساب علقتهم خديت دوش سخون وخرجت نشفت راسي ولبست نفس الحوايج حتى نسالي ونشوف منلبس فاقت المشيشة ديالي البوالة بظلت ليها تاني وبدلت ليها كاع حوايجها عطيتها البيبرون ديالها حتى شبعات درتها فالحمال ورجعت خرجت شديت طاكسي لسبيطار بينما وصل 

بابا سولت على وردة هيا هيا جا عندي طبيب :
دكتور :أنسة ممكن نهضر معاك عفاك؟
ماريا :ياك لباس وردة طرات ليها شيحاجة؟
دكتور :لا مطرا والو تفضلي معايا لبيرو...تبعتو وقلبي كيضرب دهلنا رديت الباب 
دكتور :كلسي...كلست وأنا كنشوف فيه
ماريا :شنو واقع؟
دكتور : كيفا كتشوفي سبيطار كل نهار كدهل ليه حالة والمريض مخاصوش يفوت عندنا 4يام داكشي باش...قاطعتو او وقفت
ماريا :أنا عارفاك اش بغيتي تكول وحتى واحد ممشوك فسبيطار يكلس فيه صاحبتي انخرجها وأنديها معايا أكون هاني مايجي غدا حتى نديها من هنا وحتى المصاريف انخلصوهم الله يعاونك....خرجت من عندو طالعة ليا القردة لسطح يخ يخ سونا تيليفون طلعات نمرة بابا
ماريا :ألو بابا انا فسبيطار مزال معرفتش ابابا أنا انسول ونسيفط ليك العنوان فميساج...قطعت مع بابا وسولت واحد الفرملية على سبيطار وفين جا أنا مرديتش الباب بكترة دوخة لي فيا سيفطت لبابا لادريسة وبقيت واقفة كنتسنى حتى دخلو عليا هو وخالتي مليكة
أحمد :بنتي...عنقني 
مليكة :كيبقات مسكينة؟
ماريا :كيف اتكون أخالتي راها داخلة فغيبوبة وزادني حتى طبيب كاليك الشومبر لي هيا فيه خاصو يخوى خاص مخرجها
أحمد :ماريا صاحبتك كيفاش حتى ولدات على لي فبالي ممزوجاش....شاف فيا بابا شوفات فشيشكل عمر دارهم ليا
ماريا :معندي منخبي عليك ابابا وردة مزوجة من ولد خالتها هادا شحال(ياربي تسمح ليا)
أحمد :ولكن عمرك مكلتيها لينا
ماريا :خالت وردة مابغياش هاد زواج حيت عوما ناس لاباس عليهم او وردة يتيمة مسكينة داكشي باش تزوجو ورا خالتها
أحمد :ودابا شنو اديري أبنتي فين ناوية دي وردة جيبيها لدار عندنا
ماريا :لا أبابا مغاديش نظيها لأسفي
أحمد :وفين ناوية ديها؟
ماريا :بابا المحامي لي هضر معاك عندك نمرتو بغيت نهضر معاه
أحمد :أه عندي كارط فيزيت ديالو كاليا الى جيتي تسوني ليه وراه هو محامي هنا فكازا نيت
ماريا :واخا ابابا انا انمشي عندو وعفاك خليكم مع وردة حتى نجي واخا؟
أحمد :نمشي معاك حسن وخالتك ابقى هنا
ماريا :واخا يلاه...خلينا خالتي مليكة فسبيطار شدينا طاكسي للعنوان لي كاين فلاكارط فاص حسن من تيليفون هبطنا طاكسي قدام العمارة فين جا البيرو ديالو هبطنا وطلعنا فلاسنسور حتى لطابق فين كاين لقينا سيكيرتيرة سولناها عليه
- عندكم معاه شي موعد؟
ماريا :هو كيتسنا المجية ديالنا كولي ليه ماريا المنصوري أيعرفني
- واخا بلات..هزات تيليفون(وي موسيو سعيد أنسة ماريا المنصوري كتسناك وي داكوغ) تفضلي كيتسناك....دخلنا للبيرو ديالو لي كان كبير لبسة المحاماة معلقة راجل فالأربعينات من عمرو ستقبلنا بإبتسامة
سعيد :شنو تشربو؟
ماريا :لا والو جينا على قبل الورث لي خلات عمتي بغيت نعرف واش راجل عمتي معندوش ولاد قبل ميتزوج بعمتي
سعيد :للأسف سي عبد الله مكيولدش داكشي لي خلاه يتزوج مامرة ما جوح ويطلق مكانوش كيبغيو العيالات يصبرو معاه حيت عاكر من غير لالة خديجة لي واخا عرفاتو عندو هاد العيب قبلات بيه حتى توفى مسكين بالقلب وفاش عرف عندو مرض القلب قرر يكتب كاع لي كيملك لالة خديجة
ماريا :الله يرحمهم بجوج ياربي سي سعيد عمتي فين كانت ساكنة؟
سعيد :لالة خديجة وسي عبد الله عندهم جوج ديور وحدة فلفيرمة لي عندهم فإيموزار ودار تانية هاديك لي كانو كيكلسو فيها بزاف فإفران فوسط المدينة....رجعت بداكرة لور واش هادي صدفة ولا ربي بغاني نمشي لديك لمدينة ولا بغاني ندي وردة لديك لمدينة
ماريا :كمل اسي سعيد عفاك
سعيد :لالة خديجة خلات ليك كاع لي كتب بيها المرحوم الديور بجوج وجوج فيرمات كبار خدامين فيهم بزااف ديال الناس وكيصزرو منها طرف ديال الخبز سي عبد الله كانو عندو الخدامة ديالو وهو لي كيصدر لحليب لمصانع ديال الجودة كان بخيرو الله يحرمو ومن نهار توفات لالة خديجة الحركة بدات ترجع وتوقفو ناس على خدمتهم 

دابا الالة ماريا انت لي اتولي مسؤولة على هاد الخدامة 
ماريا :واخا أسي سعيد دابا يمكن ليا نتصرف فهاد الورث من دابا؟
سعيد :وقت مابغيتي
ماريا :واخا أسي سعيد دابا لي بغيت نطلب منك عفاك بغيت أومبيلونص تنقل صاحبتي من هاد سبيطار(عطاتو لادريس) بغيتها لإفران لدار لي فالمدينة عفاك بغيتها تجهز بكاع الأجهزة لي أتحتاج فلكلينيك يكون عندها فدار
سعيد :واخا لالة ماريا عتابري الامر تقاد من صباح أنشدو طريق...

ماريا :وقفات ومدات ليه إيدها)شكرا أسي سعيد لهلا يخطيك
سعيد :هذا واجب...خرجنا من عند المحامي فطريق
أحمد :بنتي واش عارفة هاد المسؤولية لي أتهزي ولالا؟؟
ماريا :عارفة أبابا عارفة ولكن وردة راه ختي شكون ضبر ليا فالخدمة ديال المربية فسبانيا كون ماهيا كنت ساكنة عندها مكتخليني نخلص سانتيم الحمر فيها ختي ومي مي لي معطاتنيش الحنان وسمحات فيا وردة عطاتو ليا كان فيها كولشي وانجي انا دابا نخليها واخا نعرف ندير زيف قدام باب جامع ونطلب ومنسمحش فيها 
ماريا :أصلا انا شنو ربيت فيك غير تحملي المسؤولية وانا معاك أبنتي فاشما حتاجيتيني أنا معاك عمري منخليك
ماريا :الله يخليك ليا ياربي ويطوليا فعمرك ياربي....شدينا طاكسي ورجعنا لسبيطار خلصت المصاريف ودرت معاهم الغد أنجي نديها بابا وخالتي مليكة باتو معايا ديك ليلة فالأوطيل حتى هوما ناعسة وكنشوف فهاد مو عوينات لي حدايا رميشات كحلين والحنيكات شعر رطيطب وكحل بحالها بحال ماماها مدات من باها والو باها زعمة 

ميكونش رجع لدار مكالو ليه والو ماسونا ماوالو كيفاش زعمة هزيت تيليفون دورت ليه :
-الهاتف الذي تطلبونه غير مشغل أو خارج التغطية...طافي بففف... حاولت نغمض واخا مكاين نعاس وانا دماغ خدام بحال المطرقة كيضرب كيكوليك ربي فاش كيبغي شي عبد كيبليه والمؤمن مصاب الحمد لله على كل حال ناوية ندي ليليا لعند عائلتها خاصهم يعرفو عندهم حفيدة ويوقف هادشي على الصح...
***مَا زَالت الحَياةّ مُستَمِرة ، وَ قِطارَاتّ الحَياةّ لآ تَتوقَف ، العَابرُونْ لآ يَتكرَرُونْ ، الرَاحِلُون لآ يَعُودُونْ ؛ وَ القَادم أجمَل !فقط قل #يا_رب
نضت فصباح بكري وجدت البيبرون ليليا دوشت ليها بعدا ولبستها مزيان على البرد شهر 11 قربات شتا عطيتها الحليب ديالها غير كتبدلي ليها وتوكليها صافي كتنعس هزيتها ودرتها فالحمال قدامي هزيت ساك ديالي صغير وساروت وهبطت لتحت لقيت بابا وخالتي كيتسناوني فالإستقبال عطيتهم الساروت ديالها وشدينا طاكسي لسبيطار 

سونا عليا المحامي قبل منوصل لسبيطار :
سعيد :وي مدموزيل ماريا أنا قدام لوبيتال كولشي واجد
ماريا :واخا سي سعيد لهلا يخطيك
سعيد :هدا واجب....قطعت معاه الخط سولني بابا
أحمد :شنو كاليك؟؟
ماريا :راه وجد كولشي مسكين وكيتسنانا قدام سبيطار...وصلنا كتبان ليا أومبيلونص واقفة فالبيض او وسي سعيد بطوموبيلتو جينا سلمنا عليه..
سعيد :انت وسي أحمد ومدامتو أتركبو معايا ولاومبيلونص أتكون قدامنا على بركة الله؟
أحمد :بسم الله أسيدي وسمح لينا عدبناك
سعيد :لالا مكاين لاعداب لاوالو
ماريا :فخاطرها(أبابا الله يهديك راه شام ريحة الفلوس أيدير هادشي فسبيل الله... طلعنا مع المحامي لطوموبيلتو وشدينا طريق....بابا لقدام وانا وخالتي مليكة لور
مليكة :يكما نشدها عليك
ماريا :لالا أخليك اخالتي
مليكة :خاصك مرة مرة تبخريها على العين تكون عندك ديما شوية دشبة والحرمل واللميعة وتبقاي تحطي ليها القرآن حدا راسها وخاصك تكمطيها
ماريا :أنا مكنعرفش لهادشي
مليكة حتى نوصلو ونوريك كيفاش...حطيت راسي على زاج ومتبعة لاومبيلونص لي غادية بختي جات فطيارة تشوف حبيبها وهاهيا غادية لفين كاين فغيبوبة ومحساش بلي حداها دنيا غدارة متعرف شنو مخبية ليك الوقت....طريق طويل وباين مغانوصلو حتى ليل مع ظلام الحال مكاتبانش ليك طريق ولكن البرد لي حسيت بيه السم لي 

كيدخل العظام علمني بلي وصلنا دحلنا لمدينة إفران شكون كال غانجي ليها إفران لي معروفة بجبال العالية ومعروفة بالكهوف ديالها ولكن هدا ماشي وقت ديال دوران حتى نفك الحريرة لي أنا فيها ونطمن على ليليا وعلى صاحبتي قاطع أفكاري سي سعيد :
سعيد :وقف بطوموبيل)لالة ماريا مرحبا بيك حنى وصلنا هاد البلاصة أسمها حي الرياض وحنا دابا قدام دارك جديدة....حليت زاج وعليت راسي فدار لي حنى قدامها شحال كنت كنتمنى نسكن فبحال هاد ديور بحال ديال نصارة مسقفين من الفرق بالقرميد الأحمر سراجمهم من الخشب بيبانهم لكبار مصبوغين بالبيض... هبط بابا وسي 

سعيد يحلو الباب ديال دار باش يدخلو وردة
سعيد :فاش جيتي عندي البارح علمت سيدة لي كانت خدامة عند عمتك نقات دار او وجدات البيت فين اتكون صاحبتك
ماريا :بارك الله فيك اسي سعيد.... دخلو الفرملي لي جا معانا وشيفور وردة ناعسة شعرها بحال شمس مرمي حداها مغمضة عنيها تبعهم بابا وخالتي مليكة بقيت واقفة كنشوف فدار مقديتش ندخل نشم ريحة عمتي مابغيتش نبكي وانا يلاه بديت كنسى تنهدت حدرت راسي وأنا ندخل.....

مع دخلت وأنا ساهية دار من الداخل دافية كيفما كنت كنحلم نسكن فبحالها مبنية بواحد الحجر منقوش وشكل ديالو فشيشكل فوطويوت فالقهوي وعليهم ناباط بالهدوب فالبيج أما فالقنت كاين واحد الدفاية ولا كيف كيكولو ليها المدفأة ضحكت على راسي حيت عارفة سميتها غير بالعربية الخشب ديالها كيطرطق بالعافية أما 

فجنب تاني محطوطة طابلة ديال الخشب والكراسة ديالها عاد جوج بيوت وكوزينة وعاد دروج لفوق خليت بابا وخالتي مليكة عطيتها ليليا ترضعها ودخلت مع الفرملي لي أيقاد لوردة بلاصتها دخلت لبيت كان بلون لكريم ونموسيتو بالخشب ديال العرعار ريحتو كتخليك ترتاح هزو وردة داروها على نموسيها جبدو شي ماكن قادوهوم حدا 

راسها غطاوها او خرجو من اليوم انا لي أنتكلق بيها حتى تفيق إن شاء الله وأنجيب فرملية لي تعاوني هادشي علاش وصيت سي سعيد قربت عند راس وردة وبستها
ماريا :فخبارك انت قريبة من حبيبك كنواعدك اندير لي فجهدي ونصل كاع الامور وليليا انديرها فعينيا لا انت لا هيا....خرجت لقيت سي سعيد ايخرج باش يرجع
ماريا :شكرا بزااف اسي سعيد المهم من بعد ونتفاهمو راك عارف عاد وصلت والعيا دطريق
سعيد :لالا أنسة ماريا حنا فالخدمة يلاه تصبحو على خير
أحمد :حتى حنى ايخصنا نرجعو بحالنا
ماريا :بابا من نيتك باغي تخليني دار واسعة وعريضة أش كديرو فأسفي والو اللهم سكنو معايا
أحمد :لالا أبنتي اخليك على راحتك
ماريا :راحتي تكونو معايا جاتك عادي تخلي بنت بوحدها(شفت فخالتي مليكة)خالتي هضري معاه
مليكة :أحمد ماريا عندها صح برانية فبلاد بوحدها وعندها مسؤولية ها صحبتها لمريضة ها لبنت صغيرة والخدامة لي أتولي مسؤولة عليهم فكر شوية بعدا تلقى الي يهز عليها الحمل شوية
ماريا :سمعتي خالتي وفهماتني وانت لا حشومة عليك 
أحمد :مكنحملش نشد إيدي ابنتي ضروري مندير إيدي معاك
ماريا :أسيدي تولي تمشي تكابل معايا للخدامة انت راجل وأتعرف لداكشي صافي رتاحيتي ويلاه راه البيوت الفوق خاويين ختارو لي بغيتو وسيرو ترتاحو والغد الى بغيتي ترجع تجيب حوايجكم وخلي خالتي معايا غدا عندي ميدار....
طلع بابا وخالتي لفوق ديت ليليا لبيت لي ايكون بيتي حدا بيت وردة حطيتها على نموسية ودرت ليها المخاد حداها بيتي كان بحال بيت وردة كيف كيف رديت الباب وخرجت كلست على واحد الكرسي وتقابلت مع ديك العافية لي شاعلة هزيت تيليفون دوزت نمرة أمين واااالو بحال اليوم بحال البارح تيليفون طافي.... نضت ودخلت البيت 

وتكيت حدا ليليا غدا أيخصني أول حاجة نديرها هيا نقلب على فين جا قصر سي الإبراهيمي وفينا بلاصة خاصني نمشي ونشوف هاد سيهم أمين علاش لي مكيجاوب يكون غير سمع لي طرا ليها وسد ولا يكون خوا بيها ولكن هو كيبغيها وكيموت عليها وهادشي عارفاها مزيان ومتأكدة منو وبرهن عليه ألف مرة.... وعلاش مسوناش 

عليها نسيت بلي تيليفونها مشا نهار لكسيدة ايكون عيط ومجاوبو حد ونمرتي أنا دبرة مغاتخدمش ليا هنا أوووف أوووف حتى الفيس معنديش ومعندي حتى ديالو الحل هو نمشي ليهم لدار ونبينا عليه السلام...
****
#فلاش_باك
كتشوف فيها بعينين كحلين مرمشين ملامحها زوينة وحفر زين لي على وجها شعرها القصير ورطب لي خصلاتو مبوكليين لي شافها ميكولش خارجة من كرش هاد المرة لي الحجر أيكون حن من قلبها حتى هيا محناتش الراس ليها ونطقات :
- علاش حيدتي ليا تيليفون من إيدي علاش قطعتي؟؟
الحاجة السعدية :بصوت رزين وباح) شوفي قسما برب الكعبة وتوصل هاد الهضرة لخوك أمين وربي المعبود وديك الجامعة لي كتحلمي تدخلي ليها لاضربتي فيها العطرة أبنتي أهاجر وأنت عارفاني نديرها وعارفاني أشنو كنسوى..
هاجر : بغيت فير نسولك واش انت أم ولا لقيانة فزنقة ربي شنو دار ليك خويا أمين وشنو دارت ليك وردة راه بنت ختك ياحسرة واش جوج كيبغيو بعضياتهم وانت مالك عشتي حياتك خلي ناس تعيش وراك حاجة ياحسرة حياتها....هاجر ماحسات حتى بإيد مها نيشان فوجها
الحاجة السعدية : اخر مرة تهزي عليا صوت طوال ليك لسانك يالحمارة والله لاطسيلتك ومزال نسمع حسك حتى حسابي معاك هو لاخر وديني ويماني ونسمع شي حد عرف بلي ديك لخانزة طرات ليها شيحاجة ماتلومي غير راسك تموت ولا تحيا بحالها بحال مها هنات الوقت ودابا سوفي وتفرجي...عينيها حمرين وشر كيطير منهم من 

بعد ساعة وهيا كالسة فصالون بهيبتها وشموخها سمعات روايض ديال طوموبيلت ولدها وقفات بدات تعصر دموع وتبكي وتغوت ربي لي خلقها وضرب فخاضها دخل أمين كيجري على صوتها تلاح عند رجليها كيسول فيها
أمين :الوليدة شنو واقع مالك ياك لاباس؟
الحاجة :كتنحب) مشا أولدي مشات أولدي ومتسامحتش معاها مشات ومعنقتهاش ريحة المرحومة مشات إهيء إهيء وا مي وامي تكويت وامي مشات كيف الوردة وامي مشات مطلبت منها سماحة على مدرت فيها ومي كون يحسابلي كون زوجتها لوليدي وتبقى قدام عينيا
أمين :كيغوت ويحرك فيها) واشكوووون امي شكوووون ماااات هضري خلاص
الحاجة : وردة ماتت اوليدي بنت خالتك ماتت الله يرحمها ماتت...أمين كتردد غير ديك ماتت فودنو....

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.