الباشير: وقف وقف صافي هههه تور بحال خالك اوليدي توور هههه زيد زيد شرح ليا هاد واقلة عندك زيييد هههه
نتر ايدو: حيد ايدك هادشي ماكايضحكش.. كي غاندير دابا نشوف فوجهها مازال كي غاندير
الباشير: دابا واش بستيها ولا لا خخخ
ضور راسو كايحك رقبتو فحيرة وجاوبو: مانعرف والله ..كنت علاين كونما الواليدة الله يسمح ليها فيقاتني فاللقطة ..ففف
الباشير: هههههههههههه
ساط فيه: حيد من قدامي الله يرحم باك
الباشير: وأجي اجي انا نگول لك الحل
مشا بلا مايتلفت: وااقوود ..دخل لبيتو خابط الباب وگلس شاد راسو مرون وكايدوي بوحدو: زعما بصح بستها؟ لا لا مانديرهاش..ولكن كنت مبوق كون كنت بعقلي گاع مانعيط ليها اصلا ؟تفوووو الباشير تفوووو
فحين عيشة لاحت الفوطة من يدها ومنوضاها مع الباشير فالصالون هي تغوت ودعي وتسب وهو يگلب وجهو وينفخ ويسايس معاها تسكت.. ختو الكبيرة ومو التانية ماكايخسرش ليها ومايطلعش فيها العين حيت هي اللي عندو وهو اللي تكساب..تحل باب بيتو وخرج مبدل حوايجو باينة فيه معصب
عيشة: هاك ها فووطة
ماجاوبهاش وخرج بداك الشعر كايقطر كلا مرة مرجعو اللور.. حل الباب يخرج وفنفس الوقت تحل باب الجارة اللي دات ليه القليب تبدل فيه اللون وتلف بغا يرجع يدخل فحالو هو يحبس فاش سمع صوتها الهادئ
هيام: صباح الخير
جمع نفس طوييل وحنحن عاد ضار عندها كايشتت النظر: صباح النوور
تمعناتو مزيان وابتسامة خفيفة فشفايفها: كيف صبحتي مزيان
تاج الدين: ل لاباس.. اه..احم مزيان الحمد لله
حك راسو سد عينيه ورجع شاف فيها مرتابك: شوفي البارح؟ ماعرفتش..اول مرة والله يعني ..ماعرفتش كيفاش.. اه هو عارف الى گلستي مع شي حد كايكمي الحشيش راه حتا نتا كاتبوق ولكن كنت مبرزط شوية ومارديتش البال حتا لقيتيني كانعيط ليك.. دابا والله حشمان من دكشي الي درت بزاف
قاطعاتو كاضحك: هههه بشوية عليك ماالك هههه
قوس حجبانو باستغراب: مابايناش فيك معصبة
هيام: معصبة؟
تاج الدين: اه.. يعني الواحد فبلاصتك غايكون معصب الى شي حد دار ليه داكشي اللي درت انا
رمشات فيه ببراءة: وشكون گالك مامعصباش؟
سرط ريقو خايف: انا والله ..
قاطعاتو كاتفكر: ولكن يمكن الى وصلتيني للمدرسة نفكر نسمح ليك "بدات كاترجع اللور عاطياه ضحكة حلوة وهو كايرمش فيها" يمكن ؟ههه
ضارت غادة للمدرسة مخلياه مافاهم والو ولكن دغيا حرك راسو بالنفي وبانت ضحكتو وأخيرا قبل مايتبعها بالزربة
غزز سنانو وبعينين حمرين مشا قاصدها فاش شافها خارجة من السيبير ببيجامة شيبية لاسقة عليها كاطرطق المسكة وتتعوج فالمشية كالعادة.. حتا وقف عليها حابس الطريق وعلى وجهو ابتسامة مستفزة
أيوب: تء مافهمتينيش..اللي بغيت نگول هو صعييب تكوني طايحة فشي حد من الابتدائي ونتي كاتحلمي بالنهار اللي تكوني معاه ..فاللخر تجي وحدة غير البارح وهوپ ..تديه لك
ضحكات: نعاام نعاام..داوي على تاج ههه
أيوب: وشكون من غيرو.. راه ولا طايح فالبنت الجديدة اللي سكنات قدامهم وغير البارح بالليل جا مبوق على قبلها ..وشحال وهوما كايدويو ونتي يامسكينة مگلوبة علك الگفة
شافت فيه مزياان وطلقات ضحكة عاالية فالسماا: هههههه لا لا بلاتي تااج مبوق هههه وكايبغي وحدة خراا هههههه
أيوب: هادشي كايضحك
هدى: لا لا حشيشك صحييح هاد المرة اولد الخالة ههخخخخخ
باستهزاء دوز ايدو على شعرها: مازال تشوفي بعينيك ابنت خالتي وتگولي أيوب كااان عندو الصح.. ولكن ديك الساعة غايفووت الفووت ههه دومااج هه
خرجات من بيت النعاس لابسة جلابتها وكاتعگد زيفها مخنزرة ..
شافتها نجاة وزفرات: هادشي اللي ناوية عليه اعيشة غادي غير يجبد ليك الصداع مع تاج الدين واعقلي فين گلتها ليك
عيشة: دخلي سوق راسك نتي..ونحصلك گلتي ليه شي حاجة تشوفي
-خرجات كاتخبط قاصدة الدار ديال هياام .. هزات ايدها وبدات دق فالباب دقان ديال البوليس نزلات على اترو عاليا كاتسد بينوارها الحريري هازة شعرها الناعم بقراسة.. حلات الباب وبدات وحدة كاطلع فلخرا كلها وشوفتها كي دايرة..
نفس السن نفس السكن ونفس الضروف الاجتماعية حاليا ..هوما بحال بحال لكن الهيئة وقلب كلا وحدة مختالف تماما على لخرا
...اللولة شافت النعيم بأشكالو خلا شكلها الخارجي اهم حاجة عندها وسلطتها والطبقة الاجتماعية ديالها الرقم واحد فحياتها ..حتا ترسخات فيها صفات البرجوازية والتكبر اللي كاترمق بيه عيشة دابا..
مابقات عندها گانة لا تقاد الوجه ولا ديها فحالتها حتا من المراية هاجراتها سنيين هادي على قبل ولادها اللي محتالين المكانة واحد فحياتها.. ورجعات بزز منها راجل باش تحافظ عليهم وتجيب الخبز الحلال...
تنهد كايحرك راسو: فهمتك الحاج ..كون هادي ناغاتعاودش
الهاشمي: نتمناو..تقدر ترجع لخدمتك
حرك راسو ودار غادي هو يلمح حاجة كاتبري بين الساعات الأتربة.. قوص حجبانو وقرب كايتفحصها ووسع عينيه فاش لقاها بوصلة بنفس المواصفات البوصلة ديال هيام..هزها بين ايديه ملتاهف دورها وفعلا لقا فيها النقش ديال اسمها "هيام" ..ضحك بفرحة وشاف قدامو كايفكر قبل مايمشي عند الحاج
حرك كتافو هاز زاوية فمو: اسم فيه مغزى ومعنى واضح..وزيد عليها واعر ماشي بحال ..هياام ههه
ميقات قالبة وجهها حتا سمعاتو كايضحك مرة خرا: كاتولي حممرة فاش ماكاتلقاي باش تجاوبي فراسك
هيام: ممضطراش نجاوبك اصلا
تاج الدين: هههه واخا
نفخات منزاعجة فقربو منها: اووف واخا تبعد ..سير من الجيهة لخرا بانت ليك غير هاد الطريق
رد ببرود: طريق عامة هادي وانا نمشي فينما عجبني ازين ....غمزها وزاد مزاحمها كاتفلت ليه الضحكة وهي كلا مرة نافخة حناكها وقالبة وجهها لهيه كاتزيد ضحكو حتا وصلو للدرب وضارت عندو هازة حجبانها
هيام: وأخيرا غانتهنا منك وغاتسد شوية فمك من الضحك
تنهد مبتااسم: ماسخيتش "غمزها ضاير فحالو" بسلامة عليك .... رجع من الطريق اللي جاو منها غادي متوجه لخدمتو مرة خرا وهي من وراه قوصات حجبانها كاتشوف فيه من اللور بتساؤل: واش كان جاي على قبلي؟؟
سلا النهار وضلم الليل فين كلا واحد لدارو راجع ولا لسهرتو خارج وتاج واحد منهم.. جاي للدرب وفيدو هاز شي تقدية من التدويرة ديال التوريست كالعادة وصل لبابهم وبان ليه خالو واقف حداه قشع ملامحو المتوترة هو يتوجه عندو كايضحك: لا لا كنت عارفك كاتخاف من الواليدة ولكن لهاد الدرجة تصاحبي.. صدمتيني هههه
سلم عليه مبسم: خويا ديك مك عاافية عاافية.. عندها شي هضرة كاتبقا تگلب فيا النهار كامل وماكاتبغيييش تسرط
تاج الدين: ههه زيد دخل زيد رااختك هاديك وحتانا مقفرها عندها
الباشير: لا لا غاحيد خلي المجاج مقاد بلا ماتخسرو ليا.. دابا لاش بغيتيني
قلب واحد باقي مكتب الزمن حروف التحامهم وباقي ماقرر القدر خيوط حياتهم مع بعض..
تلاح كلا واحد فيهم ففراشو كايطيب نعاسو ..الطرف الاول دغيا نعس غارق فنومو باش يهرب من سواد الواقع المفرووض عليه..
والنص التاني هارب عليه النوم من البياض اللي بدا كايكتاسح حياتو والارق رجع مفروض عليه ...ضربات الطناش وفنفس الوقت وصلو ميساج فتيليفونو بلا مايشوف فيه ناض بجمود هز جاكيطتو وطيلي وتم خارج ..لبسها حدا الباب لتحت مطلع راسو بشوفة خفيفة لبيتها قبل مايتحرك غادي فطريقو للشاريع فين كانت واقفة طوموبيل كحلة ديال الباشير كاتتسناه..حل الباب وطلع شاف فيه كايحك ايديه الباااردين يسخنو: ماغانتعطلوش ياك
الباشير: على حسب الكمية..ياك متأكد؟
شاف فالطريق: سير عالله
ضحك وضور الساروت غادي فإتجاه المرصى ..قبل مايوصل بشوية طفا الضواو وبدا كايسكت الموطور حتا طفاها وأشار لتاج ينزلو..تمشاو دقائق على رجليهم لفين كايوقفو البواخر لقا تما عدد ديال الرجال واقفين كايتسناو حتا هوما وواحد مراقبهم كايضور عليهم راسو حتا قشع تاج هو يجيليه مخنزر بالزربة الباشير دغيا كايشير بيديه: هادا معايا راه ولدي وبغا حتا هو يخدم
الباشير: ههه 2000 درهم ديالك مضمونة وعلا حساب شحال غاتخدم
-زفر وعينيه مراقبين أمواج البحر هادية كاتلمع بالنجوم اللي فالسما ..سها شوية بشوفتو كايتفكر كلامها اللي غير ماكايزيد يزعمو
🎬🎬🎬🎬🎬🎬🎬🎬
كنت باغا نجيب غير البوصلة ديال بابا "طلع فيها راسو بجدية" انا ماكانتش غانخرج كون ماكنت مضطرة، ديك البوصلة هدية من بابا قبل مايموت وكاتعني ليا بزااف.. للأسف طاحت ليا ماعرفتش فين ولكن اللي ماكنتش ضاربة ليه حساب هو انو غانصادف بحال دوك الدراري ..
************
: المشكيل هو البوصلة صافي؟
بهدوء جاوبها: رديتها لك
خرجات عينيها بعصبية: ماشي ليا لماما..وهي غير ماغايبقاوش عندها الفلوس غاتمشي تجري تبيعها ماغايهمهاش الى كانت اخر حاجة ليا من عند بابا ولا لا..انا خبيتها من نهار طاحت فيدي ونتا بسهولة عطيتيها ليها
🎬🎬🎬🎬🎬🎬🎬🎬🎬
الباشير: تاج.. يالله
-طلع عينيه فواحد الباخرة العرض تبارك الله والطول ماشاء الله بقا حال فيها فمو .. تحل بابها ونزلو منها جوج مگلضمين شيرو ليهم يبداو.. وفعلا تمو داخلين ليها وبدا كلا واحد كايهز كرطونة مسدودة مغلفة بالسكوطش واخا هاكاك باينة للعما شنو مخبي تما..نصل الجاكيط وطلع للكراطن كلا مرة يهز ويوصل لواحد الكاميو مخبي بين الشجر بالزربة وبخفة دِّي هادي ورجع هاديك هاكا هاكا وواحد مورا واحد والمراقب عينيه عليهم وعلى تاج خدمتو خفيفة مزروبة مركز فشنو كايدير وشاد السوفل..
.....دازت سوايع بدا الارهاق كايجيهم كاملين وعدد قليل من الكراطن اللي بقا رجع بالنسبة ليهم وزنهم تقييل بزز باش كملو وخواو المؤخرة ديال الباخرة رجعات كاتصفر والكاميو مپلاني حتال الحد ..تسد وساگ السائق غادي فطريقو هو والباخرة اللي زادت فحالها تحت انظارهم.. قرب ليهم المسؤول هاز ضماسي زرقة فيديه كايتقدمو عندو واحد واحد واللي كايعطيه كايمشي حتا وصلات نوبت تاج ..شاف فيه وبدا يحسب فالفلوس حتا وصل ل2000 عطاها ليه بغا يدوز وشدو مد ليه 1000 وحدة خرا وبخشونة گال: جي غدا
خداها ساكت كاينهج وهز جاكيطتو زايد مع الطريق للطوموبيل كايرد انفاسو..جبد تيليفونو شاف شحال فالساعة لقاها الربعة ديال الصباح رد راسو اللور بتعب ساد عينيه وكايتسنا الباشير يتخلص ويجي خلاص باش يرجع لبيتو يرتاح
فالضلام الداامس ووسط الساحة ديال مدرستها كانت واقفة وسط دوارة ديال تلاميد قيسمها هاازة مووس فيدها وكاضور وجهها بخوف عليهم وهوما كايقربو عندها لابسين كلهم الكحل ووجههم فيه الشررر.. رجعاات كاترعد وجهها خضاار وعيونها دمعو ماعرفات لمن تستغيت وفجأة جمدات كلها فاش بان ليها تاج معاهم حتا هو كايضحك عليها وكايقرب بخبت.. ماتيقاتش عينيها وزاد الخوف تسلل لقلبها اللي بغاا يسكت وهي كاتشوف فيهم وتشيير بالموس اللي فيدها
رجع وجهوو حممر وهوكاايغوت فوجهها خللعها كتر حتا طلعات السكين بالزربة وضرباتو بيه لجيهت قلبو ..جمداات بصدمة كاتشوف فيه طايح على ركابيه بشوفة مفشكلة وكل من كان حاضر كايضحك عليها ومن بينهم ايوب وهدى ضحكاات هستييرية صمكو ودنيها.. شافت لإيديها عامرين دم بدات كاتبكي حطاتهم على ودنيها طالقة غوتة مجهههدة خارجة من الاعمااق
هيام: اعععععععععععععععععع .....
تهزات قافزة من مخدتها كاتلهت صدرها طاالع نازل بوتيرة سريعة ..ناضت بالزربة للحمام شعلات الضو وطلقات الروبيني كاتغسل وجهها وتعاود بايديها اللي باقة شادة فيهم الترعيدة..شافت بوجهها فالمراية كاتنفس بالجهد محاولة تهدأ من روعها ..رجعات لبيتها كاتجر رجليها طلات فالساعة كانت السبعة وقت فياقها نيت ..سكتاتها باش ماتصونيش ومشات للبلاكار حلاتو وجبدات منو دجين بيض وتريكو صوفي بني لبساتهم وزادت عليهم الطابلية ومونطو خفيف بيج وهزات سبادري ديالها حطاتها حدا الباب هي والكارطابل..
مشات للكوزينة لقات عاليا ببينوارها كاتوجد القهوة وقفات حدا الباب كاتشوف فيها باستغراب: العجب حتا فقتي اليوم ..غادة لشي بلاصة تاني؟
بلا ماضور: صباح الخير
هيام: صباح الخير
عاليا هزات القهوة للطبلة فين موجد الفطور كامل گلسات هيام ومدات ايدها كاتفطر بالشوية عليها ومرة مرة كاتسها.. حطات عاليا ايديها على الطبلة مطولة فيها الشوفة ودوات بتهكم: هيام
طلعات عينيها: وي
عاليا: مازال باغا تمشي من هنا ياك..باقا عند قرارك مية فالمية
حبسات الماكلة: وعلاش هاد السؤال؟
عاليا: بغيت نتأكد واش باقا موحشة العيشة اللي كنتي فيها قبل.. العيشة اللي كاتستاهلي بصح ماشي هادي.. وغير عندك الزهر باقين لينا شوية الفلوس باش نشريو بحال هاد الفطور أما كون ماغاتلقاي حتا خبز حافي احبيبة
باستهزاء: باقين لينا ولا بعتي البوصلة ديال بابا ..ياك؟
شافت فيها مدة ودوات كاتحرك راسها بتأكيد: آه..والى زربتي يكون حسن
ناضت من الطبلة كاتسمح فمها هزات الكارطاب وسبرديلها وخرجات مخلية عاليا ساهية فين كانت گالسة: بصح خاصك تزربي اعاليا..زربي قبل ماتخسري بنتك
.....
دقائق ووصلات للمدرسة وكيف دخلات للساحة تقبط قلبها مرة خرا من الحلمة اللي شافت ورجعات كاضور عينيها على التلاميد وكاتحاول تخفي التوتر اللي بدا معاها كأن بصح الكابوس غايولي حقيقة ..حسات بيد تحطات على كتفها قفزاات وضارت بالزربة.....
هدى: ههه مالكي تخلعتي غير انا ازين
-عقدات حجبانها ورمشات كاتحاول تتفكر فين شافتها
هدى مدات ايدها بابتسامة: انا هدى
طلعات حاجب وااييه عااد تدكرات شكون هي.. شافت فيدها وصافحتها حتا هي مع ضحيكة صفرة: مشرفين.. هيام
ردات مبسمة: مممم.. سميتك زوينة.. بحالك ههه
هيام: ميغسي ..بااغا شي حاجة اهدى
هدى: صداقتك هههه جيت نتعرف عليك بعدما دواو ليا عليك شي ناس.. گلت نشوفك عن قرب كي كاتباني
طلعات حاجب: مافهمتش شنو كاتقصدي
غمزاتها: من بعد ازين وغاتفهميني مزياان..دابا غانمشي بلا مايتسد عليا الباب.. بااي
مشات كاضحك وعيون هيام معلقين فيها كاتخنزر منفرة منها من عند الله ..نفضات راسها وكملات طريقها للقسم دقات الباب ودخلات وكالعادة كلشي فيها كايشوف گلسات فبلاصتها المعتادة حطات الكارطابل ونزلات عينيها فسميتو منشوقة فالجنب.. تاج الدين ...سرحات كاتشوف فيها ورجعات بدون وعي كاتتتفكر فالحلمة فاقدة التركيز...
*******ة********
تاج الدين: بسم الله الحاج
خدا من عندو الهاشمي كايحسبهم: بسم الله..هادي 3000 درهم
تاج الدين: 2000 غدا نجيبها لك وفنفس الوقت ناخد الامانة
الهاشمي: اها ماگلتي عيب "رجع شاف فيه كايتفحصو" مالك بعدا كاتبان ماشي على بعضك
تاج الدين: لا لا مزيان الحمدلله
الهاشمي: جيتني بحالا عيان لا؟
تاج الدين: لا غير ماناعسش مزيان بلا ماتشغل بالك انا بيخير
الهاشمي: واخا اولدي واحاول حاول على صحيحتك ماحدك قاد هههه
تاج الدين: ههه الله يطول عمرك الحاج..غانمشي دابا نتغدا مع الدار دغيا ونرجع
الهاشمي: اللي بغيتي ..الله يعاونك
تاج الدين: اميين ..خرج من البازار كايزرب ويشوف فساعتو خايف لايتعطل.. تصادف فالطريق مع نفس مول الصوفا ديال البارح بانت فوجهو تبسيمة خفيفة ومشا متوجه عندو
*******ة******
سررررررر
تحل الباب وبداو كايخرجو التلاميد وهيام موراهم مغوبشة كادور راسها بين الوجوه وعينيها كايقلبو .. شافتو واقف فنفس البلاصة هاز نفس الصوفا مبتاسم ليها..
دخلات سادة فوجهو الباب ضاار بعصبية خبط قبضة ايدو مع الحيط كايننهج
.....
دخلات لبيتها سادة الباب ومتكية عليه بضهرها صدرها طالع هابط.. هزات ايدها بتردد قاست بيها طرف شفايفها وسدات عينيها ببطء
فلاش باك🎬🎬🎬🎬🎬
بنفس الشوفة: ديري فيا اللي بغيتي
نيم فيها عينيه المعسليين بالتبويقة تاروها كتر وتاهت فيهم، بديك الشوفة ماقدرش يمنع راسو ويقرب ليها كتر حتا قاس شفايفها بلا مايبوسها غير حطهم وحبس خلا كرزياتها كايترعدو بين فمو رجليها مابقات عرفات فين توديهم واش لعندو ولا اللور تهرب لدارهم وقبل ماتقرر زاد تخشا فيها هو جابد شفتها الفوقانية بين فمو ساد عينيه وكايضور راسو بشووية ..لاهو عمرو باس ولا قاس شفايف شير مرا ولا تمنا يقييس اجا مابعدو عليها دابا رجع فيما تبغي تبعد كايقرب تبعد يقرب ماساخيش وغاديش يسخا حتا حس بيها كاتنتاخض وايديها تهزو بجعد ضارباه لصدرو
حتا بعد شوية حال عينيه بزز و مميل راسو شوية رجع كايهترس وانفاسو تخربقو بحالهم بحال الدقان اللي فالقليب: شكون نتي؟ شكون
هيام: و..وا واش حماقيتي؟؟؟؟؟ ع علاش؟؟
سكت ماجاوبها بوالو غيركايشوف ويتنفس طولات فيه الشوفة وضارت دغيا لدارهم فحين هو سكت حتا سكت من بعد بدا كاضحك الضحكة دياال بصح خاارجة من القلب حاس هي اللي غاتخرج شوية ديك الجياشة اللي شاعلة فيه للداخل ..جر رجليه وداك شوية الوعي اللي بقا عندو دار بيه السوارت فالباب وشعل الضو غير شاف فالدروج هو يطلق زواكتو
مشات گلسات تالفة كاتشوف قدامها وتسول راسها اللي بغا يحماق اش طراا؟ واش أترات فيها بصح ولا غير حيت اول مرة يوقع ليها فلاش بحال هادا.. ياك ديك النهار ضد فدوك المشاعر هضرات معاه عاادي بغا تبرد وتبين لراسها باللي تاحاجة ماتبدلات.. دابا شكاين اهيام..مالك غير گالك نساي تلفتي وشعلتي شنو فيها؟ راه ماكاتعرفيه ماكايعرفك شنو باغا بعد ماوقع داكشي زعما يجي يجري عندك الغد ليه فرحاان وطااير فالسماا حيت باسك ؟؟
ولهلا يفرح نتي شنو همك بييه.. تفكري شكون نتي وباللي غير ضيفة هنا وتفكري شكون هو وشنو خاصو يعني ليك وتعني ليه باراكة ماتجاهدي وتطولي التفكير على موضوع مايستاهلش حسن ماتخرجي بشي نتيجة ماتعجبكش
..وقفات كاتجمع شعرها وتمتم: باراكة.. صافي اووف
حلات الباب وخرجات متساطحة مع عاليا شداتها هاد الاخيرة من يدها بغضب كاتغوت: شنوو بينك وبين هاداااك ءاااا ؟؟هضري نتي فين كاتعرفيه
بنفس طريقتها ردات: لا باااااينة ..بقا ليك غير ولد حومة يبدا يللعب بيييك ويمشي مع خطيبتو كايضحكو وراا ضهرك على السداااجة ديالك يامسكينة.. خصاارة الكنية اللي هازة خصاارة
مشات بغضب لبيتها وبقات هيام واقفة كاترمش وقلبها كاضرب بالجهد.. بلا ماتحس ولا تبغي نزلو من عينيها دموع خط ورا خط حتال خدها وولات كلها كاتهز طارت لبيتها ماراضياش وطاحت على السرير خاشية وجهها فالمخدة كاتبكي عشرة للعين...
*******ة*******
ناض من فراشو طافي لالارم اللي كان مريگلي على الطناش..ووقف كايتجبد ماساخيش بالنعااس هز جاكيط كحلة زادها على التيشورت وخرج من بيتو بالحس كالعادة..
خرج مع الباب التحتاني وسدو وراه بغا يمشي وطلع عينو صدفة للشرجم ديال بيتها لقاه باقي شاعل..قوص حجبانو كايتساءل شمفيقها لديك الوقت قبل مايضور مكمل طريقو للشاريع كالعادة للخدمة المعتادة
ضلام الحال كتر وكتر حتا بدا الجو يصفا باقتراب الفجر عاد تم داخل تاج لبيتو مدگدگ كايعصر فعنقو وعينيه بوحدهم مسدودين ...
حدو نصل من رجليه وتلاح ففراشو بجاكطتو كايطيب النعاس اللي تخاصم معاه هاد ليام سبابو بنت الجارة اللي قلبات نهارو ليل وليلو نهار وعلى تفكيرو فيها ضهرات بسمة خفيفة على وجهو ومشا فخطرة لعالم الاحلام....
**********
صباح الخيير ...صباح جديد بدا وبدات الشميشة كاتشرق والماگانة ديال هيام كاتسرسر..
طفاتها كاتجبد وتحك شعرها الاسود المجعد كاتستاعد تفيق حتا حلات عيونها البنية على سقف بيتها ..
ناضت الاستادة هازة كتاب فيدها فاللول كاتشرح من بعد رجعات للبيرو كاتملي عليهم وكل واحد تحنا على كتابو كايكتب الى واحد الجوجات.. قانيين على هيام وحدة گالسة موراها ووحدة فالصف اللي حداها ..
غمزات وحدة فيهم لخرا اللي ورا هيام وبالخف مدات ايدها للشعر ديالها جراتو بالزربة حتا شهقات وقبل ماتغوت حسات بآلة حادة كادوز عليه وراسها المجروور اللور كايخف للقدام غوتااات بحر جهدها...
دوا المدير كايشوف فيها بحصرة؛ التقرير هاهو تضرب بيها ابنتي وحقك غاتاخديه ..المؤسسة ماغاتسكتش على بحال هادشي غير تهناي..واش تبغي نتاصلو بالام ديالك
بجمود وبلا ماتشوف فيه ردات: لا
المدير: واخا اللي بغيتي..دابا تقدري تمشي للدار ترتاحي حتال العشية عاد جي والى بغيتي حتا القسم....
-سدات عينيها غايبة حتا مابقاتش كاتسمع لهضرتو المتأسفة على حالتها ..حلاتهم دغيا وهزات الكارطابل خارجة من الادارة وعينيها كايضورو..الساحة عامرة وكلشي كايضحك عليها شعرها رجع حدا الفك نيشان بعدما كان قريب يفوت ضهرها وتاج ليها كاتتباها بيه قدام كلشي وعاجبها كتر من أي حاجة فداتها ..هاهو دابا تخاد منها..حتا هو..تبع داكشي اللي خسراات ووشنو مازال غاتخسر..!!!!
.......
دخلات للدار هازينها رجليها بزز كانت عاليا فالكوزينة.. خرجات تهضر معاها ولكن وقفات شاهقة وايدها على فمها ممصدقاااش
عاليا: شنو!!!!؟ ماالك شكون دار فيك هاكة؟؟
دازت ماجاوباتهاش خلاتها تزيد تغوت: هياام معاك كانهضر "بغات تسد الباب ووقفاتها" وووقفي!! علاش مقططعة شعرك شهااد الحااالة
شافت فيها وعينيها عامرو دموع وتساؤل: فنظرك انا غانقطعو.. اناا
حل الحاج الهاشمي الكوفر ومد ليه البوصلة الدهبية منشوقة من الضهر بأحرف اسمها بعدما حط ليه تاج الدين كمالت المبلغ فوق البيرو...خداها كايشوف فيها والفرحة ماليا عينيه معوضة التفلعيص اللي واكلين عضامو هاد الليالي..
حلات عليها عاليا الباب لقاتها هاكاك مشات گلسات حداها كادوز على ضهرها
عاليا: هيام ..شوفي فيا نگووليك شي خبار
طلعات عينيها حمرين وسخاان: شنو تاني؟
بجدية:: غانمشيو من هنا
رجعات كيف كانت كاتبكي كتر: باراكة عافاااك صافي بلا ماتزيدي تبني ليا امال على واالو انا عيييت
عاليا: هيام.. انا غانزوج
شمرات بنيفها وشافت فيها مقوصة حجبانها: نعام؟
عاليا: اه ..واحدة الراجل كان صديق ديالي تلاقينا صدفة وبعد بزاف ديال الهضرة طلب مني الزواج..وأنا وافقت
ردات بدهوول ممتيقاش: غاتخوني بابا
عاليا: الله يرحمو ..باباك تقريبا عام هادي باش مات وانا من حقي نأسس حياتي من جديد مع انسان كانبغيه
قاطعاتها مافاهمة والو: وبابا ماكاتبغيهش ..واخا دوز مية عام المفروض عمرك تبدليه بواحد آخر نتي ماكاتبغيهش ياك بابا عمرك بغيتيه
جاوباتها بغضب: سككتي شهاد الهضرة تاني.. تء.. مختار كان حب حياتي وغاتبقا ديما مكانتو فقلبي كبيرة ..والانسان ماكايبغيش غير مرة وحدة فحياتو الحياة كاتستامر وانا على قبلنا غانوافق على الزواج وحتا نتي تقبليها فأسرع وقت
-ضارت مطولة فيها الشوفة ونطقات بعدها بجدية: غايكون خيارك التاني هو عمتك فالبادية..الغدا موجود اجي تاكلي
-خرجات مخلية دموعها زايدين كاينزلو..ناضت بتتاقل للشرجم حلاتو ضاربة فيها الشمس كاتشوف قدامها لبيتو وتنهيدات حارة كاتخرجهم
خاايبة الحگرة..قاصحة الحگرة..الحگرة قتاالة.. كاتاكل من أغلى حاجة عند الانسان (الكرامة) شيئا فشيئا..واصعب احساس ممكن يصادفو اي واحد فينا،
..فاش عاد كانكونو صغار وهي بادية معانا..كايحگرو كلماتنا ..تعبيرنا وإحساسنا ..كايحگرونا بحنا بااقين صغار ماكانعرفوش ماكانفهموش فعادي يحگرنا الكبير..كانكبرو ونوصلو للحجرات الدراسية وتما حگرة من نوع آخر(التنمر) تارة من تلميد شايف راسو فالقسم وكايزيد يكبر ويتلدد وهو كايحگر عليك نتا، واللي فالحقيقة هو براسو كاتمارس عليه الحگرة من جيهة تانية وجاي يبردها فيك
..وتارة من رجل التعليم اللي ماكايعرفش يستعمل سلطتو بالشكل الواجب حتا كايزدق حاگرك غير هاكاك.. وماحدك كاتكبر ونتا كاتتلقاها من مختلف الفئات وفمختلف المواقف..
الحاجة اللي كاتزاد وتتبدل هي طريقة تعاملك مع الموقف..هنا كلشي ممفهووم وكاالم..القاصح من هادشي كامل.. هو الحگرة الللي طاتجيك من الشخص اللي كاتبغي..تما كايوقف الوقت والمنطق وتما كرامتك اللي جامع كاتشتت كلها تحتو...والصعيب هو كيغادير تردهها مازال ..ماغاترجعش
*****ة*****
وقفات وقبها مغطي شعرها خصلات خفاف نازلين من جبهتها .مطلعة عينيها كاتشوف فيه بجمود عاطيها بضهرو ومرة مرة كايهز ايدو يشوف فالساعة ويطلع راسو ينفخ
..زفرات من نيفها غادة عندو وآتار الدموع باقين على خدها وعلى بؤبؤ عينيها الحمر..
حس بشي حد وراه بسم وكيف دار محاها مغوبش: على السلامة كنتي تتعطلي مازال
زيرات فمها منزلة عينيها وكاتتنفس بغير ضيق ماحاملاش تكون هنا
هيام: شنو بغيتي؟
قرب ليها مقوص حجبانو باهتمام: هيام مالكي؟ "مد ايدو لخدها وبعدات دغيا مخنزرة فيه
غوبش وحرك شوية عينيه فوجهها وشي حاجة ماشي هي هاديك ! من الكلام المبررد ومن الخطوط الحومر اللي تايضورو على لوزويتيها خلاتو يكشر كتر ويقصح شوفتو: هيام؟..شنو واقع ..مبدلة بزاف هاد النهار مالك
نطق بالزربة: تسلفتهم صافي.. دابا نتي اللي مالك ماغاتعصبيش هاكا غير على ود ديك الليلة.. ياك
-قربات عندو براسها وصدرها برعدة الحگرة كايترعد..شافت فيه بنظرة غل واحتقار روبلاتو بيها: كلكم السبااب.. كلكم ..بالحق خديت درس زوين درتو حلقة فودني ..عمري نعطي لبناكم كبر من حجمو يوقع اللي بغا يوقع
بعدم فهم: لاياش كاتلمحي ؟؟؟
ابتاسمات ووجهها جامد ..خدات من يدو البوصلة ورماتها بالجهد لحدا الشجر دارت عندو ووعلى وجهو دهشة من فعلها: انا ماباغااش صدقة لا منك لا من هاديك خطيبتك كااااااااااتفهم
زير على ايدها وهو بصح مافااهم واالو حاس براسو مع وحدة خرا غير اللي كايعرف: شنوو كاتخربقيي اناا مصدق عليك؟؟ وشكون هاد خطيبتي منين جايبة هاد الهضرة
ضحكات فوجهو والدمعة فعينها: انا ماشي مكلخة بحاالك اتاج.. انا هيام ..هيام العلالي وغييير كنيتي نشري بيها عشرة من هادي ولكن اناااا اللي مابغيتش..ماشي باش واحد بحااالك يلقااها فرصة فيين ستهزأ بيا
زاد زير على يدها ودمو بدا كايغلي: وااحد بحاالي؟؟ كيفاش زعما بحاالي وشكوون هاااد نتي شكووون ..هي بسباابي تبااعت وبااش نمررض رااسي ونردها لك كاتجاازيني هااكااا بهاااد الهضرررة
غوتاات ناترة ايدها: حييد عليا ايديك الموسخيين .. شنو يسحابليك رااسك گااع ءء؟؟ لااش كنتي بااغي توصل زعمااا فااش جبتييهاا ليااا ؟ ههههه راه گلت ليك مكلخ..مكلللخ بزاااف وماعارف حتا شكوون مدور بيك خباارك كلهم عندي كاتفهم..عررقت كلللشي..و باش نفكر انااا نكون مع واحد فقير بحالك باقا مو هي اللي كادق فالديور تجمع ليه ماياكل وتتبرا من هادا وهادا؟ ماكاندوووزش عليهم حتا صبااا..
جمعها معاها فتسرفيقة لوجهها حتا ضار مصورة فيه ايدو.. بقات حالة عينيها فالهوا جامدة وكاتستوعب..هادي تاني مرة كاتسرفق فحياتها..اللولة فاش بغات دابز مع صاحب البنك وتاخد منو البوصلة، والتانية بعدما رمات نفس البوصلة ومابقاتش باغاها..جمعات مابقا من التكسرات اللي كاينهشوها لداخل قادات القب بالزربة وشاف فيه كاان مغير تماما.. عينيه رققو بالدموع ووجهو سخن وحمااار حتا من شفايفو مابقا عرف مايخرج منهم بالصدمة والالم ..شااف فيها متبادلين نظرات الحررقة فصدهم حتا نطق محصرر كايلهت بحالا كان كايجري وقلبو كايضرب ليه فحلقو : كيفاش؟ كيفاش قدرتي.. كيفااش تگوولي هادشي ؟؟
نزلو دمووعها مرككزة على عينييه اللي برقو: كون غييير عمرري عرفتك.. ععمممري جييت لهنناااا ولااا عررفت شي واااحد فييكم..كوون غييت متت مع باابااا ولا عرررفت باللي نااس بحاالكم عااايشيين
تاج الدين: اععععععععععععع سكككتي..
..ضاار كاينهج ويمسح دمووعو حاارين كايتكبو.. ضاار عندها حال فمو كايترعد: كون غير ماجيتيش بصح..كوون غير ماقتلتينيش اهياام..كون خليتيني عاايش وماااتقتلينييش
هيام: حتا دابا دير بحالا عمرك عرفتيني وحتا انا غانمحيك من حياتي...وعمري غانسمح ليكم.. عممري
شافت فيه لآخر مرة وضارت راجعة للدار كاتجري ..مخلياه واقف جاامد للحظات غير كايشووف حتا مابقاش قادر يزيد الدقيقة فديك البلاصة ..دوروه رجلين مگيدينو وهو ساهي قدامو وكلشي فيه مهرس..واللي متضرر بزاف شكون فيهم..ماقدرش يحدد واش رجولتو اللي من الصغر وهو محافظ عليها ولا قلبو الصافي الطيب..لقلب اللي هداها بدون علمها وبدون مقابل وبدون تردد..حقا آااه هو الغالط..هو حمااار وكانبو هه هو اللي رماه عند رجليها تزطم عليه بلا رحمة حتا فات الوجع الحدود وآاااه على وجع الحب الأول آااه..آاااه على برااءة المشااعر ولهفة احاسيس أول مرة تختابرهم..وآااه على الروح الى تجرحات ونزفات ليه فيضان دم على رجليه كايصعب عليه المشي...ولكن يستااهل ..واش بصح ؟ تاج يستاهل هه وعلاش لا الى كان باه اللي من لحمو ودمو تخلا عليه علاش البنت اللي مالت ليها روحو وعشقها ماتحتاقروش وتخليه ..شنو يمنعها..
قادوه رجليه لعند الباشير دخل وتلاح على اقرب سداري عيان تعباان وشحاال التقل اللي كتافو كايضروو ..
حرك غير عينو وبانت ليه فالطبلة اللي تما مزلغ فوقها فانيد حمر وقرعة مكفح منها شوية ..عرف ديالاش وعرف باللي الباشير غايكون غير فبيتو مع شي وحدة تاني ضحك بالجههد مطلع راسو الفووق داباا عااد حس بيه عااد عررف علاش الشرااب وعلاش الفانيد وعلاش ديما مجرب شي حاجة جديدة ..عااد عرف علاااش عمرو تزووج ولا عااود بغا من غير جميلة كانت حبو الاول حتا هي وكانت احاسيس الباشير تجاهها متاهة لتاج عمرو فهمها حق المعرفة.. كاان ديما كايسمع مو كاتگول باللي الموضوع فيه سحر مافيهااش دابا عاد فهم واستوعب اييه السحر موجوود نييت ولكن من نوع خااص..
طوول فيها الشوفة رجع كايلهت وقلبو ضرب ضربة وحدة : غاتمشي؟؟
نجاة: فين خاالي هو اللي عطا...
تهز بالزرربة داز عليها كايجري وسط ديك الشتا كاايحاول يحل عينيه الباااهتين ويزرب كتتر
*******ة********
وصلات لحدا دارهم كاتشوف كاطكاط بنية كاتبري حداها عاليا مخرجة الحوايج للشيفور يديرهم فالكوفر..جرات عندها رجليها مابقا عندها نفس ودوات بخفووت: غانمشيو دابا
تنهدات لحالتها: اه دابا
هيام: مزيان ..
حلات الباب وطلعات هي وعاليا مسندة راسها على الباب بتعب.. سدات عينيها وخرجات تنهيدة من أعماق اعماقها باغا غير تنسى ..خدم الشيفور السيارة ديمارات مااشية ومع الدورة كان هو جاي كايجري ويعيط بسميتها "هيااااااااااام" زنزنو ودنيها على صوتو وزيرات سنانها مانعة دموعها الحارين يعاودو ينزلو
🎬🎬🎬🎬🎬🎬
هدى واقفة قدامها كاتتبسم لوجهها المصدوم: شنو اللي مافهمتيش؟؟؟ صاافي تاج الدين عاود ليا كلشي واأنا عطيتو بقية الفلوس باش يردها ليك.. غير كوني هانية ازين انا حااسة بيك وغانعاونك
"خنزراات فيهم بجووح وكملاا طريقها كاتتنجه بحرااارة مخلياهم وراها كايشوفو فيها هوما والتلاميد اللي تما قدام المؤسسة"
🎬🎬🎬🎬🎬
هياااااااااااااااااام...حلاات عينيها ببطئ على الشتا اللي ماقطعاتش وغير ماكاتزييد وصووتها كايجهااد.. السائق دخل للشارع العام وكسيرا بسرعة من وراه تااج كاايجري تاابعو كلو ساارد حتا مابقاش قاادر ووقف وسط الشانطي كايشوف فيها كاتغبر على عينيه شوية بشوية حتا اختافاات .طيييييييييييط
تاج راسي الجزء الثالث
محتوى القصة
التنقل بين الأجزاء