مريام عينيها كيتقطرو بالحب وكيبريو قالت وهي كتهز فكتافها بحال البنت الصغيرة ~. صاحبك سباب !!
زيداان حط يدو على صدرو وقال في وذنهاا بصوت مبحوح ~. انا اناا سباب ، كون ملي جيت وراكم وشفتتك شديتك من يدك وهربت بيك ممسوقش لزمرر گاع
تنهداات بصوت مسمووع وركبات هربانة من كلاموو لي خلاها تسييح ...مشى لبلاصتو كيصوووط ويخبط وهو يقاطعو مراد لي كان متكي على الزاج هاز يدو فوق راسو مكلكمها بفوطة ~. واركب خلاص راه السخفة شداتني واقلة قربت نموت.."ضار شاف ف مريام "...شحال ديال الحبس في قتل العمد ؟؟
مراد خنزر فيها ورجع شاف قدامو ~ بغيت غير نعرف فين عمركم شفتوو المجرم كيركبوه مع ضحية ..
نادية ~ هي لا نزلتي وتسنيتيهم يجيو يديوك ، مزيان لواحد يعترف براسو راه مجرم ..
غادين ويتناكرو طريق كاملة اما شيخ الشباب كان حاضي غزالتو كيفاش كتضحك على نگيرهم حتى عينيها كيتغمضو ....حس براسوو غرق فيها.....صونا تليفون نادية هزاتو كانت حوالي زوج دليل ولا كثر لقات مها لي على خط وراتو لمريام حاطة يديها على زاج معارفة متقول ليها ولكن ضروري تجاوب
- وي ماما
عائشة بخوف ~ فينكم ابنتي واش هادشي كلو عشا ؟؟
نادية جوبت بثبات ~ هاا لا رااه مزال معطلين وغنمشيو نباتو مع صاحبتي...قاطعتها بتسااؤل "....شكون هاد صحبتك كنعرفها انا ؟؟
زيدان كان عارف مراد اش كيسواا مزيان هو مستحيل يوصل معاها لهاد شي ولايني جرا معاه لبلان ~ ايوا راه من حقو كنظن ...؟؟
نادية ~ انا دافعت على راسي
زيدان بالغوات باش تسمعو ~ الالة في القانون الجنائي الدفاع عن النفس عندو شروط ومن بينهم خاص مراد يكون هاز نفس داكشي باش ضربتيه
مجوبتوش عارفة كلامو على صح وكثرة الهضرة ضرتها في راسها ..حلت باب من جهة لوخرا بنرفزة وهبطت ..كانت حالتها حالة، شعر مخربق والمكياج نصو تجلخ ونصو تخلط مع دم لي نزل من نيفها اما رجلها مبقاتش قادرة تصبر لصداعها غير كتكابر ..دخلو مجموعين جهة غرفة الطوارئ ..تكلم زيدان مع المشرفة لي عطاتهم غرفة على ما يجي طبيب يقلب تلجرحة لا يكون تقاس ليه العرق عاد يخيطو ليه ..مراد غير زطم تلاح فوق ناموسية مسرح رجليه داير كيف العود ،زيدان خشى يدو في جيابو ومشى لجهة الشرجم ولبنات جلسو فالفوطوي لي كان تم عيانين مهدودين تا واحد مكيدوي ....كسر الصمت الطبيب لي دخل بعد مرمى السلام ..صوتو مكانش غريب ابداا على نادية هزات راسها دغيا
تتأكد وهي تحط ايدها على فمها مزيرة حاسة بدوخة اما مريام خرجت عينيها وقالت ~ عماد ؟؟
احساس خايب متبغيه لحد...في الوقت لي تكون كتبين ل لي دايرين بيك انك نسيتي شخص ومسحتيه من حياتك ورجعتي تعيش من جديدة واخا ماشي بحال قبل هاد المرة بروح شبه ميثة ونفسية تعيسة وقلب محطم وموجوع ..وفي الاخير يبان قدامك فيوم غير هاذا كيتسمى الدمار ..سيناريوها معاه داز كلو من بين عينيها
تفكرات شحال كانت بهلة ومعمية العينين ومذلولة ليه ..تفكرات كيفاش كان دايرة كيف لخاتم بصبعو وملعبها كيف بغى...جا فبالها شحال خدات فلوس من دارهم بحجة انهم ليها ومداتهم ليه .. احگا نادية لكرا غالي...نادية عليا دين ...!! الواليدة مريضة خاصني نضبر على لفلوس ونعطيهم ليها
زادت ضحكات بصوت مسموع ساخرة من نفسها ملي شاافتو قدامها وهو مبدلها بوزرة بيضاا وبطاقة مكتوب عليهاا دكتور عماد الابراهيمي...لي اول متعين وخدا منصب وتزادو عليه زوج فرنك ساسهاا وخسر عليها مساج "مبقيناش مفاهمين"
سيناريو داز كلو من بين عينها هي ليلة منحوسة ولكن هادشي كان وقعو كثر على نادية....ناضت خارجة فحالها قبل متكره عينيها لي شافو فيه.. تمشات بخطوات تقال غادية بحال المومياء بلا روح جات تخرج تقابلت معاه عينها في عينه ..كتشوووف فيه وتحقق مزياان .....مزال هو هو نفس الملامح لي بغات وطاحت فيهم وعشقات ... كان متبعينها باستغراب من غير مريام لكانت فاهمة نادية وحاسة بيها ....حيث عذابها من وراا فراقو داز قدام عينيهاا ...
التخلي شي حاجة صعيبة على الواحد وخصوصا الا كنتي كتعتبر ذاك الشخص نصفك الثاني ..بقات تحقق فيه وعينها مفارقوهش بكل وقاحة تجاهلها وهضر بنبرة باردة عكسها لنار گايدة كتحرقها فقلبها
عماد ~ نادية سافا مالك هنا
الجواب كان من عند مريام و بنفس النبرة ~ سافا ولباس عليها غير ليوم كنا كنحتافلو بعيد ميلادها لي صادف عيد زواجها ، ووقعت مضاربة في ريسطو لي كنا فيها و هاانت كتشوف النتيجة الحمد الله بعدا على كل حال، الله ينجيك عين بنادم خايبة
كلشي تصدم من كذوب مريام من غير مراد ل عاش دور أكثر جر ايد نادية حيث كانت قريبة ليه وباااسها ونطق وهو كيمسح ليها وجهها بيدو صحيخة ~ لمهم مرتي العزيزة ميوقع ليها والوووو ، خفتي بزااف يااك
تكثر معاه الهضرة وتبقى واقفة قدامو هادي مقدراتش عليها نثرت يدها من مراد وخرجات كتجري ...قبل متبعها مريام شدها من ذراعهاا
رماتهم عليه هاد زوج كليمات لي فهمهم ومشات ..ولا يقطر بالعرق خلاه زيداان يدخل يدير خدمتو وخرج لعندهم على برا ...نادية كانت مبعدة كتمشي وتجي جامعة يديها لعندها تا بلاصة مقدتهاا ...قلب على مريام بعينيه لقاها متكية على طوموبيل حاضيااها وكتبكي ..وقف عليها وهي تعطيه بجنب كتمسح فوجها دورها لعندو وقال ؟؟
مريام جمعات لافيست من جهة الكول ~ منقدر نقوليك والو فهمني شي حاجة مكتخصنيش
فهمها شنو عنات وتاهو محكرش حل باب طوموبيل وقال بأمر ~ طلعي ونتي تقفقفي عليا هناا على قلة شرااوط لابسة ليا هادشي
جهد تقادا تاع خود وارا دخلات مكمشة في حوايجهاا وراسها حاطاه على الكوسان عينيها مرة مرة يتغمضو .....خدا من الكوسان القدامي جاكيطو لي كان معلق عليه ودخل لعندها غطاه بيها ..
جهد تقادا تاع خود وارا دخلات مكمشة في حوايجهاا وراسها حاطاه على الكوسان عينيها مرة مرة يتغمضو .....خدا من الكوسان القدامي جاكيطو لي كان معلق عليه ودخل لعندها غطاه بيها ..حسات بيه وحلات عينيها النايمين مبتاسمة ...غمزها ومشى لعند نادية كيدوي معاها باغي يجبر خاطرها بطريقة غير مباشرة حتى بان ليهم مراد خارج والفاصمة ملوية عليه .
طلعو لطونوبيل ودوات نادية قبل ميديماري بصوت مجروح
نادية ~. زيدان عفاك شوف لينا شي اوطيل نبقاو فيه تال غداا عاد نمشيو لداار ..منقدرش نمشي دابا
جوباتو بنبرة صوت عيانة وغريبة عليه معرفهاش ~. حتال غدا وديني تال موت ، شووف لبنت ناعسة عذبناها معانا ليوم ، عفاك ازيدان دير شنو قلت ليك
مراد ~. تي ريحي الارض راه منسخاص بمت ولادي نديها لحباسات ولا نخليها في اوطيلات ودار راجلك موجودة .. دوا بينو وبين زيدان بدون متحس عليه ~. سير لدار عندي هي اقرب وحدة داابا
وداكشي لي كان قل من ربع ساعة وكانو قدام حي راقي شافت فيه باستفهام ~. واش مسمعتونيش اش قلت
زيدان ~. والله يرضي عليك ، كبري راسك ونزلي غدا والله يعرضك السلامة
حل لباب مافيه ميتلاج معاها كثر ...نزل مراد وبقات هي تفيق فيها ..مكانتش هنا معنقة دجاكيطو كتحلم بيه .....بزز باش حلات عينيها مفزوعة
مريام كتاوب ~. واش وصلنا لدار
نادية نزلات وقالت ~ نزلي غنبقاو هنا تا يصبح الحال
نزلات دايخة بنعاس عينيهاا سكرانين ......غادا مكلكمة فديك دجاكيطة موصلاها لنيفها كتشم ريحتو ......حسات براسها جا حداها خاشيها بين ذراعو ..خرجات فيه عينيها وكتمغز ليه جهة نادية بمعنى غتشوف
ملقات مدير ستسلمت ليه ..متنكرش كان عاجبها الحال وبزاف ومباغا تفكر فحتى حاجة اخرة ولكن جاهلة تصرفاتو المفاجئة زعمة تكون كتعجبو كيف بدا يعجبها ويحتل كيانها ...ولا شنو سباب فعايلو.. عيات تسول راسها وهي على الوسادة وملقات ليهم جواب ...داتها عينيها وغفاات
عكس نادية لعينيها مغسولين ..ناضت من فوق ناموسية مخلية مريام على خاطرها باش متفيقهاش.. خرجات للبالكون لي كان في لبيت لي عطاهم مراد باغا تنفارد مع راسها وتعطي الحرية لدموعها لي كاابرت صحة وهي حابساهم ...مكتبكيش على شنو وقع ليوم ولا شنو دار ليها مراد ..داكشي بنسبة ليها نقطة فبحر ملي عاناتو مع عماد الاناني ...ل ملي شافتو فاقوو معاناتها لي كانت مكمداهم شحال وحياو جرووحها لي مبرااوش لدابا
حتى طلعات الشمس عاد ناضت من البالكون مشات هزات تليفونها شعالتو لقات جايا لسبعة دصباح وهي تبدا تفيق فمريام لي مناضت غير بزز
مريام مسحات على عينيها حاسة براسها مدگدگة ...نعسات معذبة مع الجينز هزات لافيست تاعو طواتها وحطتها جنب ناموسية وقدات حوايجها شعرها بيديها عاد خرجو ...وهما غادين لباب بان ليها جسم عريض ناعس على كرشو وفوق راسو مخدمة ..عرفاتو زيدان غير من حوايجو لي مليوحين في جنب طايح كاو معاقلش...بقات حاضياه كيفاش معذب في النعسة ..جرتها نادية كتدوي بشوية
نادية ~ دغيا مغنباتوش هنا
خرجو من تما بحال الشفارة الدنيا كانت خاوية ...و حس طاكسيات مقطووع تمشاو مدة قليلة عاد بان ليهم واحد جاي شيرو وركبو
الشعا ضرو فعينيه ، حلهم سااخط وجلس مقاد شحال وهو حاط يدو على ركابيه ..مد يدو خدا قميجتو لبسها ووناض للحمام كيسد في صدايف لمح باب بيتهم محلول وهما مكينينش ، قندش وعرف بلي مشاو....دخل غسل وجهوو مزياان طل على مراد لقاه مكاينش فهاد العالم فضل يخليه ناعس هز جاكيطو وخرج فحالو لدار وهو في طوموبيل صونا عليها ولقى تليفونهاا طافي ...لاكو منثر وكمل سياقتو حتى وصل لقى مو واقفة على لجاردينيي كتوريه اش يدير ..مشى سلم عليها بلا تا كلمة وتم طالع وهي تبعو موقفاه
مينة ~. وقف وقف اولدي ، نشبع غا من شووفتك غبرتي علينا ، وصباح كل مرة تسول عليك
تنهد زيدان بضيق وقال ~. غا خدمة الواليدة راك عارفة..مهم انا ندوش وقبل منمشي لشغالي نطل عليها
مينة بابتسامة ~. واخا اولدي الله يرضي عليك "عطاها بظهرو وهي ترجع توقفو مفكرة ~. نسيت مقلت ليك خوك نصر غيجي هاد ليام هو وممرتو
مدار حتى ردة فعل حدو قال ~. راه الدار قدامو
طلع زاعف لبيتو ،خدا دوش صحصح بيه ولبس عليه وخرج غادي عندها للبيت كيلبس فساعتو لقى الخدامة خارجة من عندها وعلى عينيها نظرة حزن
غمض عينيه ورجع حلهم عاض على فكو بقوة ...فكل مرة كيكون عندو امل يجي ويلقاها فحالتها العادية لكن والو ....شافتو وهي تبدا تشير ليه وتغوت
صباح حلات عينيها بفرحة ~ زيدااان !! اجي اجي حدايا
دار ليها خاطرها مشى حداها وباس يديها
صباح كتدور وجهاا في كل قنت في الغرفة وكل بلاصة كتخايلها وحدة من ناس وكتشوف فيهم وتضحك ~. واش دفووع مزاال مجااا ؟؟
جمع يدو على شكل بونية وكضرب في ناموسية بشوية وجوبها ~. هاهما لتحتت !!
عنقاتو فرحانة وشافت في المخدة داوية معاها ~. عفااك واخا تصورني مع ولد خويااا
تحكم فنفسو بزز على حالة صباح لكتقطع في القلب ...بلا هواه كيسايرها ولا سولاتو واش راجلي جا كيقوليها اه كان معايا .....ولدي ناعس اه هاهو حدايا ...معندوش اختيار اخور ، بقى معاها حتى رجعات لحالتها الطبيعية وشربات دواها ونعسات ..خرج من عندها مريض من الداخل وخاطرو عيان .... هابط في الدروج بزربة يحط رجليه فدرجة وينقز ربعة عيات تعيط وراه مينة يفطر معاها مسمعهاش وذنيه مصمكين ركب فوق الموطور ديالو دار الكاسك وعفط غادي منير في طرييييق ..
وصل لمدرسة ودوز حصتو كيف ديماا بجدية وشرح ملفت مرة مرة تجي عينو على بلاصتها فين كانت جالسة ويتفكر كيفاش كانت تحداه.. من وراها تا وحدة متجرئات تدوي معاه بديك الطريقة لي شاف قصوحية الراس والوعورية لي بينات ليه ميقوولش بلي كلمة حنينة منو رجعتتا كيف لعجينة .. ..قبل ميكمل الحصة وقف كيقاد في حوايجو وقال
زيدان ~ زوج سيمانات ونشووف بروجي لي عطيتكم هنا فوق البيرو ، لي بغى يضمن نجاح يدير علاش حيت انا مكنفرقش النقط غا هاكداك ، تكاسل وتضياع الوقت في الخوا الخاوي ممعاناش وفعوض متجمعو في القهاوي على عيق عليا نعيق عليك خدمو مينفعكم
"كيدوي ويخنزر في شلا بنات ودراري تلاقى بيهم خارجين وعاطينها لتكركير ختم كلامو وقال بتحذير وهو غادي " ...اللهم اني قد بلغت !!
رجع ركب على موطور ومن تما لشريكة ....دخل ديريكت لبيروه مطلش عليها اطلاقا كان دماغو مصدع وخاصو تيقاد مزاجو ... هز تلفون عيط لسكرتيرية
زهور ~وي مسيو زيدان
زيدان حاط يدو على راسو ~ صيفطي ليا قهوة وشي حاجة نفطر بيهاا ومن وراهم مدموزيل بالحاج
خبط ليدو مع مكتب وقال بالغوات ~ اش هاد الخدمة تاع النم !!..الوقت ل بغات تجي كتجي والوقت لمبغاتش متجيش ولا تخرج بكري ..!! بأمر قال ~ دباااا تعيطي ليها الا مجوبتكش متبقاش تدخل من باب الشريكة !! خبط تلفونو كيسوط ..
اماهي كانت مخشية في الفراش كتعوض نعاس لي مشافتوش حتى صونا تليفونها لقاتها " عمري " كيف مسمياها فيه وشكون من غيرها لالة نزهة لي قلبها مزال واكلها على بنتها لي مضوية عليها الدار وخلاتها ظلام من ورا مخرجات
نزهة بصوت مغبون ~ زينة لبنات راني توحشتك
مريام تقادات في الجلسة كتاوب ~. ماما صباح الخير
نزهة ~. صباح الورد ابنتي ، راه توحشناك مزال مهداك الله ترجعي لدارك
تنهدات وقالت ~. عليها بابا عيط سول فيا ولا تشطن بالو عليا
ملقات متقول ليها حيت حدو سولها لمرة لولة فينها بنتك وقالت ليه عند ختي متلاش سقسى عليها ~. كيسول ابنتي كيسول ، لبارح عيطنا ليك باش ندويو معاك ومجاوبتيش
الا كانت كذبة بيضة من عندها غتجبر خاطر بنتها معليش ~. اياه ابنتي وقاليا نقوليك رجعي باراكا عليه
مريام فرحاات ~. صافي واخا اماما انا نفطر ونجي
"ردات لباب لمكالمة تانية تسجلات فتليفونها من شركة ضيقات عينيها وقالت ~. ماما قطعي من عندك كيعيطو ليا من الخدمة
نزهة ~. واخا ابنيتي مهم انا نستناك !!
مريام قادات صوتها المدعدع بنعاس ~ حم الو
زهور ~ مدموزيل بالحاج ، ممكن نعرف علاش مجيتيش
مريام كتحك فشعرها~ غير صبحت عيانة هاد صباح داكشي علاش
زهور بحدة ~ نوغمالمون تدغعي شهادة طبية ، بون بغيت نقوليك بلي موسيو بلخليفي قاليك الا مجيتيش هاد لعشية عتابريه اخر نهار عندك في الشركة
قطعات وخلاتها حالة فمها وتعلو محياها خيبة امل وعقلها كثر فيه تشاش وواش بصح لي كان يقوليها لبارح نخطفك ونهرب بيك ليوما بغى يجري عليها من شركة...قندشت وبدات تبدل حوايجها بلا خاطر
شدات طاكسي لدارهم هي لولة دخلات وكيف ديما كاينة غاا نزهة تلاحت عليها بوس وعنق وسول وسال مقانعاش منها بزز خلاتها تخرج لخدمتها
مريام كتبوس ليها في يديها ~. خاصني نمشي لخدمة ازين ديالي ، ليل انا معاك تا تملي مني
نزهة ملي رجعات ليها لدار هاديك الدنيا ومافيها ~. صافي الله يسهل عليك ابنتي ويعلي مقامك
طلعات لبيتها تبددل ودعيوات مها مرافقينها ..دوشات بالخف ونشفات شعرها مخلياه على راحتو ..لبسات لي لقات قدامها ومقدراتش تخرج بلاما تماكي وتبين زينها .....مشات لشركة لقات وقت لغدا فات عرفات من لي تما بلي خرج عندو لخدمة وتاهيا مقصراتش تحنات على لوراق ومهزاتش راسها ناوية تكمل لي عليها وتوجد لي يفهى فيه ..
جمعات شعرها لفوق بقلم وطلقت موسيقى خفيفة وفقنت لبيرو كان كاس قهوة كريمي كتجغم منو مرة مرة ..محساتش براسهاا تا داز الوقت وفاتت ستة وكلشي خرج ...
~~~
كان واقف قدام الشريكة ..على مطور كبير من نوع ايروان موديل لخر ..حاط رجليه في ارض ولابس لبسة خاصة بيه ....من بعد مقدى شلا ما عندو عيطات ليه زهور ووصلت ليه بلي جات ....كان خاصو يشووفها وضروري ما يختم نهارو بيها ...بان ليه كلشي خرج وهي مزال ما نزلت جا يهبط ويطلع يشوف فين غارقة حتى كيجه الاتصال من نادية ..جاوب بنبرتو لموالفة عليها الجدية
زيدان ~ وي الاستاذة ، سافا عليك ؛!
نادية بصوت مبحووح ~ مسيو زيدان صافا بيان ونتا ؟؟
زيدان مركز مع مدخل لباب لتفلت ليه ~ مالكي شكاين !! واقعة شي حاجة خايبة
نادية: لا والو كلشي مزيان....مهم غير بغيت نفكرك بلي الوكالة ل داير ليك مسيو جيمس قربات تسالي خاصو ينزل يجددها ..
زيدان غمض عينيه مزير عليهم حيث نسى ~ اوك، شنو باقي ثاني ؟؟
نادية ~اه غادي نكون خارج النطاق واحد يومين بغيت نرتاح ..!!
زيدان ساط بسخط وهي كتبان ليه جاية كتمختر في مشيتها وشعرها كيطير نسا راسو حتى عاود سمع صوت نادية ورجع دوا وقال..
زيدان وهو كينزل من فوق الموطور ~ وي أستاذة رتاحي بالحق مطوليش راكي عارفة منقدرش نستغنى على خدمتك ..
شكراتوو وقطعات ..اما هو سرح في قطيب الغزلان لي قدامو ...وكيفاش جايا تهز وتحط عليه في مشيتها ...ردات ليه لبال ولقات عليه تحية من بعيد غادا فاتجاه الشارع تاخد طاكسي ..
صدماتو كيف صدمها على الصباح
تبعهها معيط عليها بصوت زعزعها كاملة ..
زيدان بالغوات~مرياااااام وقفي!!
نبرة صوتو قاصحة وباينة من وجهو لي تعگد بلي معجبوش الحال انها تجاهلاتو ودارتو بحال اي واحد وهادشي ممقبولش عندو ..تمشى لعندها بخطوات ثقال ....وقفات كدور فراسهاا دايرة فيهاا اليز وهي كل ما يرمي خطوة قلبها يتفزع من الداخل خايفة يقمعها كيف موالف ولا يقول ليها شي كلمة تبقى تطلع وتنزل فيها كاع الليل .....وقف حاط يدو على جنابو عاقد ستة تسعود وقال بصوت خشن ~. اماالنااااا !! منخاافوش ولاا !!
مريام عوجت فمها وقالت~ الا دويتي على صباح وعلاش مجيتش ،غير كنت عيانة ومحسيتش براسي ..واولل معيطات ليا زهور جيت ...
نتا تگمگم وانا نفهم ...عاق بلي شادا فخاطرها من كلام لي غتكون وصلاتو ليها هاد الاخيرة بالنقطة والفاصلة ..صاط وقال بتنبيه ~. لخدمةة كتبقىى خدمةة مكنتساهلش فيها اما برا الخدمةة كنولي زوين ....زاد قرب لعندها همس سميتها فوذنها بنبرة حنينة حتى سمعات دقات قلبها لي على سبة كيضربو
زيدان ~.ممم مريام اخر مرة مزال ديري هذا الريحة ؟؟ كتسمعي !!
معرفاتو امر ولا طلب علات عينيها فيه مستغربة من كلامو
مريام كتلبد في عويناتها علاااش اشمن مشكل فيها ؟؟
زيدان تاه في عينيها ونسى راسو حداها جرها لعندوو حتى تخبطت مع صدرو وقرب لودذنها مرة اخرى ~ حيث مكنبقاش نرركز وعقلي كينحارف و مكنبقاش عاقل على فين انا ولا شنو كندير ونقدر ندير شي حاجة خارجة على القانون " بعد شوية وشد فيدها كيلعب فيهم "..
على ذكر القانون زيدي معايا قبل متبان مفسدة اللحظة..
.ضحكت على هضرتو هو ينطق كيف عادة مخليها تايهة في تفاصيل شخصيتو لمحمقاها ..
زيدان~ اخخ على ضحكة !!
تزنكت وهبطت عينها ارض باغة تهرب من هضرتو الحلوة وتصرفاتو جديدة عليها بالحق عاجباها ..
زيدان ~ عارض عليك ليوم لعشا كتعوييض على ليلة البارح وهاد المرة غير انا وياااك باش ميقاطعنا حد فاش ينحرف ليا عقلي ..
مريام دافعة كبير فعايل البنات ~ مسيو زيدان كنعتذر منك اليوم خاصني نمشي لدار بكري " جوباتووكتلعب في شعرها "
قوس حواجبو فيها مثقل ~ هي نوقف ليك طاكسي !!
بالها زلگ وتوقعات الا رزنات غادي يأمرها كيف ديما ..عضت على شفايفها بنادمة معرفت مادير واش تقول ليه نمشي راه غير ضحكت ولا تكمل على فعلتها ..
مريام ~. لا صافي ماشي مشكيل كنعرف فين جاو !!
زيدان جرها من يدها ~. قبل متمشي اجي نعطيك شي حاجة
شابك يدو مع يدها غادا حداه حاسة براسها بنت صغيرة مشا بيها فين موقف موطورو بان ليها كيجبد شي حاجة وهي تلقاه بوكي ديال لورد توسعو عينيها
زيدان ~ كنت واقف في فو غوج بان ليا وبغيتو ليك ، والا كنتي قالبة عليا سيفتك على هضرة اليوم الالة لبروجي وقت لي وجدتيه
مريام بجدية ~ لا لا ضروري نكملو كنبغي نتقن شغلي ومبغيتش الواسطة امسيو زيدان زادد جرهااا اكثر عندو وقربها منو بحراارة لدرجة نفسو السخونة كضرب في بشرتها ..~اشنوو قلتي عاودي نسمع هادشي مزيان كنت مركز مع فمك كثر من لسانك
مقدرتش تنطق والو بدات غير كتمتت لحروف هربو ليها معاه ولسانها تعگد .اما قلبها قرب يسكت من كثرت ما كيضرب بجهد وهي بين ايديه ..مكانش من العاگزين شافها سايحة واستغل الفرصة حاط راسو علئ راسها وقال بعيون نايمة ..~ لغزااالة ...
حس بيها بدات ترخى بين ايده وهو يحكمهاا ..مداعبها بخفة ~ عندك تسخفي ليا وانا مزال حتى ما بستك .
قالت حشمانة وجهها مزنگ ~زيدااان وصافي !!
زيدان تنهد ~واااخ الالة ايوا طلعي ورايا ويالاه نتعشاو ومن بعد نوصلك وبركة عليا من دراما تاع لبنات منافعاش معايا
شنو بغات كثر من هاكدا ...راجل كامل مكمول زين وعقلية وفحولة..كيحتارمو لكبير وصغير ،الا دوا كيخليك ساكت ساهي فكلامو والا سكت تاني يخليك حاضي زينو وفصالتو
الا خرجتي معاه تحسي براسك خارجة مع سد عالي يحميك من لغادي وجاي وميخلي لي يهز عينو فيك ولا يطاول عليك....
تقاد في الركبة على الموطور ،كان حاط رجليه في الارض بثبات، مد ليها يديه وشداتهم وبلاما تخمم ركبات وراه...طاحت ولي عطا الله عطاه ولي حلمات بيه لقاتو فيه...
مكسيري وهي وراه معنقااه بيديها بزوج ...حاطا راسها على ظهرو وضحكة مجبدة على وجهها ومن زينها ركبة وهي وراه وشاداه ...وقفو قدام مطعم زوين وعائلي نزل هو اللول وهبطها هازها من خصرها كل حركة منو كيخلي قلبها غيسكت وهي بين يديه ...دخلو مشادين بحال المراهقين...لي شافتو تضحك معاه وكلشي كيبان ليه فل وزوين كرشها كترفرف ومرة مرة تنهد براحة..جر ليها الكرسي حتى گلسات عاد جلس مقابل معاها حط تليفونو وسوارتو وتفطح على الكرسي مرتاح وكيصوط ...بانت ليه قدامو حشمانة ومن عينيها باين عاجبها الحال
طلقات وبدات كتدوي مرتاحة ~ كنموت على شي حاجة سميتها نسافر ،عزيز عليا البحر وحتى الطبيعة
بدات هادي تعجبني وهادي لا ، طلق وذنيه وسمع ليها مزيان عطاها الخاطر والوقت ومقاطعهاش كان مرة مرة يهز ليها راسو بمعنى متبع معاها وهاكداك كان للحظات كان كيركز في تفاصيلها وكيفاش كتدوي وتعبر بيديها ويسرح فيها بالحق صوتها الرنان كيرجعو لصوابو
تحط لعشا تعشاو في جو وزوين محسوش بالوقت لي داز حتى صونا تليفونها كانت ماماها
مريام عضات على فمها ~. هادي ماما ، نسيت معلمتهاش بلي غنتعطل " حطات تليفون على وذنها وطمناتها بلي كانت عندها خدمة وهي جايا في طريق ..قطعات وبتاسمات ليه كان حاضيها حاط يدو على ذقنو سكت شوية وقال
زيدان مضيق عينيه ~. واش عندك شي مشكيل مع باك !!
مريام بنفي ~. لا لا بالعكس بابا كيموت عليا وكنموت عليه ، غير مسكين الخدمة كتاخدو علينا...
كيبقى هاكدا اهون من انها تقوليه شنو كاين هاداك باها خايب زين كيفما كان باها كبرها وصرف عليها واخا حرمها منو ومن حنانو ولكن وفر ليها عيش كريم ...
بتاسمت ليه ووقفات وهاد المرة هي لي شدات فيديه زير عليها وركبو موصلها قدام باب دار ، سكت الموطور وقال وهو مزال راكب فوقو ~. هانتي وصلتي الالة
نزلات من فوق الموطور وقالت ~ تصبح على خير
رفع حاجبو فيها وقال ~ معنديش مع الحرفي
فلتات ليها الضحكة وبدات تلعب في حوايجها ~. مفهمتش
زيدان عض على فمو وقال~ واخا الالة ، انا نفهمك ، جرها لعندو وزير عليها من خصرها لصقها عليه وزير ، خشى راسو في عنقها كيشم ريحتها وكيبوس وهي مبورشة ومكمشة بين يديه غمضات عينيها حاسة برعدة شاداها فكل بلاصة في لحمها قال وهو على نفس الحال ~. باش ننعس بخير وعلى خير خاصني شي بوسة مع تعنيقة
عضات على فمها كتدور في عينيها خايفة يشوفها شي حد نطقات بصوت مرعود وقالت ~ زيدااان ، عنداك يشوفنا بابا ولا شي حد
بعد عليها شوية وقابلها معاه ودوا بجدية ~ معنديش مشكيل يشوفنا !! ولا بغيتي حتى ندخل معاك عندو ونقوليه بنتك دات ليا لعقل ، ندير يدي فيديك ونوقف قدامو ونقولها ليه ...
قدر يكسب عقلها من جديد بهاد لكليمات بدات تضحك وقربت منو بايساه في حنكو وقالت بزعامة~. كيف جاتك هاد تصبح على خير
جرها من جهة كرشها وايديه كتطلع وتنزل على ذرعانها ~. هاد المرة نوريك انا لمرة جايا منعقلش عليك ...
حط صبعو على فمها ودوز عليه..
لمسة يدو خلاتها تحل فمها مرعدة غمضات على عينيها مجات فين ترجع تحلهم حتى
طبع قبلة بين عينيها ونزل زادها تانية فوق نيفها سداتهم وترفعات كانت ومنتاشية مع شعور ل لاول مرة تحس بيه ...شهقات اول محسات بفمو تحط على فمها بدون ميحركوو ..نسات بلي واقفة قبالة دارهم وفي اي لحظة ممكن تحصل ..زيرات على ذراعو وتهندات صدرها كيطلع وينزل مكانتش شادة فراسها هو لي متبثها مزيان .....رجع طبع بوسات خفاف بلاما يتعمق وبعد عليها وقال
زيدان ~ الا غطست فيك اجا منوضني وهاد الوقفة ممسلكانيش خاصني نتسرح طلق منها كيمسح على ذقنو عطاها وردها وقال ~. سيري دخلي حسن ليا وليك ابنت بلحاج
طارت من حداه بلاما تلفت ، مقاداش تتنفس والضحكة فالتة من فمها وريحتو لاصقة فيها وتفاصل وجهو مزال بين عينيها
هذه المشاعر التي بدأت تتكون داخلي كرصاصات تنتظر من يضغط الزناد ..ارض ملغومة من اول الحروب وتاليها بأهات الهوى المكتومة ...وعيون معلقة بين ابتسامة وتقطيب حاجب بين شهقة وزفرة ..وطرقعة اصابع ..بين مسحة عشوائية على أطراف ذقن مذببة و بخة عطر ..تحمل رائحة كل الرجال ...
حقا هنا بين صدري وحجابه الحاجز تقوم المحارق والمذابح والمجازر ..هنا جرائم حرب وحب لاتقاضيها محاكم العدل الدولية كلها
نهار على نهار زاد تعلقها بيه ، قدر يسيطر على تفكيرها ويخليها تحلم بيه نهار وليل ، في الخدمة مكانش كيعقل عليها وعلى برا كان مغرقها اهتمام وخروج ودوران ، داكشي لي معاشتوش من نهار عقلات دوزاتو معاه وعوضاتو .....والخرجة مكتسماش الخرجة الا مكانش فيها تعنيقة وبوسة مع بعض المناوشات....
فاقت عينيها منفوخين ليل كلو وهي معاه على تليفون هو سهران في البار وهي مونساه وكتشوفيه واخا مكيدويش حتى داها نعاس وهادا حالهم ...فاقت ونهار على خوه قلبها كيتزير حيت قرب يكمل سطاج لي كانت كتشوفو فيه كثر وكثر ، معندهاش فكرة شنو غدير من وراه لكن لي عارفة بلي غير يأمر انها تخدم عندو مغاداش تتردد في انها تقبل
قبل متنوض من فوق الناموسية هزات تليفونها وصونات ليه ، تعطل شحال عاد جاوبها كان واقف قدام لمرايا كيقاد في لحيتو وكيتريح ...لبس ساعتو وقاد حالتو عاد هز تليفون
مريام بصوت مدعدع ~. صباح الخير
زيدان مثقل ~ صباح الخير , عاد فقتي !!
مريام كتاوب ~. غير حليت عيني عيطت ليك ، فينك مشيتي مدرسة ولا مزال
زيدان كان كيمسح في صباطو ~. نفطر ونتحرك ، ونتي اش كتسنااي ، متنسايش بروجي لي عطيتك خاصك تحطيه صافي مبقى والو
مريام قالبة الهضرة ~ نخليو الهضرة على الخدمة في الشركة ، توحشتك اش بان ليك نفطرو بزوج
زيدان ناض غادي خارج ~ مكرهتش الغزالة ديالي ، ولكن غنتعطل خليها من بعد
مريام قلبات سيفتها ~.جايا ليومين متلاقينا على برا ملاحظتيهاش وكل مرة تقول ليا من بعد
قطع وخلاها قلبها غيخرج من بلاصتو كتحاول تفهم شنو قصد بكلامو ، اما هو نزل لتحت غادي ويسمع صوت الهراج وتنغنيغ دراري صغار ...رمى السلام وجلس مترأس الطبلة وقال ~ صباح الخير
مينة كبات ليك كاس قهوة مخلط ~ صباح نور اولدي
هنااء كانت شادة بنتها قدامها هزات فيه راسها وجوبات~. صباح الخير ، هبطات باست حنك بنتها وهزات ليها ايديها كتشير وتقول ~ قولي لعمو صباح الخير
اية كتهز ايدها ليه وتفركل برجيلاتها ~. نغ دا دا ما اننن
خربق ليها فشعرها وهز ايدها صغيرة لين يديه وباسها في صبيعاتها كيضحك معاها
غبرات ضحكتها وتنهدات بحرقة ، تسمع صوت كي رعدة نازل مع دروج ، نايض مبجقل لابس سروال وقميجة محلولة صدرو لمزغب كيبان جاي مخسر سيفتوو وكينفخ
نصر ~ انا لي خاصني نوسع خاطري ونسااعف ماشي هي
نصر لخليفي وحرمه هناء ...راجل ومرتو كيعيشو نهار فسيمانة بحال ناس لمزوجين والايام لي بقات غير صداعات ومشاكيل وعصى
هو كيعرف راسو فقط وبنسبة ليه اكبر غلط دار في حياتو ملي تزوج ، اما هي طيشها وطيرانها معاه لي دارها ليها ، شافت لفلوس وطوموبيلات وبغات تعيش معاه الحياة حتى حصلات ...وحيت اصلها فاسي بحالو وعائلتها مكيتفاهموش بالفم كان الحل الوحيد هو زواج ل نهار سينات عليه سنات معاه على حياة معاه في الجحيم
كانو مستقرين ففاس وفين وفين لي ينزلو لكازا ، كيعرف غير يقول لخوه ارا بغيت ندخل لهاد المشروع ،ويرجع يضرب يد فختها مشات ليا سلعة ، وهو فلوسو خاسرهم على الخانزات وشراب ودوران ممسوقش ...ونهار اشكى ولا تقوليه فين كنتي يعطيها قتلة لعصى ويخليها زرگة ...جاي عاقدهم ويتهز ويتحك تما معوج فمو
نصر ~ انا لي خاصني نوسع خاطري ونساعف ماشي هي
مينة كتبرد السوق قالبة الهضرة ~ هاء ، صباح الخير اولدي زيد زيد تفطر
تلاح وراهم على الفوطوي بسبرديلتو مهامو حد ~. مافيا لي يشوف خليقتها توحلها ليا
خبط زيدان موس مع طبلة كان هازو فيديه وغوت فوجهو ~. هضرتك الباسلة خليها عندك ؟؟ ناس كترجل ونتا عاد مكتزيد ترعون مااالك اش كااين
مرضاش نصر قدامها وقف مخنزر وهز يدو كيهلل ~. رااجل وسيد رجال وعندي بنتك ونتاا اخويا لكبير ؟؟
زيدان عض على فمو مخنزر فيه ~ لوقت لي كنتي نتا كتصلكط وتابع لخوا لخاوي ، كنت انا معري على كتافي كندير باش نعمر ليك كتافك وتبودر بيهم على الناس
تدخلات مينة بكلامها موقفاهم ~ نعلو شيطان انا مزاوگة راكم خوت "شافت في نصر " حتارم خوك كبر منك
برگم تحت منو وقلب وجهو اما زيدان زير على يديه ونطق بجدية كيشوف في مو ~ من ليوم يخرج يعري على كتافو بحال سيادو مفاتحهاش ليه خيرية ولا كنلقى الفلوس طايحين في الارض ، يگد براسو
نغزة لي كانت ناقصاه كملات صاط ساخط و مشى لعندها شدها من يديها كيسايس معاها~. صافي غير سكتي نتي من الغوات هاهيا رجعات نعساات .
نصر ناض من بلاصتو كيتنتر بغى يخرج لجردة وهي تشدو من يدو وقالت ~. شكون نتا ؟؟ اول مرة نشوفك هنا ،
بقى كيشوف فيها حيت الا قاليها شي كلمة ماهياش نهارو كحل مع زيدان ...حطات ايدها على راسها مفكرة ~. اااه نتا هو طبيب وانا لي عيطت ليك ، هاكا هاكا شوفها مالها كتبكي من صباح
خلاهم ملهيين معاها وخرج لخدمتو بعد موصى مو عليها
غادي سايق منيرڨي هز تليفونو لقاه كيصوني بنمرتها وهو يشد الخط وقال~ وجدي راسك غتسافري معايا !! باغي نرتاح ونتي هي راحتي..
حطات ايدها على الڤولون صدمها ومعرفت متقوليه ...واخا عجبها راسها ومكاينش ما حسن من داك لكلام تسمعو ولكن سيرة السفر خلاتها تدوي مفافية ~. هاا شنوو مفهمتش ؟؟
سايق بيد وايد لوخرا شاد بيها تليفون ، مكسيري في طريق كيشوف غا نيشان ~ شنو لي مفهمتيش ، قلت شي حاجة ممفهوماش ؟؟ عندي شي خدمة في مراكش وبغيتك تمشي معايا يومين ونرجعو...!!
بلاما تردد رجعات تعيط ليه حياتها و بالها وعقلها خربقهم ليهاا ... تقليقتو ولات تخليها مبرزطة نهار كلو ...اما ضحكة منو واخا تكون الدنيا ضاغطة عليها تنسي الهم لِ بيهاا ...صونات مرة و عشرة و عشرين حتى سمعت نبرة صوت ل كتخليها مفافية
زيدان بصوت خشن ~ شنو كاين مالك على هاد التعياط كامل ؟؟
" رجع قطع عليها ولاح تليفونو حداه عاض على فكو.. اما هي التقليقة بانت عليها مزيان ، بايدين كيترعدو ديمارات الطوموبيل عافطة لشركة ...وصلات وبقات مبراكية مبانتش ليها طوموبيلتو وهي تعس تم رادة البال مع طريقو من كيجي ويمشي...وغير تسمع صوت شي موطور ولا طموبيل كتضور ملهوفة ، حست براسها الاوكسيجين تقطع عليها ونفسها بزز كطلع ... شدت في صدرهااا تتوسع في الكول على الله دوز ليها النفس ...وملي فقدت الامل هزات صاكها ودخلت.. عينيها كيقلبو هنا ولهيه وصلت لبلاصتها ومقدراتش تجلس بقات غادة جاية ... يديها واكلينها على التليفون باغا غير تسمع صوتو ويقوليها قطعي شوية ونعيط ليك ...تقدر ترتاح
مريام قاصدة زهور تتدوي راسها ~ بفف ياربي يكون بيخير
زهور هازة عينها فيها ~ امالك تبيضي وحدة هنا ووحدة لهيه ؟؟ ياك لاباس ..!!
خلاتها ومشات جلساات غاطسة راسها في الخدمة متلفة فيها ....
~~~~
ستغرق منها الهروب من الواقع والعيش على ذكريات الماضي ايام .. ورجعت وراه لروتينها العادي ل قررت تدفن فيه راسها وتنسى اي حاجة متعلقة بعماد كيف كتحاول تتناسى لقاءهم ..فاقت كيف ايام الخوالي خدات دوش لبست حوايجها ..مكانوش عندها قضايا ولا محاكم خدمتها كلها غتكون في البيرو..داكشي علاش قررت تلبس مغاير وتخرج من مود ديال لكلاس وتلبس سبور ...تيشورت نص كوم في كحل مع سروال لاصق عليها وصبرديلة بيضة في رجلها جمعت شعرها على شكل كعكعة مخرجة جوج زغيبات من قدام ....بانت غزاالة ومغايرة حتى من الماكيااج زادها زين على زين..هزات صاكها وخرجات ديريكت للبيرو دوزت فيه صباحها كامل غاطسة راسها بين وراق حتى وصل وقت لغذا و ناضت جمعت الوقفة خارجة تغذا في نفس ريسطو لموالفة تمشي ليه ..جلست فبلاصتها المعتادة حدا شرجم مقابل معاها الباب والبحر .. لحظات قلال وكان غذاها منزل قدامها كتاكل وكتأمل في البحر ومواجو حتى بان ليها مراد داخل معنق بنت
غمضت عينها بغضب وحسات بمغص في كرشها وبدات كتردد في نفسها أعوذ بالله من شيطان الرجيم ..
قلبت وجها وكملت اش كانت كدير اما هو ضرب عليها ملي دخل وعن قصد گلس فطابلة قدامها...حدرت راسها مشفاتش فيه على عكسو كان حاضيها.....ببتاسم بخبت وجمع الوقفة جاي لعندها .كيتمختر في المشية وكيضحك حتى بانو حفيرات الزين ل عندو فحناكو.. وقف عليها وتحدر لعندها كانت كتسناه اش يقول باش تقمعو ولايني هاد المرة دار داكشي لي قاليه راسو باغي يعصبها وربي كبير ..باسها في جبهتها ونطق بتفليا
مراد ~ مرتي العزيزة صافا عليك!! شفتك خرجتي بلا شواري معندك راجل يحكم فيك ، "حط صبعو على وذنو بتحذير كيطلع فيها وينزل ".. الالة راكي مزوجة اش هاد لباس و مالك على هاد لعكر جاية العرس ..!!
بصعوبة بالغة قدرت تسيطر على نفسها تمالكت اعصابها مراعية لبلاصة فيم كاينة حيت نقية وهاي وجامعة غير شكون وشكون ومنهم ناس بحالها في الدومين ..ماهضرت متكلمت حدها دورت راسها تشوف في بنادم واش شافيها لقات كلشي ملاهي مع ماكلتو ..وهي تجاهلو وتجاهلت تصرفاتو حيث عارفاه باغي يعصبها والا جوباتو غادي توقع شي مصيبة. ..
.بلا اذن منها ريح حداها طالق كلمة مخليها تفقد سيطرة على راسها من جديد
مراد هز ليها راسها ~ هزي عينيك وشوفي في راجلك ولا حشمانة ؟؟
خبطت طبلة بي ايدها وطلعت عينها فيه بشراسة واصلة بيها لافان ديال طلوع الدم من لبسالة الخاوية ديالو...نطقت بغل
نادية ~راك عيقتي وزدتي فيه وبسلتي كاع حتى طلعتي ليا فوق راسي.. هاد قلة الترابي ديرها مع مك ولا باك حيث بان ليا غير ولدوك وطلقووك بحال جمال ..متعرف الاحترام لا صواب لا الاداب لا معاملة... و هاد الضسارة الخاوية ديالك كتمرضني في صحتي ومعنديش مع نوعك.. لهذا نهار تشوفني قلب طريق وخلينا زوينين واخا ..
لاحت عليه كلامها لي بحال سم ولثاني مرة كتعيرو بعائلتو وتطيح منو كراجل ...سكت قاضب حواجبو وكيشوف فيها ..هزت صاكها بغضب وخرجات مخالياه مريض فخاطرو ولايني مدوزهاش ليها بالساهل مجات فين تجلس على كرسيها في الخدمة حتى وصلها مساج في واتساب كانت تصويرة من نمرة ممفيداش عندها ، مع حلتها مع توسعو عينيها وعروق راسها بداو يضربو والمساج لي كان تحتها خلا الضغط يطلع
_ فينما نتوحشك كندخل لتصاورنا بزوج امرتي لغزاالة
خدامة وعقلها معاه ولات مهووسة بيه والى تقطع عليها حسو كتولي بحال الحوتة لي خرجات من الما ... اهتمامو بيها خوفو عليها و كلامو الحلو ليها كولو دوزاتو قدامها وكتنهد حيت مبغاش تحرم منو ولا تبعد عليه ، تفكير بوحدو فهادشي كيخليها مخنوقة ، نفضات راسها ووقات غادية فاتجاه الباب وهي تلاقى بيه... جاي داخل طالعة ليه مزياان ومكيشوف فحد ...معبرهاش داز من حداها ودخل لبيروه، تسنات شوية ولحقت عليه كلها كتغزل
ميريام قربات حداه ~ علاش مابغيتيش تسمع ليا ولا تعطيني فرصة فين نهضر ونشرح ليك
زيدان هز عينو فيها و اشار لراسو ~ عرفتي هاد الراس تفرقيه على زوج تلقايه متبوخ ، فبلاما تزيدي تبخيه خرجي و دي معاك الباب في يديك عندي ميدار وممساليش هاد ساعة
ميريام بصوت خافت ~واش عند بالك انا مبغاش نمشي معاك " شدت ليه فيديه " انا راه جهنم ونتلاح معاك فيها ...دويت على ود بابا شنو غنقوليه راه مسميتوش اليخاندرو لي تجيه عادي بنتو تسافر يومين لمراكش فكر تا نتا فيا شوية !!
زيدان على اثر كلامها خبط الطبلة تا قفزت ~ ... الشريفة راك واقيلة مصممة بناء وكيخصك تسافري برا لمغرب ولداخل ومرات تا بشهورة على حساب لبروجي ...ايوا وملي باك مسميتوش اليخاندرو لاش مزاحمة مع الوقت ...
ميريام كلامو حسات بيه نازل عليها بحال التلج و جمدت بيه ،شافت فيه كتدور فعينيها عاطياه الحق حيث شافت كلامو على صح ... وخرجات من عندو بلا متجاوبو ، رجليها مكانوش هازينها كانو كيلعبو ..حسات بقلبها ضارها و بزاف گاع ، رجعات للبيرو وتكات على خدمتها كتلف فيها....ومرة مرة تهز راسها فتليفون ولا في الباب كتقول هنا يجيني مساج ولا يعيط عليا ...خيبة أمل كل مرة كانت كتبان على وجهها ، لاحت القلم ودورات الكرسي لجهة الشرجم عقل يديها و عقل يجيبها ...
وصل وقت لبوز واكيد غيخرج على برا، هزات صاكها وسبقاتو
لباركينگ فين حاط طوموبيلتو.. لقاتها محلولة حلات الباب و طلعات تتسنى فيه ...وقت قليل وسمعات الباب تخبط ، ميل راسو لعندها ونطق
زيدان بتساؤل ~. شكديري هناا !
مريام قادات الصمطة وشدات فدراعو بتلحوين ~ . شحال خاصنا من ساعة ونوصلو لمراكش !!
زيدان جبد ضحكة من الجنب وجابها لصدو معنقها وكيبوس على راسها ~... ايوا وشنو غتقولي لباك !!؟
مريام هزات كتافها باقا مخشية فيه ~ غنقوليه عندي خدمة ولا نطلبو ندير أي حاجة مهم نكون معاك حيت تا انا راحتي كتكون فين كتكون نتا .
"هز ايدها باسها من الكف وظهر ورجع شابكها مع يديه غادي مكسيري وكيدوي~ قبل غنوصلك لدار جمعي حوايجك وفليل نجي نهزك ونشدو طريق
مريام عينيها كيبريو بالفرحة ~ صافي ان شاء الله
وصلها قدام الدار وتيسر ، تمات داخلة كتضحك وقلبها مرتاح وكتحس بكتافها خفاف عليها ، حلات الباب ودخلات ومحدها كتقرب وهي كتسمع كثرة اللغى ، في الصالون بان ليها سي كامل جالسة مخنتر فوق سداري وقدامو طبسيل ديسير مشكل باينة فيهم عاد كملو الماكلة اما فجهة لوخرا كان سي عدنان لي غير شافها وقف كيلعب بتسبيحو وكيضحك ، رد ليه كمال البال فين كيشوف وهو يوقف بدورو مشرع فمو وماد ذراعو ليها كيقول
وها لالة لعروسة جات !!
تفيكسات فبلاصتها كتشوف فيهم بزوج كيفاش كيضحكو لبعضياتها ، جابها لعندو كمال معنقها ومجلسها حداه وكيخبر عليها وهي مكايناش فهاد العالم بالها مع كلمة عروستنا لي فرگعها فوجهاا
كمال كيطبطب على ظهرها ~. تبارك الله بنتي كبرات وولاو يجيو فيها الخطاب
مريام بحدة ~. ايوا قوليهم ابابا معندكش بنات لي زواج
حنحن مزير عليها من ظهرها باش تقاد هضرتها ، جا يدوي وقاطعو عدنان لي قال ~. هاد الهضرة كنت كنفضل نقوولها ليك نتي لولة وناخد رأيك داكشي علاش بغيت ندوي معاك داك نهار و قع لي وقع ، وعلى وجهك مبغيتش ندعيييه ...ضحكات باستهزاء وكمل ..مهم الالة لبنات اول محطيت رجلي فهاد دار رتاحيت ليها ورتاحيت لسي كمال
كمال ضحك تا تكمشو عينيه ~. الله يكبر بيك اسي عدنان
عدنان نطق مطمر ~. داكشي علاش فكرت نوليو عائلة ونساب الا كتاب ونديرك مرتي على سنة الله ورسوله
بوجه مقزدر حتى تصدم فيها باها جوباتو ب ~ لمرا رقم شحال اسي عدنان ....كمال قلب ضحك ~. يهديك الله اهاد البنت ، علاش كتسولي مهم نتي ميخصك خيير !!
عمرها تجاحدت مع باها ولكن هاد المرة وقفت قلبها كيضرب وعلات صوتها من الفوق
مريام ~ علاه انا هنا خاصني شي خير هاا ؟؟ انا خاصني راجل يفهمني يبغيني انا ويتزوج بيا بوحدي انا ، يعطيني وقتو ماشي فلوسو وهادشي اكيد مغاديش نلقاه في سي عدنان داكشي علاش ، مقابلاش هاد زواج ...طلعات لبيتها وخلاتهم يشوفو فبعضياتهم ،باها مبقاش قادر يهز راسو فضيف ولا غير يصرط في ريحو لي نشف
كمال ~. سمح لينا سمح لينااا اسي عدنان ، راك عارف هاد جيل تاع دابا ميحشمش
عدنان محمقاه ووعقلو مطيراه ~ معليش خليها تفكر على خاطرهاا " جمع وقفتو ". مسخيتش بيك اسيدي ولكن عندي الخدمة ، مهم كنتمنى نوسعو شراكتنا ونوليو عائلة...
القضية فيها الفلوس والبيع وشرا والحركة مروجة ، يعني بالخلاصة همزة من الهمزات لي كيموت عليهم كمال وميمكنش يفلتهم ، تم طالع ليها عينيه حمرين معصب ..لقاها معنقة مها وكتسكي دخل جاعر صاط فيها وخرج بعد ماقال
كمال ~. لكلمة وعطيتها كتسمعي..."زادت نهارت كتبكي ومها تصبر فيها ~ ماما هء هء والله منتزوج بيه ، نهرب وعمركم تشوفو كمارتي الا بززتوه عليا...نزهة كتمسح على شعر بنتها وتبكي ~. لا لا ابنيتي معندك فين تمشي ، لي بغيتيها هي لي غتكون وباك انا ندوي ليك معاه غا بقاي على خاطرك...مسحات عينيها وناضت من فوق الناموسية كتجمع في حوايجها
نزهة بخوف ~. راني وعدتك ابنتي ، فين غادا
مريام كملات على شنو كدير~. لا غادا مسافرة اماما لمراكش واحد ليومين عندي خدمة
مريام جلسات حداها ودوات بود~. ماشي لخاطري ، ولكن الخدمة خدمة معندي مندير
نزهة ~. وباك اش غتقولي ليه
مريام ~ قبل منمشي غندوي معاه فتليفون
سكتات ملقات متقول ليها
حدها وصلتها التصويرة ولا كلشي كيبان ليها ظلام في ظلام لمعيور وعيراتو والايد وحلاتها ليه شنو باقي منها مزال ، بدات تولول كل ما رجعت شافتها وتزيد تعصب ...مقدراتش تصبر عيطات ل نمرتو ولا رد ...خرجت وهي ساخطة على الوضعية كاع ديك الهدنة لقلبت عليها هاد الايام جا هو في لحظة ضيعها ليها ركبت في طوموبيلتها وزادت ....غادية وتعيط وحلف لهزو ، وقفت في الضو كتسنى فيه يشعل بحالها بحال گاع الناس ... دورت وجها بصدفة في سيارة لي حداها بان ليها عماد ومعاه بنت صايگة بيه .. بدورو ضور وجهو كيضحك وكيدندن مع الاغنية والايدين مشادين .حتى قشعها كتشوف فيهم مصدومة أكثر من قبل كان صعيب عليها المنظر حسات بروحها تخنقات ودقات قلبها كضربو بجهد بحالا تقول كانت كتسابق اما صدرها مبقاش قادر يتحكم في حركتو كيطلع ويهبط بقوة ..شعل الضو الخضر وكلشي زاد بقات غير هي واقفة وطموبيلات وراها كيكلاكسونيو عليها وهي لا حياة لمن تنادي..عيوونها هابطييين بدموع كيف شلال وايدها كيترعدو عليها اما عقلها وقف عند ديك لقطة ..بقات هكاك وبنادم كيخليها ويدووز ..حتى وقف عليها البوليسي ..
جرا عندها البوليسي من بعد ما بانت ليه عرقلت حركة السير... لقاها مصدومة وكترعد ووجها سارد .حل عليها الباب كيعيط ليها ولكن والو كتسمع فيه وباش تجاوب لسانها كان مربوط وثقيل .خرجها من طوموبيل غادي شادها من كتافها ..جلسها فجنب الطريق ورجع ركب في طوموبيلتها حيدها ليها من وسط الطريق ....عرفها تحت تأثير شي صدمة داكشي علاش مهضرش معاها اكتفي يعطيها الماء ويرشو عليها باش تفيق ..وغير قاس لما وجها وهي تشهق بحال كانت غارقة وخرجت على برا تاخد النفس..
ملي وعات ولقات راسها بلي كاينة جناب الطريق وكالسة كتبكي علي حب كاذب وخادع تحسرات على راسها ونفسها بقات فيها
واش لهذا الدرجة كانت مغشوشة فيه والحب عمى ليها عينيها ومكانتش كتشوف لخبث لكبير لي فيه واش لهاد درجة مقدراتش تشوفو شحال كان اناني وكيفكر غير فيه ،، عرف مزيان كيفاش يضحك عليها ويعيشها في كذبة كبيرة..
ياما حلمت معاه ببزاف ديال لحوايج، منهم يبنيو مستقبلهم بزوج ويتزوجو وياخدو دار ويفرشوها علي ذوقهم ويولدو ولاد وحتى سميات ختاروهم بالحق انا اريد وانت تريد والله يفعل ما يريد
مسحات دموعها وركبات سيارتها غادي لعند الشخص لي كان سباب فهاد الخرجة تبرد سمها فيه ، واول وجهة كانت هي لبار الا ملقلتوش عاد ترجع لدارو...نزلات من طوموبيل عينيها حمرين ومعصبة تخطات كلشي ومشات نيشان لبيروه لي بان ليها من بعيد ، غير جات وحلات وياريتها ستأذنات شافت قدامها منظر جامي شافتو من قبل
وصلت للبار معصبة ومكتشووفش قدامها سولت عليه نعتو ليها لبيرو تاعو غادا قاصداه كتنفخ وتسوط بغضب وصلت عند باب حلاتو بلما دق ولا تاخد الاذن ذخلت صاعرة عليه وعينها خارجين باغة غير يبان ليها قدامها ..ضورات عينيها وهي تحل فمها مصدومة من لي شافتو قدامها ...كان عريان ملابسش عليه وعينيها متمشي نيشان لمول لعلام ، تلفت وداخت مبقات عارفة تخرج ولا تذخل .بدات كتمشي وتجي تلفت ليها الهضرة بدات غا كتخربق وجيب افم وقول
نادية ~ لحمار ، لحيوان مكتحشمس ..حط يديه مدرگ واخا ملقى ما يغطي وهو يغوت
مراد ~وانتي غممممضي عينننك اش كتشوووفي ، ؟؟
غمضت عينها بزربة وهي عرقانة كون لقات تخشى فالارض ومتبقاش تبان قدامو. لبس بينوار ديال دوش عاد قرب لعندها كيدوي بغضب
مراد ~ مكتعرفيش دقي باش نجوب ونعطيك الاذن عاد ذخلي...كون جيتي لقيتيني خدام على ولادي هاا ؟؟
مراد ضحك باستهزاء ومشى جلس فوق لبيرو وقال ~ كتكوني زوينة ملي كتعصبي
ناظية عضات على فمها مغددة ~ وفهم فهمممم ابنادم بيني وبينكك شلاااا مستويااات...غير فوتني عليه حيت مغنشوفش فيك
جمع يديه وزير مباغيش يوريها مراد لخايب بالحق كلامها كل مرة كيستفزو واخا كيبغي يحافظ على بروديت دمو ولكن دابا مقدرش ، ناض قافز قدام وجهاا شاعل معاها مزيان محسات بيه حتى شد ليها وجها وزير على فكها بجهد ..
مراد مطرطق فيها عينيه ~ فكل مرة كنلعن الشيطان وكنقول دبا تفهم راسها دبا يهديها الله وعاد مكتزيدي فيه !! وهاد الفم عندك غير تاع تهراس ..."زاد زير عليها ودوا تحت من سنانو " ..متشوفينيش كنسكت ليك وتزيدي فيه وتماداي وطلعي ليا فوق راسي وتحتاقريني وتعايريني بالمستوى ...دفعها وبدا يعيب فيها ..انا محامية انا قارية انا خدامة انا هذا وانتي غير طبيب خورك حتى عيا وكرركبك مع درووج وجاية تنفخي عليا ودافعة كبير من لفوق علاش زعمة حيث انا عندي بار "حط يدو على صدرو وقال " شتي داكشي لي كنخسر فليلة نتي كتصوريه فشهر وايلا كان على لقرايا لي نافخة ليك ريشك انا سمحت في مها الكلب نهار كركبوني ل ولدوني وكونت راسي براسي وكافحت ودمرت باش نوصل لهادشي ل فيه وتجي وحدة معقدة في حياتها تبدا تبوزا عليا فكل مرة
دفعاتو بكل جهدها وجمعات معاه بطرشة كتغوت وتهرس فلي لقات قدامها من قراعي شراب لي على شكل ديكور حتال طبلة دزاج ...اي حاجة لقاتها قدامها هرستهاا مكانتش عاقلة ، هضرتو متقبلتهاش حيت عارفاها بصح ،وعندو الحق فكل كلمة قالها ..ايه تخورات فحياتها وضحك عليها شماتة وجايا قدامو كتصطانع القوة وتبورد عليه ..
فقدت سيطرة على راسها قرب حداها مندم راسو علاش نطق شدها من يدها بزوج وزير عليها متحكم فيهاا وهي كترطى وتغوت وتقول ~ طلقنييييييييي وا طلق منييي طلق
سكتها بطرشة جمع ليها فم وحنك وغوت عليها ~ لاش هادشي كامل على قبل زامل ، بقى فيك كتبكي عليه ، يمشي يبكي على موو الميدار لي ولدو ، هو عايش حياتو ونتي محبساها عليك ...
تنثرت من بين يديه وبدات تضرب في صدرو كتبكي ~ ماشي شغلك سمعتييي ديها فراسك ، اه ضحك عليا وبغيتو وكنت معاه راجل ونمد ونعطيه وفلخر خورني ولاحني فزبل ودابا راه عايش حياتو وممسوقش وانا هنا باقا ندم فراسي ، "بغات تبعد منو ومخلاهاش .".....وهادشي متحتاجش تفكرني فيه حيت كنشوفو فعينين اي راجل كيشوف فيا
جرها لعندو وعنقها خشاها فيه ~ ماشي كلشي شماتة ورعاوين ، بغات تبعدو عليها بالحق عيات وفشلات نزلات الارض ونزل معاها على نفس الحال كتبكي وذاتها كتغزل~. هء هء خليني نمشي بحالي
كيدوز ايدو على ظهرها ~ معندك فين غادا فهاد الحالة ...
مكانتش هنا كانت غا كتبرگم ووذنيها مصمكين اما هو مخنزر...
مراد نهار كان كيخيط فيدو عرف كلشي من عند عماد هاد الاخير لي كان مقص محطوط على عنقو مهددو بيه مكان قدامو ...غيسرسب ليه شنو عندو من اول لاخر ...مكانش بغى يجرحها ويعايرها بشنو وقع ليها ولكن هي لي ستفزاتو ..
خلاها تبكي فوق صدرو ،كيبوس في شعرها وجبهتها ويدوز عليها بيديه لحرشين ..حس بيها ترخات وطاقتها سالات ويديها لي كانو مزيرين على صدرو طاحو الارض ..نزل عينو ليها بانت ليه غابت على الوعي ...وقف هازها بين يديه فاشلة حطها على فوطوي كان تما حيد ليها سبرديلة والمقبط لي كان جامع شعرها...غطاها ومشا كب ليه كاس وجلس مقابل معاها
شادين طريق يديها فيديه وشاب خالد مطلوق اغنية نتي سبابي وسباب بلايا لڤوليم كان ناقص ...هي متكية على الكوسان وكتشوف من عينيها باينة مقلقة وشي حاجة شاطناها اما هو مركز مع طريق ومرة مرة يهز كاس ديال لقهوة يجغم منو ...
حط لكاس ودور راسو جهتها كيسوط وقال ~. يا إما تقولي ليا شنو عندك ولا طلقي وجهك متبقايش عاقداهم
مريام خدات ايدو عنقتها ~. مكايناش شي حاجة تستاهل ندوي فيها غير عيانة وصافي ، وزايدون انا فرحانة حيت غنسافر معاك وغتبقى قدامي يومين صباح وعشية وميفرقنا غير نعاس
زيدان باس وقال وهو كيغمز ~ الا بغيتي حتى نعاس منتفارقكش فيه غير أمري وانا نفذ شحال عندي منك !!
ضحكات بجهد وتنهدات براحة ....غادي ويتغزل فيها ويبوس فيديها قدر يخفي الغوباشة لي رسم ليها كمال بسهولة وتنسى شنو دار بيناتهم
~~
جالسة فوق الناموسية كتعيط لباها شانطة مجموعة قدامها وهي لابسة ومقادة موجدة راسها سمعات الخط تقطع ورجعات صونات ليه وهو يجاوب
كمال ~. اش كااين ؟؟ كلامي راه قلتو قبيلة سيري ممساليش دابا خدام
مريام بخنقة ~. مغندويش فداك موضوع بغيت نتشاور معاك عندي شي خدمة وغنسافر...
كمال قطع ليها كلامها في نص ~. سافري ولا جلسي ، المهم هو توجدي ليا راسك لخطبة لي غتكون هاد صيف
قطع وخلاها مقاداش تنفس عيات تخوي على راسها لما وتشرب فيه ، غير بغات تكبر بيه وتعطيه دور الاب لي ميستاهلوش حيت عارفاه ممسوقش ليها كيبغي راسو
داها نعاس مفاقت غير على ملمس يدو في حنيكاتها بدات تكسل ليه وتاوب
مريام بصوت باح ~ وصلنا
زيدان هبط لحنكها باسو مونطو خفيف كيلبس فيه حيت محرك لبرد ~ وصلنااا !! مهم نتي بقاي هنا انا راجع
قادات لكوسان وحلات شرجم يضرب فيها البرد لي محرك فليل ..كانو قدام اوطيل زوين وكبير وغير من برا كيبان غزاال ..وقت قليل وتم راجع لعندها مشى نيشان لكوفىدر خدا شوانط وطل عليها من شرجم ~ يالله نزلي
وقفات حداه عينيها غا كيضورو وكتشوف فين هي ، فايتة زايرة مرتكش ولكن الخرجة معاه غيكون ليه طعم اخور شد فيديها ودخلو كان حاجز ليها وليه بيوت مفرقين صيفط شوانط لي شومبر وتعشاو في مطعم لي تما
هضرة كثيرة من عندها مقابل كلام قليل من طرفو وناضو كلها لبيتو كانت ثلاتة دصباح عيان ومسخسخ بطريق وهي كثر
داخل كيتخروع في المشية وحايط يلوحو لخووه ..يطلع درجة ويعاد ينزل منها ناسي فين غادي تاا وصل لبيتو ، ريحتو كانت تقلب بشراب وحشيش وزايدها بالغنى تا كلمة ممفهومة بانت ليه ناعسة فوق ناموسية وخاشية فيها بنتها وهو يقرب حداها كينغز
نصر مبغاتش تفيق ليه وجرها من شعرها ~ هاديك هاااه ، واا لخراااا نوضي لمك
فاقت مقلوبة بنعاس وزادتها ريحتو كان قريب منها ، زير عليها من شعرها مقصحة وكاتمة المها على ود بنتها لي ناعسة
هناء ~ شنو ماالك ثاني !!
نصر حيد سباطو وبدا ينصل في حوايجوو ودوا بصوت ثقييل ~ هزي الدرية ونوضي خليوني نعس عيااان باغي رتاح
عرفاتو مفوت كيف عادتو مغاداش تجاحد معاه يسمعوهم هزت بنتها بين يديها حتى حطتها في الكونة ومشات نعسات على الفوطوي ...اما هو تشبح على كرشي وكيعاير
نصر ~ ندمنا گاع تا حوي*** غا نتي لي والدة
صوت تليفونها فيقها من نعاسها حلات عينيها بشوية بشوية كتشوف في السقف ، بان ليها راسها ماشي ففراشها ناضت قافزة ...صاكها عند راسها وهي فوق الفوطوي مغطية وسبرديلتها محطوطة في الارض ...مستغرقاتش بزاف لوقت باش تفكر شنو وقع معاها، بان ليها زاج ودنيا مقربلة تافافات وزادت صاطت ملي بان ليها ناعس على الكرسي عريان من الفوق وراخي عنقو اللور .بدات كتلبس في سبرديلتها بزربة وتقاد في شعرها ...صوت الحركة خلاه يحل عينيه ديجا داير بالو معاها
مراد ~ صباح الخير نعستي مزيان رتاحيتي !!
مداتهاش فيه هزات صاكها وتمات قاصدة لباب تحلو وهي تفاجى بيه مسدود ...
نادية كتدوي بلاما تشوف فيه~. حل ليا لباب نخرج من هنا
تم جاي لعندهاا حفيان لابس غير سروال سيرفيت فالكحل ..قرب منها ودوا بشوية
مراد ~ واش معييتيش ومناوياش تنعلي شيطان ، الالة گاع لي قلتي فيا مكذبتيش فيه وانا لغالط ومنسواش، صافي نساي شنو وقع بيناتنا وتعالي نبداو صفحة بيضة كتشقشق
نادية مصدومة بالحق ماشي من هضرتو ...كانت مبرقة عينيها فتليفون وكتقرا وتعاود في شنو وصلها
~ سلام نادية معاك عماد ،بون بغيت نشووفك ضروري نجلسو وندويو حيت من اخر مرة شفتك وانا كنفكر فيك ~
~ كنتمنى تعطيني فرصة اخرا على الاقل غا نتعاذر منك غنستنى جوابك ~
جرها مراد من يديها حتى فيقها ~ راه معاك كندوي شنو قلتي
نادية باغا غتفك ~. لي بغيتي يالله حل ليا لباب عفاك عندي خدمة وخاصني نمشي
مراد بغمزة مد ليها يدو ~ معاك مراد بن زين ازين ، ولحمامة اش سماها الله
نادية حركات راسها كتحسبن وسلمات عليه وقالت ~ المحامية نادية لي على يديك كنت غنولي قتالة غا جاب الله من جهتي
" شافت فشنو دارت وقالت ليه " لي خسرتيها فهادشي دين عليا غنخلصو ليك
مراد حمر فيها ~ واخا عندي طريقة باش تخلصيه !!
نادية ضيقات عينيها فيه مخنزرة ~. شناوا
مراد ضحك وقال ~ تشدي ليا واحد الخدمةة ، باغي نحل بار فمراكش وبغيت شي وحدة قاصحة بحالك توقف ليا على وراقو
جات تنطق حط يدو على فمها " هادا هو دينك وهكا غترجعيه وغيرو منقبلش
نادية بقلة حيلة ~ نفكر ونرد عليك يالله حل لباب
مد حنكو وجرها لعندو كيسلم عليها وهي غا كتبقلل فيه~ تهلاي فراسك تا نتشاوفو ، بيناتنا تليفون ، كون مزربانة نشدك تفطري
حل لباب ودفعها بشوبة تا خرجات وقال بابتسامة ~ بالحق ايام الله طويلة
عطاتو بظهرها ومشات واخا عيا يخبر هي بالها شاغلاه حاجة وحدة لمساجات لي وصلوها
الحب أن تسمحي لمن يحبك بأن يجتاحك ويهزمك، ويسطو على كلّ شيء هو أنت. لابأس أن تنهزمي قليلاً فالحب حالة ضعف وليس حالة قوة
~~~
كان عندو اجتماع عمل على الصباح ...داها معاه حتى تفاهم مع سيد ومشاو يشوفو الارض فين غيتبنى لمشروع ....جاه تليفون بعد ومشى يدوي اما هي تحركات كتشوف في دنيا تما وعاجبها المنظر حتى وقف عليها مول لبروجي موقفها
- واخا نسولك ؟؟
مريام ربعات ايدها وشافت فيه ~ مرحباا سول
- الا كانت هاد الارض ديالك شنو تبغي ديري فيها ، قبل متكمل قال.. انا عارفكم نتوما النسا ذووقكم واختياركم لا يعلى عليه
مريام بدون تفكير ~. نديرها مؤسسة لرعاية الاطفال المتخلى عنهم ..."هزات ايدها وبدات توريه ". نستغل هاد لبلاصة وندير ليهم العاب ،وهنا نديرها مكتبة صغيرة فين يقراو
الفكرة خلاتها تحمس وتدوي وتتناقش معاه ..هادشي كلو كان تحت نظرات واحد الشخص لي عينو كانت عليها ،كمل كلامو وقرب لعندهم داير ايدو وراه
- مد يدو سلم على مريام وبدا يمدح فيها ~ تبارك الله عليك الالة وفرصة سعيدة ملي دويت وتناقشت معاك تبارك الله عليك
مريام بتاسمت فوجهو ~. شكرا ، ومبروك مسبقا
كان سبقها لطوموبيل مشات وراه غير ركبات وهو يكيسري مكمش جبهتو جات تدوي معاه وهو يقمعها
زيدان ~. راسي متبووخ مافيا لي يدوي ولا يسمع
معرفات مالو سكتات حتى وصلو الاوطيل وقبل ميتفرقو حل لباب بيتو وجرها معاه لداخل وسورت ..كينفخ ويصوط وكيحل في صدايف قاميجتو قربت منو وقالت ~ بغيت نعرف مالك شنو درت ليك علاش معصب ؟؟
زيدان بالغوات ضار لعندها ~. متبقااي تدوي مع حتى قمقوم ، مجمعة وعاجبك الحال وكتناقشي معاه وهو كيتحل تما ريوگو كان غيطيحهم عليك
بغات تجاوبو صونا ليها تليفون كانت ماماها قطعات عليها حتى تشرح ليه ....
مريام عضات على شفايفها وقالت بهمس ~.....انا مدرت والو هو لي وقفني وقاليا نسولك , عادي شنو فيها ؟؟
زير ليها على يديها موعتها وقربها لعندو حتى لصقت عليه
_زيدان بصوت خشن ~ بلاما تخليني نوريك شنو فيها ، متدوي مع تا قندوح ، دوي معايا انااا شنو ممقنعكش !!؟
تنهدات وجوبتو برضي حانية ليه راس شوفة فيه كتخليها تقوليه على كلامو غير اه ، كتبغيه كثر من راسهاا وكتموت على غيرتو وقابلة على شنو فارض عليها ~......واخا صافي غير متقلقش ، سكتات شوية وقالت واخا نمشي دابا لبيت راه قطعت في وجه الدار غيكونو تخلعو عليا مفهمو والو
زيدان ،بدا يرخف على يديها ، كاتم غضب ديالو ، زفر بسخط وقال وهو مغوبش ~بوسيني وسيري
زيدان ، خنزر وقال بحدة واستهزاء ~....كضحكي عليا بهاد البوسة ولا دايرة فيها مكتعرفيش , واخا الالة انا ندير شرع يدي ...
جرها من يدها تا لصقات عليه وجها عند صدرو ، لوا ليها ايد وحدة ورا ظهرها مزيرها بيديه والايد لوخرا شابكها مع ايديه وكيتحسس وجههاا ، قرب فمو لعندهاا مخلي حر انفاس السخوونة كتضرب فيهاا وكمل عليها بكلامو
مريام يا مريامتي ,خدا خصلة من شعرها شمها ولواها على يدييه وكمل ~.....كنكون جاي ليك معصب مكنشووفش قدامي وناوي نعطي لمك قتلة ،
هزها شوية من الارض مزيرها لعندو ومقربها منو ملي حس بيها بدات تفقد توازن ديالها اثر كلامي لي محمقهاا ، جرها من فمهاا طبع بوسة و طول فيها وكمل شنو كان كيقول ، ولكن غير كنوصل حداك وقدامك كتلفيني وكندير بناقص وعينيك كيخليوني نضعف
كان كيتكلم وغادي بيها بخطوات تابثة وبطيئة جهة ناموسية تكاها وتكا فووقها محكم فيها كيف بغى ترخات وداكشي لي بغي حاصرها بايديه ورفعها معاه بهضرتو لي كلها لمساات
حسات بتبوريشة طلعات معاه ، وتنفسها تخربق صدرها ولا كيطلع لعندو وكينزل وهادشي كان عاجبو وكيزيد يشعلو ، رسم ضحك خفيفة على فمو وخدا ايدها بين يديه وبدا كيحل صدايف لقميجة ....
زيدان.... غتعيطي لدار وتقولي ليهم بلي راك بخير ولا من احسن قولي ليهم راك بين يدي ومسخيتش بيك
_مريام ،كلامو فيقها بغات تنوض وهو يرجعها وكيحرك فراسو بنفي ، لي عطا الله عطاه ابنت الحاج بغييتك ولافوت ماشي منك....كان كيدوي ويديه لي مرافق ايدها كتحل قميجة حيدها بلمهل وحطها بجنبو ورجع خدا ايدها وحطها على صدرو بغات تجمعها وهو يخنز وقال بحدة ....
زيدان ~خليها تم
بدات ترعد وداتها تنملت واي بلاصة كيحط ايدو عليها كتكمش مبورشة ، رغبتها فيه كانت كبيرة بزااف ولكن مقدراتش تعيش معاه اللحظة شي حاجة خانقاها وكتقول هادشي لي كدير فيه ماشي هو هاداك ...
حسات بيديه دخلات ليها تحت لحوايج وتحطت على لحمها قفزات تحت منو وبدات تلوى مغمضة عينيها وكتدوي بصوت رقيق
مريام كتحاول تبعد بيه فيديها ~ زيداان لا وقف !! منقدرش عفاك
زيدان عينيه كانو معسلين ومنيمين فيها مسمعهاش اش تقول باركة يفرق بوساتو فين ما والا ...مرة فسرتها وهو طالع لكرشها تاوصل لعند صدرهاا
خشى يديه ورا ظهرها يحل سوتيان وهي تشدهم ليه
موقفاه بترجي~ واش مسمعتينيش شنو قلت ، وقف وقف منقدرش خايفة !!
رجعت راسها لور ونزلت الكرسي مغمضة عينيها ..وكتفكر علاقتها معاه من اول لقاء كيف كانت حتى لاخر ذكرى ...ذكريات كلهم محفورين بدقة في بالها ..كيفاش كان كيلعب عليها وعلى نقط ضعفها وهي بحال البهلة تابعاه ولكن حاجة وحدة لحمدت الله وشكرااتو عليها انها حافظت على نفسها وهادي الحاجة ل خلاتها تشد في راسها وحتى من عماد كان غرض ديالو اكبر من ناموسية ويطلع فوقها هو كان كقلب على فلوس وشكون يصرف عليه.. استغلها تحت اسم الصداقة كان كيحترمها ويهتم بيها ومكبر بيها وهي لولة عندو ... بين ليها وجه الزوين وكان كل مرة كيعرف كيفاش يمثل عليها باش ياخد لفلوس من عندها ..عام وخوه تحولت كلمة صديقتي لحبيبتي وهنا زاد في لعبو حتى تخرج ووصل لشنو بغى وهو يبدل لمدينة وقلل اهتمامو بيها وقلب عليها بكل بساطة وبدون سبب مقنع و حتى توضيح معطاه ليها ...خسر عليها جووج كلمات لحفظاتهم عن ظهر قلب وفي عقلها نقشاتهم ..كيف تفكرت ما داز عليها نزلت دمعة حارة كتعبر على گاع لكتحس بيه والم والاحزان لعاشتها وليالي والاعوام لي ضيعتها ول سلباتها حياتها وخلاتها تبان بشخصية صارمة وامراة قوية وعازمة ومكتحتاجش راجل في حياتها وبوحدها قادرة تفرض شخصيتها في كل ميدان وهاد السبب خلا نادية تزيد لقدام وتبني حياتها من اول وجديد وتحقق حلمها وطموحها .....مسحت عينها من دموع وهزت تلفوونها ،مشات لتصاور ..اول وحدة طلعت ليها هي ديالها هي مراد معنقها وكيبوس في راسها ناعسة ....بلاما تردد صيفطتها لعماد وبجرأة كتبات تحتها
" حتى انا كنفكر فيك لدرجة مقدرتش نعرف حتى واحد من وراك"
الحب أقوى من أي إتفاق الجزء الثالث
محتوى القصة
التنقل بين الأجزاء