عذراء ساقطة الجزء 22

_يحيى (حممر فيها وبلا ميحس ضرب الطبلة ليقدامو تاتقلبت) :متخلينيش معاود هضرتي جوج لمرات.. لانني الا فت حتا مشيت تما مغنعقلش ايمتا نقتل زامل بوه ونقلبها مع طسيلتك 

كانت كتسمع ليه وهي عينيها مغرغرين خصوصا فاش ضرب الطبلة وطيح ليها لماكلة ليكانت مسيلة ريوگها عليها ومزال مشبعت.. محسات براسها الا وهي ضارباها معاه بطرشة لوجه صداها تردد فالمكان

كتشوف فيه بحالا مدايرا والو وهي كتبكي وتنخصص على الماكلة وعلى سم هظرتو

كان مهبط عينيه بحالا كيستوعب انها هزات ايدها عليه وضرباتو بصقلة.. تلقائيا بدا كيهزززهم بببططططء.. كيهزهم واللون مغااااااير تماما.. هاد المرة لون حمر

_يحيى (شدها من شعرها وقربها لوجهو.. من تحت سنانو) :حمدي ربك حاملة..اما نقتل زامــ..ل بوك هنا

طلق شعرها ناترو وناض جااااعر... من گلة الما ليجات فطريقو ضربها برجلو تاتهرسات شقاف.. مخليها كتغبن وراه.. مكتغبنش على هادشي ليدار دابا ولكن همها اللحم ليطيح ليها وهي باغاه...عنقات عندها رجليها وهي تتهز بلبكا على الشوا.. شوية ناضت كتعكز على الحيط هبطات بشوية عليها كتقلب عليه فالدار ملقاتوش بمرة... غير مزاد عليها لحال وزادت فدموعها لي طيحين بحال الحجر ومخلطين بالخنونة بحال شي بنت فعمرها خمس سنين

_مريم (كتغببن وتنخصص) :سير انا بغيت ليك غاسالمة وتشدك فليدين ليطيحو ليا حقي (عينيها تعماو بالبكا ومرة مرة تتدوز دراعها تمسح دموع وخنونة) سير انا بغيت غايرگدو علك مينوضو.. بغيت لك غا مصيبة ميفكها فكاك ميجبرها جبار.. تغرق فيها كيفما غرق قوم لوط فالبحر

خارجا من الدار غادا تتمشى بشوي عليييها وهي كتدعي وتغرق ليه وتنخصص مهازاها أرض. معارفا فين غادا

لمحتها مرأة في الستينيات من العمر.. دايرا زيف حياتي بلخضر وفيه لوريدات على راسها وشوية الشيب خارج ليها من النوظر..اما شالها غالوياه على عنقها من الصهد.. جايا بكسيبتها وعصا فيدها كتگود بيها لخروف ولا النعجة ليكتخرج من الطريق وغادا وتغوت ليهم باش يتقادو وميتنقص منهم حد ولا يمشي منهم شي حد لأرض ماشي ليهم

_المرة (وقفات عليها) :ياك لاباس ابنيتي.. مالك تبكي

_مريم (تاهي عقلها ممعاهاش شافت فيها.. شافت فيها وهي تتنخثث) :ولد الحرام لاح ليا اللحم وخلاني.. بغيتو يشداگو

_المرة (شافت كرشها فهمهتها) :تتوحمي على اللحم ابنيتي.. الله على حنينتي الله وبينة فيك غريبة وبرانية

_مريم (شافت فيها تتمسح دموعها بيدها) :اه ألحاجة

_المرة (شدتها من ايدها) :وعرفتي اشنو زيدي معايا مرحبا ببنيتي نشويو ليها تاااتشبع وتقول براكة.. المحمة فيها لاجر (ضحكات) فكرتيني غافيامات المرحرم.. زيدي

_مريم (ضحكات بحالا مخاصها خير. غاااسمعت سيرة غنشوي ليك والناب بان ليها) :بصح ألحاجة؟

_المرة :ومالي سايرا نتمازح معاك... لهلا يحوز بنيتي زيدي معايا

جراتها من ايدها وساگت لبهايم قدامها غادين لدارها عند ولادها وكنيناتها.. ومريم فرحااااااانة ناسية راااسها وناسية واش مخلية شي حد وراها وبلا متهز لا مشقوف لا واالو

غادين وشادين فالحثة بين السنان.. ونيت تتسولها شكون هي ومنين جات

_المرة :دابا نتي من لميريكان من لهيه

_مريم :لا ألحاجة انا راه من هنا المغرب غاساكنة مع راجلي تما

_المرة :هاااه حوگلك بيضة كي الحمامة.. مزيناتك طفلة

_مريم (تتضحك عاجبها لحال)؛ وتشوفي نتي ألحاجة كون راه فزمانك كانو مصافين على لباب

_المرة :عيطي عليا غا دادا كيف كيعطو عليا كنيناتي وولادي.. ايييه على ايامات الصغر(بدات كتحرك راسها ومطولة الشوفة قدامها) كنت زييينة ولكن محلا ليا غالحاج الله يرحمو ويواليه برحمة الله

_مريم :الله يرحمو.. قربنا ادادا

_الحاجة : هاه هاحنا وصلنا.. زيدي ابنيتي مرحبا بك والف مرحبا

كانت دار تاهي من الطين والطوب القديم.. كانت أكبر من دار لفيها هوما... هادي وااسعة وديرا بسور فيه شلا بيبان..دخلات معاها كدور راسها.. كتبان لبها واااسعة خلات البهيم فالساحة لولة عاد كملو طريقهم وحلو لباب الثاني ودخلو لساحة الثانية.. الدجاج كيتمشى وسط الساحة والمشاش كذلك و2 كلاب قوانع مشبحين الوسط.. لبيوت ديرين بديك الساحة وقدامهم ضسيسة كبيييرة من السيمة مفرشين فيها مع الصهد وجالسين.

غاشافوها بداو يتناغزو الكنينات ووقفو كيطلعوها وينزلو مبتاااسمين ليها

_الحاجة : حبييييبة

_حبيبة (كنتها لكبيرة) :نعام ادادا السعدية

_السعدية (الحاجة) :عمري واحد كاس اتاي... فينهو سعيد

_لطيفة(كنتها الثانية) :راهم فلقبة أدادا مجموعين

_الحاجة (وركات على عگازها باش تريح) :أحح اربي الله الله (جلسات وجرات مريم جنبها) ريحي ابنيتي مرحبا بيك

_مريم :الله يكبر بيكم

_الحاجة :وسيري عيطي لشي حد فيهم قوليه يجي عندي.. عيطي معاك لسعيد ولا لعزيز مالاخر ميعرفش

_خديجة (كنتها الثالثة والصغيرة) :شكون هاد الطفلة أدادا

_السعدية :هادي ضيفتنا ليلة.. يالله تجمعو جيبو لينا اتاي ومعاه ديك الزبيدة والعسل وزيت العود ولا باقيش شي زويتينات تاهوم حطوهم

_حبيبة :راه تايوجد اتاي أدادا

مريم غاكدور راسها بين كنيناتها بثلاثة ليتاهوما ضاربين زيف حياتي لوحدة وبيجامة طويلة ولا نقول تشاميرات رهاف مصيفين وضاربين فوقهم الطابليات.. الصغيرة فيهم شادا بنتها الصغيرة تتجر فبزولتها ترضع اما لبراهش لخرين الصغار غاحاضينها ويلعبو فالساحة ويطلو عليها كيوشوشو عليها من شعرها لسباطها ويضحكو بيناتهم.. عامرين تراب وخالقين السعادة

هابط بفويقتو وقبو مدورو لجنب.. ايدو فجيب فوقيتو هازها شوي على صيگانو.. مسطاجو لكبير وملامحو بينة هادا الولد الكبير عندها

_سعيد :سلام عليكم

_مريم (ابتاسمت ليه) :وعليكم السلام

_الحاجة :وفينهو عزيز جيتي غابوحدك

_سعيد :شكون هاد الضيفة أدادا

_الحاجة :هادي واحد الطفلة من مريكان وراها ضيفتنا.. راهي ليقالت لينا مرت العامري جاو شي برانيين الصباح

_سعيد :اااه ومرحبا بك عندنا

_مريم :ربي يكبر بك

_الحاجة؛ وسير لداك الخروف ليكنا انبيعو فالسواقية وبقا ذبحوه لينا وزندو لينا المجيمرات يالله

داكشي ليكان... مريم جلسات دايرا رجل على رجل كتاكل فالزبدة والزيت البلدية وأرگان والبطبوط سخون على راسها وكضحك من هنا لهنا مع الكنينات.. ومعاااارفاش اشمن بركان شاعل وراها وقريب يتسطا

خرج من الدار باش ميديرش فيها ايدو بلا ميحس.. كان عارف راسو على بونت يقدر يقتلها وهو مواعيش وكلما كيييتفكر انها صرفقاتو كيحس بالدم كيدفق ليه مجهد فعروق ايديه..والعصب مشكرف ملي مخلاش دار عشتها

بعد نصف ساعة رجع من بعدما كما گاروه برا الدار.. مبغاش يخليها بوحدها.. كيف وصل لقا لباب محلول.. نفسو تهزات ودخل كيجري لسطح ملقاهاش بدا كيقلب وسط الدار بحال لحمق

_يحيى :مرييييييم مرييييييييم

اثارها فالدار ممحي.. كيقلب ويعاود... هز هاتفو كيصوني كيسمع الصوت فالصالون مشا رجع لصالون لقا غاهو محطوط فوق الطبلة.. هزو تالسما وردخو وهو كييييترعد ومعارفش اش واقع ليها وهي فهاد الحالة

_يحيى (كارز على سنانو) :فيييينك فييييينك

هز هاتفو باش يلقاها بنفس الطريقة لكيلقاها بيها كل مرة ولكن للأسف الريزو مكيييينش فداك القرينة.. خرج وهو كيقلب وديك الاشارة ديالها مخداماش.. عندو الاشارة ممحية.. خرج وهو كيحس بجسمو شااااعل ومضووبل ومعصب لدرجة كثر ماكان فيها الموسم وهو معارفش مرتو وولدو فين

_يحيى (خرج برا وربط الاتصال بمحمود)؛ داااابا غتمشي لشركة فللبيسي ديالي اتلقا ملف ديال جيبيئس ليعلى مريم.. اتجبدها دااااااابا (ببحة) عندك ربع ساعة

_محمود :واخا اسي يحيى

في الجهة الثانية.. الوقت عندهم زااهية وفيتة الزهو ليه.. لبولات ليخارج لبيوت شعلو.. المجامر زندو وريحة الشوا علات.. مريم جالسة حدا المجمر.. تتحثث مع لكنينات وهوما كيعمرو فالقطبان فرحانين ويسولو فيها

_لطيفة: دابا كن راه راجلك زين بحالك

_حبيبة (نغزتها) :ياوتي سكتي اصگعة دابا يسمعك لمهاوش ديال راجلك

_مريم (خنزرات) ؛مال راجلي

_حبيبة :لا لا والو غاسولاتك واش يشبه لك

_مريم (تبسمات) :اه غاهو كبير ولد الحرام قد البغل

_خديجة (قربات ليها) :اشنو لي كبير

_مريم (فهماتها وضحكت) :غاهو قد لبغل اما هاداك لتتسولي عليه راه فات الدحش لهيه كيفرش ليه معانا

بداو كيتهزوووو بالضحك بربعة.. خصوصا هي دموع الضحك خرجو ليها من عينيها وداداهم مقابلة غالمشاش تتشري عليهم بعگازها

_الحاجة:وعطيو لطفلة نتوما گلستو على الضحك هاك بالاك

بداو كيزيدو ليها وهي تتاكل فداك الجو الليلي.. ليمنتاااابهتش ليه بلي راه الليل لاح خميتو والقمرة طلات وهي لاعلا بال.. ريوگها سايلين على لقطبان...الرجال ب 3 مجموعين على الطبلة ومجمرهم والعيالات كذلك على مجمرهم كيضحكو.. كل وحدة مدورة بيها ولادها ليغييير حاضين مريم

صوت لباب البراني الحديدي كيترردخ على جهدو بحال دقان العسكر

_الحاجة :ياو شكوون هاد البهايم ليداقو كيهوكا.. خليفة (ولدها الصغير راجل خديجة ) نوض شوف شكون

_خليفة (وقف) :هانا ادادا نيض نشوف هاد الحيوان

نااض هاز تاهو فوقيتو مخنزر.. وكلما قرب وهو كيحس داك لباب غيتفرع.. حلو مخنزر 

_خليفة : ومااااالنا صمكييين

_يحيى (عيينيه خارجين وحمررررر حمرررر واصلة بيه العظم شنق عليه مع لباب) :فينهي أولد القحـ..بة فييييينهيييييي

_خليفة (ضرب ليه ايدو معصب تاهو) :تامااال ديلمك راه الهاجم يموت شرع 

مكملش معاه الهضرة عطاه كروشي واحد ولكن عرف فين يعطيه ليه ضربو بيه لحنجرة مطلع كروشيه مع دقنو خلاه يطيح كااااو بضربتو... تخطاه وزاد داخل جاااعر وهو كيقرب معالم بيه غاللله وهو كيسمع صوت الضحك.. وكان متأكد هاد المرة انه مغيقدرش يجمع اعصابو او يتحكم فيهم الا لقا داكشي لكيتخايل والمشكل لقا داكشي لكيتخايل

بخطواتو الطوال داخل وهو كيشوووفها كتضحاااك زاهية وسطهم.. والجنون غامكيزيدو ليه فوق راسو... بلا ميحس مد ايدو ورا ظهرو جبد سلاحو كيقاد فيه وعينيه معميين

_مريم (تلافتت شافتو جاي قاصدهم.. معلااابالهاااش ضحكات ليه) :هاااه يحيى جيتي... اجي اجي تاكل من حدو سخون 

يتبع🙂