لأنك سماح الجزء الثالث

2020

محتوى القصة

رواية لأنك سماح

جاوبو فالبلاصة وتكمشات سماح بلاصتها تتكمد فالوجع تاوصلاتها رسالة منو فيها:بونسواغ
قراتو تتعض شفايفها وكتبات ليه:لباس؟؟
جاوبها فالحين:بخير ونتي؟؟
سماح:حمد لله
منصور:راك ليبغ نعيط ليك ولا تي اونكوغ افيك تا فامي
عوجات فمها وكتبات ليه:وي باقي معاهم
كتب ليها :اوا بلا منبرزطك..بونوي.
سماح:يااه هلى بارد..كتبات ليه:بونوي
حطات تيلي بعدما تأكدات انه طلع ليها في..دخلات عليها ضحى تتحيد بينوارها وقالت:شويا؟؟
سماح:(ولات حمرة)شويا وصافي فففف تتمرضني هاد لويلة والله
ضحى:اختي اه صعيبة كون شتي انا اش تتدير ليا 
سماح:صبر وصافي..نهيلة مجاتش
ضحى:(تتفرنس لتيلي)لا اتبات عند صاحبتها
سماح:مزيان..تضحكي تاني معاه داوية؟؟
حطات ضحى تيلي على صدرها وتنهدات راسمة بتسامة حب:اححح اسمااح كون تعرفي الحب. كيداير ههه
سماح:هههه كي داير اختي؟؟
ضحى:(باست قرون صباعها)عسل ههههع
سماح:لعار شنو لي مخليك تضحكي هاكا وتنشطي اش قاليك
ضحى:ههههه اححح هاكي قراي(جبدات ليها لكونفيرساسيون)
شداتو سماح على نيتها تتقرا التالي:ضحى نتي عارفاني تنموت عليك وتنشوفيك المرا لي غنكمل معاها حياتي..راك قلبي وحياتي مبقاتش تتحلى ليا شي بنت المرا من غيرك..تنبغيك

كلما تتقرا كلمة تتخسر سماح كمارتها وضحى حاضياها حابسة ضحكة حشمانة ..لاحت ليها تيلي وقالت:خزييت على كونفيرساسيون تتعصب يععععع عناااب كان كيحسابني البوليس حرشيين هذا عندك رطب 
ضحى:اري اري اش تتعرفي ههه هذا تيسميوه ناس البغو الحب العشق(تكات على كرشها)كنحماق عليه اسماح كنموت فيه
سماح:(جاتها ضحكة)هههههه هبيلة والله هههه وهو تيحبك تاهو بحال هاد طريقة
ضحى:(بثقة)كيموت علي ممخلي مداير علي والله..دعي معانا تدوز هاد العامين دغيا باش ندفعو ضوسي
سماح:الله يسر ليك فلي فيه الخير
ضحى:ههههه راه هو براسو الخير ههه
سماح:لالا نتي تسوطيتي ههههه نوضي تنعسي ولا غتعسيي
ضحى:عندو خدمة بليل نونسوو تال شوي ونعس..فيك نعاس نتي؟؟
سماح:شويا حيت فقت بكري
ضحى:نعسي ازين هه انا شوي ونلحقك
زادت عليها مانطة وتخشات تاهيا هازا تيلي تتهضر معاه وتفرنس مخليا سماح تتقلب على نعاس ويدها على كرشها وطيف منصور معاها ملاحقها



هاد الاخير لي كان تيتعشا مع مو مكتافي بسلااد لا غير فحين مو ضروري ليها طاجين..وكلها وعطاها دواها وطلعها لبيتها انعس..بقا حداها تا نعساات كيحك ليها راسها 
نعسات باس راسها ومشا لبيتو..مع دخلة داز لبلاكار ديالو هز صندوق خشبي صغير منقوش داه لطبيلة زجاجية وجلس تيبرم فجوان بطريقة احترافية وملامحو متشنجين ماتفكو ملامحو تا خدا اول دفعة دخان من جوان عاد رحع راسو للور مكالمي راسوو وشلا مطارق تيضورو فراسوو..فجأة صونا تيليفونو وظن انها سماح لوهلة تا قرا سمية خوه عبد المالك..هز حاجبو وكمل تكيافو خلاه اصوني تا يعيا كتافى فقط انه يسكتو مخليه اصوني تا يعيا
تكرر الاتصال تا دخلو الفضول.عاد شد الخط ونطق بصوت باح:الو
مالك:فين اصاحبي مالك مكتجاوبش
منصور:هانيا؟؟
مالك:حمد لله..عيطت ليك بغيت هي نقوليك ناصر ولد عمنا مات
منصور:(ببرود)الله يرحمو
مالك:اتجي؟؟
منصور:لا ممساليش..
مالك:حشومة صاحبي راه ولد عمنا ايبقا الحال فالواليد
منصور:تصبح على خير
قطع عليه مخنزر وقال كيتمم:ناصر ولا لخرا..عقل علي شي قواد انا
خلا عبد المالك مصدوم وسط دارو تيضور عينيه من باه لخوتو..
عبد العظيم:اش قاليك؟؟
مالك:(زفر بعصبية)مرييض داك بنادم تفووو على عقلية ما يرحمش ..
الحاج :(بصرامة)اش قاليك؟؟
مالك:فففف مجايش خسر علي الله يرحمو ياله الى غتمشييو
الحاج:حياتو كاملة ايبقا مسخووط
الحاجة:خليونا من هاظ الهضرة وياله نشدو طريق نلحقو الجنازة
مشاو كاملين خوتو وعيالاتهم وخلاو ولادهم للخدم..ضروري كلشي يحضر حيت ترباو على حب العائلة وصلة الرحم..عائلتو رغم الفلوس والمكانة لكنها عائلة مغربية مئة بالمئة محافظا على التقاليد المغربية 
اما منصور راه كان تيكمي كارو اخر مستمتع بنغمة نيكوتين فذاتو..تا لجهد الفجر عاد توجه لفراشو مقلوب مخلي كلشي كيما هو..تلاح ففراشو ودغيا داه نعاس حيت عيا وعينيه حرقووه..

مع اشراقة الصباح وعلى صوت المنبه فاقت سماح تتحسس حداها وتتعكز..ناضت بعجر بزز عليها دارت روتينها الصباحي لي فيه الصلاة والغسيل تللوجه والسنان..خرجات بزربة من دار حيت تابعينها الشغال لعرس خوها لي بقا ليه هي ليوم.. قرابة شهر مرت بسرعة عندها..دوزاتها انشغالات بعرس خوها وبالخدمة لي كثارت عليها..
كتنعس خمسة تسوايع واتنوض لشغلها حيت الياس مشغول هو الاخر..
وقفات امام المحل وداخلة مزروبة وتتسول:نورة اللباسي واجدين؟؟
نورة:وي
جلسات فبيروها تتراقب شي اوراق بزربة تاوصلها ميساج حلاتو وتبسمات لانه من منصور كاتب ليها فيه:بون جوغني لالة سماح
جاوباتو تاهي بالصواب وحطات تيلي...طول هاد الايام مكانش بيناتهم لقاء بتاتا..فقط التواصل بالرسائل مفادها سلام لباس بخير صحيحة كيداز نهار وصافي..وفليل بونوي
بجوج بيهم طالقين خيوط هاد المعرفة..هي شاغلة راسها بلخدمة لكن تيتاصل مرة مرة وتيكونو تصالاتهم محدودة بمعنى اخر معطاوش فرصة للقاء او حتى التعمق فتعارفهم
لاهو طلب اشوفها ولا هي قررات تشوفو..لا هو دواها كثر من جوج دقايق ولا هي طالباتو بماكثر
راجعات شي وراق تادخل الياس مزروب وقال:سماح تيسولو فيك فدار بغاوك تمشي تدي معاهم لعروسة للحمام
سماح:اخويا غارقة تالوذنين الى مشيت لمن نخلي الخدمة وعاد انا متنمشيش للحمام تزنقة
الياس:(تيهز فلوس من لاكيص)ضبري راسك عيطي ليهم علميهم
سماح؛وااخا..حط بعدا داكشي نتا هاز ليا كلشي
الياس:خليت ليك جوج تما خدمي بيهم
سماح:بسلتي والله راك طبيتي فكلشي
الياس:(هز فيها حاجبو)نعاام؟؟
سماح:كي سمعتي راه ماخليتي ليا باش نخدم
الياس:(ضحك)تال عرسك ونخليوهم ههههه هادو ماشي للعرس انديبوزيهم فلبانكة
سماح:تا مالي قلت العرس ههه عرفتك اتحطهم فالبانكة
خربق شعرها وزاد خارج:عيطي لمامات يسرا علميها
ضحكات وتواصلات مع مامات يسرا عتاذرات منها بلباقة وربطات الاتصال بمها لي هي الاخرى ممساليااش دار بدات تتعمر عندها بالعائلة ديالها وديال عثمان
زينب:(كتصايب الحلوة فالبلاطوات)ممم
سماح:خاص شي حاجة؟؟
زينب:لالا مخاص والو..شوفي صيفطي ليا شي جوج بنات اعاونو كريمة فشقا..انا محيلتي للناس ولا لماعن 
سماح:واخا واخا كوني هانيا..
زينب:مع ربعة خلطي علينا لدار يسرى كاينا الحنة
سماح:ان شاء الله ياله باي
قطعات معاها وتلهات مع خدمتها وللعرس تخوها لي بغاتو يطلع احسن من كاع الأعراس لي قبل
مهزات راسها تال الخمسة ونص عاد ناضت متعبة وقالت لنورة:زين هاني مشييت خصني مزال نمشي للحنة
نورة:اوك
خرجات هزات موطورها وعيانة مسخسخة بغات هي تنعس..توجهات لدارهم لقاتها تتنغل ها بنت عم مك ها بنت عم باك..ها عمة باك ها خالتو ها بنت بنت خالتو..دوزات ساعة هي فتسلام..مجراتها هي مها لبيتها..
زينب:(لابسة قفطان فالبيج بمضمة خفيفة تذهب وشال فالبيج والوجه مصايب ماكياج خفيف وطالون)فين تعطلتي
سماح:شغل كولو فوق راسي..جات عمتي؟؟
زبنب:(تتجبد ليها ماتلبس)فاطمة زهرا دازت للصالون وعمتك وئام مشا اجيبها باباك من المطار
بتاسمات بفرح:توحشتهاا هههه انا ندوش ونلبس ونمشيو
زينب:لبسي الله يرضي عليك قفيطن ديالك راه دايرين بحال البرزة
سماح:اكون خير
بالفعل خرجات زينب تتقرقب بطالون على مزينها تحلفي عليها خت العريس..وقفات على عائلة عثمان لي مخلطة بعائلتها وجلسات ترحب وتعاود
رقية:(اخت زينب)اختي انا لي مت العريس نتي تتباني ختوو
مليكة:(بنت ختها)لالا ممزوجش هي سي عثمان
زينب:(حشمات)اكني احفظ ربي(الله يخفظكم)مرحبا بيكن انا انمشي للحنة ديال العروسة ياله وجدو تانتوما
كلشي متانع بحجة بغاو ارتاحو باش اكونو واجدين للعرس..اصرات وعاودات لكن كلشي بغا يرتاح خلاتهم فراحتهم
دخلات من الباب وئام ..اخت عثمان لي جايا من اسبانيا رفقة جوج ولادها..كبرات وزيانت..الفصالة مفركعة لابسة دجين مزير عليها مبين ليها ليهونش معاه فوقاني على شكل جبادور مطرزة فالموف وطالقا شعر والوجه مقاد..تلاحت على زينب بتعنيقة ولوخرا كذلك كتعنق فيها حيت مغربة عليهم
باست وليداتها بجوج..ضياء وعمر..
وئام:الله شحال توحشتكم يااربيي(عنقاتها)بزااف
زبنب:تاحنا والله سماح مني دخلات وهي فين عمتي
وئام:فينها فينها المزغوبة نشوفها توحشتها هههه فين فاتي
زينب:الصالون ههه 
وئام:لهلا يبدل ليها طبيعة 
سلمات على كلشي وتنشرات حداهم تتضحك وتسلم موحشة الجموع تالعائلة والمغرب بالاخص..تبدلات ولات واعية ومرزنة وقرات وتعينات مهندسة فالمغرب لكن غادراتو التحاقا بزوجها
دخل عثمان مطلع شوانطها مع شافها فالسيجور نطق:شيفور بااك اناا(شاف فولدها)زيد زيد ابا عمر عاون خالك هه
مشا كيعاونو ويضحك فرحان تاهو عاجبو الحال بالمغرب
خلطات زينب على عثمان لبيتو فين كان تيحيد القاميجة هي شافها هز حاجب وقال:ياك الحاجة؟؟
زينب:مالك؟؟(وقفات قدامو)كي جيت؟؟
تنهد وحك على صدرو وقال:كي بيتي تجي(باسها على غفلة ففمها) معسلة مع رااسك ههه
ضحكات ليه وبعداتو:وياك اتخسر ليا العكر ههه حيد..
وما يموت الا الحب..اما العشق فهو سرمدي

عثمان:(كيدوز عينيه على وجهها)لالا خصني نزيدك فالصداق ههه
مسحات على كتافو بابتسامة عذبة:الله يزيد فعمرك وفراحتك هه هذا هو الفضل عندي
باس يديها من داخل وقال:يخليك لينا ياربي..اتمشيو للحنة؟؟
زينب:واايه انمشي انا وخواتاتك وسماح وخواتيتي
عثمان:والبقية؟؟
زينب:لا ايبقاو مبااوش قاليك مخليين جهد للعرس ههه
عثمان:خير مدارو ههه وسماح فينها؟؟
زينب:تتبدل حوايجها هه انا مشييت(باستو فحنكو)بسلامة اشيباني
ضحك وحرك يدو بتهديد:ها بلاتي راه شيباني ولايني الموتور نحيلة ههه
خرجات تضحك مسرارة وعاد مزادت فزين..كيف لا وهي عايشة مرتاحة ناشطة واليوم عرس ولدها
دقات على سماح لقاتها لبسات قفطان ديالها فالشويبة منبث بالعقيق بطريقة خفيفة مع مضمة تالذهب خفيفة جات مع خصرها المحدود..لابسا طالون زاد طولها وشعرها مفرود على كتافها..كانت نسخة طبق الاصل من زينب..ومعاها وئام بعدما تسالمو وتعانقو فرحانبن
زينب:وادركوو راه مشا الحال..فينو الياس(دوزات نمرتو وخرجات)
وئام:مال هادي ههه زيدي ازين ندير ليك شوي تالماكياج
سماح:واهي شوي متكثريش داكشي خفا زربان
وئام:(جلساتها)دايرا بحال باك معقدة ههه
جلساتها وبدات تتصايب ليها وجهها بمكياج خفيف وناعم لان ملامحها متوسطين الحجم بمعنى ما صغار ماكبار..دارت حلقات ديالها طوال جاو نازلين تال كتافها..خلات شعر مطلوق على راحتو ببوكلي خفيفة طبيعية..
وئام:(تتحيد حوايجها)صلاة على نبي..موالد زين هي عثمان ههه
سماح:(تتشوف راسها فالمراية باعجاب)ههه حلفي اعمتي هه تانتي زوينة
وئام:معلوووم ههه
لبسات وئام هي الاخرى قفطان فالبوردو راقي وصايبات وجهها بماكياج سموكي وخلات الشعر مفرود..فهاد الاثناء هزات سماح تيلي كانت متوقعة شي ميساج منو ساعا والو مالقات والو..وستغربات..دخلات فتفكير مدتو مفايتاش لحظات تا خرجها من سهوتها دخول فاطمة زهراء بكامل اناقتها كيف العادة..الشان والمرشان والزين والثباثة والوقفة والبيوضية..تعانقات هي ووئام بدموووع حيت عام متشاوفووش..لغربة بعداتهم بجوج على بعضهن خاصة فاش توفات مباركة كيحسو براسهم عندهم هي بعضهم لاغير
سماح:(مبتاسمة)لالة فاتي خسرتي الماكياج؟؟
فاتي:(تقابلات مع المراية تتمسح وتقاد)الفرحة ابنيتي(شافت فوئام)فيناهوما ولادك توحشتهم
وئام:موجودين برا هههه
دخلات زينب وقالت:فاطمة تاويل ياله هههه
خرجو متابعين شادين فجلايلهم لقاع دار مكاين هي زين على خوه..لقاو الياس فقاع الدار لابس جبادور فالابيض مع الاسود تيبان عثمان محطوط..كولو هي بااه..مبتاسم وتيسلم على خوالاتو
طلقاتها وئام بتزغريتة زعزعات القنت وتبعاتها فاتي تتصلي على النبي تا كلشي تبعها..وهو فرحان كيعنق فعمتو وئام
جو البيت عامر فرح وفيه احساس العرس..ريحة الطياب مالية المكان والدار عامرة بصغير وكبير ةكلشي فرحان
نزل لي غيمشي للحنة ركبو طنوبيلاتهم ...وغاديين وتيغنييو فالطريق مع الشعبي لي طالق ليهم عثمان والياس والزغاريت منيما دازو تتبعهم للعين
وصلو لمكان اقامة يسرا لي لا يقل شكلا عن دار الياس..تاهوما عندهم اجواء العرس بامتياز
زينب:(لعثمان)فين الدقايقية؟؟
عثمان:(تيصوني على الياس)اداك الكلب فين دقايقية؟؟
الياس:هاهوما جااييين(شاف من لعيد هونضا)هاهو ياله هبطو
هبطو كامليين هازين جلايل وقفو عليهم الدقايقية وبداو كيطبلو واغيثو..واراك لشطيح والرديح رغم انهم قلال لكنهم دارو روعة..خرجات ام العروسة بتكشيطتها هازا مريشات ديال الفضة معمرين بما زهر ومعاها بعض نساء عائلتها فرحانين وتيرشو عليهم وارحبو بيهم وهوما تيشطحو واردحو..اصلا هوما عائلة مسطية وتيعجبهم الغنا والشطيح عساك درووك فاش دارو تريتور..
شطحات سماح مع عادل تاعيات حيت هو هو العروسة..كلشي نشط وشطح عاد دخلو تيرحبو بيهم واعاودو..كانت جليسة فالصالون لكبير لي هاز ناس بزااف ..متوسطاهم يسرا بلباسها الاخضر الملكي المنبث بالذهبي مادا رجليها الحنة فبرزة خضرا تاهيا وقدامها طبيلة تالزاج عليها ثوب ابيض مطرز بالاخضر الطرز الرباطي الحر..محطوط عليه بلاطو فالذهبي كيبري فيه زلافة تالحنة وسطها بيضة مزوقة بالحنة برشمات..اضافة لجوج قوالب تالسكر ملبسين ليهم على شكلهم قالب اخضر نفس لي ملبسينو للبرزة.. وجوج مجيمرات فالجناب لتزين ممشعولينش
نقاشة تتنقش ليسرا لي قلبها تيضرب وعينيها تضببو وسط الستار الذهبي لي مغطي عينيها
تهاتفات الزغاريد وتعاودات وكيصليو على نبي وسط واحد الجليسة تنميمة
الناس فيها الفضول شكون هاديك هاديك ختو هاديك مو هاديك خالتو هاديك فلانة وزيد وزيد..تقدم الياس تيفرنس هز عليها الفوال وباس راسها كانت طبيعية بدون ماكياج..جلس حداها وجلسو تا عائلتو فحين عثمان رجع لور ومشا عند الرجال
فور مادخلو حما الطرح وبداو اللعابات كيضربو واغنيو مكاين هي اسيدي الياس يالالة يسرا وزيد وزيد..تحرج الياس جلس فقط ربع ساعة وناض لتاحق بالرجال فحين العيالات حمات عندهم..

ناضت فاتي تتعلق للعابات وتشطح وتردح جارا معاها وئام خلاو البشار حال فمهم فيهم..ضحى تاهي لا تقل عنهم ركزات تاعيات مرافقة بختها نهيلة..صغيرة فاتي لي عندها خمسة عشر سنة..وكذلك سماح شطحات حقها وجلسات ..اما زينب ضور وتعلق وضور وتشطح
دازت الليلة ولا ارووع حنات فيها يسرا ولبسو ليها ذهبها زرروها ذهب وكبرو بيها كي تيقولو..وحناو معاها البنات بحكم ليلة الحنة
دارت سماح حنينة خفيفة فيديها وتسوخرات اللور 
باختصار دازت ليلة الحنة فجو ملئ بالفرحة والسرور مامشاو من عندهم تال الليل عاد رجعو فحالهم مهدودين..
طريق كلها ووئام وفاتي وضحى شادين نميمة وسماح معاوناهم شو شنو لبسات شكون هاديك وشكون هذااك هه ثقبو لالياس راسو تا ولا تيسخط هه
رجعو لدار لقاو الاغلبية مفرقين ناعسيين والصقيل فالدار كلشها توجه لقنت..وسماح وبنات عمتها بجوج مشااو معاها..حيدات قفطانها ومسحات وجهها توضات وصلات لي فاتها عاد تخشات ففراشها وفرشات ليهم فالارض حيت ناعسة حداها بنت خالتها
هزات تيليفون مجاهاش النعاس..صقيل فدار وتتخربق فتيلي وتشوف تصاور لي تصورات..طاحت عينيها على وحدة لاحتها فسطوري وكتبات عليها:العراسية تايم
ضربات طلة على منصور لقات لا ميساج لا من يديك ولا يخليك..تنهدات حيت ولفات رسائلو ومعرفاتش تفسر سبب ختفاؤو ..
مليكة:(بنت خالتها ناعسة حداها )قن القجداوان نرا انكن(سدي داك المشقوف بغينا ننعسو)
سماح:(ضحكات)كن كن اتاشت(نعسي نعسي الحلوفة)
حطات تيلي وتقلبات تتقلب على نعاس لي مجاها تا بغات تموت..
*****
يوم العرس..كي أذن الفجر ناضت كريمة هي لولة تتوجد الفطور وتطرح المسمن وتوجد فالبطبوط تبعاتها زينب تتعاونها باش القاو مايحطو للعائلة لي غتكب عليهم..مع الثمنية جاو جوج بنات اعاونو كريمة ..مجاتش فين توصل التسعود تاكان الكل فايق ومجموعين فالصالون الكبير والصغير كيتسناو الفطور..ها السمن ها البغرير والزيت العود والزبدة والزيتون ..المربى والعسل الحر..مع كيسان تأتاي مشحرين على حقهم..
فاقت سماح طافجة من صوات بنات خالتها حداها تيدويو على تكاشط..حلات عينيها بانزعاح وقالت:الله يعطيكم العذاب مابقا حد انعس
مليكة:نوضي نوضي
الهام:خليها راه حسابها باقي الحال
سماح:(من تحت المخدة)شحال ساعة؟؟
الهام:العشرة ونص ازين ههه
ناضت طافجة وشعرها شاد ريزو وقالت:شنو؟؟وعلاش مفيقتونييش ففف
دخلات للحمام غسلات وجهها وحكات سنانها بزربة توضات وخرجات تتقلب على باش تصلي وسط كومة تتكاشط لي حاطين ليها تما
سماح:(بعصبية)فين باش كنصلي(تتهز تكاشط)
الهام:(لاحت ليها جلابتها)لبسي هادي صلي بيها الضحى اما الفجر راه دااز
شداتها ومجاوباتهاش صلات وناضت بزربة هزات حوايجها دخلات للحمام بدلات عليها بجلابة فالاصفر ثوبها خفيف نوعا ما..مطرزة من الجنات بالازرق البارد دارت معاها صندالة بلا فالازرق لي مطروز بيه وطلقات شعرها وخرجات هازا بوشيط ونظاراتها وقالت مبتاسمة:نشوفكم فالعرس
الهام:ههه مسطية ههه
خرجات وتتلقا دارهم ولات بحال السوق عامرة ..قلبات على مها تالقلتها وقالت:ماما شوفي انا غنمشي منتلاقاو تالعرس حيت انكون مبرزطة
زينب:جلسيي فطري وسيري!
سماح:مزرووبة والله(باستها فحنكها وخرجات تتدردك فدروج)
باب دارهم مترع على جهدو حيت قدام دار عامر بخوال مها وعمام باها وريحة شحمة فالشاقور..خرجات الموتور ووقفها باها قايل:فين غاديا؟؟
باستو فحنكو وقالت:العرس لي غيمشي ليه هاد قوم هبش راه انا لي غنوقفو هه(شدات فذراعو)
حيد ليها يديها وقال:يععع الحنة سيري ابنتي سيري ههه
هزات الموطور وزادت زافة فالطريق للقاعة لي غيتقام فيها العرس..كانت مكرية بحكم باقي مسهلش عليهم الله اديرو ديالهم..
لقات فريقها تما كي نزلات بدات تتصايب وتقاد تتأكد من البرزة ومن بلاصة الجوق وغيرها وغيرها لدرجة وقفات هي بالبسكوي حيت مبقاش ليها وقت فين تاكل
دارت واجبها كأخت واكثر..ووقفات لخوها على عرسوو..وصلات الربعة ونادات نورة وقالت:انا بنمشي نوجد راسي 
نورة:سيري سيري ميعادنا ليل..
سماح:الى جات رحمة النكافة تكلفي..متخليش شي حاجة تخصها
نورة:اوك
مشات عياانة دوزات اتصال لعمتها فاتي:عمييتو لباس؟؟
فاتي:لباس ازين ونتي؟؟
سماح:بخيير قوليا فين راكي؟؟
فاتي:فداركم
سماح:شوفي نجي عطيني سوارت دارك بنمشي ندوش فيها ونلحق عليكم للصالون
فاتي:وسيري للحمام نيت
سماح:لالا راكي عارفاني متنمشيش الحمام
فاتي:اوا اتبقي ستر ههه جي ونعطيهم ليك
قطعات معاها ودخلات لواتس لقاتو كاتب ليها ردا على تصويرتها:بصحتك
بتاسمات فاش شافتها حيت غبر بزااف عليها مالحقاتش تسول عليه حيت لقاتو مصيفطو ليها بساعتين كتبات ليه هي شكراا
بتاسمات وركبات فموتورها ناسية تعب اليوم بمجرد مجاوبها ورتاحت..غادية وتتفكر فيه وتتحلل ..فشخصيتوو
وصلات لدارهم لقاتها خفات شوي من ناس..شدات ساروت وهزات حوايجها لي غتحتاج جمعاتهم فصاكها..توجهات لدار عمتها غسلات مزيان ولبسات حوايجها وخرجات تاني فاتجاه الصالون لي دارت معاهم فيه..

من بين اكبر الصالونات فمراكش..رجال لي كيصايبو كثر من العيالات..لقات عماتها وبنات فاتي وبنات خالتها وزينب وريحة شحمة فشاقور تيصايبو شي ها الشعر شي ها ظفار شي الميكاب..سلمات على كلشي وصيفتات نهيلة تجيب ليها صاندويتش تاكلو حيت اطيح بجوع تتسنا نوبيتها..لتاهمات داك صاندويتش مجمعة مع ضحى لي تتلصق فظفار
ناداها الكوافير ومشات مبتاسمة حلات شعرها الاسود الطويل سارد كولو وهو ينطق:شعرك زوين زغبة عندك قوية
بتاسمات ليه من المراية وقالت:شكراا..شوف بغيتو بوكلي عفااك متنقص ليا منو والو
رضوان:كوني هانيا
باشر كيصايب ليها شعرها لي خدا ليه وقت حيت طويل والصالون عامر وصوت السوشوار تيتسمع بالاضافة لسخونية ديالو لي خلات حنوكها اتزنكو..كمل ليها وجات لي غتماكي ليها صايبات راسها بتردد ونطقات:عفااك متكثريش ليا بغيت ماكياج خفيف
البنت:واخا اختي..(قاست حجبانها)ضروري نحيد منهم
سماح:(بامتناع)لالا متقيسهمش..معمرني حيدتهم
البنت:ولايني ضروري مغيبانش الماكياج زوين
سماح:(باصرار)لالا مابغيتش هي خليهم طبيعين
البنت:غيجيك ماكياج لا علاقة 
سماح:(قندشات)اوا صافي بلاش
جات نايضا وهي تحبسها البنت وقات:انا هي بيتك تكوني زوينة حيت كلشي لي معاك صايبهم
سماح:(بتودد)اختي راني عمرني صايبتهم ومكنفكرش نصايبهم(قاست بصبيعاتها)حيت زوينين من عند الله
بتاسمات ليها الكوافورة وسايراتها الرأي..خدمات ليها ماكياج ناعم الا فعيونها ركزات عليهم..كملات ليها وقالت:واو جيتي زوينة
سماح:شكرا ازين لهلا يخطيك..
وقفات ومشات عند مها لي تتلصق ضفار:كي جيت؟؟
زينب:(باعجاب)ايهاي على بنت عثمان هههه جيتي على مزويناتك ..عقبال ماتصايبي عروسة
سماح:ههه ياك
جلسات تاهيا حدا مها فالفوتوي بغات تلصق ظفار تتسنا السيدة تكمل لمها..وفجنبها لاخر كانت امل زوجة عبد المالك ران كتقاد ضفرانها مينيكر بديكير..وحداها ختها..ونطقات :ياختي عييت والله..مكنرتاح تكنخرج نفوج
سناء:(اختها)علاش مالك؟؟
امل:اودي زربت احبيبة بزاف والله..زربت على زواج
سناء:(باستغراب)صافا با نو؟؟ماشي نتي لي كنتي ميتة وتاخدي عبد المالك؟؟
امل:(باحباط تتشوف فيها)سي انا ..كنت كنبغيه وباقي كنبغييه ولكن راه ماشي تزوجت بيه بوحدو راني واخدة تا عائلتو
سناء:اوا اش غنقوليك؟؟نتي لي نهار قاليك نعزلو قلتي ليه لا
امل:ففف وزدت زربت بالولادة ديال البنية..تصوري(تتشرح بتعابير وجهها حيت يديها ممسالينش)مابقياش تنلقا وقت لراسي ..ماحيلتي لتربية البنيتة ولا لمالك ولا لتجمعات ديال عائلتهم
سناء:ففف اوا اش غديري؟؟(ضحكات بخفة)هادوك هوما عائلة راان هه
امل:(متذمرة)ففف عائلة البخ وصافي..تيبينو لناس بلي مابيهم والو وهوما المشاكل راكبينهم من ساسهم لرلسهم ففف
سناء:تتهضري على لوسك؟؟شنو سميتو؟؟
امل:شكون فيهم
سناء:داك لي جا زرر غيثة فالاكلينيك
منصور:(بلا مبلاة)ااه منصوور الدين
ضحكات سناء بمياعة وقالت:سميتو بحال شي ملك ههه منصور دين ران
لتاقطات وذن سماح هاد سمية عن غير قصد وهي تحل وذنيها مزيان ملي سمعات سميتو..تعدلات فالجلسة وشافت شكون جالس حداها لقاتها امل..ستعقلاتها من اول نظرة معارتش ختها اهتمام كتافات تسمع فقط
امل:اشمن ملك..هذاك هو لي كيعرف ليهم ممسوقش ليهم ولا لتقاليدهم الحامضة
سناء:هههخ حسن لييه هه
امل:(كملات)راه دروك فلاكلينيك دار اكسيدون هادي سيمانة ..
حلات سماح عينيها على جهدهم 
وسرطات ريق وبدون متحس طلقات وذنيها تتفرك فيديها لي تعرقو..نتابها شعور فشكل وتضاربو افكارها فانتظار امل تنطق..
سناء:سي فغي(بحزن)كي وقع ليه؟؟
امل:منعرف ليه..مهم دار اكسيدون وراه فلوبيطال..بوغ موا معندي بيه تا علاقة مي كيبقا لوسي
سناء:اوا ياله نشوفوه فالوبيطال حشوومة
امل:(شافت فيها بسخرية)نتي شويا لباس؟؟لاش انمشيو عندو؟؟كاع معارفني واش كاينا فففف نساي علي عفاك هاد المواضيع راني هاربة منهم
سناء:مممم..اوا اجي نقوليك..منسافروش شي ايام
قلبو الهضرة على نحو اخر مخليين سماح جالسة فوف المجمر..ضرها راسها وتخربقو افكارها لدرجة مها تدوي معاها وهي محاساش بشنو تتقول..اكسيدون كيفاش وامتا وياك سيمانة وهوما تيدويو ومقال ليها والو
حكات جبهتها بقرون صباعها تتفكر وتشوف فاص ليها..تانغزاتها زينب وقالت:افين سهيتي؟؟
سماح:هااا والو..(تقلب فجنابها)ماما فينها بوشيط ديالي؟؟
زينب:هاهيا وراياا(تجعدات شوي)
هزاتها بالخف تتقلب على تيلي هي لقاتو وقفات وقالت:خصني نهضر دروك نرجع
حركات ليها زينب راسها فحين الاخرى خرجات من عجقة الصالون لي فيه شلا حكايات تتروى..الطبيب النفسي للمرأة هو الصالون والحمام تقدر تعاود فيه كلشيي وتخرج مرتاحة 
خرجات برا تتفتن بالزين..بعيون مجبدة بخط رقيق وشفار رقاق ملصقاهم تيبانو طبيعين عاد لغوج اليفغ البارد..وجليليبة تشوفها تهرب بسها..زينها عادي ماشي شي حاجة واو لكن نادر
تنفشات وتيلي فيديها عراق تعيط ولا لا..الى عيطات شنو تقول والى معيطاتش ايضرها راسها..فالاخير كانو صبعانها كيدوزو نمرتو..

فالاخير كانو صبعانها كيدوزو نمرتو..منصور
حطات تيلي فوذنها بضع رنات متزامنين مع دقات قلبها..شي اسبوع مسمعات صوتو القوي..
تسمع صوتو فالهاتف:الو
سماح:الوو..منصور؟؟
منصور:وي سماح صافا؟؟
سماح:حمد لله ونتا بخير؟؟
منصور:وي تخي بيان
سرطات ريقها وبقا الصمت بينهم كتسمع حداه تخرشيش وهي تنطق؛درتي كسيدة ياك؟؟
سكت لثواني وقال ببرود:وي..منين عرفتي؟؟
سماح:علاش ماقلتيهاش ليا
منصور:(ببرود)علاش خصني نقولها ليك؟؟
سماح:(بصدمة من جوابو)يااك؟
منصور:(رسم بتسامة شفافة)كنضحك معاك..سينو نتي مزيان؟؟امورك بخير
سماح:خليك مني انا..نتا لي واش لبااس؟؟كي وقع ليك؟؟مهرس ولا شنو؟؟
منصور:(تأمل اسئلتها المتوالية)كسيدة وصافي..الحمد لله مطارا والو
سماح:فين كاين دروك؟
منصور:فلاكلينيك
سماح:اشمن كلينيك؟؟نجي عندك؟؟
منصور:كلينيك ****. سي باكغاف غدا انخرج
سماح:انا نجي عندك
منصور:(بحدة)نووو..خليك كملي العرس ديالك
سماح:باش عرفتي عندك العرس؟؟
منصور:ستاتي ديالك..ونتي باش عرفتي انا فلاكلينيك؟؟
سماح:(دارت بتسامة خفيفة خجولة)سر المهنة هه
تبسم هو الاخر وقال:واخا الالة..ياله جوتوليس..بونجوغني ومغسي على الابيل
لتاغات بتسامتها فور ماقال جملتو وقالت:الله يجيب الشفاء
ردد فوذنها امين بصوت باح وقطع..بقات شحال تتشوف فالتيليفون وتتسول راسها واش هذا شويا لباس مالو على هاد الغرور
زفرات وحطات يديها على صدرها تتاخد نفس براحة كأنها كانت فسباق فمكالمتو
رجعات من جديد للصالون وتصادفات مع امل واقفة وشافتها..هاد الاخيرة ميمكنش متعقلش عليها خدمات معاها جوج مرات..عطاتها بتسامة وسلمات عليها بود وقالت :صافا أ سماح؟؟
سماح:حمد لله ونتي؟؟كي راها البنية؟؟
امل:مزيان..شنو كديري هنا؟؟ياكما نتي العروسة
سماح:ههه لالا عرس خويا
امل:الله يكمل بالخير..ساعة سعيدة
سماح:امين..بوسي ليا البنية
امل:مغسيي
مشات تخلص لي عليها فحين سماح رجعات لبلاصتها حدا مها لي لاحظات ان ملامحها تبدلو كانت سالات ضفارها وقالت:دوزي صايبي نتي مبقاش وقت بزااف..فينو قفطانك؟؟
سماح:هااا(مدات يديها للكوافير)فالقاعة انلبس تما
زينب:(بهدوء)مالك ابنتي؟؟
سماح:والو اماما هي عييت
زينب:ملي يسالي العرس انجلسو ونهضرو بحال شحال هادي وعاودي ليا مالك(غمزاتها)اوك
سماح:واخا
سهات تاني فظفارها تتسناهم اكملو ليها..دارو ليها ضفيرات لوزة وقصروهم ليها مصبوغين بالبوردو..كانت شبه مرفوعة لولا قدوم ضحى ونهيلة للحداها تيهضرو وشاركاتهم الهضرة تاتناسات شوي
السبعة تالعشية كلشي سالا خرجو ناضيين مقادين مصايبين وحدة تنسيك فاللوخرا..لقاو عثمان وحميد وشي رجال العائلة جاو اديوهم للقاعة ديركت تما فين غيلبسو
طلعات زينب حدا عثمان وسماح وضحى ونهيلة ووئام لور
ديمارا عثمان وشاف فزينب وقال بابتسامة:شهادشي امدام؟؟
زينب:(بتاسمات)حلقنا على الحالة شوي
عثنمان:واحلقتووو نيييت(ضار شاف لي لوور)تعريجة تنسييك فلوخرااا
وئام:هههه وشنو بيتسنا نمشيو صفرات لعرس ولدك ههه
عثمان:(شاف ضفار زينب)لاش ملصقة داك العجب؟؟(عقد حجبانو)
زينب:اوا العرس هذا اعثمان!!!شنو الحنة مخليتينش نحني فعرس ولدي وتا ضفار
عثمان:نتي راه ميصلاحش ليك الواحد اطلق ليك اللعب تديري لي فراسك وتمشي للهلاك
زينب:دابا هادو هلاك(تتوريه يديها)شوف شحال زوينين 
عثمان:(حرك راسو)كي تاوع جنياات عععع
زينب:(دارت فيها غضبانة)فففف بااز شفتيني هي بوحدي..كلشي دايرهم
وقف فسطوب وتلفت للطعارج لقاهم لعلك ترضى ..ضحك وقال:تبارك الله على طعارج لي والد ههه
سماح:انا ابابا درتهم قصار ودغيا ايتحيدو ههه
وئام:شوف اخويا داك الحكام الخاوي تهنيت منو نهار تزوجت ههه 
عثمان:اييه ليماك تزوجتي وتفلستي(طول يدو قرسها فرجليها)
وئام:(جرات رجليها تضحك)هههههه زكاا ازمر هههه دابا ازينب عثمان راه حكم فيا وصافي وحكم فسماح دابا نتي لي غتبقاي لييه
زينب:هههه شي نهار نعلم بييه هههه
نهيلة:خالو راه طاطي شرفات بلا متخاف مكاين لي يديها ليك
ضحك وقال:انا لي عارفها واش شرفات ولا لا..
حبسات وئام وضحى الضحكة اما تا سماح ونهيلة مفاهمين والو فحين زينب ضرباتو لكتفو بخجل:تتكبر وتتفلس 
وئام:هههه وبراكا من نكير راه حنا غاديين للعرس..طلق طلق لينا شي شعبي 
عثمان:(مد ليها تيلي ديالو)هاكي اختي ديري بيتي ران مبرونشي
شداتو ودارت اغنية الهدية واراك الشعبي والصداع والزغارييت والضرب وئام فيها دودة تشطيح ههه تتحرك بلاصتها 
موصلو العرس تا حيحو وباقي العاطي يعطي
نزلو من جيهة باب لوراني ديال القاعة وتوجهو للبيت لي وجداتو ليهم سماح البسة فيه..فحين هي مشات تفقد الاوضاع..شافت العروسة والنكافة واش مخصهم والو ..ومشات عند الجوق وكذلك الاكل كلشي تفقداتو ..كان كلشي لابس واجد الا هي..طلعات كع دروج للفوق تلاقات عشيرها عادل ..لي ضحك وقال:شهاد زواق تاني
سماح:ديها فرااسك(شافتو بالكوستيم)هههههه ويلي تتبان عريس
فرنس ليها وسد صدافي تلافيسط وقال:معلوم انا صيف جاي من غير هذا نبرز 

سماح:هههههه دفل علي لا لقيتي لي تقبل عليك هههه
جمع دفلة ففمو وقال :اري ندفل عليك دروك نييت ههه حيت انتزوج
سماح:(خبات وجهها)عععع تفووو عليك حيد علي خليني نمشي نبدل..
عادل:سيري انا نتسناك 
دخلات لبيت لي خوا وبدلات عليها لبسات قفطان فالموبرا فالبوردو جاي طاي حوتة..واتاها وزاد زينها كثر..
علامات الجمال المغربي فيها:الطولة..الشعر والشامة..غير هي بلاصة الشامة عندها وحمة فوق عينيها ديال الفريز جات فالجفون تتبان بحالا هي حمورية عادية..سدات سمطة بصعوبة عاد لبسات طالون هزات بوشيط ودارت اكسسواراتها القلال عبارة عن سلسلة خفيفة تذهب وحوالقها وكذلك كورميطها جات ساحرة بالبساطة ديالها..خرجات وشدات فعادل لي قال:واختي طرتي تاعييتي والو واش زيانيتي
ضحكات عارفاه العكس وهو هاكا تيضحك معاها..تيطلعها عليها وصافي
دخلو للقاعة لي فيها العرس وعامرة بمعارفهم وعائلتهم..كان من بعيد تيبان طاهور تيغني لدخلة تالميدة..طاهور لي جابتو بستة وستين كشييفة حيت مشغول..كلشي واقف بلاصتو تيشطح بالخف حيت باقي هي دخلة..مشات لتاحقات بعائلتها لي فطبلة وحدة كبيرة..
كان عرس زوين بزاف شطحو فيه وردحوو تا ماباقي قدو..دارت سماح حقها لاغير حيت كانت تقريبا مشغولة..تتجلس شوي وتطل على الأمور كيف هي..
فاللبسة تالصحراء ناضو العويتقات لبسو مع العروسة الملحفة ودارو عكر قهوي منهم سماح نيت وشطحو على الانغام الصحراوية وكذلك فالشلحة لي مسلماتش منهم..ولان عائلة زينب شلوح وكذلك يسرا كلشي نايض تيشطح ولبسو معاهم اللبسة تالشلحة..اما الياس راه تيحرك كتافو واعاود مكاين هي افووس
داز عرس ولا اروع باللباس ديال كل منطقة..مسالاو تال الستة تصباح مهدودين..تفرق المجمع وجابو معاهم العروسة لي لقات استقبال زوين فدار الياس هالحليب ها تمر ها زغاريت..داوها لبيتهم ارتاحو وكلها تفرق لقنت ..
سماح هي الاخرى حيدات دوك شفار لي ثقلو عليها..ديماكيات وجهها وحيدات ماتبقى من المجوهرات عاد توضات صلات الفجر والدار باقي تتنغل..خمسة تطواليطات فدار وتاحد مالقى فين يبول
تخشات فالارض حدا نهيلة حيت ضحى ستعمرات بلاصتها وتنشرات فيها..ونعسووو بكثرة العياا..مي قبل دارت تيلي على التسعود

وبحرا حطات راسها كان التيلي صونا وصدعها ..طفاتو ورجعات غفات شوي وعاودات ناضت حيت سمعات الحركة فدار..
باقي مشابعاش نعاس وراسها تيزدح بشقيقة على جهد..ومغوبشة..دخلات لحمام غسلات وجهها وسنانها وتيبانو ليها ضفار باقي لاصقين خسرات سيفتها وقالت:منحكل بابا ضفار تاوع جنيات..
شافت فلي ناعس تييانو ليها كي زومبي..هزات تيلي صوراتهم وجرات جلابتها لبساتها فلول اخضر مخزانية دارت صنيديلة فرجليها وخرجات لبرا فين كانت غالا غالا..كلشي فايق قولي مكانوش فالعرس بايتين اركزو..
دخلات لكوزينة لقات زينب واقفة هي وكريمة تيعمرو فبرارد اتاي باستهم بجوج وقالت:العميمرات ديالي
كريمة:اهلا المعجازة دوزي ديري ديك طابلية وزيدي تعمري واحد ربعة تالبرارد
سماح:وتقول ههه مزروبة عندي غرض نكملو ونجي نعاونكم
زينب:اشمن غرض هذاا اسماح؟؟فطور خوك اليوووم
سماح:(سبلات عينها)ساعة وهاني هنا والله
زينب:متعطلييش ايسول باباك مالقا منقوليه
كريمة:انا بعدا نقوليه مشات تشوف صاحبها هههههه
سماح:الله يمسخك هههه ياله بسلامة..اه كرييمة جااتك الحنة زااز
كريمة:تا سيمحمد عجباتو هههه
زينب:ههههه قهرتيني بسمحمد ديالك هههه
مشات سماح بزربة قبل ليتلاقاها شي حد..هزات موتور اخر ديال ولد خالتها وشداتها عفطة وحدة لكلينيك فين نازل منصور على امل تلقاه ماخرجش
كي نزلات باركاتو بعيد عند الكارديان ودخلات لكلينيك ديركت الاستقبال
سماح:(بابتسامة)صباح الخير
..صباح الخير الالة..
سماح:عفاك فين نازل منصور ران
شافت فالبيسي ديالها وقالت:ايطاج 3 لاشومبغ 45
بتاسمات ليها وقالت:ياك باقي مخرجش؟؟
..:نوو
بتاسمات بسعادة ومشات كي شي فراشة للاسانسور ديركت للطابق كي وقف خرجات تتقلب بعينيها على الغرفة بحماس متشوقة تشوفو..هي وقع نظرها على 45 تلاشى حماسها ورجع بلاصتو توتر..حمحمات وحكات يديها ودقات قلبها كتصارع..تنهدات وشتغفرات الله وحلات الباب بشوية تترعد مدخلة راسها تيبان ليها كولوار صغير كيفصلها على السرير..دخلات بخطوات صغيرة بحالها وتترقب شنو تشوف..تا طاحت عينيها عليه ممدد فالفراش ومتكي.. ظهرو على المخدة..لابس سورفيت بيتية فالرمادي على غير عادتو..لكن ماشي بوحدو كان معاه خوه عبد الفتاح..لي تاهو تلفت ملي سمع الباب تحل..سرطات ريقها وتوترات فاش شافو فيها بجوج..وتزنكات وتسرط ليها لسان اش تقول وشنو هي
اما منصور دار بتسامة مختفية مكانش متوقع زيارتها بتاتا..طلعها ونزلها بجلابة كي جاتها ويديها لي فيهم الحنة وشعير لي مطلوق لور مسبسب ..نطقات بعدها بصعوبة:السلام وعليكم
عبد الفتاح:وعليكم السلام
منصور:اهلا
تقدمات عندهم شوية فاش ردو عليها السلام ومالقات متقول وهو يسبقها منصورنطق موجه لهضرة لفتاح:فتاح تقدر تمشي دابا..

عبد الفتاح:(هز فيه حاجبو)مخاصك والو..
حرك راسو بلا ورجع ادراجو لور هي عطاهم بضهر دار بتسامة وخرج مخليهم راس فراس
طلعها ونزلها وحرك راسو باهتمام:صافا؟؟
قربات ناحيتو تاوقفات حداه وقالت:حم حمد لله(كان باين عليها متوترة)نتا كيبقيتي؟؟
منصور:(شير ليها بعينيه لرجليه لي فيها بانضة)هانتي شفتي 
سماح:(شافت فرجليه لي فيها بانضة تيبانو سميمرين ومزغبين من الصباع )حم..تقسحتي..ياك هي فدع ماشي هرس
منصور:ماشي شي حاجة..ايام وتولي مزيانة
سماح:حم الله يشافيك
منصور:امين..نتي شنو جيتي ديري هنا؟؟
صدمها سؤالو زعما راه باينا جات عندو وهو تيسولها..مصر احرجها..معجبهاش سؤالو ومبغاتش تبين هتمامها بيه ونطقات بثقة:كان عندي كونترول عند طبيب(حطات يديها على نيوفها تا شاف الضفار)ديالي ..فهاد لاكلينيك فين درت العملية
هز حجبانو بمعنى غلبتيني..ضرب بيديه على سرير وقال:جلسي
قربات شوي وجلسات تتشوف فيه بتوتر وقالت:بقيتي مزيان؟؟
منصور:راه قلت ليك الحمد لله..مزيان 
سماح:(حكات شعرها من توتر)حممم
منصور:(حس براسو جقر عليها)كيداز العرس؟؟
سماح:زويين(بابتسامة)
منصور:ديال خوك يااك؟؟
حركان راسها بالايجاب تتهز القصيصة لي على عينيها:اه ديالو..
منصور:(بمزح)ماعرضيتش عليا؟؟
سماح:ههه قلت محال تجي اما نعرض عليك
منصور:نتي كنت كندوي معاك كل نهار ومقلتيش ليا كنوجد لعرس خويا
سماح:(بتحدي دايرة بتسامة مجبدة ليها عويناتها لي باقي منفوخين بالنعاس)ههه تانتا كنتي داير كسيدة ومقلتي ليا والو(بمزح)نجيب ليك هي دانون هه وبنان
بين على سنانو المستفين بضحيكة وقال:ههههه ومالك مجبتيهمش ليوم ههه لقيتي المارشي ساد ولا؟؟
ضحكات وحاطا يديها على فمها بصوت رقيق طفولي وقالت:هههه نتا ماديالش البنان 
منصور:وديالاش انا الالة ههه
سماح(وقفات)ديال قهيوة ههه انا نهبط لتحت ناخد ليا قهوة نحل بيها عيني ونجيب ليك معايا
بتاسم ليها وقال:احسن حاجة هه سيري
بتاسمات ليه ومشات من حداه عاطياه بظهر تاتعض على شفايفها من شدة الخجل والابتسامة تتفلت ليها..هي سدات الباب وهي تفرنس كي الحمقة قربات تنقز..
كتعيش احساس جديد..احساس تقربها من راجل غامض وكولو غمووض
حطات يديها على قلبها وقالت فخاطرها:ناري غيسكت
فحين هو بتاسم وعجبو جيست انها جات لعندو حيت معمر شي حد جا لعندو فهاد سيمانة بحكم تاحد معارف راه دار اكسيدون
اما هي نزلات كي الفراشة لتحت الكافيتيريا خدات جوج قهوة..معرفاتش كيفاش كيشرب قهوتو..واش بلا سكر ولا حلوة ولا نص سكر..واش حارة ولا بين وبين
خدات ليه قاسحة معاها وتمات طالعا هازاهم فيديها والبوشيط تحت باطها بحذر..لقات الباب شبه محلول سهل عليها المأمورية ..دخلات لقات الممرضة تتصايب ليه رجليه على المخدة باش تبقا مرفوعة بتاسمات ليهم وخرجات فحين هي تقدمات مبتاسمة بخجل عندو ونظراتو كيوثروها..مدات ليه قهوتو وشدها من عندها بجوج يدين ...لامس يديها بغفلة منها..دوك ليديات الصغار لي حمرين بسخونية القهوة..جاتها الرعدة والقفقافة من لمستو لي متوقعاتهاش..فتحات فهوة فمها ببعض السنتيمرات مصدومة فحين هو قرب يديها لعند فمو وستنشق ريحة القهوة من يديها عاد شد الكاس بلطف..بقات مصدومة تتشوف فيه تاجغم وهو ينطق مخرجها من صدمتها:قاسحة معندي منقول
سرطات ريقها وقالت:ها هي قدرت وصافي..(حكات عنقها بديها لي شاد كأنها كتبعد عليها التوتر)بصحتك
جغمات تاهيا من القهوة عاد هنى بالها..عندها القهوة بحال اول دخان كياخدو المدخن بعد يوم صيام
لاحظ نسجامها مع القهوى ونطق:ممزياناش ليك الفهوة
سماح:(شافت فيه)علاش هه
منصور:بنت بحالك تشربها
هزات حاحبها وقالت:كيفاش بحالي هه
منصوى:زوينة بحالك(بجرأة)بهاد الانوثة كاملة 
تزنكات ومشات الضحيكة تخرج ليها لكن كتماتها وقالت ليه:هههه هي شوي وصافي هههه(حكات راسها بتوتر)قوليا فينهم عائلتك شت ماعندك حد..
على إثر هاد الهضرة تلغات ديك الابتسامة الخفيفة لي على وجهو وجات بلاصتها البرود..لاحظات هي شنو تبدل فوجهو كيف لا وهي حاضياه..حك لحيتو بيديه وقال:داك لي شفتي قبيل خويا
سماح:هه بصح..مكيشبهش ليك..نتا الكبير
حرك راسو بالايجاب وجغم من قهوتو والصمت طاغي..كتافات تشرب قهوتها بدون متدوي تدور عينيها على البيت فحين هو كان مكالمي هي تيشوف وصافي..كسرات الصمت وقالت:امتا غتخرج؟؟
منصور:غدا
سماح:على سلامتك..مقلتيش ليا كي وقع ليك؟؟

 فلاش باك

كان جاي مع ثلاثة تليل سايق وعقلو ممعاهش..كامي جوج جوانات وضارب سطيرات وزايدها بشوي تشراب يعني جايب الكاو..سايق فطريق المؤدية لدارو والزدحة فطونوبيلتو بفوضيل..ودخاخن مغطيين المكان..محس براسو تانحارف على طريق ودخل فشجرة ..ومكتافاش بهادشي نزل مدوخ وراسو حارق بعدما تأكد انه معندو والو..خرج لشانطي ادير اوطو سطوب لكنو مكانش فوعيو غادي.جاي ومع الظلام دخل فيه مول طونوبيل وتوعت فرجليه

نهاية الفلاش باك


منصور:هي كسيدة عادية
سماح:منيمتا ونتا فسبيطار؟؟
منصور:سيمانا(ببرود)
سماح:(بعفوية)حرام عليك كون هي قلتيها ليا نجي نشوفك
شاف فيها ساهي ونطق جملتو لي خلات الحمورية تطلع فحنوكها:اوا المرة جايا الكسيدة جايا نعلمك على تيسااع هه
سماح:(تنكرات وتزنكات لكن ماشي من الخجل)أاا..سمح لي..
وقفات حطات القهوة فوق الطابل لي حداه منزاعجة ولاحظ هادشي من ملامحها..هزات ساكها ونطقات بدون متشوف فيه:ميكون بااس
بغات تمشي تمدد شوي جرها من يديها بزربة تاشهقات:هييه
منصور:(حقق شوفة فوجهها وتيضور عينيه من عينيها لحجبانها طبيعين لديك الخلفة لي فالقدام تشعرها للوحمة لي فوق عينيها حمرة للخالة لي عندها فعنقها..كان قريب منها لدرجة زيرات على بولة بزز..تزنكات وصدمها بتصرفو الجرئ..نطرات يديها بتوتر وقالت:شنوو
بعد وجهو عليها مخلي ليها مسافة فين ترتاح وقال:تقلقتي؟؟
سماح:حممم لا(مسحات على عنقها)خليت ليك الراحة(عينيها فالارض)
منصور:نتسناك غدا فالصباح؟؟
هزات فيه عينيها كأنها كتحاول تفهم شنو قال..واش تيسولها ولا تيطلبها ولا تيطنز..لكن ملامحو كانت جدية ونطقات:بيتيني نجي عندك؟؟
منصور:(بسخرية)الى بغيتي تدي الاجر
سماح:(تعصبات لكن مبيناتش)علاش نتا مستفز ففف متقدرش تقول هادشي بلا طنز
منصور:انا؟؟(حط يدو على صدرو)حاشا بالعكس(مد يدو ليها)قربي
شافت فيديه الممدودة مخنزرة وقربات بلا متشد فيه..رضات ليه القمعة قمعتين..كمدها وجمع يديه وقال:عجبني الحال فاش جيتي عندي..جي غدا نشوفك قبل مانخرج
سماح:(كانت حانية راسها تتشوف فاليزار باش مغطي وتتسمع فكلامو عاقدة لحضاش)ان شاء الله..مخصك والو(هزات فيه عينيها لقاتو تيشوف فيها بنظرة تذوب لحجر..نظرة بحال العافية هي تحطي عليها الزبدة تدوب توترات)حم
منصور:لاا..سيري منشدكش اتعطلي على داركم
سماح:(تنهدات)ممم عييانة مشابعاش نعاس وخصني نمشي لدار جايبين فطور العروسة
هز حاجبو بعدم فهم وهي تنطق ناشرة بتسامة على وجهها كأنما ماشي هي لي عاد كانت مغوبشة:هه مرات خويا ايجيبو ليها الفطور هه مالك معمركم ديتو الفطور(بفضول)فايت حاضر لشي عرس تالعروسة
حرك راسو بملل بلا ونطق:سيري دابا..بغيتي اوصلك شيفور ديالي؟؟
وها قمعة اخرى لغى ليها اسئلتها من الوجود قبل ماتاخد جوابها..كانت قاصدة بسؤالها انها تمدد معاه الحديث لكنو لغاه دغيا شي لي خلاها تحرج..سرطات ريق وقالت:لا شكراا بسلامة
دارت خارجة مزيرة على لبوشيط ونطق:انتسناك غدا 
حركات راسها بالايجاب وخرجات مكسورة نوعا ما وفرحانة نوعا ما..معرفاتش تفسر هاد الاحساس لي تتحس بيه من جيهتو..غامض وغموضو بغاتو اروي عطش فضولها.. خدات موتورها وتوجهات للدار مرفوعة وصافي تتفكر وتحلل..وصلات لقات قدام دار عامر بالبراهش وبالرجال..حطات الموتور وطلعات للفوف لقات عماتها جاو وولادهم مجموعين فسيجور على صينية تااتاي وحليوات هازين طعارج دايرين بالعروسة لي حشمانة ..سلمات على كلشي بحب كتفرح ملي كتشوف دار عامرة ..خلاتهم فغناهم ومشات للبيت بدلات عليها بقفطان خفيف ورجعات عند مها للكوزينة لقاتها هي وكريمة وضحى ونهيلة تيصايبو الماكلة فطباسل طاوس
سماح:فاش نعاونكم؟؟
كريمة:(كدير زنجلان فوف اللحم)الله يغصبك عاد جايا ديك ساعا باتي عندو تا نتبعو ليكم الفطور هههه
سماح:ههههه باااز(بانو ليها الماعن كثاار فالالفابو)انانغسل هادو..باقي مجاوش؟؟
زينب:ممم باقي..دغيا ابنتي دغياا
مشات سماح بزربة حيدات حوايجها وعينيها على بيتها لي مرون حوايج بنات خالتها وعماتها مشتتين تما وليفاليز تاعهم..لبسات كندورة فالاسود مخيطة بالموف خطيرة حد الكعبة طويلة وعريضة بثوب سخون شوي..جمعات شعرها كوتشوفال وخرجات تحزمات لدوك الماعن غسل ياما تغسل ..تغسل طاشمة وتستف وتجي طاشمة خرا..هادو عاد كملو اتاي ولوخرين ياله كلاو ها لوخرين عاد بيغسلو وزيد وزيد..لكنه لافرق عندها حيت عقلها ساهي معرفاتش تا كي دارت تا سالاتهم..كتفكر فمنصور
هاد الراجل لي داير كي الخيط الاسود فالظلام..متقدرش تميز لونو وتا الى قدرتي مغتعرفوش واش رقيق ولا غليض..غامض لدرحة اثار فضولها واثار شخصيتها لي قليل فين كتنجادب لشي حد..مسحات يديها واخيرا ولقات ضفار باقي لاصقين وهي تدخل مها بزربة مبدلة عليها تتهز صينية فيها المريشات تما زهر وتمر والحليب وقالت:سماح زيدي ياله جاو نسابنا
بتاسمات ليها وحيدات طابلية وتبعات مها تيبان ليها كلشي تيتسالم ودار العروسة محملين بالهدايا وحوايج بنتهم..سلمات على كلشي وتاعلى عادل لي شد فيها مزيان واصرفق فيها بشوي تيضحك..
جلسو الناس فالصالون واتاي كيتفرق عليهم..الرجال وحدهم ونسا بوحدهم..عاونهم عادل فتسرباية...هو هاز اتاي وعثمان هاز الحلوى وكيفرقو والعيالات كذلك مقسمين شغل بيناتهم..جابو العروسة لعند عائلتها حشمانة ولابسة كلشي بيض و فرحانة بيهم..
السرور والبهجة لي كيدخلوها العراسات على قلوب العائلة مكايناش فشي بلاصة من غير المغرب

تشغلات سماح شويا وتناسات منصور لي سكن تفكيرها بغموضو..بقات تغني وتشطح مع النسا فرحانين تال اشمن وقت..سرباو العشا مع ثمنية كلاو ناس وشربو ومن بعد غادرو بالدموع مفارقين مع بنتهم..
كلشي خرح بقات هي مامات يسرا وعادل خوها..تتدمع فصمت..
عنقاتها زينب وقالت بهدوء:بنتك فالحفض والصون..اتكون بحال سماح بنتي وكثر
فاطمة:(تتمسح دموعها)عارفا لي كاين الالة زينب هي راكي عارفا دار البنات فاش كتخوا
سماح:(بمزح)زوجي اخالتي عادل ههه اعمر عليك دار
لقفها بدقة لوجها وقال:سيري تنعسي سيري هههههه
زينب:هههههه عندها صح هههه
جا الياس موراهم:واييه ابا عادل نزوجووك سماح
عادل وسماح تكرشخو بضحك:ههههههههههه
عادل:اويلي شكون هذا لي بيدي هادي هههه
سماح:هههههه عور واقلة ههه
الياس:وههههه لاهيلاااا
فاطمة:مالها ناقصاها يد ولا رجل..والله كون معرفتك حاسبها بحال ختك تانخطبها ليك
عادل جر مو مطمر حابس الضحة:زيدي افاطمة عند راجلك هه زيدي زيدي الى زوجتيني صرفي عليها نتي
خرجات تضرب فيه وتضحك معاه وبقاو واقفين تيودعوهم..ركبات فاطمة مع راجلها اب يسرا ومشا عادل اهز موتورو تا عيطات ليه سماح..شير ليها بيديه زعما مالكي ومشات عندو..كي وقفات عليه حط يديه على لكيدون ونطق جملتو المعتادة:مالكي؟؟
سماح:(تتشوف فيه بين قصيصتها)ابعدا دغيا تتقشعني
زاد تيضحك وقال:انا راه قارييك وحافضك وعاجنك ههه مالك..قشعتك قبيل مي محكركتش
سماح:خصني نهضر معاك ضروري
عادل:ياله نتحركو شي بلاصة؟؟
سماح:لالا دار عامرة نعاود ليك هي هناا
عادل:واخا..سيري جيبي دوك جوج كراسا واجي عاودي ليا 
مشات طايرة جابت جوج شليات(كراسا قهوين)..شدو قنت حدا الحيط كان تقريبا كلشي مشاا
عادل:(تيلعب بسوارت الموتور )ياله طلقي المزويدة
سماح:(متوترة)ولايني حلف(هزات ليه صبعها)متضحك
زاد تيضحك وقال:هي عاودي هههه منضمنش لييك هههه
سماح:ههههه نتا حماار ههه
عادل:واا دوي 
تنهدات وشافت قدامها وبدات كتعاود ليه وتسرسر ليه وهو كيسمع ليها بكل اهتمام..عاطيها وقتها مزياان تاعاودات ليه كلشي بتفاصيل..عاد شافا فيه ونطقات:اش بان ليك؟؟
لقاتو حابس ضحكة مجاش فين تسكت تاطلقها بجهد كيضرب ففخضوو واعاود وهي تبدا تضحك وتضرب ليه فكتافو وفوجهو تيحاول ابعدها وميت بضحك ..بحرا ماسكت وهو ينطق:بربي تا جاتك الزملة؟؟
غوبشاات وناضت واقفة وقالت:تفووو على حماار
بغات تمشي جرها كيضحك عليها وهي مغوبشا وقال:دابا واش من نيتك؟؟من نيتك 
سماح:(تغرغرو عينيها)واش نتا عشيري ولا عدويا؟؟
عادل(بجدية)هاهيا بتبدا تدمع وبنضرب مها
سماح:(مسحات دمعتها دغيا)
عادل:شوفي اول حاجة درتيها ومعجباتنيش انك خبيتي علي؟؟منيمتا اسماح تتخبي علي بحال هادشي
سماح(بنظرة ندم)مدازش عليه بزاف ياله وقع
عادل:الحزقة لحزقتيها تتعاوديها لياا
سماح:فففف دابا صافي دوي اش بان ليك
عادل:(بجدية جمع الضحكة)جوج كلمات منفوتهمومش ليك..داك خينا ميصلاحش ليك
سماح:(صدمها جوابو)علاااش؟؟
عادل؛على مولاه..سماح بعدي من القلاوي قبل ماطيحي فيه وتصدقي تاني معذبة..هذاك انا لي راجل منقدرش نتعاشر معاه عساك نتي..
سماح:هانتا شوف هو راه فيه حوايج خايبين ولكن فيه تا حوايج زوينين
عادل:(باصرار)يكونو فيه تا حوايح مخريين..سمعيني وفهميني..هذااك ميصلاحش ليك هادي واحد..شخصيتو مقودة وصعييب علييك بعدي على زمر
سماح:(شافت قدامها بحيرة)معرفتش
عادل:بعدي عليه..من تعامل ديالو باين صعييب واتمرضي راسك معاه..هاد منصور ولا يخان معقد وتيفهم بزااف وكثرة التحليل..داك نوع لي يعطيك شوي من حياتو ماشي كلها..كيخدم بمبدأ انا وبعدي الطوفان
سماح:(تنهدات)واخاا..يكون خير
عادل:(ضحك)قالت ليك كيعجبني ههه نوضي قاودي لكوزينتك
ضرباتو بيديها مغوبشة وقالت:تفووو على ولد كي داير متبقاش تجي عندنا ياله تفووو
ناضت مغوبشة وهو تيضحك وقال:عندكم ختي صباح وعشية تلقايني هههه
دخلات لدار مقتانعة بشنو قال عادل حيت عشيرها وتيفهم شنو بيها..ديما كتشاور معاه وكيكونو ارائو على صواب..تنهدات وقررات تخرجو من بالها..وبالفعل طلعات لفوق لقات عماتها دخلو لكوزينة تيجمعو وصيفتو كريمة وزينب ارتاحو..اما ضحى شادا تيلي مجمعة مع صاحبها
جلسات حداها سماح عيانة وقالت:عييت بالوقييف
ضحى:(مركزة مع تيلي)ممم
سماح:(شافت فيها وضحكات)هههه ماعندك عرس كي ناس ماعندك جمووع مقابلاه هي هو
سمعاتها فاتي وقالت مغددة:خلي مها تما تتحاب ليا معاه سحابها انقبل علييه..والله داك الكروفيطا اللاويا لدخل علي نسيييب
ضحى:(غوبشات)فففف ماما لتزيديش فيه..(شافت سماح مغوبشة)هانتي جبدتيها دروك
سماح:(حسات براسها جبدات الصداع ندمات)سمحي لياا والله(وقفات ونوضاتها معاها)زيدي نشوفو يسرا
زادت معاها مغوبشة دخلو عند يسرا لقاو الياس تيلبس تريكوه وهي كطوي حوايجها
الياس:اش بيتو!؟
سماح:خرج فحالك خلي ليا مرات خويا شوي 
الياس:سيري فحالك نتي نيييت 
يسرا:اهيا ههه زيدي اختي 
دخلو بجوج وجراو عليه وجلسو بيناتهم مجمعين تيضحكو واتلفو الوقت..

هوما من نوع لي ماشي متطفل ولا يسولوها كيدزات الليلة وداكشي..هي تيضحكو وصافي شيء لي خلى يسرا ترتاح..لتاحقات بيهم زينب بعدها بقاو مجمعين تا دخلو كاملين العيلاات عندها وبقاو ضاحكين ناشطين تال اشمن وقت وتكركبو ينعسو
دخلات سماح لبيتها ناسية موضوع منصور..بدلات عليها فالحمام ببيجامة تالنعاس فالبوردو والزرق وبدات تتحيد ضفار فحين بنات خالاتها وعمتها منشورين كل وحدة فقنت ناعسة من غير ضحى لي مجمعة مع الحب
تكات حدااها وشعلات ويفي وهو يطلع ليها ميساج ديالو كأنو ذكرها بيه..حارت واش تحلو ولا لا..بقات طالعا فالفيس نازلة فيه وعقلها بقا فالواتس..يدون شعور مشات حلاتو بعد مدة ديال المشاورات مع عقلها لقاتو كاتب ليها "زيونات كي وصلتي؟؟"
بدون ما تحس ترسمات بتسامة خفيفة على ثغرها وكتبات:حمد لله ونتا كي بقيتي؟؟
لقاتو ساد محالش وهي تنهد..شافت فيها ضخى وقالت:اش تما؟؟
سماح:(خرجات بسرعة من الواتس)والو
ضحى:(حطات تيلي وتكات على مرفقها تتشوف فيها)هي كري كري ههه
سماح:(جابت ليها ضحكة)باش غنكر؟؟
ضحى:شكون داك لي كاتب ليك زيونات هههه(غمزاتها)وليتي كتخبي علي؟؟
سماح:(خرجات فيها عينيها حابسة ضحكة)بيت هي نعرف واش تتهضري معاه ولا حاضية تيليفوني
ضحى:ههههههههه اختي بكثرة مكتحضيني ماما تعلمت عين هنا وعين لهيه..عين تخرا وعين تقلب على لقاعييت
ضحكات سماح وقالت:هههه بااز
ضحى:ياله واعاودي لياا انا ديما تنعاود ليك
سماح:(بهدوء)مكاين مايتعاود 
ضحى:'احياناا علييك..شكون هذااك
سماح:منصور
ضحى:(دارت يديها على حنكها)اوا؟؟
سماح:اوا اوا هههه
ضحى:(شدات ليها فذراعها )والله منتفاك معاك تاتعاودي ليا بديطاي
سماح:(بهدوء)مكاين والو حم زعما باقي مكاين والو
ضحى:(بذكاء غمزاتها)هي غيكون ههه
سماح:لا ههه
ضحى:عاودي عاودي
تنهدات وتقادات بلاصتها وبدات كتعاود ليها من لول تالخر باختلاف بسيط انها فاش عاودات لعادل مبيناتش داك الحماس لي عندها اتجاهو..وفاش تتعاود لضحى خلات الحماس ابان الشيء لي خلا ضحى تسمع ليها عاجبها الحال..
ضحى:(ضحكة واصلة ليها لفين وفين)ايهاي على بنت خالي ههههه والزهر ههه ومالك القحبة ساكتة هادشي زوين
سماح:اش زوين فيه ههه انه كيقمعني 
ضحى:كلهم احبيبة هاكاك فلول..شوفي هي من منير لي انا معاه كان فلول معفر ويعطيك الهضرة بالكرام ومكيجاوبني على شحال ..هي فلول تيبينو ليك ديك نفخة تاع البوطة
سماح:دابا كتقارني ليا منير بمنصور؟؟اش جاب لجاب
ضحى:(عوجات فمها)علاه مال منير؟؟وزايدون الرحال كاملين بحال بحال وتفكيرهم واحد..كيبغيو اعطيوك الشخصية الغامضة باش نتي تعلقي بيهم اما هوما محلولين
سماح:(بحيرة)معرفتش صراحة!!!
ضخى:شوفي اسماح لي نصحك بيه انا كبنت هو تبعي قلبك وشوفي شنو يقوليك..على حساب ماعاودتي ليا راه عاحبك كون مكانش فيه كرام تزين مغاديش تهتامي بيه كااع..راه الناس كامليين فيهم زين وفيهم الخايب هي حنا تيخصنا نتعايشو معاهم صافي..شتي منير فلول كانو فيه شي حوايج متنحملهمش ولكن حيت عندو حوايج زوينين غطا ليا على لوخرين فهمتيني
سماح:ممم
ضحى:شوفي سيد فالسبيطار وبوحدو ميبقاش فيك
سماح:(بحنية)بقا فيا والله مجا عندو حد
ضحى:اوا شتي..شوفي غدا سيري لعندو فاش اخرج شوفيه وارجعي فحالك..لوحي ليه السنارة ورجعي لور
سماح:(بعدم فهم)زعما نمشي عندو؟؟(حركات ضحى راسها بايجاب)والله لكانت ليه تيضل اقمع فيا
ضحى:وا هي حيت محيراه..الراجل كيقمع المرا ملي مكلقا منين ادوز ليها..شوفي اسماح العمر غادي وكيجري عندك 25 عام واش مكتحسيش بالوحدة؟؟واحد نهار غتبغي تانتي لي يبغيك ويقوليك كلمة زوينة ويتهلا فيك
سماخ:(بعفوية)بابا تيبغينيي
ضحى:بااك غيكويييك(بعصبية)
نتافضات لوخرا وقرصاتها تانقزات:الله يحرق والدييك الكلبة
ضحى:اوا هذا هو اللوجيك..تبعي قلبك مرة وحدة والله مغتندمي انامقلتش ليك بغيه مي هي جربييي الحب زوين
سماح:(بتتسمات وهي تتفكر)اكون خير
ضحى:(بتساؤل)بتمشي غدا يااك
سماح:(تتصايب فبلاصتها)تنشوف
ضحى:(جراتها من كراوعها)اتمشي هي غتمشي وبتشري ليه سورفيت وسبرديلة باش اخرج
سماح:(بقات تتشوف فيها)لا واش من نيتك؟؟لا نتي بزااف
ضحى:سمعيني الخراا وحلي وذنيك..الراجل كيبغي المرا لي تهتم بيه تتهلا فيه وتبين ليه شحال عندها مهم
سماح:وانا لاش نكذب(بتلعثم)سي كيعجبني ولكن ماشي لدرجة نشري ليه سورفيت
عوجات ضحى فمها وحطات يديها على خصرها وقالت:وعلاه اختي باش بيتي تشديه
سماح:وشكون قاليك بيت تشدوو؟؟
ضحى:(تتصايب فراشها)لا بااين والله هههه نتي تتهضري عليه بحالا مزوجة بييه
سماح:(بانكار)حشاااك ففف نعسي نعسيي قالت ليك نشري ليه سورفيت ههه
ضحى:الله يشري ليك لما من لحمام قولي امين خلاتها ماما ههه شتي نتي اتضفري شيب حدا زينب وعثمان
مجاوباتهاش سماح عطاتها بظهر وغمضات عينيها تافكر فكلامها..كثارو عليها الاراء..واحد تيقوليها تبعي عقلك ولوخرا تبعي قلبك

***
ومابين ما يمليه علي قلبي وعقلي
علقت انت هناك في سراديب التفكير
سكينة ايت الكبير
**

فاقت فصباح بكري بدون منبه كيف لا وهي كانت ناعسة مي عقلها مرفوع..ناضت بثثاقل كان صقيل فدار..خشات رجليها فصنديلة وناضت تتاوب وشعرها مخربق..جمعاتو باهمال قضات روتينها الصباحي لي مكتعداش غسل الوجه والسنان لاغير..وتنظيف باقي المناطق..ختارت لبيسة عبارة عن سروال اسود لاصق ثوب مع بوط قصير مبين شوي من سيقانها..بالاضافة لشوميز فالاسود مخلطة وزادت فوقها بوليرو بوردو سخون شوي..
سرحات شعرها شوي ودارت ماسكاارا وعكر خفيف عطا لون احمر خفيف لشفايفها وعينيها باقي مجبدين بالنعاس..
خرجات من بيتها مكتسمعش الحس ديركت للكوزينة لقات مها وباها..مجلسها فوق حجرو وتيفطرو واضحكو..بتاسمات وقالت:صباح الخير
عثمان:(تلفت ليها)صباح نور المشة(جات باستو)الله على الزين
فرنسات ليه وباست مها وجلسات حداهم وقالت حاطا يديها على حنكها باعجاب:قهرتونا بالحب هه
زينب:(مزنكة واخا العمر وداكشي باقي محتافظة بالحميمية مع عثمان)الله يرزقك هه(خوات ليها قهيوة)هاكي اسكايري ديالي ههه شربي قهوتك
خداتها تتبتاسم وعقلها مشوش..تتحرك حبة السكر وساهية تانطق باها:اتمشي لخدمة؟؟
زينب:هاا لا عندي مانقضي مع نورة
عثمان:ممم مزيان..ياله انا هاني مشييت
ناضت زينب تجر معاه كيف ديما للباب ودعاتو ورجعات لبنتها تدير ليها تحقيق..جلسات وهزات كاس تاتاي ونطقات:ياله خوي ليا المزيودة 
سماح:(بتاسمات)ماما..الحب زوين ياك
ضحكات زينب وقالت:هههه زين زين خص هي معامن..شكون هذاا ازين؟؟
سماح:(بانكار)ماكاين والو..تنفرح فاش تنشوفك نتي وبابا هاكا..محابيين
زينب:انا وباك غتفرقنا هي الموت..ياله كري شكون هذاا
سماح:(تنهظات تتشوف فاص ليها)ماشي دابا..نرجع اماما ونعاود ليك
زينب:علاش ؟مزروبة؟؟
سماح:ممم(تتشرب قهوتها)نقضي شي اغراض تخوى دار ونعاود ليك
زينب:(بابتسامة)واخا الالة انا نتسنا..ولكن ردي البال ماشي ديما الحب زوين
سماح:(دارت شبح بتسامة )عارفا
ناضت هازا صاكها وسوارتها وخرجات لحالها..تتمشى وفنفس الوقت تتسنى تدوز شي طاكسي..وتتفكر
واحد باقي مكملش وقت طويل فحياتها وحيرها؟؟علاش هو بظبط مازوينش زين لي تمناه شي وحدة..ممصوابش وماشي شي واكد لي تيبين ليك انه مهتم بيك بزااف
شيرات لطاكسي وطلعات ونطقات:كلينيك****
تحرك بيها طاكسي وهي ساهية ونفس الوقت راسمة بتسامة خفيفة على ثغرها..اتشوفو من جديد وترتابك
وشحال كتحماق على ارتابكها معاه حيت تتحس براسها فاشلة خصوصا بدوك النظرات الجريئة ديالو..ماشي نوع لي يحني راسو وهو تيشوف فيه..بالعكس تيشوف فيك مزيان واحرجك بنظراتو
نزلات من طاكسي كانت ثمنية ونص هادشي لي شافت فالساعة لي تتزين يديها..تطلعات فاللكيلينك وعقلها تيقول ليها باقي عندك وقت هربي وحيدي عليك هادشي وقلبها تيقوليها دخلي وتهناي..
تقدمات ومشات ديركت لبيتو..دقات بعض دقات فالباب خفاف دايرا بحساب الصباح لكن ولا رد..للحظات شكات انها تعطلات قبل ماتدخل وتروي عطش فضولها بشوفتو ناعس فوق سرير ورجليه مرفوعة..تنهدات براحة وتمشات جيهتو ماحدو ساد عينيه لي كيربكوها..قررات مع راسها تدير جلسة شوفينغ ليه..متكي على ظهرو ويديه لايحها بعشوائية على كرشو..لابس نفس سورفيت تالبارح وشوي تصوت تيخرج من فمو دال على انه ممقادش فنعاس..جلسات ففوتوي مزوميا عينيها فيه بهدوء..تيبان ليها تحت عينيه منفووخ واسود بسهير وتعب..ولحيتو سوداء اما شفايفو منفوخين بنعاس..معندوش تجاعيد فوجهو بتاتا مجبد بحالا عندو خمس سنين..
بتاسمات وهي حاطا يديها على حنكها مستخفة براسها وشنو كدير..قاطع تفكيرها دخول الممرضة رفقة الطبيب ..وقفات باحترام وقالت:صباح الخير
الدكتور والممرضة:صباح الخير
الممرضة:من عائلة المريض؟
كتافات تحرك راسها فحين دكتور قرب قرا تقرير ديالو لي كدا راسو وخرج بعدما نطق:عطيه اوتوغيزاسيون تالخروج(بتاسم لسماح)الحمد لله على سلامتو
سماح:الله يسلمك
خرج وبقات الممرضة كتموديفي التقرير وهي تزعم سماح ونطقات:ختي نسولك؟؟
الممرضة:وي لالة
سماح:مجاش عندو شي حد؟؟
الممرضة ؛صراحة معرفتش لاني عندي بزاف تالمرضى ماشي غير بوحدو..مي جوبونص جا راجل كبير شوي جاب ليه شي صاك وواحد سيد اخر صافي
حركات راسها بامتتنان وياله غتعاود تهضر تحرك كيعلن على استيقاظو..بتاسمات سماح بتوتر كتحسب فخاطرها شحال بقات من ثانية باش احل عينيه واوترها
حل عينيه هو الاخر منزاعج من الهضرة لي حداه..باقي ممفرزش شكون حداه..مغوبش ومنزاعج..نطقات الممرضة :على سلامتك موسيو الطبيب عطاك اذن تالخروج
مكلفش راسو تا يحرك راسو حدو تفوه وجا بغا يتصايب فبلاصتو وهي تحرك سماح بسرعة قادات ليه المخدة عاد لاحظ وجودها..ستغرب وتقاد فبلاصتو وهي واقفو حداه تتصايب ليه المخدة..مدار تا ردة فعل ما بتاسم ما غوبش بقا على نفس ملامحو كأنها بايتا معاه..الشيء لي زاد توترها وخافتو يكون مبغاهاش تجي
صايبات ليه المخدة وشعرها تيتحرك حدا وجهو لايح عليه رويحة زوينة من بارفانها لي ستنشقها بعمق..

احلى ريحة اصبح عليها
رجعات بضع خطوات ونطقات صباح الخير
لكن ماردش حدو حرك راسو عاقد الحضاش تيحك فعينيه وهي تمحات ملامح الفرحة لي فوجهها ندمات اصلا لاش جات..علاين تبكي ليه
مد يدو هز تيليفون من حداه دوز نمرة ودارو فوذنو وهي مترقباه بعينيها بفضول فحين هو تيشوف فاص ليه..ودغيا قلب عينيه ليها هي لي غيرات نظرها بسرعة وتتخمم فهاد المخلوق لي مايصبح ما يمسي..سمعات صوتو اخيرا بصوت معصب:صباح الله هذاا..فين زمر لي قلت ليك؟؟ اهاهه صافي اسيدي بنااقص..خدمة زبل
لاح تيليفون للارض تا تسمع وقعو فالغرفة وقفزات سماح..خافت منو حيت لبارح شكل واليوم شكل..ذكرها بيوم فاش مشا معاها للفارماسيان..تا قررات فخاطرها تهز صاكها وتمشي عاد جا صوتو ونظرتو ليها وعليها:سماح
سرطات ريقها وقربات وقالت:نعام
منصور:(مد يديه)اري يديك نوقف
فهمات انه بغا ينوض..متعطلاتش مدات يديها ليه شد فيها وحرك رجليه للارض بشوي عاض على شفايفو من رجليه لي حارقاه..اما هي العرق تينزل ليها مع سلسول كي الشلال من شدة باش مزير على يديها..حط رجليه فلارض وحاول اوقف وهي تنطق من تحت فوهها:بشوي عليك فين نايض
منصور:الطواليط
دورات يديها على خصرو مرتابكة من هاد القرب لي قريبة ليه..وتاهو دور يديه على خصرها مكرهش اعصرها عندو وادفن راسو وسطها اشم ديك الريحة لي شمها على صباح
اما هي راه شوي وتخوي بيه من كثرة التوتر..اي نعم يديه حطها بعفوية فوف كتافها معجز بيها وجاها ثقيل..تمشات بيه شوي بشوي تال حدا باب الحمام ونطق:صافي سيري
سماح:(بعفوية)مأكد؟؟
شاف فيها بنظرة هاز حاجبو بذكاء وقال:اتدخلي معايا لطواليط اسماح؟؟
خرجات عينيها وقالت باحراج:لالا حاشاا..حلات الباب وتفكات من قبضتو فحين هو حط يدو على القنت تالباب معجز بيه ودخل تيعرج للحمام وسدو
مسحات جبهتها وورا عنقها بتوتر وبقات واقفة تتنفس بشوي متوترة وخصرها وكذلك كتفها باقي تينبضو بلمستو لي كانت عفوية
ماهيا الا لحظات تحل لباب وخرج غاسل وجهو وسنانو من ريحة معجون الاسنان لفايحة منو والفوطة لي على كتفو..قربات ليه مدات يديه لي متعطلش باش اشدها بين يديه..تحسس نعومتهم بلا مترد لبال فحين هي دورات يديه على كتفها شادا فيه من خصرو مقيدها للبلاصة فين كان..
هي جلس وهي تنفس تتنهج ونطقات بعفوية:ناري شحال ثقيل
على اثرها دار ضحيكة خفيفة مزينة داك لوجه لي بكثرة ماهو مغوبش مافيهش تجاعيد..حيت التجاعيد لي حدا العينين تيكون سببهم كثرة الضحك ولي فجبهة كثرة التغوبيش
منصور:نتي لي قد هاكا هه مكتاكليش
سماح:قيااسي هه(بتاسمات بود)كي بقيتي؟؟
منصوى:كي زفت ..منعستش لبارح تالربعة
سماح:وعلاش؟؟
منصور:صداع فرجلي
سماح:(باسف)الله يشافيك..للفدع صعيب..معطاوكش شي كالمون
منصور:سيي مي دغيا عاود رجع
سماح:(باستسلام)اوا الله يجعلها اخر الامراض..(شافتو مجاوبش)طبيب قاليك اليوم تخرج
منصور:(عقد حجبانو)هادشي علاش معوليين ولكن السيد لي وصيتو اجيب ليا حوايجي مجاش بكري
سماح:(بهدوء)الغايب حجتو معاه..تلقاه لقا طريق عامرة
منصور:(بجدية)داكشي ماشي شغلي..اطير انزل المهم يكون عندي فالوقت
سماح:(تتديه على قد عقلو)دابا واش اتعصب راسك على هادشي بسيط..صافي وقع لي وقع نتا باقي مريض وتتديها فشي حوايج ايمرضوك على والو
شاف فيها بنظرة من نيتك وهي تنطق:اسيدي انا نجيب ليك حوايج متلبس واخا
حرك راسو بنفي وقال:لا بلاش هاهو ايجي
سماح:(باصرار )لا نمشي هي هنا..ونيت نجيب الفطور(بحرج)سمح لي جيت ومجبت والو هه
شافيها وطول الشوفة بعمق تا رمشات بسرعة وقال:سبحان من خلقك
حنحنات وقالت:تكا انا نص ساعة الى تعطلت ونجي
منصور:(بهدوء)مدي ليا جوا كاين فداك لبلاكار لي وراك
تلفتات وراها وتمشات بشوي للبلاكار حلاتو لقات فيه صاك صغير باينا فيه حوايجو..تلفتات ليه وقالت:فينو؟؟
لقاتو كيشوف فيها مربع يديه وساهي وهي تحرج ونطق:حم فجيب ديال الصاك
خشات يديها وجبدات جوا ثقيل مشات داتو ليه على نيتها حسابها معرت اش بغاه حلو كان عامر فلوس مد ليها البعض منهم وقال:ها باش تخلصي الحوايج..جيبي ليا سورفيت وسبادرين والتقاشر اوك
بقات كتشوف فيه باستهزاء مكمشة عينيها ومعجبهاش الحال. هزات صاكها وقالت:ييه على باااسل(خرج عينيه فيها)تسنا انا دروك نجي
خلاتو بلاكة وخرجات تاشر يديه للهوا فيه فلوس..سدات لباب وغمضات عينيها وقالت:فففف كالما اسماح كاالم
اما هو جمع الفلوس ونطق بعدم رضى :كثرة الفشوش 
رجع تسطح بصعوبة تيتسناها اما هي بسرعة خرجات تتزرب فالمشية تتسنا طاكسي..ونهار تنبغيك اوجهي قمشوك ليا المشاش..مكاينش حس الطاكسي تا دازت ربع ساعة وهي واقفة وطلع ليها دم خافت تعطل عليه واتعصب..طلعات ونطقات بزربة:شي محل قريب عفاك فيه حوايج رجال
الشيفور:مكاين تاواحد هنا..شوفي المول
سماح:فففف انتعطال..واخا هي ديني عفااك ودغيا
تحرك شيفور غادي وهي تتهزز رجليها بعصبية بستة و ستين كشيفة باش وصل خلصاتو ونزلات بزربة لاول محل..

لقات سورفيت فالاسود ليه من محل رياضي وخدات معاها سباردي وتقاشر بزربة ومشات خلصات وخارجة تاني تتزرب تاولات تتنهج وحمرة..مشا منها النفس للحظة ووقفات تتسرجع نفسها بصعوبة ناحية خمسة دقايق عاد خرجات بشوي عليها كتصرف بلا عقل بحالا مسح ليها الميموار والتركيز..مشات خدات جوج قهوة ودازت للمخبزة فاص مع المول خدات باش افطرو..تتختار وتعزل تا كملات هزات كلشي بيديها ومشات بزربة بعدما ردات روحها وجهدها خدات طاكسي بزربة ورجعات للسبيطار تتنهج..موصلات عندو تا كان مشا منها النفس حيت دارت مجهود..حلات لباب محقونة وتمشا جيهتو هو لي متكي بملامح باردة لكن سرعان ماتبدلو لقلق وهو كيشوفها تتنهج وتعاود..
مكانش بوحدو كان معاه شخص اخر..راجل هاز فيديه صاك باينا حوايجو
منصور:سماح صافا؟؟
حركات راسها وحطات كلشي فوق فوتوي جلسات عليه وهي تشد راسها حناتو تتطلع نفس وتعاود..خلعاتو عليها وناض كيتعجز عندها جلس حداها وقال موجه كلامو لسيد:ارا كاس تالما
حط يدو على كتفها وقال:واش صافا؟؟
سماح:هيييه هيييه(كطلع نفس)صافا صافا(مد ليها سيد الما شربات منو)فففف جيت كنزرب مشات مني نفس
منصور:(بهدوء)ومالك على زربة؟؟
سماح:ففف باش منتعطلش عليك
منصور:(لاح جملتو)زربتي على والو ها سيد جا وجاب الحوايج
هنا حسات براسها بحالا بزق ليها وقاليها راك مدرتي والو..تتفكر كيفاش تتزرب ومتوترة لتعطل وتزرب هنا ولهيه وتعصبات مع ترونسبور وفلخر خسر عليها هاد الجملة..سرطات ريقها بفشل وحزن فحين هو مترقب عينيها لي حزنو عاد عاق اش نطق..وهو ينطق مصحح جملتو:زعما سيد كان جاي جاي كون هي خديتي وقتك
سماح:(سرطات القمعة)ماشي مشكل(بان بريق فيعينها بحال تدموع)ها الفطور انا غنمشي
بغات تنوض شدها من مرفقها وهز راسو فسيد:تقدر تمشي
حرك راسو و خرج سيد مخليها هي تتشوف فاص ممسوقاش ليديه لي شاداها من مرفقها..تنهد ونطق بلطافة:نفطرو بجوج
سماح:(بدون متشوف فيه)فطرت انا فدارنا..
منصور:(دبل عويناتو بحال كي كدير هي)ونفطرو بجوج جاتك عادي تخليني نفطر بوحدي
تلفتات ليه مغوبشة وقالت بنرفزة:وجاتك عادي تقول بحال هادشي
تنهد ومسح على وجهو وحيد يدو لي شادها بيها..ثوان صمت عاد نطق:نوضي فطري معايا وكملي حسنتك
شافت فيه ببرود وكمشات عينيها ونطقات:علاش نتا هاكا؟؟
منصور:انا لي تنحلل ماشي نتي..خليك نتي زوينة وكالم ونية ..التحليل خليه ليا
ياله بغات تنطق سبقها وقال:بلا هضرة..عفااك خلينا نفطرو مجموعين عفااك.. تنهدات وبدلات نظرتها منو للمياكي لي جابت..بدات كتجبد شنو جابت ببرود عكس الحماس لي كان فيها فاش جات صباح..لاحظ ردة فعلها ولام راسو فالداخل..عارف راسو مبكر مكيعرفش اتعامل ولا تا يهضر مع عامة الناس عساك النساء
هز قهوة جغم منها وهي تمد ليه بتيبان سخون شدو بابتسامة وكلا منو وتاهيا بدات تاكل فوق شبعة لا غير..وكتساءل فراسها بلي خصها تمشي اش تدير هنا مع واحد بحال هذا مكيقدر والو..وفمو لاحسو كلب متيعرفش ادوي بتاتا
ساد الصمت بينهم من غير صوت المياكي فاش كيحركوهم..هو غرق فتفكير فيها..واخا راها حداه
كلا هي شوي وتسوخر شيء لي خلاها تهضر:مكلتي والو؟؟!!
منصور:(حط يدو على كرشو)نوو خديت..فصباح مكنفطرش مزيان تالغدا عاد كنغلق
حركات راسها تاهيا وجغمات من القهوة وهو يقول:انا نبدل ونمشييو
فهمات من جملتو انه بغاها تسناه يمشيو بجوج..معتارضاتش ومقالتش لا اه لا لا..خلاتو احاول اوقف ملي بان ليها مقادرش وقفات وشدات فيه من ذراعو تا وقف ولاح يدو على كتفها بعشوائية..وصلاتو لحدا الحمام وقال:اري ليا سورفيت لي جبتي
سماح:لبس ديالك
منصور:بغيت ديالك
خلاتو شاد فقنت الحيط ومشات جابت ليه بنفخة السورفيت لي جابت ليه شد البوشيط ودخل لطواليط فحين هي تنفسات براحة وتغرغرو عينيها من هاد المعاملة لي عاملها..كرهات راسها لي تبعات رأي ضحى وبدات تتلوم فراسها
فحين هو لداخل كان واقف قدام المرايا كيشوف فراسو كيعاتبو بصمت..كيحلل معاملتها اللطيفة معاه..تنهد وحل الساشي تيجبد لي شرات ليه..ومن تلفتها بالوقت نسات متحيد التيكي لي مكتوب فيهم ثمن..لبسهم بعدما تفحص الاثمنة مزيان..وخرج عندها تيعرج لقاها جمعات المياكي وجالسة تتسناه..هي خرج وهي توقف وقالت:هي هاديك بعدا؟؟
حرك راسو باه ونطقات:عندك شي حوايح اتجمعهم
منصور:سي شوفي داك بلاكار هزي داك صاك لي فيه وهذاا(شير لحدا السرير لساك لي جاب سيد)صافي
هزاتهم كاملين فيد حيت خفاف وقالت:مشيينا
بدا تيعرج وتيتمشا بشوي..عز عليها وتوجهات ليه وقالت بتوتر:عجز عليا شوي تا نزلو
دار شنو قالت ليه دور يدو على كتفها وبقات مدلية وشد من عندها صيكان وقال:خليهم انا نهزهم
حركات راسها باه وبقاو كيتمشاو تاوصلو للسانسور وهي عرقانة..تتحس براسها اتسخف..ريحتو الطبيعية الفطرية ديال جسمو دخلات لنيفها بجهد تا حشماتها..حسات براسها كيغازلها بريحتو الرجولية..وملمس يدو على كتفو خلاها تزيد تغرق ويتمسح ليها العقل
تحل سانسور ومن حسن حظهم كان خاوي..

دخلو ودارت طابق السفلي..بدون شعور كان تعجز كثر عليها شابك يديها مع يديه لي مدلية حيت كانت رافعاها باش تعاون بيها
اضظراب..خجل..بتسامة وتخوف هوما لي حسات بيهم سماح من الملمس تيديه..حسات. بالامتلاك وبالنسبة ليه...مشابك يديهم كأنه كيقوليها انا وياك ولينا بجوج مكاين لاش نبررها بفمي..
حاولات تخبي بسمتها قدر المستطاع..والتزنيكة لي فرشات القضية خلاتو ادير شبح الابتسامة وازيد ازير على يديها بود..
تحل سانسور وخرجو بنفس الطريقة كانهم معانقيين..لقاو نفس السيد كيستناهم وهي تنطق:اتمشي معاه
منصور:سي.. الشيفور ديالي هذااك
حركات راسها وصلاتو حدا الاوطو ومد هو صيكان لشيفور احطهم فالكوفر..فحين يديه بقاو شاديين فيها..توترات وحاولات تملص من تعنيقتو لا مباشرة طمعا فطريقها تخلص من شدة اليد
لكن لا..اي نعم طلق صراحها من العناق لكن يديها مطلقهاش..بقا شاد فيها وجابها قدامو بعدما سند على السيارة مكمش عينيه شوية من اشعة الشمس
تزنكات كثر وهي تتشوف فيه كي تيتصرف معاها..لدرجة نسات انها كانت معصبة منو..بتاسم وقال:نوصلك معانا؟؟
هزات فيه راسها كتبعد القصيصة على عينيها بخجل:لا اناخد طاكسي لدار هي سير
حرك راسو وقال:معندكش طوموبيل؟؟
سماح:لا
دور وجهو حولو كأنه كيتخلص من نظراتها لي بقدر ماهي حشمانة بنفس قدر انها كتوترو هو الاخر
الشيفوى:موسيو منصور كلشي هو هذااك
منصور:واخا طلع انا جاي
خلاه اطلع وجرها بشوي لجيهتو بضع سنتيمرات وقال ببحة:ملي نعيط ليك جاوبيني..هي نولي شوي نتشاوفو
سماح:هاا(رمشات بزربة)واخا واخا
داعب صبعان يديها بيديه:تفاهمناا!!
حركات راسها بالايجاب وعينيها عامرة بالفرحة والسعادة والمورال طالع ليها..لكن بمجرد ماحسات بشي حاجة فيديها ستغربات نزلات عينيها لقاتو اونفلوب شدو من شيفور لي معرفاتش اصلا امتا مدو ليه..
سماح:شنو هذاا؟؟
منصور:(بهدوء)خلاص سورفيت..مكنبغييش لي يخلص علي شي حاجة(كيضور راسو اشوف هنا ولهيه من غير فيها)تفاهمنا ازوينة؟؟
بسرعة تلغاو احاسيسيها وكيما هو عافية شعلات شمعتها راه هضرتو فنفس الوقت هواء طفا شمعة فرحتها واحاسيسها زوينة ناحيتو..تصدمات وتصدمو ملامحها ..مشافش هاد رد الفعل تا جرات يديها من يديه..لاغية احساسها بمرة..شاف فيها وهيوتقول بكره وعصببة:شتي نتا..واخا الواحد ادير معاك لي مايدار اتبقا ممصوابش وممربييش ..
منصور:نعاام؟؟!!
سماح:(بعصبية)ندمت لاش جيت نشوفك..نتا واحد الراجل خصهم اسدو عليك تاتربااا(غمضات عينيها كتحس بشمتة)معمرك تعاود(حلات عينيها بغصة)تعيط ليا ولا تسول فيا ولا تاتخدم معايااا(رفعات صوتها)وااخاا!!
سمحات فيه وزادت خلاتو مفاهمش اشنو واقع...غادية معصبة وتتسب وعينيها تجمعو فيهم دموع من تصرفو..
ضرب ليها كلشي فزيرو..عاملها كأيها الناس..اي واحد قضى ليه سيرفيس كيعطيه مستحقاتو..لكنها للحظة قالت مع راسها انا غير..
تبعها تيعرج مقسح فحين هي غادية بزربة تتقلب على طاكسي..نادى باسمها مرات عديدة ومضارتش حتا..شيرات لطاكسي وقف وطلعات بزربة وطاحو دموعها شلال..هادو لي قدر منصور اقشعهم وضرو خاطرو..لدابا معارفش لاش دارت هاكاك
بالنسبة لواحد عاش وحيد ممخلطش مع الناس مكيعرفش شناهيا يهتمو بيك الناس ولا شناهيا يتعاملو معاك مزيان..كيعرف تاحاجة مافابور
مسح على وجهو بنرفزة من تصرفها..وخرج تيليفونو تيصوني ليها ووالو متيجاوبش
هاد الاخيرة لي اول مدارت دارت نظاراتها الشمسية تغطي الدموع ..صونا تيليفونها وطلعات نمرتو..قطعات ودخلات بلوكاتو فالبلاصة من المكالمات ومن الواتساب ..خلاتو ايتسطا
زفر هو وتم راجع للطوموبيل معصب...تحركات بيه طوموبيل فاتجاه دارو دار قبضة يديه على فمو تيفكر و احلل..عيا اضورها فعقلو كيلقا راسو مدار تا شي حاجة تالعيب..فالاخير نطق ببرود:التبرهييش الخاوي
وصل لدارو بغا يشوف مو.. مو لي مشافهاش سيمانا وبحكم قاليها مسافر لاغير.
كي دخل سول عليها وقالو ليه فجردة..توجه ليها كيعرج ورجليه عاطياه صداع مغوبش ومنرفز..تلقات ليه لطيفة وقالت بخوف:الله.. مالك؟؟
منصور:(ببرود)هي طحت..فين مي؟؟
لطيفة:فالجردة .. شفتها ملات ومقلقلة وقلت نخرجها تشم لهوا
بغا يمشي لعندها وهي تحبسو مبتتسمة وقالت:اه نسيت مقلتش ليك..حركات يديها ليمنة تتحركها عاادي
شعوو عينيه بالفرح ممصدقش والعصب تسماح تلاشا فاش سمع هاد الخبار وزرب فخطواتو لجردة..مبقاش تسوق لرجليه..هي شافها من بعيد فكرسيها وحداها طبيلة فيها اتاي ودوازو..محسش تانطق ميي
هزات عينيها بشوي شافتو وبتاسمات بزز حيت فمها مشلل لحركة نوعا ما..مي هي بدا كيتمشا وشافتو كيعرج تلغات بتسامتها..جر كرسي بزربة وجلس فاص ليها وخشا وجهو وسط يديها باسها مرارا وتكرارا من كاع الجواايه فرحاان

حركات راسها بالايجاب وهزات يديها ليمن تال عند وجهو تحسساتو..شحال توحشات تدير هاد الحركة..
هي امرأة تحرمات من حقها كأم ومعاشتش مع ولدها لحظات كثيرة وتحرمات من حقها كأمرأة بحكم خسرات رحمها..
منصور:(فرحااان طلع كيبوس فراسها وفيديها )الله يشافيك اميمتي الله يشافيك ويعافيك وازيد فرااحتك(بااس يديها من داخل ودفن وجهو فيها)
حركات رااسها بتساؤل جيهة رجليه وقال:هي كسيدة خفيفة امي..هي ملوية ليا وصاافي..متبرزطيش راسك ..رتاحي ليا وتهلاي فراسك..تبعي دوا وكولي مزيان باش توقفي على رجليك.. 
دارت بتسامة حزينة متحسرة على حالتو..هي أم وأكيد تتحس..تتحس بلي ولدها ضايع..معمرها شافتو فرحاان نييت..السواد تحت عينو كيبينو تعبو مكرهاتش تحط عليهم صباعها وتحط راسو على رجليها..تحك ليه شعرو وتسال على همو وعلى مابيه..لكن دارتها الصحة..ضيعات صحتها فالخوا الخاوي وتتخلص درووك
اصعب الخيانات..خيانة الصحة..غير ذلك مجرد هراء
****
كانت وصلات باب دارهم خلصات طاكسي ونزلات بعدما ستجمعات راسها قبل ماتنزل..نشات على وجهها لي شبع بكا وتمشات لدار..تتسمع لغا عرفات دار شوي عامرة عاود..تنهداات بحزن خصها تضحك وتبين بلي مواقع والو..
طلعات لدارهم ودماغها خدام تيفكر فمنصور لا غير..توجهات لصالون لكبيرة لقات مها وعماتها ورجالهم وولادهم مجموعين على حوج طبالي كباار كيفطروو..بتاسمات ليه بزز وحيدات النظاظر وقالت:ممشيتوش فحالكم
وئام:لا اختشيي عاد بدا لفاكونص هههه
زينب:(لاحظات عينيها الحمرين)اجي تفطري اماما
دخلات ودوزات يديها فالهوا وقالت بابتسامة صفرا تتحاول تتناسا:لا سلام على طعام
خوات ليها كريمة اتااي شداتو بغير نفس..نقبات شوي ولأنهم كلشي تيهضر وتيضحك تاحد مرد البال..وتاهيا تقنات الدور دايرا بتسامة صفرا
دوات مها بهمس:مالك؟؟
شافت فيها ودارت بتسامة خفيفة:والو
زينب:(حركات راسها)تانكونو بوحدنا
فركات سماح يديها بتوتر ورجعات ساهية فكاسها..وتيلفونها كيشد لي بواط فوكال ديال منصور..لانها بلوكاتو من كلشي خلاتو بحال الحنش المقطوع ليه راسو..
من طبعها انساانة ظرييفة بزااف تافاتت القياس لكن سماح الى حقدات على واحد ولا كرهها فيه بشي تصرف تتخرحو من حياتها بحالا معمرو كان
ستأذنات من عائلتها بحجة النوم ومشات لبيتها بدلات عليها بتعب وتخشات ففراشها بلا متشوف تيليفون ..غمضات عينيها حابسة دمعة حارة من عينيها تاتحل الباب..غمضات عينيها زعما نااعسة..كانت مها طلات عليها وباست رااسها وخرجات مهولة على بنتها
حلات عينيها وسرسبات الدمعة لي حابسة..جرحها تصرفو مظناتوش ادير هاكاك..بدات تتفكر فهضرة عادل لقاتها كلها معقولة وتبعات هضرة ضحى لي خرجاتها على مبادئها..
عرفات الغلط من لول ديالها..فاش كتسمع هضرة ناس وكطنش رأيك ومبادئك كتجيبها فراسك..غمضات عينيها طامعة فالنوم لاغير..مدازش بزاف تا داها نعااس براحة 
****
كان متكي على حجر موو ويدها ليمنة تتحرك فوق شعرو فصالون لي كيعجبها تجلس فيه..منصور بحكم عارف مو مرا تقليدية وتتعجبها الثقافة المغربية فاي شيء فرش دارو على الذوق التقليدي باش ترتاح كثر..
احساسو ويد مو تتحك ليه راسو لا يوصف..كاين فناس لي يعطي لي عندو ويتسلف باش اعيش لحظة مع واليديه..
"وبالوالدين احسانا"
هز تيليفونو كيصوني من جديد كان عارف انها مغتجاوبش..زفر وحط تيلي وغمض عينيه ومو حاسة بيه عندو شي حاجة..ماحس براسو هو الاخر تاغفا على لمستها

فاقت سماح على شي يد كتحك فشعرها بحنان خلاتها تبتاسم لا شعوريا ونطقات باقي مغمضة عينيها:بابا
عثمان:كاع هذا نعااس ازين(تحنا باسها فراسها)نوضي ابنتي
حلات عينيها بشوي تتعجز ودارت ليه بتسامة خفيفة..تجعدات شوي وتكات على كتفو بحالا معنقاه وقالت:توحشتك
عثمان:(مد يدو لشعرها تيفركو)انا اختي لا ههه مراتي تتغير
ضحكات وبعدات راسها من على كتفو وقالت:شحال ساعة؟؟
عثمان:ربعة ونص نتي راه خمرتي ماشي نعستي
ضحكات تتفوه وقالت:تجمع علي العياا..جيتي من الخدمة؟؟
عثمان:سي عاد دابا وقالو ليا بنتك مقلقة؟؟
كانت جملتو كفيلة باش تفكرها بشنو وقع لي تناساتو للحظات بعد استيقاظها..تلغات بتسامتها لثواني وعينيه حاضيينها لكنها سرعان مارسمات وحدة خرا وقالت:راك عارفني تنكون مشابعاش نعااس تنولي مقلقة هه
عثمان:(صغر فيها عينيه)كي كنبان ليك انا هه مالك؟؟شكون قلقك
سماح:والله ابابا ممقلقة هاني درووك نااشطة والله
عثمان:اوا هي لنضتي تشربي قهيوة مع باباك ..وسلمي على خوك غادي مسافر
سماح:(تعجزاات)هه شهر العسل
عثمان:(وقف)حشااك ههه ياله ابنتي تنتسناوك برا
حركات راسها وخلاتو تا خرج وهي تنهد..مسحات وجهها بيديها وقالت:أستغفر الله
ناضت بالعجز غسلات وجهها وسنانها وبدلات عليها ببيجامة مريحة عبارة عن قميص وسرروالو دارت تقيشرات فيديها وخرجات تتسمع الهضرة فسيجور..
لقاتهم كي خلاتهم من غير ضحى عرفاتها اتكون مشات تشوف صاحبها..
سماح:واش نتوما مابيتوش تمشيو فحالكم؟؟
وئام؛هههه بت هنا نبت هه باك كيجري علينا ونتي تجري علينا الياس اجري علينا 
عثمان:(ضرب بيديه على التليق)اجي جلسيي(شاف فوئام)واختي ضيافة نبي ثلث اياام 
جات زينب هازت بلاطو تالقهوة وقالت بابتسامة: سمحي لينا اوئام راه ولادي ممربيينش هههخ تيجريو ليا على ضيااف
وئام:هخهخخهخهه مالي انا جايا عندهم جايا لدار مراات خووويا
الياس:(كان منشوور حدا فاتي)راه دار ولد خوووك
وئام:ناري ورثك من درووك خههه فينها يسرا
الياس: تتكمل جميع الحوايج باش نشدو طريق
سماح:شحال بتجلس؟؟
الياس:(تيلعب فتيلي)شغلك اختي..جالس عام مجايش
سماح:هههههههخ عاام تالعسل
الياس:(بدون قصد)ياله نكملو فاللحيس
على اثر هضرتو طلقو ضحكات عالية من كلشي الا زينب لي تتنزل عليه بالفوطة حشماانة وهو ميت بضحك
الياس:ههههه واكواااك اعبااد الله..يسرااا يسرااا عتقي احييبة راجلك بيرزيوك فييه
جات يسرا لابسة عليها وحشمانة باقي منهم..نظامات ليهم
ونطقات فاتي:فلت عليك واحد طرح ممم ياسلام
رقية:(خالة زينب)شتي نتا كون بقات عيشة عايشة كون صيفتيها بشي مرض ههه
الياس:هاديك بذات مزيان لي مشات بكري هههههههه
زينب:الياااااس
الياس:هههه اختي راكي زوجيتيني متبقايش تقولي(كيعيبها)الياااس
ضحكوو كاملينن وتجمعو على داك لكاسكرووط من جديد..قولها وضحك عليها..عائلة عثمان وعائلة زينب لي مكتعداش خوتهم وولادهم..تناسات سماح شويا الموضوع وكركرات معاهم مزيان..غادر الياس لشهر العسل..و قررو ولاد عمتها وئام اخرجوو اضورو رافقاتهم بحب هي وضحى لي جات وكذلك مرات انس ولد فاتي..مع كرييمة ونهيلة
داو جوج طوموبيلات وغاديين محيحين كيغنيو فالاوطو..ضوراتهم سماح فمراكش من جديد رغم انهم كيجيو كل عام لكن تتبقا عندهم مراكش لهفة وتيبغيو اعاودو اضورو فيها
نشطو مزيان فجامع الفنا وماجاورها وتعشاو فزنقة مجاو تال الطناش تالليل ..لقاوهم باقي مقصريين..عصرو معاهم على اتاي والحلوة وفلخر قلبوها كارطة كامليين

عائلة سماح عائلة مغربية بامتياز..رغم انهم مبسورين ومسك عليهم الله لكنهم عايشين ادفء العائلي كيما هو..بحرص من عثمان وزينب لي رباو ولادهم على لبساطة..بحكم دوزو سنين فسيدي يوسف بن علي..بلاصة ولاد الشعب
مناضو انعسو تال ثلاثة تليل كلها فين تنشر. 
****
صباح جديد ما فاقو مالين دار تال العشرة الا زينب لي فاقت بكري خرجات عثمان لخدمة ورجعات تنعس مخلية سيدة مكلفة بمدرستها
فاقت سماح هي الاخرى لبسات حوايجها متاجهة للخدمة خدات قهوة فقط ومشات لخدمتها فوق موتورها..وعقلها مرفووع..تناسات شوي الموضوع وندمات لاش اصلا مشات..كانت بغات تعاتب ضحى بعصبية لكنها تراجعات حيت هي انسانة وبعقلها كان خصها تصرف بعقلها ماشي لي قال ليها شي حاجة ديرها..
قررات تمسح الحدث من دماغها وترجع لحياتها الطبيعية وعتابراتو غلط كبيير دارتو وندمات عليه
****
مرت اربعة ايام بالحساب..كلها دازت عادية روتينية عند الكل الا منصور لي قربات اتصالات تجي تقوليه عفاك لباقيش تعيط لهاد نمرة راه بلوكاتك..عدة محاولات بدون جواب..كانت كتشوف اتصالاتو لي كتشدهم العلبة وتتطمر ممسوقاش حيت بردات..جرب عيط ليها من نمرة الخدمة لكن بدون جواب..انفوا قال الو عرفات صوتو وهي تقطع وبلوكات نمرة..بمعنى اخر..قطعات عليه الما والضو وبصريح العبارة صداتو. 
والراجل محدك معفرة وهو تابعك تيرضي غرورو واطيح ليك غرورك فالارض

جالسة فمحلها تتدوي مع عروسة دايرا بتسامة وتتحاورها بعفوية وتعطي رأيها فاختيارتها بحكم تجربتها..
سماح:ان شاء الله امدام..غدا دوزي عندي نذاكرو فتفاصيل
ناضت سيدة بابتسامة ودعاتها ياله غتجلس فكرسيها قشعاتو من بعيد داخل بشوي عليه ومشيتو مقادة شوي واخا تيعرج..ترعات فمها وخرجات عينيها تتساءل شنو كيدير ..
لابس سروال دجين اسود وسبادري برفقة تجاكيط لايحها من لفوق...هاز فيدو كيف العادة باكي تالكارو وجوج تيليفونات وسوارت..قشعها وتوجه ليها بصرامة..طلعات فيه عينيها ورجعات بلور متكية على كرسي براحة:اش حب الخاطر اسيدي
عطا الراسو الاذن اجلس..وجلس سرح رجليه ونطق ببرود:صافا؟؟
سماح:حسن منك(كترعد من لداخل)
دار بتسامة جانبية وقال:نقدرو نهضرو؟؟
سماح:(هزات ستيلو تتكتب فدفتار)معندنا فاش ندويو..خرج فحالك
منصور:(كيضرب بشوي بساروت فوق بيروها)سي كاين فاش ندويو..(نطق اسمها بلطف خلاها تهز عينيها بلا هواها)سماح..اوندوا باغلي
شافت فيه ببرود وداخلها تيترعد حيت نظرتو كانت هادئة تكفي انها تهدئها هي الأخرى..لكن نطقات بجمود:معندنا فاش ندويو..سير فحالك من هنا
منصور:(بلطف)سيلتوبلي..خمسة دقايق
شافت فيه وزفرات بعجرفة عاجبها الحال تذلو:هضر كنسمعك
منصور:ماشي هنا..نمشيو لشي كافي وندويو
سماح:(حطات ستيلو من يديها ورمقلتو بنظرة باردة)بيتي تهضر هضر هنا ولا بلاش ففف
منصور:(بدا كيطلع ليه دم)سمااح الله يهديك راني عيان وجاي على قبلك باش ندويو
من جملتو استنتجات انه كيحاول ابقا فيها ويكسب شفقتها..عرفاتو من نوع لي يدير كلشي باش اتحقق مرادو..ونجح فانها تحن..نطقات:مكانش عليك تجي ملي مرييض..ونساا كلشي لي وقع
منصور:(بابتسامة خفيف )شنو ننسا؟؟ننسا الحنان ولا الظرافة ولا (تفحص وجهها بنظرة كلها اعحاب وبجرأة)الزين
وترها متنكرش انه فشكل وتيعرف كي يلعب عليها..رمشات بزربة وقلبات عينيها منو:لي بغيتي نسااه..الله يخليك خليني نكمل خدمتي
منصور:والله يهدييك..خمسة دقايق مدات مجابت ميكونش قلبك قااسح
زفراات وهزات تيليفونها وقالت:خمسة دقايق
سبقاتو خارجة مخلياه تيحرك راسو يمين شمال وناض تبعها تيعرج..خرجات لبرا لقات طونوبيلتو قدام المحل..وربعات يديها تتسناه اوقف حداها..حدها شافت الطونوبيل سينات دونك حلها هو..طلعات بلاصتها وطلع تاهو ..
بمجرد ماطلعات شمات ريحة الكارو وريحتو هو..كحاات اول كحة ليها قبل مايحل ليها شرجم لي حداها ..دار سمطة وتحرك بيها ساكت
مرتاح نسبيا انها بغات تجي تدوي معاه اما هي كانت خاشية صباعها فشعرها وتتفكر فشنو كدير..سي كانت معصبة ودابا بردات..فين حلوفها وقراراتها لي تبخرو بمجرد مقال راه عياان
وقف بعد خمسة دقائق قدام كافي هي حداهم..حيد سمطة ونطق:نزلي
نزلات بصمت مدواتش بتاتا ومشافتش فيه..يكفي دخلات مرافقاه للقهوة..خداو طبلة..
جلسات وكانت متوقعة اجلس فاص ليها لكن جلس حداها ولان القهوة فيها ليفوتوي جاتو هي هاديك
حط مسائلو فوق طبلة وتيشوف فيها قالبة عليه وجهها..بمعنى اخر جايبة عليه فشوشها..دار بتسامة مبايناش من حركاتها..
نطق بصوت غليض:شنو تشربي
سماح:مابغيت والو(شافت فيه)تنسمعك
منصور:(شير لسرفور وتم جاي)دو كافي نواغ قاسحين
مشا السرباي وتصايبات هي فالجلسة فاص معاه ونطقات بنرفزة:قلت ليك مابغيتش نشرب غففف
منصور:(ببرود)شربي قهوة ورجعي النفس بنتي ليا تقطعتي عليا
عوجات فمها باستهزاء ونطقات:شكون نتا باش نتقطع عليك؟؟
منصور:مامربييش..وخصني طبيب(دار ضحيكة)
سماح:(ستافزها)مزيان مني عرفيتها..دوي كنسمعك(شافت فساعتها بملل)بغيت نمشي دغيا تابعاني الخدمة
منصور معجبوش تصرفها..كأنها قللات منو..خزر وجمع غوباشتو ونطق بصرامة:بحالا الباطوات تيتسناوك تعطيهم لوتوغيزاسيون..ريحي لارض خلينا ندويو
خزرات فيه ومرضاتش حساتو قلل منها..ونطقات:ماشي شغلك..اكونو عندي تا البيكالات..ولايني سري انا لي جيت معاك عاود اما من داكشي لي درتي تا سلام تالله منقولوش ليك
منصور:(هز صبعو فوجهها)هاديك بضبط لي بغيت نعرف..شنو درت ليك تا درتي هاكاك؟؟
عضات حنكها من لداخل عاقدة سبعة فربعة ونطقات:شوف نتاا!!
منصور:كون كنت عارف منجيبكش لهنا..دوي وشرحي ليا نفهم
سماح:(بنرفزة)واش كضحك علي امنصووور؟؟
منصور:سماح راني معارفش اش درت ليك تاتقلبتي ديك القلبة
سماح:(حطات يديها كضرب بقرون صباعها فطبلة)وايليي..دابا نتا تبغي لي تمشي عندو ومتخلي مدير عليه فلخر اكمد ليك فلوس باش شريتي ليه سوفيت بحالا هو جيعان..
هز حاجبو ومهضرش الشيء لي عطاها الضو الاخضر تهضر بدون توقف:جاتك عادي انني نجي عندك فرحانة وبغيت نطمن عليك وتجي نتا تعاملني كأيها ناس..بحالي بحال الشيفور لي جاب ليك حوايجك
منصور:(بهدوء)والله مفهمت شنو فيها؟؟نتي شريتي ليا وانا خلصتك
سماح:(بعصببة )واش نتا مسطي..كون بغيت نشد كون شديت من لول
منصور:فففف(مسح على وجهو)دابا هادشي هو لي مقلقك وخلاك تبلوكيني ومتجاوبينيش
سماح:هادشي فيه الكفاية كان خصك دير ماكثر يااك؟؟
تنهد وهز راسو فسرباي لي حط ليهم قهوة..جغم منها وبقا كيشوف فاص ليه فحين هي حسات براسها بردات خوات ليه كلشي..قلبات وجهها لجيهة خرا مخلياه منو لقهوتو وتيحلل فهضرتها..
زفر وبقا ساكت تيحلل هضرتها كثر وكثر وهي الاخرى كثر منو..محسات هي بلمستو على يديها ..تا ضربها ضو..تلفتات بسرعة ليه تعاتبو لكن النظرة لي لقات فاص ليها كانت كفيلة باش تراجع عن رأيها
كانت نظرة ندم وخجل من تصرفو لي كون مشرحاتوش ليه مكانش غايفهمو..كيفاش غيفهمو وهو مكيحللش تصرفاتو مكتافي بتحليل تصرفات الناس لا غير.
شافت فيه وتنهدات وقلبات وجهها بغات تجر يديها لكنو زير عليها تاتلفتات ليه متساءلة ونطق بصوت هادئ:سمحي لياا..كنقسم لك برب الكعبة مكنت قاصد نعاملك هاكاك..غير انا
قاطعاتو:نتا شنو؟؟نتا كتشوف هي راسك لا غير..جيت عندك بفرحة وبغيت نوقف معاك تاتخرج وفلخر تمد ليا فلووس فيدي..بحالا جيت نسعاك
زفر ونطق ويديه كيداعبو يديها:شوفي سماح..باش نجيك من لخر..انا ماشي شي واحد لي مخالط مع نااس باش نعرف شنو العيب شنو لي ماعيبش تصرفت على حساب طبيعتي شنو قالت ليا
جرات يديها بنرفزة:اوا خليك فطبيعتك..وقيلني عليك..اصلا انا شنو جيت كنسمع ليك هنا
شاف انها تعصبات بالفعل وهو يجرها باش متنوضش ونطق بهدوء وعينيه فعينيها الغاضبين:سمااح الله يهديك..(تنهد)واخا انا غلطت وجيت طالب السمااح
سماح:(شافت فيه بحدة)نقدر نمشي
زفر بدا كيفقد اعصابو ونطق:والله يهديك راه دوينا..الله يسامح ميكونش قلبك قاصح..كون مكنتيش هاماني منجيش نطلب منك سماحة
سماح:(بدات تتكالما)درتي انجاز صراحة ففف
دار بتسامة جانبية وجغم من قهوتو وقال:شريي قهوتك تكالماي شوي اعييشة
شافت فيه قارنا حجبانها كانت نظرتو مسالمة وتعابير وجهو مرتاحة ونطقات:وصلني منين هزيتيني
منصور:جلسي نذاكرو شوي ونوصلك
سماح:(باصرار)بغيتي تشرح شرحتي وسمحتك..طلبتي سماحة وسامحتك..اش باقي نداكرو؟؟
منصور:(شاف فيها وهضر تيطنز)بصح سمحتي لياا صافي هي رتااح
سماح:هي رتاح ونعس على جنب الراحة اسي راان(بتهكم)
منصور:نتي خاص الواحد اهز معاه جوج مالبورو عاد اهضر معااك
سماح:(خرجات فيه عينيها)تتكمي.؟
حرك راسو بالايجاب ونطق:ودابا بغيت نكمي ولكن الانسة كتنخق
عوجات فمها وبغات تنوض ونطقات:وا حيد وكمي على راحتك
رجعها لبلاصتها كيطنز وقال:واصافي داباا..ميكونش راسك قااسح
سماح:(زفرات)بقا فيا الحال بزاااف امنصوور..نتا نهار شريتي ليا دوا تالحساسية بغيا نعطيك فلوس دزتي فيا ومشيتي علااش؟؟
منصور:صمت
سماح:(ستأنفات كلامها)حيت مرضيتيش تشد مني ولا جاتك عيب وحشومة
منصور:سماح 
قاطعاتو:سمعني تالخر..نتا عاملتيني بحال شي وحدة عادية
منصور:(بحزم)علاش ماشي عادية؟؟
صدمها جوابو لدرجة تشللات ليها الهضرة..عاود قمعها بحالا قاليها اشنو تكوني كااع..سرطات ريقها هزات تيليفونها وبغات تنوض سامحة فيه بعدما غرغرو ليها عينيها..لكنو حبسها بجهد وكالاها برجلو لي مضراهش..شد يديها وبدات كتنتر بغات تطلقها..ولات حمرة مرضاتش وعينيها مضببين بدموع..شد يدو وضعها على ذقنها مدورها لعينيه ديركت ونطق بحدة:علاش هادشي كولو؟؟علاش هاد الاهتمام وتنوضي فصباح بكري وتجي عندي والفطور والحوايج
لي حبساتو راه تطلق دارو سرر على وجهها ونطق :حيت عاجبك(صدمها خرجات عينيها بعصبية)وتانتي عاجبااني(بهدوء)اما علاش نتي ديري هادشي وانا نجي ونطلب ونشد ليك الخاطر..
بقات كتشوف فيه محرجة بحالا كشف ليها وراقها..سرعان متفكات من يديه ومسحات دموعها وقلبات وجهها لجهة لخرا مخلياه حاير معاها..جنسها حاار بزااف عصبية وبكاية وهذا هو اصعب نوع..حيت كتبين القوة والضعف فدقة وحدة
خلاها للحظات تتخمم تاهيا او بالاحرى كتخبي وجهها منو..ميفضحهاش الخجل..لي متالكها من كلمة تانتي عاجباني..معرفاتش شنو حابسها تنوض فحالها وتخليه تتهرب منو..لي عارفا ان قلبها كيضرب اضغاف العادة..نيفها كيشم ريحتو قريبة ليها بزااف
سكت وسكتات ولي يتجرأ ويهضر مكاينش..
تنفسات بارتياح بعدما بردات..شافها مدات يديها للما الموضوع مع القهوة شربات منو وردات الكاس كترعد..مقادراش تشوف فيه وعينيه ربكووها..
نطق بلطف:نمشيو؟؟!!
جا سؤالو كأنه رحمة ليها..رحمها من عذاب شوفاتو ومن عذاب الموقف..وقفات بسرعة ووقف تاهو لايح فلوس فوق طبلة هز مسائلو ودار ليها طريق باش تخرج تسبقو
غاديين فنفس الخط وقراب لكن تاواحد مدوا مع الاخر..ركبات بصمت حداه وطلع تاهو ديمارا..والسكات بحالا فيهم لقوة..حسابها غيديها للمحل ديالهم ساعا شافت الطريق غير..نطقات باستفهام:فين غاديين؟؟(شافت فيه)
منصور:(مركز مع الطريق)انتغدااو(شاف فيها بابتسامة)مافيكش جوع
سماح:ولكن ياله الطناش هادي
منصور:علاش معاش كتغدااي؟؟
سماح:الوحدة ولا جوج
منصور:اوا كيما فطرتي معايا فصباح تغداي معايا بكري(بابتسامة)واخا
حركات راسها ببلاهة ورجعات عتادلات بلاصتها تتشوف فاص ليها وتتقول شهاد المخلوق العجيب..تا سمعات موسيقى ديال فوضيل باغنية "يانا وراني يالي نعيشك فلاجواا"..

خداو طبلة وسط الناس فمطعم خاص بالحوت بشتى انواعو..كان جااس حداها وماشي قدامها..طلب ليهم على ذوقو بدون ميسألها وهي نيت محكراتش..مدواوش باقي ومعاتبوش بعضهم..سالا الكوموند وتلفت ليها وقال:تشربي شي حاجة مع هادشي؟؟
حركات راسها بنفي ومشا السرباي..عاد تقاد معاها حاط يديه على كرسيها ويد على طبلة وقال:كتاكلي الحوت بعدا؟؟
سماح:ممم(بدون متشوف فيه)
ياله بغا يدوي رن هاتفها وجاوبات:الو
نورة:فينك الشيخة؟؟
سماح:(حكات اذنها)خرجت نقضي غرض ونرجع..علاش وقعات شي حاجة
نورة:جاو شي كليان
سماح:تكلفي نتي ازين انا واحد ساعة ونجي
نورة:اوك
قطعات معاها وحطات تيلي وقال محاول اجبد معاها مواضيع:نتي لي شادا الخدمة دروك؟؟
حركات راسها باه ..مد يدو دور ليها وجهها ونطق:شوفي فيا ودوي
سماح:(حنات عينيها)مخليتيش ليا فين تبقا نشوف فوجهك من فعلتك
منصور:لي سمع فعلتك يقول هادي معرت شنو درت..علاش كضخمي الأمور كون شرحتي ليا ديك ساعة كنت غنعتاذر منك ونكونو مزيان لاش هاد تكرفيسة
سماح:تاواحد مطلبك تكرفس..كون فاش بلوكيتيك وقرتيني كون راك بخيير
دار بتسامة خفيفة وقال:واش انا لخاطري؟؟(مد يدو شد يديها وباسها من القاع الشيء لي صدمها)سمحي لياا
توتراات وولات كاملة كترعد..حسات بشفايفو تحطو على راحة يديها بدفء وحنان خلى غضبها اتلاشى والتبوريشة تدوز فعظامها..حدها رمشات بزربة وجرات يديها وقالت متوترة وحمرة:صافي موقع باااس
حس انها حشماات وزاد اعجابو بها من هاد التصرف..الخجل لي ولى قليل فينا لقاه فيها
منصور:صافي تصالحنا الالة هه
شافت فيه ورسمات بتسامة حنونة:صافي ههه
رجع راسو لور على لكرسي براحة بعدما حزرها واخا شحفاتو..اما هي قلبها تيضرب وغطير بالفرحة من معاملتو..كيمارس سحرو الجدي عليها تكتولي هي تشوف وتفرنس..يمكن كون كانت عندها خبرة مع كحل الراس كانت غتجيها هاد التصرفات عادية لكن هي كانت تجربتها وحدة لا غير..نساتها مع الوقت صافي
حط ليهم سرباي الغدا لي عبارة عن منوعات تالحوت والشلايض..
منصور:بصحة
سماح:يعطيك صحة
باشرو الاكل بجوج فصمت وهي تتاكل ومتوترة حاضياه بنص عين..كياكل الخضر بزااف لي فصالاد..وكياخد عصير ..ومقربش للخبز بتاتا..فحين هي دخلات فطاجين بيل بيل طول وعرض عجبها..تاسلا عاد مسح فمو وتسوخر لور حاضيها كي كاتاكل..دغيمات صغار بدوك ليدين الصغار اشدهم الواحد اجمعهم فكفة وحدة..خاليين من صباغة تضفار طبعيين ..مبرودين وحمرين
نطق بهدوء:كيداز عرس خوك؟؟
سماح:(مسحات فمها)زوين..(شربات الما بتوتر حيت حاضيها)كي بقات رجليك؟؟
منصور:هاهيا كتبرا..مورتينيش تصاور العرس؟؟
صدمها سؤالو كيبان من نوع لي مكيديهاش فالتفاصيل..بتتسمات وجبدات تيليفونها كتقلب بتوتر على تصاور من لول حيت عندها بزااف..قربات حداه بشوي مخليا فين تنفس براحة ووراتو:هادي لي لبست
شد التيلي بيدو كيحقق فيها بالتكشيطة كتبان غير..بطبيعتها فلباسها تتبان عادية..مكتكلفش راسها فلباس بزاف وتا المستحضرات التجميلية لي يخليوها تبان كبيرة مكديرش بزاف
شاف فيها ونطق:كتسيفو بالماكياج هه جيتي زوييينة(دوز )شكون هاد سيد؟؟
سماح:بابا
منصور:بصح؟؟كيبان صغير
سماح:(بعفوية)سي حيت مهلي فراسو هه فراسك باقي تايلعب كورة مع خويا وتيخرجو مرة مرة اجريو يعني كيتحرك
منصور:الله يخليه ليك(دوز لطوف خرا)تبارك الله هادو عائلتك؟؟
بتاسمات بحماس وبدات تتوريه بصبعها:هادي ماما
نطق مقاطعها :نسخة منك هه..زوييينة هاد ماماك
سماح:اسمعك بابا اعلقك ههههههه
ننصور:ههه قلنا هي لي كاين
سماح:هذا راه باين خويا ههه مكنتشابهوش كاع هو كيشبه لبابا وانا لماما..هادي مراتو يسراا وهادي عمتي فاطمة زهرا وهادي عمتي وئام وهذا لي حداها غليض ولدها ضياء ولاخر عمر..
منصور:(حط صبعو على راجل)وهذا شكون؟؟
سماح:راجل عمتي فاطمة زهرا..وهادا ولدها وهادي مرااتو وهادي بنتهم ضحى ولوخرا نهيلة
منصور:ماشاء الله عائلة كبييرة هه
سماح:بزااف..هذاا خو العروسة وعشيري فنفس الوقت
هز حاجبو وشاف فيها:كيفاش عشيري؟؟
سماح:يعني صديقي هه قرا معايا وبقا عشيري تاتلاقات ختو بخويا وولينا عائلة
حرك راسو وقال:مزيان..
دوز وبانت ليه تصويرتها بلبسة الشلحة بتاسم تاتغمضو عينيه:اصلك شلح؟؟
سماح:لاا ماما لي شلحة..انا اصل بابا عربي
بتاسم ومد ليها تيليفون مساخيش بديك تصويرة وقال:بصحتكم
سماح:يعطيك صحة..
حطات تيليفون حداها وقالت:نمشييو؟؟
منصور:(رجع لور )باقي الحال..
سماح:حم هي لتكون عندك شي شغال!!فالمدرسة
منصور:هه لا ماشي انا لي كنجيري..يعني مسالي شوي
سماح:(باهتمام)وشكون تيسير؟؟
منصور:لي جيرون..معنديش الكانة 
هزات حاجبها وقالت:حضي رزقك ليشفروك هههه
منصور:(شرب الما)بحال كي شفرتك نتي ففلوس ليفينمون؟؟
ضحك بشوي وجمعها دغيا وقالت:ههه لا حاشا..هي سوء تفاهم وصافي(حنات عينيها)
بتاسم وخشا يدو فجيبو جبد باكي تالكارو وبريكة شاف فيها وقال:ممكن؟؟
حركات راسها بنفي ضاحكة:تنتخنق ههه
رجعو لجييو وقال بابتسامة خفيفة:وشنو انا مولف نكمي مور الغدا 
سماح:اوا نمشي فحالي ههه
شدها من يديها حتاضن يديها بين يديه ونطق:جلسي بناقص منوو هه
بتاسمات ليه وطلعات الحرارة لحنوكها من خجلها منو..رمشات بكثرة وهو مقابلها بعينيه لي كي عيون الصقر كيكمشهم فيها وادور بلبوزتو على وجهها كولو..خجلها ودوزات يديها على وجهها وضحكات وقالت:برااكة!!!
مسح على لحيتو وقال:اتجاوبيني فالليل واخا!!
حركات راسها بالايحاب وقالت:توصلني راه مشا الحال 
منصور:واخا الالة
شير لسرباي جاب الحساب خلصو وناض وقف مد ليها يديه..حسات بالارتباك والخجل..يديه السمراء ممدودة ليها واليد لوخرا هاز فيها مسائلو..عوجات راسها بدلع وعضات على شفايفها ومدات يديها متغاضية على عقلها لي تيقوليها شنو كديريي
عطاتو يديها وحتاضنها بين يديه..وغاديين فنفس الخط..كتحس براسها تطير وكتفرفر ومعدتها كتغني..واحد السحابة من الامان والراحة وهي حداه..مكرهاتش لو تحط راسها على كتفو وتزيح الباقي من الهم
***
لحظات...
تكتب التاريخ وتبقى في الذاكرة
الذاكرة التي ستذكرك ماحييت..
#سكينة

ركبات فالسيارة والفرحة غتخرج من عينيها..احساس جديد حاس بيه قلبها..ماعرفاتها فرحة او خجل ..لي عارفا هو قلبها كيضرب بجهههد من الفرح
ركب حداها وكسيرا اتجاه الخدمة ديالها وراسو تيزدح خصو اكمي..ساعتين ونص مكماش راه فوق بخيير معاها
مهضرش باقي حدو غادي بكالم تا وصلها..حيدات لاسانتيغ وقاالت:بسلامة
تلفت ليها دار ابتسامة خفيفة وقال:صافي سخيتي بيتا؟؟
سماح:نتا باطرون انا راه خدامة عند خويا ههه
منصور:متجيش تخدمي عندي؟
دارت ضحيكة وقالت:عطيني مليون فالخلصة شبان ليك؟؟
منصور:(حك شعرو من لور)نعطيك الالة مليون هه ياله سيري مانشدكش..
حلات الباب ونزلات فرحانة والضحكة مشركة ليها الفم..هي تتفرنس للخلا
اما هو بقا متبت ليها للعين ويدو كتشعل كاارو..كمش عينيه كينفث الكار من فمو تادخلات وتحرك مرتاح..مد يدو شعل موسيقى هادئة لفوضيل والوجهة خدمتو
***
دخلات سماح لخدمة وحدة خرا..هزيتي ووحدة وحطيتي وحدة..كانت هادئة قبل وعادية دابا دخلات بطاقة عجيبة ومفعمة بالحياة..
المرأة عامة كلمة تحييها وكلمة تقتلها وبين تضارب الكلمات كيجيو الافعال
جلسات فكرسيها تتفرنس للغادي ولجاي..وتخدم بنشاط
.ويديها باقي فيهم لمستو..كانها ريحة
****
وكانت لمستك عطرا رافق انحناءات جسمي ما حييت
****
رجع لدار بعد يوم متعب جدا..بغا هي يشوف مو واجلس معاها ازيد من نشاطو
تلاقا الخدامة الشابة نطق بهدوء:فين مي؟؟
الخادمة:على سلامتك اموسيو...راها فالصالة الكبيرة مع شي ضياف
هز حاجبو بتساءل وقال:شكون؟؟
الخادمة:ختك اموسيو وولادها
قطب حجبانو فالبلاصة ..اعدى حاجة عندو هي شي حد منهم اجي عندو..مايبغيش اخصر الجو لي خلق لمو..الجو المرتاح ليها ..خوتو قليل فاش كيسولو فيه مكيحملهمش يجيو لدارو..معندوش تا معاهم عساك اتجمع معاهم
توجه بخطوات سريعة للصالة لي كانت كيبيرة بزااف مفرشة بالتقليدي على حقو وطريقو من الفراش تال الديكورات مفرش كلشي لذوق مو حيت تيعرفها بلدية
قشع ختو لي قرينتو شوي فالعمر مفاوتين هي بشي شهورا..كانت لابسة جلابة فالخزي وطالقا شعرها القصير حد كتافها بدون قطرة ماكياج..نيفها حمر باينة فيها باكية..حداها بنتها رميساء وولد اخر عبد الرحيم..ضارين على طبلة تالخشب للمنقوشة فيها صينية تاتاي على حقها ودوازها
بتاسمات راضية بصعوبة فحين اختو لتازمات الصمت وجاها التوتر..تقرب لمو مغوبش باس راسها زيديها وقال:لالة راحتي لباس؟؟
حركات راسها ومدات يديها ليمنة لي مقادا حطاتها على يديه زعما بخير..حرك راسو لختو بمعنى شنو ديري هنا مي هي فهماتها واش لباس؟؟
زهيرة:لباس اخويا ونتا؟؟رميساء عبد الرحيم سلمو على خالكم
ناضو لدارري لعندو سلمو عليه وهو قابلهم ببرود..ونطق:مالك؟؟
زهيرة:حمم نهضرو بوحدنا
وقف بدون جواب وناض خارج تبعاتو حانية الراس بغات تفركع من البكا..
خرجو لبيت اخر جلسو وهي متخوفة منو ومن برودو..حاط رجل على رجل وتيشوف فيها بغموض تيتسناها تنطق..توترات وخافت منو رغم انهم ممفاوتينش بزاف لكن بحكم الظروف مقدراتش تعاشرو وتحيد داك الحاجز..اي نعم خوها لكن معاشوش الاخوة بتاتا..اخوة بدم ولوراق
فقط..
حمحمات وتساقطو دموعها قبل ماتهضر الشي ء لي خلاه يستغرب..نطق :مالك؟؟
زهيرة:اهءهءهء قصدتك اخويا حيت تسدو علي كاع لبواب
منصور:(حط مرافقو على ركابيه)اشنو وقع؟؟
زهيرة:تخاصمت مع رشيد
هز حجيانو باستغراب:شكون هاد رشيد؟؟
زهيرة:(مستغرباتش)راجلي
منصور:اييه وانا مالي..راني جيرون تايكول ماشي قاضي
تغرغرو عينيها بجهد وهبطاتهم حجر وقالت مفركعة بالبكا:بغا يتزوج علي هءهءهءهء ومشييت عند با وجا من جيهتوو
وسع عينو فيها وقال:هادشي مغريبش على باك..

زهيرة سرطات ريقها وبقات تتبكي وتفرك يديها:جيت عندك حيت منصفنيش..كلشي نقبلو اخويا الا الضرة هءهءهءهء مخليت مادرت معاه وصابرة معاه لطبعو واجي فلخر ابغي اتزوج علي ببرهوشة قد الخلا هءهءهء وبا جيت عندو غضبانة كنتسنا منو ينصفني ساعا هي هضر معاه دغيا نساا هءهءهءه وقاليا نتي ماشي لولة ولا لخرة لي تزوج عليها راجلها(زادت فحدة البكا)هءهءهءهء وقاليا سنة الحياة
منصور:(مسح على لحيتو)اوا الحاج هو هذا..كلشي الا لعيالات..ودوك رعاون تخوتك مدواوش؟؟
حركات راسها بنفي:هءهء ميقدرووش ادويو قدامو راك عارف
منصور:وبسلامة تتسنايني انا ندوي ليك معاه؟؟
شافت فيه بانكسار كانها ندمات لي جات عندو..زهيرة انسانة واصلة ببوسطها صحيح فالدولة ..مخصها خير هي وحيدة الحاج عبد العظيم وسط دراري تربات احسن تربية وتفششات بحال لشي اميرة ممخليش الحاج عبد العظيم من جهدو معاها لي حلات عليها فمها تحضر..معمرو حط عليها يدو تا بضحك وتاهي كابرا محتارماه ودايرا بحسابو..تزوجات من زوجها رشيد صغيرة تاهو بوسط صحيح فالدولة وولدات منو زوج دراري رميساء وعبد الرحيم
ناضت جمعات الوقفة بغات تمشي فحالها وهو يحبسها بدون مينوض من بلاصتو:جلسي لارض..
شافت فيه بدموع ونطقات :انا جيت عندك حيت قلت خويا الكبير توقف معايا متخليش كرامتي امرمدوها ليا واردوني مذلولة
حرك راسو بتفهم وناض متوجه لعندها متعرفو علاش اناوي ولا اش تيفكر..نطق ببرود:انا نوصيهم اوجدو ليكم البيوت..
حركات راسها بالايجاب. حيت مالقات جهد..رغم الفلوس لكنها بغات الحيط علاش تسند واوقف معاها وجات قصداتو
نطق بتردد:هاد خينا هذا علاش بغيتي تطلقي منوو؟؟
حركات راسها بسرعة :اه اه مابقيتش حملتوو..معيشني فالويل كل نهار مخاصمة فشكل..
منصور:(محافظ على صرامتو)باك فراسو؟؟
حركات راسها بنفي ودموع هوادين من عينيها:لا..مفراسوش واش جييت..(بترجي)عاوني نطلق اخويا هءههءه نتا لي بقيتي ليا
منصور:اكون خير..سيري رتاحي
حركات راسها بايجاب ومشات من حداه مخلياه متبعها بعينيه تيشوف فامرها كيفاش..من نهارو قاطع معاهم الما وضو..مكيضسرهمش عليه..مي فاش لتاجأت ليه من الرجولة ميفوتهاش عساك لكانت ختو..زفر وتوجه لعندهم لقا دراري جالسين بهدوء كيشربو اتاي بدون ميديرو صداع..لاحظ انهم مربيين حيت مكيهزوش فيه عينيهم..بتاسم لمو وباسها فيديها وقال:مي كيداز نهارك؟؟مزياان؟؟
حركات راسها بالايجاب وحتاضنات يديه بابتسامة حنونة وتاهو عطاها ليها..دخلات الخادمة تتحط طباسل المسمن وهو ينطق موجه ليها الهضرة:وجدي ثلاثة تالبيوت 
حركات راسها وقالت:واخا اموسيو
زهيرة :سمح ليا اخويا جينا هجمنا عليك
ناضت رميساء عندو باستو فحنكو وقالت بعذوبة:سمح لينا اخالي برزطناك
تصدم منها وحط يدو على كتفها وقال:مرحبا..(شاف فمو)مي هاني لفوق نرتاح وننزل نتعشا معااك
حركت راسها ومشا مخليها مونسة بزهيرة وولادها..هي بطبعها عمرها كرهات حجيية ولا ولادها حيت مشافتش منهم الشر..وهوما كذلك
جمعات معاها شوي زهيرة وتتشكي ليها همها وتنحي عليها..
فحين هو طالع لبيتو مهدود باغي هي ينعس..وتيخمم فتصرف ختو لي دارت وفحريرتها..دخل لبيتو حيد الساعة وبدا تيتخلص من حوايجو قصد دوش ديركت خرج كيعطعط بالروايح العطرة..مدور عليه فوكة على خصرو مبينة فورمتو العامرة..واقف على صح..اي نعم رياضة وماكلة تصح لكن عندو شوي تالكرش خارجة حيت ممواضبش على الرياضة..ذرعانو عامرين بزاااف وكاسيهم زغب الاسود..
بدل عليه بالخف بملابس بيتية مرتاحة وهز فوطة كيمسح شعرو وراسو تيضرب فاخماس واسداس..هز تيلي دوز نمرتها بدون مايتردد..رن عدة مراات عاد جاوبات بصوت رقيق مرعد:الو
منصور:سماح..لباس؟؟
سماح:حم بخييير ونتا؟؟
منصور:تخي بيان..شنو نتي فدار؟؟
سماح:اه عاد شوي باش دخلت..ونتا
منصور:معندكش شي كلمة من غير ونتا ونتا هه
سماح:هههه معرفتش هههه..
منصور:اوا سبحان الله..قلت القاك فشي عرس
سماح:لا مقدرتش عياانة باقي العيا تعرس خويا كيرجع معايا..صيفطت هي دراري
منصور:شحال ونتي فهاد ضومين
سماح:تنخرج وتنرجع..قول تقريبا شي ثلث سنين..
منصور:مزيان الالة..متتفكريش ديري شي بروجي ديالك؟؟
سماح:(بمزح)ههههه تدخل معايا شريك..جيب راس المال وانا الفكرة
دار نبرة تمزاح بدون مايضحك وقال:اري ليا نتي راس المال وانا نسير هههه
سماح:هههخه مالك سقرام خلينا نديرو مشرووع
منصور:واخا الالة نديرو مشروع ..دونك غدا عندنا اجتماع عمل فصباح
سماح:زربتي عليا ههه ناس كتسبق الخدمة عاد الاجتماعات ههه
منصور:نشوفو اجتماعنا حنا بعدا ..
سماح:ان شاء الله
منصور:نتسناك غدا نفطرو بجوج!!
سماح:هاا..تنشووف؟؟
منصور:كيفاش تنشوف؟؟على هاد الحساب باقي شادا فخاطرك؟؟
سماح:لا حاشا الخواطر صفاو هه الصباح نرد عليك!
منصور:ان شاء الله..ياله سيري ترتاحي 
سماح:تصبح على خير
منصور:بونوي..

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.