جميلة الجزء 12

من تأليف Ghazal trust
2020

محتوى القصة

رواية جميلة

هم ونزاح من جهة القهوى ورتاح البال .. الخاطر مابقاش ليها والصبر تقادا .. باعت وتهنات وخلات المشاكيل وراها ومابقاش هامها كاع شنو غيوقع . رشيد اللي عمرو نوا وفكر تبيع او طيح عليها فكرة البيع تصدم فالاخير .. بل تصعق ماقدرش يتيق .. اما مهدي فبقى فبلاصتو غير ساكت كيشوف فيه والسي رشيد كيهصر بوحدو ... شاف فيه بارتباك ومد يدو بسرعة مع ابتسامة 

- ااا مم مرحبا السي الزاهي ... مرحبا والف مرحبا .. انا رشيد منضار .. الشريك ديالك 

مد مهدي يدو بابتسامة وقال : متشرفين السي منضار .. (سرح عينيه فالقهوى) كنتمنى مندمنش على هاد البروجي هادا

رد رشيد كيتنهد بمجاملة : اودي القصية حامضة السي الزاهي ... القهاوي مابقاوش واكلين ولاهيلا الى ندمان على هاد البروجي.. وشتي حتى الشركة ديال لعيالات الله ينعلها شركة ..قوليا السي الزاهي كفاش زعما فكرتي دخل شريك فالقهوى وكفاش حتى زعمتي وشريتي بداك الثمن واش ماشي غامرتي ؟ القهوى ماتستاهل حتى 20 فالنية من الثمن باش شريتي 

هز مهدي حجبانو بابتسامة وقال : فلحقيقة السي رشيد انا يالاه دخلت للمغرب هادي شهر وناعنديش فكرة على لبروجيات اللي هنا وكفاش نسيرهم... قلت ندخل شريك فالاول .. نتعلم نتدرب مزيان ونعرف كفاش نمشي البروجي وعلاش لا نبدا بقهوى .. لاقاني واحد السيد سمسار بالمدام جميلة صافي تفاهمت معاها ..طلبات ليا فالاول مية وعشرين .. وانا فلحقيقة جاتني بزااف مية وعشرين فقهوى .. ماعارفش واش هادا ثمن لقهاوي هنا ولا لا ... شوية بشوية نقصات ليا شوية .. جابتني لهنا شفت القهوى عجبني الموقع وعجباتني الخدمة وتوكلت على الله السي منضار 

قرب رشيد كيبلل شفاهه بسرعة وقال : ولاكن داك الثمن راه بزااااف ... راه غلات عليك ... راه كنتي تقدر دير قهوى ديالك راسك بداك الثمن ... و وو و زايدون هاد القهوى راه مكرية ماشي مشرية ... راه قولباتك وضحكات عليه 

ضحك مهدي بادب وقال: وا الصراحة كنت عارفها مكرية ولاكن انا قلت المرى راه معقولة ... 

رشيد : علاش ماسولتيش علاش راسك ؟؟ واش ماقلبتيش فجوايه اخرى! كان عليك تقلب مزيان وتسول 

مهدي: راه قلت ليك يالاه جيت مزال عاد كنعرف الناس .. مزال مكنعرف حتى واحد هنا يالاه السمسار اللي عرفت وعرفني على جميلة... عاد ناوي نتعلم نشاء الله ..وحتى كن درت قهوى بوحدي ماغنعرفش نسيرها وانا ماعنديش (خز حاجبو بابتسامة) تجربة ... وعمرني جربت شي قهوى

زفر رشيد بفقصة كينفخ شاف فجهة اخرى وقال بلا ميشعر

- اويلي يا ويلي على خمسة ةتسعين مليون ... اويلي على تصيدة صيدات من لحرام 

مهدي: باغدون !!!



تلفت رشيد بارتباك وقال : والو والو السي الزاهي ... المهم ماعلينا (قرب كثر بوجهه ويدو على الملف) دابا انا وياك راه ولينا شركة ... بعني بحال العائلة .. وانا حسبني خوك ماشي شريكك راه كما تشاركنا القهوى غادي نتشاركو الطعام ونتشاركو كولشي ... والى ماعرفتيش شي حاجة انا هنا متاكل هم .. نتا غير رتاح كااع وحقك غيوصلك حتى لعندك ... غير هوا القهوى باقا جديدة ومزال عاد كتعرف ... شوية بشوية غادي تولي دخل اكثر ونشاء الله ترد فلوس باش شريتي النصيب ديالك 

ابتسم وقال : وي سي فغي ... حتى نتا باينة عليك ولد الناس ... ماشي مشكل انا راه ماتلقاش معايا مشاكيل.. انا عندي نيشان نيشان 

رشيد: انا كتااار منك ... التخلويض هوا اللي ماعنديش معاه وكنبغي نصفي باش نشرب...

مهدي: سي بون ... حنا تفاهمنا دابا ... يالاه ضرب بيا ضورة فالقهوى ... بغيت نعرف ونشوف القهوى 

ناض رشيد وقف : ايه ايه مرحبااااا مرحباااا الله اودي السي الزاهي راه ولينا شركاء دابا تفضل .. تفضل نوريك كولشي راه لا يصحالا الصحيح ... عندك الزهر طحتي فيا ... انا كنصفي عاد كنشرب وعزيز عليا المعقول .

وقف مهدي بابتسامة غادي قدامو وقال 

- حتى نتا عندك الزهر طحتي فيا ... عمرك مغتندم السي مضرور 

رشيد : منضار منضار السي الزاهي . تفضل معايا نوريك القهوى

مهدي : واخا ندخل للحمام بعدا 

شار رشيد بترحيب : الله اودي كولشي ديالك تفضل خود راحتك انا لتحت

مشا مهدي مباشرة للحمام دخل سد عليه وهبط رشيد كيغلي غليان لتحت ويدور تالف فبلاصتو حتى خرجات ايمان من جهة الحلويات كدور وقالت يدها على جنبها

- مالك اويلي ياك لاباس

عض رشيد على شنايفو كيويل وقال : ختك ... وا ختك بنت لحراام طيحاتنا فمصيييبة وشرات لينا موصيبة بخمسة وتسعين مليون اناااري غادي نحماااق 

ايمان : ويلي مالك اش واقع ؟ هضر ياك لاباس شنو كاين 

شاف فيها ضرب يديه مع بعض وقال : ختك الاللة بااعت النصيب ديالها فالقهوى وجابت ليا شريك جديد دخل معايا فيها وخرجات هي من باب واسع وانا مافخباري وااالو ناااعس 

حلات ايمان عينيها : اويلي !!! علاش صافي مابقاتش شريكة !

رد كيغلي : وراه بااااعت حقها وضربات خمساااااوتسعييييين مليوووون ... عرفتي شناهيا خمساااوتسعيييين مليون اللي ضربات لجيبها وخلات القهوى ليا وجابت ليا شريك بشلاغمو ... اويلي يا ويلي ياويلي كي ندير ليها مي ندييير حشاتها ليا بنت الحرام ... حشات ليا القالب وضربات صربة صحيحة 

ايمان تصدمات وبقات تشوف قدامها هازة صبعها فدهول وقالت 

- دابا جميلة باعت حقها !! وشحال قلتي !!!

رشيد : خمسة وتسعين اعباد الله ... حتى الى بغيت انا نفك الشركة خصني نحط خمسة وتسعين لهاد الزماكري اللي جابت ليا ...(دور راسو ) كنا نقولو ليها عليها هبيلة.. هبيلة وضاربة الملايين ... انا كن غييير لقيت هاد الشاري ... كن فييير لقيتو انا نبيع ليه بمية مليون ولا خمسة وتسعين ونمشي ندير قهوة اخرى مفروووعة فين تبان هادي ... ياك لكرا ومكرية ... وطالعة بربعين مليون ... وزيد عليها فيها الشركا من لفوق ... وختك بنت لحرام صدقااات ليها ... دخلات بربعين ودات خمسة وتسعين ماشي الشمتة هادي ... شمتة وبقيت انا واخل فالشركة ولحسابات ولكريديات اعباد الله ...


ايمان : بنت لحرااااام!!!!! وسكتات عليها!! .. هادي راه خطيرة 

ربع رشيد يديه كيشوف قدامو مفقوص : دارتها بيا ... دارتها بيا ... كن غير كنت نعطيها ديك ستين ولا خمسين فالشهر ونسكتها مكانتش غادي دير هادشي ... سري انا اللي ماوريتها السنتيم تا صدقات ضاربة الملايين اللي ماضربتهمش انا ... شحال وانا نجري ونصلح و وطالع هابط ومازااال ما وصلت لدوك لفلوس اللي عطات هي باش طلع القهوى ... اويلي وحدي ... مرى دارتها بيا ... زهر عندها زهر عندهااااا 

سهات ايمان قدامها : ايييه وجاية تبان علينا ... ماشفتيش المرسيديس اللي جات فيها ... بنت لحرااام هادي مكتعياش .. مكتهدش وبلعاااني بلعااااني دارتهت باش طرطق لينا المرارة ... انا غنمشي غنضرب ليها واحد النتفة نبررررد نبررررد فيها هاد لغداااايد 

رشيد: راه لغدايد هما اللي غنبرد فيييك ... واش هي ضاربة خمسة وتسعين وغتمشي تنتفهي ... ريحي لارض جابها الله ماخرتجتش معاها للعيب ... (مسح لحيتو) موصيبة هادي كنت هاني مكاينش اللي يحسب ليا خطوايا تا سلاطت عليا هاد الكارتة ... 

ردت ايمان كتسوط: ودابا هادا اللي جابت ليك كي داير ؟؟ شبان ليك فيه ؟

شار بيدو قدامو بنرفزة : رااه ... عاد غنعرفو كي داير ... هم وسلاط علينا ... زماكري تا هوا حشاتها ليه ... ولاكن بان ليا محلول ... (غمزها) مجايب فالدنيا والو يالاه حطاتو الطيارة .. شاري بخمسة وتسعين هه ! تسطية هادي بالله ... ولاكن كما كان الحال باين فيه غشيم خاصني نعرف كي نتعامل معاه واخا ختك كانت حسن ليا مكتفهم فحساب مكتسول متعرف والو .. غتزادني غا الخدمة مع هادا . 

نزل وراها مهدي بابتسامة : السي رشيد نشوفو القهوى؟

تلفت رشيد بسرعة وابتسامة : مرحبا مرحبا الله اودي 

مشا معاه مهدي كيدور فالقهوى ورشيد كيوريه جميع القنوات ديالها .. طلعو حدا لاكيس ووقف عاطيها بالضهر وقال

- هادي هي القهوى السي الزاهي كما كتشوف ... عااادية مافيها والو 

مهدي: لالا كوميم راه كاينة الجودة كاينة الخدمة .. تبارك الله لاكوموند لتحت كبيرة يعني القهوى كتبيع مزيان 

ضحك رشيد بارتباك : شوية شوية وصافي ..

مهدي: شار بعينيه لاكيس) وشحال كدخل فالنهار؟ 

رشيد : وااالو ... شحال كاااع كدخل ! ماشي شي حاجة كثيرة 

مهدي: وكاين شي كريديات عليها كاين شي اقتطاع ؟ 

خفض رشيد صوتو بحذر والتسامة وقال : وا شغادي نقول ليك ... كاين شي بركة ... راه كملنا بيها القهوى وصافي وكتقطع من الشهر للشهر 

مهدي: امم .. مزيان .. وريني الاوراق الله يجازيك بيخير ... نعرف شنو كاين .. عندكم كونطابل ؟

رشيد : وااا ... احم

مهدي: ضاروري يكون الكونطابل راه شركة هادي !

بلع رشيد ريقو: كاين كاين .. ولاكن ... ولاكن راه ماعندك زعما مادير بيه غير حريق الراس وصافي

مهدي: ندبدلوه الى مكانش مزيان نجيبو واحد اخر ... ضاروري خاصني نشوف الاورق

هز رشيد راسو وجهه حمر وقال : واخا ... واخا السي الزاهي نوريك لاوراق الله اودي ... مكاين حتى مشكل


فبيت مخبي لتحت مور الزتجة ديال الحلوى فممر صغير مان مكتب صغير تفاجأ بيه مهدي فاش دخلو ليه رشيد وجلس هوا وياها كيوريه الاوراق بعد اصرار مهدي .. بقا ساكت كيشوف فدوك الاوراق مطولا ورشيد كيحك دقنو ويشوف فيه بتوثر 

مهدي: القهوى غارقة كريديات السي ضرار 

رشيد: منصار منضار السي الزاهي

عقد مهدي حواجبو كيشوف وقال: كريديات هما هادشي مقالتش ليا عليه جميلة

رشيد : راه كن هضرتي معايا كن شرحت ليك هادشي قبل ماتشري ... هانتا كتشوف .. القضية مزيرة بزاف

سد مهدي الملف : المهم من بعد ونشوفو هادشي .. غادي نخليك هاد الساعة حتى لغدا نشاء الله ..

سد على راسو فالسيارة حدا جميلة اللي كتسناه فالدورة وشاف قدامو كيضحك 

جميلة: اشنو دار معاك ؟ كي جاك رشيد ؟

رد كيضحك: شلاهبي ولد **** ... مخرج طموبيل ساوية 30 مليون كريدي بسمية القهوى ... وشاري دار بستين مليون حتى هي كريدي وبسمية القهوى ... والقهوى مخاسر عليها حتى سنتيم ... مامخرج لا تلفازة .. لا كراسا ... لا والو ... لكرديات اللي على القهوى غير فمصلاحتو هوا 

جميلة: ولد لحراام ! ... شاري الدار والطموبيل على ضهر القهوى اللي دايرة انا ! ... على ضهري ! 

مهدي: ولا عليك ... والله ماتبقا ليه شي حاجة من داكشي ... الى مخرجت على مو راني ولد ****

قربات حطات يدها على كتفو : وشنو غادي دير دابا؟ غير ضيعتي فلوسك فالقهوى وصافي (تنهدات)

ضربها بصبعو لدقنها : ماشي خسارة فيك الزين ديالي 

ميلات راسها كضحك عاضة شنايفها وقالت 

- انا متشوقة غير للحانوت ديالي 

هز راسو ساهي فيها : واري شي بوسة 

عطاتو بوسة على فمو كما كيبغي وبعدات كضحك 

- مهدي : كتبغيني؟

بعدات بسرعة ديمارات الطموبيل وقالت : يالاه نمشي من هنا دغيا غيدوز من هنا رشيد ولا واحد فيهم يشوفنا


جالس فالمكتب وايمان حداه كيخططو ويفكرو .. هزات تيليفون دارت رجل على رجل وتاصلات بمها دايرة مكبر الصوت لرشيد اللي شاد راسو ومتكي على البيرو

- الو ماما ... 

الصالحة: اجي لولادك راه صدعو ليا راسي 

ايمان: واااتي شمن ولااااد اشمن اولاد الصااالحة جي شوفي بنتك البرهوشة اش دااارت .. اوييلي وحدي مجايبة للدنيا خبار 

الصالحة: اماالكي شنو وقع !! دوي بردتي لما فالركابي

ايمان: جميلة يااالاللة .. بااعت القهوى ..زعما النص ديالها باعتو وشدات ميااات مليوون وجابت لينا شريك جديد 

الصالحة: كفاش باعتو ورشيد ياك هوا داخل معاها ! 

ايمان: راه كل واحد داخل بالنص .. هي داخلة بالنص وهوا بالنص وهي باعت نصها وجابت بلاصتها واحد اخر

الصالحة : وكي دارت مافهمش

تفقصات جميلة وبدات تشرح ليها بشوية ودوزات ليها رشيد فسر ليها القضية باش تفهم مزيان وردت كتندب

ليهوودياااا ... ليهودياااا يعطيها موصيبة ديال لقتيييلة ... جايبة لبراني مدخلاه علينا .. راه يهوديااا هاديك ضبر ضبر على راسها بنت لحراام ... ميات مليون !!!! اويلي حي على ميات مليون ! صافي دابا مابقات كتسال فالقهوى والو؟

رد رشيد شاد فراسو: صااافي ... ديك ربعين مليون اللي عطااات فالقهوة .. واااا رجعات لها بميات مليون ااامي الصالحة .بحال لا شريتي الذهب وبعتيه بالزايد ... داارتها بيا ااامي الصالحة دارتها بيا خرجات من الشركة وجابت ليا البراني نوحل معاه 

الصالحة: هي دابا قبضات الميات مليون ! راها عندها !

ايمان : وايييه راه عندها دابا ميات مليون واطيح ليك هادي فراسك! ... هاديك راه لفعة ..لفعة كرطيطة من الجوع لميات مليون ... نقزات نقزة وحدة 

رشيد بحرقة : ماضربناش ليها الحساب ... ماضربناش ليها الحساب لهادي وكنت مرة مرا ندوز ليها شي بركة قليلة زعما تعاون بيها ... مدارت بوجه عائلة ولا بوجهي انا اللي عمرني خرجت معاها للعيب 

الصالحة: السلكوووطة ... صافي بدات دور ... طاحت على شي واحد هادي متكون طاحت غا على سي واحد كيوريها شدير ... ولاكن انا مالي ماشديتهاش رفستها رفيييس راه مادرت والو ... سادة معايا الضد بغات تقتلني .. بغات تسكت ليا الكلب بلعاني ... كتفقصني بنت ليهودياااااااا 

الصالحة تفقصات وتطعنات ... الضد بغا يقتلها والعكس دجميلة اللي مابغاتش طيع ليها غيخرجها على عقلها . بنتها خاصها طيعها وتهبط ليها الراس وتصرف عليها هي وتشد زمام الامور بيدها ماشي تخلي البنت اللي تشنع بالفلوس ودير مابغات 

اما جميلة وصلات لدارها وتكات ببيجامتها كتجمع مع سلوى فتيليفون بكل سعادة وتلعب برجليها فوق الناموسية

- شريييت المحل هههه غادي نعمرو ونبيع مع راسي .. تهنيت من راجل ختي

سلوى : مزيان فرحت ليك ولاهيلا فرحت ... انا عرفت هاد الغبرة اللي غبرتي وراها شي حاجة... شاي لكليان ضربيهم على حسابي انا نجيب ليك لكليان 

جميلة: نشاء الله ياربي

سلوى: ايوا فوقاش غتفتاتحي

جميلة: مور العيد غير نصلحو ونعمرو غادي ندير ليه افتتاح (شافت تيلي) قطعي قطعي شي حد كيعيط ليا انا شوية ونعاود نعيط ليك

سلوى: واخا الزين يالاه تهلاي

قطعات وردت على مهدي بسعادة عاضة على شفاها: الووو

مهدي: نعستي احبي..

جميلة : لا باقا ... لقيتيني كنفكر فالحانوت ههه كن غير خليت شي حاجة ديال لفلوس نعمرو بيها ونصلحو 

مهدي : وا تا لتما ويحن الله ... اش كنت باغي نقول ليك ... ااه .. شبان ليك نسافرو ورا لعيد 

حميلة : نسافرو ! 

مهدي: اه ومالها نسافرو انا وحبي ... مابغيتيش تسافري معايا 

جميلة: وفين نمشيو ؟

مهدي: نمشيو انا ونتي لسبانيا .. ياك عندك باسبور سويدي مامحتاجاش لفيزا 

جميلة: سبانيا دقة وحدة!!! اويلي كي غندير 

مهدي: ماديري والو مالها سبانيا جاتك شي لعبااا... ها التقب ها النقب .. جاوبي يالاه باش ندفع لفيزا يالاه تخرج 

جميلة: مانعرف ... خفت 

مهدي: واسيري ت**** انا غنمشي مع عشراني ديلمك ديال لكرنة والشواية ماشي ديال الباطو والطيارة ..ت****(قطع )


الجلسة الاولى والناس صايمة .. خرجات جميلة مع لحداش ركبات فسيارة مهدي اللي خلا ليها حيت عارف راسو مغينوضش ليها فلحداش وهوا صايم . ركبات لابسة الجلابة ديالها وجامعة شعرها كعكة مباشرة للمحكة تقابلات مع امها وخوتها اللي كانو جالسين بتهمة الضرب .. كانت الجلسة طويلة ودموع جميلة ماحبسوش وهي كتشوف الاتهامات موجهة ليها .. الدنب اللي ماقتارفاتوش.. شافت اشياء عمرها كانت متوقعاهم ... شافت وجوه كأنهم ماشي من صلبها .. اول مرة توقف ودخل للمحكمة دخلات بسبب امها اللي طيحات الدموع حجر قدام القاضي .. حضرات العائلة وكما قالت وفات وشهدات لصالح جميلة .. لاكن الاخوة شهدو لصالح مهم وبالاخص الاخ اللي زاد الطين بلة وتبت عليها التهمة وشهد ضدها ... شافت الحبس كيتسناها لا محال والقاضي حار فقضيتها ... عاودات ماجرا ليها والدموع حارة كتنزل من عينيها وتختمات الجلسة لجلسة اخرى بعد شهراين وخرجات من المحكمة كتبكي وتمسح دموعها حتى للباب وهزات يديها للسما كتغوت وتشوف فيهم خارجين موراها 

- جميلة: حسبي الله ونعم الوكيل ... حسبي الله ونعم والوكيل فييييكم ربي يخلصكم 

وقفات الصالحة قدامها بصورة حادة حلات راحة يدها ودوزات صبعها على لسانها وشرطاتو فراحة يدها قاىلة.
- الى مادخلتك ليه راني ماشي الصالحة .. سمعتي ... باغا طيري .. هانا غنوري واليدك الطيران كي داير ... انا مابقات عندي بنت سمعتي ... وجري طوالك ... الحبس هوا اللي بغيت ليك اجميلة وليه غادي دخلي وهانا فين قلتها ليك ... واعقلي ... درتي لفلوووس ... طلعتي للسما ... شكون ولد لاخر انا ولا نتي ؟ وليتي باغا تربيني ؟ انااا تربيني نتي ! .. وهانا غنوري والديك السلكوطة عيطي على لفكاك ديالك يفكك 

بقات جميلة غير واقفة كتشوف فيها بأسى والدموع هابطة وقالت

- غير قولي ليا علاش كتكرهيني ؟ علااش امي كتكرهيني لهاد الدرجة واش انا ماشي بنتك ؟ واش ماحنيتيش فيا ؟ اش درت ليك حتى دخليني للحبس 

هزات الصالحة صفر فيدها وقالت كتحلف

نتي تبيعيني على بصلة يا ليهودية ... 

جميلة : واش مابغيتيش تشوفيني عندي لفلوس ؟ مابفيتيش تشوفي عندي لملاك ؟ مابغيتينيش نرد حقي 

دفعها خالها من كتفها وقال : يالاه تمشي بحالك خليها (ضار شاف فيها) الدعوة بيك لله الصالحة وهاد العواشر 

جر جميلة كتكبي ودازت رحمة بالملحفة ديالها صارت عندها وقالت

- كما سخسختينا فهاد العواشر الله ياخد فيك الحق 

مشات ودازت موراها الغالية مفقوصة وقالت 

- الدعوة بيك لله ياخد فيك الحق ... مانتي ختنا ما حنا خوتك منك لله 
مشاو وداز با حماد وقف كيشوف فيها وفالحمية ديال ولادها اللي معاها وهز يديه بأسى كيتنهد لابس الحلابة وقال

- حسبي الله ونعم الوكيل .. حسبي الله ونعم اوكيل ولا حولة ولا قوة الا بالله لعلي لعضيم 

مشاو كاملين مور جميلة وهادشي بغا يسكت لقلب للصالحة والهضرة اللي سمعات شوطاتها وشافت كاع اللي كيوقع ليها بالسبة دبنتها اللي كرهات فيها العاىلة وحرشاتها على مها باش يتقلبو عليها .. زادت حرقة الصالحة وهي كتشوف فيهم غاديين وهزات يديها كتغوت وضرب فخادها فساحة المحكمة على برا 

- المسخوووطاااااا... المسخووطااااا سيري انا ساااخطة عليك ... ساخطة عليك دنيا وأخرة الله يهزك ونتهنا منك ... كاااع بنات الناس مرضيات غير نتي اللي خرجتي من الجنب .... طغيتي بغيتي تولديني وتربيني .... اناااا ساخطة عليك ... سااااخطة علييييك 

طاحت ليهم فالارض بالفقصة وهما كيتجاراو ويرشو عليها الماء والشمتة كطلع وتهبط معاها .. اشمن شمتة كتحس بيها الله واعلم ... فقصة ميفسرها حد من غيرها وقلبها كحال من جهة بنتها ومالقات ليها جهد تردعها وتجيبها تحت يدها كما كانت دير ليها فسطاش وسبعطاش وعشرين وهي طالعة وعمر كلمة لا ماسمعاتها من فم جميلة


راجعة فالطريق لدارها نيفها حمر وعينيها مسدودين بالبكا .. القلب محطم والخاطر ماكاينش .. صونا ليها تيليفون وهي سايقة وردت كتنخصص

- الو مهدي 

مهدي: اش درتي؟

جميلة : اش غندير امهدي؟ ... شهدات معايا العاىلة .. وخوتي شهدو ضدي قالك ضربتها وخويا قالك ضربتها جوج مرات والمرة الثانية كان معاها .. هادي مخافت من الله ماخافت من هاد العواشر وهاد رمضان والناس صايمين .. راه قالوها .. قالوها ولفها عادة قطعها تعادا ...

مهدي: دابا اش درتي شدار لقاضي معاكم ؟

حميلة: تأجلات الجلسة ... بقا القاضي غير كيشوف فينا ماعرف شكون يتيق ... قاليها شنو بغيتي دابا من لقانون قالت ليه بغيت ليها اااقصاااا العقوووبات ... عرفتي قالتها بواحد الطريقة ... واااحلة ليها واحلة ليها فلحلق خرجاتها بالسم والقرطاس .. القاضي بقا ساكت كيشوف فيها ويشوف فيا . (مسحات نيفها ودمهة من عينها بسرعة وكبرات الصوت فالسيارة) قاليا ونتي شنو كتقولي ... قات ليه انا ماحطيتش فيها يدي ربي شاهد عليا ويلى كتاب عليا ندخل للحبس راه غندخل وجات السبة بمي 

بقا مهدي ساكت مطولا وصوتو مدعدع باينة فيه فاق خاسر بحال العادة 

- خوتك شهدو فيك ولاددد....

جميلة : تنهدات بعمق) الناس كتحارب مع العدو وانا عندي الحرب مع الاصول... ديك المحكمة لهلا يوصل شي واحد ليها ... تسمع فيها العجب ... تبقا غير تشوف وتقول الله يستر.. رجع يبان ليا هادشي ديالي عادي .. ولفتو .

مهدي: فوقاش عندك دابا الجلسة ؟

جميلة: شهراين ... ولاكن ورا العيد عندي الجلسة ديال الدعوة اللي رافعة عليها على الاملاك ... انا غادي نوقفها قدام القاضي ... (بحرقة ) بغاو يدخلوني للحبس امهدي 

مهدي: مغادخلي لا حبس لاوالو بلا متخلعي ... سيري فحالك للدار نساي هادشي صافي يمشيو يت... سيري فحالك 

تنهدات : نسا ... اااش غنسااا امهدي هادشي كيتنسا ..مهدي: غتنسايه ...بقات ربعيام وغنسافرو غنديك تساراي ... يالاه سكتي صافي انا غنضرب عندك ورا لفطور تمشي تشوفي الحانوت وتصلحيه 

جميلة: ماعندي خاطر .. ماعندي خاطر لحتى حاجة 

مهدي: وصافي سيري للدار تنعسي غندوز عندك نمشيو نفطرو ونضربو للحانوت راه خاصو يتصلح .. يالاه سيري ونساي المرض... اجي بعدا خوك واحد اللي عندك ياك هوا اللي كتبات ليه مك الفيرمة .

جميلة: الله يعطيه موصيبة ... بغيت نتشفا فيه نشاء الله وفيهم كاملين


دخلات لدارها سدات عليها والدموع فعينيها مشات نيشان للبيت طاحت نعسات مافاقت حتى صونا ليها التيليفون ناضت خرجات بسرعة بجلابتها وشعرها مجموع ولا تقطة مكياج فوجهاا .. الضيم طايح عليها خرجات ففاطمة مباشرة حدا الباب ولقات السلام عليها وعينيها فالارض كتسد الباب

.- سلام فاطمة ختي لاباس عليك 

ردت فاطمة بابتسامة : الحمد لله فين غبورك ؟ مابقيتيش كتجي؟

هزات جميلة حاجبها قاىلة : ايوا كندق اختي مكيجاوب حتى واحد ... قلت غتكونو غير سافرتو 

فاطمة : لاااالا غير فالدار .. نتي اللي غبرتي كنشوف الضو طافي ديما عندك لداخل 

ميلات جميلة راسها كتشوف فيها وقالت: كانو عندي شي شغالات ... كي شفتي ضرباتني الزلطة ... ماكنتش نلقا مناكل حتى مسمنة مكنلقاها ... والحمد لله دابا سهل الله ... وبعت حقي فالقهوى بمية مليون ... وسهل الله العقبة للفيرمة والدار .. اما حتى الطموبيل غير يربحو بيها جاب ليا الله طموبيل حسن منها 

فاطمة : بصاح ! ايوا مزيااان .. الله يسهل عليك ياربي داكشي اللي بغينا ليك .. لعقبة لشي لاخر .. دخلي تفطري معانا تونسينا 

جميلة: مرى اخرى دابا معروضة للفطور برا . بسلامة عليك 

هبطات راسها حلات الاسانسور هبطات مشات للطموبيل طلعات خرجاتها من الباركينك اللي قدام باب العمارة وضارت موراها كتشوف وطل بان ليها جالس فسيارة اخرى من نوع "ميني كوبر " صغيرة بجوج بيبان جميلة المنضر .. نزل منها وحتى هي نزلات فصمت عطاتو البلاصة وركبات حداه .. زدح عليه الباب ساكت والنضاضر فعينيه ومد ليها سوارت السيارة وقال

- هاكي باش تحركي .. قضي بميني كوبر 

شدات السوارت دارتهم فصاكها وقالت بسخرية 

- نقضي ! ... هاديك ديال القضيان ! لقاوها الناس

مهدي: راه خاسرة فيها بياسة كل مرة تنوض بحال الضرسة 

جميلة : ماشي مشكل 

سكت كيشوف قدامو ماعندوش السوفل للهضرة ولا الخاطر ... ساعتو قربات وراسو مطبوخ بلا والو وكيمشي يققيل فدارو غير باش يتفادا الاحتكاك مع مالين الدار . 

دخلو لقهوى جلسو ساكتين كل واحد فين كيشوف حتى أذن وفطرو بجوج وعمر راسو مزيان عاد حل عينيه فيها وقال 

- وعااىلة عندك ديال لعصا

جميلة: اييوا كل واحد بش تبلا ... حتى واحد ماهاني كل واحد وهمو ..هز حاحبو : واييه كل واخد باش تبلى 

جميلة: شنو درتي فالقهوى؟

مهدي : خليها ماشي دابا تايدوز رمضان...شبان ليك دابا فالحانوت نمشيو؟

جميلة : عرفتي باش نتختار الاصلاح اللي يجيك على الكانة خاص تكون عندك الكانة وانا ماعنديش والله

ناض وقف : وانوضي تحركي مالكي اش وقع وقفتي فمحكمة تعقدتي ! تخيلي راسك محامية راه عاااادي هادشي عا نتي عايشة ليا فداك الكوكب ديالك مامولفاش .. بنادم راه طالع هابط كولو بلانات وهوا غادي مكيتقاداش ونتي غتموتي ليا هنا تخسري ليا لمورال معاك .. نوضي يالاه نشوفو هاد الحانوت باش فرعتي لنا كرنا 

ناضت كتنهد من بعد الفطور مباشرة ومشات .. كانو الشوارع خاويين وقت الخروج باقي مابدا وكل واحد مخشي فدارو .. فقك اقهاوي الي عامرين بالناس كيفطرو . وصلو للقيسارة لقاو العساس كيحل ابوابها الكبيرة ودخلو مشا نيشان تحنا حل الكراجات وطلعهم لفوق بجوج ودخلو شعلو الضوء كيشوفو ويدورو وسط منو . هز راسو ويديه على جنابو لابس سروال من سراولو فالرمادي وتيسورط بيضاء وقال 

- هانتي ... ها لكاراج .. هندسي دابا شوفي غديري فيه


وسط الكراج والمورال هابط واقفة كتشوف وقدامها جوج ليبان كبار ديال ريدوات فارقة بيناتهم سارية حتى للسقف . مشات وجات وهوا واقف عاطي واجهه للحيط كيدق ويدوز يدو .. حارت وداخ ليها الراس وتلفتات قائلة

- واش غنبداو نصلحوه من دابا؟

رد كيشوف فالسقف: الى بان ليك البلان نمشي نجيب تريسيان يبدا ليك بالضوء هوا الاول ويدوز ليك السلوكا 

جميلة: ولاكن الاضواء ماشي دابا

رد : الخيط ديال الضوء هوا الاول منين بغيتي يدوزو السلوكا ؟ راه غيحفر لحيط يدوز الضوء

جميلة: واخلي حتى لغدا بلا منزرب ... خليني نقلب ونشوف عاد نبداو

جبد كارو كيمشي ويجي وقال: هاد الريدوات غتخليهم؟

جميلة: وشنو غندير بلاصتهم!

مهدي: ديري ريدوات بيرفوري حيدي هاد الحديد لمخرشش كيعطي الصداع والمنضر تا علاقة

دارت يدها على جنبها خرجات كتشوف وقال: كي داير هاد بيرفوري!!!

مهدي: ديال لحديد فيه الالوان وبحال لا متقب ... بحال الغربال واخا تسدي كيبقا يبين لداخل وصحيح يطلع بالضو ويهبط بالضو ...(حط يدو فالسما على الريدو) حسن من هاد لقزدير ولقفولة... راه تا المنضر من برا كيجبد الكليان كيبان المحل ... زوق تبيع ... (سها كيفكر) الابيض ديالو كيجي مقتلو نقي 

جميلة: صافي نديرو 

مهدي: تنهد) المهم ... لعبي على المرايات .. على الاضواء ... هاد الارض خاصها تبدل تاهيا هاد الزليج لاعلاقة ... وحدة كحلة وحدة قهوية 

جميلة: غيتقلع الزليييج!!!!!

مهدي: يتقلع مال مو على زينو 

جميلة: وشنو ندير بلاصتو 

مهدي: كاين واحد الزليج بحال الرخام كبير كيبري... تشغلي الضو تشوفي فيه وجهك ... هاداك واعر والى كان ابيض يعطيك التيساع كيبين الحانوت كبير ... (شاف فااسق) ماديري لا سدة لا والو غتهبطي السقف يجيك لا علاقة

جميلة : ولاكن انا بغيت السدة ... نحط فيها السلعة 

مهدي: ديري النص وصافي وخلي النص منو للسقف... 

جميلة : دابا غادي نبدلو الزليج 

مهدي: غنبدلوه ... خرجي يالاه نتحركو لحي كريمة يكونو حلو دابا 

جميلة: يالاه 

خرجات من الحانوت وهبط ريدوات سد الحانوت ومشاو خارجين .. هما خارجين والمحلات كيحلو والناس كيدخلو والدنيا كتعمر وكل واحد كيجري فجهة يوجد للعيد .. طلعات فالطموبيل ومشات معاه معارفاش فين ناوي يديها .. وقفها حدا محل كبير للزليج والشوارع عامرة والطرام دياز ونزل شار ليها تنزل ودخلو كيسرح عينيه .. ابتسم لشخص من الناس اللي تما وسلم عليه ورافقهم كيوريهم النوع اللي بغا واللي كيقلب عليه .. اجمل الاشكال واروعها حلات النفس لجميلة على المحل اخيرا ورجعات حماسها المفقود وبدات تشوف وهوا كوريهم لوحات مربعة كبيرة لامعة بالالوان متموجة .. دوز مهدي على لوحدة من الالواح وقال

- هادا نوع زوين .. هوا اللي دتير للقهوة فالكحل ... ديري نتيلون فاتح 

ميلات راسها كتشوف وقالت : انا عجبني الابيض اللي فيه الرمادي

مهدي: هادا؟ 

جميلة: هاداك 

تلفت كيهضر مع مول الشيء وجبد ورقة من جيبو فيها العبار وطرق المسمار بسرعة وجمعو ليه الالواح بينما كدور جميلة وتسارا .. خرج كيهضر فتيليفون وماهي الا نصف ساعة حتى رجع للمحل لقا شخص كيتسناه فباب القيصارية ودخل هوا وياه للحانوت كيوريه ويشرح ليه وتافقو على السدة اللي غيبني ليهم ورجع جميلة طلع سد عليه كيسوط وقال 

- غدا غيبدا فالسدة ... خليت ليه الساروت ... غيسالي نبداو فالارض


جميلة : شحال غيبقا فيها ؟

مهدي: غيساليها فنهارها مالك عندك تما برطمة .. غا نص الحانوت وصاف 

جميلة: مزيان 

ديمارا الطموبيل مباشرة لحدا لبحر ووقف تلفت ليها بابتسامة عاض على شفايفو ولاح يديه تقرب ليه .. كحزات عندو فرحانة عنقاتو ونزل على شفايفها بقبل متاالية وقال

- غنمشيو لسبانيا ياك احبي

حركات راسها بالايجاب: نشاء الله 

رجع لشفايفها وبادلاتو القبل بجميع انواعها . اثنائها فبيت مينة جالسين طالقن رجليهم فالسطح على الزريعة كيقشرو ويتجمعو ويتبردو من صهد الدار وبيناتهم خولة بكندورة حتى هي كتقشر الزريعة وساهية كتفكر وهما كيتجمعو.

تورية اخت مينة : اللي ماعندو بنات ياختي ماعندو والو.

مينة : اييوا هادشي اللي عطا الله ... دراري واش غيجلسو معاك يعطيوك لخاطر ... الى جاوبوك ماقالها حد لحد 

قالت الجارة : تا نتي ... فاش كيتزوجو كيتبدلو ... المرى كتبدل الراجل 

ضحكات مينة بسخرية كتاكل الزريعة وقالت : ولادي هما يبدلو المرة... والله واعلم عاوتاني ماتعرف شنو يوقع 

الجارة : عمرك خطبتي لشي واحد فيهم ؟

مينة : تنهدات ) انا بغيت نزوج مهدي ... ولاكن مابغاش ليا ..باااقا واحلة معاه 

تدخلات خولة بتقة فالنفس: انا بعدا كل مرة يجي واحد يخطبني ومكنبغيش 

هزات بنت الجارة لمياء حاجبها فيها وقالت 

- كل مرة ! ... عادي اي بنت كيجيو فيها الخطاب .

خولة : ولاكن انا بزاف... اي عرس مشيت ليه ولا خرجت كيجيو فيا الخطاب 

لمياء : وشكون جا فيك ؟

خولة : واحد عندو مارشي كبييير ديال لخضرة .. واحد استاذ... واحد عايش فطاليان 

لمياء: اممم ... تبارك الله 

طلع دري صغيرة كيجري للسطح وقف عليهم وقال سخفان

- خالتي ميينة خالتي مينة ... واحد المرى وبنتها كيسولو فيك لتحت 

مينة : مرى وبنتها! 

تورية : شكون ؟

مينة : مانعرف (ناضت طلات عليهم ) ماعرفت شكون هادو عمرني شفتهم 
نزلات كتفشفش بصندالتها شادة فلحيط حتى للتحت ومدات وجهها كتسلم عليهم وتشوف فيهم .. كانت مرى طويلة وعامرة وبنت حداها لابسة الجلابة والشال على راسها مهبطة وجهها حشمانة 

مينة : ااش حب لخاطر الاللة 

المرى: جيت عندك اختي تفكي معايا الجرة لي دار ولدك 

مينة : الجرة ! اشمن جرة ؟

ردت المرى بغضب كتسوط : ولدك لاللة حمل ليا البنت ..

حلات مينة عينيها مخلوعة وطولات وجهها طلات فالدرب يمين يسار كدور فعينيها وقالت 

- زيدي اختي زيدي .. (دورات راسها ويدها كتندب حنكها ودفارها طوال ) زيدي دخلي يا ناري نهار كحل هادا زيدي


دخلات للصالون كدور راسها وتندب حنكها والمرا وراها جارة صندالتها .. ضارت عندها مينة شافتها باغا طلع ليها فوق الزربية بالصندلة وقالت كتشير بصبعها 

- حطي اختي صندالتك حطي حطيها لهيييه 

حطو صنادلهم بعاد على الزربية ودخلو جلسو مقابلين معاها وهي مطل وتشوف فالبنت كفاش دايرة.. الحواجب رقاق مضروبين والصباغة فرجليها مقشرة كحلة ودفارها طوال صباغتهم فالخضر مغلوق مقشرة .. مهبطة راسها ساكتة ومها حداها لايحة الشال على راسها كتسوط وتنفخ وتشوف فمينة والسرتلة فيدها والعنق بالذهب و ودنيها مسطرين حتا هما ومعكرة فمها بطراساج والشعر قهوي فاتح مجموع بقراصة وليميش هابطين فالاطراف ودفارها طوال بدون صباغة نقيين ويدها بيضاء وكفها حمر بالنقاء وجالسة فالبيجامة حديدة نقية بحال ديما لكولون قصير رجليها بيضين بلا شعر وتيشورط ديالها فالازرق 

مينة : كفاش الشريفة اش قلتي؟؟؟ بنت حاملة ؟

ردت المرى كتسوط وتحل وتسد فالشال : ايييه حاملة وولدك هوا السبب 

ردت مينة : ولدي السباب؟! شدها بزز ؟ شمن ولد فيهم بعدا شمن واحد 

ردت المرى كتنخز بنتها بنرفزة: قولي ليها سميتو دوي 

ردت البنت والراس هابط : ي ..ياسين 

دارت هزا مينة يدها وقالت : ايوا ختي شداك ليه ... ولدي راه غا ولد نتي حليتي ليه رجليك ماعندي ماندر ليك انا 

هزات المرى حاجبها كتشوف بقالت: اياااه !!! ولادكم يضحكو على بنات الناس وفاللخر يوليو هما اللي حالين ليهم الرجلين 

ردت مينة كتشوف فجهة اخرى ببرودة : راها كبيرة مالها صغيرة يضحك عليها ... سيري اختي منك ليه لا حملتي حيديه 

ردت المرى بحدة: راه والله وما جا يتزوج بيها ويستر لفضيحة عا لما درت ليكم هنا الشوهة ونسيفطو للحبس فين يتربا 

ردت مينة كتسوط : الاللة كن ربيتي بنتك ماتمشيش معاه ... انا ماعندي بنات عندي غا لعزارا بحاااالهم بحال قرانهم الى لقاو فين يديروه غيديروه ... بنتك اللي بنت سيري ربيها ... مكاين لا زواج لا والو بقا ليه غا الزواج (خزرات فالبنت ) شدك غتاصبك ؟ واش غتاصبك !!!!

ردت المرى: اييييه بزز منها شدها ماشي لخاطرها .. زعما نتي راكي مرى و غتفهميني ... صدقتي نتي اللي مربياهم على الضحك فبنات الناس 

قالت مينة ببرودة : انا الاللة راني قلت ليك ... ماعندي بنات نربي ولا والدة لبنات ... الدراري هما هادو كيغلطو والديفو فالبنات ... بنتك شحااال من مرة جات كتعيط عليه من لتحت ... بعيييني شفتها كتعيط ليه ومامرة ماجوج طليت عليها انا وجاوبتها (خزرات فيها) جاااوبي .. هضري ! شدك بزز واباااز .. دابا عاد جايا دايرة الحيجاب زعما ! ...نتي اختي اللي تبعتيه ... الى حملوكم صبرو راسكم ماقلتش ليكن سيرو معاهم (مدات يدها بحركة شرح) شنو نبقا تابعاهم نجمع ليهم زناططهم ... اللي لقا فين يخشيه راه غيخشيه راه راجل نتي عطيتيه وتحملي مسؤوليتك ماتجيوش تنفخو ليا انا راسي


وقفات المرى مفقوصة وقالت : والله غالاما ربيتو ... غا لاما وريتو حيوط لحبس (ضارت عند بنتها نتفاتها بالفقصة ) فاخر يامي وليت جفااف يمسحو فيا لق**** رجليهم ابنت لحراااام لفعااايلك 

ناضت مينة وقفات هازة حاجبها : ايييوا جمعي راسك ... تعايرني فقلب داري مزياان نتي وبنتك اللي ق**** سيري شوفي منين جابت هاد الكرش جايا تسبيها فولدي .... سيري شوفي بنتك فين كتقيل دالعة وعاطة قزيبتها .. كما عطاتو ليه عطاتو لعشرة من بحالو .. (دارت يدها على جنبها) هاي هاي هاااااي قالك غتاصبها !!! ... (شافت فالبنت ) وعجبك الاغتصاب اااخيتي بقيتي ساااكتة حتى حملتي عاد جايا تبكي ! مالك ماجيتي فاش وقع ليك اللي وقع ! ... ولا كنتي مكملة فشغلك حتى طلعتي بلكرش وجايا تلسقيها فيناااا .. مزيااان تبارك الله 

دخلات تورية وخولة من السطح كيجريو وموراهم الجارة والمرى كتغوت .. شارت ليها مينة بصبعها للجارة وقالت 

- سيري هبطي فحالك هادشي عائلي 

الجارة وبنتها بقاو غير كيشوفو ورحعو خطوة اللور حدا الباب وقفو كيسمعو شنو واقع ومينة كتشوف فيهم ويدها على حنبها وقالت 

- سيري اختي نولي لدارك ..سيري 

مشات جهتها مينة وسدات الباب وقالت بنرفزة 

- خاصهم غا ميسمعو ويضربو ليك الطر..

تورية : شوااقع ؟ الاللة غا بشوية هضري مالك ماباغا دابزي هضري راااه كووولنا كنعرفو نغوتو 

ردت المرى بغضب: خلات لينا فين نهضرو ... لازين ترابيك بحالك بحال ولدك 

ردت مينة بغضب وتورية بيناتهم كتفك 

- سيييري حيديه ليها ..خايفة من الشوهة سيري حيديه ليها .. هاي هاي الزواااج ! .. 

المرى: دابا تشوفي الفضيحة اللي غندييير ليك .. هانتي غتشوفي (دفعات بنتها) تحركي نتي الله يعطيك موصيبة ابنت الحرام 

نزلات عليها بالضرب مخرجاها مع الباب ومينة كتشوف فيها وتشالي بيدها 

- واسيري الضحك راه فيك ... والفضيحة فضيحتك نتي وبنتك انا ولدي رااجل غدا يصبح مزوج لالللااااااك بنت سيدك من وسط ديك الفضيحة 

خرجات المرى وسدات تورية الباب وراها وشافت فمينة مخلوعة اللي جلسات كتسوط وتنفخ وشادة تيليفون معصبة فيدها 

-اش واااقع ؟ شكون هادي ؟

قالت مينة وهي كتشطح برجلها وتيليفون فودنها : قالت بنتها حااملة وجايا ليا انا باغا تلسق فياسين.... غا اللي شبعات **** تجي عندي نزوجها ولاهيلا (جاوبات فتيايفون) الوووو ياسين ... الو فينك ... دااااابا تجي عندي للدار ... يالاه طلع انا فالدار كنتسنا ... تا تجي وتشوف


دخل ياسين عينيه مزيرين بلحشيش لابس صندالة دنايك بيضاء وتقاشر بيضين كيشعلو وسروال سورفيت وتيشورط كيتهز ويتحط فالمشية على رجل وحدة . 

هز حاجبو فيها وهي جالسة فالصالة كدوح مفقوصة وتورية حاطة يدها على خدها وخولة كتسناه يدخل 

ياسين : مالكي علاش معيطا ليا 

هزات راسها فيه معصبة وقال : علاش معيطا ليك ؟ ماعرفتيش علاااش اولد لحرااام السلكووط هاااا؟ محمل ليا بنات الناس وجاي تسول شنو 

هز حاجبو : شناهوااا!!! مالكي دابا نتي كتسطاي عليا ولا ماك؟؟؟ هضري نيشان امينة بلا فيراجات 

مينة بغضب : دابا جات البنت ومها .. ديك خيتي اللي كتجي تعيط ليه وطل عليها من السرجم ... اللي كنت حصلتك معاها فالصناك ... جات هي ومها وحاملة وغادي دخل والديك للحبس وسرررك سرررك نييييت داكشي اللي خاصك وداكشي اللي يليق ليك .. ها السراجم .. ها الصناكات وافكها دابا معاها هاهيا حاملة وجايا 

حمار وجهه ياسين كيرمش فيها وقال بعصبية: واش غا اللي حملات تجي ليا انا مالي انا هنا كراااب جالس نحمل فيهم ! تمشي تشوف شكون حملها بنت لها غا انا 

زفرات مينة بغضب : وها هيا غادا توريك ... سير اسيدي قول ليها هاد الهضرة ... وعلاااااش توريها باب داري (ناصت وقفات كتشالي بيدها ) علاااااش جايبها ليا لدااااري كل مرة تعيط ..

ياسين : ومالها غا هيا اللي كتعيط ! وراه بزااف كيعرفوني وماوريت الدار لتا وحدة راسهم جاو 

مينة : واكن جمعتي راااسك ... مللي كلاوك جنابك سييير ددددجوووج ... سيييير جيبها ودير معاها اللي بغيتي ... ماشي تمشي تغرق بنات الناس وتغرقنا معاك اووولد لحرااام 

خرج عينيه فيها وقال : واسييييري هاديك راه ماخلات تا واحد راه كانت طايحة مع صاحبي عااااد انا تصاحبت معاها 

خرجات عينيها : كتقول فيها بوجهك حمرررر ... وكتقووووول فيها الحماااار (شيرات عليه بتيليكوموند ) كتقولها ليا فوجهي البغل هاااا؟.... واعبراااات علييييك ... وحملات منننننننك

رد بعصبية كيغوت فالدار : ماشي منييييي ... بنت ***** باغا تلسق فيا تمشي ت***** تشوف شكون حملها 

مينة : نتاااا مولاااااها ... ونتا الي غتمشي للحبس حيت نتا خرجتي معاها وكنتي طل عليها من السرجم ... وغتزوووج بيها بغيتي ولا كرهتيي .... 

رد كيترعد بغضب : غننننن.... واسيييري واااابربي منتزوج بيها .. لحومة كووولها دازت عليها ونتزوجها انااا واسيري امييينة بعدي مني سيييري كتجبديني 

مينة بتسميم : غتزوج بيها .... بغيتي ولا كرهتي ... ولا غتمشي دوز لحبس على قلبك ... ها صيااااااد ... ها جاب ليك ربي النعامة وادابا روي يالاااه روي 

هز يدو كيغوت : مارويييش وهانتي غتشوفي ... الحببببس غندوزو ومنديهاش 

خرج كيغوت خلاها فالدار كتغوت بالفقصة وتورية كتهدن الوضع


تجمعات العائلة كلها على الصحور .. سكتات مينة حتىشبعات فاللخر فجراتها ليهم فالوجه وهما كيتصحرو 

- ياسين حمل واحد البنت 

هز ياسين عينو فيها وضرب الطبلة بيدو وشار بصبعو ليها 

- قلبي عليا ... وا قلبي عليا غنكبتوها فهاد الليل

هز مهدي راسو كيشوف فيهم : شنواا؟!

رد بناصر ببرودة: مبروك الله يكمل بلخير

تورية : سكتي اناري سكتي الليل هادا 

مينة : خليه .. دارها راسو 

خولة بميوعة : راه غا بغاات تلسق فييه 

ناض يسين خرج طلع للسطح وناض نوراه مهدي تبعو لقاه كيكمي ووقف حداه شعل كارو وقال

- شنو هادشي اللي كتقول لواليدة واش كتهضر بصح 

هز ياسين يدو حدا ودنو والدخان خارج من فمو وقال

- مرييييض ف** تا نتا اصاحبي واش جايا وحدة قالت ليها حاملة صافي تيقاااتها !

مهدي: نعستي مع ختنا ولالا؟؟؟.... وا هضر واش نعتي مع ختنا ولالا 

رد ياسين بنرفزة : كانت طايحة مع عشيري عماين ... طحت معاها انا بغات تلبق ليا البلان ! ومتقوبة من لفوق مالي انا اللي تاقبها !

مهدي: واجمع ك**** جمع النم ... غادي ليا مع برهوشة ديلمها كياكلها وطايحة مع ولاد الدرب وطايح معاها تا نتا ... لا دعاتك راه ماعندك متصور 

ياسين: مالو مكاين طبيب .. هاحنا غنشوفو ديالمن .. جايباه ماعرفت منين جايباه 

مهدي: ماتقول ليا لا طبااا لا *** طبيب مغيوريك الزمر تا يتزاد والبرهوشة الى دعاتك غتربحك وغدوزها حبس ... الغبارة والقتالة مادوزوش لحبس ونتا غدوزو بسباب برهووشة دلخلا .. غدوز الحبس لديلمك .. عيط ليها شوف معاها هضر معاها بشوية لاتكون نسات وماعقلاتش معامن حملات 

ياسين: واهضااااالرت معاها ... وا مشيت تا لعندها كبتناااها ديال بصح قالت ليا نتا واحيدها ليها من فمها 

مهدي: ولا كنتي نتا تزوج بيها ... تزوجها وربي الز*** بوها تا تكره ديلمو الزواج 

ياسين: وا مغنتزوجهاااش واخا ندوزها حبس .... نبقا انا خارج وعشراني كيخراو عليا بالضحك.. نزق الحومة داها **** .... تمشي ت**** 

مهدي: وادوز الحبس (حط كارو فمو ) دوزو لديلمك على والو ... باش تزوجها وتربي طاسيلتها على ت**** تا طج فحالها ..سير نتا دوزها حبس وخرج تلقا نونو كيتسناك يعيط ليك بابا .. فيك فيك ... نهار جات ديك **** ديال ديييك المرة بكرشها هضرت معاك قلت ليك القاصرات بعد منهم راه مامعاهمش اللعب... واللي مامتقوباتش تا هما فوتهم ماعندك مدير بيهم ... واش مكتعرفش تميز از** مكتعرفش تميز بين لق*** وبين البرهوشات اللي كياكلهم باغيين غا معامن يطيحو وفاش يوحلو يشدو فيه ... سييير اصاحبي عطا الله البنات ... عطا الله غا هما فين ما مشيتي تا الى وقعات شي حاجة غتمشي تفك راسها كاااع متحاشيه لديلمك .. ماشي لبرهوشات اللي تابعينهم مواتهم وهما خارجيين باغيين يطيرو .. هانتا جبتيها فك*** ورفد دابا


ناس كتوجد للعيد وناس كتوجد للعرس اللي نزل على غفلة بين ليلة ونهار ... هزو البنت داوها دوزو ليها لقاوها حامل بشهر ، مينة غتاكل جنابها فالدار بين ليلة ونهار غدخل عليها مرت الولد اللي عمرها ضربات ليها الحساب.. مكاين حل لياسين والتهمة لابساه ..باش ميدخلش للحبس تبع كلام خوه ومو اللي إيداتو بعد نقاش عميق واجتماع خدا بزاف ديال الوقت . لا خطبة لا حلوى نيشان عند لعدول ضربو لكاغيط بنهار قبل لعيد والطعنة فقلب مينة كطلع وتهبط مابغاتش تسرط وحتى العدول مامشاتش ليه . البنت ومها بغاو يديرو حفلة قدام الناس والعائلة لاكن شرط عليهم ياسين نعار لعقد تمشي معاه والحفلة يديروها من بعد وفعلا داكشي اللي وقع . 

دخل ليلة العيد على مينة وهي جالسة كتاكل فراسها بالفقصة فالدار وعينيها حومر بالبكا ... رضات بالزواج ولاكن الكيةةفقلبها مابغات طفا . جار وراه الباليزة وهي بالجلابة والفولار موراه مهبطة راسها وموراها مها حتى هي هازة خنافرها فالسما كتحنت فمينة وتوريها كلمة من اللي مكطيحش للارض. 

جلسو فالصالون مجموعين الا بناصر اللي مكاينش .. خولة كطلع وتهبط فيها باشمأزاز و مينة قالبة وجهها ومهدي كيشوف فيهم بنص عين 

مينة : ياك زوجنا البنت ... علاش اختي جايا معاها ؟؟.... زوجتي بنتك الله يعاون 

ردت ام البنت : تحمل مسؤوليتو ... 

قاطعها ياسين هاز حاجبو بغضب: واخرجي فحالك... ها المسؤولية تحملتها ... واسيري ماتجيش تحطي رجلك هنا 

شافت فيه بحدة وقالت: مغنخليش بنتي منها ليكم .... يا سكنها بوحدها يا غنبقا معاها 

مهدي بسخرية: واديها معاك للدار تهزي دي بنتك معاك ماعندناش اوتيل سانك ايطوال هنا 

مينة : بيت واحد كينعس فيه هوا وخوه راه تربح بيه .. بغيتي تخشاي بيناتهم سيري تخشاي 

شدات الام فبنتها: وانا بنتي مغاديش نخليها ليكم ديرو فيها اللي بغيتو ... نوضي تمشي معايا .. زيدي ... تايكري ليك ولا يشوف اش يدير عاد تمشي .. نوضي


خرجات المرى جارة بنتها وزدحات الباب موراها بقات مينة غير جالسة كتشوف وتشوف فولادها وتنهد

- صافي؟ فآخر يامي وليت نتمرمد فداري ؟ ولاو البيبان يتزدحو عليا ... سير تبعها .. سير تبعها وخرج عليا 

ياسين : باغا نمشي نخشي فمها شي ربعطاش؟؟؟ نمشي نخشي فيها ربعطاش ونهنيك

مينة : كن بغيتي تهنيني ماتمشيش للخانزات المسخات .. المعفونات بحالها بحال مها ... حرت معاكم انا هادا لله عييت نقاد فيكم وعييت نربي والو ... اللي مسخوط راه مسخوط 

قال مهي وهوا متكي على السداري: سير كري ليها شي بيت وكوزينة مع الجيران والى جات مها عطيها شي هلكة ديال لعصا وسير عيش حياتك 

مينة : انا ماعندي ماندير بالوسخ فدار والخنز ... اللي حملات تمشي تربي ولدها وتولد فتيساع ماعندي مندير انا لا بيها ولا بولادها 

مهدي : واسييير قلب ليك على سي بيت مع الجيران فشي سطح ولاشي براكة سكنها تما وحضي معاها . حضي معاها تمشي تخرج تكمل على خيرها ونتا حال فمك ... البراهش خطار 

ياسين: بغات تسكن بوحدها انا نوريها السكنة ... 

مينة : والهبااال .. وا المكلخيين ... هاديك راه بغات غا تستسر مامسوقاش لا لزواج ولا زمر... غرضها تستر الكرش صاافي وراه وصلات لداكشي اللي بغات 

ياسين: دابا ماعرفنا منين نشدوكم ... قلتو لينا تزوجها قبل مادعيك باش تا لابغيتي طلقها طلقها فوقما بغيتي ... لا دعاتك راه غتلسقك شحال عاد عندك الحق طلق !... تزوجنا ... دابا جالسين تقولو ليا راه بغات غا تستر ! دابا شنو غندير معاكم انا شنووو كتمرضو بنادم 

مهدي : واسييير ابنادم ساوي غا بشوية وديها تسكن فشي خربة وجه الخربة ... فاش كانت دور عاجبها راسها من واحد لواحد كانت فرحانة ... سير عطب ديلمها انا منك نعاود ليها ترابي اللي مارباوهاش وليديها ... 

مينة : ولاهيلا ... يسلتو من المدرسة ويمشيو ... يعرفو العجب بنات الحرام ويديروها قد راسهم ويجيو يبكيو ... 

ردت خولة بميوعة : بنات الناس والبنات المربيات كيبقاو محتارمين راسهم وجالسين فديروهم حتى يتزوجو ماشي دالعين من واحد لواحد حتى كيجبو الكرش... مالها ماتجلش فدارهم وتمشي تقرا بحال لالياتها اللي كيمشيو باش يقراو .. ولا هي ماشي بحالهم كتقلب على شي حاجة اخرى .. باااز ليهم هاد البرهوشات ماعرفتش فين بغاو يوصلو ماخلاو للزواج والو ... تصبر حتى تزوج ولا تمشي تزوج .. انا بعدا عمر شي ولد لمرى هضرت معاه ولا حتى وقفت ليه بقا ليا غييير نتصاحب معاه ...

طل عليها مهدي ويدو ورا راسو وقال: غا اللي فيها الدودة هي اللي جالسة ناشرة رجليها فالزناقي للشماكرية ... واللي ماعندها شغل جالسة تحسب فالخطاب وتسنا امتى تزوج ... وا بنات الناس راه وصلو فيين وفين تقولها الزواج تقول ليك مامسالياش دابا عندي ما يتقضا وكتشووف بعيد ... ماشي كلمة جوج تلسق فيه تزوج بيا (تقلب عطاهم بالضهر) خختفوو 

تنهدات خولة كتزفر من نيفها وقالت : هادوك راه حتى هما دايرين العجب ومخبيين ورا القراية وداكشي اللي قلتي .. اما بنات الاصل وبنات الناس كيديرو لحلال والمعقول ويعمرو دارهم ويجمعو رجليهم 

مينة : الله يرضي عليك ابنتي .. الله يكثر من امثالك 

ناض ياسين كينفخ خرج وخولة ومها كينصبو العشا فلكوزينة .. بقات غير مينة جالسة ومهدي مجبد قدامها عاطيها بالضهر.. ناض جلس كيسد عينيه ويحلهم ومينة كتشوف فيه مصغرة عينيها وقالت 

- خولة عندها الحق ... بنات الناس هما اللي صاينات العرض ... ماشي اللي دالعات فالزناقي توقف مع هادا ومع هادا ومع هاداك ... فييين تلقا بنات الاصل دابا بحال خولة 

تحنا على ركابيه كيشوف فيها هاز حاجبو وقال بصوت منخفض

- واش غا بحال خولة ؟ وعطا الله غا هما جالسين ... تهضر معاها تقول ليك اجي خطبني ولا منهضرش معاك ... 

مينة بحدة وصوت منخفض: وشنو بغيتي ؟؟ اش باغي باغي بحال هاد الموسخة اللي جاب ياسين 

مهدي: لا هادي لاهاديك ... خطية تجلس فالدار منها عدد ... حياتها كوولها غا زواج و اولاد


مينة بافقصة: وشنو بغيتي اناري واش غتخرج ليا عقلي تا نتا 

غمزها مع ابتسامة : انا راه غنجيب ليك الزين ... غنجيب ليك مرى ديال بصح فيين يبانو هادو اللي كدوي عليهم نتي ... شتي انا غنجيب ليك الفن ديال لعيالات 

دورات راسها كتنهد : غاااادي تجيب ليا نتا الجلطة... غادي تسكت ليا القلب .

خرج لسانو كيبلل شفاه وقال كيضحك: وعلاش ؟؟ خايفة نجيب ليك شي دفعة 

ميلات راسها مصغرة عينها ويدها على فمها كتجر ليه فلسانو بسلاسة وقال 
: وشكون هاد خيتي؟ ديك الموصيبة اللي لقيت عندك فالباب ديك المرة؟ ... هاديك والله مادخل عليا لا نتا لا هي .. 

هز راسو كيضحك: لاااالا ... ماشي هاديك ... هادي وحدة اخرااا ... ماشي من هادوك ..بنت الناس .. دااخلة سوق راسها 

مينة : داخلة سوق راسها ؟ كتكدب ياك عاد شتك نتا وياها فالبحر ... ديك الغولة نيت 

دور وجهه كيضحك : الاا ماشي هاديك مالك مريضة 

دورات وجهها بهدوء: ايوا بعيني شفتك معاها فالكرنة وفالبحر ... اللي داخلة سوق راسها كتخرج مع واحد مابينها وبينو والو 

هز حاجبو : وهنينا الواليدة راك زعما ديال الوقت .. بلا متجيبي ليا عقلية جدة وكدا ... قلت ليك مكتعرفيهاش مكتعرفيهاش وماشي من هادوك ... عمرك شفتيها اصلا وانا عارفها شكتسوا مزياان ماشي معاودين ليا 

مينة : اممم .. وشحال ونتا كتعرفها بالسلامة 

مهدي: عام 

مينة : عام!! وزعما نااوي تزوج بيها ؟؟

رد بجدية : ومالها ... باغي نتزوج بيها 

صغرات عينيها : ومالك ماتزوجتي ؟ شكتسنا زعما ؟

مهدي : هي مابغاتش 

هزات حاجبها : هي مابغاتش !! ... كاين شي وحدة يجي رزقها بين يديها وتجري عليه ! بااز هادشي مكيدخلش للراس

مهدي : ااااه اه هي مابغاتش .. راه قلت ليك الدرية فشكل ملاسقاش كااع ديك اللسقة وعندها حوايج اخريين مسبقاهم عاد الزواج ... (بسخرية ) بحال هادو !... ضحك ليها تقول ليك علاش ماباغيش تزوج بيا شنو المشكل ؟ .... وهي كاااملة مشكل ... صندوق خاوي غتديه تعمرو ... (صغر عينيه) شتي انا الواليدة ماتبقايش تشركيني مع بنادم

مينة : هادي باغا تفلا وباغا دور فالزناقي ... ماشي عينها فالمعقول 

مهدي: والمعقول هوا اللي باغا هي ... المعقول ديالها ماشي هوا ديالك وديال خولة وديال لخرين ... الدرية ماباغاش تزوج 

مينة : وشنو باغا ؟ تبقا دور معاك فالزناقي!

مهدي: ودور معايا مالها اش فيها ... بحالها بحال بزاف ديال البنات .. المهم عقليتها عاجباني ومرتاح فيها وباغيها كما هي تا ترشق ليها وتزوجو 

مينة : الحماق هادا ... عمرني شفت هادشي ! ... ايوا وبنت خالتك 

مهدي: شكون بنت خالتي؟

مينة : ويلي على شكون ! خولة !

مهدي: ومالي مزوج بيها ! دويت معاك مكاين لا بنت خالتي لا بنت عمتي ... شتي نهار تشوفي هاد البنت وتعرفيها والله تا دخل ليك لخاطرك وغتبغيها 

مينة : انا بغيت خولة ... ماعندي ماندير بشي وحدة اخرى.. زوينة هادي حتى ترشق ليها وتزوج !

مهدي: زوجي خولة للواليد وخليها معاك وهنينا ... باش تقولي لي ليا خولة ولا خاوية غا كتصدعي راسك الواليدة ... والله تا معدبة راسك 

مينة : انا مابغيتكش تصيد اولدي و ...
قاطعها : وراه نتي اللي غتصيديني لا بقيت تابعك ... توريني انا فالفلفللفلفففف ققق...ق ... لبنات


مينة : والله ماتلقا حسن من خولة 

هز حاجبو : هانتي غتندميني كاع علاش جلست معاك وهضرت معاك ... واش تسحابيني انا غنجيب شي جيفة ولا شي خنز حطو شحال من واحد ... ولا شي مكلخة مسالية قبها فهاد العالم باغا تزوج وتفرخ ... راه غنجيب مرى ديال بصح ماطيحش ليك على بالك ... عقلية وكدا واصلة فين وفين ... سويدية من لفوق هههه

مينة :ضربات فخدها) كاورية !

رد كيضحك: نص نص ... مهم السيفي ديالها عامر مافيهش .. ماشي فيه الزواج بوحدو ... (جبد تيليفون ) تهضري معاها ؟

دورات وجهها كترمش : ويلي على نهضر معاها اش بيني وبينها اخويا دوزها ليا خصر غا نتا 

خرج لسانو كيضحك ويعض شنايفو: تعرفي عليها مالكي .. واااميينة 

هزات كتفها عاطاه بالجنب كدور فعينيها 

دوز الخط كيضحك وتيلي على ودنو كيتسناها تجاوب ومينة كتبلع ريقها ودور فعينيها فجهة اخرى .. 

رد كيشوف فمينة وردة فعلها : الو الزين ديالي 

ضربات فخدها كتسوط قالبة وجهها وهوا كيضحك 

- شكاديري ؟ 

ردت بصوتها الرقيق منخفض: والو كنت كنتفرج 

مهدي : هاكي واحد السيدة بغات تهضر معاك ... تبارك ليك لعيد 

شافت فيه مينة كتحرك وجهها وصبعها وبغات تنضو تهرب وهوا يجرها جلسها وتيلي فودنو كيضحك 

مينة :بصوت منخفض) لا مغنهضرش ... طلق خليني نوض

.جميلة: شكون هاد السيدة ؟ 

مهدي: الواليدة الزين ديالي 

جميلة: هااا! !! اويلي كتهضر بصح 

جر مينة بزز عطاها تيلي والصوت كيتسمع حتى لعندو وهي كتفتف وقال بعينيه 

- هضري مع مرت ولدك باركي ليها العيد 

كمشات مينة فمها كتخزر فيه وتسوط وتحلف وردت قائلة بهدوء

الو بنتي ... كيدايرة لاباس عليك عواشر مبروكة 

ردت جميلة بارتباك وخجل: ا اا.. الحمد لله ا ا ااخالتي حتى نتي مبروك العواشر باللي كتمناي 

مدات ليه مينة تيلي بنرفزة زعما صافي باركات وبغات تنوض وردو ليها لودنها مجلسها كيضحك وقال بخفوت 

- واهضري معاها سوليها .. هضري

مينة : بارتباك) كي دايرة ماماك كي داير باباك ... كولشي مزيان 

بقات جميلة ساكتة مالقات ماتقول وردت بارتباك 

- الحمد لله ... سول فيك الخير

مهدي بخفوت : قولي ليها داكشي ديالكم ... 

بعدات تيليفون بنرفزة شاقت فيه وهوا حدا ودنها لاسق فيها وجار ليها تيشوط من العنق وقالت 

- شناهوا داكشي صافي هضرت بعد مني 

جرها بقوة : جلسي كملي الهضرة .. قولي ليها فوقاش نزوجوكم ... جريها باش تبغي تزوج .. 

حلات رجليها المربعين بغات تنوض كتشالي بيديها وتيلي شاداه فالسما لاكن ردها لبلاصتها وحطو ليها فودنها وهي كتفتف حارت معاه وقالت 

- ايوا فوقاش نفرحو بيكم ... فوقاش نشاء الله نزوجوكم 

بقات جميلة ساكتة ومهدي كيطول ودنو باغي يسمع ومو كدوفعو بكتفها يبعد وكتجر فتيشورط .

جميلة : نشاء الله اخالتي ... ن نشاء الله 

مينة : ان شاء الله ابنتي سلمي على ماماك وعائلتك ... وتهلاي فراسك ..بسلامة 

جميلة: بسلامة 

قطعات بسرعة لاحت عليه تيليفون وبغات تنوض لاكن شدها جلسات بزز وقال

- شنو قالت ليك فاش قلتي ليها نزوجوكم ؟؟

مينة : حيد عليا ... حيد بعد مني اااخر مرة تعاود ديرها ليا 

مهدي : واقولي بعدا باش جاوباتك ؟ 

مينة : قالت ليك نشاء الله وسير رمي راسك من السطح بالفرحة ... تسطيااا هادي اناااري شبتيني

شدها من دراعها : كتقولي ليها كي داير باك راه ماعندهاش باها ..باها مات 

مينة : الى مات الله يرحمو تا انا با مات وزايدون ماقلتيليش 

جرها مرة اخرى: واجي نقول ليك ... واصبري وغاتنوضي 

مينة : طلق مني طيحتي ليا كتافي 

مهدي : واريحي لارض ندوي معاك ... (بلل شفاهه بابتسامة وتردد) انن ن نجيبها غدا تغدا معانا ..

دفعاتو : حيد عليا بعد مني فقصتيني 

رد كيضحك: والعيد زعما 

مشات كتجري وتهبط تيشورط من وراها 

- سير حيد عليا ماتجيب ليا تا وحدة 

رد كيضحك : غنجيبها غدا تشوفيها وتغدا معانا .. هانا علمتك 

صارت شافت فيه هازة صبعها : والله وجبتيها حتى نتفاهم معاك .. مزيان تبارك الله ... بنت خالتك كايتة وتجيبها 

هز حاجبو : وانا مالي يكون اللي بغا يكون انا باغي نجيبها تغدا معانا وتشوفيها 

مينة : شتهااااا وشبعت شوفان مزيييناتها 

مهدي : وماكتعرفيهااااش مالك مابغاش تفهمي ... راه تخالطو ليك 

مينة : اممم تخالطو 

ناض داز على سبرديلتو كيضحك حل باب الدار خارج ورجع طل عاض شنايفو

غنجيبها غدا للغدا ... هاهيا فراسك .. ديري شي غدا زوين


ليلة العيد والدنيا زاهية.. الشوارع عامرة والحوانت النوبة مكايناش فيهم .. الخياط عليه الزحام .. الحلويات الصف .. مالين لحوايج الصهد فالمحلات .. حوايج الدراري الصغار حديث ولا حرج .. النقاشات بالنوبة فالزنقة وفالديور وفالحوانت .. المدينة بالناس والزحام مكاين منين دوز ... اما الصالونات ماعليهم كلام ... النوامر كتفرق والصوت السوشوارات كتقب الودنين ... مزاحمين فيهم لكبار والصغار .. الصف والدنيا عامرة ، وحتى جميلة وحدة من البنات مزاحمة على نوبتها .. مالقاتش نوبتها فحمام الصالون ومشات لحمام الحومة ديالها .. الحمام غيطرطق و البلاصة هي اللخرة مور الفطور مكايناش ... حيدات حوايجها فالقاعة الباردة وخشات رجليها فالصنادلة دالصبع والخلخال فالرجل .. جامعة شعرها الاسود بقراصة ولابسة سليب سترينغ غليض فالاسود .. ومشات عند الجلاسة حطات ليها الصاك ووقفات كدور فعينيها وتشوف فالناس والدراري الصغار والغوات والهضرة بالجهد كتسمع .. تنهدات وبصوتها الرقيق خاطبات الجلاسة وقالت كدوز يدها على عنقها وتشوف الوسخ نايض

- بغيت شي كسالة تحك ليا اختي

ردت الجلاسة بطابليتها البيضاء حازمة راسها طويلة وعامرة وقالت بحدة وجدية وصوت قوي

- مكاينش اختي الطيابة كولشي عامر وموراهم النوبة شادينها الناس

طوات جميلة رجل مع ختها بأسى وبدات فالتبوحيط كترغب وتمسكن 

- مرييضة اختي ... كتفي طاايح عليا ومكنقدرس نهز يدي .. الله يرحم لواليدين شوفي اللي كاين 

الجلاسة بصرامة والكل كيسمع : راه كااع هادو اللي شادين طيابة كتافهم طايحين بحالك .. ليلة العيد هادي كان عليك تجي الصباح تشدي نوبتك 

دارت جميلة يدها على جنبها كتشوف وتخمم وتسرح عينيها فالناس وقالت

- كنت دايرة حساب الصالون وصدق عاامر حتى هوا اما انا مانجيش لهنا 

هزات الجلاسة حاجبها: واسيري اختي تسناي الصالون ديالك تا يخوا... معيور معيور ! هه زوينة هادي 

انتبهت حميلة لكلامها وشافت فيها كترمش وقالت

- لالا راه ماشي هاكاك ... انا غير ..غير ولفت وصافي .. كنجي لهنا ماشي اول مرة 

هزات الجلاسة يديها : واختي ماعندي ماندير لك .. دخلي تزاحمي مع الناس حكي راسك 

ردت جميلة فشلانة : كنسخخف

ضحكات الجلاسة عليها حتى شبعات وقالت 

- كتسخفي ههه... دوشي فالدار... ماعندي ماندير ليك اختي

جميلة: راه عاااندي الحمام غزااال وكيسخن ... (تنهدات) ولاكن ولفت الحمام والكسالة... شوفي ليا اختي عفاك والله حتى ندعي معاك 

ضحكات الجلاسة وقالت: دعي غا مع راسك تلقاي شي كسالة فهاد الساعة ... تسناي شوية تخوا شي وحدة ونشوفو معاك نتي اخيتي للي مفششة لينا ... لاماحكاتش ليك كسالة تسخفي... جبتي سطولاتك 

رمشات جميلة وحركات راسها فالنفي وقالت

- ماعندكمش السطولة ؟!

الجلاسة : وانتي مجايبة معك تا قجقاجة مالك معارفاش ليلة العيد كفاش كتكون ! .. منين نجيب ليك انا السطولة 

جميلة: حتى انا معنديش سطولة فالدار! عندي واحد ديال الجفاف! 

قالت الجلاسة وهي كدور بلاصتها وتقلب على السطل : بقينا هنا ... وشنو جايبة شنو ؟ عندك الجلدة ؟

جميلة : لا 

وقفات الجلاسة كتشوف فيها : وشنو جايبة اناري ؟؟ !

جميلة: حوايجي اللي نلبس وصافي

حطات الجلاسة يدها على راسها : ااهيا ناري عمرني شفت شي وحدة فحالك .. (شافت كسالة دايزة عريانة وفازكة وشارت ليها جابهتها ) شوفي دخلي معاك هادي فركيها وحلات راسها ووحلتنا تا حنا معاها 

كانت كسالة تبارك الله عضمة كي الطول كي العرض وبيضاء معصبة غي بوحدها سخفانة من صهد الحمام وقالت 

- مشغوولة انا ماعندي فين نشد شي واحد السيدة جايا دابا دايرة معايا 

شافت فيها جميلة وراسها مايل وشافت فالجلاسة كتمسكن 

الجلاسة: وتاتجي لخرى قولي ليها باقا ماساليت ودخلي البنت تغسل ... هاد الزين كامل ونخليوها مسكينة كتسنا 

ابتسمت جميلة فرحانة والطيابة كتشوف فيها وشارت بيدها : يالاه زيدي قدامي ... اجي فين سطولاتك!

شافت فالكسالة كترمش باش تهضر هي وقالت الاخيرة اللي كدير ليها الطريق على الله دور معاها فاش تسالي الحمام وتهلا فيها 

- ماعندهاش السطولة جاية طويلة غا ديها ... تهلاي فيها راه بنت جارتي 

دارت جميلة ابتسامة عريضة ليها وتمات غادية كتهز وتحط فالمؤخرة والعيالات كيشوفو فيها والطيابة موراها كتنكر

- لا سطولة لا طاسة ... 

مع دفعات جميلة باب الحمام مشافت والو ... عطاها البخار للوجه نيشان ووقفات مخلوعة قالت 

- هيييه !!! ناري شهادا ؟؟

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.