ناضت كتشوف اش تلبس كان واحد فلكرونة هوا لي مستور بلا شبكة جايي سامبل تالحد لفخاض وصميطات بالدونتيل ولتحت بالدونتيل وتوبو من لموبرا لاصق عليها....لبساتو منو لحمهاا تحتو غير سليب اسود ...طلقات سالفهاا و لخلخال فرجلهاا كايتحرك
دخل عليها لقاها كتقلب على لحزام تقفزات وغطات صدرها بييه وقالت:مزال مقلتش ليك دخل
على نسمة الصبااح كانت اول وحدة تفيق هيا انصااف ...حلات عينيهاا فالسقف ولفات تفيق بكري ...تقلبات على جنبها كترمش كان كيحساب ليها هيا لي فايقة حتى لقات اقبال فايقة كتلبس
بعدما جا عندها شهيد ... مشاو الاقامات جديدة مزال ناس كتصلح باش تسكن دخلو لدار فالطبقة الراابعة ...مشمشة ومتوسطة فلكبر ...صالون وجوج بييوت وكوزينة او سيجور كبير حتى هوا ودوش وطواليط
شهيد:عجباتك
اقبال: مزياانة ...قريبة لياا لخدمة وقريبة ليك
شهيد: ههه جات لوسط باش تواحد مايتقلق ههه ...خاصها غير الاصلاحات ولفراش فشهر تكون ناضية
اقباال(سكتات كدور فلسانهاا وبعدات من حداه خارجة من لبييت ...خلاتو واقف حدا السرجم وهيا خرجات لكوزينة دوزات ايدها على لبووطاجي وتنهدات ...توحدة متبغي تبدا زوااجها بلعكس
جا عندها مزال كايعرج شوية وفايدو لعكاز وقف قدامهاا وقال: مالك داباا ؟
شهيد(شافت فيه)نتا عاجبك لحال دابا مك متجيش
شهيد(هز راسو كيسوط ورجع شاف فيهاا )دويناا فهادشي ا اقبال علاش كنعاودو فيه ...لوالييدة مبغاتشش ليوم ولكن من بعد معندها مدير من غير ترضا بلواقع ...انا لي غنتزوج ومن حقي نختار معامن غنبقاا ونكمل
شهيد:ليلة بيناتناا احبيبة ...واش انا لخاطري راه مكرهتهاش تحضر ومزال طامع فيها ترطااب ولكن لبقات مقسحة معندي منديير ...تنا مكنديرش شي حاجة لي غنتحاسب عليهاا حييت عصيتهاا ...هادي حياتي وخاصها تقبلهاا....دابا خلينا من هدشي ...عجباتك الدار ؟
اقبال:مم عجباتني
شهيد:غدا ان شاء الله نجمعو لوريقات او نتمناو تحاجة متعكس
اقبال؛ان شاء الله ...مشينا .مزال تابعني شلا ميدار
فعلا خرجو من داار وكل واحد فيهم قصد شغالو ...اقبال خلصاات لفاكتورات لي دازوو ومشات تقدا السلعة ليي خاص لمحاال وتقضا شنو خاص لعشية...من هادي لهادي معرفات امتا وصلات تلاتا تعيات من لخاطر
جاو من لحمام مزنكاات وانصاف مخشية فبينوار قصير ديال غيتة وسورفيت ودايرة زيف على شعرها
واخة مخلاوهاش تعاونهم بقات عليهم ترجعات كتسيق فالدار وتجمع فيهاا وتسوس الصالون دوزات تجفيفة على الدار او الدروج مسحاتهم اما اقبال كانت فالدوش كتريح عظامهاا
**
هيبة بدورها كانت كتوجد شنو تلبس من بعد مخبرات صديق وقاليها واخة مكفاتها فرحة ...جامعة الدار ومنقياها كيف ديما غداه كيطيب وموجود خاصو غير يدخل
غيتة(حيدات لعباية )مشيت غير عند هاد نوال لي حداناا هيا لي لقيت خاوية (شافت ف انصاف والاخيررة تبسمات ليها ) اهااه انصاف تصايبي ليها وانا مسيفطاني لعند ديك جحمومة اتشوط ليا شعري
حياة: نتي اختي راه ايدي كيطيحوو مع شعرك ويلي نبقا مكوزة عليك النهار كلوو (شافت فحجبانها)ايهاااي على بنت لقاايد ...قطعتي حجبانك
مع قالتها هزات اقبال عينيها فيهاا وركزات فحجبانها وقالت:قطعتيهم
غيتة:لااا بلعما غير نقيتهم من لوسط (كدور فعيينيهاا )هانتي شوفي
ضرباتها لكتفهاا وقالت:قطعتيهم الحراامية صاافي بقيتي عليهم تدوزتي عليهم ياك
غيتة:احح راه غلاض بزااف
حياة:الله اعميها لجد بووك نتيي
ميقات ومشات كلسات حدا اقبال لي كترتاح ولفوطة على شعرها تقدات حياة لانصاف شعرها سامبل وقدات ليه التقطيعة لا غير ومشات كلساات
الوقت دغياا كيدووز عند الكل هكاك شهيد كان فوووق فووق السلك واخة قضية مو ديرونجاتو وجاب عمتوو على اساس تقنعها كان فبيتو كينشف شعرو باش يلبس وهوما لتحت منوضينها
العمة(نعيمة ) : الله اهديك ....واش ولد واحد بغيتي متحضريش ليه
مينة:كلمتي راه قلتهاا وراني حلفت انعييمة بغيتو تمشيو معاه ؟ سيرو الله اعاونكم انا لي ميسمعش كلامي معندي مندير بيه
نعيمة:او اش غيقولو علينا النااس امينة ختي !؟
مينة(ضحكات باستهزاء)هااا هاااي ياخيتي هوما غير مسوقين ؟هوما لمبااركين لي بنتهم تزوجاات ...حبااسة او مهاا تشلوطات تعياات وكلسات اللرض ...اش هااادشي معامن بغا ينااسبنا ولد خووك انعيمة
نعمية(تنهدات )والو اختي الزماااان مدا من عافيتك تاشوية اخيتي
مينة:حتى نتيي انعيمة ياصحيبتي
نعمية:واختيي راه نتي لي كتقوليها فيهم خاايبة ! ...هاهيا حسناا قاتليك لبنت تبارك الله واعية وكبيرة فعقلهاا وحتى دارهم بعقلهم ....يالله كون مكاينة شي حاجة غدافع عليهم
مينة:همم حسنا راه تاابعة خوهاا قراها اش تقولييك اختي
خرجو من الدار محملين بلحلوة ولورد وضياافة لاهل لعروس
دخل شهيد لعند مو لقاها گالسة كدير لكروشي ومخنزرة باسها فراسهاا وهيا مهزاتش فيه لعيين وقال ب بشاشة :نعلي الشيطان اماما ...اميمتيي الوالييدة
مينة:كلمة وحدة راني قلتهاا مغنصومش تلتيام على لي ميستااهلش ...سير
شهيد:نمشي ونتي سااخطة عليا
مينة:انا مسااخطاش عليك مفرشااك بالرضا ومغطياك بالرضاا ...وداك رضااياا هوا لي غترجع عليه شي نهار سير داباا منك ليهاا
باسهاا فرااسها بوسة عميقة وتنهد وقال بصوت مكسور:على خاطرك اميمتي
عطاها بالظهر خارج وهزات فيه عينيهاا ...اي ام تبغي تشوف ولدها عريس ولكن بشرط تكون راضية على عروستوو غير سمعات لباب تدار تسد عطاتها لبكاا وتنخصيص وقلبها كيشويهاا
طلع لطموبيلتو سااكت و تهوما مهدرووش من وجهو عرفو القضية مهيااش ...مسافة الطريق عاد برد وتهدن ورجع كيهدر ويجمع مع عمتو او بااه ديجا دا طموبيلتو باش يجيب لعدول راكبة معاه عمتو او ملاك وقفو قدام عمارة كيتسناا تجااية حسناا كتجري بالطالون ولجبادور وركبات اللور حدا ملاك وباست عمتهاا و شهيد
كانو فبيت لغالية خرجات حياة وخلاتهم بجوج انصاف عطاتها حياة قفطان كرونة وطلقات شعرها لا غير يمكن هادي اول مرة تلبس بحال هكا ياله بغات تخرج تبع حياة تعيطات ليها الغالية وفايديهاا بواطة وقالت:اجي ابنتي اجي
كانت سنسلة وفيها خميسة تاع دهب وقالت:هاكي هادي ديريها بصحتك
انصاف:لا لااا والله غير شديها ديالك
الغالية:ديالي ديالك ابنتيي زيدي وسكتيي مترضيهاش فوجه ماماك ...مزال نشري لبنتي لي بغاات ولي حلات عليها فمهاا (تنهدات)انا لمباركة لي رجعتي لياا ...
هزات انصاف شعرها ودارت السنسلة جاتها زوينة مع عنقها طويل وبيض وقالت:شكرا
خلات غيتة واقفة ومشات لدوش تشوف كي جاتها فرحانة اول دهب دير فعنقهاا ...حاسة بدفئ زوين وسط عائلتها ياما حلماات بييه
اما غيتة ...سرطاتها ومشات عند الغالية لقاتها كتقاد فشالها وقالت:عقلي على هدشي امااما طلبتك تعيييت على ديك السنسلة وفاللخر عطيتيها لانصاف
العالية:ياك شريت ليك وحدة اش بغيتي
غيتة:كنت بااغة هاادييك ومحمقااني عندك
الغالية:يسخر الله ابنتيي ونشري ليك بحاالها والله لعظيم
غيتة:غير شديها عندك مبغيتهااش
خرجات كتخبط ولبكية فحلقهاا ...هيا ماشي حسدات انصاف ولكن كانت كتعشق ديك السنسلة وتركلات عليها ومصورات والو من الغالية
هيبة تاهيا كانت على اتم استعداد بدهبها او حويجاتها والظفيرات مصبوغين و الشعر مقاد ولمكياج فضلات مديرو تال عندهم هي باش متنوضهاش معاه ...كالسة فالصالون كطرطق فصباعها وكتسناه يدخل كل مررة تشوف ساعتهاا
هيبة:سمحيليا اختي مغاديش نجي (كتبكي)هءهءه صديق دخل مريض لدار ...قاليا جيي ولكن مقدرتش نخليه مريض بوحدو ونجي
اقبال:وعلاش كتبكي ا هيبة صافي مكتابش اختي ...صافي
هيبة: سمحيليا عفااك هءهءء
اقبال:هههه وصافي اهيبة نعلي الشيطاان راه غير عقد غادي غير نسني وصصافي مغاديا فيين...قابلي راجلك مريض معندك مديري حشومة تخليه بوحدو
قطعات معاها ونطقات حياة ولعافية شاعلة فيها :مجياش تاني ..فخطبة غيتة مخلاهاش ودابا تاني مجاياش
اقبال:قاليك مريض
حياة:مريض!! هداك يمرض شعب وميمرضش الق** لي حطوو انا لي عاارفاه دارها بلعانيي باش متجيش ...وهيا كي لحماارة دمدووومة ا اقبال ختك دمدوومة
اقبال:حيااة ! صافي سكتي محدها مزال مجاتش عندي وتشكات مغنهدرش ومغندخلش بين لمرا وراجلها...شنو نمشي نهجم على الراجل ونقوليه نوض باش نعرفك واش مريض ولا كتبووحط ...نعلي الشيطان وسيري شوفي الغالية شنو بغات
كانت انصاف كالسة حداهم غير كتسمع بودنيها وكتشووف ...عجبها الهدوء لي فاقبال ولعقل لي كتخدم وكتقول فراسها تا انا بغيت نكون هكا بحالها ونفكر بعقلي قبل قلبي
كانت اقبال بتكشيطة بيضة مطروزة بالصقلي ...شدة خفيفة على شعرهاا وطوانك طوال شوية بلفضي مع اكسسوار فلعنق رقيق وسامبل وخيط الريح فجبهتها داخل بين شعرها مكيااج خفيف ونفس لوقت بين ملامحها طايح عليهاا السر ...قلبها كيضرب وايديها عراقو كل مرة تمسحهم مع ركابيها ...تسمعات زغارييت فالصالة عرفاتهم وصلو كتسمع لغالية كترحب وتعاود وحياة كدالك دخلوهم للصالون ومعاهم لعدول جوج هازين بايديهم لكتااب ومعاهم جابر لي استقبلهم فلباب ...تقدم ليهم اتاي من طرف الغالية او حياة اما انصاف اكبر حشومية باش تبان قدام الضياف وغيتة خلاص ...تبدل عندها لجو من بعد مكانت فرحانة شادة تيليفونها فلكوزينة
الغالية(ضحكات)هههه سلمي ابنتيي راه ولينا عائلة لي لابس لزرق راه هوا راجل اقبال ان شاء الله وصغيرة ختو ولمرا لكبيرة عمتو وهاديك بنت عمو لي لابسة لخزي وباه او لعدول تاحد مغريب ابنتي سيري
فعلا هزات طبسيل مشكل حلوة كبير ودخلات للصالون عينيها فلارض مزنگة على الجهد حطات الطبسيل وعمة شهيد بقات كتشوف فيهاا دات ليها لعقل سلمات عليهاا من وجها
نعيمة:ارضي على بنتيي
سلمات على شهيد او جابر ولعدول او خرجات باغة طرطق بالحشمة
الغالية:جابر بدل ساعة لخرا الشيطان كيحضر اولدي يعطيك ستر
تحلف عليها بعينيه وهيا كالسسة كدمع وخرج
**
شهيد:حبيبة مالك !
اقبال(عينيها فلباب)ممم شفتهوم دخلو لبيت كاملين ...واقعة شي حاجة
شهيد:اش بغا يكون واقع ..(بان ليه جابر )ها جابر خرج وحياة مشات لكوزينة (لاح ايدو وراهاا )صافي داباا طرقناا لعقد ندوزو لتطبيقي
اقبال: خليك بعقلك اشهيد ههه
شهيد:والله يامك ....معرفتكش هادي عمتي نعييمة
اقبال (بهدوء)متشرفين اخالتي
نعبمة:ربي اخليك ابنتيي ...الله اكمل عليكم بلخيير
شهيد(قرب لودنهاا )نطلعو لسطح بينما جا لواليد
اقبال(توترات من قربو )شنو غنديرو فسطح
شهيد: نعبر لييك هههه....
يالله قنعهاا حلات حياة على ناصر لي وصل لعدول ورجعات كلسات كضحك ...شافت فجابر وحركات ليها راسها وطمنها ورجع مجمع مع شهيد وكيضحك وعقلو معاها شعلات فييه لعافيية
حياة:السنسلة لي دايرة انصاف عطاتها ليها لغالية ...اوى لالة غيتة قاتليك وليتو كديرو لفرزيات من داباا
اقبال:على هدشي كتبكي
حياة:وضار فيها جابر على حجبانهاا .... هبيلة وقالو ليها زغرتي هيا ختك ...زيدي زيدي
خرجو كلسو فالصالون تجات غيتة سلمات على الناس وگلسات جنب اقباال وعينين جابر بغاو ياكلووها
شهيد(شافو وضحك )اتكايس شوية اجابر
جابر(حك عينيه وتنهد ) السعاتو لله وصافي
شهيد:ايصاوب الله ...سلك
من بعد متعشااو جابت حياة صينية تاع لفضة صغيرة فوقها تمر ولحليب او لورد حمر وجوج بواطات فيهم لخاتم ... وكلاتو تمر او وكلها وشربو لحليب كيف كتم جميع العدات المغربية وختموها ب لخواتم وانصاف وغيتة كالسيين كيشوفو ومبتاسمين لابتسامة اقبال لي باينة فعينيها لفرحة ...ركب ليها لخااتم وباسها فجبهتهاا وضحكات وبدات لغالية كتصلي على نبيي وعينيها مدمعيين تبدات كتسكت فيها نعييمة
نعيمة:اوى لواه ا الغالية
الغالية:دار لبنات خااوية اختي
نعيمة:نطلبو ربيي يتبت لغرس (شافت فانصاف )والعقبة لعزييبة ان شاء الله بشي سعد زيييين بحالها ههه
الغالية(مسحات عينيها)اميين ياربيي
ضحكو ونشطوو بيناتهم وهو يستادن ناصر باش يمشيي وناضت نعيمة وملاك لي كلسات حدا انصااف وتشاركو لهدرة وضحك
الغالية:مزال لحااال كلسو
نعيمة:هدا الجهد اختي ...الله يسعدهم ياربيي ويسهل على الجميع
الكل :اميين
تسالماات معاهم
ناصر:اوى نتا مغتمشيش
شهيد:مزاا شوية هههي غير سير
ناصر:تهدا نضر
الغالية:هههه وتاهنا راه دارهم
ناصر:ههه مقلتي عيب لالة الغالية ساعة سعيدة
دار خوات وتا جابر نااض ونحن لالهم ام الغيت باش تنوض قلبات عليه عينيهاا تجات اقبال وشداتو من دراعو وقالت:خليهاا ليوم اجابر غدا تجيي
جابر: واخة الالة ...يالله اللهم يسر
اقبال؛اميين
شدها شهيد من ايدها وقال:نطلعو لسطح وربي كبيير
اقبال:واخة صبر هههه سبقني هاني جاية
جابت كاب من لداخل وبدلات سباط ب بلغة خفيفة وطلعات لسطح بان ليها واقف ايديه فجيبو ومغمض عينيه
اقبال:ها اناا اسيدي اش كااين
شهيد(شدها من ايدها جابها قداموو وتبسم ليها )بغيت نشوف لحيبان بوحدي فيها شي مانييع
اقبال(تبسمات )اييه مزيان ههه
شهيد(هز ايديه رجع ليهاا شعرها اللور وشدها من عنقها وقرب ل جبهتهاا بااسهاا وهيا حسات بتبوريشة من ديك لقبلة الدافئة حتى حطات ايدها على ايدو
شهيد:نهرب بيك ؟
اقبال: مزال لحال
شهيد:امتا نزيدو 15 لعام اخور ههه
اقبال:هههه نتا وزهرك
شهيد:مسولتيش على صداقك
اقبال(سسكتات شوي وقالت)لي بيني وبينك كتر من صداق
شهيد(تبسم ليهاا وجرها عندو وقال بهمس )زعمة متقوليهاش بطريقة خرا ...غير مرة وحدة صافي
اقبال :زعمة ضروري تسمعها باش تعرفهاا
شهيد(ايدو فحنكهاا )لاا غير نسمسعها منك وصافي
اقباا(بغات تبعد وزيرها عندو وشافت جيهة لباب ) راه حنا فالسطح زعمة
غيتة:حيت ماشي نتي لي كليتيي لعصاا منوو ...حيت ماشي نتي لي زوجوك بزز منك لواحد معتابراه خووك
انصاف: اللهم هدا ولا داك لي كان غيتعدا علييك ...
غيتة:مبغيت تواحد فيهم ...بغيت هي نكون تاع رااسي هءهءهءه مبغيت لا زواج لا زمر هءهءه
انصاف عزات عليها وكلسات حداهاا جراتها عندها وقالت:وصاافي متبكييش عفااك ...لي وقع وقع داباا تاحد ملقاها كي بغاها ا غيتة
غيتة:كون غير انا لي عطاونيي ماشي نتي
انصاف:نتي غير كتخربقي ! عارفا شناهيا الزنقة ولخيرية ولا معارفاش .... فلوقت لي نتيي كان عندك كلشي انا مكان عندي حد ....حتى من الزنقة نعست فيهاا ونتي عمرك نعستي فالزنقة ؟ لاا ....فلوقت لي كنتيي تاتقراي انا كنت كنشوف لمدرسة غير فالطريق
غيتة:هءههءء انا معارفاش شنو وقع ليا ا انصاف مكنتش هكااا هءهءه مبقيت حاملة والووو كرهت حياتي كاملة كون غير بقيت مرجعتش كاع هءهء اللهم نتكرفص فالزنقة ولا نتزوج
اقبال:غيتة ...راك بعقلك عارفة شنو وااقع مديريش راسك صغيرة ...الغالية ملي عطات السنسلة لانصاف راه ماشي حيت مبغاتش تعطيها ليك نتي ....مك بغاا ترجع لي ضيعااتو اغييتة ...نتي هدشي مغاديش تحسي بيه حيت ديماا معاناا ولكن مع انصاف لاا .... ختك راه خمسطاش لعام معارفين عليها والو نهار جات بقا فيك لحال على سنسلة ؟
غيتة:الصمت
اقبال:فلوقت لي خاصك تقربيي من ختك وتعوضي معاهاا سنين لي فاتو ديريها صااحبتك خرجي معاها
غيتة:ممم جاابر يخليك تخرجي
اقبال:داكشي بينيك وبين رااجلك اغيتة...مغنبقاش انا تابعة كل وحدة فيكم بحال لخيط لبيض .... خاص تكون التقة بيناتكم شوية ونقصي من داك التبربيص لخااوي ليي فييك جابر راه رااجلك واجب علييك تحتارمييه ويحتاارمك
طلعو لحوايج لبييت ولاخيرة نشطات وغير كضحك بقات مجمعة مع انصاف فالصالون في حين الغالية كتنصب لغدا وكتسمعهم كيضحكو تحلات عليهم حياة لباب كتنهج والصيكان فايدهاا
حياة:ففف عيييت
غغيتة:شنو هادشيي
حياة:حناش تشريي ...جيبي ليا لمااا
انصاف(طارت )انجيبو لييك
مشات عمرات ليها لما وجابتو ليهاا تجات الغاليية كتمسح فايدهاا وقالت:مالك مبكرة على لحوايج
حياة(رتاحت ) طيرتهم ليها...عارفاها اتحط فلوسها فالدار ولفراش وتبقا الله كرييم راه عرووسة
شهيد:كنت بغيت نمشي ولكن كنت مقادرش نسوك بلكسيدة ...سيفط ليها شي بركة وصافي
اقبال:خاصناا نمشيو نشوفووهاا وندي انصاف اش بان لييك
شهيد(داعب حنكها ) لي بغيتي شوفي النهار لي ينااسبك (سكت شوية )من غير السبت خليه لياا معاك
اقبال:صافي ان شاء الله(ضربات ايدو حيداتها )شهييد تت كتهرني
شهيد(ضحك )طليناه خضر معاك نتي وهرانك هههه
اقبال(خرجات من الطموبيل )ياله شرييه
مشات لطموبيلتهاا حاسة براحة نفسية حمدات الله عليهاا ...ختها لي كانت بحال لغصة فقلبها هاهيا حداهاا ...او الراجل لي كان فعقلها تهوا رجعو الزمان ليهاا ....هادي هيا لحياة مرة تعطيك مرة تااخد لييك وهكا غادي تستمرر الحياة
وقفات فلمحال ديالهاا باشرات خدمتها كل مرة تجي عندها وحدة او واحد يسلمهاا بلاصتها زوينة فين ما حطات رجليهاا كتخلي بصمتها زويينة ...تحنات على لكابو كتشوف شنو لمشكييل تسمعات صوت غيتة وهزات راسها لقاتهم جاين هيا وانصاف كيهدرو ...تبسمات ليهم وقربو جيهتها
هيبة(حطات لكاس من ايدها كتسووط وشدات حنكها كتشوف فلفرااغ
***
اسبووع داز طااير الضوسي تاع اقبال وشهيد تقبل خداو الدار لي كتبوها بسميتهم بجوج داز اسبوع مشاارجي بجري عليا نجري علييك شهيد كان مكلف بالإصلاحاات او اقبال كانت كتجهز فالدار ومعاوناها حيااة
هيبة هيا وݣانت صديق مرة فوق السلك مرة فلحضيض كل نهار وهوا ...من بعد مداها لطبيب وتاكد بلي كلشي طبيعي عاد رتاح وتهنا شكوو من ناحية لفنيد
اما انصاف ف هيا كتحاول تولف لغالية او تنسا لي فات وخة الدقة صعيبة ...نهارها تقريبا كيدوز مع اقبال يافالدار يالمحال وعاجبها لحال بخواتاتها خصوصا حياة واقبال فينما خارجين يخرجوها يشريو ليها قبل متحل فمها
حياة هاديك من بوتييك لبوتيك كتوجد لسفر ديالهاا لي مبقا ليه والو من بعد ما خرجو وراقهاا وشدات لبيي تاع الطيارة لي خلصها محمد من فرنساا كانت فرحة عاارمة و هيا كتشوف حلمها مبقا ليه والو ويتحقق كيفما بغات تكون نتيجتوو ....ربيع كتعيا تصدر فييه ولكن لصقهاا ومزال كتقلب على بلان تصدرو
اما غيتة فهاديك بووحدها عايشة فعالمهاا ...من بعد مكانت كترفض لعلاقة لحميمية معااه ولات كتشوفها هياا لجوكر لطلباتهاا ..وخة موفر ليها كلشي ...من طبعها كتعشق لحاجة لي ماشي ليهاا
حط لقاميجة وبقا هي بديباردو كحل دخل لدوش وهيا كالسة على لكرسي ب ديباردو وشورط وشعرها قدامها طايح هز الرشاشة كيكب عليها وكيدوز على فروت راسهاا وكيضحك عليهاا
جابر:ههههه ايكون سمن بدوك السيرومات لي كدهني ....نربيو شي وحدة لعيد لكبير
تبعاتو على نيتهاا تسد لباب وكلاها مع لباب وحاوطها بايدو كيهدر بهمس : شنوو قصارة السبت دازت
اقبال: مكتشوفش فاش غرقناا
شهيد:ماشي مشكيل خيرها فغيرهاا ... (غمزها )ناوي نبات فالدار ليووم ...نجرب بيت النعاس
اقبال(ضحكات )خود راحتك الدار دارك
شهيد؛ شوية لبااس !! نبات وحدي فالداار تنخاف
اقبال: وصافي بعد راه لمعلم فلبيت اشهييد
شهيد(باسها فحنكهاا ) لعشية ندوزوها انصومبل ولا نجي نبات عند الغالية
اقبال:وخة ههي بعد
شهيد:عطيني بووسة
اقبال( دفعاتوو )بعد لهيه من لبسالة اشهيد
شهيد:مقبولة منك ...ابنت لغالية
حلات لباب وسداتو عليه ومشاات لكوزينة شافتها حياة وقالت:مزال متعطي لسيد رزقو
اقبال(كتحل فكارطونة )دخلي سوق جواك ....ليوم يمكن غنبات هناا
حياة: باتيي الحب بااتي ...اشو زعمة بقيت غير انا ؟ اللخر مبخر
اقبال: امتا عندك الطيارة باقي
حياة: تلات الجاي ...بقات سيماانة ونطييير
اقبال(بهدوء)ديري عقلك احيااة...معرفتش كيفاش اتكون حياتك مع واحد يكون كبر من باك
حياة:تاانتيي شحال من وحدة تزوجات بيه شارف شنو وقع كاع ! شاابعة فلووس مع كرهاا وضاربة الدنيا بركلة تلقاها فاتحة شين فيوتوب وتفوح على لبرهوشات هاا شنو جاب ليا رااجلي شوفو فين تعشيت شوفو فين سافرت
اقبال: ونتي مالك ومالهم
حياة:الحبة هيا لي خلاتني وخلاتهم يتزوجو بشيب الرااس باش ميجيش واحد عاد هز سروالو ويقوليك صبري معايا تندير مستقباالي ...خلينا من لهدرة اش بان ليك نمشيو لحمام وندير لختي لاصير
مع هزات عينيها كيبان ليها عمران كيتقدا شومبوان ليه وداير كاسكيط دورات عينيها كترمش وتنظم تنفسهاا باش تصرف عادي
تسمعات صديق قال بغضب : يكما نعطيك نمرتها باش ترتاح
كان موجه هضرتو لعمران لي بدورو قشعها وبقا مركز الشوفة فيها كيتاكد حيت دايرة لفولار تفيقوو كلام صديق وهز فيه عينو
هيبة:واش غتديها فلبرااهش اصديق !
عمران (سمعها ونطق)لبرهوش هوا بااك
محس براسو تدخل فداك سطر تاع الشمبوان بدفعة من صديق لي دخل فيه بلا موجب شرع وقال مغدد:عاود اش قلتيي
هيبة:صديييق اش كديير
عمران(دفعو كيقاد فلكول )ضور تق*** نتاا وهياا
صديق(جعر علييه بلمزياان جروو كيخشي ليه فاللكمات ولاخر حتى هوا ماشي من لعااكزين ناض لغوات ومشاو كيعيطو لسيكيريتي و الرجال كيفكو فييهم
عمران(جروه)القيتك قد بااا اما نورييك اش كنسوا
صديق:لبرهوش لي حطك الكلب ... (كينهج ) كترتو الكلااب تشوفو فعيالات الرجال اليهود
عمران (كيجرو فيه ونيفو دايز بالدم ) وسييير قلب عليهاا قبل متولي مرااتك اعمي عاد جيي نتاافهموو
هيبة(كترعد كتجر فصديق) صافي اصديق براكة من الشووهة ...صاافي
صديق(بقا كيتوعدوو بعينيه وكيقاد فقميجتو ودمو كيفور وهيبة حداه حشمانة من بنادم لي كينعت فيهم بعينيهم )زيدي لخربتك نتيي
مزادتش وراه كلمة وحدة خلات الشاريو عامر وتبعاتو غادي وراهاا كيماصي لفك ديالوو وايد فجيب وهيا كتحاول تماشي خطواتو لكبار تخرجو ...خرج كيقلب عليه بعينيه مبانليه والوو وقصد الطموبييل دمو شااعل
هيبة:ياربي تخرج هاد النهار بخير
صديق(بلغوات)ركبييي
تزعزعات وركبات كتغزل من صوتو كي الرعد الطريق كلها ساكتين وهوا كيتغدد وياكل فمو ومن سوكانو بايينة فيه على نقشة يتفركع على كلشي
مقدرات تقوليه والو واخة داخت بالطرييق من كترت مكيدور بلا مينقص فالسرعة باش جاي باش ضااير كي تنقولو ...وصلو لداار فأقل من لوقت الطبيعي حل لباب خرج عاد خرجات وراه خافت تسبقو يندمها اللهم تمشي خطوة معاه وتفادا شيي حاجة ما هياش ...
طلعو لدار نفسسو كتسمع مجهدة ...سد لباب وهيا مشاات لبييت كتزرب كتحيد فلكسوة و الزيف تبقات هي بدو بياس وكتلعن الساعة لي قالت ليه خرجني اصديق ياله كتحل فلماريو تلبس تاتجرات من شعرها بقوة خلاتهاا تغوت
هيبة:اااااه شعرييي
لاحها فلارض هكاك معرفات باش تبلاات تلقاتو كيدور على ايدو لكاابلي تاع الشارجور وقال بتحدير:كتعرفيه السلكووطة ....فين كتعرفييه
هيبة (كترجع باللور خايفة من لكابلي وملابسة والو ) مكنعرفووش اصديق والله هءههءهء
حكاية أنثى الجزء 20
محتوى القصة
التنقل بين الأجزاء