قصة الأجنحة المنكسرة

2020قصة كاملة

محتوى القصة

رواية الأجنحة المنكسرة

قصتي مستوحاة من الواقع المعاش كيفما قريتو فقصصي لي مضت
رواية بطابع دراامي √ رومنسي √ مرارة الفراق √ الحزن √ ضياع √ قسوة √ آمل √ والكثير 😊

بقلمي : Mariama laaroussi ❣

الأجنحة المنكسرة 🌾

إن أصعب إحساس يمكن للإنسان أن يعيشه في هذه الحياة ، هو أن يكون بذاخله شعور يوحي إليه بأن العالم بأسره ضده و أن الجميع يريد أن يراه منكسرا دليلا تائها في دروب الحياة بدون أحلام وبدون طموحات ، هكذا أراد الجميع أن يراني .. أرادوا أن يجعلوا مني فتاة مستسلمة فتاة تعيش بأجنحة منكسرة .
منذ أن وطأت قدمي هذه الحياة وأنا أعاني و أقاسي في صمت ، وكأنه لم يكتب لي أن أحيى حياة هنيئة في هذا العالم ، كثيرون هم من يولدون وقد ولدت معهم أمال وطموحات كبيرة ويترعرعون في دفئ أسرهم ، أنا لم أعش هذا الشعور أبدا من قبل ، ولم أحس بدفئ العائلة ، لطالما شعرت بأنه لا أحد سيكون حزينا إذا ما فقدني في يوم من الأيام .
كثيرة هي الأفكار التي كانت تراودني كلما تذكرت أمي تلك المرأة التي تخلت عني و عن أخي تركتنا ونحن في عمر الزهور أو ذلك الرجل المدعوا بأبي الذي لا يأخد من معاني الأبوة سوى الكلمة فعندما كنا في أمس الحاجة إليه تركنا هو الآخر و غاذر غير آبه لما سنعانيه وما ستفعله الأيام بنا ، لقد حولتني هذه الأحداث القاسية إلى حجر نعم بدون إحساس بدون قلب ، لكن نقطة ضعفي الوحيدة في هذه الحياة كانت هي أخي ، الذي لم يكتب له هو الآخر أن ينعم بدفئ و حنان العائلة ، و أكثر شيء كان يكسرني و يحطم فؤادي هو رأيت "زياد" أخي عاجزا أمامي فوق كرسي متحرك غير قادر على الحركة أو الكلام بطلاقة ، فالكلمة الوحيدة التي كان يقولها بصعوبة هي "ناريمان" ومن غيري تكون ، نعم أنا ناريمان تلك الفتاة التي كانت بمثابة وطن لأخيها الصغير العاجز يقال أنهم من ذوي الإحتياجات الخاصة أنا لا أتفق مع هذا المصطلح أبدا فهم من ذوي القدرات الخاصة ، فالزياد هو الوحيد الذي كان قادرا على أن يمنحي الأمل في الحياة ، إن أقسى ما أتمنى بكل صدق هو أن أراه في يوم من الأيام سليما معافى ، كي يعوض ولو قليلا عن الفقد الذي عاشه في هذه الحياة .
لطالما كان بذاخلي شعور ينتابني من حين لآخر يهمس في أذني قائلا هذا العذاب سينتهي وسيمنحك القدر فرصة ثانية كي تعيشي حياة سعيدة مليئة بالطمأنينة والسكينة ، ولطالما رسمت في مخليتي ملاكا سيذخل إلى حياتي ويغير كل شيء يحبني ويجعلني أحيى من جديد .
قصتي ليست كباقي القصص ربما لم ولن تسمعوا من قبل أو بعد مثلها لأنني وببساطة لا أشبه أحد .

" ناريمان الأجنحة المنكسرة "

شدات الدفتر ديالها لي متعودة تكتب فيه معناتها والقسوة لي كدوز منها.. ناضت خشاتو بين حويجاتها فواحد الماريو عندو باب وحدة مقشر وراشي .. ورجعات بخطوات بطيئة حطات راسها على المخدة هازة راسها فالسقف ديال البيت كتخمم فحالها لي مكيتغيرش..
و ألف سؤال كيتطرح فراسها واش غضحك ليها الدنيا شي نهار. واش غتحقق الحلم لي كتقاتل باش توصل ليه..
قلبات وجهها على اليمين ديالها كتأمل ملامح خوها " المعاق " لي ناعس جنبها كتشوف فيه بحزن وآسى وعلى حالتو صعيبة .. الا كان فيه غير العطش شكون يعتقو وشكون يكون بيه من غيرها هيا.. كتدعي فنفسها ان ربي يعينها حتا تبقى ديما هزاه.. بقات على نفس الحال وقلبها مقبوط حتا غفات...


فصباح واقفة نريمان كتلبس حوايجها وكتحاول تزرب باش يلاه تلحق المدرسة لي تعطلات عليها..
خرجات كتلوي الفلور ديالها وكتقادو فواحد المراية صغيرة فوسط دار فوق التلفازة...
خرجات جداتها من بيت نعاس لقاتها كتقادد الفولار وهيا تقول :

"حوار بالريفية "

غيشوفك غا الوزير والعميل والملك كتمشيو لديك مدرسة غا باش تسيبو اماا القراية الله يجيب صبحاتو الله

هبطات نريمان عينيها ومشات باست ليها يديها والأخيرة خطفاتها بالزربة وقالت : فيناهوا الفطور؟
نريمان : انا خليتو فالكوزينة قلت مزال مغتفيقوش وقلت بلاماا نوضك انا غنمشي ايما لمدرسة

هزات شكارتها يلاه كتلبس صباطها وهيا تقول جداتها من كوزينة

فضيلة : بسخرية) هه المدرسة من غدا غيعطيوك الوضيفة غا مهندسة ولا استاذة العام مبقاليه والو هاحنا غنشوفو هاد خيطي زيطي فين غتوصل

خلاتها نريمان كتنكر وطلعات بالشوية فالدروج لطابق 3 وقفات حدا باب كدق بشوية حتا حلات ليها مرا كبيرة الباب سلمات عليها

رشيدة : نريمان دخل ابنتي
نريمان : لا امرات عمي غنمشي المدرسة وصال مشات ولا باقاا؟
رشيدة : ممشاتش اودي راها بايتة كتقطع بالحريق جاتها ديك مسخوطة ايوا راكي عارفة
نريمان : اه ميكون عندهاا باس، خالتي زياد خليتو ناعس عفاك تقدري تقولي ل امين ملي ينوض يهبط يشوفو يديه لطواليط
رشيد : ايوا شغنقولك دابا نقولهاليه
نريمان : الله يسهل عليك انا مزاوكة راه بالي كيبقى معاه.
رشيدة : يكون خير غا سيري
باستها وهبطات كطير شداتها جرية وحدة حتا باب مدرسة لقاات باب مسدود وبقاات كدق تما حتا فتح الحارس باب مغنزر وفمو زرڭ بقوة الدخان..
حارس : بصوت مبحوح) شهاد الوقت لي عاد ماجا فيه
نريمان : راه غير تعطلت فالدار خليني ندخل الله يخ...
قبل متكمل كلامها قاطعها وهوا كيسد الباب : سير جيب ولي امرك هاد هضرة قديمة تبقااو كتسركلوو فالزنقة حتا يفوتكم الحال عاد تجيو كترغبو

نريمان : والله شاهد علياا مكنت فشي بلاصة راه عندي ضروف قاصحة فالدار راني عندي خويا معاق وشي صعوبات ربي لي كيعلم خليني ندخل انا مزاوكة
بداات كدمع عينيها وفمها كيترعد وهوا يدفع الباب بالنترا وقال : يلاه دخلي دغيا مرة خرا تقولي امي كتموت والله لا عتبتيه

مشات كتنهد مقهورة من عند الله وزاد قهرها الحارس بهضرتو وزاد كملها ملي جبد ليها امها وهيا مزال حتا مشافتها ولا عرفاات وجهها كيف داير لا واش عايشة ولا ميتة...

دخلات القسم لقات أستاذة واقفة قدام الصبورة كتكتب والتلاميذ كيكتبو فالدفاتر ديالهم شافت نريمان داخلة وهيا طلع حاجب بمعنى شهاد الوقت.
نريمان : بصوت خافت قدامها) أستاذة عفاك أخير مرة راه تعطلت غير ضروف فدار وزاد كملها حارس مبغاش يخليني ندخل سمحيلي عفااك اخر مرة...
تنهدات وقلبات وجهها لصبورة : يلاه بلاصتك..
جلسات حدا الصديقة ديالها كتسولها على ما فااتها جبدات حتا هيا كتوبة ديالها وبدات كتكتب حتا دوزات الحصة ديالهااا وخرجات مع 12..
غادية بسرعة لدارحتا سمعت صوت صديقتها كتعيط ليها..

هناء : مالكي غادة كتجري اصحبتي
نريمان : خصني اختي نرجع لدار دغيا راه خويا يكون فزك حوايجو عوتاني مفياا مناكل شي قتلة من عند عمتي عوتاني ولا نڭير د يما
هوما غاديين وكيهضرو.
هناء : اناا بغيت غا نفهم هادي واش عدوتك ولا عمتك وديك يماك بحالا غتخلد فهاد دنيا فعوض متحس بيك بنت ولدها وديك عمتك عوتاني زعمة عائلة كتحن ونتي بنت خوهاا وخوك ولد خوهاا!

نريمان : ايييه يا وتشماينو " ختي " شمن عائلة واخاا بنت خوهاا قسما بالله الا كتشوف خويا كيتقطع بالجوع ولا خاصو يمشي لطواليط والله لا عتقاتو. وانا ياختي كنبغي غا ندوش مكتخلينيش كتقولي الماا كيجي غالي وخصك تسخن الماا وباش تصبن حوايجك اناا خصني معاك بانكة وهانتي اختي الصيف وبنادم مغاديش يعرق مغاديش يبغي يبدل حوايجو . وشحال من مرة كنشوفها كتجيب الحلوة وتاكلها وملي ندخل الدار نلقى غا ساشيات خاويين ولا كراطن فسطل دالزبل والله لا خلات ليا حتا منلحس.

صراحة الا جيت نعاودلك خاصني شهر .. خوياا مسكين غا المحسنين كيجيبو ليه الحوايج ويشريو ليه باكيات دليكوش وحتا انا الحوايج كيجيبوهم لياا غا ناس وملي كيجيبوهم لياا كتجي هيا كتجري تقلب فدوك الحوايج لي عجباتهااا ديالها. وشكون يطمع فليكوووش ديال واحد معاق ملي كتجيهاا هاديك كتمشي دير ليكوش ومتعرفش تشري اولويز راسها اودي راني لرنععاااارررررنعععععععععخااااااااا
انهارت حدا هناء بالبكا . من قوت القهرة لي عايشة فيها رجعات على سبة فالبلاصة تنوض تبكي...

عنقاتها هناء كتبوس ليها يديها وراسها وكتحاول تسكتها وترغب فيها وتحاول تهذنها.
هناء : نريمان لعمر اينو " العمر ديالي " صافي عفاااك الله يسهل عليك سكتي اوتشمااينو صافي شوفي بغيتي دوشي اجي عندناا والله متخافي واخا عندي خوتي فالدار قسما بالله الا بحال ختي اجي دوشي ولبسي وصبني حوايجك ونقول لماما توجدليك لي تشهيتيهاا تاكلي حتا تشبعي لي بغيتيهاا قوليهالي راه حنا
خوت انا غداا نجيب ليك شي حوايج ديالي مزالين جداد والله متوريهمش ليهاا سمعتيني! متشوفهمش
نريمان : لا مخصنيش اختي شكرا انا غير قلبي فايض وجيتي فطريقي نخوي قلبي عليك وشكرا بزاف حيت ملي تعطلت فصباح هضرتي مع استاذة وقلتي ليها على ضروفي الحمدالله مغوتاتش علياا اما كون راهاا خرجاتني.


هناء : وراني حسباك ختي والله مديريش بالك انريمان صبري شوية دابا يجي شي بوقوص ويبغيك ويتزوج بيك وتعيشي نتي احسن عيشة كااع ههه
مسحات دموعهاا وهيا كتخلف فالمشية ديالها وكتجاوب وهيا

كتنخصص : انا مبغيتش نتزوج اناا باغا غا نكمل قرايتي ونكون طبيبة. ونداوي الناس ونداوي خويا ونعيش بوحدي انا وخويا واخا نكري غا بيت وطواليط مهم نتهنى من هادالعيشة المذلولة. صافي سيري اهناء هادي راها ماشي طريقك غتعطلي على داركم
هناء : لا غا خليني نمشي معاك وديك ساعة نمشي لدار فطوبيس اصلا دارنا بعيدة على مدرسة ديماا طوبيس.
قوليلي باباك مكيصونيش عليكم ولا يسول عليك نتي وخوك؟
نريمان : والو ياختي نساا بلي خلا ولادو بحال يتامى وخوتو دايريهم فيهم ما بغاو ..
وصلات هنااء مع نريمان حتا الحي ديالهم تودعات معاها ومشات تشد طوبيس. اما نريمان ملي وصلات لحدا باب شافت الصالون دالحلاقة د عمتها محلول بحكم ساكنين فسفلي واحد كراج صغير دارتو عمتها صالون د حلاقة...

دخلات لدار اول حاجة سلمات على جداتها لي جالسة فوسط دار طالقة رجل وطاوية رجل كتنقي العدس وكتشوف فالتلفازة قبالتها.. دخلات لبيتها لقات خوها مجبد فبلاصتو وعينيه مدمعين شافت فيه بدهشة
كيحاول يتحرك بصعوبة باستو من راسو ويدو وقالت : خوياا فطرتي مالك معصب قولي علاش كتبكي! غوت عليك شي حد ياك؟ مكليتيش؟ واش مداكش امين لطواليط !

فهمات ان من حركاتو انه مزال بالجوع حسات براسهااا غتغلي من الداخل ويديهاا كيترعدو وسنانها كيتقرقبوو بقوة العصب خرجات لوسط الدار وقالت لجداتها لي مزال على نفس الوضعية
نريمان : يما واش هاد الولد معطيتوهش ياكل! واش مديتوهش لبيت لما؟
هزات جداتها راسها مخرجة عينيهاا كتغوت : واش انا يا بنت السوق غنهزو نديه لبيت الما؟ واش مراكيش تشوفي رجلي كيراها دايرة رانب نجرهم غا بزز بقالي غا هوا نهزو يتهرسو عضامي! لا مزياان مزيان
( زادت فالوتيرة كترفع صوتها وتغوت) ولاهيلا تقادو الكتاف بقالك غا ضربيني هاا وجهي هااا بحالك بحال باك سلعة وحدة الله يعطيكم شتات
زادت تعصبات نريمان كتر من كلام جداتها واخاا كتعياا متحاول تكالمي راسها ومتردش عليها خلاتها كتغوت حتا سكتات وقالت : دابا انا شنو قلت ليك! قلت ليك واش مديتوهش زعمة عمتي ولا أمين واش مهبطش ماشي قلت ليك نتي مالكي ايما باغا غير ايمتا دابزي معايا؟
فضيلة : ( ناضت كفضات على يديها) لا لا نتي لي وقيلة ناوية تهزي الهراوا وتسوطيني بيها..
على صوتهم لي كيتسمع برا وغوات الجدة لي كتبغي تسمع لكلشي دخلات العمة د نريمان كتجري مرا غليضة وطويلة وغير مغنزرة
سعاد : هيي هييي هييييه اش كاين هنا شهاد الصداع كلياان عندي ونتوما كتغوتو شكاااين صوتكم كيتسمع من راس درب
نريمان : والو انا يل.....

مكملاتش هضرتها قطعاتها الجدة وهيا كتغوت
فضيلة : البنت الالة قالت ليك علاش منوكلوش خوهااااا وعلاش منديوش خوها لبيت لما وبنت طنشاات كبرات ورجعات تهز عليااا وتغوت فوجهي وتقابح معايا وتصنطح
نريمان : ان....
مكملاتش هضرتها محساتش براسها حتا جات فالأرض من تسرفيقة لي عطاتها سعادة عودات ليها تسرفيقة خرا وهيا كتريش فشعرها وتخبط

سعاد : ابنت الحرام لي شاط على باك تكمليه لينااا نتي خرج عليااا ليهودي خدالي رزقي ورزق امي هاااااا اليهودية هاداا هوا خيرنا هااا...
الحق فينااا اما نهار لي حطاتك ديك حرامية د امك كن ديناك لخيرية وحنا جيبينك هناا نتي وهاد معوق د خوك

فضيلة : عطي لحراميااا عطيها عطي لبنت سوق عطيهاااا

تحماو فيها حتا هبطات رشيدة من الفوق لي عيات صابرة واقفة فالدروج كتصنت فلاخر هبطات كتحاول تفرقهم

رشيد : واش خصكم تقتلوها هااا واش خصكم طيحو الروح ولا مالكم
جراتها لعندها موراها
سعاد : ونتي اش دخلك لاش هابطة لهناا كتعرفيناا اختي كنعرفوووووك
رشيد : معندي منعرف فيكم ومخصنيش منكم ولكن براكة متقتلو فهاد البنت اش غتقولو غدا قدام الله

فضيلة : اشوفي هاا سيري لدارك وراني مبرية تعاودي تحطي رجلك عندي ولدي وقلبتيه علياا رجعتي كتخليه ميجيش حتا يسلم على امو

رشيد : راه نتي لي خرجتي على ولادك كلهم كون كان فيك الربح كون راه خليتي هاد البنت بين باها وامها كون جمعتيهم كون صلحتي الامور بيناتهم وكون بنت دابا مع واليديهااا ولكن نتي دابا ربي ياخد فيك الحق دابا اخرتك تكون كفس من فرعون

سعاد بلاماا تهضر نيشان شداتها من شعرها وجلسات كتنتف وفضيلة كتسب والتعاير حتا دخلو الجيران كيفكو ودخل سي الحبيب راجل رشيدة كيبعدهم
عاد فرقو بيناتهم كل وحدة مقموشة فوجهها وعنقها وشعرهم منتوف. الحبيب جرا على الجيران وناض كيغوت فحين نريمان دخلات مكمشة حدا خوها كتبكي وترعد..
معارفة راسها واش فالسماء ولا الارض حتا غوات لي برا مسمعاتوش راسها مرفوع..
سي الحبيب : ياك تبريت عليك وقلت ليك متهبطيش لهناا مخصناا صداع
رشيد : ايوا محضرتيش كون قتلو ديك البنت محاميين فيهاا بجوج
فضيلة : اشدي فمك الشايطة
سي الحبيب : امي الله يهديك حنا كنهدنو القضية ماشي كنزيدو نزندوها
فضيلة : اناا ما ام حد ملي نتا رجعتي كتسمع لكلام مراتك تفضل عليا مراتك اناا بعد مني امك ماتت هز علياا هادي وخرج لياا من داري الا فيك نفس ماا نتا ولدي ماا انا امك...


سكت مزادش رد عليها ناضت رشيدة تمات غادية لقدام وهوا موراهاا طالعين بحالهم وهيا مزال لتحت كتغوت وتزيد تعاييير..
سعاد : غا بلاتي امي الا منخشي فمها موس اناا با مولد فيا غا الخلا

جلسات كتحلف فيهم وناضت غسلات وجهها وجمعات شعرها وخرجات عند الكليان لي خلات فالصالون...

اما نريمان دوزات نهارها فبيتها مرفوعة جسد بلا روح غير كتبكي على حالهاا والمكتاب لي كتب عليها الله حتا كتحس بالأخ ديالها كيحاول ينطق اسمها بصعوبة وحلقو غيخرجو وكيحرك فيها بواحد اليد..
ضارت لعندو شدات فيديه وقربات عندو معنقاااه كتبكي فصمت...

نريمان : صبر معايا اخويا مبقاا قدما فات غير صبر انا غنحاول نقلب على خدمة غير صبر معايا انا غنكمل قرايتي وغنداويك وغترجع بخير وغنعيشو اناا وياك ممخصوصييين من حتاا حاجة انا مغاديش نخليك كتسمعني ياك؟
منخليكش اخويااا واخاا يبقى عرق فياا كيزدح نهزك بسناااااااني

الا واليديناا خلاونا انا منخليكش اناا منخلييييييكش اخوياا منخليكش.
بقات معنقاه حتا شافتو نعس فيديهاا بقات شحال كتخمم اش دير وكيفاش تصرف حتا نعسات حتا هياا....
فساعة متأخرة من الليل ضرباتها الفيقة لقات خوها فايق كيحرك فيها وريحة كريهة فالبيت. ناضت مخلوعة شعلات الضو كيبان ليها جناب دالبونجة لي ناعس عليها زياد فازڭين عرفاتو خرج فزاڭ على ليكوش دارت يديها على حنكها وخوها عينيه مدمعين مشات ليه هزاتو خرجاتو بشوية مقاتلة معاه حيت تقيل داتو لطواليط حيدات ليه حوايج لتحتانيين وضااتو ورجعاتو لبيت حطاتو ففراشها لبسات ليه ليكوش و حوايج خرين وهزات البونجة وكاشة لي كان مغطي بيها وخرجات كتسلت طالعة فالدروج حتا وصلات لسطح وهيا تغوت ملي شافت وصال بنت عمها متكية على الحيط كتهضر فالتليفون بصوت خافت..
قطعات بالزربة تليفون وقالت
وصال : اويلي خلعتيني اختي مالكي طالعة فهاد نص ليل
نريمان : غا سكتي راه زياد فزڭ وعمتي الا شافت هادشي بلاما نقولك شنو غيطرا
وصال : كرهت هاد العمة والله انا وياك بحال بحال حتا لالة
نريمان : اختي انا ماشي بحالك كيفما كان الحال نتي عندك باباك بعدا عمي كيعطيكم الحنان وكيتهلا فيكم ماشي بحالي انا معنديش واليدين شنو كديري نتي بعد هنا؟
وصال : اا. انا لا والو والو غا كنت كنهضر مع واا واحد صحبتي وصافي

نريمان : بتشكيك) اووك
نشرات دوك الحوايج بعدا بعدا غا يبسو حتا تلقى كيف دير تصبنهم.. شافت فوصال لي واقفة حداها وقالت
يلاه تصبحي على خير..
ردات عليها وصال بضورها كتبتاسم بمجاملة ورجعات كتكمل هضرتها...

هبطات نريمان بشوية دخلات لكوزينة كتقلب على ما تكال لقاتهم طيبو دجاج لعشا ولي شاط داروه غالفريكو جمد... اما غدا دارو العدس وشاط شوية حطوه فطاسة خلاوهاا فثلاجة من لتحت... هزاتها نريمان بلاما تسخنها ولا تحطها فشي طبسيل هزات خبز بارد ومعلقة ومشات لبيت عند خوها كتوكلو بالمعلقة وهيا كتعمر الشدق دغيا وتخشي فمها وحاضية مع باب حتا كملات عطاتو يشرب


خلاتو ناعس فبلاصتها وهيا فرشات كاشة منها الحصيرة فالاررض ونعسات هكاك.. فالصباح ناضت بصعوبة كتحس باللحم ديالها مفصلة عليها الجهد معندهاش حتا باش تهز المقبط وتجمع شعرهاا.. ناضت بزز مشات لطواليط ودخلات لكوزينة كترد الما يطيب باش دير الفطور...
وجدات الفطور يلاه هزات السنية خارجة بيها وهيا توقف ليها جداتها فباب..
نريمان : يما ها لما سخون باش توضاي
فضيلة : وشكون قالك ديريلنا شي فطور المعفوونة صباح لله
مشات كتنتر وخرجات نريمان حطات سينية فوق الطبلة وطلعات لسطح كتجري هبطات فراش خوها بلاما تشوفها جداتها دخلاتو لبيت. ومشات فيقات زياد بشوية هزاتو على عينين جداتها لي جالسة فوق كرسي كتصلي فالوسط الدار وعينيها كيضورو مع لي كيتحرك حداها.
دات خوها لطواليط وضاتو ورجعات حطاتو فكرسي متحرك ديالو خرجاتو لوسط دار كتبرد ليه اتاي
كملات فضيلة بالصلاة وشعلات تلفازة وهيا كتعيط على سعاد حتا فاقت.

خرجات بعينيها منفوخين كتشوف بنص عين ف نريمان هزات يد امها باستها وقالت : شوفي نتي من اليوم متقربي لداك الكوزينة ولا طيبي شي حاجة وهاا وذني منك قابلي غا ليكوش دخوك حنا مفينا لي ناكلو شي عفن
هبطات نريمان راسهاا بدون رد
وناضت كتمسح لخوها فمو وتشربو حتا كملات ليه.
نريمان : بصوت خافت) انا غنمشي لمدرسة ها نتا كتفرج..
خلاتو فالكرسي ديالو وناضت لبسات حوايجها بالزربة ومشات طلات فالمرايا لقات وجهها منفوخ وحدا عينيها زرقة وجنب فمها منفوخ.. تحصرات على حالتها لي غتخرج بيها لزنقة وكلشي كيشوف فيهاا... خرجات كتلبس صباطها وهيا توقف عليها سعاد كتقول

: عوتاني طاطي فالزناقي راه تابعك بيت نعاس د امي تهزي ديك زربية طلعيها لسطح تصبن وبيت خصو يتسيق ويتحك وديك كوزينة خاصها تخمل مكتشوفيش دار كيف معفوونة!
ملقات باش تجاوب حركات راسها بالايجاب ودموع محجريين فعينيها. خرجات بالزربة كطيح فدموعهاا وصدرها لي كيطلع وينزل غادية فالطريق كتبكي. حتا دخلات القسم كانو تلاميذ مزال كيدخلو جلسات فبلاصتها وعينيهاا حومر كاع نضرات موجهها ليها والوشوشات من كل جهة عليها حتا دخلات هناء جلسات حداها كتشوف فوجهها وتعنق فيها وكتسول اش طرا وشكون كاين
نريمان : بصوت متقطع) ح حتا نخ رجو ونقولك اهئ اهئئ
دخلات الأستاذة وكلشي سكت كيشوف فالصبورة لبسات الطبلية ديالها وجبدات الكتاب كتشوف، فيه توجهات الصبورة كتكتب حتا كملات يلاه تلفتاة وهيا تشوف نريمان بديك الحالة.. شافت فالتلاميذ وقالت :
خرجو هاد التمرين انا ماجا..
شافت ف نريمان وقالت : نريمان اجي معايا
ناضت من بلاصتها وخرجات برا تبعاها لقاتها واقفة متكية بيديها على الحيط لي كيطل على الساحة
نريمان : نعم أستاذة
أستاذة : كيف، بقيتي شوية!
نريمان : الحم د الله
أستاذة : شكون ضربك ياك لباس قوليلي
نريمان : لا غير مشكيل بسيط ماشي شي ح...
أستاذة : بالارتياح)
هضري وقوليلي مالك انا دابا سناء لي كتهضر معاك ماشي أستاذة قوليلي مالك احكيلي شنو عندك؟

أستاذة بحالا حكاات على الضربة بدات نريمان كتعاود ليها اش طرا ..
أستاذة : لا حول ولا قوة الا بالله هاد ناس خصهم يتربااو وشنو كيفاش عايشة معاهم يا فين واليديك
نريمان : مفارقين انا مكنعقلش عليهم، ومعرفاهمش حتا فين هوماا،
أستاذ : وزعمة هاد، امك معندها كبدة خلاتك وزادت! مرعات لبنتها واش واكلة شاربة جيعانة عريانة ملي مكيقدوش بالولاد علاش كيجلسو يعمرو فكروشهم ويحطو واش زنقة كتربي! تفوو هادا باش البلاد راجعة باللور وعلاش امك تفارقاات هيا وباك وعلاش هاد الكره كامل من عند عائلتك..
نريمان : شغنقولك قصة طويلة بزاف على مكتعاود ليا مرات عمي بابا ضحك على ماما وهيا حملات منو وملي قالت ليه حاملة نكرني وقالت لياا مرات عمي ماما كانت كتبغيه بزاف وكانت ديما كتجي، عندو لدار كتقوليه تزوج بياا وهوا كان كيضربها فالزنقة وكيقوليها، نتي مصلحاش وهاد الكرش ماشي انا مولاها ايوا ماما ملي عرفو واليديها دعاو بابا وتزوج بيها بزز منو وكان، ديما كيعطيها العصى وجداتي كضرب ماما وتخرجها عريانة لزنقة هيا وعمتي وماما فديك الوقيتة كانت نافسة يلاه ولداتني وعياو ناس يدخلو ويصلحو بيناتهم وكانت ماما كتمشي، تغضب فدارهم ويوليو يرجعوها عوتاني يضربها ويجري عليها عوتاتي يرجعها حتا حملات بخويا بالغلط وكانت بغات طيحو وعيات متشرب، فالعشوب والو وخلاتو ديك ساعة كانت عندي عامين ايوا ملي ولدات خويا بقات مقاتلة مع بابا ولدات خويا معاق ايوا صبرات بزاف ومن بعد قالت بغات طلاق قاليها جدي الا طلقتي متجيبيش لياا ولادو ولا متجيش حتا نتي ومع هيا مكنتش قارية بزاف وخوافة مكنتش كتقدر تعتامد على راسها زعمة تخدم وتصرف علينا وتكري لينا خلاتنا عند بابا ومشات بحالها. وقالت لينا مرات عمي امي كانو جاوها شي ناس وراها تزوجات


تأثرات سناء بكلامها وهيا كتأمل فملامح وجهها وفمها لي كيترعد.. تنهدات وقالت :
وهاد باباك فين مشا ؟ كان خصو هوا يهزكم ويكون بيكم

نريمان : كلشي كيقول بابا ملي كان صغير كان عديم المسؤولية..
وديما غا الشراب وحشيش والحبسات لا خدمة لا والو غا سرقة والنصب على عباد الله .. كنت بعد مرات كنجلس مع عمي ومراتو عرفتي شكيعاودو عليه!! مصائب
ملي تفلا على ماما ومشات بحالها قالت ليا مرات عمي بابا سرق لعمتي فلوس، عمتي خدامة كوافورة وكانت جامعة شي فلوس ومشات جابتهم من بانكة حطاتهم فدار كانت غتشري بيهم واحد الدار سفلية ممصلوحاش وكان عندها الذهب كانت باغا تبيعو باش تزيد عليه.. عمتي مطلقة وعندها عندها جوج دراري سامحة فيهم لراجلها. ايوا جات فتحات كراج فين ساكنين فالسفلي ودارت تما محل د حلاقة صغير وكتمشي لعراسات بزاف فالمدينة والجبل مهم جمعات فلوس وذهب كان داكشي واصل ليها كتر من 19 مليون .. ويما حتى هيا كانت عندها شي مع فلوس وكانت عاطياهم لعمتي باش تزيد على ديالها.
ايوا و بابا سرق ليهم داكشي وبات ما صبح.
دابا عمتي داكشي لي دار معاها بابا كتفديه فيناا حنا من صغرنا انا وخويا وحنا معدبيين ديما بجوع والعرا حنا كيعتقونا غير الناس يجيبو لينا منلبسو وهكاك ملي كيجيبو لينا شي حاجة مزيانة عمتي كتديها لينا الحاجة مخيرة ديها وحنا تخلي لينا غا ديشي.
وخويا كيجيبو ليه المحسينين ليكوش كتهز ، ليه منو الا جابو ليه غا جوج بكيات تدي باكية. وفالعواشر ناس كيجيو يعونونا جيران ومعارف يعطيونا شي بركة قليلة زعمة نشريو حوايج ف عيد ولا نشريو حتا حنا شي حاجة كتجي عمتي ويما وياخدو لينا داكشي.
من صغري طلعني لسطح نصبن ويلا معرفتش. تبدا تقرص فيااا وعلى اقل حاجة تحط موس فوق عافية وتشويني بيه واحد المرة دفعاتني من الدروج هبطت كنتكركب حتا تقطعات فيا النفس..

أستاذة واقفة حداها متأثرة بزاف بكلامها, كتصنت ليها كتشوفها كيفاش كتعاود وصدرها كيطلع ويهبط ويديها كيترعدو
بدات كتهضر بصوت متقطع وتبكي بالجهدد فقدات السيطرة على راسها ومبقاتش عاقلة حتا على شنو كتقول..
عنقاتها أستاذة وبدات كتحاول تسكت فيها وهيا غير مكتزيد تبكي وتغوت حتا خرجو اساتذة والتلاميذ كلشي كيطل تجمعو عليها كيحاول يهذنوها وستغربو حتا من سناء لي مأثرة معاها ومقدراش تهضر..

عرات نريمان على يديها كتوريها
نريمان : شوفي يدي كلهم مشوييين اناا عييييت انا بغيت غير نموت بغيت نرتاح علاش انا بالضبط علاش يطرالي هاكا علاش هاد مكتاب يطيح فيا غير انا ناس كلهم بخير مرتاحين وفرحاانين انا معمرني عرفت العيد كيف داير ولا حسيت بالجو ديالو معمرني لعبت بحال وليدات هازة هم كتر مني ومكينش لي مضعفني كتر قد خويااااا هوا لي كنشوفو ف هاد الدنيا حيت كون مكانش هواااا كن مت شحال هادي..

شدات فيها استاذة اخرا
بعدات سناء شوية لور وهيا كتردد : حسبيا الله ونعم الوكيل حسبيا الله ونعم الوكيل حسبيا الله ون....
تقطع فيها الجهد وجلسات فواحد الدرجة كتشوف قدامها .
للحضة تهدنات نريمان وبقات غير كتنخصص والأستاذة مزال معنقاها
و سناء جنبها ملقات متقول...

صافي اجي معايا. يلاه كل واحد، القسم ديالو
كاع الأساتذ والمدير كيفرقو فالتلاميد كل واحد يرجع للقسم ديالو ...
حتا خوات دنيا دخلو نريمان لواحد قسم خاوي ودخلو بعض من اساتذة كيحاولو يهذنوها معنقااها سناء واستاذة خرا شادة يديها بجوج يدين.. كيعطيوها آمل فالحياة وأن هاد الضروف كلها غتبقى غير معاودة...

سمعو دقان فالباب وشافوه تحل. وقفات هناء فالباب وقالت : سلام ممكن نشوف نريمان.
حركات سناء راسها وقربات هناء عندها
هناء : حبيبة شوية دابا
حركات نريمان راسها بالايجاب وقالت : خصني نمشي بحالي ساعة فاتت.
هناء : اه راه 12:30 دابا كلشي خرج..
ناضت نريمان بالزربة وهوما كيشوفو فيها
نريمان : انا غنمشي بحالي سمحولي على هادشي راه ماشي لخاطري

أستاذة : ردي البال راسك ويلا حتاجيتي شي مساعدة مرحبا
سناء : نريمان حنا كلناا معاك وراني كنقوليك متجهديش فراسك وخممي فصحتك راه غتكبري وهيا لي غتحتاجي
حركات نريمان راسهاا بالايجاب و
خرجات هيا وهناء ..
بقات سناء كتعاود الأساتذة الحال لي فيه نريمان والضروف لي كتعيش فيهاا كلشي تأزم وتعاطف معاهاا...

فحين خاارجة نريمان هيا وهناء غاديين فالساحة متوجهين لباب.. وهيا تسمع كل مجموعة اش كيقوولو عليها...

1 : اييه يا تبوحيط، أثروو فيكم افلام تركيين رجعنا كنتفرجو فيلم هندي مباشرة هههههعه

2 : مسكينة باينة باها لقاهاا مع شي واحد وزرق ليها وجهها

3 : مسكينة عزات علياا واخا معرفاش بالضبط شنو عندها

الهضرة كترات كلها يلغي بلغاه كل واحد اش كيقول فيها كاين لي بصح تعاطف معاها وعرف مشكيلتها وبقااات فيه وكاين لي جاه داكشي لي شافو غا تبوحيط
وكاين لي بصح تاق بداكشي ولكن ضروري يستهزء حيت كاين واحد الصنف من بني آدام كيتلذذ ملي كيشوف شي حد كيتقطع و مهموم وعندو مشاكيل ..
خرجات نريمان مصدومة كتر كتحس انها بحال شي شخص غير مرغوب فيه
وانها لا شيئ فهاد الدنيا
وانها معندها حد لي يحس بيها ولا يعطف عليها..


خرجات مع هناء وهيا غير ساكتة كتحاول هناء تهضر معاها باش تخرج داكشي لي فقلبها ومتبقاش ساكتة حتا يأسات وسكات وصلات معاها حتا لدار تودعات معاها ومشات فحالها اما نريمان عارفة راسها تعطلات وعارفة راسها ضروري تاكل قتلة وفنفس الوقت كتخمم للحصة دالعشية خصها ضروري تمشي المدرسة ولكن من خلال الهضرة لي سمعات من تلاميذ حرقاتها فقلبها ومقدراتش ترجع بشمن وجه وهوما كيشوفوها غا كتمثل وكاع داكشي لي داز قبالت عينيهم ممنو والو. دخلات لدار على غوات والصداع د جداتها وعمتها وزياد لي كينين فالبيت كيعيط ليها بسميتها بصعوبة. دخلات عندو كتبوس فيه بدلات ليه ليكوش وخرجاتها غادية بيها لسطل د نفيات وهيا تقول سعاد
سعاد : الشايطة بقا ليناا غا الخرا تحطيه لينا تما يقلبنا بالريحة المعفونة
نريمان : انا عمرني حطيت ليكوش هنا وخليتها؟ انا دابا مخرجة الزبل كامل
سعاد : هيا اللولة ولا نقلبو على الق** د مك على راسك...
سكتات نريمان هزات داك السطل لي عامر خارجة بيه وهيا تطلقى امين ولد عمها داخل مع باب زنقة توخر لور حتا خرجات وهوا يقول : اري اختي نهزو اري
نريمان : لا لا غا دخل فحالك انااا غنديه
امين : واري غا نهز معاك ميكونش راسك قاصح. .
هزو هوا وياها حتا خواه ليهاا وقال
: سيري نتي حتا دخلي عاد ندخل اناا موراك
حركات راسها ومشات دخلات غسلاتو فالطواليط ورجعات حطاتو فالكوزينة دخلات لبيت نعاس د جداتها وبدات كتجمع فالريدوات وتهز فالزرابي لي مجموعين فالارض..

دخلات سعاد موراها وقالت : هيي غا بشوية عوتاني خليهم بطبايع فركيهم مزياان انا خارجة لصالون عندك يجي شي كليان..
جمعات نريمان ريدوات وليزور ومنطات خفافين وزرابي كلشي طلعاتو لسطح وبدات تصبن وتشتف فبانيو د الزنك كتشتف وشعرها طايح حداها وعينيها كيدمعوو
نريمان : ياربي الموووت ياارب بغيت غاا نموت ياربي هنينيييي اهنننن اهئ اهئ علاش اربي هاد المحنة علاش
بقاات كتنخصص وتهضر بينها وبين نفسها حتا طلعات رشيدة كتجمع حوايج من سطح
رشيدة : نريمان! كيف بقيتي ابنتي
نريمان : هانا امرات عمي كيف كتشوفني الحمد الله وانت
رشيدة : ايوا هاحنا كنعديو عوتاني بلاوك بدوك الشرواط تصبنيهم لا حول ولا قوة الا بالله مقريااش هاد العشية ولا
نريمان : قارية وممشيتش رجعت كنغيب بزاف هانتي كتشوفي حالي
رشيدة : ايوا شي يديرها وشي يوحل فيها دوك واليدين معرفناا اش غيقولو غدا قدام الله..
الله يرزقك الصبر وهانتي لي بغيتي شي حاجة اجي عندي احبيبة راه دار عمك بحال باك
حركات نريمان راسها وقالت : واخ امرت عمي لهلا يخطيك

هبطات رشيدة بحالها وبقاات نريمان كتشتف وتشلل وتنشر. حتا آذنات المغرب وكملات نشير عاد هبطاات مهدودة مقدراش حتا تزيد لقاات فضيلة فوق سداري جالسة جلستها المعتادة طالقة رجل فالأرض وطاوية رجل ومخدة فحجرها فوق منها تليفون وتليكومند وتسابيح وشادة 2M كتفرج مسلسل تركي وعايشة مع الاحداث.. دخلات نريمان لعند خوها لقاتو ناعس قربات عندو بغاات تبوسو فجبهتو لقاتو كيغلي بالسخانة وكيترعد شدات فذراعو كتفيقو وجهها مخطوط حل عينيه بصعوبة ورجع شدهم خرجات كتجري عند فضيلة
نريمان : بخوف) يما زياد طالعة ليه سخافة بزاف ومكيحلش عينيه شوفيه مالو
فضيلة : طبيبة انا؟ شبغيتيني ندير ليه
بدا دم د نريمان كيغلي ملي كتسمع كلام د جداتها وهيا تقول : واش معندكش قلب؟ واش مكتحسيش؟ واش هادا ماشي ولد ولدك ؟ واش ما فقلبك رحمة !!
خرجات فيها عينيها وقالت : ابنت سوق واش باغا تخرجيلي مرارتي واش باغا طرطقي فياا شي عرق كتخرجي فياا عينيك ابنت الخانزة ابنت ق** شنو غندير لهادمعاق دخوك ديه لخيرية ولا سيرو رميو راسكم فواد
خلاتها نريمان كتغوت ورجعات لبيت عند خوها حاطة يديها على راسو كتشوف حرارتو عالية تالفة
كيف كل مرة ملي كان باقي صغير وهيا معارفة مدير ليه هوا نقطة ضعفهاا متبغيش تشوفو مريض
. رجعت خرجات برا وجداتها مزال كتبرڭم ودعي فيهم مشات لصالون عند سعاد لقات عندها 4 د ناس جالسين وحدة كتدير ليها بروشينغ
عيطات ليها نريمان وهيا خايفة : عمتيي ... عمتيي
تلفات سعاد لعندها وقالت : شنو؟
نريمان : اجي واحد شوية

هضرات سعاد مع كليانة استأذنات منها ومشات تابعة نريمان خرجات فيها عينيها وقالت : شكاين مالناا
نريمان : هبطت من سطح لقيت زياد طالعة ليه سخانة بزاف وكيترعد معرفت شنو ندير ليه عفاك شوفيلياا خويا مالو
هزات يديها لسما كانت غتجمع معاها بتصرفيقة وقالت : يابنت ليهود هادا علاش معيطالي مخلياني سامحة فكليانات وجاياا تقوليلي فيه سخانة تكون فيه حتا جربة نتي وياه تفووو

بقاات نريمان كتشوف فيها بعينين مدمعين ومصدومة من جواب ديال سعاد فحين هوما واقفين حدا باب الدار كيهضرو دخلات رشيدة هيا وبنتها كيضحكو طلعات فيها سعاد وهبطات ورجعات لصالون زدحات الباب فوجههم
شافت رشيدة فنريمان وقالت : مال هادي عوتاني ياك لباس
نريمان : مرات عمي زياد طالعة ليه سخافة بزاف وغير كيترعد مبغاا حتا واحد يشوف مالو
هيا كتعاود وفضيلة مور باب كتصنت على كلامهم شافت رشيدة داخلة هيا ونريمان لداخل وهيا تخباا..
دخلات رشيدة كتحط يديها على راسو وكتشوفو كيترعد وعروقات هابطين عليه ضارت لعند بنتها وقالت : سيري طلعي لبيت نعاس راه تما قوالب لي كان جاب باك ليونس طلعي جيبيهم دغيااا وجيبي ديك كينة زرقاا


مشات بنتها كتجري ونريمان حداها كتبكي مخلوعة معارفة مدير .

رشيدة : نوضي نوضي جيبي شي بانيو د الماا وفوطة هوما لولا

جابتهم ليها نريمان حطاتهم ليها فديك وقيتة جابت ليها وصال قوالب بدات كتفزك الفوطة وتحط فوق راسو وهيا كتقرا قرآن شربوه كينة ودارو ليه القالب د سخانة
كاع الهضرة لي ضارت بيناتهم.. فضيلة من برا جالسة فوسط الدار ناقصة لتلفازة وكتسنط على كلامهم حتا خرجات رشيدة شافت فيها بنص عين وزادت هيا وبنتها بلا حتا كلمة بقات معاه نريمان حتا بدات سخانة كتنزل ليه وخرجات برا لقات جداتها فالكوزينة كطيب روز بالحليب مقدراتش دخل عندها ولا حتا تشوف فوجهها وفنفس الوقت مصارنها كيتلواو بالجوع واكيد حاسة بخوها غيكون كتر منها. خرجات بغات طلع فالدروج وهيا طلل من شقة دالباب على عمتها لقات مزال عندها ناس كتصاوب ليهم وطلعات بالجري لعند مرات عمها لقاتها كطيب العشا كتحمر فخيضات دجاج والخضرة فالفران كطيب.
رشيدة : زيد ابنتي زيد اجي تعشاي معانا.
حنات على يد عمها باستها ورحب بيها بضورو
حشمات ملقات متقول ليهم ورجعت ناضت يلاه تصبحو على خير
رشيدة ؛ فين ماشا اجي جلسي تعشاي معانا يلاه دخلتي
نريمان : لا غير بصحتكم حتا لمرا خرا جيت غا نشوف عمي وصافي
خرجات معاها رشيدة لدروج وقالت : شوفي يحاسبك الله الا كذبتي علياا لي بغيتيهاا اجي ليها راني بحال ميمتك
نريمان : لهلا يخطيك اناا عارفة لي كاين امرت عمي انا نهبط قبل متشوفني يماا
حركات رشيدة راسها وهيا حاسة بيها بغات شي حاجة ومبغاتش تقول. يلاه هبطات جوج درجات وهيا تلفت عند رشيدة وقالت بصوت خافت : مرات عمي كنموت بالجوع انا وزياد وماشي مشكيل انا مشكيل زياد مسكين مكلاش نهار كامل وانا مباغاش ناكل ماكلة د يما ومقادرة ندير والو
رشيدة : ايواا قوليها علاش كديري هاكاا انا منسمحلكش الا مبقاش فيك راسك يبقى فيك غا خوك مسكين انا ندخل نغرف ليكم ماا تاكلو زيدي دخلي..
رفضات نريمان دخل وبقات واقفة فالباب وكطلل من الدروج على سفلي ومخلوعة فالداخل ديالها كتخاف دخل الماكلة وتجي مع جداتها قد قد...
خرجات ليها رشيدة طاسة وخنيشة صغيرة وقالت : يلاه هبطي دغياا
هبطات كتجري بالحفى بلا صندالة وقفات فالباب مور ريدو وطلاات بشوية لقات جداتها مزال فالكوزينة كتقرقرب ودخلات لبيت كتسلت...
وردات موراها الباب حلات طاسة لقات فيها فخيضات دجاج مع خضرة مشرملة وخنيشة فيها جوج تفاحات وخبزة
بدات كتوكل خوها بشوية وتاكل حتا هيا وعينيها مع باب كتحاول تزرب حيت عارفة راسها الا حصلاتها سعاد غتاكل قتلة..
كملات مخلات والو من غير طاسة وقلب ديال تفاح لي بقاا خبعاتهم بين حوايجها كيف عادة..
ورجعات بدلات لزياد نعساتو وخرجات ليكوش حطاتها فالزنقة بقات متكية كتشوف فالسقف وهيا دخل عندها سعاد وقالت :
نوضي الا غتااكلو
نريمان : لا مخصنيش غادي نحفض
سمحات فيها سعاد وخرجات
كتسمع هضرتهم برا وكتسمع معالق كيتقرقبو فالطبسيل ..
هزات كتوباتها كتحفض وتخرج فالتمارين حتا داها نعاس
فاقت فصباح بكري كيف ولفاات ..
كتحس بعضامها مفصلين مقادراش حتا ضور لجهة خرا من قوة التقل لي هزت البارح وصابون وزادتها خلعة د زياد والجوع وارهااق بقات حالة عينيها كتخمم فالقراية وامتحانات وكاع داكشي لي حفضاتو مشاا مبقاش عندها تركيز تنهدات وناضت ضارت عند زياد لقات حرارة نزلات وناضت مشات لطواليط قضات حاجتها وغسلات وجهها رجعت لبيت كتخمم خاصها تمشي لمدرسة وفنفس الوقت بالها غيبقى مع زياد ملي يفيق خاصها تبدل ليه.. تفطرو تجلسو شوية على كرسي بالها مشوش ومعارفة مدير جلسات فالأرض وتكات بيديها على طبلة فصراع بينها وبين نفسها..


نريمان : ولكن انا ضروري خاصني نمشي نقرا الا بغيت ندير مستقبلي باش نداوي خوياا ونعيشو انا وياه بخير وممخصوصين مم والو شنو غندير ضروري خصني نقابلو شكون دابا غيفطرو ولا يبدل ليه. ياربييي رزقني الصبر وعااوني نتجاوز هاد المحنة عيييت اربي عيييت..
ناضت لكوزينة كتقلب حلات الثلاجة لقات فيها روز د بارح فواحد كسرونة شدات كسرونة بين يديها وهزات معلقة كتاكل وعمرات لاخور ف زلافة وداتو لبيت حطاتو فوق طبلة ومشات كتفيق زياد برفق وكتبوس فيه باش يفيق ليها حتا حل عينيه بزز وهيا

تقول : زياد وفيق عفااك غير كول ونبدل ليك ورجع نعس انا خصني نمشي لمدرسة.. بصعوبة حل عينيه بدلات ليه ليكوش وكلاتو بشوية لبسات حوايجها بالزربة غطاتو وخرجات جمعات الزبل مشات رماتو وزادت كتخلف مع الطريق وهيا تبان ليها هناء واقفة حدا واحد بوتيك. قشعاتها نريمان وهيا تعيط ليها تسالمو وزادو كيهضرو.
نريمان : واش جيتي عند شي واحد هناا
هناء : الا راني جيت موراك بغيت ندوز موراك لدار وخفت نجبد ليك صداع
نريمان : تنهدات) اصلا صداع ديماا كاين علاش ايمتا تهنينا

هناء : كيف بقا خوك شوية
حركات نريمان راسها : شوية
مشاو دخلو المدرسة على عينين التلاميذ لي كيشوفو فنريمان وقف واحد شاب على هناء كيهضر معاها ويضحك واقفين فالساحة
الشاب : كيف بقيتي اختي شوية
نريمان : لباس شكرا.
شافت ف هناء وقالت : هناء انا ماشا للقسم ديك ساعة لحقي علياا ..
خلاتها مع داك الشاب ومشات متوجهها لدرج طالعة للقسم وهيا تسمع الغوات ودراري كيجريو والهضرة بزاف رجعات هبطات كتجري لقاتهم مجموعين فواحد البلاصة خاوية مور المدرسة ودراري وبنات كلشي باغي يشوف ويعرف اش كاين سولات واحد بنت حداها وقالت : اش كاين شنو واقع اختي هناا
البنت : اويلي ههه لقاو جوج ولاد وجوج بنات تما كي*** وهجمو عليهم دراري
رجعات نريمان لور عيفاانة الوضع كتفل فالأرض وقالبها طالع كتخيل الوضع قبالت عينيها واول حاجة كيمشي ليها عقلها هيا الأم والأب ديالها بديك علاقة باش جابوها لدنيا كتشوف راسها انها كانت ضحية علاقة متسخة وحتا هيا براسها معندهاش كرامة ولا قيمة كتشوف راسها انهاا لاشيئ ماشي بحال كاع بنات والولاد معقدة فحياتها من هاد ناحية فينما تسمع اغتصاب او علاقة غير شرعية بين جوج كتحس بالضيق وغصة فقلبها كتفكرها فراسها وكتقول يريت لو مكنتش تزاديت..
رجعات للقسم بوحدها دخلات كتشوف فالطاولة حتا دخلو موراهاا تلاميذ الوشوشات فكل جهة والضحك والسخرية دخلات هناء جلسات قدامها وقالت : ناري معرفاش اش طراا عهه؟
نريمان : عارفة وبلاما تعوديلي صافي
هناء : فخبارك شدوهم فالادارة غيعيطو لواليديهم ناري فضيحة يا ختي
نريمان : رفعات صوتها) وصافي اهناء صاااافي قلت ليك صااااافي
قلبات عينيها هناء مراضياش، بيها تغوت عليها قدام زملائهم لي فالقسم
حلات نريمان دفتر وهزات ستيلو وكتبات..
سمحيلي اهناء ولكن راك مغاديش تفهميني..

دفعات ليها الورقة قراتها هناء وقالت : حتا نتي سمحيلي ولكن مديريش فخاطرك

حسات نريمان بلي هناء تقلقاات طوال الحصة وهوما ساكتين شي مكيهضر مع شي حتا خرجو مع 12. يلاه بدات تجمع كتوباتها وهيا تعيط ليها استاذة مشات عندهاا وقفات حدا بيرو وقالت : كيف بقيتي انريمان شوية دابا رتاحيتي
نريمان : ببتسامة) الحمد الله
أستاذة : بغيت صراحة نساعدك ولكن معرفتش شنو ندير
ملقات نريمان متقوليها وبقات ساكتة
أستاذة : واش محتاجة شي حاجة نشريها ليك ولا باغا شي حاجة نعاونك فيها
نريمان : لا لا مبغيت والو شكرا

جبدات أستاذة صاك من تحت بيرو ومداتو ليها.
أستاذة : هادو شي حويجات خوديهم نتمنى يعجبوك راهم مزال نقيين ومصبنيين وفيهم جداد مهم هانا ملي تحتاجي شي حاجة قوليهالي

شداتهم نريمان منها وهيا حشمانة شكراتهاا وعودات وعينيها فرحانين
أستاذ : شوفي هاد ايام مخصكش تبقااي تغيبي سمعتيني راه امتحانات على ابواب وفكري فمستقبلك هاد الضغوط وهادشي كلشي كيعيشو ولكن خصك دير مجهود باش تزيد لقدام وتقدر توصل صافي المهم كوني قوية.
رسمات أستاذة ابتسامة على وجهها وهيا كتوجه ليها نصائح عودات نريمان شكراتها سلمات عليها وخرجات مع باب لقاات هناء واقفة فالدروج كتسناها..


لقات هناء مزال كتسناها واخا باين على وجهها مزال مقلقة..
شافت الصاك لي فيديها مبغاتش تسولها وزادو غاديين فصمت حتا قالت نريمان :
مزال مقلقة مني؟
هناء : لا عادي
نريمان : وصافي اصحبتي سمحيلي راه مبقيتش عارفة راسي اش كنقول
هناء : وهااانية يلاه تغداي معايا
نريمان : اه يا ختي خصني نمشي دغيا لدار راه مزال تبعاني روينة د شغل...
كملات هناء معاها حتا لدار كيف عادة ورجعات بحالها..
دخلات نريمان لدار على انضار جدتها لي كتشوف فالصاك لي فيديها..

حطاتو ومشات لعند زياد لي حال عينيه باستو وهزااتو لكرسي ديالو حطاتو فيه وخرجاتو لقاات مكاين حد حتا جداتها خرجات... دخلات لكوزينة حطات اتاي والخبز وزيتون وزبدة وجلسات كتاكل وتوكل معاها زياد... سمعات شي حد هابط فالدروج وناضت بالزربة لقات امين لابس توني وسبادري
نريمان : امين غادي تلعب الكورة هه
امين : اه دراري كيتسناوني برا
نريمان : مصاب كن كنتي قريب تخرج معاك زياد شهوراا مسكين ماا شاف الضو دالله
امين : اريه اختي نخرجو نتي مكتقوليلي والو اماا اناا نخليه قدامي حتا نكمل ونرجعو معايا..
بفرحة) : بصح تقدر ديه معاك دابا؟
امين : اه ودغياا
نريمان : هاهوا لابس مسالي.

دخل امين جر الكرسي وخرجو معاه ونريمان واقفة فالباب حضياهم حتا مبقاوش كيبانو كملت مكلتها وناضت جمعات الصالة طلامط ومخاذ وزرابي كلشي هزاتو طلعااتو لسطح دوزات عشيتها كاملة تما ورشيدة كتعاونها بالتخبية عنداك تشوفها سعاد.
حتا كملات وطلع عندهم امين لسطح لقاهاا كتنشر..
امين : هاناا دخلت زياد لبيت هبطي اختي راه وسخ وملقيت كيف ندير نبدل ليه
يلاه سمعاتو نريمان هبطات كتجري لقات جداتها كتغوت هزات داتو لطواليط حيدات ليه حوايج بدلات ليه وداتو لبلاصتو مسحات الكرسي وخرجاتو برا ورجعات عند جداتها وعينيهاا حمرين.
نريمان : وصافي صافي اش طرااا ياك فزڭ حوايجو وانا غنصبنهم ليه ياك مفزڭش ليك فراشك ولا حوايجك...
فضيلة : يه ابنت سوق كتجاوبي معايا
خلاتها نريمان حلقها خارج وطلعات لسطح كتفل
نريمان : اووف عرفتي امرت عمي اناا مبقيتش صابرة شي نهار غادي نوقف فالشانطي ويضربني شي كاميووو ولا نرمي راسي من هاد السطح اااهئ اهئ اهئ هاناا فين قلتها ليك
رشيدة : اويلي استغفري الله ابنتي دابا امور تقاد وتزوجي بشي ولد ناس يستاهلك وينسيك فكل ما داز عليك...
نريمان : بسخرية) شمايت بحال هاداك لي سميتو بابا هوماا لي موجودين الله يقطع رجال فينماا كانو انا بغيت غا خويااا يعيش مرتاح ومخاصو خير..
رشيدة : كلشي ابنتي قريب عند الله غا صبري...
كملات نشير زرابي بالمساعدة ديال امين.
وهبطات بحالها لقات جداتها كطيب العشاا وسعاد كتعيط ليها من صالون مشات لعندها وقالت سعاد :
دخلي راه كليان معمر علياا اجي عونيني
وقفات حداها لي بغاتها كتمدها ليها وهيا مبتاسمة فوجهه كليان وكتعامل، معاهم بلطاافة.
حتا كملو وخلصو سعاد وهيا كتحسب حدا نريمان لي كتشطب الصالون وتقادد فالمخاد ...
سعاد : عرفتي اش غيجيك مليح غدا صباح غنبدا نوريك كيف ديري سييشوار وبابيليز راه كيجيو عباد الله وكنبقى واحلة فيهم حتا ديك مسخوطة لي كانت معايا كانت تخدم وتخبع الفلوس وكتقولي والو مكاينة خدمة
نريمان : بصدمة) ولكن انا غدا عندي القرايااا صباح وعشية معندي كي ندير وزيدون هادشي معنديش معاه
سعاد : شناهوااا معندكش معاه؟ واناا شمن ربح عندي فيك شداك نتي وخوك فداري؟ وموكلاك من رزقي وكنقري فيك ودابا كتقولي هادشي معندكش معاه وممسلياش؟
هبطات نريمان عينيها فالأرض كتغلي من الداخل ديالهاااا وعينيها حومر وهيا كتسمع لهضرة د سعاد لي بحال السم...
اينا قراية لي كتقريهاا واش كتفكرها بكتوبة؟ ولا بخلاص ولا ملي كتحتاج شي حاجة كتعطيها ابدااا من غير عمها لي كيشري ليهاا كتوبة وناس لي كيعطيوها وكيقدمو ليها مساعدة... واصلا هيا عايشة فالدار بحال خدامة تمارة كلهااا عليهاا والخدامة فالديور وكتخلص . اما هيا منها كيااخدو محاااس بيها حد.
حسات بالقلب ديالهاا كيضرب بالجهد وكترعد غا بوحدهاا هادي هيا الحالة لي كتوصل ليهاا كل مرة فاش كتعصب.
دخلو لصالة وهيا ساكتة سعاد كتعاود لمهاا على كليان لي كيجيوهااا تعيب على هادي وتهضر فهادي
ونريمان جالسة فالطرف غا كتشوف وراسها مرفوع.. حطو العشاا خرجات زياد فالكرسي ديالها كتوكل فيه اما هياا الشهية تشدات ليها..


ناضت دخلات خوها لبلاصتو بعدماا بدلات ليه ليكوش وغطاتو.. جلسات فبلاصتهاا كتحفض وتخرج تمارييين حتا كملات كتسمعهم برا كيتفرجو ويضحكو... هزات كتابها بين حويجاتها لي فالمااريو كتكتب فيه بعض الخواطر ..
كتبات بعض الأسطر ورجعاتو لبلاصتو معندهاا ميدار لا تليفون لا اصدقاء مقربين من غير هناء لي كيطلقاو غير فالمدرسة... لا عائلة حنينة لا واليدين عايشة ب أجنحة منكسرة...
تنهدات وهيا كتشوف فالسقف كضور على ليمن كتلقى زياد ناعس كضور على شمال كتلقى الحيط قبالتهاا ليل كولو وهيا كتبكي حتا فشات قلبها عاد نعسااات ..
فالصباح الباكر ناضت مدقدقة.. نفس الروتين اليومي بدلات لخوها فطراتو ورجعاتو لبلاصتو. تفكرات الصاك لي عطاتها استاذة كانت خزناه تحت الطبلة جبداتو يلاه بغات تحلو لقاتو محلول والحوايج لي فيه. مرونين عرفات ان جداتها جات قلبات شنو فيه واكيد غتكون هزات منو ليها وسعاد كيف عادة...
شافت ديك حويجات عجبوها واخاا ماشي حاجة
رجعاتهم لصاك ولبسات قميجة تحت خصرها وسروال توب وطبلية وفولار صباط ارضي ..
خرجات كتخلف حتا وصلات المدرسة دوزاات نص نهارهاا فالقراية ورجعات بحالها كيف عادة رفقت هناء... يلاه دخلات لدار وهيا تشدها سعاد بالهضرة من باب
سعاد : شنو قلناا لبارح ياك قلتلك غنوريك باش تعاونيني فالصالون
نريمان : وراه عندي امتحانات مبقااا ليهم والو واش انا غندوز وقتي فالصالون وملي يجي امتحان شنو ندير.
سعاد : وشمن ربح عندي انا فقرايتك الله الله غتخرج غا محامية ولا وزيرة..
اوالله ابنتي لا طفرتيه حنا ديك قراية سلينااا منها كاااع غتجلسي فدار سمعتي غتخدمي معايا فالصالون مزياااان تبارك الله بقيتيلي غا نتي فالشروط
نريمان : كتنخصص ) واناا مكتعجبنييش هاد خدمة ممرتحااش فيهاا العام جاي عندي الباك ويحن الله شنو ندير انااا باغا نقرا اما هاد الخدمة معجبااانيش مباغاااش ندخل ليهاا

ناضت فضيلة من بلاصتها وقالت وهيا مخرجة عينيها : اوالله لا عودتي قريتيه اوالله لا طفرتيه وغتخدمي بزز منك داكشي لي دوز عليناا باك والله حتا نعصروووووه منك سمعتي كبرناااك حتا طنشتي ودابا كتخرجي فينااا عينييك ابنت السوق اماا كون حطيناك فشي زنقة كون فرسوووك لكلاب ولا متي غا بالبرد وتهنينا منك وحنا هزينااك ملي كنتي لحمة امك حتا بزولتها معطاتها لك ودغيا سمحات فيك وزادت ...

ردات عليهم بصوت متقطع وهيا كتبكي وصدرهااا كيطلع وينزل : وانا شنو ذنبي انا لي قلت ليهاا ولديني علاش درتو فيااا خير كون من ديك ساعة رميتوني ومنوصلش لهاد الدل اللهم الموت

من البيت سمعاتو كينين وكينادي بسميتها باحرف متقطعة قالت : وهادا حتا هوا اش ذنبوو واش قال لربي خلقني هاكاا واش قال لمي ولديني واش قال لبا سمح فيااا وزيد اش ذنبو حتا هوااااا ربي بغااا يشوفناا هاكا. وهكاك ملقيناا محنة ملقينا لي يحس بينا. سمحات فيهم ودخلات عند خوهاا وهيا تشدها سعاد من شعرها وزدحاتها مع الحيط تزادو فيهاا 10 بقات كضرب فيهاا بلا شعور ومع هيا مريضة بالاعصاب مكتعرفش راسها حتا فين كضرب.. قربات فضيلة كتفك وكتقول : اويلي عنداك طيحي عليناا روح بعدي منهااا صافييي هنينا
كتشوف نريمان خرجو. عينيها وحماار وجهها نفس مبقاتش كطلع ليهاا. رخات منها سعاد وبقات كتعطيها فالركل الكرش حتا زواتها ..

تقطعات النفس فنريمان وخوهاا كيشوف فيهاا بعينين مدمعين مقااادر يدير حتا حركة ولا يقول حتا شي كلمة.
خرجات فضيلة سعاد لوسط دار بزز ولاخرا مزال مغزفة خااصهاا تاكل من لحمهاا ومتبردش .
بقات نريمان مزوية فالبيت بدون حركة كطلع النفس بصعوبة مقدراش تحرك صبعهاا وحتا ريق لي فمهاا مقدراش تهبطوا اما زياد كيبكي حداهااا وكينين باسمهاا..
بقات فديك البلاصة بدون حركة حتا ليل فمها ناشف وشاحف باغا غا شربة د الماا ومقدراش تنوض وعينيهاا غير كيبكيو هكاك دوزاات ليلتهاا كتشوف فخوهاا مقدراش حتا تهضر معاه او تنوض توكلو وديه يقضي حاجتو ..

في اليوم موالي صابحة فبلاصتها بالسخانة والرجفة ..عينيها مقدراش تحلهم كتشوف فزياد وكيبان ليهاا غا بحال ضبابة.. وصلات 10 دصباح دخلات جداتها لبيت وهيا تبدااا تغوت..
فضيلة : اويلي ريحة كدوخ دارهم فسروالو ؟ ومااديتيهش لطواليط؟

بدون رد
زادت قالت : معامن كنهضر انا واش منيضااش تديه لبيت الماااا ابنت سوق صابحة ناعسة لقيتيها من جنة والناس
بدون رد..


حلات عينيها بثقالة وهيا كتشوف فجداتها كتبان ليها غير ضبابة ..
وترجع تشد عينيها.
قربات حداها كتهزز فيها وتعيط وهيا كتحس وتسمع ولكن بدون حركة .
خلاتها وخرجات بقات نريمان على نفس الوضعية غير شادة فكرشها وكتسمع صوت زياد لي كينادي باسمها بأحرف متقطعة...
ضارت بصعوبة لعندو حلات عينيها كتشوف فيه وبدات كتسحت بيديها لعندو عنقاتو وهيا حاطة راسها حدا راسو وعينيها مدمعيين..
رجعات جداتها دخلات لعندهم لقاتهاا معنقة خوها وناعسة بقاات كتشوف فيهم بجوج وقربات بشوية هزات مانطة دارتها عليهم وخرجاات.. حتا حلات نريمان عينيها بعد العصر.. بالشقيقة فراسها وكرشها لي مزال كضرهاا ولحمها المفصلة عليهاا.. ناضت بشوية شادة فالحيط
على عينين جداتها لي جالسة حدا تلفازة.. مشات لطواليط وقلبهاا مروع بقات كترد غير الرغوة حتا تجرحات حنجورتها. رجعات لبيتها كتمشى بصعوبة وهيا تنوض جداتها : دوزي اجي تاكلي راه من لبارح مكليتي وشوفي خوك راه يكون وسخ حوايجو عوتاني راني بدلت ليه سيري خرجيه..
دخلات نريمان لبيت مقدراش تهز زياد الجهد والو جلسات حداه فالطرف مغمضة عينيها كتحس باللحم ديالها طالعة معاهاا الرجفة دخلات لبلاصتها وهيا كترعد وسنانها كيتقرقبوو.

يوم على يوم وهيا مريضة مكدوقش الماكلة حالها كيزيد يتكفس كل نهار كتقول صافي غنبات منصبح لأكثر من أسبوع..
فقط جداتها لي كتدخل ليها ماكلة بالنكير وتغطيها وتوكل خوهاا وتبدل ليه وهيا عايفاه حوايح لي توسخو كترميهم عكس نريمان لي كانت تصبن ليه واخاا يدير شنو ما دار ..
بعد ايام من المرض لي خلا نريمان طاحت، فيهم فالفراش ناضت فيوم جديد مزالة كتحس بالعيااء والدوخة لي مزال شداهاا. مشات لطواليط غسلات وجهها ورجعات لعند خوها حتا هوا بدلات ليه وخرجااتو فالكرسي.. دخلات لكوزينو باش توجد الفطور وهيا تدخل موراها جداتها بلا متكلمها.
قربات عندها نريمان شدات يديها باستها وقالت بالآسى : يما ..
خصني نمشي المدرسة غيفوتوني الامتحانات
خرجاات فضيلة عينيها فيها وقالت : ياك قلنا ليك ماكاين قرايا خاصك تصوميناا بزز 3 ايام. راه مكاين قراية
نريمان : يما انا مزاوكة فيك لي بغيتي نديرو غير متخرجونيش من قرايااا باركة عليااا هاد سيمانا لي ممشيتش فيهاا ودازوني شحال من حاجة.
قالت فضيلة وهيا كتخلط السميدة للحرشة : ها عمتك يلاه، سيري بينك وبينهااا انا مسوقيش...
شافت فيها نريمان ب آسى ومشات لبيت دعمتها لقاتها مزال ناعسة . بدات كتفيق فيها بشوية حتا ناضت
سعاد : شكاين
نريمان : عمتي خليني نمشي المدرسة الله يخليلك وليدات خليني نقرا راه العام جاي عندي باك ومبغيتش نضيع فقرايتي.
سعاد : جوج هضرات نقولهم ليك ديك قراية اوالله لا رجعتي ليهاااا واخاا تحلميييهااا واخاا منعرف اش ديري ومرا خرا تجبديلي حس القراياا نوريك قرايااا اش كتسوا نوض غبر عليااا خليني نعس..


خيبة آمل صابت نريمان بعدماا خرجات من عند عمتهاا وهيا منكسرة شنو صافي قرايا مشات!! احلام مشااو!! كيفاش غتقبل الوضع كيفاش تقنع راسهاا ان دوك اهداف لي كانت حاطة فالمخيلة ديالها تبخروا.. ودوك آحلام لي كانت كتكتب فمذكرتها صافي مبقى منهم والو...
جلسات فطرف الفراش كتشوف فنقطة واحدة حتا خرجات جداتها من كوزينة هازة الحرشة فيديها وقالت : نوضي جيبي سينية د الفطور نوضي راه رجال شابو وحفات ليهم فالقرايا وراهم بيطاليين مزاحميين مع عيالات على تليكومند بقااات غا البنت غتخدم وطفرو..
دخلات نريمان هزات صينية وجلسو كيفطرو يلاه كترفس وتوكل خوهاا وعقلهاا مرفووع حتا كملات وجمعات الدار وجداتها طيبات الغدا .. تغداو وجمعات نريمان طبلة وهيا تقول سعاد :يلاه سربي دغيا راه اليوم غيجيو عندي ناس غنوريك باش تبداي تخدمي لكلياان..
سكتات نريمان وخرجات معاها لصالون كتوليهاا فواحد المونيكة عندها شعر حقيقي.. نريمان غير كتشوف فيها داكشي مدخلش ليهاا فراس واخاا عيات متحاول تعلم جاها صعيب بزاف.. حتا صوناا تليفون ديال سعاد كتهضر بلباقة وكترحب بالكليان لي جاي فالطريق..
قطعات مكالمة وقالت بالزربة :
مسحي هاد غبرة دغياا راه هادو لي جااين واحد المبعكييين..
نريمان : خصني ندخل نشوف زياد، بعدا هوا اللول
سعاد : بنرفزة ) زياد ها امي حدااااه يلاه سربي دغياا
..مسحات نريمان معاها الغبرة ودوزت الجفاف بالزربة وهوما يسمعو باب كيدق.. فتحات ليهم نريمان اما سعاد جلسات بكل تكبر على واحد الكرسي دايرة رجل على رجل سلمات عليهم ورحبات بيهم وناضت بدات كتخدم ليهم اما نريمان غير كتمد ليها لي خاصها وتساعدهاا فالامور بسيطة وكتشوف بعينيها كيفاش كتخدم .. وهيا محملاش الوضع.. اه دومين زوين ولكن هيا عمرها فكرات انهاا دخل ليه ولا تمشي فيه الهدف الأول والأخير كان هوا الدراسة..
كانت كتحلم بحال كل بنت دير مستقبلها وتفرض شخصيتها فالمجتمع وتكون عندها قيمة.
خدمت سعاد لكاع ناس لي جاو فداك النهار اما نريمان غير كتسلت كتمشي طلل على زياد وترجع فالبلاصة حتا كملو فالليل وشدو صالون ودخلو بحالهم . جالسين مجموعين على طبلة كيتعشاو ونريمان كتوكل خوهاا وتمسح ليه بشوية حتا كملو وبقاات جالسة معاهم كيتفرجو فالتلفازة شافت زياد عينيه كيتشدو بدلات ليه وداتو لبلاصتو نعسااتو ورجعات خرجات جالسة فطرف سداري..

سعاد : شفتي الخدمة كي دايرة! راه خصك تعلمي باش تولي طيري فهادشي . باش انا الا مشيت لشي عرس بعيد هانتي هناا تخدمي بوحدك بلاماا دخل معاك شي قمقومة..
نريمان : بخوف) واا. وو خليني نكمل قرايتي يااك وهانا نخدم معاك فالصالون
هزات سعاد يديها لسماا كانت غتجمعهاا بتسرفيقة حتا رجعت نريمان لور كانت غطيح..
سعاد : واش باغاا طرطقي فيااا شي عرق ولا مالك. راه قراياا لا لا لا لاااااااا ودخليهااا لمخك راه والله لا رجعتي لديك المدرسة يلاه بررد..
حذرات نريمان عينيها فالارض صافي قطعاات امالها فمراا..
دخلات لبيتهاا حاطة راسها على مخدة حاسة بنفسهاا ضايقة عليهاا القهرة لي فقلبهاا والكياا لي كتعيشهاا ميحس بيهاا حد من غير لي عايش ضروف بحالهاا حاسة بصدرهاا كيزيد يتزير عليهاا.. بقات فداك الوضع ليلة كاملة كتخمم أنها تخرج من دار معندها حتا شي حل.. ولكن فين غتمشي! وزياد معامن غتخليه وحتا الا بغاات تديه معاها شكون هادا لي غيقبلها،، العم ديالها يلاه مكافي مع ولادو والضيق عندو فالسكنة ديالو.
هناء!! واش تمشي عند هناء! ولكن واليديها ميقبلوهاش او يقدرو يقبلوها نهار يوماين ومن بعد ميقدروش يخليوها معاهم... داخت وهيا كتفكر فهاد الامور حتا آذن الفجر عاد داتها عينيها...


الأيام كتشابه فحياة نريمان لي كتعيش نفس الروتين يوميا كتحاول تتأقلم مع الوضع جديد .. نهارها كيدوز غير فشغل دار نڭير دجداااتها وغوات د سعاد وتسرفيق على اقل حاجة .. مقابلة د زياد وصالون كدوز فيه نهارهاا حتا 8 دعشية او بعد مرات حتا 10 د ليل على حسب الكلياان..
بدات كتخدم لناس واي حاجة شافت سعاد كديرها كتبغي تعلم ليها

حطات قرار فراسها انها غتمشي فهاد الخدمة مؤقتا بيدما تجمع الفلوس ومن بعد غتهرب هيا وخوها وتكري فشي بلاصة بعيدة وتعاود العام ديالها لي ضاع .. تخدم وتكمل قرايتهاا رتاحت نسبيا بهاد القرار لي خدات .. وبغات تجتاهد باش تزيد تعلم وتخدم لناس وتشد الفلوس. ولكن سعاد حاضية معاهاا مبغهاش تعلم 100% باش متاخدش ليها الحرفة باغا تعلم غا داكشي ساهل ..
دازو اياام وفيوم من ايام ..
سمعات نريمان دقاات فالباب وهيا فالكوزينة كتعجن
لوات عجينة دغيا وغسلات يديها خرجات كتمسح فبيجامتها طويلة
يلاه حلات باب وهيا تلقى هناء واقفة ببتسامة.. عنقاتها ورحبااات بيها قالت هناء وهيا كضور عينيهااا مور نريمان :
ويماك متقول والو الا دخلت!
نريمان : يما مشاات لسوق عاد خرجت وعمتي ناعسة زيد...
دخلات هناء معاها دخلاتها نريمان لكوزينة ردات موراهم الباب وجلسات كتكور فالعجين
هناء : ايوا عوديلي مالك علاش مبقيتيش كتجي المدرسة
شافت فيها نريمان بالآسى وبدات كتعاود ليهااا وتبكي بصوت خافت وكل مرة كطلل عنداك تكون سعاد فاقت وكتسنت عليهم..
هناء : ياختيي ودابا شنو غتبقااي غا فالدار ولا كيفاش صعيب هاد الحالة راه ديما استاذة سناء كتسولني عليك وراهاا جات واحد نهار لهناا وقالت ليها شي وحدة نتي مكينااش
حلات نريمان فمها بصدمة وقالت : وايلي ايمتااا جات انا من نهار لي حبست يلاه كنمشي نرمي الزبل ونرجع دغياا
هناء : اناا نويت غا كذبو عليهاا ونتي كنتي فالدار وهوما قالو العكس شنو نمشي نهضر معاها تجي تهضر مع عمتك
نريمان : ميبغيوش اختي واااخاا ديري لي درتي المهم انا قلت ليك شنو غندير غنخدم معاها ونجمع فلوس وديك ساعة نخرج من دار ونمشي نكري..
هناء : واجي عندنا لدار راه هانية وعائلتي يفرحوو بيك
نريمااان : لا لا لاااا صافي انا قلت ليك اش غندير
هناء : وهاد ايام لي خدمتي معاهاا خلصااتك بعدا عطاتك شي حاجة..
حركات راسها بالنفي وقالت : مزال معطاتني حتا درهم ديك نهار قالت ليا غنجمعها ليك..
هناء : ايوا مصاب غا تعطيهالك عوتاتي مت....
سمعو باب تحلات وجداتها كتعيط خرجات عندها نريمان هزات من يديها تقدية وهناء واقفة فوسط الدار شافت فيها فضيلة كطلع وتهبط فيها وهيا تقلب وجهها.. سلمات عليها هنااء وقالت لنريمان : يلاه نخليك اختي تهلاي فراسك بزاف
حركات نريمان راسهاا خرجات معاها لباب زنقة تودعات معاهاا دخلات يلاه راجعة الكوزينو تكمل شغلها وهيا تقول فضيلة : شكون هاد مقزبة لي جاايا عندك
نريمان : كتقرا معاياا
فضيلة : اييه هادا هوا الربح لي كتمشيو تعلمو فديك المدرسة غا تسلڭيط
سكتات مرداتش عليهاا خلاتها كتنڭر.. كملات نريمان شغلها دوزات العشية ديالها فالصالون كليان بزاف كملو معطليين.. حتا مسحات وجفاات ونقات الدنيا عاد دخلات لدار.. تعشاات وهيا مهدودة باغا غا تنعس. بدلات لزياد وهزاتو حطاتو فبلاصتو عاد نعسات..
صباح وهوما كيفطرو شافت نريمان فسعاد وقالت : عمتي ا اييمتا غادي تعطيني فلوس
سعاد : هزات حاجبها) ايناا فلوس
نريمان : قلتيلي غنجمعهاا ليك عاد نعطيك راه كتر من 20 يوم وانا كنخدم معاك ومحتاجة دابا
ضربات سعاد فالطبلة بالجهد وقالت : شمن فلوس غنخبع ليك بالسلامة الماكلة فابور نعاس فابور دوشي وتصبني فابور وخصك نخلصك؟
اري بعدا نتي خلصيني فالكرا والماكلة عليك وعلى هاد خوك وديك ساعة نتحاسبو..
شافت فيها نريمان بالآسى وهبطات راسها ملقات باش ترد عليهااا
غوتات سعاد حتا عياات ونريمان غير ساكتة.. دوزات نهارهاا كيف ديما الصالون وترجع مهدوودة ورجليهاا تنفخو بقوة الوقووف والعيااء.

بعد اسبوع وبيوم الأحد نريمان وسعاد جالسين فالصالون مزال مجا حتا كليان
سعاد : نهار منحوس سلامة ياربي

شافت فيها نريمان وضورات عينيها كتشوف فواحد اللوحة معلقة فالحيط ويديها على خدها...
سعاد : زيدي يلاه ندخلو بحالنا


دخلو بحالهم جالسين.. سعاد كتهضر ابيل فيديو وفضيلة متبعة المسلسل التركي المعتاد عندها وتسابيح فبيديها.. اما نريمان دخلات الكوزينة تنصب العشاء وهيا كتقطع البصل سمعو الدقان فالباب وهيا تعيط ليها سعاد . غسلات نريمان يديها وخرجات حلات الباب وهيا تشوف هناء واقفة مع مرا لابسة جلابة هازة فيديها كرطونة بيضاء وشاب موراهم
.. سلمات هناء على نريمان وسعاد من داخل كتعيط وتقول شكون؟
سلمات على المرا حتا هيا مبتاسمة فوجههم
ضارت المرا عند شاب وقالت ليه : صافي اولدي ديك ساعة نعطيو ليك

حرك راسو وهوا كيشوف ف نريمان ببتسامة كذالك هيا ابتسمات فوجهو شافتو ركب فسيارة لي كانت واقفة حدا بابهم وزاد.
ناضت سعاد خرجات عندهم وهيا تقول المرا..
ندخلو ولا نبقاو غير هناا هه
فتحات ليها نريمان طريق ببتسامة وكذالك سعاد سلمات عليها وهيا كطلع وتهبط فيها دخلوهم لصالون سلمات على فضيلة وجلسو مجموعين..
ابتسمات السيدة فوجههم وقالت : سمحو ليناا على هاد الدخلة هه ونتوما معرفييناش..
شافت فضيلة فهناء وقالت : نتي لي جيتي داك النهار عند نريمان.
حركات هناء راسها مبتاسمة وقالت : هادي ماما جات بغات تهضر معاكم.

فضيلة : اييه مرحباا

ام هناء : هه ايوا شغادي نقوليكم انا بنتي كتقرا مع نريمان وديما كتشكر ليا فيها وتعاود حبيتهاا قبل منشوفها( شافت فنريمان) تبارك الله ماشاء الله. ايوا شغادي نقوليكم انا جيت نخطب لولدي الا قبلتو عليناا هوا قاليا امي خطبيلي شي بنت ناس تكون معقولة ورزينة كي كتشوفو هد الوقت بنات كيطيرو مبقينا نعرفو لي يصلاح ولي ميصلاح. ايوا وجيناا قاصدينكم.
هزات سعاد حاجبهااا كطلع وتهبط فيها وقالت : بنت مزال صغيرة وديما كيجيوها الخطاب ومكتبغيش كتقولك هياا باغا غا تقرا مخصهاا والو
شافت ام هناء فنريمان وقالت ببتسامة : حنا ابنتي ميخصك معانا خير ولدي طرونكيل باغي بنت ناس لي تكون بيه وانا مفيااش قوة الصداع غتعيشي مرتاحة
سكتات نريمان مقالت حتا كلمة وهناء جالسة حداها كتوشوش وكتقوليها راكي عجبتيه وباغي يهضر معاك....
هزات عينيها فسعاد وهيا تشوفها كتحرك ليها راسها بالنفي. بمعنى لاا
أم هناء : ايوا شنو قلتو
فضيلة : ولدك فاش خدام بعدا
أم هناء : عايش ف اسبانيا خدام تما فواحد الشريكة المهم ممخصوص من حتا حاجة وعندو السكينة معايا فالدار
نطقات سعاد وقالت : المهم تخليو لينا شي شوية دالوقت هادا الزواج والدوام انسان خصو يفكر
فضيلة : ويلا كانو مكتابين راه حتا واحد ميفرقهم
ابتسمات فوجههم ام هناء وبدلو الموضوع كيتعارفو وكيهضرو فمواضيع خرا. اما نريمان ناضت الكوزينة كتوجد اتاي وهناء واقفة حدا راسها كتوريها تصاور خوها وكتعاودليهاا بلي ديما كتعاود ليهم عليهاااا وبلي خوها عجبو الحال وعجباتو نريمان من خلال تصاور لي عند هناء مرة مرة كانو كياخدو شي سيلفي، وكيبقاو عندها تصاور وعجباتو كتر، ملي جاب امو وختو وشافها مباشرة ورسل لهناء مسج كيقوليها عفاك قنعيهاا وراها عجبااتني.
ملقات نريمان متقول حيت آخر حاجة كانت كتفكر فيهاا هياا الزواج راسهاا داخ وتفكيرها تشوش.. خرجات ليهم اتاي وهنااء موراها هازة طبسيل دواز اتاي،.. قطعو الحلوة لي جابو ناس معاهم تشاركو الطعام وبقاو شوية جالسين وهيا تقول ام هناء : ايوا ابنتي عيطي لخوك نمشيو صافي هادا الجهد..
سعاد : ايوا هانتوما جالسين مزال الحال
ام هناء : هه لا لا حبيبة الله يلاقينا فشي ساعة د الخير المهم هاد ايام نرجعو عندكم ان شااء الله
فضرف دقيقتين..
وصل الشاب بسيارتو حدا باب دار كيكلاكصوني تسالمو بيناتهم وخرجو ونريمان معاهم وسعاد من اللور دايرة يديها على خصرهاا وعاقدة حجبانها.. شدات نريمان الباب وخلات وهيا تقول سعاد : شغتك عاجبك الحال .


شافت فيها نريمان وهبطااات راسها الأرض . جلسات فطرف الفراش وسعاد جالسة قبالتها دايرة رجل على رجل كتغامز هيا وأمها ..
سعاد : ايوا شنو قلتي موافقة عليه!

نريمان : معرف شوفو نتوما
فضيلة : حنا معندنا منشوفوو نتي مولات الري وشوار حنا معندناا علاش نحرموك من رزقك الا جاك.
سعاد : ههه ويه امي عندها الحق غير هوا فكري مزيان قبل منردو على الناس
نريمان : الصمت
سعاد : ياكما يحسابليك زواج داكشي لي كتشوفيه فالأحلام راه غيررر كذوب الواقع راه حاجة خرا.

فضيلة : كتغمز سعاد) سبعة ايام د الباكور دغيا كدوز كيبقى غا القاصح
سعاد : كون كان الزواج فيه الربح كون راني مزال فداري وجامعة ولادي هانتي كتشوفي حتا ولادي حارمني منهم وحتا هوما مكيحملوش يجيو عندي كرهم فمهم راه رجال سلعة وحدة وسوليني انااا نقولك
فضيلة : راجل عطيه جوج حوايج فراش والماكلة يعطيك بالضهر والله لا عقل عليك واش مريضة ولا كتوحم ولا مخصوصة واش مكسياا ولا عريانة الا تفكرك من العيد العيد مقالها حد لحد.. الا طحتي فشي واحد عندو شوية د الفلوس راه يقضي بيك نتي لي فدار ويكمل فالزنقة. اماا الا ديتي شي مزلوط هييهاااات خبزة متلحقيهاش معاه ويطمع فيك نتي تخدمي وتوكليه..
سعاد : ايييه ويغرقك ولاد يضيع ليك شبابك وزينك وصحتك ويبقى هوا كي العود ميبقاش حتا يشوف فيك داك الساعة غيهرب غا لزناقي يشوف لي عاد طنشو ومزاليين طريين
فضيلة : راه لي مطلق راه مصبرش اما لي ممطلقينش راه غا ساكتين وصابرين على همهم وهانتي تشوفي شانطيو من باك وامك.
سعاد : مهم حنا مغاديش ندخلو فيك بغيتي تزوجي الله يعرضك السلامة اناا معندي باش نديرلك العرس هانتي كتشوفي الحالة الماا والضو والمصروف راه معنديش.. مهم نديرلك الكغيط ديالك والله يجيبلك التسير
نريمان : بخوف) وو وو زياد؟
سعاد : هههه معلوم غادي تديه معاك علاش فين غتخليه
فضيلة : ايوا غا طلبي الله الخطيب يقبلك بخوك
هييا مكيقبلوش حتا نسيبة لي كتهلا فنسيبها وتخلي ليه غا الحاجة مزياانة وتوصي بنتها وتعاود عليه عندهم نسيبة فحال دم د سنانهم يالطيف بقاا غا خوك وزيد عليهاا معاق
سعاد : ايوا امي شوار شوارهااا حنا غا كنصحوهاا مهم نتي تعرفي مصلاحتك فين هيا راكي كبيرة زعمة وبديتي تفهمي راه 16 عام عندك..
لزمات الصمت فقط كتسمع لكلامهم وكتخيل داكشي لي كيقولوه ليهاا..
سعاد : ونوضي نوضي كملي ليناا على داك العشاا راه بغينا نعسوو..
دخلات الكوزينة وجدات ليهم العشااء وعقلهاا مرفوع دوخوهاا بكلامهم وبقاات كتفكر غير ف زياد متقدرش تزوج وتخليه وحتا الاا خلاتو تقدر متنجحش فعلاقتها الزوجية وترجع مطلقة او كيف قالت سعاد بالولاد وتبقى واحلة وتزيد هم هميين وترجع لدار فالكأبة والغمة.. حطات ليهم العشاا وهيا مزال كتفكر اما هوما معاودوش جبدو ليهاا الموضوع غير كيتغامزو بيناتهم.
نعساات ولغدا نفس الروتين من شغل الدار لصالون لي بدات الحركة كتقلال فيه قليل فين تجي ديك المرا ولا جوج يديرو غير بروشينج او يحيدو الدوفي.. رجعات سعاد عصبية كتر من القياس الفقصة ديال قلة الخدمة كتبردها ف نريمان ايما بالغوات ولا المعيور.. دازت سيمانا ورجعو عندهم ناس رحبو بيهم وشركو الطعام عاد دخلو فالموضوع ونريمان جالسة حداهم مزيرة بحالا جالسة على شوووك.. سولوهاا على جوابهاا واش فكرات وشنو القرار لي خدات جوباتهم وهيا كتشتت النضر مقدراش تشوف فالسيدة لي كتبتاسم فوجههها وكتسنئ الرد ديالها ..
نريمان : غير سمحيليا اخالتي انا مبغاش نتزوج مزال الحال ومقدراش دابا..
تغيرو ملامح هناء لي كانت ضاحكة وعاجبها الحال وكانت متيقنة انهاا غتكون موافقة.. وحتا الأم ديال هناء بقاات غير كتشوف فيهاا ملقاات باش ترد عليهاا...
سعاد : ايوا بيناتكم حنا منزيدوها غير الخير الا بغات دير دارهااا وتفرح براسهااا حنا مكرهنااش
أم هناء : علاش ابنتي انا قلت ليك ولدي بلاماا نشكرو ليك طرووونكيل وماا مبلي ما والو غير الخدمة ديالو والدار ويلا خرج القهوة عند صحابو راه يحطك فعينيه نعلي شيطان صراحة مكرهتكش تكوني مرات ولدي والله وبغيتك ابنتي من قلبي...
ردات عليها نريمان وهيا حشمانة من كلامهاا وقالت :
شكرا اخالتي الله يكبر بيك ولكن غا سمحيلياا بزاف انا مبغاااش نتزوج فهاد الساعة الله يجيب لولدك شي بنت ناس..
اكتفات بهاد الكلمات ورجعات اللور وهناء كتشوف فيهاا بصدمة مكانتش متوقعة منهاا هاد الرد..
استأذنو منهم وناضو بحالهم ام هناء واخا بقاا فيها الحال وقلبها مغير ولكن صبرات سلمات عليهم هيا وهناء وخرجو يلاه وصلات الباب وهيا تقول هناء لنريمان : تهلاي فراسك بزاف ونساايني فمرااا اوكي!


تصدمات نريمان من اخر كلمة قالتها ليهاا هناء دخلات لدار وعينيهاا كيجريو بالدموع وحاسة بغصة فقلبهاا وبدات كتلوم فراسها وكتقول كون غيييير وافقت علاش انااا درت هاكاا علاش علاااش.. مسحات عينيها وهيا تشوف زياد كيشوف فيها بملامح حزينة قربات عندو عنقاتو وقالت : لا لاااا اناا قلت ليهم الصح ومزيان ملي موافقتش لمن نخلي خوياا انا لمن شدات فحناكو بيديها بجوج وقالت : اناا غنصبرر وغنخدم اخويااا وغنخرجو انا وياك من هنااا كنوااااعدك والله حتا نخرجو فالقريب صافي غير صبر معايااا حتا نتااا..

بقاا الوضع كيفماا هوا عند نريمان فالدار نفس الروتين اليومي اما بالنسبة لسعاد ترجعات بزاف صالون مبقااا كيدخل ليهاا والو كليااانة وحدة هيا لاخرااا مكتعتبش الباب. او كاين لي كيدير معاهاا موعد يجي عندهااا كتبقى تسنى وفلاخر مكيجي حد..

فواحد الليلة بعدماا تعشااو ونعسات نريمان خوها وجلسات كتفرج حداهم فالتلفازة وسعاد حاطة تليفون حداهاا كتخمم.. بعد تردد هزات تليفون وتاصلات برقم وبقات كتسنى الرد... حتا جوبات مرا بصوت لطيف كتهضر بلبااقة
... وي الو!
سعاد : سلام لالة جوديا كي دايرة
... وي صاافا مغسي سي كيي معقلتش على هاد نيم
سعاد : انا سعاد ديال الحسيمة وقيلة معقلتيش علياا راه خدمت معاك هادي شي عاميين ملي كنتي ف كازا
... اااه وي عقلت عليك صافا نتي كي دايرة!
سعاد : لباس الحمد الله وانت لباس ومالين دار كلشي بخير
... مغسي حبيبة كلشي صافا

سعاد : امم.. (بتردد) ا اااا الا جات على خاطرك الالة جوديا راني محتاجة الخدمة وبغيت نسولك الا كنتي محتاجاني

جوديا : داكوغ انا دابا مكيناش فالمغرب هاد دو جوغ غنجي ونتاصل بيك الا حتاجيتك اك!
سعاد : صافي واخا الله يجازيك بالخير الله يسهل عليك ويعطيك لي ناوية فقلبك
جوديا : هه هانية يكون خير.
قطعات معاهاا المكالمة ونريمان كطلل عليها بنص عين كيفااش كتهضر باحترام مكاين غا لالة لالة...
دازو ايام وسعاد مزال كتسنى جوديا تتاصل بيهاا رجعات غير كتغوت بوحدهاا وبالها غير مع تليفون كل مرة تصيفط رسالة وبدون رد..
هزات سعاد تليفونهاا ودخلات لبيت زدحات الباب.
اما نريمان كانت كتغسل لخوها لبسات ليه حوايجو فالطواليط وخرجات هزاه بين يديها ودايرة ليه فوطة على راسو حطاتو فالكرسي فغرفة المعيشة وهيا تسمع سعاد كتهضر ف تليفون. قرباات شوية من الباب وحطات راسها كتصنت وبالها مع باب الزنقة عنداك دخل جداتها..
وهيا تسمع الحوار لي كيضور بين سعاد ووجوديا

سعاد : اه انا عارفة راسي غلطت معاك وكنترجاااك تسمحيليا عطيني فرصة خرا الالة جوديا الله يفرحك بوليدااتك

جوديا : سعاد دابا انا ممحتجاش شي وحدة تخدم معايا تما فالحسيمة راه ختي وبنات خدامين ممحتاجينش شي وحدة خرا وحتا هنا فكازا راه عندي بنات لي خدامين

سعاد : بخيبة آمل) انا عرفاك مزال مقلقة مني ولكن الله يديرها لوقت سمحيلي ولكن متخلينيش الله يشد ليك فالوليدات
سمعات نريمان باب دالزنقة تحل وهيا تهز راسها بالزربة ورجعاات عند زياد..


دخلات جداتها هازة تقدية وسعاد مزال كتهضر فالتليفون. ناضت نريمات شدات من جداتها التقدية دخلاتها الكوزينة وبدات كتستف فيها وعقلها مع سعاد شكون هادي لي كتهضر معاهاا وعلاش كطلب منهاا مسامحة..
وجدات الغدا وتجمعو على الطبلة وسعاد عقلهاا مشطون..
ونريمان عينيها معاها ..
خرجات سعاد لصالون بوحدهاا ونريمان بقاات جالسة كتفرج جنب جداتها وزياد.. حتا تجمعو فالعشااا وسعاد طايح عليهاا الضيم مبغاتش تاكل.
فضيلة : مالك ياك لباس مالك غا مغبنة
سعاد : صافي امي قلبي علياا معرفتش اناا هاد النحس منين جاني وتقول اليوم واش جات شي وحدة لصالون جاو غير لي باغيين كيراتين وسوان دو فيزاج وداكشي واناا هداك مزال مدخلتو.
فضيلة : ايوا وشغاديري!
سعاد : تلفت ولاهيلا تلفت مبقيت عارفة اش ندير...
نريمان غير ساكتة وكتشوف فالتلفازة مقالت حتا كلمة..
الايام كدوز مملة وروتين عادي.. سعاد غير كتزيد تجعر وتبرد الغدااايد فنريمان.. اما نريمان كيف غادة غا ساكتة.. وهوما مجموعين على طبلة دالفطور. تليفون د سعاد كيصوني ناضت بالزربة وسرعات ماا ترسمات الابتسامة على وجهها وهيا كتجاوب بلهفة..
وي لالة جوديا .. لباس وانت؟ الحمد، الله لهلا يخطيك... اه قوليلي هانا كنسمعك.. بصح؟ اووه الله يفرحك بوليداتك عمرني نسااا خيرك صافي واخااا واخاا كوني هانية..
واخاا واخاا صافي. لا لا شوفي سمعي... لا لابلاش انا غنجيب معايا بنت خوياا لي قلت ليك لا هيا غتعاوني لا متخاافيش راهاا معلمة الله ياودي لهلا يحشمناا معاك لالة جودياا ..
حلات نريمان فمها ملي سمعات سعاد كتهضر عليهاا معرفاتش اش كاين.. قطعات سعاد المكالمة وهيا طلق تنهيدة طويلة شافت ف نريمان وقالت. نوضي نتي دغياا سيري غسلي حالتك راه غتسافري معايا...

سفار وجه نريمان وقالت : فين؟ فين غنمشي
سعاد : غتمشي معايا لكازا عندي شي خدمة تما هيا قالت غتصيفط لياا البنت لي تعاوني قلت ليهاا بلاش ها بنت خوياا نجيبهاا معايا دوك فلوس لي غتعطيهم لاخراا زايدين فياا اناا يلاه سيري غسلي وحكي
دخلات سعاد هزات جلابتها كتلبسها وهيا مزال كتهضر... غتشدو طريق فالليل انا غنمشي نقطع ف ساتيام.
نريمان : ولكن معامن غنخلي زياد؟ انا منقدرش نسافر ونخليه بوحدو..

خرجات فيها عينيهاا وقالت : ها امي غتقابلو غير تهزي دغيا
نطقات فضيلة وقالت : وانا عندي شي جهد ليه انا عضامي مفصليين علياا مكنقدرش نزيد حتا برجلي بقالي غير ولد عضوماتو قصح من ديالي نهزو ونبدل ليه ليكوش على آخر ايامي..
سعاد : بنرفزة) اميي واش من نيتك متهزيه ميهزك غا وكليه وبدلي ليه راه مغنتعطلوش غير يوماين وغنرجعو.
فضيلة : مغنشدو حتا ساعة ضبرو راسكم
ضورات وجهها فضيلة وسعاد بقاات كتغلي من الداخل.. شافت فنريمان وقالت : طلعي لعند امين قوليليه يبقى يهبط يبدليه نجي نجبرك دوشي باش نجمعو حوايجناا راه كار مع 8 دالعشية كيخرج وقيلة.
ملقات نريمان متقول ليها عارفة الا زادت تجدلات معاها غتاااكلها فعضاامها وهكاك وغتمشي بزز منها معاها. مشاات الكوزينة هزات برمة عمراتها بالما ورداتها طيب. وطلعات لدار عمها سلمات على رشيدة وصال وجلسات معاهم
نريمان : عمي مكااينش هنا؟
رشيدة : مزال فالسوق ايوا راكي عارفة البياعة والشرايا اليوم خميس راه كيترزق الله
نريمان : اه الله يعاونو... ( بعد تردد) مرات عمي راه محتاجاك فواحد الحاجة ولكن خفتك متبغيش
رشيدة : ايوا قولي، الله يسمعناا خبار الخير الا كنا قادرين منقولوش لا..
نريمان : بغيت نخلي معاكم زياد راه عمتي بغات تمشي لكازا وخاصها ديني معاها. ويما مبغاتش تقابل زياد، بيدماا نجيو تقدري تخليه معاكم
شافت رشيدة ملقاات باش تجاوبهاا وقالت فالاخيرة : وصافي يكون خير ملي يجي امين من الكورة نقوليه يطلعو.
ناضت نريمان باست ليهاا راسها ويديها كتشكر فيها وتعاود، هبطاات جمعات ليه حويجاتو وليكوش والكرسي طلعتهم ليهم ورجعت هبطات جمعات حوايجها ودخلات الحمام ضرباتها بدوش فاعل تارك حكات ونقااات وهزات مكينة د حسانة لقاتهاا تما فالطواليط وبدات كتنقي راسها وتحيد الشعر الزائد لي كان كيدوز عليه عاام ومكيتحيدش شكون غادي يعتقهااا بدرهم هوا لاخر. وحتا ملي كتجيها الدورة الشهرية كانت كتقضي غير بشراوط ولا سروال مصالحش تقطعو وديرو . خرجات لابسة بيجاما وفوطة على راسها كتنشف شعرهاا وريحة دشمبوان منها كتعطعط. حتا رجعات سعاد المحطة


طيبو البيض ومطيشة بالزربة .. تغداو بيه وناضت سعاد جمعات حوايجها وجلسات كتوصي ف نريمان وتعاود :

الا هضر معاك شي حد متجااوبيهش ويلا سولك شي حد شدي فمك عندك ومتقوليش عاد كنتعلم قولي ليهم راني معلمة. ومديري حتا حاجة حتا تشاوريني هاناا فين كنوصيك وعنداك تحمشميني مع السيدة..
حركات راسها بالايجاب وبقات ساكتة.. ناضت سعاد دخلات لبيتها كتحلق على الحالة تصبغ بالدفران وتقااد الحجبان .. فالعشية سعاد كتلبس حوايجها ..
ونريمان مع زياد كتبوس فيه وتعاود وكتبكي بحالا مغترجعش..
نريمان : انا مغاديش نتعطل اخويا هانتا مرات عمي غتهلا فيك صافي ودغيا غنرجع عندك سمحليا اخويا..
خلاتو فبلاصتو عينيه مدمعين وناضت كتلبس حوايجهاا وتقاد زيفها حتا سمعات امين كيعيط ليها.. دخل عندها هز زياد من بلاصتو وطلعو لدارهم.. اما نريمان عاد مزادت فالبكا من جهة خوها لي متعلقة بيه بزاف وتمنى اي حاجة تصيبها هيا، ومتصيبش خوهاا..
خرجات لوسط الدار هازة صاكها فيه حوايج جلسات فطرف السداري وجداتها كطلع فيها وتهبط.. حتا خرجات سعاد مقادة الحالة هازة حتا هيا صاكها. جبدات واحد الصباط من واحد البواطة مزال جديد عندو كعب عالي جلسات على واحد الكرسي كتلبس فيه ونريمان كتشوف غا من التحت التحت...
سعاد : نوضي يلاه نزيدو المغرب وذنات يلاه نوصلو المحطة ونشدو بلايصنا.
ناضت نريمان مشات هزات يد جداتها باسها . لبسات صباطها الارضي المعتاد لي كتخرج بيه وخرجات مور سعاد...
حتا وصلو لطكسيات كبار ركبو وتسناو طاكسي يعمر عاد زادو وصلو المحطة وبداو كيقلبو على الكار د كازا لقاوه مزال مخرج. جلسو فالمحطة كيشوفو الغادي والجاي وسعاد غير كتوصي وتعاود وكل مرة تجبد مرايا طل على وجهها وتقاد زيفها ..
اما نريمان عينيها سارحة فالمحطة اول مرة تجي ليهاا وتشوفها واول مرة توصل سونطر فيل .
بقاو جالسين تما حتا جاا الكار د كازا وناضو غاديين متوجهيين ليه. شدو بلايصهم بالارقام ولكن مجاوش حدا بعضياتهم. لقات سعاد شاب جالس حدا رقم ديالها هضرات مع الشاب وقالت..
سعاد : خويا واخا تبدل معانا البلاصة!
شاف فيها وف نريمان لي موراها وقال : هادي بلاصتي انا منايضش من هنا..
عوجات فمها وقالت لنريمان جلسي نتي لهيه.
مشات نريمان لبلاصتها لقات راجل كبير شعرو شايب جلسات حداه. وسعاد جلسات حدا داك الشاب..
شوية وهيا تنوض وقالت لنريمان : جلسي هنا انا غنمشي نجيب واحد تعبئة وما ناكلو عنداك تخرجي حضي بلاصتي معاك.
حركات نريمان راسها بالايجاب وبقات فبلاصتها حاطة صاكها بين رجليها. شوية وهيا تسمع صوت موراهاا كيقول : بست سس
ضارت لقاتو داك الشاب نيت غمزها. قلباات وجهها بالزربة وبقات كتشوف قدامها مضارتش. شوية وهيا تشوف شاب اخر ناض من بلاصتو فالمقاعد الأمامية راجع اللور. داز من قدامها وما هيا الا دقيقتين. عاود داز من حداها ورما ليها ورقة جات فحجرها . خرجات عينيها كتشوف فيه وفالورقة شداتها بيديها لقات فيها نمرة وكاتب عليها ممكن تتاصلي بياا اولا تصيفطيلي مسج..
كمشات ديك الورقة بيديها ورماتها حدا رجليها وهيا ضور وجهها لسرجم جيهت راجل كبير كتشوف ناس برا حتا . رجعات سعاد هازة ميكة فيديها حطاتها لنريمان وقالت : خلي هادي حداك نتعشاو بيه
حطاتو نريمان فوق صاكها وربعات يديها اما سعاد رجعات لبلاصتها كتكونيكطاا وضحك وتسجل فالاوديوات وتصيفط والشاب لي حداها غير كيأفأف..
قلع الكار ونريمان عينيها سارحين مع الطريق اول تسافيرة ليها كتشوف المناضر الجميلة بالليل والجو هادئ والناس لي خارجين كيتسراو. حتا خرجو على المدينة..
ناس جبدو مكلتهم ريحة دالسندويتش وريحة الكفتة مشوية كل واحد كياكل فجهة. قطعات سعاد المكالمة لي كانت شادة ملي كانو مزال فالحسيمة..
وقالت لنريمان : اري ديك الميكة.
مداتها ليها وجبدات منها خبزة وفروماج وكرطونة د الحليب وجوج دانونات. عطات نص خبزة لنريمان مع فرماجة وحك دانون وجلسات هيا كتهذن بيديها وتاكل ودوز بكرطونة دالحليب والشاب لي جالس حداها غير كيشوف فيها ويضحك كيهضر ب ابيل فيديو كل مرة يضور تليفون كيضحك هوا ولي كيهضر معاه.
اما نريمان شدات ديك خبزة وفرماجة ودانون خشاتهم فجنب الصاك حشمات تاكل حدا عباد الله واخا كلشي كياكل وحتا راجل لي حداها عندو ميكة فيها البنان وتفاح. مد ليها جوج بنانات وتفاحة رفضات ولكن اصر عليها حتا شداتهم منو خشات فصاكها وهيا تمد ليها سعاد كرطونة دحليب : هاكي شربي.
نريمان : خرجات عينيها) لا لا مخصنيش غنتقياا..
ضورات وجهها وخلات سعاد كتاكل وتهضر فالتليفون ..


بقات ساهية فالطريق حتا حساب بالتعب واستسلمات لنوم عميق.. ناضت بشقيقة فراسها حلات عينيها بصعوبة وهيا تنوض قافزة لقات كلشي ناعس . بقات كتشوف ف اطرافها وفسعاد لي حالة فمها ناعسة. حسات بمعدتها خاوية كتلوا بالجوع جبدات ديك نص خبزة دهناتها وجلسات كتاكل فراحتها ودوز بدانون كملاتها ببنانة وجمعات قشور فواحد ميكة وحطاتها حدا رجليها.. يلاه حطات راسها بغات ترجع لنعاس وهيا تشوف الشاب لي عطاهاا نمرة كيشير ليها وداير يديه فوذنو بمعنى اتصلي بيا ضورات وجهها وهوا ينوض من بلاصتو قرب عندها كيهضر بهمس وهوا يحل عينيه راجل الكبير لي جالس حداهاا خرج فيه عينيه وقال بالريفية مخلطة بالعربية : سير تلعب الله ينعل لي ميحشم بوهبوش تفوو.

رجع الشاب لبلاصتو بالزربة كاين لي فاق على صوت راجل وكاين لي محس بوالو وكلشي رجع حاضي طرافو من داك شاب .. شاف راجل ف نريمان وقال : نوض ابنتي نوض
ناضت وقفات وخرج هوا عطاها بلاصتو جهة زاج وهوا جلس فالطرف.
شكراتو وهيا مبتاسمة وفنفس الوقت كتقول سعدات وليداتو بيه كيحن على البراني فما بالك وليداتو وهيا لي معندها لا لي يحن عليها ولا لي يخاف عليها ويحميها..
حطات راسها على زاج ساهية حتا داهاا نعاس.
ناضت على صوت سعاد لي كتهزز فيها حلات عينيها وراسها مكوانسي كتحركو بصعوبة.
سعاد : ونوضي تڭعدي راه وصلنا ولا غنبقااو هنا
نريمان : احح عنقي كيضرني نعست معذبة
سعاد : انا بعدا نعست مزيان محسيتش براسي وزيدي دغيا يلاه نفطرو باش نمشيو راها تكون كتسنانا.
خرجو من الكار وهيا تحل سعاد ساكها باش تجبد التليفون ملقااتوش خرجو عينيها وهيا كتقلب وتعاود وتقلب فجياب الجلابة. رجعت الكار كتجري كتقلب فبلاصتها وتسول الڭريسون والو ملقاتش فمرا رجعات عند نريمان
وقالت : غيكون غا داك ولد ق** لي كان جالس حداياا هوا لي داه الله يديه واد الله يعطيه شي موصيبة
خرجو من المحطة وهياا غير كتغوت وتويلل ونريمان غا ساكتة زايدة حداها ولازمة الصمت حتا وقفو يشدو طاكسي وهيا تجبد سعاد من سوتيان ديالها زيف معقود، فيه الفلوس.
سعاد : جاب الله خبعت الفلوس ف كمي اماا كون بقينا فالزنقة حتا فلوس طاكسي مكنااش نلقاوهم
نريمان : فين غنمشيو نفطرو؟
خرجات سعاد عينيها فيها وقالت : واش اناا دابا فالفطور تليفون شرياه ب ربعين الف ريال هاهوا مشاا وانا عاد غنخمم فشي فطور زيدي قدامي

شدو طاكسي ونريمان عينيها مع زاج كتشوف فشوارع الدار البيضاء وبيناياتها الكبرى وناس بزاف والزحام فالطريق.. حتا وصلو وخرجو وقفات سعاد كتشوف عيات متقلب على صالون جوديا لي مكتوب باللغة بالفرنسية ملقااتوش عيات تسول كيقولو ليها ماشي هنا ..
سعاد : زيدي يلاه معايا لداك تليبوتيك نصوني عليها راه نسيت فين عندها صالون .
تبعاتها نريمان خلات ليها سعاد ساكها ودخلات لتليبوتيك. جلسات نريمان فجنب واحد الدار وصيكان حداها وكرشها كتلواا بالجوع تفكرات البنانة لي مزال عندها فالصاك جبدااتها كلاتها بالزربة ورمات قشورها فواحد الخاوية وتبعات موراها تفاحة يلاه عضات منها جوج عضات وهيا تشوف سعاد خارجة رماتها بالزربة ومسحات فمها.
سعاد : زيدي نشدو طاكسي راها مزال بعيدة اوووف نهار ممنحوس
وقفهم طاكسي حدا العنوان لي عطاتها جوديا بالضبط.
خرجو من طاكسي ونريمان معلقة عينيها كتشوف اسم عريض ..

L'ART DE BEAUTÉ CHEZ JOUDIA ..
حلات فمها وهيا كتشوف روعة المنضر من براا عمارة كبيرة سفلي ديالها عبارة عن صالون بنوافذ كبيرة دالزاج مزيناها ستائر ذهبية كتبان من برا ومحابق مزينة الباب.. والطبق الثاني كيبانو فيه لي منكان واقفين مور الزاج بالكسوة البيضااء دالعروس

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.