تلف ومعرف باش يرد عليها واش يفرح لحملها .. ولا يحزن على ولدو لي مليه آثر ومزال ما عرفو واش فالحياة ولا يكون مات.. مجرد كيجيه هاد التخيل انه يلقاه ميت فشي بلاصة كيضييق الصدر ديالو وكيمرض نفسيااا...
دقتو محاس بيها حد من غيرو شد عينيه بضيق ورد على نريمان بحزن
عطي راحة راسك منبغيكش ديري شي مجهود ولا طرا ليك شي حاجة بحال المرة لي فاتت عفااك انريمان ديري عقلك وسمعي لهضرة اناا ملي غنقدر نصوني عليك راه غنصوني ويلا شفتيني غبرت عضريني ومتقلقيش اوك !! وراه غندوز ليك فلوس لحسابك باش تمشي لطبيب وتاخدي لي غتحتاجيني المهم نتي عطي راحة راسك ومتخرجييش عفااك
ردت بهدوء : واخا اجهاد صافي مغاديش نخرج
جهاد : ولي بغيتيها ختك ولا امك تمشي تجيبها ليك تافقنا
نريمان : اه واخا كون هاني
جهاد : يلاه بسلامة عليك انا غنقطع
قطعات ورجعت خرجت عندهم مدات لوفاء تليفونها اما نسرين حطات سينية من جديد ولورا كتعاونها وسمية عاقدة حجبانها كتهضر هيا وفاء..
مزال ممتيقى بلي السيد عندو ولد كتشوف ف نريمان بالآسى على زهر بنتها المكفس ما فرحات فحياتها مطفراتو فزواجها...
مطولاتش وفاء فالجلسة معاها واخا عياو فيها تبقى تغدا معاهم ولكن رفضات بحجة عندها اشغاا وشلا ميدار والوقت مزير...
بقات نريمان متكية فبلاصتها بوحدها فدار نسرين ولورا مشاو لصالون وسمية فالخدمة مكتجي حتا ليل وحتا لبنات اما نريمان غير نعاس وراحة مكدير حتا مجهود كيخليو ليها الماكلة وكلشي حداها وتصالها بجهاد نقص مرة مرة كيصوني وكل مرة كتحس بيه مخنوق كتر وكيهضر غا بزز
الايام كطير وشهر رمضان داخل وكلشي كيوجد وحتا من سمية فوقت الفراغ هاهيا كتحمر الطحين هاهيا تنقي زنجلان وتوجد وتحط حتا يبقى اسبوع لرمضان اما نريمان غابت فمرا على صالون مخليا نسرين ولورا ودنيا شادينه اما البنات كيتعلمو فبعضياتهم ويراجعو داكشي لي علماتهم ،،
صباح الاحد وكلشي ناعس نوضااتهم سمية يفطروا باش يخرجو يتقضاو داكشي لي غيحتاجو تجمعو على طبلة دالفطور من غير نريمان لي معندها خاطر معندها شهية جلسات حداهم بتعب وسمية كتكب ليها الحليب
اي حاجة بانت ليها وشافت غتحتاجها هزاتها بلاما تفكر .. سمية كتختار من جهة وحتا نسرين كتهز من جهة خرا ..
اما نريمان دخلات لمحل كيبيعو فيه حوايج دالخلوق وملابس اطفال صغار من شهر حتا ل 5 سنوات وبدات تشوف فدوك الحويجات ببتسامة وعينيها كيلمعو. خرجات من المحل وعيطات لورا لي غير واقفة كضور وتشوف .. مشات عند نريمان ودخلاتها لداخل كتوريها وتهز من العلاقات وتحط على كونطوار .
نريمان : شوفي لي بغيتي انشريو اليوم حوايج د بيبي
ابتسمات لورا بخجل وبقات غير مربعة يديها كتشوف ونريمان كتجرها تختار وتهز لي بغات بزز باش بدات تهز حويجات شيبيين ديال اطفال بحكم عندها ولد ..
اما نريمان غا لي عجباتها كتهز وتحط حتا جات عندهم سمية حتا هيا شافتهم كيختارو الحوايج وحتا هيا بدات تختار معاهم من جديد وترد الحوايج لي ختارت نريمان
خلاو لورا الدموع دايزين من عينيها من شدة الفرحة .. حيت مكانش فالظن ديالها غيتعاملو معاها هاكا ويحسبوها وحدة منهم وحتا سمية لي كانت قاصية معاها فاللول رطابت معاها ورجعات حنينة فيها ولي جابتو تجيب ليها حقها ومتنساها من حتا فنيدة هيا الاخرة
من صباح حتا طاح الليل وهوما كيضورو.
يلاه بغاو يرجعو لدار وهيا ترغب نريمان سمية تديهم المضيق يتعشاو فالمكان لي تعشات فيه هيا وجهاد لوغيزون ...
مشاو لدار دخلو كاع دوك المشتريات غير حطوهم ورجعو خرجو . شدو الطريق فوجات عليهم سمية لي طلقات ليهم الشعبي غادين كيغنيو ويشطحو فالطوموبيل. اما نريمان مفوجة معاهم وفنفس الوقت قلبها مقبوط وحاسة بالغمة من فراق جهاد ومن الضروف لي كيدوز منها وحزنو على ولدو لي مزال ملقاه .. دخلو تعشاو فجو عائلتي كيتجمعو على الكرسي فين غيديروه وعلى السبوع. وعلى السفر لي غيسافرو مور رمضان لحسيمة حتا كملو عشاهم ورجعو شدو طريق لتطوان ..
بعد تردد وهيا شادة تليفون فيديها عاضة على شفايفها واش تصوني ولا لا ، تلفات لقات لورا نعسات ورجعت شافت فالتليفون ودوزات نمرتو كتصوني..
حل الخط وقال بصوت هادئ : وي حبيبة
ردت ببتسامة : لباس عليك كيف بقيتي
جهاد : شوية نتي بخير بعدا
ردت : اه الحمد الله امضرا لقيتي ولدك ولا مزال شنو درتو
تنهد بحيرة ورد
- مزال ملقيناه وحتا هيا مكيناش معرفنهاش فين زادت
سكتات ملقات متقول ومعرفات باش تواسيه فهاد المحنة وردت بالارتباك
- اا مم . ش .. شغادي نقولك الله يفرج عليك وربي يرجعو ليك بخير وعلى خير بالي معاك وملقيت ليك جهد والله ملي كنحل عيني صباح وو ( غلبوها دموع ) وواناا كنفكر فيك وتوحشتك بزاف هانا مزال دابا 2 ومقدرااش نعس يريت كن كان بيدي ندير شي حاجة
سكت مطولا كيسمع تنخصيص ديالها وقال
- المهم هوا تسمعي دابا الهضرة وتهلاي فراسك وفولدي لي عاد غيجي اوك ! غير سمعي الهضرة وصبري معايا فهاد المحنة راه راسي مبلوكي حتا خدمتي مقادرش نركز فيها ولا ندير شي حاجة
ردت بحزن : حاسة بيك اجهاد وعارفة هادشي لي كدوز منو ماشي ساهل الله يكون معاك انا غنبقى نصلي فالليل وندعي معاك والله كنحلف ليك حتا نبقى ندعي معاك ونطلب الله يفرج امورك فالقريب
شافت نريمان ناضت وهيا تشد عينيها وتقلبات على جهة خرا..
بدلات نريمان حوايجها ودخلات لبلاصتها كتردد.
دعاء فنفسها حتا داها آذن الفجر وصلات وزادت دعات عاد دخلات لبلاصتها منهكة طاحت طيحة وحدة...
صباح نهار جديد وهيا كتفطر وشادة تليفون فيديها صبحات على جهاد بمسج كتسول على احوال ... من بعد بقات كتخمم فالفكرة لي فبالها ومن مدة وهيا باغا تقوم بهاد الخطوة كانت كتمنى ديرها من مدة وقررت حتا تيسر امورها وتجمع شوية د الفلوس عاد توكل على الله وديرها...
دخلات الفيس وفاكبر تجمع نسوي لناس من الشمال طنجة تطوان ..
كتبات بوسط كالتالي
" سلام البنات مبروك عواشركم المهم المنطولش عليكم بمناسبة شهر رمضان الفضيل بغيت نقتارح عليكم واحد الفكرة طبعا لي قبلات بيها مرحبا شنو رأيكم نقومو بافطار الصائم فهاد الشهر الكريم ! ناس المتشردين فالزنقة نفرقو عليهم الفطور . والناس لي مفحالهمش نديو ليهم تقضية ديال شهر ؟ نعاونوهم واخا غير شوية واخا نقصمو معاهم فطورنا المهم ناخد اجر عظيم عند الله وفالعيد نشريو حويجات لوليدات اليتامى ولي معندهمش او نمشيو لخيرية نشوفو دوك الوليدات ! المهم منطولش عليكم انا نيتي حسنة وبغيت لي يشاركني فهاد العمل الخيري لي بغات توصل معايا مرحبا دخل عندي الخاص ونعطيها رقم ديالي ونطلقاو ونتفاهمو. #الأمر جدي بلا تفلية وشكرا "
وجمعاتهم فجروب واتساب دارتو هيا سجلات ليهم اوديو طويل باش يتفاهمو على كلشي. وفنفس الوقت كتسول شكون لي خدامة وشكون لي غادي تساهم طيلة هاد الوقت .. لقات اغلب البنات داخلين على والو ماهوما عندهم فلوس باش يعاونو ناس ما هوما يقدروا يخرجو معاهم فرمضان .. تنرفزات نريمان وخرجاتهم وكملات الحديث مع بنات خرين لي غادي يساهمو وغادي يتعاونو حددو الموعد فالغد فصباح يطلقاو وداكشي لي كان ..
صبحات نريمان على مسج لجهاد لي مزال ماجوبها من الليل دالبارح وباين انه مدخلش كاع الواتساب ولا وصلوه المسجات تشواشات كتر ولكن معندها مدير كيف قال ليها صبري عليا الا غبرت ...
لبسات حوايجها عبارة عن جلابة مخزانية فالاحمر فيها طريزة صغيورة فالصدر وسبرديلة بيضاء وشال مشكل بين الابيض والاحمر..
هزات صاكها حرفات بيه وخرجات بشوية عليها ويديها مرة مرة كتحطها على كرشها بخوف كتمشي بالكرام وخايفة بحالا الجنين غيطيح ليها .. طلعات فطاكسي ومشات لكافي لي دارت مع بنات يطلقاو فيها. عطاتهم موصفات اش لابسة كيف دخلات شافت 4 بنات جالسين كيشيرو ليها وكيتأكدو واش هيا. مشات عندهم ببتسامة سلمات عليهم وجلست معاهم بيدما يجيو بنات خرين. تعمرات القهوة ب 18 بنت لي عندهم الكلمة جلسو مجموعين ونريمان كتشرح ليهم اش يديرو وفين يمشيو وبدات كتسولهم واش عارفين ناس ضعاف ومحتاجين. كل وحدة كتهضر وكتعطي رايها ونريمان شادة ورقة وستيلو كتكتب ...
فالاخير سولاتهم على شحال يقدروا يساهموا...
كاين لي غيعطي 200 درهم وكاين لي 700 درهم وكاين لي معندوش وخدمتو على قد حال غيعطي غير 100 درهم المهم من هاد البنات كاملين حتا وحدة ما فااتت مساهمة ب 1000 درهم تنهدات نريمان هادشي مكافيش وخاص الزيادة... وبدات كتهضر مع بنات خرين واش غيساهموا .. ولكن حتا واحد معطاها كلمة صحيحة
الحاصول داخت نريمان معاهم ولكن مستسلماااش وقررت تزيد تبحث وتسول وتزيد بنات خرين وداكشي نيت لي كان بعدما رجعات لدار وهيا كتسول وصلها مسج جهاد
خداو شباكية بلا حساب والبريوات والمملحات وخلاو الفواكه وحليب والبقية للغد ،، هادا بالنسبة لفطور الصائم لي غادي يتفرق على ناس فالشارع...
ومشاو من بعد يتقضاو لناس لي معندهمش ومفحالهمش. تقضاو ليهم تقضية د شهر .. من طحين لزيت سكر تمر عطرية قطاني دجاج واللحم المعجنات الحليب كل ما يتحتاج شراو ل 20 أسرة
اما نسرين غادية جاية بطوموبيل من صالون لسوق وبنات كيساعدوها يمشيو معاها يطلعو داكشي ويرجعو يهبطو يرجعو لسوق يجيبو تقدية لي محطوطة 11 د ليل وهوما مزالين فالزنقة اما نريمان شافت الفلوس مكفااتش وزادت تيرات الفلوس من د جهاد وهزات 500 درهم من فلوسها هيا لي عندها وزادت شرات عمرو الكوزينة لي فالصالون بالتقدية وخناشي طحين ستفوهم وحدة فوق وحدة فبيت د التعليم ..
رجعات نريمان لدار بزز باش كتنفس وعياااء ملي دخلات وهيا فالطواليط كترض حتا تجرح حلقها خرجات كتنهج عند سمية وقالت
دخلات لبيتها حولات تصوني على جهاد ولكن لقات تليفون مطفي .. حطات تليفونها حداها حابسة الدمعة غا بزز حتا غفات
صباح الحال وصبح فمها ناشف الحرارة على صباح ناضت بعياء والخاطر مكاينش نسرين ولورا مزال ناعسين وسمية فالخدمة
جلسات على طرف دسداري كتدوز نمرة تصوني ولكن لقااتها مزال طافية.. تنهدات بحزن وضيق فصدرها وبعد تردد اتصلات ب اسيا المرة اللولة وثانية عاد جوباتها ببتسامة
- اهلا حبيبة ديالي
ردت بحزن : كيف دايرة اخالتي لباس عليك
- صافا حبيبة ونتي كيف دايرين مع نهار اللول فالصيام
بلعات ريقها بزز وردت : الحمد الله . خالتي بغيت نسولك كنصوني على جهاد وطافي تليفون مالو خالتي راه مرضت بالفقصة والله حتا عييت مبقيتش فهمااه
آسيا : راه ابنتي سافر لكندا تبع ديك الموصيبة لي بغات تعذبو وهوا حرام واش بغا يتنازل راه مغلغل غير بدلي ساعة بخرا حتا حنا راه كنصونيو عليه وكيقطع علينا راه خبارو كتوصلني غير من عند روبن اما هوا والله يا بنتي مكيعاود ليا شي حاجة
تنهدات بضيق وقالت : دابا مغاديش يجي ياك غيبقى تما
ردت : والله ماعرفت المهم ديك ساعة باش ما كان نعلموك صافي غير ردي بال راسك
ترددات نريمان بغات تخبرها بالحمل ولكن سرعان ما سكتات وانهت المكالمة ،،
جلست كتخمم فحيرة وصدرها ضايق عليها الغمة تجمعات عليها...
بغات تخفف شوية وناضت توضات وحلات القرآن كتقرا حتا آذنات الضهر عاد صلات بزز. وخرجات هيا ونسرين يبداو فالعمل ديالهم الخيري.. شدو طاكسي نيشان لصالون دخلو وجلسو كيتسناو البنات حتا جاو عندهم تقسو البنات على جوج فئات .. فئة
بداو كيحلو بواطات دالاكل وكل واحد كيديرو ليه الفطور ديالو وفئة أخرى مشاو يشريو لي باقي من الخبز والديسير والحليب الخ... وحتا من حريرة غير شراوها بحكم سمية خدامة اول اسبوع بالنهار ومغاديش تقدر توجدها ..
قربات توذن المغرب وخرجو كلهم تفرقو . كل 5 دالبنات شدو جيهة ..
اما نريمان مبقاتش قادرة توقف ولا حتا تحل عينيها طاح ليها طونسيو وبزز باش كتنفس وحتا صيام غالبها
خلاتهم كيفرقو لناس لي فشارع ولي معندهم باش يفطرو وشدات الطاكسي رجعت لدار ترتاح
ودنات المغرب وتجمعو على طبلة دالفطور غير نريمان وسمية اما نسرين بقات مع البنات.
دخل عندها الطبيب بطبلية بيضاء وقف جنبها كيطمئن على حالتها وممرضة كتعبر ليها الطونسيو ..
كتب ليها الدواء ومنع عليها تصوم فهاد الفترة حتا ترتاح...
خرجات من تما وسمية شادة فيديها لقاو نسرين عاد جاية لعندهم شدات فيها حتا هيا وطلعوها فالطوموبيل رجعو لدار مع آذان المغرب .. كلات معاهم شوية وتكات على سداري حداهم كتفرج معاهم فالتلفازة حتا رن تليفون ديالها وناضت لبيتها كتحل الخط..
ببتسامة : جهاد
رد بفرح : حبيبة ديالي صافا
نريمان : بخير وانت
جهاد : مخرجتيش بعدا ياك
ردت بالارتبااك معندها مدير اكيد متقدرش تقوليش اش طرا..
- لا انا غير فدار وانت شنو درتي .
رد بفرح : انا نصيفط ليك واحد لافوطو دخلي تشوفيها.
نريمان : واخا
قطعات ودخلات الواتساب وهوا يرسل ليها صورة جالس على فوطوي بصدو عاري وشورط قصير وولد صغير بليكوش منعسو على كتفو وموراه الزاج كيفصل بينو وبين الشارع فاقامة عالية كيبان موراه المباني عالية ونهار مزال عندهم ..
سكتات للحضة كتسمعو كيهضر مع ولدو ومعاها وكل مرة يصيفط ليها صورة مع ولدو هاهوا معنقو هاهوا كيبوسو هاهوا هازو فوق راسو هاهوا كيوكلو . عمر ليها تليفون بتصاور
ولكن كيبقى ولد مرا خرا ورابط مشترك بين جهاد وديك المرا...
ضاق صدرها اكثر وطفات الكنكسيون وهوا مزال كيصيفط ليها تسجيلات صوتية لوليد وهوا كيبجغط وجهاد كيهضر معاه. خلاتو كيصيفط وطفات الكنكسيون جلسات كتبرد على خاطرها بالبكااا وفينما تجي صورة ديك الوليد فبالها كتسوط بغضب والعافية شاعلة فيها
حطات يديها على كرشها كتخمم فهاد الحمل واش جهاد غيفرح ليه ! واش غيفرح بولدو ولا بنتو بحال بولدو ...
واش غيهزو ويلعب معاه بحالو ! واش غيعطيه حقو ولا
بداو التخيلات والوساويس يدخلو لنريمان من جديد...
ولكن رجعات كلما كتحس بالضيق والقهرة كتنوض تريح راسها بقرأة القرآن حتا كتهذن
وهادشي نيت لي دارت بقات كتقرا حتا غلبها النعاس..
3 ايام وهيا فدار غير ناعسة مخليا نسرين هيا كتمشي مع البنات يفرقو الفطور ويفرقو قفة رمضان للأسر لي معندهومش..
الخاطر لي يجاوب جهاد على مسجاتو مكااينش وحتا مكالمات والو باغا غا تنعس باغا غا ترتاح وميبرزطها حد ... بزز باش تحل عليه الخط يلاه كتهضر شوية وتقطع عليه بالخصوص ملي كتسمع صوت ولدو حداه كيغوت ولا كيهضر ... فبلاصة كتقطع واخا كيعاود يصوني مكتهزش عليه ..
15 يوم دازت فرمضان ..
ايام روتينية عند نريمان لي غير نعاس والخاطر مكااينش ولكن شهية محلولة جالسة وتاكل ناعسة وتاكل واقفة وتاكل..
فكل مرة تشهى عليهم حاجة جديدة بغيت هادي... قطعولي هادي... طيبولي هادي ... مدو ليا هادي ...
كيف كيفطروا ويصليو كيلبسو حوايجهم ويخرجو بحال جميع الناس لي كيخرجو مور الفطور
مرة يجلسو فكافي ، مرة فجردة و مرة يخرجو يفطرو فالبحر حتا يتنصص الليل ويقرب الصحور ..
اما جهاد مبقاش كيلحق يهضر معاها ولا يسول فيها. حيت مبقااتش كتجاوب على اتصلات ديالو وحتا ملي كتخرج كتخلي تليفون فدار كيبقى يصوني حتا يقطع بدون مجيب ...
وحتا ملي كيسول فيها وتجاوبو يلاه تهضر معاه شوية وتقطع وتبدا تبكي بلا سبب او تقطع عليه وتخليه كيغلي بالفقصة حتا رجع هوا براسو مكيصوونيش ولا كيسول فيها خبارها كيجيبها غا من عند نسرين لي كيتواصل معاها فالانستا ديالها ويسول على احوالها وشنو كدير وعلاش معصبة..
رجعت كتاكل وتفرج فالفيديوات وضحك ومرة مرة دخل تجاوب على مسجات لي كيجيوها وترجع تكمل الفراجة ...
صباح نهار جديد صبحات فيه مخصرة ومقدراش تصوم .. رمضان كامل صامتو مقطع كاين نهار لي كتقدر تصوم فيه وتكملو بزز وكاين نهار لي من صباحو مكتقدرش وكتفطر.. بحال نهار 27 فرمضان شربات كاس د الحليب وشوية دالفريز وخرجات مع البنات طلقاو فالقيصرية وبداو يقلبو حويجات دالدراري وكسيوات د البنيتات ولي زاكسيسوارت دالبنات وصببيبطات وصنيدلات حتا قربات المغرب تودن عاد تفرقو كل واحد مشا بحالو .. والاغراض بقاو عند نريمان حتا يفرقوهم فاليوم موالي....
طلقاو من جديد وتفرقو لمجموعات كل وحدين فين مشاو يفرقو على وليدات حتا كملو ..
ومشات كتفرق على ضعفاء وعلى لي كيبيعو حاجيات البسيطة فالاسواء بعدما كملات دازت المسجد حطات فيه 200 درهم وطلبت من المأذن يدعي معاها فديك الوقفة دالمغرب ..
ورجعت بحالها لدار
ليلة دالعيد هزو سطولة ديالهم وحوايجهم ومشاو لحمام ..
جبدات نريمان مرايا من صاكها كتشوف وجهها وبدات كتجبد المكياج وتقادد من جديد هزات نعيمة حطاتها فوق رجليها جاتها تقيلة حيت كبرات ورجعت حطاتها بين رجليها وهيا مكمشة حدا الباب.. حتا وصلو الحسيمة ايييه يا ليام
سينين هادي محطات رجليها فيها شحال من حاجة تبدلات والاراضي لي كانو خاويين هاهوما ولاو عمارات وديور على شارع بعدما كانت غا الارض خاوية بحال شي جبل ..
مشات كتسارا بعينيها وتذكر كل مكان دازت منو حتا وصلو لدار جداتها كانت دار من 4 طبقات دار كبيرة طلعو فجوج دريجات وصوناو هبطات بنيتة كتجري من الفوق عنقات نريمان هيا اللولة ومشات كتبوس المعزة ديالها ..
حوار كان بالريفية
هبطات مرا العمر ديالها قد سمية كانت مرت خال نريمان وبنت اخرا كانت بنت خالها
طلقاوهم بالسلام كيرحبو بيهم ويباركو. لعيد.
وطلعو لطابق الثاني كانت الجدة جالسة طاوية رجل وطالقة رجل واشمة جبهتها بين حواجبها وفالذقن ديالها ويديها بجوج موشومين وتسايح فيديها لابسة قفطان بيض وشال بيض وجهها بيض منور غا شافتهم طالقين وهيا تنوض بصعوبة باغا توقف تسلم عليهم . تقدمات عندها سمية بعناق حار كتبوس ليها فيديها وراسها وكدالك نريمان عنقاتها كتبوس فيها والجدة كترحب والدموع فعينيهاا سلمات نسرين وكدالك لورا لي كلهم كيشوفو فيها ببتسامة اكيد عرفوها شكون هيا مرات اشرف
سلمات عليهم كيفما شافتهم كيسلمو وجلست معاهم فصالون بلدي من داكشي غير جالسة وساكتة مكتفهمش هضرتهم ولا علاش كيهضرو. اكتفت تشوف قدامها وتبقى غير ساكتة وفينما تهز راسها وتشوف شي حد كيشوف فيها كتبتاسم فوجهو وترجع تهبط راسها.
دخل الخال الاول وناضت نريمان عنقاتو وهوا ميرحب بيها ويبوس ليها راسها ويطلب منها السماحة .. دخل الخال اخر لي حتا هوا ساكن فوق منهم هوا ومراتو هبطو سلمو عليهم وجلسو مجموعين
هزت الجدة يد نريمان حطاتها على رجلها شداها بقوة وقالت بحزن بالريفية
سمح لنا ابنتي سمحلنا بزاف حنا كلنا غلطنا فحقك كلنا ويلا مسمحتيش لنا معندنا فين نديرو وجهنا مع الله امصاب ابنتي وكون كنا نقدرو على كلمة د جدك . هوا لي مبغاش امك تجيبك هوا لي حرمنا منك وحنا ملقينا جهد ملقينااش ابنتي ملقيناش
مي لالة انا مسامحة لكلشي شكون ما كان سمعتي انا مسامحة لجدي واخا عمرني شفتو ولا عرفتو حتا كيف داير انا مسامحة ليه والله وقلبي صافي من جيهتو وحتا نتي الله يسامح دنيا واخره. وحتا ماما انا مسامحاها وحتا هيا بغيتها تسمحلي حيت وقفات معايا وتمحناات معايا بزااف لا ف اسبانيا ولا هنا
وسعاد شتي واخا كاع داكشي لي دارت ليا
والله حتا مسمحاهاا من قلبي وفضيلة الله يسامح ليها دنيا واخره واخا عيشاتني فالويل واخا مقدرتش نسى عذابها ليا ولكن الله يسامح ليها والله يرحمها. واخا مشيت شفتها نهار كانت معدومة وكنت حاقدة عليها ولكن ملي رجعنا لرباط وسمعت بلي ماتت والله حتا ضرني خاطري ونضت صليت ودعيت معاها وقلت الله يسامح ليها دنيا واخره ومن قلبي امي لالة من قلبي كنقول هادشي
كلهم ناضو يبكيو وتأثرو حتا جوج بنيتات صغار ناضو يبكيو وكلهم كيطلبو المسامحة من نريمان. دخلو جوج خوالتها بعدما عرفوها جات وطلقاو بعنااق حار والزغاريت على الجهد والبكا ودموع الفرحة
حنات الجدة على ركبيها وشدت رجل د نريمان بغات تبوسها وهيا تخطف رجلها وعنقاتها بالجهد كتبوس ليها فراسها وتردد :
والله حتا مسامحاااكم بالعكس قلبي صافي من جيهتكم امي لالة صافي عفااك باركة من البكا
ردت كتنخصص : صعيب ابنتي صعيب هادشي مكناش حاسين بيه لا حول ولا قوة الا بالله ياربي تسمح ليناا ياربي
حتا واحد معارف الحمل د نريمان من غير سمية والبقية بعدما حطو ديسير فينما تبان ليهم شي فريزة يهزوها ويحطوها لنريمان اما نسرين كتخطفها من حدا خالها وتمدها ليها....
عاد فرشو ليهم فبيت ضياف نعسو فيه اما سمية باتت مع امها
صباح نهار جديد مشمش الجو رائع .. كاين لي مصبح على البحر غادي يتبحر وكاين لي غادي للعمل اما نريمان كيف فطرات ناضت لبسات حوايجها وخرجت بوحدها واخا بغات نسرين تمشي معاها ولكن مبغاتش .. شدات طاكسي نيشان لروضة..
غير دخلات لحم ديالها شوك عليها ودموع تغرغرو فعينيها.. بدات كتقلب بعينيها على القبر ولكن ملقاتوش حيت المقبرة عمرات بزاف على لي كانت .. سولات واحد الفقيه كيقرا تما وناضت بدا كيقلب معاها وهيا كتنعت ليه بلي القبر فيه رخامة قهوية ومكتوبة فيه اسم زياد...
كان تلف مع مقابر وبعدما قلبو لقاوهم وقفات نريمان حدا القبر عينيها كيدمعو والجسم ديالها كيترعد سنانها كيتقرقبو وهيا كتشوف فقبروا. لي دازت عليه سنين طويلة مشافتو ولا زارتو...
توحشتك بزاف ازيااد توحشتك اخويااا العزيز توحشتك انفسي وحياااتي توحشتك اعمري واغلى ماا عندي توحشتك بزاف ( كتنخصص ) سمحلي بزاف مجيتش نترحم عليك سمحلي بزاف هاد المدة كلها مجيت نزور قبرك ولكن منسيتكش والله منسيتك كل جمعة كنقرا عليك القرآن والله وفينما نصلي كندعي معاك وكندعي ربي يصبرني . شفتي اخويا واخا نفرح ونضحك ولكن غصة كبيرة مزال فقلبي مقدرتش نصبر عليها هيا فراقك . صعيب اخويا فراقك صعيب توحشتك بزاف
تنهدات وهيا كتنخصص وقالت
خويا انا تزوجت والحمد الله تيسرات ليا اموري وسافرت بزاف ومكرهتش لو كنتي معايا والله ما كرهت لو حتا نتا سافرتي معايا وشفتي معايا بلدان خرين كنتي غتفرح بزاف والله. عرفتي كنت غنداويك والله كنت غندير جهدي الحبيب ديالي باش تشافى وتكون معايا ونكبرو مع بعضياتنا
عنقاتها سمية بقوة وجداتها حتا هيا كيشوفو فيها بالآسى..
اما سمية ندمات على حياتها ندمات لي خلات ولادها وسمحات فيهم ندمات لي حرماتهم من الحنان وخلاتهم معذبيين فيدين ناس مفقلوبهم رحمة .. بعدما هدنو نريمان ورتاحت حطو الغداء وتجمعو من جديد كيتغداو فجو عائلي..
جلسو على براد د اتاي مور الماكلة حتا تعشات العشية..
بعد تفكير طويل ناضت نريمان لبيت بعدلات حوايجها حيدات بيجامة ديالها ولبسات كسوة صيفية مبردة طويلة بلا كمام لبسات فوق منها كاب خفيف مبرد بيدين واسعين قدات شالها قدام مرايا وحطات كريم لوجه . هزات صاكها وخرجات كتلبس صندالتها. شافوها خارجة وناضو يسولو فين غتمشي ردت وهيا كتشد بزيم صندالة
تلفتات هبطات مع الدروج .. خرجات وشدات طاكسي عطاتو العنوان وحطها فشارع كبير فحومة شعبية نزلات من الطاكسي كتشوف كلشي تبدل وكلشي تجدد كانت غا الارض ودابا فيها شوارع... كان غا الخوا ودابا ديور والعمارات وحتا زناقي كانو مهمشين ولكن تصلحو . وديور كانو غا بالسيما من برا دابا كلشي مصبوغ وكل واحد حاط محابق حدا باب دارو .. تبدلات الدنيا والجو رجع حسن من لي كان . وهيا غادية كتمنضر وتشوف ودخل بين زناقي حتا وصلات ودق قلبها دقاات متسارعة وهيا واقفة حدا الدار لي كبرات فيها وشافت فيها الويل حتا هيا تبدلات وزادت تبنات وتصلحات من برا.. وحداها جوج محابق كبار حطات يديها على صدرها لي كيطلع وينزل بقوة كتنهج من الداخل ديالها والخوف متالكها فديك اللحضة... قربات من الباب ببطئ وحطات يديها على صوني صونات وحذرات راسها حتا سمعات صوت مرأة من لفوق قالت
- شكون ؟
ردت وهيا مكتبانش واقفة حدا باب
- قريب هبطي
سمعات صوت هابط فالدروج وكيشعل الضو وهيا توخر لور بخوف فديك اللحضة مكرهاتش تمشي بحالها قبل ميحلو باب .. ولكن سرعان مشجعات راسها وبقات واقفة حتا حلات الباب هيا نفسها منى مرات امين لي غلاضت لابسة بيجامة صيفية وجامعة شعرها لفوق بقراصة. غير شافت نريمان وبدات تحقق فيها
فايت ليا شيفاها فشي بلاصة ولكن فين !! شكون هادي...
سرعان متذكراتها وحلات يديها كتسلم عليها وترحب بيها اما نريمان غير حادرة راسها من شدة الخجل...
شدت الباب وهيا تقول نريمان بتردد
- سمحيلي عفاك نسولك
منى : اه اختي شنو !
ردت بالارتباك : بغيت نسول على بابا واش كاين هنا فدار ! حيت شحال هادو كنت سمعت بلي رجع لدار ملي ماتت فضيلة
حركات منى راسها وقالت
اه ها هوا عايش هنا هاهوا سفلي ديالو مشدود دابا وقيلة راه خدام
جيت نشوفك حيت توحشتك بزاف وعقلتي شحال من مرة صونيت عليك بريفي ؟ وكتحل عليا الخط المهم كان عندي نسمع صوتك كيقول الو انا راه ماشي نسيتك ولا مبغيتش نجي نشوفك كيفما كان الحال غتبقى بابا
رد كيتنخصص : فين الوجه باش نشوف فيك ولا حتا باش نسول عليك فين .. انا اصلا مبقاليش وجه لا مع الله ولا مع العبد طيش صغر فين وصلنا مبقينا عارفين راسنا من رجلينا ندمنا ومنفعاتنا ندامة مكرهناش نرجعو بزمان اللور ونعوضو لي فات ولكن بكا مور الميت خصارة . انا عارف راسي منستاهلش نكون اب وعارف راسي يهودي وشماتة حيت كن كنت راجل غنبقى شاد ولادي ولكن ...
وهوما كيديرو كسكروط طلعو لسطح فرشو فيه الزربية كبيرة ومخاف وجلسو يتبردو اما نريمان حلت لتليفون ودخلت تشوف اش كاين لقاتو مصوني عليها وشداه بواط فوكال كتبات ليه مسج بعصبية وصيفطاااتو ليه...
ماهيا الا جوج دقايق اتصل بيها وناضت من حداهم هبطات لتحت تجاوب
- نعم
زفر بغضب وقال : شهاد التبرهيييش هادا مالك كديري غا لي فراسك واش انا هضرتي زايدة ناقصة عندك ولا ! قلنا ليك متمشيش لديك دار ومشيتي زعمة ضد فيا ولا شنووو
ردت بهدوء : مشيت شفت بابا اجهاد فين المشكيل !
غوت على حر جهدو ورد :
ومتمشييييش لديك الدار د ***** واش مكتفهمييش ولا عاجبك تشوفي داك ال*** لي تما قلت ليك متمشيش هيا متمشيش باك غتشوفيه خرجي برا وشوفيه ولا عيطي ليه وشوفيه
ردت بحدة : معندكش الحق تجي تقولي فين نطلاقى بابا. غنمشي لدارو ولا نتا ولا غيرك غيحبسنيي بزاف على هادشي ديالك نتا
جهاد : معنديش الحق !! هيا انا غير زايد عندك وقيلة ياك و...
قبل ميكمل كلامو قطعات عليه وعودات طفات تليفون من جديد مرضااتش يغوت عليها بديك الطريقة
رجعات طلعت عندهم لسطح جلست معاهم وجهها مبدل غير كتشوف حداها وساكتة واخا هوما كيشاركوها فالهضرة كتجاوب بالقياس وترجع تسكت.. تعشاو فالسطح فجو مبرد وبقاو تما مكملين على جمعية ديالهم تنصص الليل عاد هبطو كل واحد شد قنت ينعس...
صباح الحال وصباح نهار جديد...
فطرو فيها العائلة وناضت سمية ونريمان ولورا ونسرين يجمعو حوايجهم باش يرجعو بحالهم ولكن منعووهم ميمشيوش حتا يتغداو بزز باش بقاو ومباشرة كيف تغداو شدو طريق لتطوان. وصلو حتا ليل شراو اكل جاهز ومشاو دخلو لدار تعشاو وطاحو نعسو من شدت العياء..
صباح نهار جديد صبحات فيه نريمان شادة تليفون فيديها كتهضر مع آسيا لي صبحات مصونيا عليها. وعلماتها بلي من دابا جوج سيمانات غيديرو العرس فكازا .. ونريمان خاصها تجي اسبوع بقبل باش توجد راسها وطبعا حتا الام ديالها والبقية كلهم يجيو
داز ديك النهار غير فالهضرة جالسين فدار كيخططو بيناتهم صباح جديد . كرات فيه نريمان كاميو وجابتو حتا لدار لي كاريين فيها عطاو لزهرة سوارتها وتوادعو معاها واخا سلامها وتعاملها معاهم ناقص ولكن بقا فيها الحال ومسخاتش بيهم ..
هزو رحيل وخرجو برا كيسلمو على جيران لي ولفو بيهم ولي رجعو بحال العائلة ديالهم....
واخيرا خرجو من دار ركبات نريمان وسمية مع مول كاميو ومشاو لصالون هزو رحيلهم لي تما من حوايج لمطريال لبلاكات لي معلقين حتا محيبقات صغار لي حطاهم فالسراجم هزاتهم مرايات كلشي خلات الصالون كيصفرر.. عطات لمول العمارة ساروت ديالو . وهبطو ركبو مع مول الكاميو نريمان وسمية اما نسرين شدات طريق هيا ولورا فالطوموبيل وشدو طريق لطنجة
حطو رحيلهم فطنجة بعدما شافو 3 درجال هزو ليهم رحيل والمطريال تقيل طلعوه ليهم حتا لدار. دخلات سمية كتشوف فدار وتشوف فالفراش بالاعجاب عاجباها الدار وديكور والاثات لي فيها ...
كملو ليهم رحيل كامل دخلوه لداك البيت لي خاوي جنب الكوزينة.
اما فوطويات ديال صالون حطوهم حتا هوما فصالة يجلسو عليهم ...
تمارة كحلة دازو منها ناضو كلهم دوشو وحدة مور وحدة خففو من تعب طريق. وخرجو فليل تعشاو برا وكيضورو فالكورنيش ديال طنجة حتا تنصص ليل عاد رجعو ...
3 ايام دازت وهوما كيوجدو فيها كل نهار خارجين يشريو حاجة جديدة لنريمان يزيدوها على داكشي لي شراو قبل رمضان . عمرو ليها جوج شوانط جداد... وبداو يوجدو حتا لورا لي صيفط ليها اشرف الفلوس بعدما خدم وتخلص. وزادت نريمان جبدات من فلوس جهاد. كتشري ليها حويجات وحمالة وليكوش مخلاتها مخصوصة من حتا حاجة...
وطيلة هاد الفترة الكلام بين نريمان وجهاد مقطوع. لا هوا يصوني ولا هيا هزات تليفون تسول فيه ولا تعرف سبب ديال هاد الغبرة ...
داز اسبوع وجات فيه ريم هيا وبنيتة ديالها حتا لطنجة باش يديو نريمان والعائلة ديالها . ديك اليلة تعشات معاهم وباتت معاهم وصباح كيف فطرو ناضو هزو حوايجهم وشوانط ديالهم وخرجو كلهم طلعات سمية فطوموبيلتها هيا ولورا . اما نريمان طلعات قدام ريم ونعيمة ونسرين وبنت ريم لور. شدو طريق لكازا وسمية تابعة طوموبيل د ريم. حبسو تغداو فالطريق. عاد ناضو كملو طريقهم حتا وصلو فالعشية...
بالزغاريت وصلاة على نبي رحبو بنريمان طلقاوها كلهم فالباب.
من خوالات جهاد وعماتو وبناتهم رحبو ب امها واستقبلوها احسن استقبال. وضيفوهم فالصالون عصري كبير كيفصل بينو وبين الجردة الزاج من الارض حتا لسقف كتبان ليهم الجردة غير من باب..
ڤيلا واااشمن ڤيلا ملي دخلات سمية وهيا كضور عينيها وتشوف باعجاب وعينيها مع اسيا وبناتها ريم وريهام لي معنقين نريمان وكيسولو فيها مضورين بيها بحال الاميرة وهيا فوسط منهم وجوج بنات لابسين طابليات بيضاء خارجين من الكوزينة هازيين السنية حطوها بتاويل وحطو طباسل والبلاطويات بالادب وحتا كلامهم بأدب تجمعو على الطبلة وفرقو طبيسلات قطعو كيك بالاكريم فرقوه على الجميع. وبداو يضورو الحلوة ويكبو العصير وكل مرة يضورو عند نريمان يسولوها واش بغيتي شي حاجة واش نجيبو ليك شي حاجة.
هيا براسها تفاجئات بهاد التغيير وهاد الترحاب لي مكانتش مولفة بيه ولا عاشتو فزواجها الاول مكانتش حتا حاسة براسها واش عروسة بالخصوص مكان حتاا واحد عاطيها القيمة محسبينهاش كاع واش كاين ولا مكيناش. اما دابا صغير والكبير باغيها وباغي يجلس معاها ويجبد معاها الهضرة ..
الايام كدوز طايرة وهوما كل نهار فين مخرجين نريمان نهار يتقضاو ويشيريو ليها الامور لي غتخصها فزواجها واخا شرات وففات ولكن هوما ضوبلو داكشي وشراو غا لي مارك وغا الرفيع والغالي ..
كملوها ليها بحمام فاعل تارك ودوزوها لاحسن صالون قادات فيه الحالة من راسها لرجليها من ضفيرات رجليها حتا لشعرها. ماهيا الا 3 ايام ويكون العرس الاسطوري ف افخم قاعة الحفلات بمدينة الدار البيضاء ..
بطلب من نريمان طلباتهم تزيين ليها جوديا معرضوش ولباو ليها الطلب ديالها اتصلو بيها وهضرات معاها نريمان وطلباتها تجي تزين ليها فعرسها. اما جوديا من شدة الفرحة بكات حيت نريمان مبدلاتهاش ولا ختارت شي وحدة خرا ..وحتا جوديا بلاما تردد قبلات تجي وبالفرحات عليها...
اشرف حتا هوا وصلات طيارتو فنفس اليوم لي وصل فيه جهاد طلقاو فيه فالمطار وتسالمو بعناق حار وخرجو من تما طلعو فطوموبيل ومشاو لدار نيشان
دخل اشرف هوا الاول وتليفون فيديو كيصوني على لورا غير شافتو وهيا تنوض بكريشتها الصغيورة بزز باش كتمشى حتا لعندو وعنقاتو بقوة بقا كيقلب بعينيه على سمية حتا شافتو وناضت سلمات عليه فالباب. حشم يدخل عند نريمان فداك المجمع د العيالات وناضت اسيا من بلاصتها سلمات عليه ورحبات بيه ودخلاتو لعند ختو وعينيه فالارض هز ليها ليزار على وجهها وباسها فجبهتها. وتعانقو ويديها مفرقين باش متقيصوش بالحناء.
رجع خرج وخرج معاه لورا .. وفديك الاثناء دخل جهاد لابس سروال دجين وتيشورط لاسقة على لحم كيبانو عضات يديه وتفاصيل جسمو فاللون الاسود وكسكيطة فوق راسو فالاسود تلفت شاف جيهتها بنص عين وقلب وجهو كيسلم على خولاتو وعائلة
من تحت ليزار المشبك هزات عينيها شافت غير ضهرو وجنب وجهو كيسلم ويضحك مع عائلتو ...
مباشرة طلع بحالو لفوق
رجعات هبطات عينيها كتشوف فالحناء وتبتاسم فوجهوه الناس لي كيشوفو فيها ،، حتا نشفات ليها الحنااء وكرطوها ليها واسيا جمعات ليها داك الفتات حيداتو هيا وسمية
وبنات كلهم هازين يديهم بالحناني ...
تفرقات الحلوة وتاي وكل ما يتشهى الانسان امصاب غا تاكل بوفي طويل نوض وهز راسك اش بغيتي ولي حبات خاطرك وبنات بلباس رسمي كيتسخرو ويشوفو كل واحد اش خاصو..
شافتو مزال اون لاين ولكن مدخلش المسج ديالها دازت 15 دقيقة كان خرج من واتساب ورجع دخل من جديد وماشاف مسج ديالها مرد عليها تعصبات ومعجبها حال وهيا تعاود تكتب ليه
زعمة اون لاين ومكتجاوبش ! اوك سمحلي وقيلة كنبرزطك
صيفطاتو وبقات قارصة واش يجاوب ولا لا ضورات وجهها لدروج لقاتو هابط بلباس جديد سروال اسود وقميجة فالكري لاسقة مع لي زابدو حال جوج صديفات شعرو كيلمع باين عاد دوش شاف فيها بنص عين وخرج مع باب
رجعات شافت فالمسج لقاتو شافو ولكن مجوبهاش خلاها كتغدد فبلاصتها...
عشاو الناس الحاضرين ولي غيمشي بحالو ناض يمشي ولي غيبات مشا ينعس ولي سهران مزال شادة القصارة فالجردة.
انا نريمان طلعوها لبيتها لي هوا بيت جهاد بالزغاريت دخلوها وحيدو ليها داك ليزار لي فوق راسها عاد تنفسات بارتياح كان متقل عليها خرجو وخلاوها بوحدها كتبدل حوايجها وهبطو بحالهم شافت راسها فمرايا كبيرة بديك القفطان وناضت حيداتو دخلات الحمام حيدات دو بياس وخدات دوش خفيف غير لحمها اما شعرها جمعاه بمقبط لفوق ...
نشفات لحمها بفوطة وخرجت بينوار هزت لاتخوس كبير بحال سامسونيط جبدات منو كريمات داللحم بدات تخوي فيديها ودهن لحمها هزات زيت معطر خاص بالمنطقة الحساسة كبات شوية فصبعها ودوزاتو تحت منها
وهيا فوق النموسية تذهن وتشم ريحة كملات ذهنات تحت صدرها وتحت الابط ديالها. عاد لبسات دوبياس جداد مشبكين لبسات فوق منهم شوميز بيضاء وبينوار ديالو .. سرحات شعرها بمشطة وضفراتو ضفيرة خفيفة. كحلات عينيها ودوزات كلوس على شفايفها عاد مشات دخلات لبلاصتها هازة تليفون فيديها. كمشات حواجبها بغضب زعمة علاش مجوبنيش ! معامن يكون كيهضر ... واش غضبان ولا مالو ... واش مغاديش يجي !
وحتا هوا ملي مجوباتوش زاد تعصب كتر وناض من حداها دخل لحمام سمعات الماء مطلوق وجرت عليها الغطاء بقات ساكتة كتخمم حتا خرج لاوي عليه فوطة حيدها ولبس شورط ديالو وهيا عاطياه بالضهر... طفى الضو وخلا غير فايوز مشعولة .. نعس على ضهرو حاط يديه على راسو كيشوف فالسقف ،، اما هيا ضارت لعندو لقاتو مزال كيسوط معصب بقات مركزة فملامح وجههو باعجاب وشوق للحضة هزات راسها حطاتو على صدروا ويديها حوطاتها على خصرو عنقااتو مدار حتا ردت فعل ومتحركش من بلاصتو اما هيا هزات عينيها فيه شافتو مزال معصب وقالت بصوت رقيق
- معصب مني ! صافي سمح ليا
مجوبهاش وبقا على نفس الحال وهزات راسها حطاتها على كتفو وانفاسها كيضربو فعنقو
همسات فوذنو بتتقااتل وقالت
توحشتك بزاف ،، توحشتك
زادت تمخشات فيه كتعنق فيه حركات فيه الغريزة خلاتو كيسرط ريقو بصعوبة مقدرش يقاوم وهيا كدوز يديها على صدرو وتهبطها حتا لخصرو .. محسش براسو حتا تلفت لعندها وشد ليها دقنها بقوة كيقبل فشفايفها ،،
وحتا هيا تحركات فيها الرغبة وبدات فتجاوب معاه بقبلات ساخنة متتالية خلاتهم يتجردو من جميع ملابسهم ويعبرو على احاسيسهم بكل حب فوق فراش الزوجية
بعد علاقة لي نوعا ما متعبة بالنسبة لنريمان لي كل مرة كتحس فيها بوجع وحريق من تحتها وكتبغي تنهي العلاقة دازت بصعوبة وخلاها ترتاح وهوا معنقها كيقبل فيها من شفايفها هابط مع عنقها حتا لصدرها لي خلاه ليها طايب...
شافت فيه بتعب وقالت : فين خليتي ولدك !
رد كيشوف فيها ببتسامة : خليتو ف امريكا مع مرات صاحبي مع ولدها صغير
حركات راسها بالايجاب وردت
وعلاش مجبتيهش معاك
رد : كنت بغيت نجيبو ولكن مكيبغيش يمشي عند شي حد وخاصني نبقا غير هازو خليتو حتا نمشيو ان شاء الله
نريمان : وعاودلي شنو درتي مع هاديك وفين لقيتوها
رد بتعب : خليناا من داكشي دابا واجي قوليلي
خشا يدو تحت الغطاء حطها على كرشها كيداعبها وهيا مكمشة رجليها وقال
لبسات دوبياس وفوق منهم قفطان خفيف خضر نشفات شعرها من الماء ولوات شال على راسها. سمعات الدقان فالبال ومشات حلت لقات ريهام وخولات جهاد بجوج جاو موراها يهبطوها.
خرجوها بالزغاريت مهبطينها فالدروج وهيا كتشوف الحضور والناس لي باتو تما كيزغرتو عليها من لتحت. شي جالس فالصالون الكبير وشي جالس فصالة لي قبالت الجردة وشي داخل وشي خارج..
دخلوها لصالة وحطو ليها فطورها وتشاركو معاها العائلة الفطور على نغمات الشعبية والشرقية. ناضو يشطحو وجرو معاهم حتا نريمان لي مكتقدش تشطح بزز باش كتوقف. واسيا شادة فيها باغا تشطحها بزز. فديك الاثناء كان داخل جهاد وشاف بنص عين كيشطحوها وهوا يخرج عينيه فيهم شاف ف ريم شير ليها بيديه خرجات عندو لجردة ورجعت لعند اسيا وشوشات ليها فالوذنيها حركات راسها وخرجات لعندو يلاه وقفات حداه وهوا يخرج فيها عينيه
- شكون قالكم تنوضوهاااا تشطح !!
بالاستغراب : وعلاش اش فيها راها عروسة زعمة ونهارها تشطح وتفرح فيه
رد بصرامة : ومتنوضضضش متشطحححش راها حاملة طرا ليها شي حاجة نتي مسؤولة
حلت عينيها على كبرهم وقالت من هول الصدمة
حاملة !!! وحنا باش غنعرفوها حاملة ايمتا حملات امم تا ...
رد : وصافي تجلس متشطحش قوليلها تجلس.
سمح فيها ومشا لباركينغ فين كاينة طوموبيلتو طلع فيها وزاد...
فرحات ولمعو عينيها من فرحة وقالت : واخا كيف تقرب توصل صوني عليا
قطعات المكالمة وتكات على فراش ترتاح ويديها على كرشها كدوزها عليها بحنان وهيا فقمة السعادة ..
حتا دخل عليها جهاد هاز كومبلي اسود فيدو باقي فالميكة ديالو والعلاقة دخل هزو بين يديه حتا لدريسينغ علقو فالبلاكار.
ناضت من بلاصتها ومشات لعندو كتجر رجليها شافت فالبدلة وقالت
- واووووو كيحمق غيجيك واعر
مردش عليها علقو وتلفت لور يخرج وهيا تشد فيه
- مالك مكتهضرش معايا !
شاف فيها عاقد حجبانو ورد بصرامة
حتا تحاولي وديك ساعة نهضروا
ضحكات على تخنزيرة لي داير وردت
وغير كنضحك معاك ههه اويلي كتيق دغيا حنا عودنا تزوجنا وانا عاد غن..
حطات يديها على كتفو وهيا كتكمل هضرتها قاطعاها بحدة ونتر ليها يديها من على كتفو ورد
نتي تبرهشتي كتررر من قياس وهاد شي ديالك راه معنديش الصبر ليه
خلاها حالة فمها فيه وخرج مع باب طالعة ليه النقشة . هبطات عينيها بحزن ندمات كاع علاش تهضرو ولا علاش تقوليه كنحاول ولا علاش كاع تنوض عندو وتبغي تضحك معاه.. اه بصح من واحد ناحية هادا ماشي ضحك بالنسبة لجهاد .. اما هيا عادي مقالت والو غير بغات تشد فيه ..
رجعت جلست ففراشها بحزن كتردد كلمة وحدة لي فينما يطيح عليها الضيم تقولها
مجوباتوش ولكن مرضاتش يزفر عليها حدا جوديا هبطات عينيها شادة البكية
اما جوديا دخلات بسرعة وقالت
راه مغيطرا ليها والو بالعكس غير شد فيها وها نڭافات حتا هوما غيهبطو معاها تبارك الله راهم 5 معندك مناش تخاف ..
زاد شاد ليها فيديها بيدو الشمال . ويد اليمنى حاطها على خصرها وقفات ف اول درجة هبط هوا الاول شاد فيها ونڭافات هابطين 3 موراها وجوج قدامها كيزغرتو اما جهاد عينيه غير مع الدرج خايفها تزلق ولا تقلب ليها رجليها...
اما الصويري لتحت كيغني
ااااا شمس العشية امهل.. لا تغيب بالله رفقاااااا ...
هيجتي مااا بياا حتى زدتني فالقلب شوقااااا... ترفق عليا ان في المليح قد زدتو عشقااااا... في الوادي المذهب في الوادي المذهب...
هبطوها بزغاريت نكافات وانغام صويري حتا لتحت والحضور كلهم فالاماكن ديالهم فطبالي مزيين بالورود الحمراء والبيضاء واقفين كيشوفو فيها باعجاب ودهشة حيت فعلا احسن عروس شافو اما سمية من البعيد كتقرا اية الكرسي والمعوذات وتشوف فالناس لي ميشوفو فنريمان وتقرا وتعاود خايفة من العين ..
والمصورين هازين الكاميرات كيصورو بداو العائلة كيجيو يجلسو معاهم ويتصورو بانتضام حتا تكملو اما نريمان عينيها مع الحضور لي مخلط بين رجال ونساء وهادشي عيب عندهم فالحسيمة حيت عرسهم فيه رجال بوحدهم ونساء بوحدهم. لكن فكازا جو اخر...
كتقلب بعينيها على باها لي مباينش مع الناس وبالها غير معاها شافها جهاد كتقلب بعينيها قرب عندها لوذنيها وقال
ضور حتا هوا عينو مبانش ليه وقال : واخا حتا نطلعو وعطيني نمرتو نصوني عليه نشوفو واش جا ولا عاد غيجي..
حركات رااسها بالايجاب وبقات كتصور ببتسامة حتا كملو عاد نوضوها وطلعوها مرة خرا بشوية حتا وصلات لفوق . عطات لجهاد نمرة وهبط كيصوني عليه...
اما نريمان بدلات ليها جوديا كسوة خرا وكانت الشدة الشمالية واخا تقيلة ولكن بغات نريمان تلبسها وتشوف راسها بيها..
كانت فالڭرونة غامقة مع الذهبي...
لبساتها جوديا بمساعدة جوج بنات خدامين عندها. جوج سوايع ونص عاد كملات ليها شافت نريمان فالمسج لي وصلها من عند جهاد ودخلات تشوفو
" باباك هاهوا هنا راه جابو ماجد من المحطة عاد وصل....
لمعو عينيها من الفرحة وناضت
هبطوها من جديد بلا جهاد لي بقا واقف فقاع الدروج كيتسناها تهبط وهوا لابس جلابة بيضاء من جوج طبقات وطبروش حمر على راسو وبلغة حمراء ...
هبطوها نڭافات بشوية درجة بدرجة حتا وصلات لعندو وهيا شادة عينيها عاد لاحض بلي شداهم وهوا يخزر فجوديا
- علاش شادة عينيهاا واش تصطيتو !!
ردت جوديا كتلطف الجو
- راه عادي هادشي خاصها تشد عينيها فهاد اللبسة وراه ماشي شادة عينيها راه غير مهبطاهم وصافي متخلعش وهانتا كتشوف نڭافات مهبطينها
ابتسمات فوجههو بزز وهوا كيزفر بغضب. شد فنريمان كأنه مكاين والو ومشا شادة فيديها حتا لمنصة من جديد جلسو وكل مرة يشوف فيها مهبطة عينيها يتنهد ويسوط فنفسو ...
تصورو معاها وطلبات منها جوديا تحل عينيها بعدما اصر جهاد عليها تحلهم متبقااش هكاك ...
حلاتهم نريمان عاد شافت فالحضور ببتسامة وعاد زادوها صور خرين . وهنا كانت مفاجئة ملي شافت ماجد وهاشم خوت جهاد جايبين باها حتا لعندها تغرغرو عينيها من شدة الفرحة قرب عندها ببتسامة باس ليها جبهتها وراسها على انضار الجميع وانضار سمية لي حلات فمها بصدمة ممتيقااش شكون كتشوف بعد سنييين طويييييلة ....
صورو نريمان مع باها ومع الاب دجهاد وخوتو رجال وخوها اشرف ...
بعد صور عديدة وقفوها من جديد كيضورها على عائلة لي جالسين بعاد وملحقوش يشوفوها عن قرب واخا كيشوفوها فالتلفازة ولكن ماشي بحال مباشرة ..
ضوروها نكافات عليهم كاملين وهنا شافت نريمان وجهو سبق ليها وشافتهم من قبل فشاشة تلفازة منهم مغنيين واعلاميين .. فرحات وهيا كتبتاسم فوجههم وحتا هوما كيردو ليها الابتسامة
طلعات مغنية شعبية كتغني فوق المنصة وكلشي ناض من بلاصتو يشطح ويدردك شي كيتصور مع المغنية وشي داير لايف
اما نريمان كلشي كتشوفو من تلفازة لي عندها فبيت كتشوفهم كيشطحو ويتصورو ويغنيو منشطين العرس...
حتا كملات ليها جوديا ولبساتها لبسة خرا فاللون الزهري لبسة طويلة كتجرجر من الور كلهم منبتة بالاحجار الكريمة متقلة بالطرزات والهدب لي هابط منها وتسريحة اخرى ومكياج اخر بدلها فمرا....
عاد هبطوها من جديد تصورات مع جميع العائلة وقفوها شوية فالوسط بحالا بغاو يشطحو معاها وهيا كتحرك غا بشوية وجهاد حاضي معاها. حتا طلعوو وهبطوها من جديد ب اخير كسوة ولي هيا الكسوة البيضاء باليدين مشبكين وطرحة فوق راسها مشبكة وشعرها مطلوق هابط مدرج مع تاج فضي كيلمع فوق راسها والورد ابيض فيديها ...
وقفات ف اول درجة باش تهبط والحضور كلهم واقفين كيشوفو فيها اما جهاد بالكومبلي ديالو الاسود واقف ف اسفل درج كيشوف فيها وعينيه كيلمعو ..
على نغمات رمنسية هادئة هبطوها درجة بدرجة وهوا متبع ليها العين وحتا هيا كتشوف فيه وتشوف فالارض حتا مد يديه ليها شد فيديها بحب وحنية على انضار الجميع وهز يديها قبلها بحب ابتسمات بخجل بالخصوص من رجال لي تما ومن الاب ديالها. هبطات عينيها بخجل شدها من يديها حتا لوسط القاعة ولف يديه نحو خصرها كيتأمل فملامح وجهها وتفاصيلها الصغيرة والكبيرة
على اغنية اليسا ع بالي حبيبي
كيضورها برقصة خفيفة كتحرك فيها بين يديه والكاميرة متبعة معاهم فيديوات عن قرب وبعد...
منقدرش نعاود نتفرق عليك مرة خرا نعتارف ليك بواحد الحاجة ...
شد عينيه للحضة خرج تنهيدة عميقة وقال
- نتي هيا كلشي فحياتي وبلا بيك انا والو فهاد الدنيا نتي عمري وروحي وام ولادي وشريكة حياتي حتا لموت نتي نقطة ضعفي والله يشهد على كلامي..
عاود شاف فيها عاقدة حجبانو كتشوف الضعف فعينيه هبطات عينيها لي تغرغرو بدموع من هادشي لي سمعات فرحانة وفرحتهااا لا توصف ،،
انتهت ديك اغنية وجات فبلاصتها اغنية اخرى وهوا متوجهين جيهت الطبلة الطويلة وقفو حداها كانت عليها سينية ديال الذهب منبتة كبيرة ... فيها جوج بواطات وحدة حمراء ولوخرا بيضاء محلولين
واكواب كبير فيهم الحليب وطبسيل ابيض طويل فيه التمر معمر وطارت من 5 طبقات كبار فطبلة اخرا مضورة جنب ديك الطبلة ..
هز هوا الاول خاتم ومدات يديها ببتسامة. لبسو ليها قدام الحضور . وطبع قبلة على يديها وعينيه فعينيها وناس كلهم ناضو من بلاصتهم بتصفيقاااااااات حارة والبعض كيصفر على الجهد والورد كيترمى عليهم من الفوق اما هيا مقدراتش تصبر وهبطو دموع الفرحة من عينيها مدو ليها خاتم لي فالبواطة البيضاء لبساتو ليه مد ليها تمرة قطعات منها جزء صغير كلاتو ومدات ليه حتا هوا . مع الحليب ودازو المنصة جلسو وخداو تصاور بوحدهم وتصاور مع العائلة ورجعو ناضو لاطارت شد الموس فيديه ويديها فوق يدو قطعو منها جزء حطوه ليهم فطبسيل فضي ومدو لجهاد قطع منو ومدو لنريمان حلات فمها بأدب خداتو منو ونفس الشي عطاوها طبسيل ليديها قطعات من نفس المورسو وهزت يديها وشوكة فم جهاد ..
فرقو لاطارت على الجميع ... وجلس جهاد ونريمان فطبلة خاصة بيهم بجوج حطو ليهم الحلوة والعصير ولاطارت فالوسط . وهوا كيوكلها وحتا هيا كتهز يديها وتمد ليه ببتسامة ..
طولات شوفة فيه للحضة وقالت وعينيها كيلمعو
حتا نتا حياتي وكل ما عندي فهاد الدنيا انا كنت كنحاول هادي سنين باش تكون ليا عقلتي ! على مسج لي كنت صيفط ليك .. وحدة خرا فبلاصتي مغاديش ترضى ولكن انا درتها فيد الله حيت بغيتك من القلب خالص ماشي بغيت فلوسك ولا ... هادشي ديالك ولكن بغيتك نتا كا انسان وحولت ما امكن تكون ليا
تغرغرو عينيها وهيا كتهضر وهوا مركز مع كلامها ببتسامة
شدو طريق بوحدهم فداك الليل كيضحكو ويهضرو فجو رومنسي ومرة مرة بقبلات حارة
حتا ترخات نريمان وغلبها نعاس اما جهاد كان كاسو د القهوة حداه مل مرة يشرب منو واخا غلب عليه النعاس وصباح بدا يطلع .. بزز باش قدر يكمل السياقة حتا وصلو لمراكش
فاوطيل جميل وقف طوموبيل بعدما فيقها وناضت بصعوبة حلت عينيها بزز...
طلقاوهم برا هزو ليهم شوانط ديالهم طلعوهم لاشومبر ديالهم . اما نريمان شدات فجهاد وهيا مدهشرة بالنعاس طلعو فلاسنسور . دخلو لاشومبر بجوجهم عيانين . شد جهاد الباب ودخل لقا نريمان حطات راسها على المخدة. ومشات فالنعاس.
حيد لافيست لاحها فوق الكرسي وحيد كرافاط حتا هيا وقميجة وهبط سروال بقا غير بكالسون ومشا جيهتها حل ليها صندالة من رجليها وهيا غارقة نعاس. حطها فالجنب وحل ليها الشال من على راسها. ربع رجليه على فراش وهوا كيطلع ليها جلابة بشوية ..
الأجنحة المنكسرة الجزء 21
محتوى القصة
التنقل بين الأجزاء