براءة مهووس الجزء الثاني

من تأليف شمس العقبة
2020

محتوى القصة

رواية براءة مهووس

شريفة:(ضحكات بفرحة وقالت)وعلى غنلقا حسن منو لبنتي ياختي حسنية راني كنت نصلي وندعي لبنتي براجل بحالو عارفاه مربي ومأصل وميفوتش ليا بنتي وشحال من مرة عاودات ليا على الوقفات لي كيوقف معاها مرحبا بيكم اختي حسنية......
حسنية:(ببتسامة وفرح)بنتك اختي راها وحدة من بناتي ومعزتها من معزت انس الله يرضي عليه 
شريفة:عارفة دكشي علاش انا مرتاحة من جيهتها عارفة فين غنحط بنتي 
حسنية:وا هي بعد غدا انشاء الله نجيو نهضرو فالبنت رسمي
شريفة:مرحبا بيكم غتنورونا وعبد الرحيم غيفرح الى سمعها
حسنية:انشاء الله (وقفات)هدا هو خاص نمشي تلقاي انس شاعلة فيه العافية هه
شريفة(كضحك)ههههه سيري وسلمي عليه وعلى دريات ومتنسايش العشية را غيتجمعو لعيالات عندك متجيش
حسنية:(كتقاد زيفها وهي غادا)مبلغ يلاه نتلاقاو فالعشية 
خرجات من دار براءة فرحانة مخاية حسنية غطير بالفرحة مشات لكوزينة وتدهات بالشقا وطياب حاضية مع الطيابات وحتى هي ديرا ايديها معاهم باغا كلشي متول ويكون طياب ديال تحميرة لوجه متخلي لجيران ما يقولو هادي هي شريفة معروف عليها التاويل واي حاجة حطات فيها يديها خاص تكون متولة وتحمر لوجه فحين لالة حسنية غير دخلات لدار وهي طلقها بتزغريتة فاااعلة تاركة تسمعات حتل عند جيران تمات طالعة وهي تلقا ليها سلوى عند لباب ديال لبروميان
سلوى:اش واقع امي
حسنية:(بفرحة)خوك غيخطب
سلوى:(عينيها تحلو)وشكون هادي 
حسنية:(بفخر)براءة بنت لااالة شريفة ولدي زين ومربي ودا زينة البنات بنت الاصل والمفصل
سلوى:(ميقات فمها وقالت)اوا شلا 
دخلات مخلية مها كتعوج فمها وتعير فيها وفالاخير كملات طريقها لبيت انس غير حلات لباب لقاتوو راكع جلسات فوق سريرو كتسناه يسالي ودكشي لي كان بعد دقائق كمل وسلم شاف فيها وهو فوق الصلاية بدون ما يهضر سبقات حسنية كضحك وقالت
حسنية:مبروك اوليدي مها را وافقات وغتهضر مع سي عبد رحيم وما غيكون غير الخير
انس:(غمض عينيه وخدا نفس عميييق كأنه عاد رتاح نسبيا وقال)الحمد لله الواليدة ولهلا يخطيك عليا........
#بعد_يومين
كلشي داز بخير وعلى خير تجمعو لعيالات ودوزو عشية بيناتهم مجمعين وبالشطيح والرديح ختموها اما لغد ليه كانت صدقة بين رجال وانس ما رفضش طلب برائتو بالبلدي دخل لدارهم وبصوت الشجي اطرب الروح هو لتحت وهي لفوق مقاداها فرحة تدعي وطلب من الخالق يكون من نصيبها.......
#اليوم_الموعود
فمنزل برائة فطر عبد رحيم وتم غادي خارج من الدار حتى قفزات شريفة منبلاصتها كتولول و باغا تقتل راسها
شريفة:سيدي عبد الرحيم الله يخليك بغيت نهدر معاك
عبد الرحيم:(شاف فيها كيضحك)نعم خاصك شي حاجة
شريفة:(كتفكر كفاش تهدر باش ميتعصبش عليها ولكن معندها كي دير دخلو وقالت)اجي معايا لبيت (مشا معاها وسدو عليهم بيتهم وقال)
عبد الرحيم:نعم الالة اش حب الخاطر
شريفة:بنتنا كبرات ا عبد الرحيم او ولاو يجيو فيها الخطاب
عبد الرحيم:(شاف فيها عاقدهم)وشكون هدا بالسلامة
شريفة:(بلعات ريقها بتوتر)قبل يومين جات عندي حسنية وطلبات البنت لانس
عبد الرحيم:ايه ونتي اش قلتي ليهم
شريفة:اش غنقول ليها انس مربي ومأصل وتبارك الله عليه خدام ومغلقاوش حسن منو لبنتنا 
عبد الرحيم:(بنرفزة)من هاد الهدرة كاملة اش قلتي ليها
شريفة:(بدات كتلعب فصباعها بتوتر وقالت بصوت خافت)قلتها ليها مرحبا بيكم 
عبد الرحيم:(بغضب)مزيااااان الالة مزيااان وليتي نتي الراجل فهاد الدار انا ميت مكينش بلا متسوليني ولا تشاوري معايا عطيتي لكلمة لناس
شريفة:ها نت ا سيدي علد رحيم غير بالعقل بلا غوات البنت كتسمع انا فاش قلت ليها مرحبا بيك قلتها حيت عارفة انس عندك عزيز 
عبد الرحيم:(خرج فيها عينيه)الالة عزيز بوحدها وبنتي بوووووحدها جي تشاوري معايا...وعاد جاية تقوليها 
شريفة:نسيت تشغلت مع الناس لي كانو كيجيو وكنت كنعيا راك شفتي كلشي على عينيك غير كنسالي كنعس بالعيا
عبد الرحيم:دبا ايمتا جايين الناس
شريفة:(الصمت)
عبد الرحيم(نهض فيها حتى قفزات):هدريي نتي كتشوفي فيا مزوق انا
شريفة:(قالتها بالزربة)ليوم 
عبد الرحيم:(ولا كيزفر من مناخرو)الى دوزتها ليك اشريفة اجي صبغي ليا وجهي بالقطران
شريفة:(نزلات راسها وقالت بصوت خافت)سمحليا را تدهيت بالناس ونسيت واش انا عندي من غيرك..ياك كتقول ليا انا وياك واحد
عبد الرحيم:(عارفها وحافضها ما هي عشرة سنين..وقف)اكرام الضيف واجب معندي مندير حتل ليل وغنفكو هاد الحريرة لي درتي



خرج مخليها وراه بمجرد مفات الباب تنفسات الصعداء عارفاه وخا صارم كيحشم او وجهو قدام الناس هو لي ميطيحش بعد لحظات خراج حتى هي لكوزبنة وعيطات على براءة حتى هي تعاونها كلفاتها لدكشي لخفيف وهي تكلفات بالطبخ لبلدي......داز الوقت غير فالكوزبنة وجدو كل ما تشهاه النفس زبراءة غير كتسزل شكون جاي وسريفة حلفات متقول ليها باش متفضحهاش مع الناس معارفاش بلي هي كتمناه ليل ونهار...وجدو راسهم وحتى عبد الرحيم الام بقفيطين جوهرة والاب بالجابادور اما براءة لبسات قفيطين جوهرة بيج وهي مستغربة من توصيات مها الى ان صونا باب الزنقة مشا عبد الرحيم حل لباب وسلم على حميد وانس ببتسامة ورحب بيهم كدلك شريفة رحبات بالام وبنتها وكدلك حميد وأنس دخلو لصالون وبعد الاخد و الرد دخلات براءة هازة طبسيل د الحلوة بالرغم من انها متوترة من وجود انس الا انها حاولت تصرف عادي كيف كانت شحال هادي قدامهم بدون ما تعرف اش واقع ولا علاش مجموعين سلمات عليها حسنية وطلبات منها تجلس حداها ناضو صلاو رجال جماعة العشاء وتجمعو على العشا بدون ما يجبدو الخطبة حتى كملو وضحكو ونشطو وعقلو على ماكلتهم وتجمعات الطابلة عاد نطق حميد مبتاسم بزز بعدما نغزاتو حسنية
حميد:سي عبد رحيم:راك عارف علاش جينا وعلاش مجموعين ليوم 
عبد الرحيم الصمت

حميد:جينا طالبين راغبين فبنتنا براءة لانس الى قبلتو علينا
عبد الرحيم:(بقا كيشوف فحميد ودور عينيه لانس لي كان واضح التوتر فوجهو وقال)شوف ا سي حميد حنا صحاب قبل ما نكونو جيران ودوزنا الحارة والحلوة عمرني رفضت ليك شي طلب ولا فتك ولكن هاد المرة غاسمح ليا(انس هز راسو فيه بسرعة وقلبو تزير عليه) البنت باقا عندي صغيرة ومزال كتقرا (شاف فأنس وقال موجه ليه الكلام)مزال الحال عليها وحتى نت اولدي باقي صغير وعاد بادي فالدنيا
أنس:(قال بجدية)شوف اعمي انا انسان عارف لي ليه ولي عليه وما جيت تقدمت لبنتك الا وقاد بيها والى خصاتها شي حاجة نحضرها ليها اما بالنسبة لقرايتها مغنحبسهاش عليها وعنخليها على راحتها وغنبقا معاها حتى توصل لفين بغات(هزات عينيها لي تجمعو فيهم الدموع فأنس لي كيهضر بجدية ومن وجهو كيبان مراضيش بالرفض).
عبد الرحيم:اجي معايا اولدي نهضر معاك 
ناض عبد الرحيم وتبعو انس لي كان على اعصابو دخلو لبيت جنب الصالون جلسو بزوج فاص ا فاص وقال 
عبد الرحيم:شوف اولدي انا غنجيك نيشان بنتي بغيتها تعيش حسن مني تكون مرتاحة وبدارها وميخصها خير ونت مزال مدرتي والو فحياتك مزال معندك لا سكن لا خدمة مرسمة لا والو يقدرو يجريو عليك فاي لحظة وشنو غدير هديك الساعة غترجع لتسرباييت فالعراسات كفاش غتعيش ليا بنتي ونت غتكون مقادر تعيش حتى راسك
أنس:(حاس براسو تخنق من كلام عبد الرحيم حيت من جهة عندو الحق ومن جهة اخرة بالنسبة لانس معندوش فيها الحق)عمي بنتك نهار جيت دقيت فبابها جيت بنية حسنة وقلب صافي الى كان غير على السكن نكري ليها وتسكن بوحدها الخدمة نخدم بالليل ونهار ونوفر ليها لي تحتاجو
عبد الرحيم:بنتي مغنعطيهاش ليك اولد الناس ما نت من سهمها وا هي من سهمك لي عندي قلتو
انس:(عض على شفايفو من لداخل بعصبية حتى تبنن الدم فمو وقال كمحاولة انه يلينو وهو عافط على كرامتو وجهو ولا حمر وتزير)بنتك اعمي غتكون بنتي نفديها بروحي نخدم عليها بالليل وبنهار وما يخصها خير لابارطومون غتجي فوقتها كلشي بوقتو وانا دخلت الدار من الباب طبقت قول الله تعالى [ "وأتو البيوت من أبوابها" سورة البقرة الاية 189 ] والارزاق بيد الله ليوم عندنا غدا معندناش والعكس صحيح كلشي بيد الله
عبد الرحيم:(بقا كيشوف فيه وناض)لي عندي قلتو الى سهل عليك الله ودرتي دارك واستقريتي فخدمتك او ولا عندك صالير لي غيعيشكوم مرتاحين وكانت مزال مدوا فيها شي واحد مرحبا بيك
ولكن دبا منقدرش نعطيك بنتي ونت مضامن حتى مستقبالك 

خرج من البيت مخليه وراه فحين انس تبعو فالبلاصة وبدون ما يستنا عائلتو تبعو داز فبراءة لي كانت واقفة وخرج وجهو حمر وصدرو كيطلع وينزل من وجهو عرفز دارهم اش كين خرجو تابعينو هو معرفوه فين مشا وهما مشاو لداارهم حميد كينغر وحسنية عقلها غير مع ولدها بقات عساسة عليه الليل كامل فحين هو كان غير كيتمشا معارفش راسو فين غادي حتى عيا ورجع لدار حادر راسو حتى سمع اسمو هز راسو وهو يشوفها كانت كطل من الشرجم....

لداارهم حميد كينغر وحسنية عقلها غير مع ولدها بقات عساسة عليه الليل كامل فحين هو كان غير كيتمشا معارفش راسو فين غادي حتى عيا ورجع لدار حادر راسو حتى سمع اسمو هز راسو وهو يشوفها كانت كطل من الشرجم....
براءة:(بهمس مسموع)تسناني انا نزل عندك 
خرج عينيه فيها بغا يهضر لقاها طارت زفر من نيفو بعصبية منها اما هي دخلات رمات عليها فولارها ونزلات كتسلت لزنقة كلها كترعد خايفة تحصل كتخطي الخطوة او فمها فيه غير اية وحدة "وجعلنا من بين ايديهم سدا ومن خلفهم سا فأغشيناهم فهم لا يبصرون" سورة ياسين وكتقول موراها " ياربي ياربي ياربي منحصلش ياربي ياربي تحفض ياربي تسترني ياربي" موصلات لباب حتى كان غيسكت ليها القلب بالخلعة حلاتو بشوية باش ما يتسمعش وخرجات راسها لقاتو عند باب دارهم غير شافها وهو يسخط قرب بسرعة عند بابهم دور عينيه على شراجم بان ليه كلشي مسدود شراجم قلال لي محلولين دفعها لظاخل زرد الباب وراه وقال بصوت خافت ممزوج بنبرة غضب
أنس:اش مهبطك فهاد الليل هبلتي ولا شنو
براءة:(بصوت هادئ وخافت وتوتر قالت بحروف متقطعة)بقيت مشطونة عليك
أنس:(سكت كيشوف فيها عينيها فعينيه وهي قريبة ليه شادها من دراعها بدون ما يرد لبال للمسافة لي بيناتهم وقال)علاش غتشطني عليا 
براءة:(حطات ايدها على ايدو كتألم من الشدة لي شادها)وجعتيني 
أنس:(طلق منها بسرعة وبعد عليها خطوات قلال وقال)سمحيليا مرديتش البال
براءة:(ببتسامة صغيرة)ماشي مشكيل..(حرك راسو ساكت يلاه غيهضر وهي تقول بسرعة)مكنت عارفة بلي راك جاي تخطبني من بابا
أنس:(زير على يديه وقال بكبرياء مجروح)نساي ممكتابش
براءة:(زيرات على بينوارها طويل وقالت وعيونها كيلمعو وبتوتر كبيييير قالت)واش ك(سكتات)
أنس:كملي كلامك 
براءة:(نزلات راسها وقالت)والو فين كنتي حتل هاد الوقت
أنس:(عقد حجبانو وقال)شغلي هداك علاش كتسولي
براءة:(شافت فيه بنضرات حنان يدوبو التلج وقالت بخفوت )غير سولت غتكون خالتي حسنية مشطونة عليك
أنس:(بقا ساكت كيشوف فيها هز ايدو خربق شعرو كيف عادتو فاش كيتوتر وقال)سمحيليا هضرت معاك بهديك الطريقة ..سيري طلعي لدار اخر مرة ديري بحال هاد تصرف ولا غيكون ليا معاك تصرف اخر
براءة:(شافت فيه نيشان وقالت بدون لف او دوران)بأشمن صفة غتحاسب معايا ولا تخاف عليا
أنس:(بلع ريقو وقال بهيبة بالرغم من الحزن لي حاس بيه)حيت بحالك بحال خوتي وبحال سلوى مغنبغيش شي واحد يشوف فيك شوفة ناقصة ولا ينعت فيك
براءة:(كانت كتسنا جواب اخر وبخيبة أمل قالت)اه شك
أنس:(قاطعها وهو حاط ايدو على صدرو)مباغيش شي واحد ينعت فشرفي وعرضي ......."يقصد العرض"
براءة:(فهمات قصدو وكلامو لي نبع من قلبو وصل لقلبها نيشان وبان تأثيرو بتزايد دقاتو ووجنتيها تصبغو بحمرة الخجل وحدرات عينيها وقالت)اش قال ليك بابا فاش بقيتو بوحدكم
أنس:(زفر بضيق قلب وجهو وقال)والو
براءة:(طلات عليه وقالت)بغيت نعرف
أنس:باش غيفيدك الى عرفتي
براءة:(بعد لحظات من تفكير)معرفتش
أنس:(ببتسامة موراها حزن كبير وهم اكبر)سيري طلعي لداركم ويكون خير انشاء الله
براءة:(بأمل وبدون تفكير قالت)غتعاود طلبني من بابا
أنس:(صغر فيها عينيه وقال بدون تفكير متأمل وكيطلب الله فخاطرو يكون دكشي لي كيفكر فيه صحيح )كتحسي بشي حاجة من جيهتي!!!!!!!
براءة:(بعد لحظات من الصمت دازو على انس تقاااال قالت)ونت كتحس بشي حاجة من جيهتي؟؟
أنس بدون ما يتسنا كتر وبدون ما يهضر حرك راسو ببطئ وكيشوف فيها شوفات كيبينو ضعفو فهاد الاثناء ..مستني جوابها على نار وهي كدلك بدون ما تستنا اكثر حركات راسها بنفس الطريقة وعينها مجموعين فيهم دموع بدون ما يحس على راسو جرها عندو عنقها مغمض عينيه وكيحمد الله ويشكرو فحين هي حاطة راسها على صدرو ودموعها نزلو وهي كتسمع دقات قلبو المتسارعة والعنيفة زيرات على شوميز لي لابس وطلعات منها شهقة بكاء بعدها عليه بسرعة وقال
أنس:(مخربق ومتوتر وفرحان وخايف يكون غير كيحلم مزال ممتيق قال)مالكي علاش كتبكي..(فكر فالتعنيقة وقال)سمحيليا مقصدتش نبكيك محسيتش براسي حتى عنقتك نتي معارفاش شحال وانا كنتسنا فهاد اللحظة وخا تمنيتها تكون حسن من هكا ولكن معليش ربي كبير وهكا مكتاب لينا نعرفو شنو كيخالج صدورنا(مقادرش يصبر ولا يحبس راسو وميعتارفش ليها بدكشي لي داز منو فالوقت لي كان كيبغيها غير بوحدو وهو عارف بلي مكتبغيهش شد راسو بزز وقال)سمحيليا حيت قربت ليك وانا مكيربطني بيك حتى حاجة رسمية ولكن ص
براءة:(قاطعاتو)من ايمتا
انس:(بدون فهم بقا كيشوف فيها)!!!
براءة:من ايمتا ونت(سكتات للحظات وقالتهت بخفوت)كتبغيني
أنس:(ابتسم وقال كينعت بايدو لارض)ملي كنتي قد هاكا هه(حك مؤخرة رأسو وقال وهو كيتفكرها فاش كانت صغيرة) معرفتش فالاول كنت كنحس بالمسؤولية اتجاهك وفالتالي لقيت راسي (ركز عينيه فعينيها)كنبغيك (تنهد بأسى)كنت ليل ونهار كنطلب الله يكتبك ليا عمرني فكرت فيك خايب بالعكس ديما كنت كنشوفك الملاك الطاهر (ابتسم)كنتي دائما برائة روحي......

راسي (ركز عينيه فعينيها)كنبغيك (تنهد بأسى)كنت ليل ونهار كنطلب الله يكتبك ليا عمرني فكرت فيك خايب بالعكس ديما كنت كنشوفك الملاك الطاهر (ابتسم)برائة روحي......

كلامو تغرس فقلبها وخلاها تلاح فصدرو كتبكي عسا ما يسولها وهي مكتجاوبوش خلاها على راحتها وقالت وسط دموعها غاطسة وجها فصدرو....

براءة:كنت كنشوفك فشكل وديما كنشوفك فالمدرسة حتى ولفت على وجودك ولا كيجيني عادي وكنكون مرتاحة وانا غادا فالطريق ولكن عمرني فكرت فشي حاجة غتكون بيناتنا كان كيحسابليا ولد دربنا وماما كتوصيك عليا حتل نهار سمعت صوتك فالجامع نهار على نهار كنحس بلي كنتعلق بداك الصوت حتى وليت كنطلب الله يكتب ليا صاحب الصوت...(شافت فيه وقالت)تعطلتي عليا بزاف شحال وانا كنتسنا فيك عاد وصلتي ......
فهاد اللحظة بالدات تفكر اول جملة سمعها منها فالرؤيا لي كنت نفسها تماما ابتاسم وغمض عينيه وقال "الحمد لله" بصوت هامس قدرات تسمعو براءة وخلاها تبعد عليه وهي خجلانة منو حادرة راسها ابتاسم ليها وجبد جوالو...
أنس:(متناسي صورتها لي على الشاشة)دخلي الرقم ديالك 
براءة:(باغا تاكل راسها بالحشمة والموقف لي حطات فيه راسها ولكن رغم دبك كانت حاسة براحة عجيييبة خداتو من عندو وحلاتو بمجرد ما تحل بانت صورتها وهي كطل من الشرجم ابتسمت وقلبات الهاتف فوجهو وقالت
براءة:دير تصويرتي فليكرون هه ايمتا صورتيني 
انس:(شاف الفوطو وتفكر شعرها لي كان بين ضربها لراسها ضربة نيت حسات بيها وقال عاقد حجبانو)اخر مرة طلي وشعرك كيبان 
براءة(حطات ايدها على راسها مخصرة ملامح وجها):وعتيني ا اناااااس ومالني درتها بلعاني
انس:(جر ليها لفولار على شعرها)سيري طلعي لظار حتى نصوني ليك باك مبقا ليه والو وينزل لجامع
براءة:(خرجات عينيها)ناري نسيت بابا الى حصلني غيقتلني
انس:(قبل رأسها وقال)طلعي لدار..(دارت غادا شدها من ايدها وحتى شافت فيه وقال ببتسامة زينات وجهو الرجولي)كنواعدك غيكون خير وغنعاود نهضر مع باباك فالقريب العاجل غندير جهدي كامل باش تكوني حلالي فأقرب وقت
براءة:(ببتسامة هزات ايدو قبلاتها باحترام وقالت)كنتيق فيك بزاف
أنس:(طلق منها وهو مبتاسم ونعت جهة دروج)طلعي انا غير نطلع غنصوني عليك 

حركات راسها بالايجاب وطلعات كتحري محيدة سندالتها غير قربات لباب ديال لبروميان طلقات ودنيها وكملات لدوزيام فين كين بيتها وطلقات رجليها للريح سدات باب بيتها ومشات نيشان للشرجم كتنهج كطل حتى بان ليها غادي لدارهم حل لباب دور وجهو بانت ليه كطل وهو يقرب حدا دارهم شوية باش تسمعو وحتى هي خرجات كتر من الشرجم و نطق بصوت هامس مسموع نوعا ما
أنس:كنبغيك
براءة:(مقدراتش تحبس الضحكة حركات راسها كضحك وجاوباتو بنفس طريقتو)حتى انا كنبغيك ....

❄عسى ان تكرهو شيئا وهو خير لكم...❄

دار ليها اشارة باش دخل حركات راسها بالايجاب وحركات ايديها بتحية سلام ودخلات عاد هو حل لباب ودخل لدار سد موراه وطلع فرحان ومبتاسم بمجرد ما وصل لبروميان لقا مو كتسناه فالدروج شافها وابتاسم قرب ليها وقال
انس:الواليدة مزال فايقة
حسنية:(كتهضر بجدية حتى قلبو خفق بخوف نوعا ما)فين كنتي حتل هاد الوقت
انس:(بلع ريقو وقال)كنت غير كنتمشى وصافي 
حسنية:(بقات كتشوف فيه وحركات راسها بالايجاب وقالت)عشاك فالكوزينة
أنس:(حرك انس راسو وهو حاس بمو ماشي هي هديك تبعها وقال)لواليدة (شافت فيه هز ايديها عندو وقبلها وقال)عسى ان تكرهو شيئا وهو خير لكم نساي شنو وقع ومغيكون غير الخير انشاء الله براءة مغيديها حتى واحد من غيري (ببتسامة)انا هو لي مكتاب ليها بإدن الله 
حسنية:(مشات لبيت الجلاس وقالت بعدما شافتو جلس حتى هو قدامها كيف موالف فاش كيكونو بوحدهم)شنو قال ليك عبد الرحيم
انس:(بقا راسم ابتسامة على وجهو بزز وقال)غير الخير الواليدة مقال حتى حاجة د العيب كلامو كلو على حق والمرة جاية فاش غنهضر معاه مغنخلي ليه فين يهضر بادن الله تعالى
حسنية:(دوزات يديها على شعرو وقالت)الله يرضي عليك اوليدي .. ولكن انا مك ولازم نعرف علاش رفض واش غيلقا حسن منك لبراءة 
انس:(تنهد بضيق وهو كيتفكر كلامو)باغي مصلاحة بنتو وباغي يشوفها مرتاحة وانا كنبان ليه ماشي أهل للزواج مغنقدرش عليه 
حسنية:(عقدات حجبانها وقالت)هداك انا لي كنعرفو كنا جيران حتى قبل ما نتزوج بباك عزيز عليه المظاهر وعزيز عليه يبان حسن من الناس الله يهديه وصافي 
انس:(نزل عينيه وقال)أمين يارب
حسنية:(هزات ليه راسو وقالت وايديها مزال على ذقنو)خازنة ليك اوليدي شي فلوس لهاد نهار خودهم وبدا شي مشروع ديالك
انس:(حرك راسو بالرفض)هدكشي لي كنت كنعطيك راه ديالك ماشي باش تخزنيه ليا عندي باش نقضي متخافيش الواليدة دبا يفرجها الله 
حسنية:وانا باش كنتسمى ماماك الى معاونتكش اوليدي الفليسات لي كمتي كتعطيني درت بيهم قرعات وراه محطوطين فالبنك مكنمسهمش لاهما فيك ولا فحميد الى شافهم غياخدهم ويمشي يخسرهم فالغارو "السجائر" والخوا الخاوي را عندي غير نت اعوينتي فهدوك الحتارف كلهم حتى واحد مفيه الفيدا "الفائدة" 
أنس:(برفض قاطع)خليهم ليك ولا خزنيهم لسلوى نهار تزوج تلقاوهم انا قاد براسي وخدام الحمد لله نكمل عامين غنترسم وهديك الساعة غنهز كريدي وندفع فشي ابارطوموون و......
حسنية:(خرجات عينيها)كفاش برطمة باغي تعزل عليا اولدي صافي.....هادشي غير مزال مدرتي والو وكتفكر تخوي عليا الدار 
أنس:(كيشوف فيها)الله يهديك الوالدة نوضي تنعسي حتل غدا ونهضرو فهادشي 
حسنية:لي عندي قلتو
أنس:(حط راسو فحجرها بتعب وقال)عيان الوالدة باغي غير نعس غدا ونهضرو عفاك
حسنية:(بردوخ وحنان)وخا اوليدي نوض تنعس حتل غدا انشاء الله تصبح على خير 
أنس:(وقف وقال)وانتي من اهل الخير ليلتك مبروكة

مشا لبيتو وحسنية بقات باركة ديرا ايد على حنكها كتشوف قدامها كتخمم حتى فيقها نت سهوتها ولدها رضى لي كان غادي لكوزينة عاد لعنات الشيطان ومشات تنعس اما أنس بمحرد ما طلع لاح تجاكيط فوق الكرسي وتبعها الشوميز هزها بغا يحطها تصبن وهو يتفكر تعنيقتها وريحتها لي مزال لاسقة فيها ابتسم وطواها داها لماريو حطها فواحد القنت بوحدها وجبد سيرفيط بدل ومشا لسريرو متكي هز الفون ودوز لابيل لبراءة عينيه كيتلسقو 
انس:ألو
براءة:(بخجل ردات عليه وهي كتعض فشفايفها )الو 
انس:موقع ليك والو فاش طلعتي متلاقيتي مع حتى شي واحد
براءة:لا الحمد لله كانو مزال ناعسين
انس:(بتاسم)الحمد لله 
براءة:(بخجل سولات)انس نسولك
انس:(وهو فرحان وغير كيضحك مثلها تماما)خودي راحتك
براءة:علاش انا!
أنس:(بتاسم وقال)الى الله قذف حب شخص ما فقلوبنا مكيكونش بايدينا نحيدوه ولا نبدلوه الله لي حببني فيك 
براءة:زعنا غير هادشي
انس:(ضحك بصوت مسموع وقال بنبرة رجولية)علاش شنو بغيتي يكون اخر
براءة:(بخجل)والو هه
انس:وخا الالة ... 
براءة:(كتهضر وهي حشمااانة منو وكبنت اول مرة غدخل فعلاقة قالت)قول والله منتخلا عليك ولا نخونك
أنس:كنعطيك عهد الله وكنقسم ليك بالله دكشي هو لي عمرو يكون معمرني شفت فغيرك 
براءة:(بخجل)همم هه
أنس:(ضحك وقال)ونتي الى كبرتي شوية مزال غتبقاي تبغيني!
براءة:(غتموت بالحشمة لدرجة ولات كتقرص فراسها بدوون ما تحس)ممم لا منبقاش نبغيك
أنس:(حبس الضحكة وقلبو كيحس بيه بحال شي صخرة كتنبض)بمعنى!!!
براءة:(بصوت بريئ كضحك)بمعنى غنولي كنموت فيك (بصوت هامس نوعا ما)نت اول شخص دخل لحياتي وأول شخص نبض ليه قلبي...وقالت بسرعة مغيرة الموضوع باش ما يقولش شي حاجة تغرقها فحويجها)ومتبقاش تعطل فالزنقة 

ضحك أنس من نيتو على هبالها ومن خلال حديثهم شاف براءة اخرة بنوتة مزال صغيرة دغيا تطلق ليها لسان معاه عاودات ليه على راسها وكفاش شخصيتها بالرغم من انه بان ليه العكس وهي كتهضر معاه الا انه قدر يستنتج بلي مكتشوفوش كيف الناس لاخرين ومكتعاملوش بحالهم نهائيا حتى قال الفجر الله واكبر بزز باش قطعو الاتصال وتمناو لبعضهم ليلة سعيدة وكل واحد توجه للقبلة كيناجي لي خلقو دعاء واحد بجوج طرق مختلفة ولكن المقصود واحد صباح صبحو ناعسين بزوج خصوصا وانس كان مخدامش حيت صابح الاحد وكيف معروف بلي عطلة ناض اول حاجة دار هي هز الفون حال عين وساد لخرا كتب مساح مفاده "صباح الخير براءة روحي" حطو وناض غسل وجهو ومشط شعرو ورتب نفسو عاد هزو ونزل لتحت يلاه فات مع الباب صبح عليهم وهو شاد لفون كيختش فيه بل كان كيكتب ليها مساج فاش طلعات ليه vu بدون ما ينتابه لشكون كين حتى سمع بزاف د الاصوات هز عينيه وهي تبان ليه كضحك وكتلعب بحجبانها كتهزهم وتنزلهم وحداها مها.......

دار هي هز الفون حال عين وساد لخرا كتب مساح مفاده "صباح الخير براءة روحي" حطو وناض غسل وجهو ومشط شعرو ورتب نفسو عاد هزو ونزل لتحت يلاه فات مع الباب صبح عليهم وهو شاد لفون كيختش فيه بل كان كيكتب ليها مساج فاش طلعات ليه vu بدون ما ينتابه لشكون كين حتى سمع بزاف د الاصوات هز عينيه وهي تبان ليه كضحك وكتلعب بحجبانها وحداها مها.......

حسنية:(شافت فيه وابتاسمات بعدما كانت عاقداهم)صباح الخير اوليدي 
انس:(دور عينيه عليهم كاملين حابس الضحكة)صباح النور ..السلام خالتي شريفة لباس عليك
شريفة:(بخجل)لباس اوليدي ونت كي صبحتي
انس:(حرك راسو بالايجاب)لباس الحمد لله(شاف فماماه وقال)انا الفوق الى حتاجيتيني عيطي ليا
حسنية:مغتفطرش
انس:حتل شوية مزال محاس براسي باغي ناكل ..خليت ليكم الراحة 

قبل ما يدور شاف فبراءة لي كانت عاقداهم وطالع ليها الدم حيت مسلمش عليها وغمزها فغفلة من مو ومها خلاها تحدر عينيها بز منها ووجنتيها يحمارو بالحشمة تم خارج وهي توقفو
شريفة:ولدي انس انا جيت لعندكم باش نشوفك ونهضر معاك اوليدي
انس:(رجع دار وشاف فيها باستفهام وقال ببتسامة)مرحبا اخالتي الله يسمعنا خبار الخير
حسنية:وجلس بعدا غتبقا واقف
انس:(جلس فجنب مو اونفاص لبراءة لي مبقاتش مرتاحة فالجلسة كانها جالسة على الشوك وهي كتلعب بصباعها حتى رد ليها لبال وقال موجه لكلامو لمها)هنا اخالتي خير
شريفة(بحرج حادرة راسها)سمح لينا اوليدي على دكشي لي دار عبد رحيم لبارح 
انس:(حط ايدو على لحيتو وطال سكوتو حتى هزات براءة وجها وتقابلت عيونهم وقال)معليش من حقو 
شريفة:(عبد الرحيم اولدي الله يهديه كيصعبها وكيفكر فراحتها ولكن انا مكرهتك ليها اوليدي منلقاش حسن منك الى تزوجتيها غنكون مرتاحة وعارفة فين نحطها 
انس:ممكتابش اخالتي ولكن يكون خير من هنا لقدام معرفنا شنو غيكون ولا شنو مخبي لينا الله 

حسنية خرجات عينيها ولكن سكتات مهضراتش ديما كتحتارم ولدها وتكبر بيه خصوصا قدام الناس وخا مكتكونش متافقة معاه ولا معاجبها حال كتسكت حتى تبقا هي وياه فالراس عاد كتهضر معاه وغالبا ما كيكون الاقناع من طرفو وكتستلم وتبعو فهواه فحين شريفة قالت ببتسامة 
شريفة:هدا هو المضمون فيك اولدي الله يرضي عليك...(شافت فحسنية)ولدتي وعرفتي اش ولدتي اختي تبارك الله مشاء الله عليه اللهويحفضو ليا 
حسنية:(عاقدة حجبانها ومعاجبها حال)امين
سلوى:(عنقاتو من لور كضحك وقالت وعينيها على برائة)خويا را زين رجال مخلا رزانة مخلا زين ما خلا عقل وما خلا اخلاق 100الف وحدة تمناه غير هو الله يهديه (تنهدات وقلبات عينيها)

فحين براءة شافت فانس بحزن وحدرات راسها اما لالة شريفة فهمات المعنى وضحكات بزز وقالت 
شريفة:الله يعطيه على قد نيتو ابنتي فالاخير كلشي بالمكتاب....

أنس شاف فسلوى شوفة قاصحة خلاتها تبعد منو وتخرج من لكوزينة كلها مخلياهم بلا ما يهضر معاها فحين حسنية ضرباتها لضهرها بالزعفة وقالت كتحلف عليها
حسنية:الى بقات فيك ازرمومية عكري ليا بلاتي على والديك(خرجات كتحك فضهرها وكتنغر فحين حسنية شافت فشريفة وقالت)راك عارفاها كي ديرا مديش عليها
شريفة:(وقفاات وتبعاتها براءة)ماشي مشكيل عارفة لي كين..المهم انا غنمشي خليتكم على خير وكنتمنى من الله الخاطر يصفا
حسنية:(بعدما شاف فمو ودار ليها حركة بعينيه قالت)فين غادا وعلى انا هضرت بعدا باش تمشي جلسي لارض..متديش على ديك البرهوشة را متخاف متحشم
شريفة:ولكن غندي عليك نتي نيت لي من صباح ونتي تخنزري فيا الله يهديك احسنية را شرحت ليك اش كين وطلبت السماحة انا مكنتش عارفا كون قال ليا شي حاجة كون علمتك قبل ما نخليش حتى نتحشمو معاكم (بحزن)
حسنية:(شافت فيها وقالت)ايه نتي صحبتي وبراءة بنتي وربيتها بيدي ولكن اجارتي الى كانت غتكون شي علاقة بيناتنا غتكون صحبة وجورة اما نتشاركو الدم لا راجلك مدار فيها ما يصلاح لعالم الله اش قال لدري حتى هججو وخلاه ديع مجاني حتى قرب لفجر (انس شاف فبراءة وهي كدلك كأنهم فكرو فنفس الحاجة ابتسم ابتسامة خفيفة وعاود غمزها كإشارة منو باش يقول ليها دكشي لي فكرتي فيه حتى انا فكرت فيه)
شريفة:اختي حسنية الله يهديك را حتى واحد معجبو الحال راني قطعت معاه الهضرة وحتى براءة معجبها حال مبغاتش يدير هكاك انا جيت عندك نصفيو الخواطر وانا أم ونتي أم غنحسو ببعضياتنا وانا حطيت راسي بلاصتك وحسيت بيك
حسنية:(دارت صبعها ففمها وطراساتو على طابلة وقالت بعصبية مراضياش)شتي غير راجلك الى مندم على ولدي راني موالداش رجال وعقلي على هضرتي والله وباش يحلفو دكاليات لا لقا بحالو
شريفة:(تنهدات حيت عارفة كلام حسنية صحيح وهي مغتلقاش حسن منو ومن ديما كتمناه ليها وكتشوف بنات جيران اش ديرات عليه وقالت)والله اختي كون جات عليا كون زوجتها ليه ليوم قبل غدا راني منلقاش لي يصونها ليا ويعزها بحالا باقا فدار باها....(شافت فأنس لي عاقد حجبانو وغير كيسمع وايديه تحت دقنو كيشوف فبراءة)اوليدي كيقولك خطب لبنتك ما تخطب لولدك وانا مكرهتكش تكون ليها وتكون ليك 

براءة:(بعد صمت طويل وهي غير كتسمع وقفات وقاطعتها مكتشوف فحتى واحد)انا غنمشي لدار الى كنتي غتمشي يلاه مكنتيش غتمشي انا غنسبقك
أنس:(شاف فيها وزفر بضيق وقال حتى خلاهم كيشوفو فيه)نقدر نهضر معاها شوية!
براءة:(شافت فيه مخرجة عينيها وكتفتف)لا غنمشي لدار بسلامة 

دارت غادا كتفتف حشمانة ومخلوعة وصلات عند الباب ديال الكوزينة وقفها صوت مها

شريفة:براءة
براءة:(وقفات مغكضة عينيها وشادة فطرف جلابتها لي لابسة وقالت بصوت خافت)نعم ا ماما
شريفة:شوفي انس شنو بغاك ونمشي انا وياك
براءة:(دارت مخرجة عينيها قلبها كيضرب وقالت)اه وخا انا كنسمعو 
انس:(قال بسرعة حابس الضحكة)على انفراد.،الى بغيتي طبعا
براءة:(عقدات حجبانها فاش شافتو حابس الضحكة وقالت)لا غنمشي لدار
انس:(وقف)انوصلك ونهضر معاك 
براءة:علاش مالي فين ساكنة 
انس:(نوصلك غير قدام الباب 

سبقاتو وناض هو تبعها مخلي مو ومها كيضحكو عليهم وحدة كتغمز فالتانية 
شريفة:شتي مواتيين تبارك الله مشاء الله 
حسنية:الله يحجبهم من العين ياربي.
شريفة:اميين ياربي 
حسنية:(جمعات الضحك وشافت مخنزرة فشريفة وقالت)وهدك الراجل عدك محشم مرمش مقال عيب مقال ندير بزجه الجورة والعشرة ولا طعام لي مشاركين مقال والو من هادشي
شريفة:واااا حسنية واااختي الله يهديك نساي دبا يدير الله خير عندي احساس براءة مغتكون غير لأنس وانس مغيكون غير لبنتي

ميقات فيها وهزات كاس ديال اتاي عاصرة عليه فحين انس بمجرد ما فاتو الكوزينة جرها لجهة الدروج وقفها وقال 
انس:مالك الخيبة 
براءة:(ساطت من مناخرها ربعات يديها وقالت بحال شي طفلة كتشكى)اويلي مكيحشموش كيهضرو فدكشي قدامنا حشمونا كاع
انس:(ضحك وجر ليها الفولار على شعرها)يخليلي لي يحشم .. (نزلات راسها حشمانة وجها غيطرطق بالحرارة وهو قال بأمل ويقين)دكشي لي كيقولو غيتحقق بادن الله تعالى وغنعيشك احسن عيشة 
براءة:(ببتسامة خجولة)هممم هه
انس:(قهقه برجولة )مالك وليتي بقرة تهمهمي عليا هضري نيشان
براءة:(عقدات حجبانها وضرباتو لصدرو بلكمة)ونت تور يلاه 
انس:(شد فصدرو ومخصر ملامح وجهو)مسمومة يديك قاصحين 
براءة:(بقات كتشوف فيه ممتيقاهش ولكن فاش شافتو على حالو قربات ليه وحطات ايدها على صدرو مخلوعة وقالت)توعتي!!! سمحليا عفاك مكنتش قاصدة نوعتك سمحليا 
انس:(حرك راسو بالنفي كيتبوحط:توعت غير شوية ماشي بزاف 
براءة:(دموع تجمعو فعينيها)كداب من وجهك كتبان موعت بزاف سمحليا😭😭😭
انس:(غير شاف دموعها نزلو وهو يجمع الوقفة وقال بسرعة)لاش ليكا غير كنضحك معاك مموعتش 
براءة:(كتبكي مخلوعة هزات ايدها بغات ضربو وهي ترجعها عندها وقالت بصوت باكي)حرام عليك خلعتيني

انس شد ايديها قبلها وراسها كدلك وقال)سمحيليا صافي منعاودش نضحك معاك هاد الضحك صافي سمحيليا(مقرب ليها ومنزل راسو عندها كيمسح ليها فدموعها وكيراضيها بحنان ممزوج بالندم وصوت خافت نوعا ما...حتى سمع صوت سلوى لي كانت حاضياهم ملي نزلو حنحنات وقالت 
سلوى:(كأنها متفاجئة)اويلي شنو كديرو 
بالصدمة والخلعة بعدات عليه حتى كانت غطيح من دروج جاب الله كان شادها من ايديها شاف فيها مخلوع وزير على يديها وعاود شاف فسلوة بعصبية وقال من تحت سنانو 
انس:2 كلمات مغنعاودهمش غتغبري منشوفش خليقتك ولا راك عارفاني كيف دير غبري من قدامي
شافت فيه وشافت فبراءة لي حادرة راسها خيفة وقالت بغضب عاقدة حجبانها كتغلي مراضياش يهدر معاها هكتك قدام براءة 
سلوى:ها هي غادا حتى يجي بابا ونشوفو هادشي لي شفت فيناهو الى مقلتهاش ليه مولد فيا غير الخلا
انس:(تقدم خطوة لقدام غادي ليها زيرات عليه براءة حابساه كتبكي خيفة وقال بالزعاف)سلوى حيدي من قدامي ولا غنفوت فيك شي ضربة ...(شافها باقا وهو يغوت بغضب حتى قفزها)غبرييي من قدامييي 

مشات كتجري من حداه وهي العافية شاعلة فيها الغضب تغلب على الخوف وهي كتوعد لبراءة وانس بالويلات صوتو وصل حتل لكوزينة ناضو النسا بزوج يتجاراو يشوفو اش واقع لقاوه حاني عليها وحاط ايدو على خدودها وكيسكت فيها وكيمسح دموعها بأصبع الابهام 
أنس:صافي موقع والو علاش كتبكي وترعدي هكا 
براءة:(كتنخصص بالبكا وحاطة ايديها على ايدو بخوف كتخرج كل كلمة مع شهقة د البكا)فهمات غلط كيحساب ليها كنديرو شي حاجة الى قالتها لعمي غيوصلها لبابا وبابا غيقتلنا بزوج (كتبكي حتى وجه ولا حمر)
انس:(قلبو كيخبط ومخربق معمرو طاح فهاد الموقف ومعرفش كفاش يجيريه وقال)واش مكتيقيش بيا انا معاك وحتى حاجة مغتقيسك صافي خلي عليا كلشي صافي براكا من البكا كتحرقيني 
براءة(كتحرك راسها بالنفي وهي على حالها الا بكائها خلاها تسعل سعلات متكررة وتقول بكلام متقطع كأنها مسمعاتش كلامو كتفكر غير فباها)كحلتها ا انس قفرتها الى مشا حتى سمع هادشي غيقتلنيييي

يلاه بغاا يهضر وقفو عليهم الامهات شريفة تلاحت على بنتها عنقاتها عندها مخلوعة عليها وحسنية مخرجة عينيها وقالت 
حسنية:اش وقع لبنت اويلي

انس بغضب:سلوى غنقتلها ليوم نصفيها ليها..
دفعهم بزوجات وتم غادي ليها تبعاتو حسنية وبراءة دفعات مها تبعو شدوه غير بزز كيزاوغو فيه وهو كيغوت باغي يمشي ليها مغدد 
انس(بعصبية):طلقي مني الواليدة خليني نمشي نهرس ليها دك الفم 
حسنية:الله يرضي عليك اولدي باك مبقا ليه فين يجي غادي غير يكبر المشكيل وينوض صداع الله يرضي عليك بدل ساعة بغيرها

بقا كيششوف فيها وقال بغضب:هدري معاها ولا مغيعجبها حال 

خرج مخليها كتندب وتولول اما براءة حدرات راسها وسبقات مها فحين شريفة سلمات على حسنية وطلبات منها تهدن الوضع وتعرف اش وقع بلاتي هي احسن ودكشي لي كان كل وحدة توجهات تقضي دكشي لي كيتسناها......دخلات حسنية عند بنتها لقاتها جالسة ممسوقاش كتمش فشعرها وكتقلب على حويجها ناوية تخرج 
حسنية:(وقفات عند الباب عاقداهم:شتك كتقادي اش كين
سلوى:(كتكمل دكشي لي كدير)خارجة
حسنية:(بعصبية غوتات عليها)غنقلك 2 كلمات دك دخول والخروج ديالك را ماااااعجبنيش غتبقاي دوري دوري حتى ديري شي مصيبة الله يا مك حتى يقتلوك 
سلوى:(كتسوط وكتهز يديها)مالهم لي يقتلوني اش كندير كاع سيري الواليدة سيري الله يهديك حتى نتي 
حسنية:(كتحرك راسها)وعلى الله يكون هادشي نيت لي كين..وبعدي من خوك را كتقلبي عليه
سلوى:(شافت فيها عاقدة حجبانها)مالي اش درت ليه قولي ليه هو يبعد مني ولا غيشوف لي ميعجبو مني
حسنية:(مشات عندها مخرجة عينيها)والله يا مك ما تفرقيه عليك يا تا نعلق والديك 
سلوى:(بالغوات وكتبكي)سير كتحكرو عليا هاد الهضرة قوليها ليه هو لي مقنت البنت وجالس يبوس فيها فالدروج مالي انا
حسنية:(خرجات عينيها ونزلات لفخاضها طلعاتها بتلييعة)اويلي على الحمارة ما بقيتيش تحشمي..وليتي تقولي على خوك هادشي وقدامي الله ينزل على بوك اللعنة يا بنت الحرام
سلوى:(غوتات وشدات فخضها كتبكي)انا قلت غير دكشي لي شفت وغيجي بابا غنقوليه هادشي كلو لي درتو ليا ليوم غير بلاتي 
حسنية:(بتهديد)والله يامك ونسمعك خرجتي شي حرف لباك يا ميفكك مني فكاك الى بغيتي نرجعو ليامات زمان نرجعو ياااوييييلك يا سلوى ونسمع قد هكا(دارت حركة بصباعها)ناكلك ومنخلي فجد بوك عضم صحيح 

خرجات مخلياها وراها كتبكي حتى حسات بالفون كيفيبري فصدرها جبداتو شافت النيم مسحات دموعها وسدات الباب ومشات جهة الشرجم دوزات لابيل كضحك كانها ماشي هي لي كانت كتبكي
سلوى:(بصوت انثوي هادئ وابتسامة مزينة وجها وكتعوج كأنها قدام شي شخص)الو......ام صافا...الحمد لله....كنوجد راسي قربت نسالي...وخا غتلقاني فنفس البلاصة لي كنتلاقاك فيها ديما .....بااي (قطعات قرحانة وتنهدات هايمة وقالت)شحال كنموت عليه 

بقات للحظات على وضعيتها وناضت كتكمل توجادها وخرجات كتسلت باش متشوفهاش مها اش لابسة فاتت الباب وضرباتها بجرية حتل واحد الزنقة بعيدة على دربهم شوية وكتكون خاوية لقات لوطو فاخرة "لكزس ال سي 2018" ابتسمت وزادت فسرعتها حلات لباب وركبات فجنبو سلمات عليه من خدو وتبادلو الاسئلة الروتينية ديمارا وهي مستمتعة جنبو وقلبها كيشطح بالفرحة......
#فمكان_اخر
واقف هو وصحابو كيهضر معاهم حتى وصلو مساج من عندها حلو وشاف شنو فيه بعد على صحابو و سيربلاص صونا ليها وقال باهتمام
انس:براءة صافا ياك لباس
براءة:(ببتسامة وهدوؤها المعهود)الحمد لله ونت بردتي شوية
انس:(ابتسم من سؤالها وقال)علاش كنت معصب
براءة:ام وخلعتيني 
انس:(حك مؤخرة راسو)سمحيليا مكنتش قاصد 
براءة:(ببتسامة)معليش كتوقع
انس:(حرك راسو كانها كتشوفو وقال)علاش باغا تمشي لفرماسيان ياك لباس "pharmacie" 
براءة:والو باس غير شي حاجة وصافي 
انس:قولي نجيبها ليك بلاش متخرجي
براءة:(خرجات عينيها بخجل وقالت بسرعة)لا لا بلا منعدبك معايا هه انا نمشي راسي 
انس:(عقد حجبانو وقال)هضرت معاك....
براءة:(عضات على شفليفها ندمانة علاش فالتها ليه ولا تشاورت معاه وعاودت قالت)واا انس يهديك الله غنمشي نقضي غراضي ونجي منتعطلش والله
انس:(بجدية وهو على نفس كلامو)كلمة راني قلتها ليك قولي شنو بغيتي نجيبو ليك اصلا انا قريب ليه
براءة:(كتغبن وباغا تبكي من هاد الحصلة لي حصلاتها بتردد)انننممم خاصاني شي حاجة ديال البنات ا انس خليني نمشي الله يخليك نجيبها ونرجع نيشان منتعطلش
انس:(بدون فهم "مطنغ معندش خبرة😂")شنو هاد الحاجة....

براءة:(عضات شفايفها بحرج بغا تاكل راسها وقالت )وا اناااس دكشي ديال البنات حشومة نقولو ليك..هانت غنمشي نجيبو ونجي بالخف منتعطلش
انس:(حك مؤخرة راسو كأنه فهم المغزى ابتسم وقال بدون ما يحرجها كتر)وخا سيري ومتعطليش
براءة:(تنفست الصعداء وقالت)وخا شكرا انا نخرج دبا

قطعو بزوج الهاتف انس رجع حدا صحابو كيكمل الهضرة معاهم وبراءة لبسات عبايتها ودارت فولارها وخرجاات دازت من حداه ابتسم ليها وبادلاتو ابتسامة خجولة حدرات راسها وكملات للصيديلية خدات دكشي لي خاصها وخرجات حادرة راسها فاتجاه دارهم دخلات وطلعات لبيتها دارت فوطتها الصحية وتخشات فالسرير تدفا قبل ما يتجهد عليها الوجع هازة لفون مكونيكطيا معاه حتى داتها عينيها بدون ما تحس لساعات والهاتف جنبها طلعات مها طلع عليها كيف عادتها فكل شهر كتعدب وتمحن لقاتها ناعسة حيدات ليها الفون وقادات ليها الغطا على ضهرها وتمات خارجة من البيت حتى لمحت لون غطاء السرير المتغير قربات وبعدات الغطا شوية وخرجات عينيها مخلوعة وحيداتو عليها بمرة كانت السرير عامر دم...حركاتها بدون رد او مجيب وعاودات حركاتها لتالت مرة بدون مجيب كدلك..دارت بيها الدنيا ومبان ليها غير باب حسنية دقو ودكشي لي كان نزلات ببيجامتها ديال الدار كتجري دقات بل كانت غتهرس الباب نزل انس كيجري على اعصابو كانه حاس بشي حاجة حل لباب عاقد حجبانو بسرعة فكهم فاش شاف شريفة بهديك الحالة طاح ليه الما فالركابي وقال 
انس:(بخوف)براءة
شريفة:(كتبكي وكتغوت)بنتي عتق ليا بنتي غتموت ليا ......

على اثر صوتها نزلات حسنية كتجري هي وسلوى ودراري اما انس بدون ما يتسناها تكمل خرج بشورط وتيشورط ديال الدار نيشان لدارهم دخل تالف طلع مع دروج لطابق التاني دخل كيقلب فالبيوت حتى لقاها فوق سرير وكلو ملطخ بدمائها وقف بصدمة من المنضر لي قدامو للحظات وتمشا عندها بسرعة وجهو مخطوف فيه لون وفمو ابيض اللون حركها 
انس:براءة..براءة فيقي شنو ضارك ...فيقي نديك للطبيب...
بدون ما يجيه الرد منها دور وجهو على بان ليه فولارها وعبايتها معلقيه جرهم بالزربة دار ليها فولارها ولوا عليها عبايتها وهزها بين يديه كيجري نزل من الدار شافتو حسنية وغوتات كضرب فجنابها اما حسنية فشلات ومعارفة اش طاري لبنتها 
حسنية:(شافت فرضا)طلع عند باك قول ليه يعيط على عبد الرحيم سربي ونتي "(موجهة كلامها لسلوى)سيري جيبي ليا جلابتي وجيبي لشريفة جلابة طيري من قدامي متعطليش
(نزلات شدات فشريفة كتحاول توقفها وقالت)نوضي را مكين والو نوضي لبسي جلابتك ويلاه نتبعو البنت نوضي 

جابت ليها الجلالب لبسات حسنية وعاونات شريفة تلبس نزل حميد عندهم لقاهم فهديك الحالة شد طاكسي وركبو فيه ب 3 بعدما قال لحسنية بلي باها سافر لفاس يحضر لضريب صداق ديال بنت خوه وبلي مقال ليه والو حتى يرجع ويعرف.....
قدام سبيطار 20 غشت بالدار البيضاء وقف طاكسي احمر نزل منو انس وملابسو كلهم عمرو بالدم وفايدو براءة لي مزال فاقدة وعيها دخل كيجري لسبيطار لقا المستشفى عامر ت جه عند واحد الممرضة وقال 
انس:ختي الله يحفضك عاونيني البنت نزفات بزاف ومغيبة
الممرضة:(ببرود)وخا اسيدي سير شد النوبة مع الناس كينين بزاف سابقينك
انس:(عقد حجبانو وهديك الخلعة تحولات لغضب قال بالغوات )واش كنقولك البنت كتموووووت ونتي كتقولي ليا شد النوبة....ديري خدمتك (شتيمة) 
الممرضة:(حتى هي قالت بعصبية)ا شريف حتارم راسك وعرف اش كتخرج من فمك 
انس:(بهستيريا من الغضب معارفش اش كيخرج من فمو)"شتيمة" عاوني البنت "شتيمة" ولا برب العزة حتى ندير ليكم الشوهة هنا 
-لحسن الحظ كان عاد داخل دكتور وداخل من باب الرئيسي جا معاه كيغوت وقف عليه وخنزر فالممرضة وقال
دك:(بنرفزة)واش البنت غارقة فدمها ونتي مزال كتهضري وتغوتي على دري حسابي معاك من بعد(بغا يهزها من بين يديه وهو يحضنها عندو مخرج عينه وقال)

انس:(زير عليها فحضنو وقال مخرج عينيه خايف عليها ونفسو كرجل محكمة)لا متقيسش فيها انا غنديها فينما بغيتي ما يقيسها حتى شي واحد ......

جابت الممرضة البياص ووقفاتو قدام انس وقال ليه دكتور بتفهم: غير حطها اسيدي مغيوقع ليها والو انشاء الله الى بقيتي كضيع فالوقت نقدرو نخسروها 

كلمة نخسروها عصرات روحو وخلات قلبو يوقف لعدة اجزاء من التانية ويبس بلاصتو حركو الدكتور بموسات و حطها فالبياص ودفعوها الممرضات يلاه تبعهم وقفات عليه نفس الممرضة وقالت 
الممرضة:(حادرة راسها)اكي اسيدي عمر واحد الوتيقة الله يخليك 
انس:نطمن عليها ونجي نعمرها ومهازش معايا حتى لاكارط كلشي نسيتو فالدار
الممرضة:(شافت فيه وقالت)وخا عطينا غير المعلومات سمياتكم والعنوان ودكشي حتل من بعد وكمل الاجراءات..ومتخافش انشاء الله يكون خير مرتك فايادي امينة الدكتور متمكن وعارف اش كيدير 
انس:(حرك راسو بالايجاب وقال)ووخا 

تبعها حتل لغيسيبسيون بدا كيعمر فالمعلومات لي عارف حتى سمع صوت مو دار بانت ليه جاية وكتسول ومعاها شريفة حالتها تشفي بالخوف على بنتها نده ليها بصوت تعبان وهز ايدو كيشير ليها بتعب حتى شافتو وتمو جايين عندو 
حسنية:امضرا اوليدي كي بقات براءة
انس:(شاف فشريفة بحزن وقال)مزال لداخل عند طبيب..هازة تيليفونك 
حسنية:اه اولدي 
انس:عيطي لسلوى طلع لبيتي تجيب ليا البزطام لي فيه لوراق ديالي والفلوس لي تما تشد منهم طاكسي وتجي بالزربة 

دارت حسنية دكشي لي قال ليها ومشا عند شريفة باس ليها راسها وحاول يطمنها ويواسيها فحين حالو مكانش اقل من حالهم بل كان داخليا اسوء من الكل هاز دقتو وساكت عليها عاونها فالطريق ومشاو حتل لغرفة لي شافهم دخلوها ليها وبقاو واقفين كيتسناو طبيب حتى خرج 
انس:(بلهفة وقف عليه وقال)كي بقات 
شريفة:(كتبكي)بنتي اولدي لباس عليها ياك
الدكتور:(ابتسم ليهم وقال)الحمد لله الحاجة رها مزيانة(حط ايدو على كتف انس وقال)مرتك بخير وعلى خير الحمد لله جاتها ايموراجي وهي حائض حيت تعصبات ولا تخلعات واترات عليها عطيوها اكل صحي باش تعوض هاد الدم لي ضاع وخليوها تشرب هاد الدوا "قيد ليهم اوردونونص" والله يجيب الشفا
انس:نقدرو نشوفوها !
دك:خاصها ترتاح فاش تفيق بامكانكم تشوفوها

شكروه ومشا دك يكمل خدمتو فحين حسنية بقات كدور عينيها فاش سمعات كلمات طبيب اما انس ان شاد فشريفة داها جلسها وجلس قدامها كيمسح ليها دموعها وقال
انس:صافي براكة الحمد لله براءة بخير وعلى خير موقع ليها والو
شريفة:(جراتو عندها وعنقاتو كتبكي وقالت)سير اولدي الله يرضي عليك الله ينقي طريقك من الشوك كي عتقتي ليا بنتي بغيتك عمرك تخيب ......
انس:(تنهد)امين ا خالتي امين (بعد نصف ساعة وصلات سلوى لقات السلام وعطاتو بزطامو شاف فيها بغضب وقال من تحت سنانو)فاش نمشيو لدار لينا هضرة (شدها من ايدها مزير عليها)ليوم نقتل مك غير بلاتي
طلق منها بالنترة وتوجه لجهة الريسيبسيون خلاها مخرجة عينيها وكترعد بالخوف.. خلص وكمل المعلومات لي مكملهمش فحين حسنية جرات عندها سلوى وقالت 
حسنية:اش درتي اصكعة ليام تاني
سلوى:(عينيها مدمعين وقلبها كيرجف بالخوف ايديها كتحرقها)مدرت ليه والو ياك قال ليا جيبي ليا بزطامي جبتو ليه 
حسنية:رجعي لدار متبانيش هنا را محلف عليك اصكعة 
سلوى:(بخوف)علاش شنو درت ليه 
حسنية:بمسبتك يا المسخوطو وصلات لبنت لهنا وكانت غتموت
سلوى(براحة):على شنو درت ليها انا اويلي
حسنية(قرصتها من جنبها حتى غوتات)سيري لدااار حتى نجيو سيري متبانيش قدامو 

خرجات سلوى من تما بدون ما يشوفها انس وتاصلات بصاحبها يجي عندها يوصلها فحين انس كمل كلشي وخلص مستحقات سبيطار ورجع عندهم سول مو على سلمى وقالت ليه مشات
انس:انا غنمشي نبدل ونرجع مغنتعطلش
حسنية:(شافت فيه وجراتو بعيد على شريفة وحميد)دخلت عليك بالله اوليدي متقيسها 
انس:(راسو مرفوع)حتى نحلو هاد المنامة ومن بعد تكون الهضرة 

مشا مخلي مو وراه كتويل بانت ليه الممرضة دور معاها باش ترد البال لبراءة وخرج شد طاكسي لدربهم لقا بنادم مجموع عند البيبان كيهضرو عياو ميسولو فيه معطاهمش راس الخيط طلع لدار مبان ليه حد من غير دراري سول على سلوى قالو ليه مزال مجات زفر بعصبية وطلع لبيتو دوش وبدل وخرج من تما فاتجاه احد محلات الملابس الجاهزة طلب من مولات المحل تختار ليه بيجامة سخونة وملابس داخلية ومعاهم شال خلص ومشا لسبيطار لقا غير حميد سول عليهم وعرف بلي دخلو عندها بدون ما يزيد ثانية دق الباب وقال
انس:(حادر عينيه وبلهفة)السلام عليكم

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.