الأجنحة المنكسرة الجزء 15

2020

محتوى القصة

رواية الأجنحة المنكسرة

رجعت لدار جالسة مع سمية كيتعشااو وعقلها ساهي

سمية : دابا غدا غتجي ديك ساعة نمشي نطلقاها انا

شافت فيها وقالت : معامن كنهضر فاش كتخمم

نريمان : لا والو هانا كنسمعك.. وصافي سيري موراها

سمية : ايوا وفقاش غنمشيو نشوفو الحولي عيد بقالو غا 4 ايام

نريمان : وانا قلتلك اماما حتا يبقى يوماين ولا نهار هاحنا

سمية : وجهك معاجبنيش ياك لباس؟

نريمان : اوالو غير تالفة وصافي انا غنمشي ندوش ودخل نعس

خلاتها متبعة ليها العين وناضت هزات حوايجها ومشات دوشاات ورجعات لبلاصتها لابسة بيجامة قصيرة بلا حمالات الصدر من غير سليب ..
تكات فبلاصتها هازة تليفونها الحنين والشوق خلاها تمشي تشوف جهاد شنو حاط وشنو الجديد ديالو لقاتو حاط ستوري فيه صورة وليد صغيور كان هوا نفس الولد لي هاز فيديه بدات كتكبر الصورة ودموع مغرغريين فعينيها. حبها عامي ليها العين واخا كتبغي تنسي وتعرف ودير علاقات باش تنسي ولكن ديما كتقاارن بيناتهم كتلقى حتا واحد ميوصل لجهاد.. ولكن شنو دير!! المكتاب فرق بيناتهم وكل واحد شد طريقو وتستمر الحياة.. !!

فصباح مشمس كيف العادة فايقة نريمان ببجامتها كتفطر معاهم. الحرشة سخونة بالزبدة البلدية والعسل وبراد د اتاي مشحر مع البيض مسلوق وطبسيل فيه بريوات معسليين هازة نريمان كاسها كتفطر شافت سمية ف اشرف لي يلاه حال عينو ناعس فوق سداري قبالتهم وقالت :

نتا غتبقى دابا غا خروج ياك؟ لا قرايا لا خدمة لا تكوين هااا؟ غنبقى دايما ليكم انا ولا؟ نوض دير مستقبالك فحال قرانك محدك صغير

مجوبهاش قلب وجهو لجهة خرا وحط على راسو مخدة مباغيش يسمع

سمية : ايوا لي بغا يربح يربح ولي بغا يخسر يخسر انا مسوقيش لي علياا راني كنديرو

حطت نريمان يديها عليها وقالت : خليه اماما دابا يوقف على هضرتك ويندم

هز راسو فيها بحدة وقال : يديها فراسك نتي قابل غا شغلك

بسخرية : هه شغلي قابلاه وداياها فراسي شوف راسك غا نتا

اشرف : وهاانتي اماما واش كنجبدها؟
سمية : نعس غاا نعس وسكتنا.

وقفات نريمان حيدات تليفون من شارج وقالت : ماما هانا غنمشي نتي مغاديش تمشي دابا؟

سمية : لا انا اليوم عندي سيمانا د ليل حتا ل 8 عاد غنمشي

نريمان : اه مغنلقااكش هنا فعشية ايوا الله يعاونك

سمية : امين ابنتي الله يعاونك حتا نتي

هز اشرف عينو فيهم ورجع هبط راسو كيخمم..

لبسات حوايجها ومشات شدات طاكسي لصالون.. كيف العادة دخلات كتنضف ودوز الجفاف وتهوي الدنيا جلسات قدام مرايا كتقاد وجهها وعينيها مع المرايا شكون داخل شكون باب جاتها ف الجنب كتشوف فالدخلة د صالون وهيا فبيت اخر مكتبانش..
صونى ليها التليفون لقات فاتي لي كتعيط.. حلات الخط بالزربة

نريمان : اهلا الزين.. ااه والله حتا لقيتيني يلاه جيت.. اه اجي والو ماجا حد.. واخا هانا نتسناك..
قطعات ورجعات المرايا كتقااد وترش تحت يديها ديودوغن وتقاد كسوة لي لابسة وشعرها لي ملوياه بطريقة عشوائية خصلاتو هابطين مع جناب..

بعد دقايق دخلات فاتي لي كانت طايتها ما غليضة ما رقيقة ولكن الصدر خارج ومؤخرة حتا هيا مكياج خفيف وحجبان راسماهم بطاطواج وشال ملوي على راسها مغطية نص ونص خارج من قدام لابسة سروال دجين مطرطق عليها وصبادري عالية وقميجة تحت خصرها

تسالمو وجلسو فالصالون كيتجمعو وفاتي حيدات شال كتشوش على راسها

فاتي : ايوا كيف دايرة ازين لباس عليك؟

نريمان : بخير وانت شكتعاودي امور هانية مول دار

فاتي : هه سوليني غا على راسي هاد الساعة ايوا امضرا شنو درتي مع داك خيينا لي قلتيلي غطلقايه؟

ضحكات وقالت : طلاقينا لبارح هه
فاتي : هاي هاي هه هيا تما شي حاجة عاوديلي

ردت : بغا يتزوج بيا فاللول حساب ليه انا مزال متزوج المهم مدخلش ليا راسي داك السيد انا بغيت نديرو غا طريق باش نسى طليقي

ردت : همم وعلاش مترجعوش نتي وراجلك شفيها تحلوني على. ديلمو ورجعيه

عضت على شنافتها كتحرك راسها بالنفي : اودي ساهلة فالفم انا قلتلك راه تزوج ودار ولادو ونساني فين عاد غنزيد معاه بففف هوا اول واحد بغيتو عمرني مقدرت نساه

فاتي : ايوا اختي ملي قاضية عندك حامضة هاكا شوفيلك شي واحد اخور اويلي غتبقااي بلا راجل هه

بالآسى : ايوا راه مكرهتش ( تنهدات ) ولكن الله غالب معندي مندير

فاتي : هانتي ازين سمعي عطي الفرصة راسك محدك صغيرة تمتعي بشبابك خرجي وفرحي ونشطي راه مكاينش غا هوا فالدنيا ونزيدك سيد سيادو كاينين خصك غا تحلي عينيك. اجي بعدا شبان ليك نخرجو انا نفوجو على راسنا نقصرو فشي بلاصة


خرجات عينيها وقالت : اويلي لا هه منقدرش نمشي لشي بلاصة

فاتي : وشنو فيها الا خرجتي وتمتعتي براسك وبالجو بحال ناس راه عادي مزوجين وصحاب ولي كوبل كلهم كيمشيو لكازينو عادي

نريمان : اويلي انا منمشيش ليه وزيدون انا كندير فولار اصاحبتي منقدرش

فاتي : وحتا انا كندير فولار وكنحيدو عادي فين المشكيل مالهم غيعضوووك اويلي

نريمان : الا اصاحبتي منقدرش

فاتي : وراه غير غادي نقصرو تمااا عادي ازمر وغنرجعو بحالنا مالهم غياكلوك!!!! بففف. راه بحال بحال. بحال مشيتي لقهوة بحال مشيتي لبواط هانيتووون. ونيت تنساي الهم وتحيدي القنت

سكتات نريمان كضور عينيها وشيطان كيوسوس

فاتي : اوالله حتا يعجبك الحال هههه وداكشي واااعر بلاما نقولك خصك تمشي وتشوفي بعينك

نريمان : بخوف ) ويلا شافني شي حد وناض ليا الصداع؟

فاتي : مغادي ينوض ليك والو غير سعفيني ويلاه نمشيو

نريمان : وصافي ديك ساعة نشوف

فاتي : اوك ازين واخا نكمي ياك هانية ؟

نريمان : لا اجي لداخل ديك البيت الخاوي ولا كوزينة يجي شي حد غيشم ريحة

فاتي : واخا اجي معايا

نريمان : يلاه زيد

دخلات معاها لبيت هيا كتسوط فالسماء ونريمان كتشوف فيها دخان خارج من فمها ونيفها وعينيها مع الباب عنداك يدخل شي حد. والقرعة د ريحة فيديها كتخرج حتا لصالون تسوط.
حتا كملات ورجعو جلسو..


فاتي : ياختي كنموت بالجوع حتا الفطور مفطرتش. انا غنهبط نجيب شي حاجة شنو نجيب ليك معايا

نريمان : واخا هاكي جيبي ليا معاك سندويتش نتغدا بيه راه 1 دابا
مدات. ليها الفلوس وهيا تردها ليها
فاتي : لا انا نجيبو لزين غا خلي فلوس

نريمان : اويلي لا هاكي شدي ت..

فاتي : وصافي هضرت معاك انا نجيبو ليك..

يلاه هبطات فاتي مع الدروج وهوما يطلعو جوج كليانات فديك الوقيتة رحبات بيهم وناضت كتخلط الصباغة وكليانة جالسة على كرسي وهيا كتصبغ ليها. كملات ليها خلاتها جالسة ومشات تدير لاصير لبنت لوخرا. فديك اثناء دخلات فاتي حطات داكشي فالكوزينة ورجعات لعندهم جلسات كتجمع مع السيدة لي صابغة الشعر كتسنى باش تغسلو..
يلاه كملات لكليانة وهوما يدخلو 3 دناس خرين
ناضت فاتي تعاونها غسلات لكليانة شعرها ودارت ليها بروشينغ. ونريمان فكرسي اخر كتقطع الشعر وتصبغ..

مجلسااتش نهار كولو وهيا واقفة ملقاتش الوقت حتا باش تاكل داك السندويتش لي برد..
رجعات لدار مسخسخة
لقات نسرين جابتها سمية من مطار جالسة فالكوزينة كتوجد العشاء
تعانقو بشوق كيتباوسو ويسولو على احوال..
تعشاو فجو عائلي ب 3 بيهم من غير سمية حتا تنصص الليل عاد مشات لبيتها فرشات لنسرين حداها باتو معنقين بعضياتهم كيجمعو ويضحكو ،،

صباح كيف كاع الايام خرجات غادية مع الطريطوار تشد الطاكسي. وناس بموطور 3 دروايض غاديين بالحوالا كل واحد شاري الضحية ديالو

والشوارع بياعة حاطين التبن والفاخر كيبيعو لناس سوق قدامها عامر ناس مزامحمين كلشي كيتقضى شدات .طاكسي ومشات لصالون .دوزات نهار فخدمة كليان على الجهد ملحقات لا تغدا ولا ترتاح

يلاه خارجة من الصالون وهوا يطلاقاها طارق وقفها فالباب
مدات يديها سلمات عليه شاف فيها وقال...

علاش مكتجاوبينيش كنصيفط ليك فالواتساب ومكتجاوبيش

ردت : راه كانت عندي الخدمة وممسالياش يلاه نخليك غنمشي

وقفها : اجي شنو درنا فداكشي لي قلت ليك!

ردت بنرفزة : طارق مبغاااش نتزوج وا فهمني مالك لسقتي راه معنديش الغرض نتزوج انا قلت ليك باغا نعيش حياتي وندير مستقبلي ونحقق داكشي لي باغا كون كان على زواج كون راني تزوجت شحال هادي

طارق : زعمة مراضياش بيا؟ فهمتك ابنت ناس

ردت بتنهيدة : واااا ماشي مرضيااش بيك بالعكس راه اناا معنديش فكرة د زواج وصافي يلاه تصبح على خير..

خلاتو واقف وشيرات لطاكسي مشات بحالها.
الجو د العيد

وقفات نريمان الخدمة مشات سمية هيا واشرف يشريو الحولي ونريمان هيا ونسرين مشاو يتقضاو الحلوة والمشروبات والتقضية ديال العيد.
رجعو لدار كيخملو وينقيو ويوجدو لنهار عيد..


صباح العيد لبسات نريمان قميص فالشيبي طلقات شعرها لواتو بالبابيليز من لتحت ودارت مكياج خفيف وحتا نسرين بقميص فالڭرونة وشعرها الأشقر مبوكل كامل وسمية بقفطان نص كم جامعة شعرها سفنجة خرجات نريمان من بيتها باست لسمية يديها وراسها كتبارك ليها العيد ولختها. هزو طبسيل د الحلوة وطبسيل د رغيفات معسلين وطلعو لعند جارتهم حطو داكشي على طبلة باركو ليها العيد شاركو معاها الفطور وهبطو بحالهم. كيفيقو اشرف لي حال فمو

جلسو فالصالة حدا بعضياتهم ونسرين هازة تليفون خدات سيلفي جماعي ضاحكين ولي، مزين الصورة كتر هيا نعيمة فوسطهم

جلسات نريمان كتبارك كترد على مجموعة من المسجات ديال الكليانات لقاتهم مصيفطين ليها مباركة د العيد.. وهيا كتجاوب على مسجات وصلها مسج من عند ريم دخلات ليه

ريم : زين صباح الورد ومبروك العيد تعيدي وتعاودي بشي زمان يواتيك سلمي على صحاب دار وتهلاي ليا فراسك بيزو 😘


تبسمات نريمان بفرح وسجلات ليها مسج صوتي شكراتها فيه وبركات ليها
حطات تليفون يتشارجا وناضت بدلات حوايجها بعدما جا جارهم لي غيذبح ليهم ولمولات دار..

واقفين فالسطح ودخاخن ودراري كيصونيو على ديور يشوطو ريوس جو دالفرح والبهجة عايشينه ذبحو الحولي ديال مولات دار هوا الأول عوناتها نريمان فغسيل دوارة وتشواط راس..
عكس نسرين لي جالسة فالكرسي شادة تليفون مكونكطيا محطاتش يديها فالماء ..
ذبح ليهم السيد حتا ديالهم وتعاونو عليه حتا كملو وفصلو ليهم فميكات وسمية كتقدد وتعلق فالحبولة سيقو وشواو الكبدات بجوج وتجامعو عليهم فصالون د مولات دار. تغداو مجموعين وقيلو جالسين حتا تعشات العشية عاد هبطو بحالهم..

دازت 4 ايام رجعات نريمان الخدمة ولروتين اليومي نسرين غير الدار وخروج وتباحر اشرف حتا هوا عطيه غا الخروج والقصارة.
نريمان صالون من صباح حتا العشية وسمية لي كملات سيمانا د ليل وبدات فسيمانا د نهار..

كانو مجموعين فليل كيتعشاو ونريمان كتخمم شاف فيهم وقالت :
عرفتو راه جاتني واحد الفكرة فبالي

نسرين : بتساؤل ) اما هيا؟
سمية : الله يسمعنا خير

سكتات كتخمم وقالت : ماما فكرت ندير واحد القضية قالتها ليا واحد السيدة كليانة ديالي. انا ديك فكرة مدخلاتش ليا راس فاللول ولكن فكرت فيها عجباتني دابا

سمية : وشنو هيا

ردت : غندير تعاونية ديال تعليم الحلاقة دابا نتي عارفة انا كارية دار كبير صالون وبيت وبيت لاخور خاوي وعاد كوزينة وطواليط. انا فكرت داك البيت لي خاوي نصلحو ونرجعو تعاونية يتعلمو فيها البنات وحتا الا مكفانيش صالون كبير حتا هوا نعلم فيه وداك البيت د مكياج نبقى نخدم غا فيه. ندير صالون وفنفس الوقت تعليم شنو بانلك

ساطت سمية من مناخرها وقالت : وهادشي شحال خاصك ليه د تمارة! وشحال د فلوس؟ وطلع هبط واش سهلتيه!!!

نريمان : ماما الله يهديك سمعيني راه شتااء جايا والحركة فالصالون غتنقص ونتي كتشوفي غنتزيرو ها الكرا ها الماء وضو ها مصروف شلااا فاش غنوحلو دابا الا درت هاد التعاونية د حلاقة غتعاوني وغترجع عليا بالمنفعة وزيد عليها نشوف شي بنت تقة نعلمها وتبقى تخدم معايا فالصالون شنو قلتو ؟

نسرين : فكرة مزيانة اختي انا كن مكانتش عندي القرايا كون بقيت معاك نعاونك ونخدمو انا وياك بلحق خصارة هاد اليوماين غنمشي

نريمان : ديها فقرايتك نتي ولي حتاجيتيها نصيفطوها ليك

سمية : وشغادي نقولك انريمان ديري ابنتي لي يصلاح ليك انا معندي منقولك.
نريمان : و دعي معايا وصافي انا تحمست لهادشي دابا تشوفي من دابا عام والله اماما حتا هادشي غيرجع علينا بالنفع

حركات راسها سمية وقالت : ايوا الله عوينك ابنتي

من قوة تخمام مبغاش يجيها نعاس همها دابا هوا تزيد تكبر مشروعها وتحقق الفكرة لي فبالها هوا دير جمعية دحلاقة ديالها

بدات كتقلب وتبحث فهاد الموضوع بحكم معرفاش ومعندها حتا فكرة على هاد شي ولكن كتسول ومن الادارة لعند المندوب كتوجد الاوراق ديالها طلع هبط والصالون مشدود ..

يلاه كتوجد راسها باش تخرج وهيا دخل عندها سمية مدات ليها برا
نريمان : ماما شنو هادشي

سمية : شدي انا ماشا لخدمة يلاه شدي متعطلينيش

شداتو منها نريمان حلاتو لقات فيه فلوس

نريمان : ديالاش هادو اماما؟
سمية : المهم جمعت ليك هاد البركة راه تما 4500 درهم قضي بيها

تغرغرو عينيها بالدموع من شدة الفرحة : لا اماما الحبيبة انا غنشري بشوية عليا حتا نكمل م..

قطعاتها : قلت ليك شدي معنديش 10 منك باغا تحققي داكشي لي فبالك سيري الله يعاونك
خلاتها واقفة مصدومة وعينيها مدمعين من شدة الفرحة وخرجات..
شداتهم نريمان فيديها دارتهم فصاكها وخرجات موراها..

شرات صباغة ورجعات لصالون مشمرة على يديها وفاتي معاها كتعاونها صبغات داك البيت بالڭري فاتح وخدات بونجة على شكل وردة كديرها فصباغة حمراء وتزوق بيها دخلات فاتي كتسيق ومقابلة ليها الصالون وخرجات دفعات 12 د مارايات كبار بطبيلة خشبية صغيرة تحت كل مرايا وكراسا ديالهم شرات صبورة كبيرة لي غتعلقها فالحيط ومانكات لي غتعلمهم فيهم ورجعات لصالون


رجعات لصالون لقات فاتي كتخدم لوحدة من كليانات

نريمان : ياختي تعطلت ياك
فاتي : هانا موجودة شنو كندير انا هنا هههه
نريمان : جيتيني بحال الحسنة والله عمرني نسا خيرك

فاتي : لهلا يحشمنا الزين صافي اختي كملت ليك
بغات البنت تخلص فاتي حركات راسها بالنفي وشيرات ليها تعطيها لنريمان
شداتها منها وعطاتها لفاتي بعدما خرجات البنت

فاتي : اويلي حمقة نتي ههه واش انا كنخدم باش تعطيني

نريمان : وراه ديما نتي معوناني فالكليان وديما واقفة معايا علاش مكتبغيش تشدي ملي كنعطيك؟ شدي شري بيها غا ديك الكارو ولا طاكسي منين غيجيوك نتي الفلوس

فاتي : هه لا ازين عندي الخير والبركة ايوا ضروري راجل كيعطيني انا كنبغي غا نفوج عندك وصافي وكنفرح ملي كتخليني نتلاهى بحال هاكا

نريمان : هلا يخطيك عليا صراحة فاللول كنت خيفانة منك هههه كنت كنعرف واحد البنت فالامارات سميتها جنات وو ( عودات ليها كلشي ) ايوا وصراحة مبقااتش عندي ديك التيقة 100% من صحابات

تنهدات وقالت : شوفي بنادم متقدريش تعرفي اش تحت راسو انا حسباك بحال ختي والليام والزمان يبينو ليك انا خايبة راسي ومزيانة راسي ومنقدر ندير ليك حتا مشكيل ويلا متقتيش فيا راه من حقك

سكتات نريمان وهيا ميلة راسها لجنب كتسمع ليها وقالت : تقت بيك افاتي المهم لهلا يحشمنا هاحنا مع بعضياتنا احم امم فقاش نخرجو؟

فاتي : هههه هيا نمشيو نقصرو؟

نريمان : يلاه كيف قلتي نفوجو ومولاها ربي ههه حتا لغدا ونخرجو ماما غيكون عندها ليل

فاتي : وختك شنو غتقوليلها؟

نريمان : ختي مشات لإسبانيا رجعات بحالها عندها الامتحانات وخويا كيدخل حتا لفجر وغا كيدخل كينعس غنشد بيت لي كنعس فيه وصافي مغاديش يحسو بيا

فاتي : ايوا صافي هيا غدا نخرجو؟

نريمان : اه صافي غدا نمشيو نخرجو من هنا نيت

فاتي : مشات

كملات شغلها فالصالون

وفاليوم الموالي فصباح
مشات لستوديو لي طلبات منهم يوجدو ليها اوراق ديال تعليم مع لوڭو من اختيارها

خلصاتهم وخرجات كتعلقهم فالشوارع وفالبوطو ديال الضو اي بلاصة واضحة كيدوزو منها الناس علقاتها فيهم

رجعات لصالون جلسات على فوطوي كتدير اعلان فالجروبات على ود الجمعية دالحلاقة
دارت ليهم 300 درهم كل شهر
دخلو عندها مجموعة د ناس كيسولوها فين وبشحال والوقت والايام وهيا مربعة رجليها كتجاوب حتا جاو عندها الكليان وناضت كتخدم ليهم وعقلها مع تليفون
تعشات العشية وهيا مزال خدامة دخلات فاتي بعباية وصندالة د الصبر كتجرجر بيها وصاك كبير فيديها
جلسات كتجمع مع نريمان وهيا خدامة لكليان حتا كملات ليهم وشدو عليهم الباب

فاتي : وسربي دغيا بدلي حوايجك
نريمان : بدلي انا غندخل لدوش نطرف ونجي

خلاتها كتعري وتلبس ومشات كبات عليها الماء وصابون لبسات دو بياس ومشات لبيت ملوية عليها فوطة لقات فاتي فالصالون كتلبس سروالها
شدات عليها الباب وجبدات حتا هيا سروال دجين من صاكها لي جابت معاها لبساتو جا لاسق عليها ولبسات فوق منو تريكو فالأحمر غامق بلا كمام وتجاكيط كحلة من فوق شافت راسها عجبها الحال ولكن مترددة اول مرة تخرج بلا شال احساس خايب كيخليها تراجع على فكرة دالخروج

جلسات على كرسي حاطة يديها على فمها كتخمم حتا دخلات عليها فاتي
نريمان : ياختي حسيت فشكل مقدراش نخرج هاكا

فاتي : اويلي نتي حمقة نوضي نخرجو نفوجو ومولاها ربي راه مغنديرو حتا حاجة خايبة نقصرو نفوجو ونرجعو

رجعات ناضت طلقات شعرها دوزات عليه بابيليز من القاع وحطات مكياج خفيف مع حلقة فالأنف ديالها وصندالة كحلة عالية كانت فاتي برا كتلبس صباطها

نريمان : يا ختي غنموت بالخلعة

فاتي : وزيدي تقودي ونتي كترعدي بحالا عاد عندك الدخلة

نريمان : ههه فاش فكرتيني

فاتي : ياك ههه هيا غتعاوديلي

نريمان : ههه ازيدي شغادي نعاود ليك
طفاو الضواو وحلات نريمان باب بشوية طللات على دروج لي طالعين الفوق وشافت فباب دجيران لي قبالها حس المقطوع خرجات فاتي كتسلت وموراها نريمان شدات الباب وعينيها مع الدروج
طلو يشوفو شكون طالع لقاو دنيا خاوي وهبطو فالدروج كيجريو شادين فالحدايد ديال الدروج عنداك يطيحو بداك الطالون خرجات فاتي هيا اللولة ضورات عينيها العزارا فالقنوتا وشماكرية فقنات وغادي والجاي وطوموبيلات ضارت عند نريمان لي كترعد وقالت : وزيدي يلاه

نريمان : اويلي لا شوفي شحال د رجال

فاتي : ويقودو زيدي يلاه
شدات ليها فيديها وهيا ترجع نريمان باللور

نريمان : اويلي غيشوفوني غيوليو يهضرو فيا اختي منقدرش والله

فاتي : ببف شوفي غا تبعيني نمشيو مقاديين والله ميهضر معانا شي حد غا زيدي اصلا شكون غيعرفك واش نتي ولا لا ونتي بلا درا وجهك مبدل فمرا مكتعرفيش وحق الله ههه زيدي

شدات ليها فيديها وخرجات معاها حاذرة راسها كيخلفو فالمشية الكل حول النظر ديالو ليهم قبل ميهضرو شيرات فاتي لطاكسي وطلعو فيه بالزربة

بهمس : وهانتي شنو طرا كاع

ردت : ندمت افاتي
بنرفزة : وحتا دابا رجعي بحالك انريمان بفف

سكتات مرداتش عليها متكية على باب طاكسي ساهية فالشارع ومول طاكسي راجل شارف كل مرة يهز عينو فيهم

شافت فيه فاتي وقالت وهيا كتحلون : شنو عمو ديالي بغيتي امم هاك كلشي

هبط عينو وقال : لا حول ولا قوة الا بالله
ضحكات بالجهد وجبدات كارو كتكمي وهوا كل مرة يخطف شوفة منها كيلقاها كتشوف فيه وتغمزوا


وقفهم طاكسي قريب من كازينو خرجات نريمان وفاتي خلصات مول الطاكسي وغمزاتو بقا متبع ليها العين.. شدات فنريمان وغادية كضحك..

موسيقى على الجهد وناس داخلين هابطين فالدروج فلاكاب
وقفات نريمان فالباب وهيا مخلوعة من داك الجو لي أول مرة فحياتها كتشوفو وكتعيشو حاسة براسها بحالا كتحلم بغا ترجع باللور ولكن جراتها فاتي وهبطو لتحت حشمانة وخايفة ونادمة عكس فاتي لي كتهضر مع صحابها وكتسلم. جلسات معاهم فوطويات مضورين على طبلة وفوق منها مشروبات كحولية .
وقف عليهم نادل كيهضر مع نريمان
هزات فيه عينيها وهيا كترد شعرها اللور
جوبات فاتي فبلاصتها : جيب ليها شي عصير بارد ههه

شافت فيها نريمان ضحكات وهبطاات رسها كضور عينيها فالشباب لي تما جات عينها فعين شاب فالثلاثينات هازة كاس فيدو كيشرب وكارو بين صبعانو. ابتاسم فوجهها وهبطات راسها كتشتت النضر

شاف فاتي وقال : شكون هاد الزين لي معاك؟

فاتي : هادي صاحبتي نريمان

طلعات فيها واحد بنت وهبطات وقالت : اول مرة كتجي؟
فاتي : اييه عاد جات من اسبانيا وجات معايا

البنت : همم ايوا مشرفين ازين

ردت : شكرا احبيبة

طولو السهرة وهوما على الضحك وجمامع ومكاين غا روايح د الڭارو ودخاخن واضواء زرقاء كتمشي وتجي شي كيشطح وشي مقنت فضلمة كيفرغ شهوة على خاطرو وشي مجمع وناشط انسجمات نريمان معاهم وكتهضر وتجمع عاجبها الجو. ناضو لي حداها يشطحو وحتا فاتي

فاتي : جلال نوض اصاحبي نشطحو ههه يلاه انريمان

نريمان : لا ويلي مغاديش نوض

فاتي : وهانتي جالسة مع دراري..

خلاتها فاتي ومشات تشطح..
نريمان كتحس بقلبها كيضرب بالخلعة بالخصوص ملي كتشوف داك الشاب عينو معاها.
دارت رجل على رجل وكاس فيديها مقنتة فالفوطوي كتشوف ف فاتي لي كتشطح . حسات بشي حد جلس جنبها ضورات وجهها لقات نفس الشاب مد يديه ليه شدات كاس بيد شمال ومدات يديها

الشاب : انا مراد واخا نجلس معاك ياك ؟
نريمان : اه هانتا جالس

الشاب : ممكن نتعرفو؟

ردت : سميتي نريمان
رد : تعطيني نمرتك ازين ؟

ردت : علاش بغيتيها
رد : عجبتيني ومكرهتش تكون شي حاجة ( غمزها )

ردت : لا انا مكنتصااحبش سمحلي

زاد قرب حداها حتا لسقها مع الفوطوي وقال : انا عجبتيني يلاه نمشيو!! بشحال كتخلصي بعدا ؟

خرجات فيه عينيها وقالت : شناهواااا؟ واش حماقيتي

رد : علاش ازين بالعكس امم

قلبات وجهها كتسوط فجهة خرا حط يديها على يديها وهيا تنوض مفزوعة حتا قلبات داك الكاس من يديها
نريمان : متشدش فياا معندكش الحق تقيص فياا

ردت : وعلاش ازين؟

خلاتو جالس وهزات صاكها مشات لعند فاتي لي كتشطح شداتها جراتها كتعاود ليها

فاتي : ههه اويلي على حمقة ومالو عضك هه سيري جلسي سيري
نريمان : لا يلاه نمشيو بحالنا انا معجبنيش الجو هنا

بنرفزة : وسيري انريمان راه مزال الحال عاد جينا سيري جلسي لهيه
خلاتها واقفة ومشات تكمل على شطيح. رجعات نريمان جلسات على كرسي حاطة يديها على الرخامة ومرا كبيرة كتمسح حداها الكيسان وتحط على رخامة شافت فنريمان ببتسامة وقالت : شنو بغات الغزالة

نريمان : اا مم شي مونادا وصافي

ردت : هيا اللولة ازين هاكي مكتشربيش ؟
نريمان : هه لا لا

خوات ليها فالكاس وهيا جالسة كتشرب وضور عينيها فالناس وفاتي لي مكيناش فهاد العالم.
جبدات تليفون ديالها دخلات الفايس كيطلعو ليها اشعارات د بنات لي باغيين يتعلمو دخلات كتجاوب كل وحدة حتا كملاتهم خدات صورة راسها وهيا كضحك عودات خدات صورة خرا وهيا جامعة شفايفها شافت فالساعة لقاات 2:30 دليل رجعات تليفون لصاك وعينيها بداو يتلصقو بالنعاس.

رجعات لعند فاتي كتجر فيها وترغبها ترجع لدار.. وبزز باش خرجو وهيا كتنڭر عليها.. بغاو ياخدو طاكسي وهوا يوقف عليهم واحد بالمرسيديس

شاف ف نريمان وقال : فين نوصلكم ازين

نريمان : لا غير سير انشد طاكسي..
نطق الولد لي جنبو وقالت : هانيتون ازين نوصلوكم فين بغيتو طلعو
فاتي : زيدي نطلعلو يوصلونا

جراتها نريمان وقالت : لا خاي شكرا غير سير

جرات فاتي قطعو الشانطي وقالت : واش تسطيتي باش عرفناهم نطلعو معاهم زيدي نشطو طاكسي

فاتي : وراه تقة مكاينة لا ف مول طوموبيل ولا طاكسي كلهم بحال بحال

نريمان : اجي ها طاكسي جاي زيدي نطلعو..

طلعات نريمان هيا اللولة وفاتي حداها وصلو فاتي هيا اللولة حيت دارها كانت قريبة بقات نريمان مع مول الطاكسي خايفة البولة غتهبط فسروالها وهيا كتشوفو عينيه مقلوبين حتا هوا سكران وكيضور بيها فالزناقي لي خاويين كيصفرو.
طلبات منو يقربها حتا لدرب ديالهم وهوا غير كيحرك راسو مقلوب وكل مرة طل عليه نريمان خيفاه يدير بيها شي كسيدة وقفها فراس د الزنقة.. جبدات شالها من الصاك لبساتو وخرجات كتسلست غادية مع الزنقة مضارتش موراها حتا وصلات لدار حلات الباب بالزربة ودخلات كتفتف على الضو شعلاتو ضارت كتقلب ملقاتش اشرف عاد رتاح بالها. بدلات حوايجها وغسلات وجهها ومشات دخلات لبلاصتها نعسات طاحت دودة..


صباح الحال وعلى تنقيزات نعيمة وفمها لي كيداعب شعر نريمان وليزار لي مغطية بيه فيقااتها كضحك عينيها منفوخين وجسمها مدڭدڭ بالسهرة دالبارح.
جلسات كدوز يديها على ضهر معزتها عاد استوعبات الليلة د البارح كيف دازت..

حسات بندم شديد وخاطرها مزير عليها ،، ماشي بلاصتها هاديك ومكانش عندها الحق تحيد الزيف وتخرج بشعرها عريان وهيا لي من صغرها وهيا محافضة على راسها باللباس المستور والمحتشم وديما راس مغطي..
دوزات يديها على عينيها كتنهد وناضت من بلاصتها خرجات كتكسل لعند سمية لي كتقرقب فالكوزينة كانت حتا هيا عاد دخلات من الخدمة كتوجد ليهم الفطور وعاد تمشي تنعس. باست ليها نريمان راسها وهزات معاها فالفطور حطاتو طبلة مشات الحمام كبات عليها سطل دالماء العياء توضات ومشات لبيت لبسات عبايتها وصلاة الصبح وهزات يديها كتطلب من الله يسامحها على هاد الغلط لي كينهش فخاطرها..

خرجات لعند سمية لقاتها مجبدة فوق سداري عينيها معسلين بالنعاس جلسات قدامها كتخوي الحليب وقالت : نوضي اماما تفطري

سمية : غير فطري مفيا لي ياكل بغيت غا نعس عييت

ضورات نريمان عينيها وقالت : فين اشرف مكاينش؟

سمية : المسخوط مباتش فدار يعلم الله فين مشااا اودي غيطرطق ليا المرارا بالفقصة

نريمان : ويكون بايت مع صحابو اجي نعيمة هاك مطيشة هاا الخص

حطات ليها بانيو ديالها فيه ماكلتها كتاكل حداهم

سمية : انا غنعس فقاش غتمشي لصالون؟

نريمان : دابا غنخرج انمشي نشوف بلاكة د تعليم واش وجدات ونشوف شي لاخور فين وصل راه وقيلة ناس غيجيو اليوم

سمية : ايوا الله يعاونك انا غنعس

حركات نريمان راسها شافت سمية داها النعاس
بقات ساهية فيها كتشوف فيديها لي محروقة من قوة الطياب والقلي فالريسطو لي خدامة فيه شدات نريمان عينيها بالآسى مكرهتاااش تقول لسمية غير جلسي انا نخدم ونجيب ليك ولكن هيا براسها مزيرة ومحتاجة وعاد بادية
كملات فطورها ومشات لبيتها لبسات حوايجها كسوة طويلة مع صندالة ارضية وشال ملوي بطريقة عشوائية راميا اطراف ديال لور
هزات صاكها خشات فيه تليفونها هزات ليزار وخرجات غطات بيه سمية. يلاه هيا خارجة مع الباب وهيا تبعها نعيمة لاسقة فجنابها كتمعمع عليها باغا تخرج

نريمان : سيري دخلي يلاه سيري
دخلاتها شدات الباب ديالهم وحلات باب الزنقة خرجات غادية بخطوات مسرعة لقات جوج جرات واقفين لقات عليهم السلام وهوما متبعينها بعينيهم حتا غبرات

بدات فالعمل والجرا تشوف شنو وجد وشنو مزال ناقص. كتشوف مبقاش عندها الفلوس بزاف والشهر جاي باش غتخلصو والوراق د الماء والضوو جاوها وعاد خصها تزيد تسلف باش تكمل خلاص حارت وتلفات دازت مور البلاكة لقاتها وجدات ودات المعلم معاها حتا الصالون علقها ليها برا تحت السرجم د تعليم على شارع لي داز يشوفها خلصاتو ومشا بحالو جبدات لاكارت فيزيت من صاكها حتا هوما وجدو
حطاتهم فشبيكة صغيرة فالبيت د ليستيتيك بدلات حوايجها تما ومشات حلات البالكون وخرجات لصالون كتدوز الجفاف عاد مشات المرايا كتصاوب وجهها بالزربة فديك الأثناء دخلو جوج بنات كيضورو عينيهم خرجات عندهم نريمان ببتسامة وقالت : تفضلو دخلو
دخلو دوك بنات بقاو واقفين وقالت وحدة : ختي هنا كيعلمو الحلاقة

ردت ببتسامة : اه احبيبة هنا مرحبا

ردت : اه وشنو كتحتاجو وشحال تمن وو

سولاتها على كلشي وجوباتها نريمان بفرح
ردت : واخا اختي حنا جينا غا نسولو انا نمشي نقولها لماما

ردت : واخا ازين مرحبا فقاش مبغيتي

خرجو من عندها ودخلو ناس خرين شي باغي يتسجل وشي عاد كيسول فديك الاثناء دخلات فاتي حتا هيا راسها مقلوب
جلسات هيا ونريمان كيهضرو على ليلة د بارح

شافت فيها نريمان بحدة وقالت : شوف افاتي اناا والله حتا ندمت علاش خرجت زغت صراحة ومشيت هديك ماشي بلاصتي وانا غلطت مكانش عليا نمشي

فاتي : نتي معقدة مع كرك اش طرا كاع را

قطعاتها : اه معقدة وباغا نبقى معقدة وعفاك افاتي من دابا لفوق متعاوديش تجبدي ليا القصاير وخوا الخاوي انا حمااارة والله حتا حمارة دغيا كنطيح فالشبكة

خرجات فاتي عينيها وقالت : ومالي احبيبة ديتك تقحب ولا تهزي *** مالك على هاد الهضرة شنو درت ليك انا كااع

شدات نريمان عينيها بنفاذ الصبر وقالت : شوف هادشي داز ولكن منبغيش يتعاود انا سعفتك ومشيت وندمتت علاش مشيت وحطيت رجلي تما دابا صافي قلبي عليا متعاوديش تجبديلي هادشي رر..


مكملاتش هضرتها شافت كليان داخل شافت فاتي بنص عين وناضت ترحب بالكليان
فحين وقفات فاتي لوات عليها فولار ديالها هزات صاكها ودازت حداها بالزعفة

فاتي : بسلامة نريمان
خرجات مع الباب كتخلف هبطات فالدروج كتقرقب ونريمان متبعة ليها العين تنهدات ورجعت كتجاوب الكليانة ببتسامة بدات الخدمة وكل مرة دخل عندها وحدة تسولها على التعليم كتعطيها جميع المعلومات وتمشي بحالها

تعشات العشية وسمية حازمة راسها كتصبن فالطواليط بالفراكة تشلل وتعصر ودير فالشبكة
حتا كملات دوزات الماء فدار وباسيو سيقات وجمعات وطلعات تنشر

وهيا كتعلق الحوايج طلعات جارتها عندها لسطح. كيديو ويجيبو فالهضرة شوية وهيا تقول

الجارة : سمية معرفتك كنز اجارتي وصراحة الله يعمرها دار وعمرني شفت منك العيب وديما داخلة بالحس وخارجة بالحس ولكن مقدرتش نبقى ساكتة على هاد المنكر


خرجات سمية عينيها ومقبط دنشير فمها حيداتو شدات بيه تيشور وقالت : شمن منكر افتيحة؟ شنو شفتي عليا

ردت بنرفزة : راه من قبل العيد وانا جيران كيقولولي رجال كيدخلو عندك وكيدخلو بنات معاهم وكذبت هادشي وقلت جيران غا كيكدبو ومكااينش هادشي ولكن شفت بعييييييني يا جارتي بعيني وتصدمت وانا عندي العزبااات الكبيرة عندها تسعطاش ويدخلو يتكرفصو ليا انا على بنات اش نصور منهم اناا.

خرجات سمية عينيها بصدمة وقالت : جيني من لاخر افتيحة وقولي شنو

ردت : ولدك كيجيب معاه رجال وبنات لدار. ملي كتكوني نتي وبنتك خدامين بنهار كنسمعو غا تخصار الهضرة وكيديرو داكشي وغير ديك نهار شفت ولدك حل ليهم الباب هوما دخلو وشدو عليهم ولدك خرج وهبطت نتصنت كنسمعهم كيغوتو ويضحكو وكيديرو المسخ

سمية : بصدمة ) اويلي واش كتهضري بصح؟؟؟ افتيحة

فتيحة : اييه وراه كنجي نهضر معاك ومكنلقااكش وشحال مرة دقيت عليك وكتكوني واقيلة ناعسة قلت حتا طلعي لسطح ونهضروا. يوا ديري شي حل راه الجيران كلهم كيهضرو

فشلات سمية بهاد الأخبار لي طاحت عليها بحال السعيقة رمات الحوايج فوق الحبولة بالزربة وفتيحة كتعاود ليها حتا تنفخ ليها الراس. وهبطات كتجري فالدروج رمات الشبكة فالطواليط ودخلات لدار لبسات جلابتها ورمات على راسها الشال وخرجات يلاه غطلع فالطوموبيل لقات جوج جيران ووحدة كطل من شرجم دارها ولاخرا واقفة معاها حدا شرجم كيشوفو فسمية ويهضرو لقات عليهم السلام وطلعات فطوموبيلتها وهيا تشوف ديك الجارة لي واقفة جاية عندها وجارة لوخرا كطل وتشوف فيهم وقفات على سمية فباب طوموبيل وقالت : ايوا كيف عاملة لباس العيال لباس

سمية : لباس اختي لهلا يخطيك ونتي ومول دار وليدات

ردت : ايوا جمع كلشي وقول الحمد الله ( تنهدات ) ايوا وديك بنتك وقيلة ممحكوماش؟

خرجات عينيها بصدمة وقالت : شناهواااا؟
ردت بستفزاز : ديك البنت لي عندك ديك الكافورة حتا وذن الفجر عاد داخلة بشعرها مطلوق ولباسها مفضوح وصلها شي حد بطوموبيل حتا لباب دار ولدي شافها كان مع صحابو برا

سمية : وجهها صبعها لصدرها ) بنتي اناااااااا داخلة مع الفجر؟

ردت : ايوا كلشي شافها دراري دالحومة لي هنا والحومة لي مورانا وداخلة مغطية وجهها غا بنهار فقيهة وفليل قحبة

ردت عليها سمية مغزفة وهيا خارجة من طوموبيل : قحبة هيا لي معرفااتش تربيك وتجمعي فمك نتي تعايري ليا بنتي وانا كنسمع!!!!!

دارت المرأة يديها على جنابها وقالت : وسير حضي بنتك الخانزة ل..

مكملاتش هضرتها جمعات معاها سمية بتسرفيقة شبكوها باليدين ومقاتلة مكاين غا نتف فيا نتف فيك كانت سمية مفقوصة ومحسااش براسها اش كدير فقصة دالولد والفقصة د، البنت لي عاد خرجات ليها من الجنب فكوهم الجيران غا بزز ناضت سمية كتجمع شعرها لي تنتف هزات شالها من الارض كتحلف فالجارة والجارة لي شادينها جيران كتغوت على حر جهدها وتنعتهم ب اخبث الفاض
طلعات سمية فالطوموبيل وكسيرات بالجهد كانت غدخل فديك الجارة من شدة الفقصة وفالبلاصة رجعات مشرياان حتا تزيطووو روايض كلشي ضار يشوف حساب ليهم غا كسيدة مشات طايرة فالشارع موقفات حتا لباب عمارة خرجات من الطوموبيل وطلعات كتجري لقات الصالون عامر بالناس ونريمان يدها بوحدها من وجهها باين التعب والعياء.

دخلات سمية مع باب شافتها نريمان وقالت ببتسامة : ماما ديالي

حركات سمية راسها بمعنى تبعيني مشات فداك الكولوار صغير دخلات الكوزينة كتسناها.
حيدات نريمان ليڭات من يديها فيهم الصباغة ومشات كتسائل شنو كاين. دخلات مور سمية رقاتها كتشوف فالارض حاطة يديها على رخامة د الكوزينة. غا دخلات نريمان وهيا تمشي موراها سمية زدحات الباب على حر جهدها حتا تخلعات نريمان.
هزات يديها لسماء بقوة وجمعاتها معاها بتسرفيقة خرجات عينيها وقالت : فين كنتي بارح ؟؟؟ هاااا هضري لبارح معامن بايتة الخانزة !!

نريمان : بصدمة ) فين بايتة فالدار امام..

قطعاتها : شكون جابك لبارح لدار ( بالغوات ) لباااارح شكون دخلك لدار فنص الليل شافووك العزارا داخلة عرياانة وشعرك مطلوق ومعاك شي حد هضري وقولي شكون؟؟؟

سكتاا نريمان بصدمة شادة حنكها والدموع هابطين من عينيها تلوا ليها الللسان ماقات باش غتجاوبها

شافت فيها سمية ودموع محجرين فعينيها وقالت : هادي هيا بنتي ؟؟ هادي هيا بنتي الكبيرة لي فين ما مشيت نهضر عليها ؟ هادي هيا بنتي لي كنقول غتهز راسي قدام العديااان وقدام تريكت باك وغتولي شان وهمة وكلشي حال فمو فيها هااا؟ صافي غا مطلقة وطريق مسرحة لي جاا تعطيه يخور فيك

حركات راسها بالنفي : لاااا اماما لاا والله ما درت شي حاجة والله ماا..
قطعاتها بحدة : سكتييي سكتي اش غتقوليلي اااااش براكة من الكذوب ناس شافوك جايبك لدار ومعريا اش غتقوليلي اش وكلشي باين كلاوك جنااابك باغا طيري باغا تقحبني بحال دوك السلاڭط حتا تجيبي ليا شي كرش دالحرام من الزنقة كنقول بنتي غطلع وغتهز راسها قدام لي يسواا ولي ميسوا قدام العائلة والعديااان وانا بنتي كتزيد تكفس وترجع باللور وطيح براسها وبقيمتها وذلل راسها لكلاب هااااا

سكتات نريمان حانية راسها معندهاش جواب من غير البكا ودموع حاريين لي هابطين على وجهها..


بخوف : ماما والله مكنت مع شي حد ولا مشيت مع شي حد راه خرجت غير انا وصاحبتي و

قطعتها ودموع هابطين من عينيها : شمن صحبة هادي هااا شمن صحبة ابنت ليهود باغا طرطقي لياا مرارتي ولا شنو كتلقااايني انا خدامو بليل كديري لي بغيتي هااا؟ وفنهار ملي يصبح صباح ونتي فالصالون يعلم الله اش كديري مور ضهري وانا معيقاااش

بترجي : والله اماما مكندير شي حاجة غا سمع..
قطعاتها وهيا كتحل الباب : ديري ولا مديريش حياتك هادي

سمحات فيها وخرجات مع الباب

شدات نريمان عينيها بضيق مقدراش تحبس الدموع لي فعينيها جلسات فالارض كتشهق وتبكي حتا عيطو ليها الكليانات لي جالسين فالصالون تجي تكلم لناس لي جاو.. وقفات ومشات نيشان لبيت دليستيتك ردات موراها الباب على اعين الجميع ومشات وقفاات حدا المرايا مسحات الكحل لي ساح ليها وريسيل لي ترون ليها فعينيها. قدات حالتها وخرجات عندهم ببتسامة باهتة ..

كتخدم وكتهضر معاهم والعقل مرفووع حاسة بالندم الشديد مكرهة راسها تمنااات لو مخرجاااتش ومطاحش فهاد الغيسة ،،

خرجات من عمارة وطلعات فطوموبيلتها دوزات النمرة كتصوني على اشرف جوبها مخلاتتتش ليه فالتليفون بسبان والمعيووور وتهديد حتا خلاتو غا ساكت مزادش موراها الهضرة. رجعات لدار وهيا كتسوگ وتبكي قلبها مشوي. دخلات لدار جلسات فوق سداري ودوزات الخط كتصوني على اختها لي مونية اتصال اللول والتاني عاد جوبات. بعد السلام دخلات فالموضوع سمية نيشان وقالت : فين نسرين؟

مونية : راها خرجات مع صحباتها علاش؟

سمية : فين خرجات اينا صحاب هادو؟
مونية : ايوا قالت ليا غتخرج مع صحباتها ومشات انا معرفاش شكون هوما

سمية : همم واخا شوفي. كيف تجي غتقولي ليها تقطع البيي وتهبط حنا معندناا منديرو بشي قرايا ولا خرايا سمعتيني قوليلها قالت ليك امك صوني عليها ضروري وهاد السيمانا تجي

مونية : اويلي اختي علاش ياك لباس علاش البنت غتجي مسكينة وهيا عندها القرايا والامتحانات!!

بعصبية : الله ينعل جد بوها قرايا انا مبغيتهااااش تقرا قلت ليك ملي تجي امونية دوزيهالي صافي سالينا حنا من شي قرايا

رمات تليفون على اعصابها مبغاااتش تبرد ليها الحرقة تشوف ولادها تبعو طريق الانحراف وضيعو شبابهم وحياتهم ومستقبلهم وهوما يلاه باديين كل خوفها تشوفهم كيضيعو ب 3 بيهم.

طاح الضلام وكملات نريمان للكليان لي عندها بدلات حوايجها بعدما سلات وخرجت رجعت لدار فطاكسي.
لقات باب مشدود وضوء فصالة مشعول لنعيمة لي كضور. رمات صاكها وجلسات كتنهد عرفاتها مشات الخدمة..

ناضت الكوزينة توجد لعشاء لقات طاجين على بوطاجي مغطي مشات عراتو لقات طاجين دالكفتة والبيض شداتو ومشات تبدل حوايجها دخلات دوش من الصهد والعرق وتحيد التعب ديال النهار..
تعشات وعطات لمعزتها حتا هيا تاكل وبقات متكية فوق السداري حتا دخل اشرف كيضور عينيه
اشرف : ماما هنا؟
نريمان : لا فالخدمة
جلس فوق سداري ناشر يديه ومفرق رجليه وقال : بففف كون غا بقيتي ف اسبانيا علاش راجعين فخبارك انا غنرجع فحالي
نريمان : علاش غترجع هنا خدم ودير مستقبلك

اشرف : اهاد البلاد مفيها مستقبل ..
سكت ورجع شاف فيها راسم ابتسامة على وجههو وقال : عرفتي شنو
نريمان : شنو؟
اشرف : نقولك شي هضرة تبقى بيناتنا زعمة
نريمان : بتساؤل ) امم قول
اشرف : راه كنعرف واحد البنت وبيني وبين باغي نتزوج بيها

تقادات فالجلسة وقالت : وشكون هادي؟ واش عاد عرفتيها هنا

اشرف : الا هيا من اسبانيا شي 5 شهور وحنا مصاحبين ولبارح قلت ليها نتزوجو وصراحة واااااعرة ياختي هانتي اجي تشوفيها.

حل ليها تليفون كيوريها تصاورها وهيا كدوز وتكبر تصويرة جسمها جميل واخا عامر شعرها وملامحها شقرااء وبتسامتها البيضاء شافت فيه وقالت : وعندك باش تزوج ولا غا كتهضر نتا مخدام ما ردام وباغي تزوج كي درتي ليها

اشرف : ودابا تشوفي غا صبري. نوضي حطيلنا ناكلو الله يهديك

نريمان : نوض حط راسك مفياا منتحرك

هزات تليفونها ودخلات لبيتها شدات عليها حيدات سوتيان وخلات غا بيجاما قصيرة على اللحم تخشات فبلاصتها كتلعب ف تليفونها وماهيا الا دقائق قليلة محساتش براسها حتا داها النعاس..
بايتة ليل كولو تنعس وتتفيق بالها ممهنيهاش والندم غالب عليها ومكرهاتش تمشي تراضي امها عاد ترجع. ملمتهاش على الضربة ولا الهضرة لي قالت حيت تستاهل. شافت امها كيف محروقة عليها وحسات بالذنب لي دارت..

صباح الحال 11 د صباح عاد حلات عينيها هزات تليفون تشوف شحال الساعة وهيا تنوض مخلوعة رمات الفراش وخرجات ملقااتش الحس د سمية مشات لبيتها لقاتو مسدود عرفاتها كاينة لداخل. بغات تدق عليها ولكن خلاتها ناعسة فخاطرها. فحين سمية لداخل حاطة راسها على المخدة كتبكي وعينيها منفوخين بالسهير والخدمة دالليل والصهد لي كيكون عندهم فالكوزينة فريسطو وتعب ليل كامل

غسلات وجهها ومشات توجد الفطور حطاتو على الطبلة ومشات دقات على امها دقات وعودات بدون مجيب. عيات تعيط ليها والو
جلسات على سداري كتشوف فداك الفطور وف اشرف لي حال فمو قبالتها ف سابع نومة رجعات ناضت لبيتها لبسات حوايجها خارجة وشادة تليفون فيديها كتجاوب على المسجات د الواتساب من عند كليان وبنات لي كيسولو على تعليم. دخلات الانستغرام تجاوب لي عندها تما وهيا تفاجئ بالشيئ لي مكاانتش متوقعاه. مسج من عند جهاد


وقفات مخرجة عينيها يديها كيترعدو احساس فشكل حسات بيه هزات يلاه بغات تدخل المسج وهيا دوز من حداها نفس الجارة لي تخصمات مع سمية هازة التقدية فيديها وداخلة الحومة طلعت وهبطت فنريمان لي خاشية وجهها فتليفون وقالت بصوت مسموع : صباحاتو الله حومة تكفست بقماقم الله يخليها سلعة

هزات نريمان عينيها فيها لقاتها كتشوف فيها باستفزاز وقالت : ياك لباس اشريفة شكاين

ردت بلامبلاة : ايوا الله يعفو عليك والله يحفض ولادنا ولاد المسلمين

هزات نريمان حجبها طفات تليفونها من جنب غادية جيهتها وهيا كتخشيه فصالك هزات يديها بتساؤل على ديك المرا وقالت : شكاين ياك لباس شهاد الهضور على صباح!! جيني من لاخر

ردت : اسييير ستر راسك باقي عندك الوجه لي تهضر بيه وتخرج عينك فياا تريكة ناقصة ممربيااش

قبل متنطق نريمان خرجات سمية لي كانت كطل من شرجم بعدما خرجات نريمان وسمعات الهضرة دالجارة خرجات بشعرها عريان جمعاه بجبادة وجهها شاحب وعينيها حومر بالبكا وقالت بحدة : غتفرق عليك ولادي ولا قسما بالرب المعبود حتا نقتلك وندخل عليك الحبس سمعتي فوت عليك بنتي وبزاف عليك باش توصل حتا الوسخ ديالها

سمعو بنات ديك الجارة الغوات خرجو كيجريو وجيران كلشي كيطل وشي خارج كيتفرج
جرت نريمان سمية وقالت : دخل اماما بحالك خلي الكلاب ينبحو زيدي دخلي بحالك

ردت كضحك : ههههه والكلاب هوما نتوما المسخيين ملي دخلتو لهاد الحومة كفستوها يخليها سلعة جيران د اخر الزمان
مكملاتش هضرتها حتا جراتها سمية من شعرها وقلبوها مقاتلة وجيران كيفكو ونريمان كتجر سمية لي مغزفة حتا من اشرف خرج مضهشر بالنعاس الروينة مقلوبة وسمية كتحلف فالجارة متخليها فيها..

دخلو ناس سمية لدارها كتنهج كيعطيوها الماء تشرب وهوما مجموعين عليها شافت ف نريمان وقالت : سير لخدمتك يلاه سير
نريمان : ما..

قطعاتها : قلتلك سير لخدمتك وتقرب ليك شي وحدة ولا تهضرك شي بنت الكلب نوري اصل مها الهضرة شكتسوا
خرجات نريمان مع الباب كانو جيران كلهم فالباب كيوشوشو ويهضرو.. يلاه شدات نريمان طاكسي وهيا تخرج سمية الحومة كتغوت : ايوا لي مسميااا راسها مرا وقادة تخرج عندي نعاود نسمع شي خانزة تهضر ليااا فشي حد فولادي نمشي عليها الحبس كتسمعوووو راكم مزال معرفتوووني شكون انااا يا ليهووود لي طيحو الباطل على بنتي وتقولو جايا فنص ليل وانا بنتي بايتة حدايااا. وعندييي شهووود والله حتا نربيكم على هاد الهضرة ايلا مجبتش ليكم البوليس عرفو مولدو فيااا غا الخلااا. ايوا هانا هضرت تعاود شي بنت قحبة تعرض لبنتي ولا نسمع شي هضرة قسمت فمي بالله حتا ندمك اصل مكم كاملين..

عرعرات عليهم ومخلات غا لي نسات خلااتهم غا كيشوفو فيها وجارتها كتجرها ودخلها وهيا كدفعها وتزيد تغوت على حرر جهدها حتا دخلها اشرف وجارة وبنتها
شدات الباب فوجههم ودخلات كتسوط دمهاا حامي جلس حداها اشرف وهيا تخرج فيه عينيها شداتو من تيشورط ديالو بقوة وقالت : اجي نتااا ابن ليهودي لي مدخل لي لداري السلاگط وتشوهني واش انا رجعت عندي دار القحاب هنا يا شمكار يا.....

مسكتاتش بردات غدايدها فيه وفقصتها سكت مردش عليها عيا يرغب فيها ويبوس فيديها وراسها فالأخير انهارت بالبكا ودخلات لبيتها سدات عليها معندها زهر فالولاد لي ولدات وتعذبات عليهم...

طلعات فالطاكسي متكية بيديها على باب د طوموبيل ساهية والدموع فعينيها مبغاتش تبرد ليها ندمااات اشد الندم على ديك الليلة لي سببات ليها هاد المشاكيل..
تفكرات تليفون ومسج د جهاد وجبدات تليفون بالزربة لقات طارق كيصوني عليها. قطعات عليه ودخلات المسج د جهاد كتقراه وعينيها مبتاسمين كيلمعو

JIHAD 💬: bonjour Nero comment ça va ? J'espère Tekouni Mezen , Á Tehallay Fi rassek OK ?🖤

بقات على نفس الحالة مهبطة راسها كتقرا مسج وتعاودو وتعااااودو حتا هبطات دمعة من عينيها على تليفون مسحاتها بالزربة وشافت فمول طاكسي وقالت : شي بلاصة هنا اشريف ..


دخلات كتعاود ديك المسج وعينيها كيلمعو طلعات لطبقة ثانية فين كاينة قاعة دلأعراس. جلسات فالدرجة وطلعات الكلاڤي كتكتب،
يديها كيترعدو اكيد قرا مسجات لي صيفطااات ليه اكيد غيقول هادي تبعاني وكتفكر فيا ...

بزاف د الهضور جاوها فبالها مبغاتش يفكر هاكا وبغات تبين ليه بلي نساتو ورجع شخص عادي بالنسبة ليها..

Narimane 💬 : Salam Elhamdoulillah Onta? Choukrane 😊

اكتفت بهاد المسج واخا مقنعهاش ولكن مبغاتش تبين الضعف ديالها واللهفة من جيهتو.
طلعات بحالها لصالون وهيا كتفتح الباب هبطات مرا غليضة شعرها كحل غاامق حجبانها رقاق راسماهم بالطاطواج وفمها زرڭ ودفرانها طوال مقشرة ليهم صباغة كحلة شافت فنريمان ببتسامة وسلمات عليها وقالت : وفين ازين لباس عليك عاد كنت جاية عندك ديري ليا لاصير

ردت بخوف : لباس اختي ربيعة وانت وليداتك ومول دار اه اجي مرحبا بيك

ردت : ايوا نعديو ازين انا غنخرج نقضي شي غراض وديك ساعة ندوز لعندك

ردت : واخا مرحبا
هبطات المرا كتهز بديك المؤخرة ونريمان متبعة ليها العين كتشم ريحة البخور خانزة هابطة من دار دربيعة الشوافة تنهدات وهيا داخلة كضحك

نريمان : ههه زهري غا فالشوافات فين ما مشيت نلقااهم
يلاه دخلات تبدل حوايجها وهيا تسمع صونيت فالباب مشات حلات لباب ودخلو الكليان وهيا كترحب بيهم

نريمان : واخا جلسو انا نبدل غا حوايجي ونجي.

دخلات لبيت ليستيتيك بدلات حوايجها لبسات كسوة حد الركبة بنص كم فاللون اصفر والابيض. قصمات شعرها فالنص دارت قرينات هابطين من صدرها مفخفخين مكياج خفيف. رشات ريحتها بالزربة وخرجات عندهم ببتسامة جلسات دايرة رجل على رجل. وهوما كيطلعو ويهبطو فيها باعجاب شافت اش خاصهم وناضت كتخدم ليهم وهيا طالقة موسيقى من تليفونها

باغنية اليسا..
دخلو بنات كيسولو على التعليم وهيا كتعطيهم معلومات والوقت لي غتبدا فيه دوزات نهار يدها بوحدها صالون عامر ومكاين معين همها كولو هوا فقاش تسالي ليهم وترتاح وتاكل،،
من عشاء د بارح ما داقتو..
فكرات تقلب على شي بنت لي تعاونها هادا هوا الحل باش ترخف عليها القضية

وصلات 8 دليل عاد كملات لأخر كليانة تخلصات منها وشدات بابها باش تبدل حوايجها وهيا تسمع الدقان ناضت حلات لقات ربيعة واقفة وعروقات كيقطرو على جبهتها
حلات ليها نريمان باب وهيا محملاش تشوفها كتخاااف منها بزاف الحس ديال شوافة وسحارات كتموت منهم خايفة تلوح ليها شي حاجة فالصالون ولا دير ليها شي موصيبة الخوف لي دخلها فديك ساعة خلاها كترعد حداها. ديما كتهرب منها فاش تكون خارجة وتبان ليها وشحال من مرة كدق عليها وكتسمع هضرتها من برا ومتبغيش تحل ليها.

سرطات ريقها بخوف وربيعة داخلة كتبان حداها نريمان بحال شي بنت 10 سنين جلسات فوق الفوطويات وقالت : جيبي ليا عفاك نشرب الله يعطيك الستر

حركات راسها بالايجاب ومشات الكوزينة بالزربة ورجعات وعينيها كيضورو مع صالون عنداك تكون رمات شي حاجة تما جلسات حداها كتشوف فيها وقالت : لقيتيني كنت غنمشي ماما غتمشي لخدمة وقالتلي نجي ضروري

ربيعة : وقيلة غنعطلك ازين سيري حتا لغدا ونجي عندك

شافت راسها مغتفااكش منها وقالت : ماشي مشكيل نصاوب ليك دابا نحاول نزرب وصافي اجي معايا

دخلات لبيت د ليستيتيك وربيعة كتحيد جلابتها موراها وقالت : وانا كنت جاية نجمع معاك ههه قلت كملتي الكليان نجي نهضرو ونجمعو شوية فراحتنا ونتعارفو مزيان

ردت وعينيها وهيا مع المقص كتقطع وريقات د لاصير : مكرهتش ياختي ولكن عيطلتلي زرباتني مغكعرفتها شنو بغات

شافت ربيعة تكات على بياص وفرقات رجليها وشحمتها هابطة من جناب البياص،
كلها هباري قربات عندها نريمان ويديها كيترعدو. جسمها موسخ وريحة العرق منها كتقلب فخاضها زورق بقوة مكينة د الحسانة بيطانها كوحل مشعريين
محملااتش نريمان المنضر كتشوف انسان معاطيش اهتمام لراسو وممنقيش حالتو واخا شبعانة وغارقة فلوس من عند كليان لي كيجيو تشوف ليهم وتكتب ليهم الخ.. مباين عليها حتا ريال.
جابت لنريمان الردان بركات على راسها وبدات كتحيد ليها وربيعة كتسول وتعاود باغا تجبد الضوسي د نريمان..

نريمان : انا كبرت فالحسيمة مع دارنا ومن بعد مشينا اسبانيا ورجعت لتطوان ودابا خدامة وصافي

ربيعة : ايوا دابا ناقصك غا راجل ههه تزوجي عرفتي عندي لوسي جدارمي حتا هوا على مزيناتو وداك نهار فاش هبطت عيدت مع دار ناسي ف سلا قالي ضبريلي شي مرا ههه منلقااش حسن منك صافي لقيت ليه العروسة

ردت بغيض : لا دابا مكنفكرش فالزواج صراحة باغا غا نكبر مشروع ديالي ونوصل لداك شي لي باغا اما راجل بلاش منو

ردت : ولواه هههه لواه زواج زين تجربي ويعجبك الحال هههه لهلا يخطي راجل من حياة المرا

نريمان بلامبلاة : اه بصح عند الحق

ردت : ايوا شنو قلتي تعطيني نمرتك نعطيها ليها

نريمان : لا لا مبغيتش عفاك الله يهديك معندي مندير بشي زواج

ردت : ايوا ماشي مشكيل هانتي غنعطيه نمرتك وتصاحبو وخرجو دوزو الوقت وحتا وكان تبغي تزوجي وتزوجو

نريمان : هانا كملت ليك بصحتك

ناضت ربيعة جلسات ونريمان ضورات وجهها كتحيد ليڭات من يديها
وقفات ربيعة كتلبس سليب ديالها وقالت : زين فين طواليط من قبيلة وانا مزيرة ؟


وراتها نريمان طواليط وعقلها غيخرج من بلاصتو جاها وسواس كتسنى غا ايمتا تخرج بحالها،، شافتها دخلات الحمام وشدات عليها وهيا تمشي بالزربة بدلات حوايجها وشدات باب دليستيتيك بساروت هزات فلوسها خشاتهمفالصاك وجلسات فوق فوطوي كتسناها تخرج ،، شافتها خرجات بصندالتها قاعها فازڭ رونات ليها الصالون لبسات ربيعة عبايتها وهيا كتعرض على نريمان

ربيعة : ايوا اجي ازين تشربي معايا كاس د اتاي مرحبا بيك راني غا فوق منك فقاش مبغيتي تجي مرحبا

نريمان : ربي يخليك ان شااء الله
ربيعة : ايوا غدا نتشاوفو ونهبط ليك الفلوس صافي؟ دابا والله ما عندي
حلات نريمان فمها بصدمة كتشوف فيها وناضت باغا تاكل جنابها بالفقصة : واخا ماشي مشكيل سمحيلي عفاك خصني نسد دابا راه فات الحال

ربيعة : واخا ازين وسمحيلي عطلتك انا قلت ليك خلي حتا لغدا غا نتي مبغيتيش

نريمان بعصبية : ماشي مشكيل

حلات الباب خرجات ربيعة فاللول وقفت برا كتهضر ونريمان كتشد باب

ربيعة : ايوا ازين تصبحي على خير اري ليا بعدا نمرة د تليفونك..
عطاتها نريمان نمرة غالطة وهبطات بحالها فالدروج كتسوط معصبة وجهها حمرر..
شدات طاكسي وجبدات التليفون لقاتو مديشارجي... وصلات لدار دارتو فالشارج هوا الأول ونعيمة كضور ليها بين رجليها مكاين حد الدار خاوية جلسات ترد نفس كتلعب مع معزتها وعينيها حاضيين تليفون ايمتا يشعل باش دخل تشوف اش صيفط ليها..
ناضت تاخد دوش منها تحيد العياء وتخفاف ومنها تلقى تليفون تشارجى.
دوشات ليها ولمعزتها وتكات على سداري كتشعل تليفون..
دخلات بالزربة تشوفو اش صيفط
JIHAD 💬: Merci 😉

شافت مسج ديالو بغات تكتب ليه ولكن ملقات متقول واكتبت ب ايموجي كيضحك..


دخلات كتشوف اعلان ديالها فين وصل وناس مزالين كيسولو على فين تعليم ونمرة وهيا كتجاوبهم وتقولهم نهار لي غتبدا فيه..
دارت اعلان اخر كتقلب على شي بنت عندها خبرة ومعلمة تبغي تخدم مكملاتش 5 دقايق شافتهم داخلين عندها لخاص كيسولوها باغيين يخدمو دارت مع جوج بنات يجيو عندها عطاتهم العنوان ناضت توجد ما تاكل لقات دجاج بطاطة وزيتون طايب..
وقفات ساهية كتشوف التضحية ديال امها عليهم ميمكنش تمشي لخدمة وتخليهم بلا عشا هزات شوية سخناتو حطات لراسها تاكل وحطات لنعيمة بانيو صغير فيه مكلتها وهيا هازة تليفون كتاكل وتشوف الجديد ديال ليميكاب ارتيست العالميين فين واصلين وشحال دالمتابعين عندهم والشهرة والنيڤو لي واصلين ليه ..
حتا هيا هداك حلم من احلامها تكون حتا هيا مشهورة وكيعرفوها ناس وعندها بروجي ديالها كبير . وكلشي كيشكر فيها سهات حتا فيقها من مسج من عند جهاد ودخلات ليه بالزربة

JIHAD 💬: Sheno Tadiry?

لمعو عينيها وهيا عاضة على شفاها السفلية بفرح وردت عليه بهدوء

Nariman 💬: ghire galssa onta?

رد فالحين

JIHAD 💬: Hemm Aussi Fen Netea Daba, bgheet Ngoul WeSh f Espania!?

شافت فالمسج ديالو مفهماتش علاش كيسولها ،،
ولكن فنفس الوقت فرحات وعجبها الحال وردت بالقياس

Nariman 💬: La jit Ana f tetouane

شافتو مردش عليها ومدخلش يشوف مسج ديالها مسحات على وجهها بتعب كتحس براسها مشوش مفهماتش هاد احساس لي كتحس بيه.. سهات مع بالها كتخمم ف اخر نهار شافتو فحياتها هوا نهار لي كانت فالسبيطار والهضرة لي خلا ليها كتنهش فالقلب ديالها.. شافتو كيفاش تخلا عليها وخلاها هكاك وزاد بلاما يتلفت الوراء.. وبعدما كانت كتعالج وبدات كترتاح شوية وكتقول غنولي بخير وغنرجع لحياتي حسن ملي كنت زادت صدمتها سمية بكلمة راه طلقك ومبغاش يكمل معاك
تما نريمان حست براسها معندها اهمية عندو.
حيت كن كان بصح باغييها مغاديش يخليها ولا يسمح فيها وهيا ف اكفس الضروف بعد تفكير طويل حاطة تليفون على صدرها وعينيها فالسقف ساهية هزات تليفون وهيا تلقاه مصيفط ليها

JIHAD 💬 : Okey Nariman , 😘

كا العادة قررات انها متردش عليه وخلات ليه vu.. واخا قلبها من لداخل كيتقطع عليه ومكرهاااتش تسولو وتعرف احوالو وتعرف تدقيق د حياتو ولكن بركات على راسها وطفات التليفون من جنب حطاتو حداها مكرهاتتش تنسااه وتشوف حياتها مع شي شخص اخر لي يفهمها ويبغيها وميخليهاش ،، رجعات لمسجات د لؤي فالفيس بوك لي مكانتش كتجاوبو عليهم جوباتو وعطاتو نمرة دالواتساب
بغات تنسي بيه وعلاش لا تبدا معاه علاقة جديدة وحب جديد...

كيفما دارت مع طارق لي مقدرش ينسيها فجهاد واصلا معجبهاش واخا كانت كتفكر تكون على علاقة معاه ولكن حتا حاجة معجباتها فيه..


صباح جديد صابحة نريمان لابسة حوايجة وجالسة حدا سمية كتبوس ليها فيديها وترغبها باش تسمح ليها فحين سمية دايرة يديها على جبهتها وعينيها حومر عقلها مشا بعيد والوسواس مرونها شنو بنتها غتكون كدير مور ضهرها وملي كتكون غايبة.
وشنو قضية داخلة بالليل ومديراش زيف وشي حد موصلها مبغاتش تسرط ليها ومبغاتش الهضرة د نريمان دخل ليها فراسها وتيقها .

نريمان : وماما قسما بالله يما كاينة شي حاجة واش انا غندير شي حاجة بحال هاكا. انا واحد صحبتي قالت ليا نخرجو نسهروا وزيغة عملتها بياا ومشيت معاها وندمت قسما بالله الا ندمتتت اماما..
متشكيش فياا انا ماشي ديال داك الشي والله ممشيت مع شي حد ولا درت شي حاجة

ردت عليها بعصبية : وهداااك لي وصلك هاا شكون هداك !!

تنهدات وقالت : هداك غا طاكسي وصلني معرفتش علاش كذبو ويزندو العافية بنادم باغي غا يخرج فيا الهضرة ويشوهني

سمية : بسيف يشوهووك نتي درتيها راسك نتي باغا ضحكي فيك لي يسوا ولي ميسواش

نريمان : دابا من هادشي كامل انا غلطت وندمت وانا ما درت والو تقتي بيا هوا هداك بغيتي حتا نتي تيقي هاد الهضرة د الكذوب نتي تعرفي اماما

وقفات بعينين حومر هزات صاكها وخرجات زدحات الباب حتا فزعات سمية لي كتمسح دموعها حتا هيا عقلها ترون مبقات عارفة شنو دير..

دازت نريمان تشوف اشغال فين وصلات لقاتهم وجدو ليهم مرايات خلصاتهم ودازت لكراسا حتا هوما خلصاتهم كرات موطور وطلبات منو يتبع الطاكسي لي غتمشي فيه.
وداكشي لي كان وصلهم ليها حتا لباب وطلعهم ليها حتا لفوق جابت المعلم لي يفيكسي ليها المرايات فالحيط متصافين . وجدو ليها اخيرا بيت ديال التعليم متول والالوان متناصقة..
رجعات خرجات مشات تشوف البطاقات ديال تعليم لقاتهم وجدو خداتهم رجعات لقات الكليان وبنات واقفين فباب صالون ..
دخلاتهم رحبات بيهم بنات لي بغاو يتعلمو سجلاتهم خدات من عندهم الفلوس وعطاتهم بطاقة ديالهم والموعد بيوم الاثنين لي باقي ليه 3 ايام...

بعد يوم شاق كيف ديما خرجات من صالون مع وحدة من كليانات تفارقو فالباب وشدات طاكسي مشات لدار ومع الدخلة كتسمع الهضرة لداخل وسبابط محطوطين فالباب دخلات مستغربة وهيا تجي عينيها فعينين طارق لي لابس سروال كحل وقميجة بيضاء ومعاه مرا كبيرة لابسة جلابة باهتة عاقدة زيف فعنقها وجوج بنات كبار معاها وقوالب د السكر محطوطين حدا الطبلة ..

وسمية معاهم هازة حجبانها مبدلة سيفتها.
دخلات نريمان مفاهمة والو شافت ف امها ب تساؤل لقات السلام ودازت سلمات عليهم وجلست حدا سمية

شافت فيها المرأة ببتسامة وقالت : هادي هيا البنيتة ياك ؟

طارق : بهمس ) اه الوليدة

ردت بالجبلية مغلوقة : ايوا ابنتي حنا هضرنا مع الوليدة ديالك وقلنا ليها اش كاين . جينا نخطبوك لولدي طارق ايوا لهلا يحشمنا

هزات نريمان عينيها ف طارق وشافت فامها وحنات راسها الارض فحيرة ..

طارق : احمم
انا قلت انريمان ليك ناوي معاك المعقول وجبت الوليدة وخوتي الا قبلتي من هاد السيمانا نديرو الخطبة

ردت وهيا تالفة : سمحلي اطارق ولكن .... انا .. انا قلت ليك مبغاش نتزوج دابا نتا عارف انا عندي الخدمة وباغا ندير..


قطعاتها امو : وا هوا ولدي باغي المرا متكونش خدامة راه بخدمتو ودويرة ديالو معندك لاش تخدم هوا مباغيش المراأة خدامة

هزات سمية حاجبها وقالت قبل متهضر نريمان : بنت فهاد الزمان اشريفة خاصها دير المستقبل اما راجل يمشي ويجي وزيدون انا بنتي كيف قلت ليك قبيلة باغا دير بخوجي ديالها وتكون راسها اما زواج راها مكتفكرش فيه راني قلتها ليك ملي دخلتي وها هيا بينك وبينها الا بغات تزوج انا منزيدها غا الخير

ردت المرأة وشوكتها طالعة كتحاول ترطب : ايوا ابنتي شنو قلتي ردي علينا ولي كاين راني قلتو ليك

شافت نريمان ف طارق لي عينيه معاها وقالت ليه : طارق الله يسهل عليك انا مبغاش نتزوج وخدمتي هيا عمرني نسمح فيها وانا مغاديش نقدر نتزوج ونبقى شادة الدار. ايوا الله يجيبلك شي بنت ناس

شافت فيها المرأة وهيا كتزفر وقالت : ايوا بنت ميصلاح ليها غا دارها وراجلها ودير ولادها ، نوض اولدي نمشيو نوض

ناضو وقفو هزو قوالب د سكر لي جابو..
ونريمان كتشوف فالارض مهزاتش عينيها فيهم وقفات سمية معاهم حتا شدات الباب ورجعات لصالة لعند نريمان لي غير ساكتة

سمية : عبرتي عليهم ولاهيلا قالتلك بنت تصلاح ليها غا دارها وراجلها يعطيهم القطيعة لي تزوجووو طفروه باز

هزات نريمان عينيها وقالت : مبغااش نتزوج انا كااع مبغيتو لا هوا ولا غيرو

صغرات سمية عينيها وقالت : شنو دابا مزال مقلقة مني

قلبات نريمان عينيها مجوباتهاش

وهيا تنوض سمية من بلاصتها مشات جلسات حداها عنقاتها وكتحزر فيها وتطلب منها مسامحة بدلاتها نريمان حتا هيا العناق ورجعو جبدو الموضوع ونريمان كتشرح ليها لي كاين بالتدقيق. حتا ندمات سمية علاش تشك فيها..


غادية جايا فالصالون حاطة تليفون على وذنها وكتسمع لنسرين لي كتبكي فتليفون

نسرين : علاش علااااش تقولي نجي فين غنجي فين! شنو غنجي ندير تما انريمان شنوو كتغوت عليا وتعرعر انا شنو درت ليها شنو شافت عليا باش تقولي هبطي المغرب مغاديش تبقاي تمااا

ردت عليها كتحاول تهذنها : صافي انا غنهضر معاها راها انسرين غير خايفة عليك وعلينا وصافي المهم انا غنهضر معاها غير بردي دابا خرجي يضرب فيك الهواء ونساي

نسرين : اش غنسى اش ؟؟ (بغضب ) واش غا تعصب من شي حد تجي تبرد فيااا غدايد تمشي تبعد مني تخليني نقرا فخاطري متعاودش تسول علياا انا مغانجيش لهاد المغرب كاع وغنشوف فين نهز راسي

ردت بغضب : واش تسطيتي ولا مالك متحمقينيش حتا نتي انسرين فين غتمشي جلسي يديها فقرايتك . ماما راها غير خايفة عليك وانا غنهضر معاها

قطعاتها : نريمان راكي مسمعتيهاش كيف كتهضر معايا وتغوت وتعاير علاش شنو شافت عليااا شنو علاش دير ليا هكاك

ردت بهدوء : دابا انا كنهضر معاك ونتي كطلع فسماء مالك شكاين دابا ! ملي باغا ديري لي فراسك علاش معيطة ليا انا كاع علاش ماجا تشكي عليا هاا علاش..

قطعات عليها ورمات تليفون فوق الفوطوي راسها زاند ومعصبة غا بوحدها .. صبح المورال هابط والغيم طايح عليها مالها وشنو معصبها هيا براسها معرفاتش كتحس براسها محتاجة لشي حاجة ومعرفاااش شنو هيا..

خرجات من دار بلا فطور وصلاتها سمية لصالون ومشات لخدمتها طالع ليها الزعف حاسة براسها باغا غا تبكي وتجلس بوحدها وتفش قلبها ولكن زاد راسها زند بمكالمة د نسرين...

جلسات حاطة يديها على راسها الجهد دالخدمة معندهاش وڭانة باش ضحك وتستقبل الكليان حتا هيا مزفتة وفين الوقيتة دخلو جوج بنات هزات نريمان عينيها فيهم رحبات بيهم دخلو جلسو قبالتها دايرين رجل على رجل باين عليهم الخير غير من لباس لي لابسين غير لي مارك وبوليود سمايل فالفم وشعر مسبسب ولاطاي مقادة هضرات وحدة من دوك بنات بصوت رقيق وابتسامة شادة فخصلة من شعرها كتشرح لنريمان الكولور لي بغات تبدل بيه لون دشعرها ومعاها صحبتها باغا تقطع الشعر..

شافت فنريمان ببتسامة وقالت : وصراحة شفت بوسط ديالك فالفيس وقلت نجرب نجي عندك. كنت ديجا مشيت لعند وحدة فسونطر ڤيل عرررفتي ضيعات ليا شعري وكنت غادية لفرانسا عرفتي شبعت بكا عليه ومن تما وانا خايفة نصبغ شعري ولا نمشي عند شي وحدة

ردت بطمئنان : شوفي انا مغاديش نشكر ليك راسي ولكن مدام تقتي فيا وجيتي عندي مغاديش نخيب ظن ديالك. انا كنخدم لكليان بحالا كنخدم لنفسي والله

ردت : والله منبدلك ياختي امصااب
نريمان : اجي معايا انا نخلط صباغة اجي..

ناضت معاها البنت جلسات على كرسي كيهضروا ويتعارفو بيناتهم ونريمان قررات انها تجاوب اجوبة عادية ومدخلش فتفاصيل،،
يلاه بدات تخدم ليها وهيا دخل بنت كتسول

نريمان : زيد اختي مرحبا

ردت : واش نتي لي هضرتي معايا فالفيس قلتي ليا باغا شي وحدة تخدم معاك

نريمان : اه شكون نتي هضرت نع جوج /؟

ردت : انا دنيا لي قلتلك ساكنة قريبة من صالون

نريمان : اه مرحبا اجي جلسي..

كملات لكليانة وهيا كتسول البنت اش كتعرف دير.. فالفيس بوك قالت ليها كنعرف ومعلمة ولكن ملي جات قالت العكس انها مكتعرف دير والو من غير تقاد الحجبان. وبغات نريمان تعلمها

تعصبات من كذوب دهاد البنت ومن تصرفاتها وهضرتها بالنفخة

نريمان : وشغادي نقولك انا بغيت بنت معلمة معنديش الوقت لي نعلم فيه وعاد نبدا معاك من زيرو فهمتي

ردت : وعلميني وانا نبقى معاك انا خفت نقولك فاللول مكنعرفش ومتبغيش وانا محتاجة الخدمة..

سكتات للحضة وقالت : واصافي واخا تبداي معايا من دابا؟

ردت : اه واخا انعيط لماما نقولها ليها وهانا معاك..

حركات راسها خلاتها كتهضر مع امها حتا كملات وجلسات حداهم

سمعات نريمان تليفون كيصوني دايرة ليڭات فيديها ومعندهاش كيفاش تشوف وتجاوب شافت فديك البنت وقالت : ختي عفاك مدي ليا التليفون راه فبيت دليستيتيك مور الباب

دخلات لبيت ونريمان عينيها مع الكاميرة عنداك تهز ليها شي حاجة،،
رجعات بنت وقالت : ختي ابيل فيديو

نريمان : ارا نشوف..

طلعات ليها نمرة د لؤي كيصوني بيها ابيل فيديو.
مقدراتش تقطع عليه ولا متجاوبوش وطلبات من البنت تحل ليها الخط وتوقف ليها تليفون فوق بيرو..

عطاتهم بالضهر وجوبات وهوا كيهضر معاها بالاسبانية ولبنانية دخلو بنات خرين وكذالك بنت خرا لي هضرات معاها تخدم معاها. وبقات معاه على اتصال وهوما كيشوفو فيها ويطلعو فيها ويهبط باعجاب.
شي كيقول سعداتها وشي مكرهش يكون بلاصتها

نريمان : وي مزال خدمة

لؤي : اتما راح تخلصي الشغل؟

نريمان : مزال حتا ليل

لؤي : تمام بعدين نحكي راح اتصل فيكي انتبهي ع حالك

نريمان : اوك حتا نتا بسلامة عليك
صيفط ليها بوسة مع غمزة خلاها كضحك بخجل وقطعات ..
هزات عينيها فيهم لقاتهم كيشوفو فيها ببتسامة حشمات وهبطاات راسها.

شافت فالبنت وقالت : عمري ليا السطل دالماء نغسل ليها شعرها..


جلسات مع بنات كتشوف كل وحدة وشنو خاصها وحتا لي باغي يتسجل كتسجلو وتعطيه بطاقة ديالو وفلوس كتخشيهم فصاكها وتشد باب..

جوج بنات حتا وحدة فيهم معجباتها باغيين عاد يتعلمو من بداية .. البنت لولا معارفة والو عاد غتعلم والبنت الثانية مزال ممعلماش ومن داخلة باغا تعرف شحال غتخلصها فالسيمانا ولا شهر..

خلات اللولة لي بغات تعلم وصدرات ثانية بحجة حتا تحتاجها وتعيط ليها..

كملات نهارها فالصالون بمساعدة دنيا لي كتعاونها ف امور خفيفة تمد ليها لي بغات ولا تسخر ليها حتا هبطات عندها ربيعة ببجامتها حمراء غير شافتها نريمان وهيا تكحل بالعمى جلسات ليها فالصالون كتجمع ليها مع الكليان وتشالي بيديها ..

تنفخ لنريمان راس بقوة الهضرة بزاف وتعصبات كتر من ربيعة لي مخلصاتها ما عطاتها بتيساع. كملات الكليان ودخلات لبيت تبدل حوايجها جبدات 30 درهم.. وعيطات لدنيا مداتها ليها على مساعدة ديالها وكا اول نهار ليها.. شدات بابها وقالت بحدة عاقدة حجبانها : سمحولي غنسد يلاه نوصل لدار

... سمحيلي احبيبة سهينا مع ربيعة هههه عطيني اربيعة نمرتك غدا نجي عندك تشوفي ليا

ساطت نريمان من مناخرها بعصبية مكرهاتش تغوت عليهم وتخرجهم من تما. كرهات الكليان والجيران لي تبلات بيهم معرفات مال زهرها ملاقيها غا مع الخبائث،،

خرجو كيتجمعو حتا لقدام الباب شدات بابها وتأكدات بلي تشد دازت وسط منهم وهبطات كتنتر ومعاها دنيا..

هزات وحدة من دوك بنات حاجبها وقالت : هادي مالها كتهز علينا وغا كتسوط بوحدها

ربيعة : ههه وتفرڭع ڭاع مكبرة وحاسة براسها قلت ليها عطيني غا نمرة معطاتهالي غالطة وقبيلة شفتي ملي قلتها ليها بقات غا كتمتم

ردت بستهزاء : تقول غا هيا لي عندها صالون زعمة راها منعرف فين وصلات
ربيعة : افين عندها فين توصل مسكينة حاسبة فكرها ..
خلينا منها واجي نكمل ليك قلت ليك غتجيبي داكشي ديالو فشي خرقة ومن احسن يكون جديد وتجيني قرعة دزاج متكونش كدخلها الشمس وتجيني شندقور يابس وتجيبي...

نريمان : يلاه بسلامة عليك ا دنيا غدا اجي بكري باش نبدا معاك

دنيا : صافي كيف قلتيلي مع 10 نكون هنا

نريمان : واخا يلاه بسلامة

....
غادي كيسوڭ ،،
ساهي عينيه فالطريق حتا وصل هز تليفون ودخل مباشرة لصورتها لي هزها من الانستغرام.. كيكبر فيها ويدقق فملامح وجهها لي تغيرو بعض الشيئ.. وزنها زاد على لي كان كانت ضعيفة كيبانو فيها العضومة اما دابا كتبان ليه العكس فورمتها بانت شوية وابتسامتها لي سحراتو وخلاتو يرجع بالزمان اللور....

تنهد وهوا كيدوز يديه على وجهو خرج من طوموبيل ودخل نيشان لاسنسور..
طلع لطبقة 14 فتح باب دارو... كانت دار كبيرة كلها ضايرة بالزاج روعه لا من ناحية الديكور ولا من الأثات كان صوت طفل صغير كيبجغط وهوا غادي كيحبو شافو جهاد جاي جيهتو وهوا يمشي عندو كيضحك هزو فالسمااء وشدو كيبوس فيه

جهاد : اووه بطل ديالي اهممممم هم هم هم ناكللل اناا هاا ناكلك ههه
جاية جيهتو لابسة شورط قصير لاسق عليها باللون الاسود وسوتيان بنفس اللون شعرها الاشقر وقفات قدامو وعنقاتو وهوا كيشوف فيها بنص عين

(الحوار بالانجليزية )

جهاد : شديه نمشي نلبس حوايجي
مدو ليها وهيا تشدو حطاتو فالارض ومشات تبعاه حتا لبيت لقاتو كيحيد تيشورت ديالو

شافت فيه وقالت : جهاد مالك معصب؟ ....
كنهضر معاك شوف فيا مالك علاش مكتجاوبش على ليزابيل ديالي؟ علاش لبارح مجيتيش

جهاد : اريانا مفيا لي يهضر بدلي ساعة بخرا

ردت بشوق : جهاد انا شنو درت ليك علاش كدير معايا هاكا نتا عارفني كنبغيك ونتا هوا كلشي فحياتي وفوق هادشي جامعنا ولدنا

مردش عليها حيد سروالو كيبدل بواحد اخر وهيا تعنقو من
خصروو بقوة كتشوف فعينيه وقالت : توحشتك اجهاد

شاف فيها بنص عين وحيد ليها يديها كيشد السمطة وهيا تعاود تشد ليه يديو وقربات من وجهو بشهوة وهوا يبعد

جهاد : راه قلت ليك خدام ومزروب ودابا معنديش الوقت حيدي خليني نلبس . راه ممساليش

ردت بحزن : كتعرف شي وحدة خرا ياك؟ كتبات مع شي وحدة خرا !!

بدون رد

اريانا : جاوبني اجهاد

بدون رد

شدات ليه فدراعو مقابلة مع وجهو دموع فعينيها وقالت..


شنو مكيعجبكش فيا اجهاد! علاش كدير معايا هاكا ؟ جوبني بغيت نعرف شكون هادي لي كتمشي عندها وكترتاح معاها وكتخليني انا؟

رد بحدة : ممشيت عند حتا وحدة نتي عارفة هاد 15 جوغ كلها كانت عندي خدمة وزيدون معندكش الحق تسوليني فين مشيت وفين جيت حيت ماشي سوقك

سرطات ريقها بحزن جلسات على فراش كتشوف فيه كيشد صدايف د القميجة وقف قدام المرايا دهن شعرو ودوز المشطة هز برفان ديالو رش جوج رشات ومشا كيلبس صباطو وهيا متبعة ليه العين حتا شافتو هز لافيست كيلبسها وهيا تمشي عندو

اريانا : غتجي فليل ياك؟

حرك راسو بالايجاب ومشا خرج. هابط فلاسنسور وهوا كيكتب مسج صيفطو ومشات طلع فالطوموبيل...

فحين متكية نريمان فبلاصتها 11 دليل عكس امريكا لي مزال عندهم نهار وصلها مسج ديالو وهيا كتهضر مع لؤي هبطات شاشة كتقرا مسج

JIHAD 💬 : Bonsoir Nero ça va? Seftilia le numero Whatssap dielek OK!!


شافت المسج من برا ومدخلاتش ليه ترونات من جديد بعدما كانت شادة الخط مع لؤي مجرد اسم ديالو كيطلع كيشوش ليها راسها..
خلاتو مدخلاتش المسج ديالو ورجعات كتجاوب لؤي وعقلها مع جهاد لي القلب كينهش ولكن هيا باركة على راسها متجاوبوش..

تنصص الليل وعودات طلات على مسج ديالو بلا مدخل ليه طفات كنكسيون وبقات كتخمم فمصيرها اشنو غدير وكيفاش غتعيش ونهايتها كيفاش غتكون حتا داها نعاس..


صباح صبحات كتحل عينيها بصعوبة من قوة الصهير د ليلة لي دازت..

توضات وصلاة ودخلات الكوزينة لعند سمية تكمل معاها توجاد الفطور. حطو على الطبلة وبداو كيفطرو ويهضروا

نريمان : ماما شنو درنا دابا؟
سمية : فاش؟

نريمان : ياك هضرت معاك البارح على ود نسرين خليها تقرا ومعندك علاش تشكي فيها وتقوليلها تجي .
شنو غتجي دير هنا تبقى جالسة فدار ولا تمشي تقلب على شي خدمة متومرة!!!

سمية : معندها متجلس دير تما. تجي لهنا حدا عينينا تخدم ولا تقرا ولا تجلس معاك فالصالون علميها وتعاونك حسن متجيبي براني

نريمان : الله يهديك واش حتا هادي خدمة!! خليها تقرا وتوضف ولا تخرج شي حاجة تنفعها انا مكتشوفيش الزيار لي كندوز منو غا اجي وخدم فالصالون خليني نتقاتل بوحدي الله يهديك اماما خليها تقرا بلاما تعيطي ليها عفاك اماما صافي؟ ...

وهضري صافي مغتقوليلها والو ياك؟

سمية : وصافي يلاه نوضي نوصلك باش نمشي الخدمة راني غنتعطل

نريمان : واخا انا نبدل حوايجي اليوم غندي معايا نعيمة تفوج شوية ياك انعومتي ههه ..


حل عينيه على قبلاتها المتفرقة فصدرو وعنقو كمش حواجبو شاف فيها وقال : خليني نعس

طلعات فوق منو مفرقة رجليها بين رجليه جلسات عليه وصدرها محطوط على صدروا وهيا عارية كتحكحك معاه وقالت : حتا 3 وانا كنتسناك ومبغاش يجيني نعاس ومكنشبعش منك خليك فايق معايا

طبعات قبلة على فمو كتمص شفايفو شد عينيه كيتخايل نريمان فوق منو بلمستها ودفئها وحنانها كيتجاوب معاها وهوا شاد عينيه مستمتع سخناتو وخلاتو هايج حل عينيه وشهوة غالبة عليه ..

بعد مدة حس براسو وصل لمبتغاه ..
وهوا يضور خلاها حالة رجليها استغربات من التصرف لي دار معاها وزاد عطاها بضهرو وجر عليه الغطى حاس بالتعب والارهاق ديال الخدمة وعاد ممارسة لي خلاتو يحس بالارتخاء ونعاس.

شدات فكتفو بحزن : جهاد مالك ؟

رد بغضب : خرجي برااا يلاه نوضي خليني نعس نوضي خرجييييي

شافتو هكاك وهيا تنوض هكاك عارية خرجات لحمام لي برا دخلات ليه كتغسل، وجهها وتبكي فحين ناض هوا زذح الباب وشدو من لداخل ورجع ينعس.


كا كل يوم الكليان مزال كيتزاد ولي عجباتو الخدمة كيمشي يجيب حبابو وصحابو .. الحركة كضور عند نريمان والخدمة على الجهد...

نهار كولو مكتلحقش تهز تليفون الا اذا اتصل بيها شي حد واكيد لي غيصوني هوا لؤي.. لي اتصل ومطولاتش معاه فالهضرة
ورجعات لخدمة ديالها حتا داز نهار ومشات بحالها..

عاد هزات تليفون لقات مسج اخر من عند جهاد فرحات حتا لمعو عينيها هبطات غير شاشة كتقراه من برا

JIHAD 💬 : Cou Cou ?

مجوباتش وخشات تليفون فصاك حتا وصلات لدار ..

بعدما تعشات ودخلات لبلاصتها وهيا هازة تليفون.

نجاوب ؟ لا منجاوبش!! لا نجاوبو؟؟ لااا لا منجااوبوش

غا بينها وبين راسها حايرة ولكن مطولاتش فقصارة من شدة التعب وتخمام نيشان طاحت نعسات بلاما تجاوبو..


صباح جديد عند نريمان ومميز اولهم جهاد لي كيسول فيها. وثاني حاجة اول نهار ديال تعليم د بنات لي غيجيو مع 3 دالعشية شوية دالخلعة وتلفة توتر غالب عليها.. هادشي طير ليها النعاس وناضت ف 7 صباح. حلات تليفون دخلات لمسجات دجهاد خلات ليه vu مجوباتوش باش يزيد يسول فيه هادشي خلاها تحس بمتعة كبيرة وفرحة تشوفو هوا لي كيسول وهوا لي كيصيفط..


ناضت لحوايجها كتقلب على شنو غتلبس ختارت جيب قصيرة سودااء فوق الركبة شوية مع تريكو بكمام قصارين مكرشين هابطين على كتاف فاللون اصفر فيه وريدات صغارين سوداء ودو بياس فالأسود . خشات داكشي فصاكها وناصت دارت تليفون يتشارجا ومشات الكوزينة وجدات الفطور حطاتو على طبلة قدام اشرف لي غارق فالنعاس فطرات بالزربة ومشات لعند سمية علماتها بلي غتخرج. ومشات لبيتها لبسات عبايتها فوق بيجاما قصيرة لي لابسة لبسات صندالة سوداء عالية بالصميطات ديالها. لبسات حويلقاتها الطوال ولوات شان على راسها. هزات صاكها وتليفونها وسوارتها وخرجات ومشات لصالون. دخلات وشدات عليها بالساروت
حيدات العباية وبيجامتها بقات غا بالدوبياس كدوز يديها على رجلها لي ناض فيها الزغب وتحت الابط ديالها عضات على شفايفها اكفس حاجة كتخمم فيها هيا لاصير وحريق ديالو جلسات على البياص بدات برجليها هوما اللولة . عاد هزات يديها قبالت المرايا كدوز لاصير وتحيد وتعض فشفايفها بالحريق بقات حتا كملات وقربات المرايا كدوز على موسطاج ديالها الخفيف زغبو مكيبانش ولكن باغا تحيد الا كانت شي وحدة.

كملات وجمعات داكشي جبدات المنضفات سيقات البيت دليستيتيك وصالون جمعات الدنيا وستفات كل حاجة فبلاصتها ومشات لبيت د تعليم حتا هوا دوزات فيه الجفاف والمعطرات حتا كملات ومشات لحمام خدات دوش بالزربة قبل ميجيو الكليان. سمعات الصوني كملات بالزربة لبسات عبايتها بوحدها فوق اللحم وفوطة على شعرها ومشات تحل لقات دنيا

نريمان : جابك الله هانتي هنا انا ندخل نبدل حوايجي ونقاد حالتي ونجي حلي الباب وهبطي ريدو

دنيا : واخا كوني هانيا غا لبسي فخاطرك
دخلات لبيت لبسات حوايجها لي جابت معاها دوبياس من تحت وفوق منهم داك التريكو لي جا لاسق عليها مبين فورمة ديالها وحتا لاجيب لي جات لاسقة معاها ومع مؤخرتها لي صغيرة ولكن بارزة وباينة لبسات صندالتها العالية. حطات مكياج خفيف جبدات العوينات بالايلينر وخرجات لصالون لقات دنيا مكونكطيا. جلسلت على الكرسي وهزات السيشوار كتنشف شعرها. اكتفت بانها تنشفو وتمشطو وتخليه كيفما هوا مطلوق مع بوندو اسود، فوق راسها بقات دنيا غير كتشوف فيها. كيفاش بالحجاب كتبان فشكل وملي، كتقاد وتلبس وتعري كتبان بحالا شي وحدة خرا. هيا فعلا فاتنة وزينها كيهبل كيخلي كاع العيالات لي كيدخلو عندها كيتمناو لو يكونو بحالها ..
جلسات على الفوطوي كتدي وتجيب فالهضرة مع دنيا حتا دخلو الكليان وناضت كتخدم ليهم وعينيها مع الساعة كلما كيقرب الوقت كيزيد توترها..

هادشي خلاها تنسى مسج د جهاد وتفكر غير كيفاش غيدوزها اول نهار..

وصل الوقت وبداو بنات كيدخلو وهيا ببتسامة كتستقبلهم وهوما كيسلمو عليها ويشوفو فيها باعجاب. طريقتها فالكلام ولاطاي ديالها وطبيعتها كتخلي الكل يظن انها فسن 18 او اقل كلشي كيقول انها مجرد بنت صغيرة..
تصدمات وهيا كتشوف ناس كبار فسن الأربعين والثلاثين والعشرينات جايين يتعلمو كان عددهم اكثر من 25 وحدة..
زادو شوشوها كتر ورونوها وخوفوها وهيا كتحاول تحكم فراسها وتعامل مشكيلة انها عندها بيت واحد وهداك البيت مكافيش لهاد العدد لي جا

دخلات دنيا حاضية صالون وكتخدم الا جات شي كليانة وهيا واقفة كتوريهم اول درس وهوما مجموعين عليه السكات كلشي كيسمع ليها وعينو مع يديها لي كتخدم ليهم فالمونيكة

وكل مرة ضور عندهم واش فهمتو؟ لي عندها سؤال تسولني نشرحو ليها؟؟..
شنو فهمتو من هاد الدرس. !

دابا شكون طبق ليا هادشي!!


شكون عاقلة على شنو درت!!


حتا هوما تأقلمو معاها وعجبهم تصرف د نريمان لي كتعامل معاهم بطيبة وحنان وتوضيح وعاطية لكل واحد فيهم الخاطر صوتها الرقيق كتهضر بيه وهوما كيسمعو ليها عاجبهم الحال. فاللول حڭروها وقالو بينااتهم..

اويلي واش هادي لي غتعلمنا؟؟؟
هيا براسها موحال تكون عارفة شي حاجة...

كون غير مشيتي لشي ايكول بريفي ومنجيوش..

كترات الهضرة فاللول وكاين لي ندم حيت جا وحيت تسجل..

ولكن فالاخير خلاتهم يبغيوها وعاجبهم تعليم ديالها وطريقتها فالشرح. لو كانت مدرسة خاصة مكانتش غتعلمهم بهاد الدقة وبهاد الخاطر..

حتا هيا ولفاتهم وعجبها الحال وهيا وسطهم
. مسخاتش بالوقت يدوز وتوصل 7 دغيا ويغادرو..

خرجو بحالهم وهيا رجعات كتكمل شغلها فصالون مع دنيا حتا طاح الظلام لبسات عبايتها ورجعات لدار نيشان دخلات لحوايجها تشوف اش غتلبس غدا وكل شوقها ايمتا يوصل نهار د غدا..

جلسات كتعشى مع سمية واشرف وهيا كتعاود ليهم على اول نهار ديال تعليم كيف داز وناس لي خلصوها ف اول شهر مجرد 25 وحدة وصلات ل 7500 درهم..

فرحو ليها وباختيار ديالها لي غيرجع عليها بالمنفعة..

بعد قصارة طويلة بيناتهم دخلات لبلاصتها وهزات تليفون تشوف جهاد واش صيفط ولا لقاتو مصيفط جوج مسجات خرين ضحكات وعينيها كيلمعو عاضة على شفاها السفلية..

JIHAD 💬 : Nero? Cava Bghet Ndewi Meaak!!

Fenek! AlaSh maketjewbiSh !!!

تبسمات وعينيها ضاحكين طلعات الكلاڤي كترد عليه ببرود

Nariman 💬 : Semaheli maraditech lbal lmessage dyalek oui hana?


شدات عينيها وخرجات نفس عميق وهيا كضحك ،،
دازت الواتساب تجاوب لؤي لي حتا هوا كيتسنى الرد ديالها.

وبلا تعطال وصلها الجواب د جهاد لي كان على القرص ...

ضحكات بالجهد وهيا كتهبط شاشة تشوف اش صيفط

JIHAD 💬 : Ok passe lea numero Deilek

عضات على شفاها السفلية وخلاتو يتسنى شادة الهضرة مع لؤي حتا دازت 10 دقايق..

دخلات المسج ديالو صيفطات ليه نمرتها وفالبلاصة طلع ليها vu..
غير شافتو قرا المسج وهيا تطفي كنكسيون بالزربة حطات تليفون حداها كتسرط ريقها متوترة كتقول راه صيفط شي مسج راه كيصوني فالواتساب حتا قفزها صوني دتليفون ناضت مفزوعة هزات تليفون.
كتشوف نمرة غريبة كتصوني عليهاا
+1 514 .....
حسات بيها غتكون نمرتو مقدراتش تجاوب وممستعداش تهضر معاه فهاد الوقيتة ..

كان فعلا هوا لي كيصوني جالس فطوموبيلتو كيصوني ويعاود ولكن بدون رد ..
خرج نفس عميق ودخل سجل ليها مقطع صوتي فالواتساب ..

" Kensouni Elik "
بقى كيتسنى يشوفها واش غدخل تقرا مسج ولا لا..

ولكن مجاه حتا رد عاود صونى بدون رد..
صغر عينيه فحيرة واش زعمة نعسات ؟ واش دغيا نعسات ومسمعاتش تليفون !

فحين متكية فبلاصتها كضور عينيها تالفة ومتأكدة غيكون صيفط ليها مسج وكيتسنى جواب ديالها .. بقات ساعة وهيا على نفس الحال كتقلب فبلاصتها حتا داها نعاس ..


صباح مبرد والجو مغيم وشتاٱ كتنقط.. جرات غطات عليها من البرد باش تكمل نعاسها سمعات سمية كتعيط ليها حلات عينيها بثقالة ناضت كتكسل لبسات بينوارها وضوات وجهها لتليفون ديالها كتخمم ف اتصال د بارح وهضرة د جهاد خشات تليفون فالبريز يتشارجا.

وخرجات عند سمية لي كتناڭر هيا واشرف جالس فوق سداري كيهضر مع سمية

اشرف : هااا . ها نريمان اجي اختي جابك الله

نريمان : مالكم اش كاين ؟

ردت سمية باستهزاء : هه خوك قالك غيتزوج بواحد اسبانية واش هادا تسطى !! معندوش حتا باش يشري سروال وخاصو يتزوج

وقف كيشوف ف نريمان وقال : والله اختي الا باغي نتزوج راه غادي نخدم وغادي حتا انا ندير داري

طولات فيه شوفة وقالت : ايوا الله يسهل عليك ومن بعد !!

سمية : قالك خصو الفلوس يا حبيبة باش يكري وباش يبدا حنا منين غنجيبو ليه الفلوس ؟؟ ملي نتا باغي تزوج بصح سير خدم وسير جمعهم بالريال وسيري تزوج حتا 10 حنا مالنا

مشافش فسمية وقال وعينيه مع نريمان : ختي راه معنديش الوقت لي نخدم ونجمع الفلوس وعااااد نمشي نتزوج . راه دابا صعيبة غا البدية راه معنديش من عندمن نسلف عاونوني والله حتا نردها ليكم بالضوبل

ردت : ودابا اخويا حنا منين غنجيبو ليك فالفلوس و ..

قطعاتها سمية : ومتيقيييش بيه غا كيكذب يعلم الله اش مخبي فداك الراس وجاي يدوخ لينا راسناا

اشرف : وااا ماما قسما بالله الا باغي نتزوج ودابا نتوما معارفينش البلان لي فراسي دابا غا عاونوني والله حتا نرد ليكم رزقكم عونيني اختي نريمان الله يهديك

نريمان : معندي باش نعاونك الغالب الله.
خلاتو واقف ومشات لحمام توضات ورجعات صلاة. لبسات حوايجها وهيا كتسمع نڭيرهم. هزات تليفونها وصاكها وخرجات لعندهم جلسات تفطر شاف فيها وقال : ياك انريمان هادي هيا خوك وعزيز عليك ونعاونك وندير ليك !!

نريمان : وراه معنديش وحتا انا مزيرة واش مكتشوفش الضروف لي كندوز منها حسابلك مطفرااه انا بفف
سمحات فداك الفطور وناضت خرجات لبس هوا تيشورط ديالو وخرج تابعها فالزنقة كيطلب ويرغب فيها
طلعات فالطاكسي وطلع معاها حتا وصلات لباب صالون لقاتو مفتوح كانت تما دنيا حالة دخل معاها لبيت د ليستيتيك وسدات الباب عليهم. شافت فيه وقالت : دابا شحال خاصك ؟

اشرف : بتردد ) امم معرفتش شحال تقدري تعطيني نتي ؟

نريمان : انا معنديش اشرف وعندي بزاف د مطارق فالراس شحال من حاجة خاصني نديرها قول دابا شحال خصك نشوفلك ؟

اشرف : شي جوج مليون ولا 3 و.

قطعاتو : ولا 4 ولا 10 راه معندي منين نجيب ليك هادشي شوف غنعطيك مليون راه معنديش كامل غتصبر راه واحد السيدة بغات نخدم ليها لعرس بنتها هضرات معايا فالفيس . انا غنشوف واش غتجي ولا لا وديك ساعة الا خدمت وجمعت ونعطيك صافي ؟


تنهد واخا مكفياهش ولكن معندو ميدير . هادشي مدخلش لنريمان فراس ولكن بغات تعاونو وتشوفو فين غيوصل بهادشي ديالو.

خرج مشا فحالو وهيا بسرعة جبدات تليفون لي كانت كتسمعو كيڤيبري ولكن مقدراتش تجاوب فالطريق ملي كان معاها اشرف وحتا ملي دخلات وكانت كتسمعو كيڤيبري. ل
قات نفس النمرة جلسات على كرسي كتنهد ويديها كيترعدو حلات الخط وقالت بصوتها رقيق : آلو !


سمعات نفس ديالو فالخط وهيا عاضة على شفتها التحتانية كتسناه يهضر ،،

جهاد : نريمان !
ردت بتوتر : اه ..اا شكون معايا ؟

رد : انا جهاد لباس عليك

حسات بالصهدة طالعة معاها وهيا كتسمع صوتو لي من مدة مسمعاتو مشتاقة ليه وتوحشات نبرة صوتو روجولية وهضرتو المغربية لي موضحاش مخلطة بالاينجليزية حولات تقوي راسها معاه وردت بهدوء

اه كيف داير لباس عليك ؟

رد : صافا وانت !!

ردت : مزيانة الحمد الله شكرا

سكت للحضة وقال : صونيت عليك لبارح مي مجوبتيش ؟

ردت بتقالة : كنت عيانة ونعست مسمعتوش

رد : اهاه اوك ياك لباس بعدا باش عيانة !

سكتات حاطة يديها على قلبها كتغمض عينيها وكتشوف وجهها فالمرايا وضور الكرسي تالفة وقالت
مع الخدمة وصافي

جهاد : اها وي مزيان ..جو بونز درتي سونتخ بيوتي ديالك ؟

ردت : اه الحمد الله

جهاد : اوك بون كوغاج

سكت للحضة كان هوا براسو تالف ومع يلاه نايض من نعاس بصدرو عاري واقف فالبالكون وڭارو فيدو كيكمي ..
كمل كلامو وقال : نصوني ابيل فيديو نقدر نشوفك ؟

زادت طلعات معاها السهدة وتلفة و بغات تعرف علاش باغي يشوفها قوات راسها وقالت : وعلاش اجهاد باغي تشوفني ! بشمن صفة ؟

سكت للحضة مردش عليها وهيا كتسمع انفاسو فالتليفون وقال بصوت هادئ : توحشتك وبغيت نشوفك

سكتات حتا هيا وناضت من بلاصتها كتمشي وتجي اش غترد عليه وباش غتجاوبو وقالت بجدية : سمحلي اخويا جهاد . انا مكنديرش ابيل فيديو وزيدون نتا وقيلة عندك الوليدات ومزوج معندك علاش تهضر معايا ولا تصوني عليا.
كي شفتي را مراتك مغاديش تبغي على هادشي كيفما انا راجلي ميبغيش انا جوبتك غير حسابلي خاصك شي حاجة وصافي الله يعاونك

خرج عينيه بصدمة وقال : شنووو مزوجة نتي ؟؟؟؟؟ جاوبينييييي !!!! واش تزوجتي !

سمعاتو كيفاش هضر بالجهد ونبرة صوتو الحادة حسات براسها دارت انجاااز وهيا تقطع عليه تليفون ..
معرفاتش علاش قالت ليه هكاك وعلاش قطعات وعلاش هوا تصدم بهضرتها شافتو كيعاود يصوني ومجوباتش وبالها كيقول ليها متجاوبيش .
ياك هوا لي طلقك ! ياك هوا لي خلاك وزاد... ياك هوا لي مسولش فيك ملي كنتي مريضة ومحاولش يرجعك .. ياك هوا لي خلا ليك هضرة بحال سم فاش كنتي فطبيب وزاد مرجعش لعندك...
مجرد تفكير فهادشي كيخليها تأزم فنفسيتها وتقرر متعاودش تجاوبو وتعطي لحياتها فرصة خرا مع شخص اخر

بغات تليفون ولكن خافت تصوني عليها شي كليانة خلاتو كيصوني ويقطع حتا شبع وناضت هيا كتلبس حوايجها وتقاد راسها خرجات لصالون هازة تليفون فيديها لقات دنيا كتخدم لوحدة بروشيتغ رحبات بيها وجلسات حداهم فوق الفوطوي وصلها مسج من ديك نمرة ودخلات تقراه ..

" Jawebeni "

شافتو رجع صونى ومجوباتش عود مرة خرا وهيا تنوض دخلات سدات عليها وحلات الخط بلاما تهضر

سمعاتو كيتنهد وقال : علاش قطعتي ! حنا كنهضروا علاش تقطعي ليا فوجهي ؟

بدون رد ..

جهاد : نريمان ؟

بدون رد ..

جهاد : نريمان كنهضر معاك جاوبيني !!

ردت بتعب : شنو بغيتي اجهاد

جهاد : متمرضينيش عفاك واش ڤغيمون مزوجة ؟ جيني نيشااان عفاك متكذيش عليا ايمتا تزوجتي ؟

حسات بالغيرة ديالو والعافية شاعلة فيه ونبرة الصوتو مبدلة وبغات تزيد تشعلو كتر وقالت : اه تزوجت ودابا علاش كتصوني عليا ؟ ها علاش كتسول ؟

مردش وبقا الخط محلول للحضة وقال : انا بغيت نشوفك ونهضرو ضروري عندنا بزاف ميتقال متقصحيش راسك.. 24 فهاد الشهر غنكون فالمغرب وعندي نيت الخدمة فتطوان خاصنا نتشاوفو ونهضرو

ضحكات بسخرية وقالت : طلقتيني اجهاد رميتيني وخليتيني .. ومعاودتيش سولتي فيا ودابا عاد جاي نهضرو ؟ شنو غادي تقول ليا شنو ؟ ياك سولتك داك النهار على داك الولد وقلتيلي ولدك . ياك ولدك ؟ .... جاوبني واش ولدك ؟

سكتات كتسنى الرد ديال وقال : اه ولدي

كملات هضرتها وقالت بنبرة حزينة والدموع هابطين من عينيها
: ايوا تزوجتي ودرتي ولادك علاش جاي تسول فنريمان دابا ؟ نريمان هاهيا عايشة كون ملقيتش ماما كون فرسوني الكلاب طلقتيني وخليني و..

قطعها : نريمان نتي بغيتي

قطعاتو بغضب : اش بغيت اش ؟؟ شنو بغيت انا ! اسيدي متصونيش عليا كاااع فرقني عليك نساني ومتعاودش تسول علياا. كيفما نتا بديتي حياتك حتا انا بديت حياتي وكيف نتا درتي ولادك حتا انا درت ولادي ومتعاودش تصوني علياااااااا كتسمع ؟؟

قطعات عليه وطفات تليفون حاسة براسها غطيح غتسخف غتحماق كلها كترعددد من راسها لرجليها. جلسات على البياص شادة فقلبها لي كيضرب بالجهد وهيا دخل عندها دنيا كتجري

دنيا : مالكي اختي ياك لباس علاش كنتي كتغوتي ؟

نريمان : والو مماليش خرجي وشدي عليا الباب

دنيا : واخا . وبنات د تعليم راهم جاو ..
حركات راسها بالايجاب وبقات مهبطة راسها كتنهج ودموع حارين هابطين مع خدها. بقاات نص ساعة هكاك حتا حسات براسها رجعات شوية عاد ناضت لقدام مرايا مسحات وجهها وغطات بالمكياج. وخرجات راسمة ابتسامة باهتة على وجهها مشات لبيت د تعليم


بعقل مرفوع كتهضر مع البنات وتشرح ليهم كتحاول تركز معاهم وتنسى حوار لي ضار بينها وبين جهاد..
عطاتهم الدرس وتوخرات اللور كتشوفهم كيطبقو داكشي لي دارت . وفينما يكون شي غلط تصححو ليهم وتعاود تشرح ليهم بالوحدة..
محساتش بالوقت ايمتا داز حتا بداو كيخرجو بنات وحدة مور وحدة وصلات 8 د ليل مشات حلات لاكيس لي كتحط فيها الفلوس د الخدمة هزات 50 درهم مداتها ل دنيا وقالت : سيري بحالك باش متعطليش

دنيا : وانت ؟
ردت : انا مزال غنبقى هنا شوية
دنيا : واخا تصبحي على خير
حركات راسها بالايجاب
خرجات دنيا وشدات الباب.

هزات نريمان عينيها كتشوف راسها فالمرايا وتكات على طبلة كتبكي راسها غيتفرڭع بالحريق كتحس بضغط كبير..
ناضت لبسات حوايجها وهزات صاكها شدات الباب وهبطات فالدروج خرجات غاديا مع طريطوار كتمسح دموعها مبغاتش تسرط ليها صافي تزوج ودار حياتو مع انسانة خرا شدات طريق طويلة على رجليها حتا وصلات لدار.
كانت سمية مزال فالخدمة وغتخرج حتا 12 د ليل شبعات بكا بردات على قلبها حتا رتاحت وتليفون مزال طافي.
جلسات فالصالة شعلاتو وهوما كيطلعوو ليها مسجات ديالو وبواط فوكال.
دخلات بلوكاتو من واتساب ومن نمرة ومن الانستغرام حطات تليفون يتشارجا وبقات متكية فوق السداري حتا داها نعاس. فيقاتها سمية بعدما جات من الخدمة كتحرك فيها وتنوض وهيا مستغربة علاش ناعسة بحوايجها مبدلاتهمش ناعسة معذبة وجهها شاحب. خافت وبقات كتحرك فيها حتا ناضت بعياء

سمية : اويلي مالك على حالتك شنو كاين مال عينيك منفوخين

نريمان : والو مكاين والو

سمية : لا هضري شنو كاين علاش كنتي كتبكي ؟
نريمان : والو اماما قلت ليك والو

سمية : بخوف ) كتخبعي ياك انريمان !!

انهارت بالبكاء وترمات على صدرها كتبكي وتنخصص : اناا معنديش الزهر اماما معرفتش كنحس براسي ضايقة بيا وعيت من دنيا وتكرهت فكلشي

دوزات يديها على ضهرها بحنان وكتبوس فيها : وعلاش ابنتي شكون وصلك لهاد الحالة علاش كتقولي هاكا مالك ابنتي شنو خاصك نتي بخديمتك ومستقبلك ومزال صغيرة علاش هادشي علاش ؟.

نريمان : والو اماما غير ضاقت بيا وفشيت قلبي وصافي
سمية : بتشكيك ) كتخبعي ابنتي شي حاجة ياك ؟.
نريمان : لا اماما منقدرش نخبع عليك بالعكس معندي والو..

طبطبات ليها سمية على ضهرها كتبوس فيها وتسكتها.
نوضاتها تبدل حوايجها.
لبسات بيجامتها وداتها سمية تغسل وجهها ورجعاتها لصالون سخنات العشاء وحطاتو حدا نريمان كتوكلها بزز بالرغيب ونريمان كتبرك على راسها وتاكل .
دخلاتها سمية معاها لبيتها معنقها ومغطياها كتبوس ليها فراسها حتا شافتها نعسات..
فصباح حلات عينيها لقات راسها فبيت ماماها.
ناضت كتفكر ليلة لي دازت حسات براسها خفافت ورتاحت ناضت كتكسل كتشم ريحة د الحرشة جاية من الكوزينة..
دخلات لعند سمية باست ليها راسها والاخيرة عنقاتها كتبوس فيها وعينيها فيهم الخوف على نريمان : كيف صبحات ليا بنتي ؟

نريمان : انا بخير هه الحمد الله

سمية : خلعتيني ابنتي والله حساب ليا غا شي حاجة طرات ليك

نريمان : لا انا بخير انغسل وجهي ونجي نعاونك..

فطرو غير هيا وسمية واشرف حداهم حال فمو ناعس ..
لبسات وخرجات غادية على رجليها ساهية وكتخمم شافتو مصوناش بنمرة خرا واخيرا تهنات ومغيعاوش يهضر ومنها نيت تنساه وتبدا من جديد.
شافت ف تليفون لقات 18 فشهر اسبوع وغادي يكون فالمغرب هاهوا كاع جااا مغاديش يلقاها ومغاديش يعرف فين كاينة ..

دخلات لصالون لقات دنيا مبكرة جالسة كتصور وتبوزا قدام المرايا ..
جبدات الجفاف والمنضفات وبدات كتمسح هيا ودنيا ويجفو وينقيو دنيا حتا خلاو كلشي كيشعل.
دخلات بدلات حوايجها قدات راسها كيف العادة وهيا شادة الهضرة مع لؤي لي كتنسي بيه الجرح العميق لي خلا ليها جهاد فقلبها...
دوزات نهار فالخدمة وتعليم البنات ورجعات لدار بعد يوم متعب..
قررات هيا وسمية فالصباح يفطرو جنب البحر ..
خرجو بكري والجو مبرد طلعات حدا سمية فالطوموبيل.
فطرو وجلسو يتجمعو بحال اي ام وبنتها وهيا كتعطي لنريمان نصائح وتوصيها تسراو شوية كيضورو فالمدينة حتا وصلات 12 عاد دات نريمان لصالون حطاتها حدا باب ومشات تشوف شغلها..
داز يوم روتيني كيف باقي ايام الخدمة قلالت شوية وتعليم فالعشية هاكا دوزات اكثر من اسبوع .. رتاحت ونسات القضية د جهاد وكتحاول تولف انها تحيدو من بالها وتبدا من جديد.. كانت واقفة كتعلم لبنات طريقة مكياج العرائس وكتشرح ..
شافت رقم دالمغرب كيتاصل بيها حلات الخط حدا بنات وقالت بهدوء
نريمان : الو سلام عليكم

رد : سلام فينك انريمان

سمعات صوتو وهيا تقول بحدة كتحاول تبقى مهذنة : علاش مصوني عليا اجهاد ؟

جهاد : خصني نشوفك دابا خاصنا نهضرو

ردت بتوتر : معندناش فاش نهضرو لي كاين قلتو ليك بسلامة..
قطعات عليه وبنات كيشوفو فبعضياتهم فهمو لي كاين ..
بعد نصف ساعة وهيا كتشرح عاود صونى قطعات عليه عاود صونى وعودات قطعات شافتو مصوناش وكملات لبنات على الدرس شوية وهوا يصوني ليها باب شافت فدنيا وقالت: خلي شوفي وقيلة سكينة عاد جايا حتا كملنا حنا

مشات دنيا حلات الباب ونريمان مزال كتكمل حتا رجعات عندها ببتسامة وقالت : ختي نريمان هادا واحد الراجل سميتو جهاد كيسول عليك

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.