قلبان لا يلتقيان الجزء 20

من تأليف Fatima Z-F
2020

محتوى القصة

رواية قلبان لا يلتقيان (إنها زوجتي 2)

تغلب عليها لألم بشكل كبير و تنفسها تسارع مع تسارع دقات قلبها...شادين ليها فيديها كيشجعوها تزحم بينما اعينها الدامعة محطوطة على عصام لي وجهو اصبح اصفر بالخوف عليها..مقدراتش تزيد تغوت او تعايرو و تهددو ميقربش ليها من جديد كيف دارت ليه قبل ..بل كانت عيونها فقط عليه مزيرة كتبين ليه لألم لي كتحس بيه...

نطقات حليمة لي كانت جالسة بين رجليها ....

-دفعي ابنتي كتر قريب يخرج راس

هاجر مزيرة وكتزحم بكل قوتها بينما يديها مرتابطين بيدين عصام لي غاب على كل لي حداه و بقات كتبان ليه غير هي ..فقط كيمسح ليها لعرق من وجها وساكت بحال شي صنم...طلقات تنهيدة صعبة بين شفاها من سمعات صرخة طفل كتعم ارجاء لغرفة ...بسرعة قطعات حليمة لحبل سري و مداتو لسلوى لي واقفة حداها..لوات عليه مانطة صغيرة و قرباتو لعصام بغات تمدو ليه لكن من لحضات نضراتو لي محطوطين على هاجر كأنه غايب عن الوعي..بعدات منو بينما حليمة كتحاول مع هاجر لي التعب تمكن من انها تزحم كتر يخرج لبيبي التاني...

فوسط المها و تعبها جاتها ضوخة بحال النعسة رغم الألم لي داير بيها غمضات عنيها و ترخات ولكن صرخة ديال حليمة رجعات فيقتها ...

حليمة بعصبيبة : عصااام متخليهاش ترخى اتقتل دري وهو فكرشها..صرفقها باش توكد كتر ...

كأنه عاد فاق من سباتو و بعد عينو من هاجر مخلوع : فين هي طبيبة ....

حليمة : انسيبي واش حنا فطبيبة دابا ..شد معايا طريق يرحم والديك و متحنش فهاديك راه لولد معندوش وقت خاصو يخرج دغيا ...

بتلفة بقى كيدور عينو بين هاجر و حليمة وصوت طفل صغير كيسمعو فالجهة أخرى...دور راسو بزربة مبهوض فتربية لي بين يدين سلوى و نطق بعدم تصديق...

-وقتاش خرج...

حليمة بصدمة شافت فيه و بدون ما ترد عليها مدات يديها بزربة عطاتها لهاجر لحنك بجهد : دفعي اهاجر اتقجي لولد...


بضربة لي عطاتها حليمة رجعات لوعي ديالها مزيرة على سنانها بجهد ...بكل القوة لي بقات ليها زحمات وفلحضة تالية تسمع صوت تاني لطفل وقبل ما تشوفو حطات راسها فحضن عصام لي كان جامعها بين درعانو و بتعب غمضات عيونها بدون ما ترجع تحلهم من جديد...
صبح يوم جديد مغاير عن جميع الأيام ..كان هناك فرح و احتفال بزيادة التوأمين ..مجموع كل العائلة كيهنئو بعض ..
في لكوزينة داخلين ليها لعيالات كاملين كل وحدة و شنو كدير وعلى وجهم ابتسامة جميلة مزينة لجلسة مع بعضهم ..

سمية : هاجر لي عبرات غير ولدات و ضرباتها بنعسة مزال كاع مبغات تفيق من لبارح...

أسماء: خليها مسكينة تصحابي نتي توام ساهل ولادتهم ..حمدلله من ما وقع ليها والو ....

سلوى حابسة ضحكة بزز : انا لي ضحكني هو عصام مسكين تلف ما بقى عارف شمن جهة يشد كل دقيقة يدخل عليها لبيت و يسول واش فاقت واش خاصها شي حاجة علاش مفاقتش شنو نجيب ليها ...عينا ما نقولو ليه راها غير ناعسة و والو يرجع يعاود يشوفها و يسول ..تا من لعشا صلاه كتر من ربعة ديال لمرات يمشي يصلي و يعاود يرجع عندها يشوفها ناعسة و يقول هاني نمشي نصلي لعشا لفاقت عيطي عليا و يمشي يصلي و يعاود يرجع و يقول نفس لكلمة ...

الياقوت هزات راسها كضحك من نيتها و باين عليها لفرحة : انا لي مو و تلفني بزز باش جريتو و جلستو و عطيتو لولاد يشدهم اما مكرهش يبقى واقف حدا راسها ...

أسماء تنهدات بجهد : اوا لي داز عليهم مساهلش وهو مبقاش قادر يتفارق معاها ولفها كتر من خيالو ...

تجمعو على الهضرة مع بعضياتهم كيوجدو رفيسة ديال نافسة..فقط هي لي مدخلاتش وسط هضرتهم فقط متكية على لبوطاجي كتحيد لميكة من بلاطو ديال لحلوى وساهية فداكش لي دار سمير و بدون ما تشعر دورات لسانها على شفاه ديالها فلمكان لي باسها فيه ...

تعمقو نضراتها من حسات براسها فاش كتفكر بزربة نفضات كل افكارها مبغاتش تأتر او ضعاف.. قدات كلشي و خرجات من لكوزينة موجهة لجردة كتقاد فزيف لي كيزلق ليها من مقدمة راسها...

حسات بنضرات موجهين ليها وهي دور راسها وجات عنيها مع عينو.. كان واقف بعيد منها مدخل يدو فجيب سروالو وبعض اتار الجرح فوجهو من دابز مع عماد... بغات تبعد نضراتها لكن مقدراتش لقات راسها كتشوف فيه بدون ما ترمش مثلو تماما..

كأنهم كيقراو بعضياتهم شكون فيهم لي تغير... وشنو لي خلاهم يرجعو بهاد شكل واش البعد او عدم التواصل او انعدام التقة او شيء اكبر من ذالك..خطى خطوات وقرب لجهتها اكتر بينما هي تسمرات فمكانها ..فور ما وقف قدامها هبطات عنيها لأرض..


سمير : وقتاش درتي لحجاب...

حولات تجاهلو ولكن لسانها نطق بلا ما تشعر ..

اريج : ماشي بزاف باش درتو ...

بعض لحضات صمت وهو مراقبها قال : مبروك عليك جا معاك زوين ...

زيرات على يديها بجهد بدون ما تهز راسها لعندو قالت ...

-درتو حيت مقتانعة بيه ماشي حيت جيت فيه زوينة ...

حرك راسو ببطئ كأنه كيوافق على كلامها : كنتي ديما زوينة ودابا رجعتي كتر ...

حسات ببعض لإحراج من كلامو ..حلات فمها تهضر لكن ما قدرات تخرج تا حرف فعتزلات صمت وزادت هبطات راسها اكتر ...

تبسم نصف ابتسامة بينما عيونو بقاو واضحين تجاها ...

سمير : مبقيتيش كتسلمي على دراري...

-حركات راسها بسرعة : لا و اولهم نتا ...

هز حاجب و هبط لخر : علاش انا بالضبط ...

عضات طرف فمها بجهد : حيت مبغيتش نعاود نفس الغلط معاك ...

ربع يدو على صدرو : شمن علط كتهضري عليه...

رجع وجها حمر و نطقات بين سنانها ...

-نتا عارف علياش كنهضراسمير ....

بملامح جامدة رد عليها ...

-بزاف لأغلاط درتي معايا حددي ليا شمن واحد مبغياش تعاوديه معايا ...


هزات راسها لعندو و عنيها حمرين وبعصبية مرضياش على اسلوبو فالكلام معاها قالت ...

-الغلط الوحيد لي نادمة عليه هو اني بغيت واحد بحالك و مبغيتش نعاود نفس الغلط مرة تانية ...

سمير بملامح جامدة : علاش مبقيتيش كتبغيني...

تنفسات من نيفها بجهد : نهار تخليتي عليا برد قلبي من جيهتك....

بنضراتو كيقراها فالسر بينما ملامحو مفيهم تا إشارة لـتأتير كلامها عليه ...فتح شفاهو و نطق بكلمة واحدة ..

سمير : متأكدة ...

بغيرة كتحرق فقلبها قالت : ما عمري كنت متأكدة كتر ما متأكدة دابا اني مكنبغيكش...

كتفى فقط انه يحرك راسو بملامح باردة كأن كلامها مكانش موجه ليه و عطاها بضهرو و خطى خطوات بعاد منها ..معاودش دار او شاف فيها كمل طريقو بصمت و بهدوء بينما عينو لي كانت باردة امامها أصبحت مختلطة بكتير من المشاعر و تزير كتر..

عض فمو بجهد ودخل لجهة صالون فين جالسين رجال..جات عينو نيشن فكمال و نطق بدون مقدمات ....

سمير : بغيت نهضر معاك ...

سي حميد : دخل بعدا اولدي شرب معانا كويس ديال اتاي ...

سمير وعينو مزال على كمال : من بعد اسي حميد الهضرة هي لولة...

شاف فيه كمال مزيان وهو يجمع الوقفة وخرجو بجوج بعاد من اعين لجميع...

كمال : شنو باغي...

سمير :نتا عارف اش باغي..

كمال ساط بجهد: بنتي راك شفتيها كيف ولات حمدلله شدلت طريق و عرفات غلطها و انا لي كيهمني هو بنتي و لغلط لي وقع بيناتكم ما بقات ليه فايدة دابا... و نشالله يجيب ليها ربي رزقها حسن منك...

كمش حجابو وبانت لعصبية فملامحو :شكتخربق على ديلمي نتا واش عارف باش واعدتيني نهار لول...

كمال بصرامة : لي عندي قلتو اولد ناس بنتي متصلاحش ليها....

بغضب شد ليه فكول جلابة وعنيه حمرين و نطق بجهد ايطرطق من لداخل...

سمير: قبل ما نسافر وجيت نشوفها وقفتي ليا ومنعتيني و شرطتي عليا نبعد منها تا تكبر لا بغيت نتزوج بيها و وافقت على شرطك بشرط هي تكون ليا فلخر و دابا كتقول ليا ما تصلاحش ليا وااش باغي تحمق ديلمي...


كمال وجهو رجع حمر نتر يد سمير من كول ديالو و دفعو معصب..

_انا قلت ليك اتكون ليك لعطيتيها تيقار ماشي دابا جاي قدامها و كتطلب شي حاجة موفيتيش بيها ...

سمير حط صبعو على صدرو لي كيطلع و يهبط : دابا انا لي موفيتش بالكلمة ...هادشي كامل لي درت وماوفيت بوالو عندك تال هضرة بزز باش هضرت انا وياها واش كضحك عليا جيني نيشن قول ليا بنتي مبغيتش نعطيها ليك متبقاش تلعب عليا و تخدم معايا خدمة شمايت ...

كمال : لي عندي قلتو ليك بغيتي تفهم مرحبا ما بغيتيش تفهم عطا الله بنات ناس لي تقبل عليك اما بنتي مـ...

قاطعو بعصبية و زفير ديالو مجهد واضح شاد راسو بزز..

-بنتك ديالي و غادي تبقي ديما ديالي ...خدمت معاك فلول راجل حيت عرفت لغلط مني حاولت نصلح على الأقل ترضي بيا تكون بنتك ليا ..ولكن ما حدك خدمتي معايا فعايل شمايت انخدمهم معاك تا انا و لكنتي راجل عطيها لشي واحد من غيري لما رسلت مو لقبر قبل لوقت ...

كمال بنرفزة : دابا عاد بينتي وجهك لحقيقي الغدار ..غدرتي تيقتي و خرجتي على بنتي و زايد باغي توقف فطريقها من شدات طريق صحيح باغي تخرج عليها وهي عاد بدات تشوف الدنيا ...

سمير مزير على يدو بجهد : هادشي كلو لي درت على بنتك ما بانش فعنيك بان ليك غير خرجت عليها...انا كنبغيها وهي كتبغيني ونتا اش دخلك بيناتنا ....


كمال بكره هز يدو عطاها لسمير لوجه بصفعة قوية ونطق تحت من سنانو : انا باها لي ربيتها و كبرتها..

سمير بحنك حمر اتر الصفعة و جرحة على فمو فيها اتر من الدم نطق تا هو حاقد...

- تا انا ربيتها و كبرتها و حضيتها كتر ما حضيتيها نتا و تبعتها فكل لقنات بحال لهبيل وما خليت تا واحد يمسها و عارف عليها كتر ما عارف عليها نتا لي باها نقدر من غدا نهزها ما تعرف فين ديتها ما تحدانيش اسي كمال تال اريج منسمحش ليك فيها وخا تكون باها ...

كمال كرز على دروسو ايطرطق: هديك بنتيييي وما حدي فالحياة اتبقى بنتي و تحت من يدي نعطيها لمن بغيت وماسوق حد فيا ولكنتي راجل قرب ليها لما تلقى راسك فالحباسات كتجرجر كيف الكلب ...


نفض سلهامو ودخل كيطبخ خلى سمير معصب باغي ياكل راسو..دار تابعو معول يفرتك هاد رمانة وهو يخرج ليه عصام فنص طريق ..لابس جبادور رجالية ومرجع شعرو لور مع نضارات طبية على عينو ..خاشي يدو فجيبو و عينو فطريق لي مشا منها كمال ...رجع دور راسو لسمير بملامح هادئة بينما سمير بقى واقف فمكانو ....

شاف فعصام كيشوف فيه وهو يدور راسو لجهة لـخرى كيخبي لحمورية لي فنحكو ...وقف قدامو بهدوء وهو يتبسم نصف ابتسامة ...

عصام : رونتيها مع النسيب ...

سمير بعصبية : هو لي بدا هادشي ...

عصام هز حجبانو بجوج : دايرها قد راسك وزايدها بسنطيحة ...

سمير سكت بدون رد بينما عصام جرو معاه طلعو لفوق لجناح ديالو ...دخلو لبيت دراري صغار شافتهم لممرضة وهي تخرج بينما هما بقاو واقفين امام تربية كيشوفو فيها وهما ناعسين ...

سمير بصوت هادئ : مجاوش كيشبهو ليك بحال حاتم ....

عصام بنضرة حنينة على اطفالو حرك راسو : لا جاو كيشبهو لهاجر بزف..

سمير ضحك من نيتو من شافهم كيحركو فمهم وهما ناعسين : عنداك غير يجيو زلزال بحالها ...

عصام :ولفت زلزال مهم ..."هز راسو" ...الهضرة لي دارت بينك و بن كمال صحيحة ....

سمير : كنصحابو راجل قد لكلمة ولكن خوا بيا بحالي عمرو قالي شي حاجة ..

عصام بهدوء : من حقو بنتو هاديك ...

سمير بألم : ولكن كنبغيها ....

عصام : كتضن الحب ديالك غادي يغطي على كاع داكشي لي درتي ...

سمير بقهر : ندمت اخويا عصام و الله تا ندمت ..

عصام : من ندمتي بين ليه الندم ديالك هو لتعصب عندو الحق لأنك خنتي تيقتو وقصتي اغلى ما عندو..قبل ما كنتي تحل فمك عليه كان عليك تحط راسك فبلاصتو و تصور بنتك وقع ليها هادشي شنو كنتي ادير ...

سمير حدر راسو ما قدرش يرد بينما عصام تنهد ببطئ


عصام : الوقت كتصلح كلشي حاول نتا من عندك تصلح لأمور معاه وحيد ديك العصبية ما عندها فين تنفعك ...

حرك سمير راسو بشوي و خرج حادر راسو و كيفكر فكلام عصام و ساهي فطريقو حتى بانت ليه لتحت جالسة حدا باها ..بقى كيشوف فيها مدة طويلة بغا يهبط يجلس حداها و شد راسو بزز..دور راسو غادي لغرفة ديالو و فور ما دار هزات راسها هي وجات عنيها مع ضهرو..زيرات على يديها و رجعات هبطات عنيها لي بداو كيلمعو بدموع و خباتهم عن اعين الناس ..تا حد ما حاس بألمها او تحطمها فهاد اللحظة ...


دخل لبيتو وهي تشهق بصوت مرتفع ودورات راسها لعندو وهي كتحاول تنوض من بلاصتها ...قبل ما تنطق حرف طار عندها ودور يدو عليها دخلها فحضنو مزير عليها كأنها اغلى ما عندو ...خرج من فمها انين خفيف و تعابيرها مخصرين ....

هاجر : اييي ا عصام قصحتيني ...

عصام رخف عليها مخلوع : فين تقصحتي انشوف ...

شافت فيها بلا ما ترد وهو كيدور عينو عليها ..تنهدات بشوي...

هاجر: فين هما ...

عصام : بغيتي تشوفيهم ...

حركات راسها و هزها بين يدو و دخلها لبيت دراري حطها حداهم وهي كتشوف فيهم مبهورة و كأنهم حسو بيهم حلو عنيهم بجوج دقة وحدة ...فور ما شافت لون عيونهم شهقات و عيونها كيلمعو ...

هاجر : لون عيونهم بحال لون ديالي ...

دور يدو على خصرها و حط راسو على كتفها و كيشوفو بجوج فتوئمهم..

عصام : اممم كيشبهو ليك بزااف ...

بفرحة مدات يديها كتلمسهم بكل حب ...هزات الأنتى حطاتها على صدرها كتقبلها بكل حنية و رجعات حطاتها و هزات الأبن دخلاتو فحضنها بكل حب...بقات كتشوف فيهم بفرحة نسات كل الألم و العداب لي عاشتو فولادتهم ...دورات راسها لعصام ...

هاجر : شنو انسميهم ....

دور يدو على شعرها و قبلها حدا فمها و نطق بصوت دافئ : حاتم لي ختار ليهم سمية ...

هاجر خرجات عنيها : مغارش منهم ...

عصام ضحك من نيتو : لا غير شافهم نسا كلشي وفرح بزاف ..

هاجر عضات طرف لسانها : وشنو سماهم...

عصام : ساجد و سجدة ...

هاجر مبهوضة : منين جاب هاد سميات...

عصام هز كتافو : معرفتش من شافهم سماهم هاد سميات...

هاجر بفرحة شافت فلابن لي فحضنها و نطقات بحب : ساجد ...

حطاتو لعصام بين يدوو وهزات لإبنة عرات على صدرها بشوي و عطاتها ترضع بينما عصام جلس قدامها و كيشوف فيها بكل حب قرب ليها و قبلها مباشرة في فمها فرق القبلة و حط جيهتو على جبهتها و تبسمو لبعض بدون ما ينطق تا واحد فيهم بحرف كان فقط الصمت من طرفهم ...احيانا تكون لغة لعيون اقوى من أي كلمات او حروف ...بنضراتو شكرها على كل ما قدمات ليه وهي بنضراتها شكراتو على صبرو و اخلاصو تجاها...


__بعد مرور أسبوع____

أضواء في كل مكان وصوت زغاريت و افراح تنبع من مكان فيلا بن جلول...مجموع العائلة و كل المعارف و الاصحاب يباركو لعصام و لهاجر زيادة ..كان تناغم جميل وكلشي مزين وجهو بإبتسامة رغم ان البعض متغلب عليه الحزن الا ان الفرحة لهاجر و عصام خلاتهم يتبسمو و ينساو هاد ليلة كل لألم لي داز عليهم ...

جالسة فرحانة براسها بقفطانها لأبيض مع حجابها لي برز جمالها و رجعها بحال لعروسة كتفتن...جالس حاتم فحضنها فرحان براسو تا هو ...

حاتم : ماما فيه هما ساجد و سجدة ...

هاجر : دخلناهم احبيبة هما مزالين صغار مخاصش يبقاو قدام بزاف الناس ...

وقفات حداهم و عنيها مليئين بالدموع مدات يديها لهاجر و نطقات بصوت ضعيف ...

نورة : هزيني اخالتو هاجر...

حاتم بغضب دور يدو على هاجر : ماما هادي سيري عند ماماك تهزك ...

خنزرات فيه بكره و ضرباتو لرجليه بجهد : حمار انا هضرت مع خالتي ماشي معاك ....

نتر من مو بغى يطير عليها معصب و هي تشدو هاجر بزز : واش حماقيتو شهادشي كديرو بيناتكم راكم بحال لخوت زعمة ...

دورو راسهم بجوج لهاجر و نطقو دقة وحدة حاقدين على بعض : ..

حاتم : هي ماشي ختي ...

نورة : هو ماشي خويا ...


شافو فبعض واحد ما حامل لأخر بقات هاجر غير كتشوف فيهم ..مدات يديها هزات عندها نورة حطاتها على رجل و حاتم خلاتو فرجل لأخرى مقابل هو ونورة مخنزرين ...

حاتم : متجلسيش على ماما ...

نورة : خالتي لي هزاتني ماشي صوقك....

هاجر : دابا واش اسكتوني ولا انهبطكم بجوج وما نهز تا واحد فيكم ...

سكتو دقة وحدة بقا غير صوت تنفسهم لي مسموع باين واحد ما كيحمل لأخر دايرين عداوة بيناتهم وتا واحد فالعائلة ما عرف سباب هاد لعداوة لي جمعاتهم ....

هاجر بحنية شافت فنورة و لعبات ليها فشعرها :مالكي قبيلة كانو عنيك حمرين....

نورة شافت فلبلاصة فين جالس خوها وحداه جالسة بنت كدور فراسها مبهوضة واضح ان هادشي جاها جديد بينما ياسر جالس بهدوء و عنيه مركزين امامو بحال الجماد...تبعات هاجر نضراتها فين كتشوف ونطقات بشوي ...

هاجر : واش دابزتي مع ياسر ...


مسحات دموع من عنيها بحال شي طفلة صغيرة و خشات راسها فحضن هاجر بصوت باكي نطقات...

نورة: علاش كيديرو لخويا بحال هكذا...

هاجر بدون فهم: علاش شنو دارو لياسر...

نورة : كلشي كيتحكم فيه عمرهم سولوه شنو كيبغي وهاديك مزويناش بحال خويا علاش يجلسوها حداه...

هاجر تنهدات بجهد: هادشي ديال لكبار ابنتي مغاديش تفهمي فيه ..من تكبري و اتعرفي ان اي حاجة كيقولوها ليك فمصلاحتك...

نورة دورات راسها بسرعة بنفي: لاا انا مغاديش نكون بحال خويا و مغاديش ندير داكشي لي كيقولو...

حاتم بقى ساكت و تكى على صدر ماماه و غمض عينو بينما نورة بقات كل مرة كدور راسها لبلاصة فين جالس خوها وتركز بكره فمكان واحد و فشخص لي كان جالس قريب من ياسر لي هو عمها فؤاد كانو عنيها ما كيحملو تا اتر للحب او لحنية كان فقط كره... تلقات اعنيها مع اعين اخوها وهي تهبط راسها بسرعة ودخلات فحضن هاجر لي جمعاتها هي و حاتم فحضنها و قرباتهم لبعض اكتر و بدون ما يحسو نعسو و وجوهم قريبة لبعض و انفاس كل واحد كضرب فالاخر ....

قربات ليها اسماء و الياقوت خداو منها دراري دخلوهم لداخل و بقات هي جالسة فبلاصتها و عنيها على ياسر لي ملامحو مكيحملو تا تعبير.. ..جلس حداها عصام و دور يدو عليها و هضر حدا ودنها..

عصام : فين ساهية....

هاحر بهدوء : فياسر...

عصام قربها لعندو اكثر: متفكريش بزاف كل عائلة و كيف تعاملها مغديش ندخلو فقراراتهم....

هاجر: ولكن لولد صغير و لبنت باين ما فاهمة والو..

عصام: من ايكبرو ايفهمو كلشي....

حطات راسها على كتفو غمضات عنيها و نطقات بشوي: مبغيتش ولادي يعيشو بحال ياسر....

باسها فراسها و ضمها ليه كثر: مغاديش نعيشهم ديك لعيشة متفكريش بزااف....

بعيد منهم كانت اعين ياسر هادئة و البنت لي حداه كتهضر معاها بينما هو بدون رد فقط الصمت كيشوف فالناس لي امامو بعضهم كيشطح و بعضهم كيضحك و بعضهم كياكل بينما هو جالس كيف الجماد..

شخص ما فيه روح كيتم تحكم فيه من كل جهة... غمض عينه بهدوء تحت نضارتو الطبية و نطق في اعماق انفاسو "واش ايجي نهار لي يتبدل فيه كلشي و يقدر يعيش حر ام ايبقى سجين في سجن اسمه عائلة الوزير"...


حلات عنيها بشوي شافت فساعة لقات 3 ديال ليل.. حيدات يد عصام لي على خصرها و خرجات من حضنو بشوي... توجهات لبيت نعاس دراري بانو ليها ناعسين و لمربية حداهم.. سدات لباب و هزات بينوار طويل لبساتو و خرجات من لجناح هبطات لتحت دخلات لكورينة هزات كاس لحليب وجلسات فوق طبلة ساهية كتفكر فصمت.. معجبهاش داكشي لي دار فؤاد لياسر بغات تهضر و تقول ليه هادشي ممزيانش لكن شكون هي باش دخل فقرارات عائلة ماشي عائلتها.. سرطات كلامها و سكتات رغم انها شافت انكسار في اعين ياسر لكن مقدرات دير والو كتفات بصمت مثلها متل عصام...

تنهدات بجهد كدور لكاس بين يديها حتى دخل عليها خلعها...

هاجر: اففف خلعتيني اش مفيقك فهاد ساعة....

جلس حداها معصب...

سمير: فين نعست انا باش نفيق...

عمرات ليه كاس لحليب مداتو ليه و رجعات جلسات حداه...

هاجر: ياك لباس اش واقع...

هز فيها عينو حمرين : زعمة ما فراسك والو...

هاجر: واش اريج ....

سمير: وشكون من غيرها لي انهز ليه الهم...

هاجر تنهدات بجهد: اودي تلاقيتي نتا و كمال كل واحد باغي يفرض كلامو و نسيتو اريج مسكينة ما عالم بيها غير الله و معارفة كاع اش داير بينك و بين باها...

زير على الماس بين يدو : من نهار خوا بيا بغيت غير نهضر معاها نشرح ليها اش كاين و لكن مخلاليش منين ندوز وغير شاد راسي عليه مبغيتش ندابز معاه ونزيد نكحل دواصا عندو...

هاجر : اوا دابا اش ادير...

شاف فيها مزيان و صغر عينو و هي كمشات حجبانها...

-شوف بلا ما دير فيا دوك شوفات ما فيا لي يدخل فصداع لي بينك و بين كمال و انا عاد والدة خليني فتيقار يرحب باباك....

بغات تنوض و هو يشدها من يديها كيطلب و يرغب....

سمير: اخر مرة ا هاجر و الله ما نعاود ياك انا خوك عاونيني فهادي...

رجعات جلسات حداه كدور فراسها : احياني عليكم ارجال كتبداو فلول بسنطيحة و فالتالي كتخرجو بالحزارة ...

سمير: دابا لي وقع وقع ما عندي ما ندير...

هاحر: دابا خلي تال غدا ويكون خير ....

خرجو من لكوزينة كيهضرو وهما يتلقاو مع عصام فدروج متكي على جنب و شعرو مخربق جالس كيتسناهم... ركز عينو فيهم..

عصام: ساليتو من لهضرة....

مدات يديها لعندو هزاها بين دراعو و طلعاها معاه خلاو سمير وراهم كيجر فرجلو بحال لميت دار املو على هاجر هي لي تقدر تفك هاد روينة لي تشبكات عندو...

حطاها فوق ناموسية ونعس حداها كيلعب فشعرها و نطق بهدوء...

عصام: مضغطيش على راسك كل واحد يتحمل مسؤولية افعالو...

حطات راسها على صدرو : بنت ختي لي بقات فيا مبغيتش نشوفها كتعدب كتر...

جر لملايا غطاها مزيان وخلاها تنعس فحضنو....

شرقات شمس بيوم جديد حامل فطياتو الكتير..

جالسين فطبلة ديال لفطور كيفطرو فجو عائلي جميل.. نطق كمال بحنية وعينو على بنتو...


كمال: مغاديش تمشي ليوم لدار لقرأن...

اريج : تال غدا ابابا...

سمية : مزيان نيت تمشي معايا لحمام نسخنو عضيماتنا شوي...

كمال : ياك داير ليكم حمام فدار علاش اتمشي لحمام ديال زنقة...

حلات سمية اترد عليهم و هما يسمعو دقات فالباب.. جمع كمال الوقفة بتسائل و توجه لباب حلو مبهوض فشخص لي واقف...

كمال: هاجر اش كديري هنا فهاد صباح...

هاجر تبسمات بشوي ودارت لشخص لي كان وراها و عنيها فكمال : جيت نخطب لخويا...

سمير لي كان وراها حل فمو بصدمة و كمال لي قدامها خرج عينو حس بقلبو ايوقف ليه...


بصدمة بقاو كيشوفو فيها بجوج مكوانسين فبلاصتهم.. كمال حط يدو على قلبو لي كيزدح شداتو دوخة بينما هاجر جرات سمير دخلاتو قدامها و وقفات حدا كمال لي جامد فمكانو...

هاجر: اوا انسيبي لعزيز فين هو صواب جايبة ليكم عريس و متقول تا مرحبا....

دخلات جارة سمير و كمال تابعهم كيجري بحال لهبيل سبقهم و وقف حدا اريج لي معرفات راسها باش تبلات من شافت سمير قدامها... غطاها كمال ورا ضهرو مخنزر فهاجر و سمير....

كمال: هاجر شهادشي كديري فيه....

جرات لكرسي بهدوء جلسات حدا ختها لي حالة فمها فيهم و شارت لسمير يجلس حداها عاد قالت و البسمة مزينة ملامحها...

هاجر: اوا جلس بعدا نشربو كاس ديال اتاي وعاد نهضرو...

كمال بعصبية كيشوف فسمير: معندي هضرة معاكم هاد ساعة...

هاجر بنرفزة: ولايني ما فيك صواب ا كمال انا جايا على صباح مسبقاك نتا لول و نتا كتجري عليا فوجهي...

كمال زير على دروسو : راكي عارفة علاش كنهضر اهاجر... داري ممفتوحاش فوجه شي وحدين...

هاجر جمعات لوقفة : اوا الله يرحم لوالدين هذا هو المضمون فيك..

دفعات لكرسي بعصبية اتخرج وهي تشدها سمية مزيرة عليها مخرجة عنيها فرجلها...

سمية: واش من نيتك كتجري على ختي اوا اسيدي على هاد لحساب جري عليا تا انا معاها...

كمال بتعب : سمية عاد تصالحنا متقصحيش معايا راسك...

سمية بنرفزة: تا دابا اسيدي ما درنا فطاجين ما يتحرق كيف تصالحنا كيف نتفارقو وكل واحد يشد طريقو....

هاجر بعدات من ختها و وجها رجع حمر: سمية جلسي حدا راجلك انا لي غلطت و مكانش عليا نجي...

دورات راسها لعند سمير لي واقف حداها مدور راسو لعند اريج كيشوف فيها بصمت بينما هي حادرة راسها و مزيرة على يديها.... شافت فيهم هاحر مزيان وهي تسوط بجهد.. جرات سمير وشدات طريق خارجة حتى توقفات بصوت متألم...

اريج: عافك اخالتي متمشيش....


تهزات بلطف وهي كتشوف فبنت ختها بألم... زطمات على كبريائها و خدمات عقلها وحيدات زلزال من قاموسها... رجعات وقفات قدام كمال و نطقات بهدوء...

هاجر: خلينا نهضرو اكمال بحال الناس اما قصوحية راس غادي غير تخرج علينا.. حنا ولاد ليوم وخاصنا نفكرو فليوم و غدا اما البارح فات وداز ومات...

كمال حدر راسو ورجع هزو شاف فبنتو لي وجها حمر حادرة راسها و باين من رموشها لي مبتلين انها حابسة لبكية بزز... سرط ريقو وحرك راسو لهاجر...

جلسو كاملين فصالون هاجر و سمير حدا بعض و كمال و اريج جالسين حدا بعض بينما سمية بقات بعيدة منهم غير كتشوف و ساكتة....

هاجر : كمال نتا عارفني من كنت صغيرة و تقريبا ولاد حومة وحدة وديما عاملتيني بحال ختك صغيرة وتا انا عاملتك بحال واحد من خوتي واش نتا دابا اتبغي لي يضرني....

كمال : ربي لي شاهد معزتك عندي اهاجر و منبغي تا حد لي يضرك و لكن...

سكت بدون ما يكمل كلامو بينما هاجر كملات فبلاصتو...

هاجر: ولكن شنو اكمال راه تا انا بحالك و منبغيش ليك ضر و بنت ختي راك شفتي كيف كنعاملها وعمري خسرت ليها لخاطر و لحاجة لمخيرة ديالها و مكنقولش هادشي باش نبان ولكن بغيت غير نوضح ليك اني منوياش لغدر ولا لمضرة ليها ولا ليك.. لغلط وقع وميمكنش نرجعو زمن لور و دابا بغينا نصلحو لغلط و مندموش من بعد.. خلينا نحلو لامور بالعقل اما لغوات و لمدابزة غادي توصلنا غير لهلاك و تقطع لقرابة لي بيناتنا....

سمير مشبك يدو لوسط وحادر راسو كيسمع بصمت وحاس بدنب كبير متقل عليه وجالس كأن النار شاعلة فيه كيتسنى رد ديال كمال كأن روحو متعلقة بجوابو... ..

وقع صمت طويل تا حد ما نطق ورا كلام هاجر بقا كمال صامت و ساهي كيفكر حتى حس بجرة ديال تريكوه من لتحت.. هبط عينو كيشوف بنتو شادة ليه فتريكو من لتحت و مزيرة عليه بيدها.. هز عينو لوجها بانت ليه مغمضة عنيها ومزيرة على فمها كأنها كطلب الله فنفسها و محساش ان لحوايج لي شادة فيهم ديال باباها ماشي ديالها...

سرط ريقو بصعوبة من شاف شكل بنتو و وجها لي رجع صفر و ارتجاف جسدها كأن روحها غادي تزهق من جسدها.. حس بغصة خنقاه و عينو رجعو كيلمعو بدموع بزز باش قمعهم.. هز ليها يديها بحنية حطهم بين يديه و طبطب عليهم بلطف ...دار عند هاجر ونطق بصوت مبحوح...

كمال: حنا ولاد ليوم اهاجر ربي يدير لي فيها لخير و ربي يسر امور كل واحد...

فور ما نطق كلماتو تسمع تنهد سمير بجهد.. تنهد لي فيه بزااف لمعاني....و كأن جاه عفو من عقوبة الاعدام شي لي خلا روحو ترجع لجسدو و دقات قلبو يتسارعو ...هز راسو بسرعة لعند اريح لي كتشوف فيه ودمعة على طرف رموشها و قف بزربة غادي لعندها ناسي راسو حتى جراتو هاجر بجهد رجعاتو لبلاصتو حابسة ضحكة بزز...

هاجر: صبر على خبيزتك طيب بعدا مالك زربان....

سمير عقلو مغيب كيشوف غير فأريج نطق بدون وعي : توحشتها....


اريج تزيرات و زاد دموع غلبوها مقدرات تنطق بتا حرف بقى غير كمال لي مخنزر فسمير لش شداتو تلفة ما عرف شنو يدير.. دخلات هاجر كتنغز فسمير يتبت معاها فالخط...

هاجر: هادشي لي مضمون فيك انسيبي لعزيز لواحد هو يوسع لخاطر و منوقفوش قدام لي كيبغيو بعضهم...

كمال دور وجهو لجهة لخرا مزال ما رطاب : انا هادشي كلو كنديرو غير على بنتي بوحدها اما هو لباب منخليهش يدخل منو...

هاجر: كلامك كلو صحيح و ما قلتي عيب ولكن تا سمير ولد الاصل و مربي و دار المستحيل باش تسمح ليه و مغاديش تلقى حسن من سمير لبنتك...

كمال : هو لي عمرو يلقى بحال بنتي اما بحالو عطاهم الله فكل لقنات....

هاجر : تا هادي عندك فيها الحق بنت ختي تستاهل كل لخير و ما نتمنى ليها غير ما حسن.. "سكتات شوي عاد كملات كلامها" اوا دابا اش قلتي موافق ...

كمال بدون فهم: علاش انوافق...

هاجر: كفاش علاش اتوافق راه زعمة جينا طالبين يد بنتك لسمير زعمة...

نقزات سمية وسطهم بتزغريتة خلعاتهم...

-وشكون لي ميوافقش على سي سمير لبنتو غير لكان حمق و ما عندو عقل...

كمال مخنزر: سمية حنا ماشي فزغاريت دابا و انا مزال ما....

قطعاتو مخنزرة كتر منو: وصافي اكمال وخا يكون هاد لولد قاتل روح متجرجروش هاز تجرجيرة كاملة دير غير بوجه باه الله يرحمو لي كان يعطيك لكتوبة من كنتي كتقرا و مكيتخلصش منك حيت مكنتيش قادر تشريهم..

كمال حدر راسو من فكراتو بأب سمير لي خيرو سابق عليه... غمض عينو و لعن شيطان ونطق بشوي......

كمال: وخا و لكن بشرط....

سمير هز راسو و نطق بسرعة : كل شروطك موافق عليهم فقط هي تكون ليا...


كلهم خرجو عنيهم فيه من غير اريح لي مزال خادرة راسها بصمت...

هاجر: خلي نسمعو سيد اش بغى يقول مالك زربان ولكان شي شرعذ متقدرش عليه و تزيد تكحلها كتر ما نتا مكحلها...


سمير عينو مبعداتش من اريج: مكيهمنيش ، شروطو كلهم موافق عليهم فقط هي تولي مراتي وتكون ديالي...

كمال تنهد بجهد: سمعني بعدا اش غادي نقول...

قاطعو سمير و عينو كيبريو : ياك موافق نخطبها و نتزوح بيها ...

كمال حرك راسو بزز منو : اه موافق و مغادي تزوج بيها تا تقبل شروط ديالي كاملين ....

سمير بفرحة حل فمو يهضر و هو يتقطع صوتو بصدمة من نطقات اريج اخيرا و اعينها حمراء و دموع خط على حناكها ....

اريج بألم : انا مقبلاش و مبغياش نتزوج بيك....

تحل صمت رهيب و سمير بصدمة جمع لوقفة و عنيه خارجين فيها و فشكلها المتألم.. قرب ليها مخلوع وهي دفعو بسرعة و طلعات كتجري لبيتها و صوت بكاها مسموع خلات كلشي مصدوم فمكانو..

بلا ما يحس بنفسو طلع تابعها كيجري وقف قدام بابا بيتها كيضرب فالباب بجهد و كينطق إسمها بترجي....

سمير: اريييج حلي لباب.. اريييج حلي غير نهضر معاك....


اريح ورا الباب وبكائها مسموع صرخات بجهد: بعد منييييي قلت ليييك مبقييتش بغيييتك علااش مزال لاصق فياااا....

سمير بندم: اريييج مدرييش فيا هكذا حلي لباب عافك غير نشوفك و تسمعي اش بغيت نقول...

اريج زادت فصراخها كثر و نطقات بعصبية : بعااااد منييي علاااش مزاال تابعنيي ياااك خدييتي مني كلشييي شنوو باااغي عندي.. سيير عند هاديك لي بدلتيني بيهاااا و ختاريتيها عليا...

سمير بصدمة جمد فبلاصتو ما حس الا و كمال شنقو من كول القامجة كيديه و يحبو معصب و سمير مرفوع ما فاهم والو...

كمال: مزااال عندم لوجه طمع فبنتي الغدااار.. داااير لبناااات و مزاال لاصق ليا فبنتييي...

سمير بعصبية : شمن بناات و لا خرى كدوي عليه انا عمري قربت لشي وحدة من غير بنتك حيااتي كاملة ....

كمال طلع لو جنون فوق راسو بغى يفرسو : ياك قالت ليك مبغاتكش اش مزال كدير هنا فداري...

سمير بترجي ضرب لباب بجهد وكمال مزال قاجو ...

-ارييج راكي ما عارفة واالو اقسم بالله من نهار سافرت ما قست ولا قربت لشي بنت اول و حدة و اخر وحدة هي نتي...

اريج بتنخسيس اثر بكائها نطقات بتعب : كداااب انا عارفك ديما كنتي كدوي معاها فتليفون...

سمير بزربة فهم اش كتقصد.. دفع كمال و قرب لباب مكرهش يهرسو و يدخل عندها...

-واش سهيلة ما بيني و بينها واالو ومن كنت كنهضر معاها كنت فقط كنسول غير على الحالة ديالك.. "جبد تليفون ديالو" ..هاكي قلبي تليفون اتلقاي كاع لميساجات لي بيناتنا كلهم غير عليك بوحدك... "دق فلباب بترجي" ..اريييج كنقسم ليك بالله ما كنبغي تا وحدة من غيرك....

تحل صمت بيناتهم و فوسط الصمت تسمع ساروت كيدور و حلات لباب بشوي و مدات يديها فقط...

اريج بصوت مبحوح : تليفون...

حط تليفون فيديها و قبل ما تدخل يديها و تسد لباب دفعها بشوي و دخل عندها و سد لباب وراه بسرعة ...


كلشي بقى كيشوف فالباب لي تسد و خلاهم جامدين فمكانهم... دار عند هاجر و راسو ايطرطق...

كمال : شفتييي هادا لي بغيتيه لبنتي شنووو كيدير فوجهي بلا حشمة....

هاجر جراتو كتبرد سوق : وخليهم يتفاهمو را سمير بعقلو هو يعرف يتعامل معاها...

كمال: كون كان بعقلو كون بان عليه نهار لول بلا ما يدير ديك الكارتة ومزال زايد فيه بالحمار....

هاجر غمزات سمية لي تحركات عند كمال بحنية جراتو عندها...

سمية: صافي احبيبة ديالي صبر شوي غادي غير يوضح لأمور لبنت ويخرج ما تعصبش راسك...

جلس كمال كيترعد فبلاستو مراديش بهادشي لي واقع و عينو على لباب كيحسب دقايق بحال شي واحد شاعلة لعافية تحت منو....

بقى سمير واقف حدا لباب كيشوف فيها و فعنيها لي حمرين و دموع لي مرسومين على خدها.. حاول يقرب ليها وهي تهز يديها وقفاتو بعصبية...

اريج: حدك تماااا متقربش ليا...

سمير بحنية فصوتو: اريج سمعي شنو بغيت نقول ...

حاول يقرب منها وهي ترجع بخطوات لور مزيرة على سنانها ...

-قلت ليك متقربش وااااش مكتفهمش و اصلا معندكش حق دخل عندي هنا لبيتي انا قلت ليك تليفون ماشي نتا...

سمير بصبر مد ليها تليفون : اوكي هاكي....

مدات يديها وهي تعاود ترجعها ورا ضهرها و شارت بعنيها لفوق طبلة...

اريج: حطو فوق طبلة و انا غادي نهزو بلا ما تقيصني ما نقيصك...

هز فيها حجبانو بجوح بدون فهم و رغم ذالك حط تليفون فين قالت ليه و بقى واقف كيشوف فيها..

اريج: فين كتشوف خرج عليا من بيتي...

سمير سرط ريقو بصعوبة : خاص نهضرو...

ربعات يديها لصدرها مخنزرة...

اريج:لهضرة بعد ما نشوف تليفون ماشي دابا....

سمير بندم: مكتيقيش فيا....

اريج بصرامة: لي عضو لحنش يخاف من لحبل اولد الناس و تيقة ما بقى عندي بيها ساس هاد ساعة كلشي هدمتيه بيديك....

سمير بحرقة : مزال ما فاهمة والو ا اريج باك لي...

عضات لسانها مجننة قطعات كلامو: ماااا تجبدش باااا على فمك ا سمير.. قلت ليك الهضرة بعد ما نشوف تليفون بغيتي هي هديك ما بغيتيش هز تليفونك و خرج و نسا عليك شي وحدة سميتها اريج....


بقى كيشوف فيها بصمت بدون ما يرد عليها فقط كيشوف فعنيها.. زير على يدو مزيان و دار حل لباب وخرج.. بلا ما تحس بنفسها تبعاتو وقفات حدا باب بيتها و عنيها بقاو على ضهرو وهو غادي بزربة مكيشوفش قدامو داز عليهم بحال رعدة و خرج بلا ما ينطق بوالو....

هاجر بزربة دارت عند اريج شافت فيها و تبعات سمير كطير.. شافتو غادي فشارع مكيشوفش قدامو.. بقات تبعاه من لور بصمت خلاتو على خاطرو و بقات فقط تبعاه بحال خيالو وخا عيات و بدا كيضرها لتحت ديالها لي مزال مبراش بعد الولادة الا انها صبرات و كملات معاه طريق حتى وصل لبحر و جلس فرملة كيشوف فالبحر بصمت و ملامحو حاملين الف حكاية و حكاية......

مقدراتش تمشي عندو من شافت الالم لي حاملين ملامحو.. كتفات فقط تجلس بخطوات قلال بعيد منو و بقات مرقباه بحال شي ام كتراقب ولدها خايفة لبعدات عنيها منو غادي يضيع منها و متعاودش تلقاه....


غربات شمس على جوج اشخاص لي مزال فمكانهم.. تنهد بجهد وجمع لوقفة كينفض حوايجو من رملة دار وهو يتصدم من شافها جالسة خرج عينو ونطق بعدم تصديق....

سمير:: هاجر اش كديري هنا...

شارت ليه حداها. .

هاجر: اجي جلس حدايا...

جلس حداها و حجبانو مرفوعين بينما هي كتراقب شمس كتغرب...

سمير: مكانش عليك تسنايني هاد الوقت كامل و نتي مزال مريضة. ..

هاجر بحنية : ماشي مشكل الواحد خاصو يجلس مع راسو باش يفهم شنو باغي و يصفي خاطرو...

راقب لغروب بحالها و نطق بشوي...

سمير: كلشي تبدل ما بقيت فاهم والو...

هاجر: كلشي ايتصلح عطيها وقت تراجع نفسها و تعرف اش بغات وخاصك تقبل اي قرار خداتو و متحاولش تحكم فيها...

سمير بصوت تقيل : هادشي لي كنت خايف منو من الاول كنت عارف ان هاد الحب غير ديال المراهقة و ايجي وقت لي اتشوف لقدام و غادي تنساني وتبغي واحد حسن مني ولكن الغلطة لي غلطت غادي ندفع بها تمن غالي حياتي كاملة و عمري نسامح راسي...

هاجر بحزن : شنو غادي دير لمبقاتش بغياك....

غمض عينو و قلبو كيضرب بجهد حس بدموع تجمعو ليه فعنيه و حلقو نشف و تزير كتر ..بقى ساكت لدقيقة كاملة عاد نطق بصوت مخنوق...

.سمير : غادي نتسناها تا تكبر و نتزوجها ومن بعد نطلقو ومن بعد تكمل حياتها كيف بغات بعدا كلام ناس مغديش يتبعها بأنها ماشي بنت...

هاجر : وكضن هادشي اتقبل عليه هي ....

سمير بالم: هذا هو الحل الوحيد باش نحميها من هضرة ناس لمبقاتش بغياني....

شافت فعينو حنينة.. هزات يديها و غلغلات اصابعها بين خصلات شعرك و دعباتو بلطق...

هاجر: عانيتي بزااف اسمير تستاهل تفرح و تعيش مع لي يبغيك و تبغيه ....

تبسم ليها نصف ابتسامة رغم عيونه لي كيحملو الم و رجعات ليه الابتسامة بلطف ... رجعو اعينهم لبحر مراقبين اخر جزء من غروب الشمس بصمت و هواء نقي كيضرب ملامحهم المكتأبة و كيعاود ينعشها ببطء....


دازو ايام كلها متشابهة كل واحد عايش نهارو بلي فيه وخا الالم فلقلوب و العيا فالجسد الا ان طبيعة البشر هي الاستمرارية في العيش رغم كل الظروف الصعبة...

جالسة بين رجليه حاطة رجليها فلابيسين و متكية على صدرو بينما هو مدور يدو على خسرها كيلعب فكرشها... مراقبين حاتم لي كيسبح قدامهم... خشى راسو بين عنقها و قبلها فخدها مع همسات حدا ودنها...

عصام: شحال بقى ليك...

هاجر ساهية فولدها نطقات بدون فهم..

.-خمس ايام علاش كتسول...

عصام ببحة رجولية همس ليها : توحشتك بزااف....

هزات راسها لعندو مصغرة عنيها..

- انا ديما حداك علاش اتوحشني...

ضحك من نيتو وقرب لعندها قبلها بزربة فوق شفاه ديالها و بعد هاز حجبانو ..

عصام: وهادشي متوحشتيهش.....

بقات كتشوف فيه بصمت وهو يغمزها خلاها تحمار غير وحدها.. دورات راسها و عطاتو بضهرها...

هاجر: مبقيتيش كتحشم..

جرها عندو كتر خشاها وسطو مزير عليها بين يدو...

عصام: هادشي مفيهش الحشمة ا هاجر وحنا ماشي عاد تزوجنا لبارح...

سكتات مقدراتش تجاوبو.. بقى متبعها بعينو ساهي فيها بحب ويدو كتلعب فكرشها تا نسى راسو ونطق بلا ما يحس....

عصام: ولات عندك لكرش كتر من لول...

تنفضات فبلاصتها و بزربة بعدات منهو مقصحة فيه شوفة... جمعات لوقفة خلاتو جامد فبلاصتو.. حل فمو يشرح ليها لقى قدامو غير لبرد و ريح.. ناض تابعها و هي مخنزرة و عنيها كيطلقو لقرطاس خلاه يوقف بزز منو مقدرش يتبعها...

دخلات على الياقوت بحال جن خلعاتها...

الياقوت: بسم الله الرحمن الرحيم مالكي ابنتي داخلة هاد دخلة خلعتيني...

هاجر بعصبية : ما مليش....

الياقوت : اجي فين غادة جلسي بعدا لغدا غادي يتحط...

هاجر مزيرة على سنانها : مبغيتش انا من ليون ما بقيت اناكل تا حاجة واندير رجيم فكلشي...

الياقوت هزات كتافها: اوا انا غير قلت وصافي حيت دايرة طاجين ديال لحوت لي كيعجبك ....

غير سمعات طاجين ديال لحوت وهي توقف ودارت عندها...

هاجرعنيها كيديورو : اتحطيه دابا ولا مزال...

الياقوت ها هنا لخدمات كيوجدو طبلة انعيط على عصام و حاتم يجيو يتغداو..

بغات طلع مردياش و مزيرة على نفسها تا داز طاجين من قدامها هزاه لخدامة و ريحة عاطية دخلات معاها بحال لدروك بلا متحس براسها تبعات طاجين كتسرط فريقها...


جلس حداها عصام وهي مهزاتش راس فيه.. قدات طبسيل قدامها كتحط فيه وهي تنطق الياقوت مكمشة حجبانها...

الياقوت:ياك قلتي اديري ريجيم...

هزات راسها و فمها محلول : كفاش....

حيدات ليها الياقوت طبسيل لي عمراتو حطاتو قدام عصام و هاجر متبعة ليه عنيها غادي يخرجو من بلاصتهم بحالي داولها ولدها...

هزات راسها فعصام مخنزرة بغات تفرسو وهو بدون وعي هز طبسيل يرجعو ليها وهي تسبقو الياقوت حطات ليها طبسيل فيه صلاد...

الياقوت: هادشي لي كيتبعو ناس فالرجيم اما لخبز و طاجين غادي غير يزيد يغلضك و نتي وليتي قد لغولة نقصي شوي اصاحبتي لغلظ غير كيكبر مولاه ....


حطات لملح على الجرح وخلات هاجر تلون فبلاصتها و ودنيها كيصفرو مرضاتش بغات طرطق من لداخل و وجها رجع حمر...

عصام بزربة حيد من قدامها طبسيل ديال صلاد و رجع ليها طبسيلها لي عمراتو وشاف فمو...

-لغلض اصلا كيجي معاها وهي مغليضاش بزااف وانا كتعجبني هكذا...

هزات عنيها شافت فعصام لي تبسم ليها وحرك ليها طبسيل تاكل.. بقات كتشوف فيها وهي تهز طرف لخبز اتبدا تاكل وهي تعاود توقف بكلام الياقوت لي قالت....

الياقوت: لواه اولدي وخا تكون مكتشوفش كاع راه باينة غلاضت هي اصلا كانت عامرة فالاول وكانت زوينة اما دابا غلاضت تا طبزات رجعها خايبة و انا عارفك اولدي مكتبغيش لمرا تكون غليظة بزااف...

هاجر عضات فمها من لتحت بجهد هبطات عنيها جات مع كرضها لي سبقاها تقول مزال حاملة.. زادت تزيرات كتر و هي تجمع لوقفة و نطقات و دموع فعينيها ....

هاجر: مبقيتش اصلا غادي ناكل....

طلعات كتجري مرضياش و الياقوت ما فاهمة والو...

الياقوت: مال هادي ياك قالت بفمها غادي دير ريجيم ...

عصام حط يدو على جبهتو و تنهد بجهد كيكون مزيان تا كيجبد عليه زلزال يزلزل ليه راسو...


وصل ليل وهي ناعسة فبيت ولدها.. غطات حاتم لي نعس و جلسات مربعة فوق ناموسية و كرشها كتغرغر بجوع.. عضات فمها من لتحت كتقمع فراسها ...سمعات دقان فلباب و صوت عصام من ورا لباب.......

عصام: هاجر حلي لباب....

هاجر : سير بحالك انا غادي نعس مع ولدي...

عصام تنهد بيأس : خرجي تاكلي متبقايش بجوع....

هاجر: ماشي سوقك نموت كاع بجوع اش دخلك فيا...

تكى على لباب كيهضر بشوي...

عصام: نتي عارفة ما قصدت والو بهضرتي...

هاجر: اممم اماتش غير خرجو مسارنو واش كضحك عليا كتصحابني بنت لبارح ولا ديك هاجر لي كلمة جوج كترطاب..

عصام بحنية : هاجر انا كنبغيك حيت نتي مكيهمنيش تكوني غليضة ولا رقيقة لي كيهمني هو نتي وشي لخر مكيهمش...

هاجر عضات فمها و نطقات بتردد. ...

-وعلاش قلتي ليا عندك لكرش من نتا كتبغي فيا كلشي...

عصام بحنية : انا مقصدتش لغلظ نتي عاد والدة و بقا ليك خمس ايام ومن سولتك نضتي نتي تقلقتي و مخليتينش نسالي كلامي....

هاجر : وشنو كنتي كتقصد...

عصام: قصدت واش كرشك مزال كضرك مبغيتش من نعاود نعس معاك توقع ليك شي حاجة...

هاجر صغرات عنيها: حلف بالله انك هادشي لي كنتي قاصد...

عصام من نيتو حلف: كنقسم ليك بالله هادشي لي قصدت اهاجر...

تحل صمت بيناتهم كيسمع تخرشيش من ورا لباب و بتواني حلات لباب و خرجات عندو مخرجة شفاه ديالها بحال شي طفل صغير كتشوف فيه من تحت رموشها..

شاف فيها بحنية وجرها عندو لحضنو ودور يدو عليها بلطف.. قبلها فجبهتها و نزل بقبلاتو الحنينة حتى قرب لفمها و بعد كيداعب نيفها بنيفو...

عصام: علاش كديري ليا هكذا...

هاجر كتلعب بصباعها فصدرو: نتا لي مشرحتيش ليا مزيان...

عصام بهمسات: نتي معطيتينيش فرصة نشرح ليك... .

هزات كتافها بطفولية : ما وقع والو....

تبسم نصف ابتسامة و قبلها فطرف فمها و هزها بين يدو فرق ليها رجليها دورهم على خسرو و حط يدو على مؤخرتها ...هبط هو وياها لتحت دخلو لكوزينة حطها فوق لبوطاجي ورجع قبلها في فمها بحنية مص ليها شفاه ديالها بحب و نطق ما بين شفاها العسلية...

.عصام: شنو بغيتي تاكلي ....

هاجر عنيها بداو كيلمعو: غادي طيب ليا...

قرص ليها خدها : اممم شنو بغيتي...

هاجر بفرحة: صاوب ليا غير ليباط بالبشاميل مع لفرماج....

كمش حجبانو وهز تيلفون بدا كيقلب فاليوتيوب.. لقى داكشي لي بغات و بدا كيجبد كل لي يحتاج و متبع الوصفة شنو الخطوات لي كيدير بتركيز جاب ليها ضحكة و فنفس الوقت نساها فكلشي و رجع ليها لبسمة و لفرحة لقلبها....


داز من حداها وهي دور يدو على عنقو جراتو عندها قبلاتو فخدو بحب و طلعات فوق ضهرو مدورة رجليها على خسرو...

عصام: مالكي...

هاجر خشات راسها بين عنقو و نطقات بهدوء...

-والو غير بغيت نركب فوق ظهرك و نعنقك بحال هكذا...

تبسم بحب.. دار عندها قبلها فخدها و رجع كيقاد داكشي لي كيمليه عليه لفيديو وهي راكبة فوق ضهرو متبعة معاه اش كيدير فجو هادئ و رومنسي لي خلقوه مع بعض و نساهم فكلشي...

فالجهة لاخرى ديال لفيلا كيتواجد صال كبيرة فيها كل معدات ديال رياضة.. بحال شي ناضي رياضي كتسمع موسيقى غربية سريعة و صوت تنفس حاد.. لابس شورت ومن لفوق عريان مدور فاصمة على يديه كيضرب صاك الملاكمة بكل قوتو و عضلاتو المقسمة كيتحركو مع كل حركاتو و لحمو كيتراقص بالعرق و شعرو نازل على جبهتو فازڭ...

توقف من ضرب من سمع الهاتف كيصوني... بعد من صاك الملاكمة كيسوط بجهد و صدرو كيطلع و يهبط بكثرة الحركة لي كان كيدير..

هز قرعة لما شربها كاملة و حيد لفاصمة من يدو بهدوء عاد قرب لهاتف لي محبسش من الصونيت... فور ما جات عينو فالشاشة تجمد لتواني عاد تحرك بسرعة هز تليفون كيشوف فالنمرة لي فشاشة..

كانت نمرة ديال الهاتف ديالو لي خلاه عند اريج.. صرط ريقو بصعوبة و تنهد بجهد و بيد مرتجفة قبل لخط و حط تليفون على ودنو و قلبو كيضرب بجهد...

كان الصمت من طرف الاخر و نطق يصوت مبحوح و عينون حاملين لطف و شوق من سمع صوت تنفسها على الهاتف.....

سمير بحنية نطق: اريــج...

بعد تواني ردات عليه بصوت هامس: اممم...

سمير دور يدو على شعرو بأحاسيس متخلطة ما بين الفرح و الحزن و الخوف قال...

-تأكدتي ....

اريج : خاصني نشوفك...

جمع لوقفة بزربة و نطق بسرعة...

سمير: اه فينك نجي عندك دابا....

خطى خطوات بزربة خارج برا لصال وهو يوقف تحت كلماتها...

اريج: ماشي دابا ا سمير...

سمير : اي وقت ا اريج معنديش مشكل انا تسنيتك و مزال غادي نت.....

قطعاتو بدون ما تخليه يكمل كلماتو...

اريج: غدا مع صباح نتلقاو فالقهوة ديال بابا...

فور ما سلات كلامها قطعات عليه بينما هو بقى مصدوم فمكانو مزير و رغم انه عارف انها قطعات لخط الا انه كمل كلماتو لي قطعاتهم بكل الم...

سمير: وغادي نبقى نتسناك حياتي كاملة...


عندما قلت لك انني اكرهك قصدت بها اني لم احب في حياتي شيئاً مثلك....

وعندما قلت لك ابتعد كنت في اشد الحاجة لقربك....

لكنك كالعادة لم تفهم.......

من نهار خرح سمير من دارهم وخلا ليها تليفون وهي مرفوعة معرفاش شنو ادير كل ما كتحاول تفتح الهاتف و تلحت عن الحقيقة لي شاغلة بالها كتوقف و تمنع نفسها.. خايفة تصدم و تلقى ما يتبث خيانته له..

خايفة داك الامل الضئيل لي كتحس بيه انه فعلا مخنهاش يختفي من الوجود بعد ما تشوف الهاتف ديالو.. ولو انها قصحات راسها وتقول فنفسها انها مستعدة لأي حاجة وان تيقتها بيه تلاشت من سافر وخلاها لكن رغم دالك القلب ضعيف جداً لمن امتلكه و احبه من اعماقه...

لسانها بنطق بكلام و قلبها يقول كلام اخر حتى مبقاتش قادرة تعرف ايهم الصادق و ايهم الكادب هل هو القلب ام العقل...

دازو ايام كتيرة وهي فصراع نفسي حتى بهاتت و ملامحها دبالو بكثرة بكائها و بؤسها كأنها بين ليلة ونهار كبرت من فتاة مراهقة اية في الجمال الى امرأة ناضجة ....

في سواد الليل وعقارب الساعة كيتسمعو في غرفتها الهادئة متكية فمكانها على ضهرها وساهية فالصقف و فوق من صدرها الهاتف ديال سمير.. فداك الصمت البائس لي كتطلب فيه الحقيقة لي بين يديها و مقدراش تبحت من كترة خوفها صونا الهاتف لي فوق صدرها...

تهزات كاماة مخلوعة وبسرعة هزات تليفون و قلبها كيضرب بجهد ضناً ان سمير هو المتصل لكن فور ما بان اسم المتصل فالشاشة ختفى كل التوقع و اللمعان لي كانو حاملين نضراتها و تحولو لنضرات جامدة في اسم المتصل و نطقاتو بضعف و انكسار...

-"سهيلة"....


قبلات الاتصال بيد مرتجفة و حطاتو على ادنها بصمت بينما الذرف الاخر نطق بهدوء...

سهيلة: الو سمير صافا.. مهم سمح ليا تاصلت بيك دابا ولكن بغيت غير نقول ليك انني خرجت من دار و بلا متشغل بالك صبيطار لي خدامة فيه عطاوني ستوديو صغير نسكن فيه وراني علمت السكرتيرة ديالك كنضن انها اتكون علماتك و لكن تاصلت بيك باش نشكرك على كل لي درتي معايا و خليتني نعيش معاك فدارك.....

فور ما نهات كلامها بـ"خليتيني نعيش معاك فدارك" تسمعات شهقة مرتفعة من اريج لي صدمة وضاحت على ملامحها كتر.. حطات يديها على فمها و دموع بداو كيهبطو من عنيها بغزارة و صوت انينها جهاد...

سهيلة كمشات حجبانها و بسرعة بعدات تليفون شافت اسم و نمرة عاز رجعاتو لودنها مصغرة عنيها و نطقات بشوي...

-اربج واش هادي نتي....

-دون رد فقط صوت انين كيألم و يكسر القلب و الخاطر...

سهيلة: اريج لكنتي نتي جاوبيني ....

اريج بصوت متكسر متألم: علاش اختي درتي معايا هادشي نتي عارفة اش وقع بيني و بينو حشومة عليك اش درت ليك باش تغضريني هاد الغضرة ....

سهيلة بدون فهم : اريج واش معاك سمير دابا....

اريج تنهدت بجهد: علااش كدبتوو علياا...كون قلتوها ليا نهاار لول متخليونيش معلقة هكدا ما عارفة راسي من رجلي.. من نتي وياها كتبغيو بعض وعايشين مع راسكم علاش مخليني نتعدب و نتقهر....

سهيلة بعصبية: اريييج واش عااارفة علامن كتهضري رااه سمييير هذاااك ..سمير لي دار عليك لي تا واحد ما يقدر يديرو وانا ماشي بنت لحرام لي نفرق بيناتكم.. سيري هضري مع سمير و عطيه وقت يشرح ليك كل لي كاين و متبقايش غير كتخربقي و طيحي الباطل على اي واحد انا و سمير فقط اصدقاء وشي حاجة خرا مكيناش...

اريج مزيرة: وعلاش سكنتي معاه فدارو....

سهيلة حطات يديها على جبهتها : انا نهار جيت لأمريكا هضرت معاه يعاوني فالسكن حيت هو لي كنعرفو ساكن هنا و نهار لول خلاني فدارو و اصلا فنفس النهار هبط المغرب عندك يعني معشتش معاه ا اريج هو خلا لي فقط دارو بما نلقى فين نسكن و صافي.... "تنهدات بجهد"...ما بيني و بينو والو ا اريج سمير وحدة لي كيبغي هي نتي بوحدك وعمر شاف غيرك....

اريج بألم حوطات نفسها: كون كان كيبغبني كاع ميتخلى عليا و يسافر و يخليني بوحدي كنتعدب....

سهيلة: هو تعدب كتر منك ا اريج و انا اكثر وحدة فهماك و فهماه حيت تا انا دزت من نفس تجربة الحب لكن الاختلاف نتوما بغيتو بعض و انا كان حبي من طرف واحد و تعدبت فيه بوحدي وتا حد ما شاركني الالم لي عانيت منو.. بينما نتوما بجوح حسيتو ببعض و تألمتو لبعض و مكنضنش عندي حق اني نقول شي هضرة فمكان سمير لذا من الاحسن عطيه فرصة يشرح لبك كل لي عناه وهو بعيد عليك و شنو لي خلاه يبعد.. مكاينش لي يقدر يبعد من شخص لي كيبغي الا لكانت شي حاجة ضدو ا اريج....

اريج حدرات راسها مزيرة على حوايجها قالت...

-جريت عليه و مخليتوش يهضر ...

سهيلة: ولكن خلا ليك تليفونو يعني مزال كيتسناك تاصلي بيه باش يشرح لبك كلشي....

اريج زيرات على فمها بدون ما ترد بينما سهيلة نطقات بحنية فصوتها....

سهيلة: اريج سمير كيبغييك بزاااف مضيعيهش بين يديك ولا غادي تندمي حياتك كاملة حيت مستحيل تلقاي شي حد يبغيك بحالو....


وقع صمت بدون ما ترد اريج و كذالك سهيلة عطاتها فرصة تفهم كلامها عاد نطقات...

-نخليك دابا لي عليا قلتو ليك سمير كأخ و صديق مقرب فقط عمري شفت فيه شخص اكثر من هادشي ...

غادي تقطع و هي تسمع صوت اريج.. رجعات تليفون لودنها كتسمع كلمات اريج لي نطقات...

-اريج: تا هو كببغيك بزااف و كيدير المستحيل باش ترضاي عليه عطيه فرصة حيت تبدل على شخص لي كان عليه....

هبطات راسها و زيرات على فمها بجهد حولات تمالك نفسها من دموع لي تشكلو على عنيها و نطقات بهدوء قبل ما تقطع الخط....

-انا وعماد منصلحوش لبعض ا اريج...

تقطع الخط و رجع الصمت من جديد لغرفتها... حطات تليفون و بقات جامدة فكانها محساش براسها انها تنهدات براحة او ان نضراتها رجعو كيبيرو ترسمات ابتسامة جميلة على ملامحها... كانو هادو كلهم عوامل خارج استعابها لأنها هي بنفسها غاصت في افكارها و بالضبط فسمير كيف كان كيطلب و يرغب تسمع ليه وهي جرات عليه بديك طريقة...

عضات فمها من لتحت و هبطات راسها تنهدات بجهد و هي تجمع الوقفة خرجات من بيتها و هبذات لتحت دخلات لكوزينة كدور فعنيها...

سمية: بنتي مالكي كضرك شي حاجة....

اريج : فين هو بابا....

سمية: فدوش شوي و بخرح علاش بغيتيه....

حركات راسها و جلسات فطبلة ديال الاكل كتسنى فباباها بينما سمية كتحط الاكل فوق طبلة... دخل عليهم كمال حاط فوطة على عنقو كبمسح راسو لابس كيطمة ديال دار... شاف بنص عين فسمبة لي لابسة كسوة قصيرة معربة من جهة ضهر وهازة شعرها بقراصة مخلبة بعض الخصلات فقط لي طايحين على عنقها خلاوه يسرط ريقو بصعوبة.. هبط عينو ببطء على طول جسمها المنحوت و الممتلئ ومع لكسوة مزيرة فصلات ليها جسدها وخلات عينو كيبريو...

تبسم بجنب و تقدم لعندها مشافش بنتو لي جالسة فطبلة.. وقف وراها وقرب نيفو حدا عنقها ستنشق ريحتها بحب و نطق بصوت تقيل....

كمال: حبيبة...

سمية عنيها فشغل لي فيديها متصوقاتش ليه: اممم....

كمال حط بدو فوق درعانها برقة ولمسهم بحنبة وهمس ليها حدا ودنها...

-باركة عليك من شقى نهار كلو ونتي فالكوزينة...

سمية دفعاتو بكتفها بلا متهز عنيها فيه: وشنو بغيتيني ندير نخلي كوزينتي مسخة باش تبقى على خاطرك....

دور يدو على خسرها لسقها معاه و خشا راسو فعنقها قبلها بشهوة ..شدها من يديها وهي مصدومة...

كمال : اجي معايا....

سمية بصدمة خرجات عنبها: بلاتي اريج كتـ...

شاف فجهة لي كانت جالسة فيها بنتها ملقاتهاش وكمال معطهاش وقت فين تزيد تهضر.. هزها بين دراعو و قتاحم فمها بقبلة عميقة حاملة كل نيران الشهووة و الرغبة.. بدون ما يطلعها لبيت ديالها حل لباب ديال بيت ضياف لب حدا لكوزينة دخل وسد لباب برجلو...

فور ما سد لباب خرجات اريج من لحمام و وجها حمر ايطرطق بالحشمة.. بزربة طلعات كتجري لبيتها وخا قريبة لوالديها بحال صاحبتهم لكن عمرها شافت باباها كيتعامل بهاد طربقة... حشمات و ملقات غبر تخبي راسها فالحمام...

دخلات لبيت وهي كدور فبلاصتها و كتفكر غير وحدها و كل مرة دور تشوف فتيليفون ديال سمير لي فوق ناموسية....

هزاتو دورات لنمرة الهاتف ديالو التاني.. حطاتو على ودنها و قلبها كيضرب بجهد و لسانها مربوط فور ما تقبل الخط و تسمع صوتو حسات بدموع رجعو كبتشكلو فعنيها استعدادا لبكائها شي لي مخلهاش تقوي فالهضرة معاه و بزربة قطعاتو بدون ما يكمل كلماتو خوفا انها تبكي و بسمع لبكائها....


شرقات الشمس أخيرا على قلوب محبة و قلوب مشتاقة للقاء وكل واحد حامل كتير من الأشياء لي باغي يقولها و كيتسنى غير اللحضة لي تعطاه فرصة..

جالسين فطبلة ديال لفطور مجمعين هاجر هازة سجدة كترضعها و حداها الياقوت هازة ساجد كتلعب معاه و أسماء هازة ولدها الصغير محمود...

أسماء : دابا صافي تافقتو تعيشو فإفريقيا الجنوبية ...

هاجر : وي اختي حاتم مولف ليا تم و زيد خدمة ديال عصام كاملة تما ميقدرش يحولها قلت حسن لعيشة تم تا الجو و طبيعة زوينة دغيا كتولفي...

الياقوت : حسن نيت اما قوة التسافير ما بقيت قادرة عليه....

سمعو خطوات هابطة من دروج و هما يهزو عنيهم فشخص لي هابط مبتاسم و عنيه كيبريو ...

هاجر كطلع و تهبط فيه : هاي هاي على سمير شهاد الحطة ضاربها مع صباح..."غمزاتو"...شكون هادي لي فايق على ودها مع صباح كتفرنس فرحان ...


سمير هز طرف ديال لحلوى وتم خارج زربان: شكون من غير اريج ...."دار عند هاجر قبل ما يخرج من لباب"...انتلقى بيها اليوم ...

الياقوت بصدمة كتشوف فالباب لي خرج منو سمير : كفاش اريج...

أسماء : علاش اماما ما فراسك ما يتعاود...

الياقوت بعصبية : لا الالة فهموني نتوما انا بان لي وليت زايدة ناقصة فهاد دار...

هاجر :اودي الحاجة مكاين والو غير هضرة دايزة و صافي مزال لبنت صغيرة و ايتلقاو بحال أيها الناس يهضرو و يتفاهمو اش فيها ...

الياقوت : جيني نيشن بلا دخول و خروج فالهضرة علاش ايتفاهمو ...

أسماء : واالو اماما غير سمير كتعجبو اريج و طلب يديها من باها ودابا خارج يهضر معاها يشوف واش موافقة عليه و يسمع شروطها بحال كل ناس....

الياقوت حطات يديها فوق قلبها : نتوما اش كتقولو لبنت مزال صغيرة عاد لبارح تعلمات تمشي و خطبها بلا ما يتشاور معايا ولا ياخد برأيي انا غير زايدة عندو فين ديك الوليدة لي يضل يقولها ودابا من بغى لبنت قالها ليكم وانا لا ...

أسماء : اوا صافي اماما تا اريج غزالة كتحمق وهو يستاهلها صراحة وما فيها عيب يحط عينو عليها من دابا بعدا تكبر و تعرف راسها ديال سمير ....

الياقوت بعصبية : لاا بقى فيها غير العيب انا عاد تكافيت مع هاد زلزال و يجيني بركان اخر يرسلني نيشن لروضة ...


هاجر خرجات عنيها : دابا انا لي وليت خايبة ياك عنداك تصحابيني نسيت ما درتي فيا نهار كنت مريضة راه غير مكنبغيش نجبد العيب و كنغمض عيني و نخلي شمل مجموع بلا ما نديرو لعب لبراهش...

الياقوت : لا زعمة نتي خليتي شمل مجموع من طلقتي ولدي وخلتيه يتعدب عام كامل بسبابك ....

هاجر : شفتك اختي قلبك عامر عليا ودايرة غير سبا باش تنوضي ياك لباس ...

الياقوت : لا بان لي نتي لي بديتي كتنفخي و تخطبي لولدي بلا خباري وانا كيف ضبعة بيناتكم ...

هاجر : الله يرحم باك بلا ما تصدعي ليا راسي تا يجي وضبري راسك معاه ....

الياقوت حطلت يد فوق يد كتحلف فبلاصتها : اوا وخا عليك اولدي سمير وليتي تخطب بلا بيا ..اوا من باغي يتزوج يشوف غير شي بنت قدو تواتيه و يواتيها ماشي اريج...

أسماء : حشومة عليك اماما اريج غزالة واي واحد يتمناها ودابا دارت الحجاب و كتصلي مشالله شنو بغيتي كتر من هكدا ....

الياقوت هزات كتافها : انا مجاتنيش على كَانتي ولدي خصاه شي وحدة لي تعمر ليه لعين وتسخن ليه لفراش فوقت لبرد ...

هاجر مخسرة سيفتها : امممم غادي يتزوج بملاية نتي نوضي باركة من ضحك الخاوي سيد شحال وهو يطلب ونهار حنات البنت عليه نوضي ليه نتي من جنب خسري ليه كلشي ...

الياقوت خرجات عنيها : وماااالو يطلبها مالها لقات حسن منو ...

هاجر : الالة صوقهم هداك حنا مالنا ....

الياقوت : انا مبغيتهاش...

هاجر :اوا غير دوري بيه راه يسمع ليك فكلشي جيه تال اريج يقلب عليك الفيستة بحال عمرو عرفك...."شافت عصام هابط وهي تبدل طريق ديال الهضرة "...و ييه اخالتي الحبيبة داك طاجين لي صاوبتي جا غزال...

الياقوت تا هي كتر منها غير شافت ولدها وهي تفرنس لهاجر : فأي وقت ابنتي لحبيبة شحال عندي من عروسة ياك غير نتي لي معمرة عليا دار...

هاجر تبسمات بزز منها كتهضر تحت سنانها : ربي يخليك ليا اعكَوستي...

عصام بإبتسامة قرب منهم باس راس ختو ومو وقرب لهاجر هز منها سجدة ولعب ليها فحناكها بلطف....

-عدبوك...

هاجر : لا كتعاوني فيهم خالتي...

عصام حرك راسو و بقى كيلعب مع اولادو تا هبط عندهم حاتم وهو يجمع الوقفة خرج هو وحاتم وخلى لعيالات شي كيشوف فشي...

اسماء : باااز وجهكم صحيح ..وراه دايرين كيف لمش مع لفار و قدامو بحال سمن مع لعسل...

الياقوت و هاجر نطقو دقة وحدة : اوا دار لي فيها حبيبك فيها عدوك ...


في القهوة ديال كمال ..جالس فطبلة مع كاس قهوة لي طلب و رجلو كيتهزو بتوتر و كل مرة يهز يدو يشوف شحال فساعة و يرجع يحطها و يدور عينو على باب لقهوة كيقلب على خيالها بدون فائدة ..ماقدرش يعيط عليها و كتفى فقط يتسناها بكل شوق و قلقل...دازو ساعات وهو فمكانو وملامحو تحولو لألم ولكن بقى صابر كيتسنى ....

تقدم ليه سرباي : خويا من 8 ونتا كتسنى هنا واش كاين شي مشكل....

سمير دور يدو على شعرو بيأس : كنتسنى غير شي حد ...

سرباي : وخا خويا مرحبا..بغيتي شي حاجة لغدا نقدموها ليك ...

سمير هز ساعة لقاها 2 وهو يغمض عينو بجهد وتنهد بصوت مرتفع ...

_من بعد مد ليا غير شي كاس ديال لما ...

مشا سرباي و بقى غير سمير كيدور عينو فكل ركن فالقهوة و يرجع يشوف امامو بيأس حاس بقلبو مزير و الألم واضح فعينو وبدون شعور بدا اليأس يتسرب لأنحاء جسدو...

بعيد منو واقفة سيارة امام القهوة مباشرة ..قرب ليها سرباي لي هضر مع سمير وهضر من شرجم لي محلولة نصف حلة...

سرباي : مزال اسيدي غادي يتسنى...

كمال : وقتاش وهو تم ...

سرباي : من 8 ديال صباح اسيدي....

كمال : صافي سير شوف خدمتك ....

مشا سرباي بحالتو و كمال بقات عينو على سمير لمدة طويلة عاد تنهد ودار عند بنتو لي جالسة حداه ...

كمال : متأكدة من هادشي لي بغيتي ديري ...


اريج مهبطة راسها وجامعة يديها وسطها حركات راسها بهدوء...

كمال بحنية فصوتو : شوفي ابنتي انا مغديش نحاسبك على الغلط لي درتي وعمري غادي نحاسبك عليه حيت لغلط لكبير ديالي ماشي ديالك..."حط يدو فوق راسها"...وانا ابنتي باك نبغي ليك غير لخير متبززشيش على راسك بسباب غلط ديري لي بغيتي ومكاين لي يهضر عليك وانا فهاد الحياة ...

بدموع فعنيها هزات يديه باستها ليه

_عارفة ابابا لي كاين و نتا ربيتيني احسن تربية وانا لي مكنتش كنفهم ولكن هو لي ختاريت ا بابا ....

كمال بحنية فصوتو : سيري عندو ابنتي و الله يسهل عليك ...


فور ما شافها داخلة من باب لقهوة تهز كامل جمع الوقفة و قلبو كيضرب جهد و نضراتو حاملين اشتياق و ترقب...

وقفات قدامو حانية راسها وهو كيشوف فيها قرب بغى يعنقها و يدخلها فأحضانو يفدي شوقو فيها و لكن مقدرش من شاف حجابها و لبسها المستور...

كتفى فقط انه ينطق ...

-اريج صافا..

حركات راسها ببطء : سمح ليا تعطلت عليك ...

حرك ليها كرسي تجلس و رجع جلس فبلاصتو وعينو مبعدهمش منها : ماشي مشكل مهم انك جيتي..."حرك يدو لسرباي"...بغيتي تشربي شي حاجة ...

هزات راسها لعندو ونطقات بهدوء...

-نو بلاش خلينا نهضرو هو لأول....

سمير : وخا لي بغيتي..

هزات كاس لما لي كان فوق طبلة شربات منو شوي سرحات حلقها و شافت فيه مزيان ...

اريج : شنو بينك و بين سهيلة ....

ركز عينو مع عنيها مع ابتسامة خفيفة بدا كيعاود ليها كلشي من نهار عرف مرت باه اش دارت فيه وصفرو لأمريكا و شغلو تم زائد قرايتو و من كان كيهضر مع سهيلة ومن جات عندو لأمريكا عاود ليها كلشي بدون ما يخبي عليها فقط مدكرش ليها الوعد لي عطاه باها مبغاش يزيد يخسر علاقتها مع باها فكتفى انه هو لي ياخد لوم كامل منها بدون ما تعرف الحقيقة ....

اريج تسناتو حتى نها كلامو وتبعات معاه كل مرحلة لي دوزها برا بعيد عليها كتفات فقط انها تقول...

-علاش عمرك تاصلتي بيا و كنتي كتعيط لسهلية تسولها عليا ونتا عارفني كنت كنتسنى غير صوتك نسمعو وشفتي حالتي كيف كانت قبل ما تسافر..."تكونو دموع فعنيها"...علاش مفكرتيش فيا و فكرتي غير فراسك...

تحولو ملامحو لألم من شاف دموعها : كنت مضطر مقدرتش نبقى ورا كل لي وقع ...

مسحات دمعة نازلة على حنكها بسرعة

اريج : نتا معارفش شنو داز عليا من وراك ...معارفش لعداب لي عشت فيه..كل نهار كانت كضربني لفيقة فنص ليل نقلب عليك بحال لحمقة ....وليت كنتخيلك فكل قنت ونتكلم وحدي ...كنقول ديما متخليتيش عليا لكن كل نهار كيدوز بلا بيك كيوضح انك تخليتي عليا من خديتي كل لي عندي...

حدر راسو بحزن و الألم كيقطع قلبو من كلامها لي خنقو ما قدر يفسر والو ليها من غير انه قال ....

سمير : سمحي ليا...

ضحكات بقهر كتمسح دموعها : علاش انسمح ليك بضبط ...قول ليا بضبط شنو لي نسمح ليك فيه ا سمير ...

سمير بصوت مرتجف : سمحي ليا فكلشي....

تنهدات بضعف و تملكات نفسها و انفعالاتها...

اريج : انا مجيتش باش نلومك ولا نحط عليك غلط درناه بجوج انا جيت نقولك فقط خاصنا نوقفو هادشي لي بيناتنا و نساليوه هنا ...

تهز كمال و عينو خارجين وقلبو بدا كيضرب خوفا من كلماتها لي قتلوه وهو حي ردد اسمها بصوت مكسور كالموتى ...

سمير : اريييج لااا مدرييش ليا هادشييي حكمي عليا بلي بغيتي تال هادشي لا ا اريج لاااااا.....


داك الامل و الفرحة لي جا بيها صباح تحولات لرعب و خوف و يأس...كيشوف فيها بعدم تصديق و دنيا كلها حده ضلامت بقات فقط هي لي بين عينو و كلماتها الأخيرة كيترددو فودنو بحال سم كيقتل فيه ببطئ و انفاسو تزيرو...

بتردد هزات يديها و حطاتها على دراعو...

اريج : خلي نكمل كلامي ا سمير...

حط يدو فوق يديها من بغات تجبد يديها زاد زير عليها كتر وحطها فوق من قلبو كتحسس بيها دقات قلبو المجنونة...عضات فمها من لتحتت وحدرات راسها مزيرة....

اريج : خاصني الوقت ...

نطق بدون ما يترك يديها : شحال خاصك...

اريج : معرفتش...

جلس على ركابيه قدامها بدون ما يهتم بالناس لي كيشوفو فيهم..حاوط يديها الصغيرة بين يدو لكبيرة...

سمير : مستعد نتسناك حتى لوقت لي تنساي فيه كلشي و ترجعي ليا من جديد....

اريج بحزن ودموع بداو كينزلو بدون ما تحس ...

-غادي نتعطل بزااف..

هز يدو لي كيترعدو مسح ليها دموعها وحاول يتبسم رغم دموع لي غلبوه ...

سمير : ماشي مشكل انا انتسناك ....

تنهدات بحرقة وعنيهم مشابكين مع بعض ...بقاو فترة طويلة هكداك كيشوفو فبعض تى وقفات هزات ساكها و خرجات بلا مدور عندو..بقا هو فمكانو متبع ليها بنضراتو حتى ختفات من مكانها كأنها عمرها كانت ....

دعني اراك.. لابلل مبسم قلبي بفيض هواك
دعني اراك.. قبل صلاة العشق مع الافلاك
او تشفع للحب صلاة
قبل صلاة الدمع معاك.. دعني اراك
قد صلى الفجر بعينيك قبل التوديع
والشفق الوردي يديك والخلق بديع
اصفار النور برمشيك بباها يضيع
وينام الليل بجفنيك كالطير وديع

يتبع...
الجزء الأخير

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.