يوم جديد بأحدات شاحدة جديدة...شميشة حارة تربعات على السما الصافية وعصافير حدا بالكو كوزينة دار تاج الدين كايغردو ..
وهو واقف قدامو بشوميز بيضة وڤيسط بيج تقيلة شوية مع مشوار اسود منقط طاويه فالجيب الايسر ديال .. سروال توب نفس لون الڤيسط وصباط بني لامع لمعان كايشبه للون عيونو العسلية البراقة..
واقف كايتنغم بقهوتو وساهي كايخمم فالي شاغلة بالو..كايخمم فالساكناه اللي مشات معاها راحتو..فاللي عدم تواجدها بالدار خلا نوع من الخنقة واكسجينو المفضل يغيب معاها.. فاللي ولا مدمن عليها اكتر من القهوة اللي بين ايديه..واصعب من الحب والولف هو الإدمان..
زفر وضار حط الكاس فلاڤابو وخرج من الكوزينة كايحك عينو من قلة النوم وطالع لبيتو الفوق .. دق ودخل لقا الضلام وهو باقي مليوم على السرير مع ريحت الشراب اللي عاطية منو..خنزر فيه ومشا للخاميات حيدهم وحدة وحدة .. دخل ضو الصباح واستقرو أشعة الشمس نيشان على وجه جمال اللي خسر ملامحو وضور وجهو بانزعاج وصوت مدعدع قال
جمال: اععع سدو الزمر
ركلو ركلة وحدة حتا ناض مدهوش كايضور راسو بعينين شبه محلولين
تاج الدين: صباح النوور اسي السكايري ..صاڤا بيخير
لاح راسو مرة خرا على المخدة والشقيقة غاتفرق ليه الراس: شهااد المرض اصااحبي تفووو
حل جمال عينيه على وسعهم والصدمة طالعاه خرج بسرعة تابعو تزامنا مع المصعد اللي تسد على وجه تاج الميت بالضحك وخلاه وااقف مدهووش حاط يديه على عنقو مخنزر وكتيحاول يتدكر
هيام: غانغسل غير وجهي "ضارت عندها كاتحك شعرها" جيبي ليا شي كسوة من عندك نلبسها
أميمة: واخا واسربي
خرجات مرة خرا وهيام دخلات للحمام غسلات وجهها بروشات سنانها مزيان عاد خرجات للبيت مع الحلة ديال الباب ودخول اميمة بابتسامة مشرقة ..هازة كسوة صيفية حمرة فيدها كاتجي طويلة وهابطة على الكتاف بحال شكل الغجريات
أميمة: هاانتي هادي غاتجيك فنة
خداتها كاضحك وسرحاتها قدام المراية: مابان لك غاهاد اللون
أميمة: ويلي كون تعرفي الحمر كيف كايجي مع البيوضية اللي فبشرتك تلبسيه بالليل وبالنهار
عوجات فمها وطلعات ..سد عليها الباب وغمز تاج كايضحك ..قبل مايدور يطلع شاف صدفة جيهة الباب ولمح نجاة نازلة كاتقرقب بالطالون والكسوة مفرفرة معاها ..بدات كاتوسع بسمتها فوجهو هو يتبلوكا ووقف بلاصتو تالف مابقا زاد ولا عرف واش يطلع عاد يهبط ولا يهبط عااد يطلع
طلعات فيه عيشة حاجب وتاج كدلك ضار شاف فين موجه عينيه هو يخنزر وعطاه للكتف
تاج الدين: اصبحان الله الشرييف
حسام: احم احم كح كح كح كح كح
دازت من حداه شادة الضحكة وركبات فسيارة تاج وهو متبعها بالعين حتا فيقو صوت تاج الدين
تاج الدين: حساااام
حسام: هااا ؟؟
تاج الدين: طلع..طلع خليني هاني
حسام: اجي اجي بعدا..ياك انا خطبت قبل منك..ادن نورمالمو اللي خاصو يتجوج اللول هو أنا ياك
تاج شاف تاشاف وزاد خلفة مع الطريق ركب فسيارتو وديمارا مخليه واقف حتا دقات عيشة فالزاج وقالت
مرجان: بغيييت ههه غير شوف نتا شغلك وخرج هاد السوق متافقين
جمال: اللي بان لك ديريه ههه
طلع هو الفوق ومرجان دخلات للكوزينة كاوصيهم شنو يزيدو
📍ولكِ في قلبي عرش👑
.. لا تجلس عليه انثى سواكِ ،
..تحرسه ألآف النبضات
.. وتهمس "أحبك" بالثانية
......... ألآف المرات 📍
...
شافت راسها فالمراية وحطات البودر من يدها مبسمات بسعادة كاتمغص ليها الكرش و التوتر واضح فعيونها..
وقفات بفستانها الابيض ونقاط بالدهبي مرشوشة عليه من لتحت وطاالع لخصرها المشدود وللسميطات العراض اللي شادينو..شعرها مموج بانسيابية على ضهرها ومكياج مركز على لون عيونها مع عكر حمر ماط راسم شنيفاتها المفتحين
بقات تطلع وتهبط فراسها وقلبها مع مرور الدقائق كايزيد يخبط بشعور اول مرة تعيشو حتا تفتح الباب وضارت قافزة
أميمة: هههه مالك تخلعتي
..دخلات عندها بكسيوة طويلة وردية، اللون المفظل ديالها ..شعرها ضافراه للور وخصلات ملويين خلاتهم القدام مع مكياج ناعم لوجهها..بسمات وماحدها كاتقرب وهي كتنباهر وتشوف فهيام الواقفة قبالتها
مينة: اختي انا مگلت والو راك عارفة الناس وعقل شي بعضين كي داير..انا بغيتها تكون معززة معاه ومكرمة فدار وحدة واش كلامي عييب..راها بنتي وحياتي كلها وانا كنفكر فيها كل يوم ودقيقة وبغيت نشوفها فرحانة بضارها وبراجل يستاهلها
مرجان: يااودي ماگلتي عييب الالة كلام الحق كلو عندك.. دابا غاتنوضي طلقي البشرة ونستقبلو الناس بجوج ههه صافي؟
تنهدات وقالت: واخا اختي انا نايضة
تدق الباب وناضت مرجان خارجة وقالت: خليت ليك واحد قفطان معلق تما ..لبسيه حسن من لخرين
مع الدخلة وعينين عيشة كايدورو هنا وهنا ..مقطبة دوك الحجبان فكل بلاصة كاتشوف وتعبر
هالجردة قد السخط يجريو فيها العودان والربيع تبارك الله متول ومقاد..هالبولات مشتتين فالارض كايشعلو تلقائيا بالليل ونافورة كبيرة من الرخام كاتبان ليها من بعيد
هاد الفيلا قدام عينيها على شككل قصر وغير الباب قدو قدااش وخشبو تقييل فخم، اما الكارد كور خلاص خلاوها غاحالة فمها وتخنزر جااهة كلشي فشكل بحالا داخلة لمسلسل سامحيني اللي تتقيل تتفرج فيه ودار كوزان قدامها..
وقفو قدام الباب وتاج حداها هاز كرطونة مربعة ومشموم ديال ورد الجوري مقطب حواجبو كاييتنفس كلا مرة بارتباك ونجاة حداه هازة بحال كرطونتو وحسام كدلك..
تحل الباب من طرف الخدامة بأدب نزلات راسها وبابتسامة شارت ليهم يدخلو وداكشي اللي دارو
ضحكات بببشاشة ومشات سلمات عليها وهو مبتاسم كايشوف الفوق ويدور عينو هنا وهنا باحت عليها وبنفس الوقت نزل ادهم بملابسو الرسمية للخدمة..سلم عليهم ومع تاج بحرارة
ومرجان كاضحك ليهم
مرجان: تفضلو دخلو مرحبا بكم الدار داركم
عيشة: اللله يكبر بيك الالة ههه
..خدات الخدامة داكشي وهوما تبعو مرجان وادهم للصالون وعيشة غير تترمش وتشوف بلا هواها اعتارفات باللي الناس همة وشان نيييت مااعندها فين تحل فمها
....………………………
دخلات أميمة بسرعة ساادة الباب وكتقول بفرحة: جااو جااو ههه
ضارت حلات الباب وخرجات فإتجاه بيت ماماها ..تلاقات بجمال خارج من غرفتو كايقاد الشوميز من الكول وغادي ينزل عندهم لكن وقف فاش شافها جاية قبالتو وتبسم كايطلع فيها عيونو وينزل..قربات حداه منزلة راسها ببسمة بغات دوز وحبس عليها الطريق كايتنهد وبستنشق ريحتها
جمال: ماكتگوليش السلام
طلعات عينيها فيه بصعوبة والاحمرار مكتاسحها: السلام
جمال: هاكة حافية
ضحكات عاضة شفتهاوبغنج نطقات: واحيد ندووز
جمال: الله على هاد الفيم اللي كايتلوا شنو مصيرو معاايا
أميمة: هههه عاوتااني داكشي اللي بديتي البارح ناوي تكملو اليوم
بتاسم لضحكتها وقال بتساؤل: اش بديت الغزالة؟
حماارت فاش تدكرات وحكات ايديها تالفة: و وصافي بلا متزيد تحشمني ههه
جمال طلع حاجبو وحك جنب عنقو: البارح بالليل دويت معاك؟
حركات راسها خافية الضحكة وهو زاد قوصهم كايحاول يتفكر ووالو: وشنو گلت؟
شافت فيه ببراءة كاترمش وباتغراب قالت: علاش نسيتي
جمال: لا لا منسيتش هه غير گولي شنو گلت
ضحكات وهربات ليه كاتزرب وتلفت تشوف فيه وضحك حتا دارت مع الدورة و خلاتو تابت كايدور فدماغو سؤال واحد "البارح شنو درت"
زفر وكمل طريقو لتحت كايشمر بنيفو وبسمتو كاتوساع عاد دخل ببهجة وقال
جمال: السلاام عليكم
ردو عليه السلام مبسمين كلهم حتا من عيشة تطلقات فالهضرة مع مرجان اللي طلعات عارفة عليها الكتيير والكتيير كأنها صاحبتها من زمان وهادشي اللي ريحها
گلس حدا تاج وحسام من الجيهة لخرا.. ضايرين بيه بجوج وهو محني على ركابيه عينيه فالباب وكلا مرة يحنحن بارتباك جامع من الشوق ليها الكتير
حسام: مالك اسي العريس غاتكح ضاربك البرد هههه
جمال: فيك الرواح..وااقلة نأجلو هادشي حتا تبرا يمكن
تاج طلع فيه حواجبو ونطق بحدة: غااتكوْن بلاصتك وتسكتوني لا؟
حسام: حنا غااگلما زعما لاكتي مريض ولا شي حاجة صحتك هي اللولة العشير ماتعصبش
خنزر فيه وشااف جيهة كايحنحن مرة خرا وقال كايحك راسو
تاج الدين: بحالا تعطلو لا؟
بجمود رد عليه: شكون هادو
تاج الدين: مك والشي لاخر زعما
غمزو بعدم فهم: الشي لاخر كيفاش
تاج الدين: اللي علييها جاايين اصااحبي تأ
جمال: اااه..الى بغيتي يالله نوصل لبيتها حسن ..زيد زيد نوصلك حتاال عندها ارا متحنزز فيها گاع نتا
حبس حسام الضحكة بصعووبة حتا حمار، بغاها فيه ديال الصح وتاج حدو خنزر ورد ضهرو اللور كايزفر كل دقيقة وخرا وحرارة غريبة مجتاحاه ..هبط راسو على كاس تالما شربو دقة وحدة وهوما ضاحكين عليه وكايتغامزو ..
قلبات عينيها مميقة وقالت تحت نيفها: الصواب ديال والو ..البراني كاين واللي خاصو يخرج عدنا غابر..راضياش بينا زعما ولا كيفاش
نجاة: عييشة..بدييتي تااني؟؟
عيشة: وشنوو المرا مسكينة ماللي دخلنا وهي تهز فينا وتحط والمرا اللي خاصها دير هادشي مكيناش عييب عييب وحشوومة..بالحق شنو نتوقع من اللي والدة ديك اللفعة غالله يحضر السلامة
ميقات نجاة وقلبات عينيها للطيلي عاطياها النخال، وواخا هاكاك دور دور وتويل ماعاجبهاش لوجيسط اللي دارو
...
..دخل أدهم بعدما نها اتصالو گلس مقابل معاهم بتلاتة ورمق جمال بنظرات نارية حارقة.. مخنزر وكايوصل ليه الهضرة نييشان غير بالعينين..هضرة مافهم فيها والو تقاد فالبركة وحرك راسو بمعنى شنو لكن ماردش عليه وهبط عينو بصرامة للطيلي
نزلو مع الدروج وهي وسطهم نازل عليها سر خطيير وفسورية مميزة
..حاضناها مينة من جيهة وعيونها مدمعين ببريق الفرح.. عمرها تصورات تعيش شعور فحال هادا وحتا هي يجيو ناس يخطبو منها بنتها الوحيدة اللي لطالما تمنات تلقاها
ومرجان حاضناها من الجيهة التانية بابتسامتها المعهودة زأميمة من اللور تابععاهم
مينة: الله يرضي عليك ابنتي الله يرضي عليك..انا مفرشاك ومغطياك بالرضا الحبيبة ديالي
مرجان: وايالله زيدي خلااص را تعطلنا على الناس حشوومة.. طلقو راسكم توما الكوزينة يالله
ضحكات ومشاو وحدة حدا وحدة جيهة الكوزينة وهيام بدا يلعب عليها التوتر بالجهد
..فحين مرجان جراتها للصالون كتتبسم ..دخلو ومينة طلقات البشاشة وخدات دور ولية الامر بتأتر كبير ناسية موضوع تاج لا واش تتعرفو ولا لا ورجعات ففمها غير كلمة واحدة
مينة: مرحباا بيكم نهار كبير هادا ههه
تحنات على عيشة سلمات عليها بحرارة وببسمة عريضة فرحة: مرحبا بلالة عيشة مرحبا بيك
ضحكات ليها عيشة كاتشوف وتتمعن: ههه الله يبارك فيك الالة..شت كللشي عاارفني هنا انااري خلعتوني ههه
مينة: الالة سييرتك سبقاتك للدار قبل مادخلي مرحبا والف مرحباا
عيشة: ههه الله ينوركم اختي ربي يخلييك
گلسات حداها وهي بينهم عاطينها للضحك والتسوال مرة تهزها مرجان من جيهة ارااك للكلمة المعسلة ومرة مينة من الجيهة لخرا حتا داخت بقوة الصواب الضحكة واصلة ليها لفين وفين وكدلك اصواتهم اللي صدعو نجاة فراسها..عكس تاج الدين اللي گالس مخنوق كلا دقيقة يتنهد وماعندو گانة يجاوب لا حسام ولا جمال
ضحكات هيام بجنب فمها والخدامة جابت ليها داكشي كلا حاجة فقرعتها..قربات للكاس اللي فجنب الپلاطو وكبات فيه قبصة من الملح والبزاف وقبصة كبيرة من الفلفلة السودانية ..مزجاتهم مع القهوة مزيان والبنات شادين الضحكة بالجهد
اميمة: وانااري قوودها ههه غايندم على الساعة اللي فكر فيها يجي يخطبك
نجاة: احح على خويا مسكيين بقا فيا
هيام: اييوا الي بغا العسل يصبر لقريص النحل "هزات الپلاطو وشافت فالخدامات بنص عين" ممنوع يدخل الما للطبلة مفهوم..وحتا العواصر لا
نجاة/اميمة: هههههههههههههه
الخدامة: واخا امدموزيل
هزات راسها واستقامت بضهرها مزيان عاد خطات والبلاطو فيدها باتجاه الصالون والبنات قدامها سابقينها وحابسين الضحكة..
قلبها رجع كايضرب بالجهد ملتاهف بشدة وحب لشوفتو..نزلات عينيها بهدوء وحياء فاش دخلات مع الباب وبطرف عينها بدات تشوف وتقلب عليه
تنفظ قلبو من بلاصتو وفجأة گاع الصداع والخنقة والتبرزيط اللي كان فراسو تمحا سكت وهدااا فشوفتها وهي كاتنزل بهدوء ورقة فحال الفراشة كاتقدم ليهم القهوة..رقة وقبول باينين فحركاتها المتولة والهادية وحتا من عيشة دخلها شيء من الانبهار وبلا هواها بدات توزنها وتعبر ليها فالتفاصيل المفصلة فصمت تحت نظراتهم كاملين وهي من واحد لواحد غادة وكتقرب لعندو ومخلياه هو لخر..
وصلات ليه ورمشات جيهة صباطو..بقا ساكت سارح فملامحها بلا حشمة بلا حيا زاد وترها حتا هزات فيه نص وبصوت خاافت حرق ليه الوجه وتغلغل مع اعماق قلبو قالت
هيام: تاج ..خود قهوتك
بعفوية رد: ناخدك نتي واخا؟
حسام خرجات ليه القهوة من النيف بالضحك لا هو لانجاة وأوما عكس جمال اللي ضار ليه عقدهم و مطلع حاجب بحالو بحال عيشة الي دارت صبعها فوجهها وتويل حشمها المسخوط
..حنات عينيها مبتاسمة بالزربة ورجعات همسات ليه: خود بعدا قهوتك، والشي لاخر من بعد ونتفاهمو فيه
هز يديه مبنج عينيه فيها وخدا الطاسة من الپلاطو قائل بهمس كايتحلف: غير عقلي..عقلي على هادشي مزيان
جمعات الپلاطو بضحكة حطاتو فوق الطپلة ومشات گلسات حدا نجاة جامعة رجليها وعينيها مبتاسمين بسعادة..حنحنات عيشة بعدما حطات كاسها وقالت
عيشة: ايوا اسيادنا قصدنا اليوم قصد شريف راكم عارفينو..جينا طالبين راغبين فيد بنتكم "تنهدات وقالت مرة خرا ضاغطة على نفسها" لولدنا تاج الدين..الى قبلتو
مرجان: انا منعندي الله يجعل كلشي مبارك ومسعود ههه ولكن الري للالة مينة ام المعنية بالأمر والكلمة اللولة واللخرة لهيام طبعا
خرجو فيه عينيهم مخلوعين وهو غير كايكح بلا انقطاع والكاس فيدو مزير عليه ..خلع هيام وعظات شفتها بندم فحين عيشة تهزات عندو هي ومرجان ومينة كاتسول بخوف وهو وجهو حماار ماعندو كيف يهضر
عيشة: اماالك اولدي واااش تخنقتي..تااج الدين كتسمعني ااولدي يااك؟؟؟
شافت الكاس اللي فيدو نتراتو ومعنات فيه الشوفة مزيااانن بان ليها وسط الكاس شي حاجة ماشي هي هاديك واللون مبدل فيه شيء من الحمورية..شهقاات وصفار وجهها بالخلعة والهلع ماحسات حتا طيحاتو من يدها وغوتات: اااويلي على السحووور..ااااويلي ااميمتي على وووولدي بغيتو ترزييوني فيييه اااميمتي شهااادشي اااويلي
ناض تاج هاز الفيسط ديالو ومرة مرة يخنزر فعيشة: لا غير سمحو لينا غانمشيو
وقف جمال منزاعج وقال: فين غادين دابا و الغدا على قبلكم دار
تاج الدين: مرة خرا إن شاء الله دابا مزروبين..نجااة يالله
ناضت ومرجان تلفتات بسرعة مترجياه بملامح حزينة لطيفة وصوت رقيق مغنج خلات تخنزيرة أدهم تظهر
مرجان: عافاك بلا متخسرو الغدا وزعما واقفة عليه من الصباح على قبلكم..واديرو ليا خااطري
وقف حداها أدهم زير يدها وبحدتو المعتادة قال
أدهم: زيدو نتغداو يالله "شاف فالخدامة" علميهم يسدو البيبان ممنوع يخرج شي حد
الخدامة: واخا امسيو
جمال: هههه يالله دگ دابا لا قدرتي
بقلة حيلة زاد هو الاول وعيونو متعلقين عليها ..تبعوه من اللور وحتا عيشة ناضت بعدما ناداتها مرجان كاتخفي التقليقة اللي قلقاتها ببسمة خفيفة ولكن مع دلك عيشة تحشماات ونفس الماكلة ولا باش تشوف فيهم معندهاش بزز باش ناضت قدامها غادة للطبلة وعينيها كايهربو للأرض..
مخليا مرجان اللور جاية هي وادهم اللي قرب حداها مخنزر كايفرس سنانو وقال
گلس فمقدمة الطاولة وهي حداه طالقة البشرة ومتجاهلاه ..حداها گالسة أميمة وجنبها مينة وحسام وحداه تاج الدين..من الجيهة لخرا بارك جمال جنبو هيام وحداها عيشة كاتفادا فيها الشوفة لعدة أسباب لكن رقة هيام حااضرة.. كل مرة تقرب ليها شي حاجة وتتبسم ليها بسمة خالصة من القلب حيراتها فيها ديال بصح
..الطبق قدامو باقي عامر وعيونو عليها فقط يعيا يحاول يبعدهم وبدون جدوى كايهربو عندها..
تهز الغدا وتحط الديسير مشكل على حقو وطريقو وغير الديكور والالوان يشهي فالنفس ويفتح الشهية
..تقدمو الخدامات كايقطعو ويحطو ليهم فأطباقهم وعيشة تضور عينيها وتقلب على تاج اللي غبر غبرة وحدة معرفاتو فين زاد، لكن الوجه باش تسول عليه معدهاش من غير تنغز نجاة حداها وبهمس نطقات
عيشة: شووفي فيا تي..فين خوك؟؟
قصحات فيها الشوفة وقلباتهم مداتهاش فيها وخلاتها دوي ودوي ودوي تاعيات وسكتات تتنفخ
...بداو المعالق فتناول الطبق عاد تم نازل هو يديه فجيبو وبسمة غريبة على شفايفو مصوب عينيه جيهتها وهي غير سمعات الحس جيهة الدروج طلعاتهم فيه بشوفة خاطاار وبسمة حلوة
هيام: تعطلتي.. ياكما تغالطو ليك البيبان؟
گلس واكتافا يحرك راسو بواخا ..
داق شوية من طبسيلو وحبس مرجع ظهرو اللور كايقيس الخاتم فصبعو ورجلو كتحرك بسرعة متبت الشوفة فيها وبؤبؤ عينيه كايتساراو على ملامحها الجدابة
معرفش علاش وكيفاش وايمتا ولات هاكا ،فجأة تغيرات على عينو كل التغيير، واش زيانت بين ليلة ونهار ولا الشوق خلاها تفتن نظرو ولا هو اللي عمرو تمعن بملامحها
..فقط اللي حاس بيه فالوقت الراهن هو دقات قلبو المتسارعة وافكار كتييرة فدماغو مكرهش يشرع فتطبيقهم بأسرع وقت
مرجان: هادي ماامحسوباش عاودوها مرة خرا إن شاء الله
نجاة: إن شاء الله اخالتي الله بعاونكم
تسالمو مجموعين عيشة رمات السلام غير بفمها وتبعاتهم كلهم برا ..جمال رجع فحالو وطالع لبيتو كايحك راسو وأدهم جر مرجان وراه مخنزر بقات هيام غير بغات ترجع هي تسمع تحنحينتو وقال بفعل أمر
تاج الدين: بلاتي تسناي
طلعات عيشة ونجاة ويد عليهم باب اللوطو
هيام: شنو بغيتي شي حاجة؟؟
داز حداها لورا سيارتو وهي تابعاه حتا وقفات قدامو..مد يدو لجيبو كايجبد طيلي ديالها منزل راسو يشعلو فنفس الوقت قرب خطواتو ببطء عندها تاقاست بيدو كرشها وبورشها فداتها عاد قال بهدوء وعينيه فالطيلي
مرجان حركات راسها بهدوء: هي اول وحدة معجبهاش الحال ولكن الحمد لله شخصيتها زوينة..حتا مللي كتتعصب كاتخمم فالهضرة والكلام اللي غاتگول عااد تخرجو مع فمها..يعني ماشي مندافعة واي حاجة كديرها كتحسب ليها مزيان..فمن هاد الناحية متهزي هم..هيام غاترف كيفاش تتعامل معاها
مينة: وهاديك يتعاملو معاها الناس ..اجي بعدا مسولناهمش واش غاتسكن مع مو ولا دارهم وحدهم..وهو شنو خدمتو ؟؟
مرجان: ههههه وحدة وحدة ياتا
دخلات الخدامة حطات ليهم قهوتهم ورجعات فحالها..داقت منها مرجان وشافت فيها مرة تانية قائلة بهدوء: موضوع السكنة بيناتهم امينة بلا متدخلي حسن متخسري بنتك هانا كانگول ليك..وبالنسبة للخدمة راهم فنفس االدومين حتا هو مهندس
جمعات مينة عينيها وگالت: تبارك الله..احم "فركات صبعانها شوية وقالت مرة خرا بتوتر" و وزعما مهندس شحال يكون كيتخلص
مرجان: هههههه
مينة: و وغاسولت
مرجان: سولي سوولي هههه..كاياخدو شي جوج دالمليون هاكاك بلا المشاريع اللي هو كايصيبهم..ممكن يضبر فيهم على ملاين صحيحة زيد عليها دارو وطمبيلتو مضمونة
مينة: تبارك الله
مرجان: شوفي من هاد الناحية هادشي ميهمكش..تاج مهندس مبتدأ وواخا هاكاك بدا يدير سميتو ويتشهر ..و هيام غاتلقا راحتها معاه واخا ماشي شي وحدة اللي كاتعطي اهمية للماديات لكن عندها متطلباتها وهو غايعرف يوفرهم ليها ..كوني هانية
مينة: واعلى الله تاني
جبدات مرجان الايپاد تاعها كاتابع منو الخدمة اللي تكاسلات عليها فهاد الايام وتشرب من قهوتها..حتا دوات مينة مرة تانية ومن هضرتها باينة مرتابكة
مينة: خ ختي مرجان..بغيت نسولك عافاك
مرجان: ههه سولي شنو؟
مينة: دابا..جمال و وأميمة..هوما بحال لخوت ياك؟؟
قوصات مرجان حجبانها وقالت: علاش ؟
مينة: و غير واحد النهار سمعت شي كلام م
قاطعاتها وقالت واقفة : أميمة وجمال علاقتهم بوحدها..هوما ماشي خوت راك عارفة..والى كانت علاقتهم غاتاخد مسار آخر انا اللولة غانعرف وغاتكون شي حاجة فالحلال الالة مينة انا بنتي مربية
ناضت مووسععة عينيها بصدمة وقالت متداركة الموقف: لا لا لا الله اودي اختي علاه انا شگلت
....مرجان دخلات لبيتها لقات أدهم خارج من الدوش لابس توني خفيف فقط وشعرو الاسود مختلينو شعرات بيضاء سارد ونازلين خصلات خفاف على جبهتو..خشاه يديه فجيابو وبدا يشوف فيها كيف قالبة وجهها زفر وقال بخشونة
أدهم: غاتبقاي حابسة معانا الهضرة
حلات الپلاكار كاتقلب جيهة الپيجامات وقرب هو جيهتها خاشي وجهو فعنقها ويدو على مؤخرتها كايدوي هامس ويساري يديه بلمسات نارية
أدهم: واصافي احبيبتي ياك طلبنا السماحة
بصوت مدلع وبنص عين قالت: نتا ديما هاكة ..خاصك غير تخاسم
أدهم: ونتي مكديريش علاش
خرجات فيه عينيها: ااشنو درت بالسلاامة شنوو..واش الولد قد وللدي وولدي اعباد الله وتغير منو
رد شعرها ورا ودنها بهدوء وقال: ايوا راجلك هاكا معدك ماديري.. المرة جاية بداي تحظي مع ديك النبرة
مرجان: اففف افففف
ضارت لحوايجها كاتقلب وهو ضحك ودوز يدو على شوميز قصيرة فاللون الاحمر القاتم توبحا حريري كايزلق على اللحم ومشبكة من الصدر..دوز يدو على شفايفو ومدو ليها بنظرة ناايمة
..سالاتهم وبدات تنش على يديها ورجليها باش ينشفو وكل مرة تلوح عينها للطيلي اللي مابغاش يسكت .. سميتو مكتوبة بالخط العريض باللي متاصل وهي ماشي هنا حدها كضحك وتهز طرف صبعها تقطع عليه وتحسب شحال من مرة وواش غايمل ولا باقي ..ناضت بعدما نشفو ظفارها نزلات الكسوة حتا طاحت وهزات الشوميز فيدها معجبة..بدات ضورو فيدها وهو فيه شبر مشبك وملس عاد تفكرات كلام مرجان وضحكات فخاطرها..لبساتو طلقات شعرها كامل متموج بانسيابية على ضهرها وخصلات منو مغطيين مقدمة راسها..حركاتو بيدها ومشات للمراية الطويلة اللي مقابلة مع البالكو كتمعن كيف جاها..لونو الاحمر وتوبو الحريري القصير مع بشرتها االبيضاء وجسمها المشدود خلا مزيج قاتل بامتياز..متير لأقصى الحدود وفااتن للنظر ..ضحكات وضارت هزات الپينوار لبساتو وبدات تسدو هو يجيها ميساج..گلسات وهزات الطيلي كتقراه وفنفس الوقت سمعات دقان فالزاج ديال البالكو خلاها توقف مصدومة كاتشوف فتيليفونها فالباب اللي مغطي بخامية بيضة لكن ظلو باين وواضح
وصلاتها رسالة خرا حلاتها بسرعة ولقاتو كاتب
"حلي حسن لييك راه مكنضحكس"
دارت على راسها بحيرة كاتفكر فشنو دير ووهو من تما متزعزعش خافت من شي شوهة ومشات كاتزير سمطة الپينوار دوزات الخامية ووقفات قدامو يديها على خصرها والزاج فاصل بيناتهم
بغضب واضح نطقات وقالت: اااشنو بغيتي وااش حمق ولا مالك
بعصبية دفع الباب لكن بدون جدوى كان مقفول بإحكام ومابغاش يتحل..ضربو حتا تزعزع وقال تحت سنانو: نتي لااش باغا تووصلي..كاتففكري فهادشي اللي كاديري ولا غيير زبلة ولا زبلة
رمشات وهدنات صوتها: علاش بالسلامة شنو كاندير
تغدد كتر وضرب الباب مرة خرا: هاااكا..كاتمرضيني وعارفة منقدرش ندوز نهار بلا مندوي معاك فييه وواخا هاكاك بلعاني كت "زير سناانو بقمة الغضب زفر مزياان ورجع قال" دابا حلي غير نتفاهمو..حلي هاد المررض قبل منهرسو
تاج الدين: لا ماديريهاش ..لا واياك..واياك اهيام واي....طلقاتو من كتافها حتا نزل زالق على جسمها الرطب للأرض نيشان..وبان المستور..المستور اللي عينيه تخلوضو فيه وتوضرو ماعرف يطلع ولا ينزل ولا يبقا غير مفيكسي الشوفة..مرة نصاعة بشرتها واللون الاحمر كيجاها..ومرة فخيظاتها العامرين اللي اول مرة يشوف داك الطول كامل حيت الشوميز مدرقة جيهة التريمة فقط..وعلى دكل هاد الاخيرة سبابت المشاكل عند تاج واللي خلات ليه الباشا يبدا ينوض تاني، تمشات هيام للسرير ببطء قاصدة ومتعمدة تجننو وتسطيه وعيونو فيها دايخين سكرانين حد التخمة وبحال العطشان..خلاتو ومعسات مسرحة فبلاصتها كاتشوف فيه ببسمة حلوة مغنجة ونطقات بين شفايفها بحروف قدر يستنتج شن هوما
هيام: تصبح على خير..احبيبي
زير سناانو مغدد تغديدة ديال الصح خلاتو كايشوف شوفة الدري الصغير نهار السوق فاش داز على ماحال الشكلاط ووقف فالزاج كيشوف ويريوگو دايزين..لكن باش يدوق ،ممنوع ... رجع حرك ليها راسو بواخا وصدرو طالع نازل قبل مايدور ينزل فحالاتو من تنا نادم اشد الندم على هاد المشية..جا مفقوص من جيهة قلبو وناوي يدوي معاها..دابا رجع مفقوص من جوج جيهات والجيهة التانية اجا مبردها وصورتها فبالو لاسقة وغاتبقا لاسقة طول الليل
بعد الليلة المتوهجة والشاعلة بأحداتها
جا صباح جديد.. صباح منور صافي بشمسو الدافئة
قدام العمارة توقفات سيارة حسام..نزل منها بشوميز بيضة ودجين زرق مدوز شعرو اللور ونظاظر الشمس فعينيه
دانل و كايلعب بالساروت فيدو وملامحو مرحة كالعادة ضحك هنا وهنا مع هادا وهادي
طلع فالاسنسور للدار ديال تاج الدين دق وتسنا شوية عاد فتح ليه بسرعة مبرزط ولابس ملابسو الرسمية كالعادة
حسام: اصباح النور
ضار داخال وبصوت عيام مهدوود قال: سد وراك الباب
حسام:هههه صباحاتو الله تاني هادي حالت عريس دابا ههه
مردش عليه ودخل وسط الدار كايحل المجورة ويسد ..وجهو باهت فيه اللون وعينيه تحتهم حمر غادي للكحولة ،طالع ليه الخز ومن ملامحو باينة معصب..بقا حل سد حل سد حتا وقف عليه حسام وقال بتساؤل
حسام: كاتقلب على شي حاجة..نعاونك ظ
بلا مايشوف جيهتو قال: واحد الدوا كنت جبتو البارح معرفت فين لحت ديلمو " تعكس ليه واحد الجر مابغاش يتحل جرو بالجهد حتا گلعو ولاحو للأرض بغضب طالع ليه الدم " تفووو
حسام: بشوية اصاحبي..واش دوا ديال الراس
حرك راسو بالايجاب وهو زاد قال: بشوية غاتلقاه..شوف ننوض نجيبو ليك من لافارماسي ..راها غير حداكم وحسن نيت شوف كيفاش رونتي الدنيا.. ولا شرب ليك شي...
قاطعو وقال مغوت: حساااام هنيييني شوية من الصباح ونتا بلااا بلااا بلااااا بلااااا ضريتي فرااسي آااااو
حسام: تاج ؟؟؟؟؟
سكت تاج كايلهت فيه وسد عينيه بانزعاج فاش عرف راسو شنو قال..قرب جيهتو بملامح باهتة وقال بصوت خافت: سمح ليا..معرفت مالي اليوم معصب غير مع حوايجي
حسام: مالك شنو واقع؟ طرات شي حاجة
تاج الدين: مناعسش مزيان وصافي
زفر من اعماقو وضار هز سوارتو والطيلي
تاج الدين: زيد زيد نخرجو
بقلق قال حسام: فطرتي بعدا
سبقو خارج: معندو منين يدوز
تبعو من اللور ونزلو لتحت ..ركب كل واحد فسيارتو وزادو مع الطريق قبل مايوقف تاج الدين قدام الصيدلية نزل دخل ليها وخرج هاز فيديك كارطونة ديال دوا الراس حلها وسرط حبة ورا حبة عاد طلع وكملو طريقهم
هيام: صبااحو ههههه
دخلات للكوزينة كاضحك بجاكيط ناعمة بنية طويلة وتحتها بيل سماطي كحل لاسق مع كرشها ودجين كحل..شعرها سرحاتو بالپلاك على طولتو وخلاتو كايلعب منينما دازت كايدوز وفينما ضحكات كايتحرك..باست مرجان اللي كانت كاتصاوب القهوة وگلسات على الطبلة
مرجان: تعطلتي على الفطور اليوم لا نتي لا هاديك خيتي.. شكتو كاتوشوشو
خرجات طالعة عند اميمة ومينة ناضت عندها وقالت بارتباك
مينة: ختي مرجان..و واخا ندوي معاه شوية؟ الى جات على خاطرك
تنهدات وخرجات غادة للصالون الصغير ومينة وراها
..جلسات حاطة مخدة على رجليها وهي جلسات قدامها كاضور الهضرة فراسها قبل مادوي لاتزبلها تاتي
مرجان: نعام كنسمعك
مينة: انا اختي بغيت نطلب منك السماحة على البارح ..الله فوق مني شاهد باللي مكانت بنيتي حتا حاجة خايبة، الله يرزيني فولادي الى كنت نويت فبنتك شي حاجة خايبة اختي غير انا هاكة دايرة ..اللي ففمي على لساني مكنفكرش فالهضرة قبل منگولها
تاج راسي الجزء 16
محتوى القصة
التنقل بين الأجزاء