العميل الصهيوني والجاسوسة المغربية الجزء 19

2021

محتوى القصة

إمبراطورية الأسود (الفصل الثالث من العميل الصهيوني والجاسوسة المغربية)

♔ دخلات لقاتو واقف عاطيها بالضهر
أرسلان : فين كنتي
ريماس : كنت لتحت
أرسلان : فين لتحت؟!
ريماس : مع خالتي أديرة و جوليانا
أرسلان : همم .. ( ضار لعندها ) و شكون اخر كان معاكم
ريماس : عائلتك و صافي .. بغيت نسولك ... جرها لعندو و لوا عليها يديه
أرسلان : ( كايشوف فيها ) كانسمع
ريماس : وا طلقني باش نسولك
أرسلان : ( بنظرات ساحرة ) لا
ريماس : علاش كاتصرف مع مك بحال هكاك؟؟؟
أرسلان : هضرت معاك ديك المرة
ريماس : ( عاقدة حجبانها ) لا ماهضرتيش معايا .. نتا ماشفتيهمش كي كايعاملوها لتحت كلهم كايجرحوها و كايبكيوها غير حيت عارفينك علاقتك بيها خايبة
أرسلان : ( ببرود ) ما دخلنيش فسوق النسا
ريماس : ولكن هاديك راه كاتبقا ماماك و نتا ولدها ايلا ماعطيتيهاش القيمة قدام بنادم شكون غايعطيها لها؟؟؟
أرسلان : عندها راجلها و ولدها
ريماس : ايوا و نتا؟؟؟
أرسلان : عزازين عليك المشاكل!!
ريماس : و ترضى تشوف المرا لي ولداتك كلشي كايهينها و يجرح كرامتها؟؟؟ .. هادي راه إهانة ليك قبل ماتكون إهانة ليها .. ماشي نتا لي شفتيها كي كايعاملوها
أرسلان : نساي عليك هادشي .. خنزرات فيه و تعصبات
ريماس : الصمت
أرسلان : هضر معاك مالك!؟
ريماس : لا ماهضرش
أرسلان : و نتي هضرتي معاه!!
ريماس : ضروري باش نعرف علاش عيطتي لي
أرسلان : و انا اش قلت اخر مرة؟!! ... بعدات عليه
ريماس : عييت من هادشي .. فكل مرة ماتهضريش مع هدا .. ماتشوفيش فهدا أرسلان بدييت كانتخنق من هادشي ... قربها ليه حتى تلاصقو الجسدين و قرب شنايفو لجنب شفايفها .. ولات كاتحس بالملمس ديالهم لدرجة فاش هضر حسات بيهم كايلمسو شفايفها
أرسلان : ( بصوت خافت ) بغيتك
ريماس : ماتهضرش معايا
أرسلان : بغيتك نتي من وسط النسا .. فهمي غيرتي ماكانبغيش نشوف واحد من جنس الدكور كايدور بساحتك
ريماس : و خوك اش ديك الحالة درتي فيه البارح؟؟
أرسلان : ماتلومينيش على هادشي لي كايوقع حيت الغضب ديالي ماكايتقارنش بداك الإحساس لي كاينهش فيا .. بقات كاتحاول تبعد حيت هاد القرب بيناتهم شي حاجة بزاااف الأنفاس ديالو كاتحس بيها
ريماس : ( بتوتر ) أرسلان بعد شوية .. بعد شوية و عض لها ودنها عضة خفيفة حتى تأوهت .. و رجع قرب لها بحال اللول ولكن هاد المرة ماكانش مكتافي غير بالهضرة .. بقا كايمرر شفايفو من فوق شفايفها بطريقة خفيفة
أرسلان : اااه ا ريماس اش كاديري فيا
ريماس : لا ا أرسلان ماديرهاش راني عاد.. ... قاطعها بقبلة قوية كايلتاهم فيها شفايفها .. فقد الصلة ديالو بالعالم و غاص فبحر العشق ضمها لصدرو باش يحس بدقات قلبها كتر و كتر .. مافيقهم منها غير أصلان لي دخل بالكرسي المتحرك بقا مصدوم فيهم و حنحن .. بعدات منو و مشات لبيتها
أرسلان : جدي كون عيطتي لي نجي عندك
سي أصلان : لا ا حفيدي انا نيت قنطت فالجناح ديالي و بغيت نتحرك شوية
أرسلان : واش كاينا شي حاجة؟
سي أصلان : ايوا ا حفيدي كي كاتعرف دابا ولات عندك المسؤولية كبيرة شحال هادي مابقيتي سافرتي على ود مصالح العائلة
أرسلان : فالقريب عندي سفر
سي أصلان : ( بفرح ) بصح؟؟؟
أرسلان : ( بشك ) وي من مور الخطبة
سي أصلان : ايوا مزيان ا حفيدي هاكا نبغيك قدر المسؤولية لي عندك دابا و ماتشغلش فالخوا الخاوي ااه و بغيت نهضر معاك فموضوع اخر
أرسلان : وي كانسمع
سي أصلان : احم بالنسبة لبنت عائلة روكف..
أرسلان : من بعد ا جدي .. فاش نرجع و نهضرو فهاد الموضوع
سي أصلان : عنداك تنسا ا حفيدي .. هاد الموضوع بالذات مهم بزاف
أرسلان : باغي نهضر معاك فهاد الموضوع بالذات من بعد ...

" خلفك ... أمامك ... بمخيلتك و حتى في أحلامك كان هناك مكان لقلبي يردد إسمك
في عتمة الليل وسط النجوم حيث لا احد سواك "


قلبها مابقاش ديالها و مابقاش عندها و لو أدنى شك بلي كاتبغيه ... تصرفاتها معاه .. الاحاسيس لي كاتحسهم و هي معاه .. التوتر لي ولا كايجيها من القرب ديالو .. دقات قلبها لي كايتسارعو .. كلامو ليها لي كايخلي أنفاسها يتخربقو كلشي كايدل بلي كاتبغيه .. قبلاتو .. لمساتو .. غيرتو .. كلهم كايخربقو لها الأحاسيس ... قررات قرار أخير غادخل فتحدي ضد ديانتتو و ماغاتخليهاش تزيد توقف عائق بيناتهم .. مدام هو فعلا باغي يتزوج و فعلا كايعشقها و كايبغيها .. قررات تحارب على ود قلبها و تدخلو فأقرب وقت للإسلام .. هادي هي الحقيقة مابقاتش باغا هاد العائق يدوم كتر و كيفما حتى هو حارب على ودها قررت دير نفس الشيئ عارفا الطريق لي غادخل ليها صعيبة و عامرة مخاطر حيت جدو ماغايبغيش ولكن ما عطاتش اهمية لهادشي بقدر لي عطات الأهمية لأنه مايجي يوصل وقت العرس حتى يكون دخل للإسلام .. حطات يديها على شفايفها كاتتحس البلاصة لي مرر عليها شنايفو بتاسمات ابتسامة خفيفة و عاودات حيدات يديها و خرجات من البيت طلاقات مع اصلان غادي لجناحو فالكرسي المتحرك و معاه 2 رجال .. حبس حداها و بقا كايطلع و يهبط فيها بشر
سي أصلان : ( بإبتسامة شر ) مابقاش ليك بزاف ماتفرحيش .. تحدرات لعندو و شافت فالجهة ديال الندبة و عاودات شافت فعينيه
ريماس : الخوف من الله ماشي منك ( سكتات و عاودات كملات ) أ عمي اصلان
سي أصلان : بداي تحسبي ايامك ا قليلة الترابي
ريماس : كانحسبهم بالساعات و الدقائق
سي أصلان : ( بإنفعال ) شييطانة ... شافت فعينيه مباشرة و هي باقا حادرة لعندو
ريماس : انا اخيب من لي كاتظن و اطهر من لي كاتخيل و أشرس م ن داكشي لي كاتوقع و أطيب كتر مما كاتتصور ( سكتات و عاودات كملات بنبرة خبيثة ) ولكن فعايل و تصرفات الانسان معايا هما لي كايقررو شكون لي يخرج مني الملاك ولا الشيطان .. ماتنخادعش بهاد الصورة لي عاطياك شكون عرف اش يقدر يخرج مني
أرسلان : ريماس؟!! ... تقادات فالوقفة و شافت فيه ببرائة
ريماس : أرسلان بان ليا عمي أصلان قنط
سي أصلان : ( قلب وجهو ) لفعة
أرسلان : اش كنتي كاتقولي لجدي؟!!
ريماس : والو قاليا بغا يهضر معايا و تحدرت باش نسمعو
أرسلان : و اش قالك؟؟
ريماس : ها هو نيت باقي هنا سولو خفت نقولك و مايعجبوش الحال
أرسلان : هممم ... مشات من تما و توجهات للتحت راشقة ليها حتى خرجات فأبراهام
أبراهام : مسينا عالله
ريماس : ماعرفتش علاش فاش كانخرج فيك كايوقعو لي المشاكل
أبراهام : هاد الهضرة انا لي خاصني نقولها ماشي نتي
ريماس : ( طلعاتو و هبطاتو ) كلب
أبراهام : ( طلعها و هبطها ) ما فيكش و لو ذرة ديال الكيوتنيس .. تجاهلاتو و مشات كاتقلب على أديرة و راسمة فبالها خطة باش ترجع لأديرة القيمة ديالها قدام العائلة كاملة بصفة عامة .. بقات غادا و كاتسول عليها حتى لقاتها
♚ أرسلان : جدي اش قلتي لريماس؟
سي أصلان : شي حاجة بيني و بينها ا حفيدي نصائح و صافي
أرسلان : باقي قنطان؟!
سي أصلان : لا بغيت نمشي نرتاح عييت .. خلاه يرتاح و كمل طريقو باش يشوف شغالو .. أصلان بقا تفكيرو غير فالفظاظة لي هضرات بيها ريماس معاه .. زاد إصرارو على انه خاصو يتهنا منها فأقرب وقت حيت ايلا مشات حتى تزوجات بأرسلان غايمشي للطارو دزبل فنظرو .. و نسا بلي واخا يوقع لي يوقع ارسلان ماغايديرهاش
سي أصلان : جيبو لي داك تيليفون
الكارد : ها هو ا سي أصلان .. دوز نمرة بقات كاترن مدة
بنجامين : مساء الخير سي أصلان
سي أصلان : مساء الخير .. عندي ليك واحد العرض غايعجبك
بنجامين : عارف بلي عروضك مغرية كانسمعك
سي أصلان : **************
بنجامين : علاش؟
سي أصلان : **************
بنجامين : ( بعد تفكير ) موافق ايمتا؟
سي أصلان : *************
بنجامين : تافقنا
سي أصلان : ماغاتندمش
بنجامين : عروضك من ديما كانت فيهم الفائدة .. كملو هضرتهم فداك الموضوع و اصلان كايخطط ف100 حاجة و حاجة .. اما عند ريماس فكانت كاتشرح لأديرة الخطة لي تقريبا عجباتها و قررو يطبقوها
ريماس : مابقاش بزاف و غادي يندمو على الساعة لي قللو فيه معاك الاحترام
أديرة : نتمنى تنجح
ريماس : اوسي نتمنى ...

♚ كان جالس مترأس طبلة العشا كالعادة و ريماس فجنبو ليمن .. كانو شي بلايص خاويين ديال افراد عندهم اعذار بحال جدو و خوه و شي ولاد عمامو خرين .. كلشي كان حاني على طبسيلو ما عدا ريماس لي كانت كاتدرس الخطة مزيان و عينيها على أديرة لي كانت جالسة حدا الكرسي لي كايجلس فيه أسوار
ريماس : هيييه .. هز عينو فيها
أرسلان : مالك
ريماس : والو بغيت ناخد من الشربة لي حدا أديرة .. كمل ماكلتو كأن شيئ لم يكم
أرسلان : هزيها
ريماس : ( موجه الهضرة لأديرة ) راني كانهضر معاك واش ماكاتسمعيش؟؟؟؟
أديرة : نعم ا بنتي
ريماس : ما بنتكش و مايشرفنيش نكون بنتك اصلا .. ولاهيلا زوينة السيدة طلبت منها تمد لي الشوربة صدقات باغا تشري معايا المعرفة
أرسلان : ( بهدوء ) ريماس كملي عشاك
أديرة : بنتي راه ماسمعتكش هدا ما كان
ريماس : أرسلان بلاتي نشوف هاد خيتي لي قالك ما سمعاتنيش .. ( بالغوات ) ياك قلت لك ماتبقايش تقولي لي بنتي شفتك تيقتي راسك على دوك جوج دقايق لي عطيتك فالصباح .. راك وااااالو هنا حتى واحد مامعبرك باراكا ماتتبحلسي و تمسكني .. حدرات اديرة راسها بينما ارسلان حاضي بعينيه اش واقع
أديرة : سمحي لي
ريماس : ( بالغوات ) ماااااامسامحاكش ا لالة و اصلا اش كاديري هنا؟؟؟؟؟؟ .. كلشي بقا مصدوم من اسلوب ريماس ... جوليانا تعصبات و ايتان بغا ينوض يغوت عليها حتى حبساتو اديرة
أرسلان : ( بعصبية ) ريماااااس .. هز يدو غايضربها حتى كان غايجمعها معاها بتصرفيقة و كمش يدو عندو
ريماس : مالي اش درت؟؟؟؟ كانهضر مع أديرة ماشي معاك ( شافت فأديرة و هزات صبعها عليها ) عجبك الحال دابا ا الشارفة دوي؟؟؟؟ ها هو تعصب عليا هادشي لي بغيييتي يا حطب جهنم .. سكتها بتصرفيقة لي خلات أديرة مصدومة فردة الفعل ديالو .. شدها من صبعها و زير عليه
أرسلان : ( بحدة ) المرررة الجاية لي نعاااود نشوفك هازة صبعك عليها ولا كاتغوتي عليها غانطردق لك العروووق ديال راسك كلامي واضح؟؟؟؟؟
ريماس : ( كاتشوف فأديرة ) الصمت
أرسلان : واش واضح؟!!!!!
ريماس : واضح .. طلق من صبعها بنطير و عاود خنزر فلي جالسين فالطبلة
أرسلان : هضرتي موجهة للجميع .. غاتوصلني شي شكوى بلي شي حد فيكم قلل الإحترام على واليديا غا نحرق القواعد و نحرقو حي معايا كلامي واضح؟!!!!
الكل : الصمت ... ضرب فالطبلة حتى تزعزعو الفراشط
أرسلان : واش كلامي واضح؟!!!!
الكل : واضح
أرسلان : ( بهدوء ) كملو عشاكم .. بقاو كايكملو عشاهم فجو من الصدمة على اسلوب ريماس و لكن اكثر شعور كان حاضر فديك الساعة .. هو الخوف لي كان راكب عيالات الاعمام و بناتهم لاتمشي أديرة تشريها لهم مع أرسلان على داكشي لي دارو من قبل .. أديرة كانت فرحانة حيت واخا مامعبرهمش ولكن كاينا بلاصتهم عندو خاص غير لي يبينها ... بينما ريماس كانت كاتشوف فأرسلان بغضب كانت باغا غير يحس بمو و يدير لها قيمة قدامهم ماشي يصرفقها قدامهم .. سالات داك العشا بزز و بغات تنوض ولكن وقفها
أرسلان : سالي عشاك
ريماس : شبعت .. نطرات يديها من يدو و ناضت .. دازو دقائق و ناض حتى هو .. بداو كاينوضو واحد بواحد حتى تفرقات جقلة
جوليانا : ( بغضب ) كيفاش قدرات تهضر معاك بديك الطريقة ا ماما؟؟؟؟؟؟
أديرة : ( بفرحة ) شفتيه ا بنتي كي دافع عليا واش شفتيه ( بدموع فرحة ) ولدي أرسلان باقي معتابرني ماماه
جوليانا : شفتو ا ماما و مزيان منين وقفها عند حدها ماكنتش عارفة هي دايرا بحال هاكا .. نتي ماخرجتيش معاها العيب و هي بغات تشوهك قدام العائلة كاملة ولكن مزيان منين وقفها خويا عند حدها
أديرة : ولدي غا يرجع لصفنا ا بنتي .. خوك باقي حاسبنا قراب ليه ...

أديرة : يلاه معايا
جوليانا : فين ا ماما؟؟؟
أديرة : عند ريماس
جوليانا : فهاد الوقت؟؟؟؟ و علاش غانمشيو عندها؟؟؟ ماشفتيهاش اش دارت؟؟؟
أديرة : زيدي تبعيني و باراكا من الهضرة سربي قبل مايشوفنا شي حد تما ... طلعو بالسليتة
♔ ريماس : حمار تفووووو .. عند بالو ماهضرتش حيت ماقدرتش نهضر .. كون ماشي على ود الخطة و الاحترام لي خاصو يبقا لها كون شاف وجهي الثاني بن الكلب لاخر ( مشات لجهة المرايا كاتشوف واش باين اثر الضربة ) الحمد الله منين ماحمارتش .. وجهي مكتوبة فيه للتصرفييق فوقما يبغي يضرب ما يبان لو غير حنكي تفووو على بشر ولكن غير بلاتي انا لي عارفة كي غا نردها لك ا أرسلان والله لا بقات فيك جينا نديرو خير صدقو مندمينا كاااع .. مادير خير ما يطرا باس .. تسمع صوت دقان فالباب
ريماس : ( بصوت عالي ) ناااااااااااااعسة ( تحل الباب )
أديرة : هادي غير انا
ريماس : اه خالتي هادي نتي .. ردات الباب و دخلات هي و جوليانا
أديرة : ( بإبتسامة حنونة ) ريماس .. قربات لعندها باش تشوف حنكها
ريماس : هههه مابقاش لاطراس غير تهناي .. بقات كاتشوف فيها اديرة بعيون دامعة فاللخر جراتها لعندها عنقاتها الشيئ لي خلا جوليانا ماتفهمش اش واقع .. هزات يديها بتردد و بادلاتها العناق
أديرة : شكرا بزاف على هادشي لي درتي معايا اليوم ماغاننساهش ليك .. أول مرة نحس بولدي قريب ليا .. اول مرة نحس بيه بلي فعلا عاطيني قيمة ... مشاو جلسو و جوليانا غير كاتشوف و شوية بشوية بدات كاتفهم
ريماس : هو من ديما عاطيك قيمة راك كاتبقاي ماماه و مايبغيش يشوف شي واحد كايهضر معاك ولا عليك .. خاص غير تحاولي نتي تتقربي منو
أديرة : ( بخيبة امل ) حاول باباه معاه ولكن ماكانتش شي نتيجة
ريماس : لا ماشي هو لي خاصو يحاول .. خاصك نتي لي تحاولي حيت نتي لي ماماه
مرة مرة شوفي الاكلة لي كاتعجبو و طيبيها ليه اكيد ماغاديش يرفضها حيت كاتسماي درتي فيها مجهود .. سولي على احوالو و ماتمليش يقدر فاللول مايجاوبكش شوية بشوية غايولي يجاوب ولكن جواب ناقص .. شوية بشوية غايولي يسولك حتى نتي على احوالك .. و ها نتوما هاكا حتى تبداي كاتتعمقي معاه فالهضرة و يبقا يعطيك فرصة تتقربي منو
جوليانا : دابا هادشي كان كااامل تمثيلية؟؟؟
ريماس : بيان سيغ تمثيلية .. ماكانتقلبش دغيا
أديرة : ( شدات لها يديها ) قسمي ليا
ريماس : علاياش؟؟
أديرة : ( بعيون ترجي ) قسمي ليا بلي غاترجعي لي ولدي
ريماس : ( بإبتسامة خفيفة ) غانحاول نرجعو لك .. عنقاتها أديرة كتعبير على الشكر
أديرة : عنداك ماتهبطيش عندنا غدا
ريماس : لا غدا ماكانظنش غانهبط حيت..
أديرة : غادي نتسناك غدا ( بإبتسامة ) باغا عروسة ولدي تكون فجنبي
ريماس : واخا ان شاء الله غانهبط .. خرجو من تما و مشات ريماس باش تسد الباب من موراهم حتى فزعها أرسلان لي كان واقف حدا الباب و عينيه على الدروج .. دفعها بيديه بشوية للداخل و سد الباب موراه
أرسلان : علاش واقفة!! .. جلسي باغي نهضر معاك
ريماس : ( بغضب ) ماغانجلسش .. مصرفقني قدامهم كاملين بحالا مانعرفت شنو درت
أرسلان : سيري جلسي نهضر معاك قبل ماغانجبد لك لسانك من وسط حلاقمك و مابقاش بزاف غانديرها باش تترباي على هاد قلة الإحترام لي ولات فيك
ريماس : ياك كلهم كايعاملوها هكاك علاش ماهضرتيش معاهم هاه؟؟؟؟ ولا غير انا لي حلال ياك ...

أرسلان : ( بهدوء ) من زهرك لي ما جبدتش لسانك قدامهم و قطعتو لك
ريماس : والله ما نسمح لك على هاد التصرفيقة
أرسلان : ( عقد يديه مور ضهرو ) وليتي كاتهزي اليد و ضربي طبلة قدامي!!
ريماس : غير قستها ماضربتهاش
أرسلان : ( بحدة ) أخر مرة تكدبي فوجهي .. ديري فبالك هادي اخر مرة عندك ... تسالات الطاقة ديال التحمل ديالي معاك ا ريماس .. تخطيتي جميع الحدود الحمراء .. ايلا كنت ماقادرش نقتلك هادشي ماكايعنيش ما قادرش نشوه لك الملامح ديال وجهك على هاد العناد لي فيك
ريماس : بغيت نعس
أرسلان : مزال ما ساليت هضرتي معاك .. اخر مرة نلقاك لابسة هاد شراوط .. حدرات عينيها على حوايجها كاتشوف مالهم
ريماس : مالهم حتى هما؟؟؟؟؟؟؟ ياك مستورين
أرسلان : ماغانعاودش هضرتي معاك و هدا اخر تنبيه ليك ا ريماس ( ضغط على الكلمات ) اخر تنبيه عندك حيت المرة الجاية ماغاتخرجش لك سالمة .. و ديك المعمعة لي معمعتيها نتي و الواليدة ديالي .. اخر مرة دخليني فيها مرة خرا دنوبك على راسك
ريماس : اينا معمعة؟؟؟؟
أرسلان : بديتي فالكدوب!!!
ريماس : منين عرفتيها علاش ضاربني قدامهم؟؟؟؟؟
أرسلان : ( ببرود ) على قلة الاحترام لي فيك .. تقدم كبير عندك هدا .. الغوات و هزان طبالي .. المرة الجاية نلقاك هازة يدك فوجهي
ريماس : درت هكاك حيت نتا لي ماعاطيش لمك قيمة قدامهم حتى ولاو يجرجرو فيها و يحتاقروها و لاتعاود الزمن غانعاود نديرها حيت ماشي انا لي غانشوف حماتي المستقبلية كاتتهان و ندير راسي ماشف.. ( حبسات هضرتها )
أرسلان : ( بإبتسامة جانبية ) كملي
ريماس : بغيت ننعس .. جرها لعندو و خشاها بين يديه
أرسلان : ( بشبه إبتسامة ) كاديريها قد راسك و تنسيني فيها
ريماس : بعد مني كاع مانسيت التصرفيقة
أرسلان : سمحت لك على قلة الاحترام و نتي مزال مانسيتي!!
ريماس : راه انا لي تشوهت قدامهم
أرسلان : و صوتك لي تهز و انا حاضر!
ريماس : على ود عمل مزيان
أرسلان : ماتعاوديهاش باش ماتقلقينيش منك .. بقات كاتشوف لثواني و جاوبات
ريماس : تبدلتي بزاف على قبل .. قرب لودنيها و همس
أرسلان : تبدلت معاك ( عاود شاف فيها ) نتي لي غير ما زايدا و كاطغاي
ريماس : انا؟؟؟
أرسلان : ماغاتنعسيش!!
ريماس : وا خرج باش ننعس
أرسلان : لا
ريماس : ناوي تبقا فايق؟؟
أرسلان : غاننعس هنا
ريماس : كيفاش؟؟؟ ( بدات كادفع فيه ) خرج خرج خليني ننعس وا خرج ... خرج و سدات موراه الباب عاد مشات تنعس
• صبح صباح جديد فاقت العائلة كل واحد دار روتينو الخاص .. أما أرسلان فعلى الصباح صونا ليه طيلي
بنجامين : نقدرو نطلاقاو هاد النهار؟؟
أرسلان : تقدر تجي
بنجامين : ( بصوت طاغي عليه الحزن و الغضب ) مانقدرش نجي و انا عندي الجنازة ديال ولدي فالقصر
أرسلان : فهاد الحالة فاش تسالي اجي
بنجامين : الموضوع مهم بزاف راااه ولدي مات مقتووول ...

أرسلان : ولدك مات!؟
بنجامين : ( بحقد ) قتلوه
أرسلان : و عرفتي شكون قتلو؟!
بنجامين : مزاال ماعرفت ولكن غانجبدوو غانجبدوو .. الخبر تنشر فالجرائد و رجالي كايقلبو عليه
أرسلان : همم
بنجامين : غدا غانجي لعندك محتاج لمساعدتك
أرسلان : الوقت.!
بنجامين : فاش غانكون جاي غانعلم أبراهام
أرسلان : مزيان .. قطع عليه و خشا طيلي فجيب و ابتسامة شر مرسومة على وجهو اللعبة مزال ما سالات
♔ كانت جالسة كاتختار ما تلبس من الماريو و ريناد و فادي معاها كل مرة كايسولوها على حاجة كاتخص القصر
فادي : ختي فخبارك واحد الحاجة
ريماس : امممم
فادي : وا شوفي فيا باش نقولك
ريماس : راني كانسمعك غير هضر
فادي : عمي أصلان عتاذر منا البارح فالعشية .. حطات الحوايج من يديها و ضارت لعند خوها
ريماس : شنو دار؟؟؟
فادي : عتاذر منا البارح على الغلط لي دار معانا هادي عام
ريماس : و شنو قلتو ليه؟؟؟
فادي : سامحناه ا ختي
ريماس : ( بشك ) اش قالكم بالضبط؟
فادي : قالينا بلي راه ندمان على شنو دار
ريماس : غير هادشي؟؟؟
فادي : و قالينا بلي حتى حنا فرد من افراد هاد العائلة و بلي حنا بحال حفادو
ريماس : كمل
ريناد : و قال لفادي بلي غادي يوقف فجنبو حتى يولي بحالو بحال خويا أرسلان ناجح فحياتو
ريماس : ( بغضب ) الكافر بالله
فادي : ختي علاش تعصبتي
ريماس : هاد المرة ايلا عيط لكم ماتمشيوش لعندو هداك راه واحد الشيطان ما منوش انا لي غانتفاهم معاه عرفتو فين باغي يوصل .. جات الخدامة كاتعيط لهم ستأذنو من ريماس و مشاو .. ختارت حوايج انيقة تليق تهبط بيهم .. لبسات و قادات شعرها ، طلقاتو و دارت اخر اللمسات و هبطات متوجهة لفين كايكونو العيالات .. كادوز من حدا ولاد عمام أرسلان و ماكاينش فيهم لي كايطول الشوفة حدو الشوفة اللولة و كايبدل الطريق .. وصلات للباب و دخلات كاتقلب بعينيها على أديرة لي كانت جالسة بعيدة عليهم شوية .. سلمات عليها و على جوليانا تحت نظرات الاخريات لي هاد المرة حتى وحدة ما هضرات
ريماس : ( عاقدة حجبانها ) علاش جالسين هنا مبعدين عليهم .. البارح تحل كلشي
أديرة : هنا كانرتاح ماباغا صداع مع حد
ريماس : بلاتي هاني جايا .. مشات لعند مرت غابريال لي كانت جالسة الوسط و هازة مجلة فيديها .. نطرات لها المجلة و سداتها حطاتها فوق الطبلة
مرت غابريال : ( بغضب ) اش كاديري؟؟؟؟ ... اشارت لها ريماس بيديها
ريماس : نوضي
مرت غابريال : فين غانوض؟؟؟
ريماس : نوضي من البلاصة لي ماشي ديالك .. يلاه يلاه اش كاتسناي تحركي
مرت غابريال : اش كاتخربقي؟؟؟ واش عارفة اش كاديري ولا لا؟؟؟؟ موالفا نجلس هنا من سنيين
ريماس : ( ربعات يديها ) هاد النهار بغات تجلس فيها مولاتها
مرت غابريال : ( بحقد ) واش...
ريماس : خالتي أديرة اش كان قال أرسلان؟ ... وقفات مرت غابريال من تما تحت نظرات ذهول الجميع حيت من نهار ماتت حماتهم مرت اصلان و مرت غابريال هي لي كاتجلس تما .. خرجات من تما و هي ماراضياش
ريماس : ( شافت فأديرة ) بلاصتك هنا ماشي تما .. ناضت أديرة من تما و توجهات لبلاصة غابريال بغرور .. جلسات و هي فرحاانة حيت الاعتبار رجع لها قدامهم
أديرة : هاكا يكونو العرايسات ولا بلاش .. بقاو شوية بشوية كايتجمعو عليها بنات العم كايحاولو يصلحو علاقتهم بيها اما ريماس هزات مجلة و مشات جلسات حدا جوليانا .. عجباتها الجلسة هنا ، ماشي على ود المواضيع التافهة لي كايهضرو فيها العيالات هنا ولكن حيت لقات فيمن دوز وقتها .. حطات المجلة و هزات عينيها كاتسكانيهم شوية بانت لها وحدة عينيها ضايرا بيها شوية ديال زروقية ...

بقات كاتشوف فيها 100% غايكون راجلها لي تسبب ليها فيها حيت باينا فهادو لي هنا ماكايوصلوش لديك الدرجة ديال الضرب .. شافتها البنت كاتشوف فيها و حدرات راسها .. ناضت و مشات جلسات حداها
ريماس : يا خوك يا راجلك لي دار فيك هاد الحالة ياك
***** : الصمت
ريماس : حاجة طبيعية يديرو فيكم ما بغاو و نتوما غير ساكتين لهم .. دارت رجل على رجل و بقات كاتشوف فيهم وحدة بوحدة عصبوها ، عايشين حياتهم بهدف واحد هو يرضيو أزواجهم .. دفنو طموحاتهم و اهدافهم و قرايتهم و تلهاو غير بالتجميل و اللبس و الحوايج و انا لبست هادي و انا شرا ليا هادي .. حوايج تافهة و لا علاقة .. اهدافهم قصيرة المدى و حياتهم روتينية ناضت من تما باش تشوف فين تلاهي الوقت حتى وقفاتها الهضرة ديال البنت لي كانت هضرات معاها
بنت العم : راجلي لي ضربني .. رجعات جلسات فبلاصتها
ريماس : و شنو درتي؟؟
بنت العم : والو .. انا لي غلطت
ريماس : ضربك و صافي غير قطعتي معاه الهضرة و ساليتي؟؟؟ هادشي لي قدرتي ديري
بنت العم : لا ماقطعتش معاه الهضرة .. سامحتو
ريماس : مزرق لك العين و مسامحاه؟؟؟؟؟
بنت العم : ماتنسايش الرجال قوتهم زايدة علينا و مانقدرو نديرو والو .. بقات كاتشوف فيها ريماس بصدمة و بفقصة تعصبات بحالا هي لي تزرقات لها العين ماشي حبا فالبنت ولكن كاتشوف هاد قمة الذل و الكلاخ لي قدامها جاوباتها بهدوء
ريماس : دابا نتي سمحتي ليه حيت هو قوي عليك ياك
بنت العم : حيت هو كايبقا راجل و ماخاصنيش نتستهان بقوتو
ريماس : ماشي مامزيانش يكون الراجل قوي ... لي مامزيانش هو يطبق قوتو عليك و هو عارفك ماعندك صحة
بنت العم : هو كايبقا راجل
ريماس : ايلا كنتي كاتعتابري هادشي رجولة .. انا كانعتابرو من جنس تاهميشت
بنت العم : هو راجلي و انا عارفاه كايبغيني .. كيفما صابر عليا حتى انا خاصني نصبر عليه
ريماس : هدا حب هدا؟؟؟ ... مزرق لك العين و كاتقولي لي كايبغيك؟؟؟ فين هو اللوجيك؟؟؟ .. ايلا كان كايبغيك ماغايبغيكش تأذاي هو لي يحميك ماشي هو لي يشوه لك وجهك
بنت العم : ولكن هو دار هادشي حيت غلطت
ريماس : فهاد الوقت حتى من الحمير مابقاوش كايتمشاو بالعصى .. كاينا شي حاجة سميتها الهضرة .. الحواار .. النقاش .. هضري معاه و يهضر معاك و حلو المشكل
بنت العم : راجلي ماكايبغيش الهضرة بزاف
ريماس : ركبي ليه البريز الشارج ديالو تسالا ... ماكايبغيش يهضر سيري تشكاي لجدك هو يتفاهم معاه
بنت العم : ماشي من حقي نتشكا
ريماس : و باقا عايشة؟؟؟؟
بنت العم : الصمت
ريماس : غانوض نقضي لراسي حاجة ... ناضت من تما معصبة ندمات كاع لاش جلسات تما غا ازموها فاش شافت علاياش عايشين نظام العبودية .. خرجات و تلقات مع أسوار فطريقها .. كان وجهو باقي فيه اثار الضرب
أسوار : ريماس صافا
ريماس : الحمد الله
أسوار : ( بإبتسامة ) عندي خبر غايعجبك
ريماس : شي كدبة خرا هادي؟
أسوار : ( بفرح ) وليت مستعد ندخل للإسلام
ريماس : مقتانع ولا داير هادشي غير باش دير ليا خاطري
أسوار : قتانعت بيه ولكن مزال ماكانعرفش بزاف ديال الحوايج فيه
ريماس : ( بإبتسامة ) هانيا انا نعاونك ايلا بغيتي
أسوار : ولكن خاصني نعتانقو عرفت بلي كاين شي مراسم باش عاد نقدر نعتانقو
ريماس : ماشي شي حاجة صعيبة خاصك غير تغتاسل و تنطق الشهادتين
أسوار : مستعد نديرها واش تعاونيني؟؟
ريماس : ( بتردد ) تقدر تشوف شي إمام هو لي يعاونك فهادشي
أسوار : و فين غانلقاه؟؟
ريماس : موجودين فالمساجد
أسوار : غانمشي نقلب عليه دابا
ريماس : الله يديك على خير
أسوار : ( بإبتسامة ) شكرا
ريماس : علاش؟
أسوار : من بعد و غاتعرفي علاش .. ضار باش يمشي
ريماس : أسوار
أسوار : نعم؟
ريماس : فرحت بزاف منين عرفتك غاتعتانق الإسلام .. بتاسم ليها
أسوار : كون ماعرفتكش ماكنتش غانديرها .. جا لعندو ولد عمو إليان كايجري
إليان : اسوار راك باقي هنا؟؟؟؟
أسوار : وي علاش؟؟
إليان : مافخباركش بلي ولد بنجامين لقاوه مقتول البارح؟؟؟؟
أسوار : واش ميكائيل؟؟
إليان : وي هو هداك
أسوار : و شكون قتلو؟؟؟
إليان : ماعرفتش ولكن راه كلشي مشا لجنازتو بقينا غير انا وياك
أسوار : تسنا نوجد راسي و نمشيو
ريماس : واش هداك لي كان حاضر فالعشا هو و واليديه؟؟؟
إليان : و نتي شكون عطاك الحق تهضري؟؟؟
ريماس : عطاه لي راسي
أسوار : واش جاو للدار؟؟؟
إليان : وي جاو كان عرضهم أرسلان
أسوار : و ارسلان مشا؟؟؟
إليان : وي مشا على ود العلاقة ديال العائلتين
أسوار : تسنا .. غانلبس و نمشيو .. مشاو و خلاو ريماس كاتفكر ماشي فشكون قتلو ولكن فكيفاش عرف و هي ماقالتش ليه؟؟ ماكانتش عارفة بلي نظراتو ليها فالطبلة ماغفلش عليهم أرسلان لي كان مراقب تصرفاتو .. مشات من تما و توجهات للجردة ...

مشاو للجنازة كان كلشي حاضر و فاش كانقصد كلشي كانقصد غير لي من طبقتهم
بنجامين : باغي نهضر معاك ضروري
أرسلان : حتى تجي لعندي
بنجامين : الموضوع مهم بزاف
أرسلان : كانسمع
بنجامين : قدرت نعرف شكون لي قتل ليا ولدي
أرسلان : ( ببرود ) نتاقم لولدك
بنجامين : مانقدرش نديرها بوحدي حيت لي قتلو من حلفائنا
أرسلان : يعني؟!
بنجامين : محتاج للمساعدة ديالك ( بغضب ) باش ننتاقم من داك الحقير مورغان .. رجالي قدرو يعرفو بلي السلاح لي تضرب بيه هو السلاح ديال مورغان الغدااار
أرسلان : هممم
بنجامين : عرفت بلي هو سبق ليه حاول يقتل عروسة روتشيلد الجديدة .. هاكا نقدرو ننتاقمو منو بجوج
أرسلان : غانفكر
بنجامين : و غانتسنا جوابك .. مشا بنجامين لعند الضيوف بينما أرسلان كان كايبتاسم بخبث فهاد الحالة حتى ايلا قتل مورغان ماغاديش تتأثر علاقات العائلة اكيد هو مانساش اش كان حاول يدير مورغان هادي كتر من عام .. خرج من تما و تبعوه العائلة و رجالو باش يرجعو للقصر .. اما عند ريماس هاد النهار دوزاتو غير باش تزيد تعرف القنوت ديال القصر و تتعرف على الخداما باش فحالة كانت محتاجة شي حاجة تكون كاتعرفهم.
دازو أسبوعين غير فالتجهيزات لخطبة أرسلان و الدعوات .. فهاد المدة علاقة ريماس مع أديرة زادت قوات و ولات ريماس عزيزة على أديرة و كانت أديرة مركزة على الخطبة ديال ولدها و فرحانة بيه بينما الاخريات ماكانوش حاملين ريماس حيت دور دور و تحشي لهم فالهضرة .. أسوار سلم و ولا كايصلي بالطبع بعض المرات كايطلب من ريماس توضح لو شي حوايج و تعلمو ولكن غير بالتخبيعة .. هو ماعارفش بلي جوليانا سلمات و جوليانا ماعارفاهش بلي هو و مالك سلمو و مالك ماعارفش بلي اسوار سلم .. فهاد المدة عينين ريماس كانو غير على اصلان لي عرفاتو كايخطط لشي حاجة و خصوصا انه كان كايتعامل مزيان مع ريماس و حتى هي نفس الشي معاه .. هو كاينافقها و هي كاتنافقو .. فهاد المدة أما بخصوص علاقة ارسلان بريماس كانت غادا فتحسن كبيير .. ولكن بيان سيغ ماكانتش ناسية خطتها باش تدخلو للإسلام .
♔ كالعادة كانت خارجة من البيت باش تهبط لتحت حتى كانت فاتت جناح أصلان و عاودات رجعات 2 خلفات اللور فاش شافتو كايهضر فطيلي و الباب مردود شوية .. شافت فالكولوار واش ماجاي حد و بدات كاتتسنط
أصلان : ايمتا غاتجي؟؟؟ ... الخطبة كاينا غدا فالوقيتة ديال الظهر الوقت راه مكتوب فبطاقة الدعوة ... غانتسناك هادي هي الفرصة لي عندك من دابا خاص نبداو نتحركو ... ( بخبث ) لا هادي غير الخطوة اللولة مزال عندنا مايدار ... حاجة طبيعية ماغانقبلش بيها ما هي من مستوانا ما هي من ديننا و حتى ايلا تغاظيت مايمكنش ندخل السوسة لعائلتي ... ضحكات بشر و دخلات للجناح و هي كاتهضر بصوت عالي بحالا زعما عاد جات
ريماس : ( بإبتسامة ) عمييي أصلان ... حيد طيلي من ودنيه بزربة و شاف فيها كالعادة بإبتسامة مصطنعة متبادلة بيناتهم
سي أصلان : عروسة حفيدي جيتي
ريماس : ( بحزن مصطنع ) كنت خارجة للجردة ولكن تفكرت و تفكرت بلي ماقادرش تتمشى و غاتكون تخنقتي قلت نعاونك باش تشم الهوا
سي أصلان : ( بإبتسامة مصطنعة ) غير عدبتي راسك ا بنتي كاين لاطيراس
ريماس : ماغادي نقبل منك حتى عذر يلاه يلاه .. هاني نعاونك تنوض راه الجو زوين فجردة
سي أصلان : عارفاني ا عروسة حفيدي مانقدرش نخصر لك خاطرك ... عطا الإشارة لدوك 2 رجال لي معاه باش يعاونوه يتمشى لتحت و يوجدو ليه الكرسي المتحرك .. سبقاتو لتحت على ماينزلوه و ماخفاش عليها من مكالمتو الهاتفية بلي ناوي يدير شي حاجة فخطبتها .. نزلوه لتحت و حطوه فوق الكرسي المتحرك بغاو يجروه للجردة
ريماس : ت ت ت ... غير خليوني انا نمشي معاه بغيت نهضر معاه فشي مواضيع و ناخد إستشارتو فشي حوايج و كانظن عمي أصلان ماغايبغيش نناقش الأمور العائلية قدام الخدم و البوديكارد ولا لا ا عمي أصلان .. عطاهم الإشارة باش يمشيو .. دفعات الكرسي المتحرك قدامها و بقات غادا بيه لجهة الجردة هو كايفكر فهاد اللفعة كيف كايسميها فاش كاتفكر و هي كاتفكر فهاد الشيطان شنو كايخطط .. وصلات بيه للجردة و بالضبط حدا لابيسين ..

أصلان : علاش جينا للهنا؟؟؟
ريماس : والو ا عمي أصلان الجو زوين هاد النهار و الما حتى هو زوين .. عرفتك غا تبغي تشوف الما
أصلان : حيديني من هنا ا بنتي بغيت نرجع للجناح ديالي راني عيان
ريماس : ولكن ياك قلتي لي ماغاتخصرش ليا خاطري و زايدون انا ما جبتكش لهنا ان فراغ
أصلان : اش كاتقصدي ا بنتي؟؟؟
ريماس : عمي اصلان كاتعرف اللون الأسود؟
أصلان : اش جاب هاد السؤال دابا؟
ريماس : غير بغيت نعرف
أصلان : حاجة طبيعية كانعرفو و داك اللون عزيز عليا
ريماس : داك اللون بحالك نيت .. شحال ما حاولتي تزيد من الألوان فاللون الأسود .. كايبقا فنفس لونو و هادشي لي واقع معاك دابا .. واش يسحابلك غانتيق بتمثيلية ديالك؟؟ لهاد الدرجة كايسحابلك انا غبية؟؟؟
أصلان : اش كاتقصدي بهاد الهضرة؟؟؟ .. تحدرات لعندو و همسات
ريماس : هاد المرة فاش تبغي تخطط ماتنساش تسد موراك الباب مزيااان
أصلان : ( زير على اليدين ديال الكرسي ) لفعة
ريماس : تيق بيا مزال ماشفتي والو و لحد الساعة مادرت والو .. فمثلا نقدر دابا ندفعك فلابيسين بحال هاكا ... دفعاتو و عوجات الكرسي بحالا غايطيح .. بقات مخلياه هاكاك و هو شاد بيديه و رجليه
أصلان : رجعيني لبلاصتي اللفعة غانننقتلك
ريماس : ولا بحال هاكا .. زادت عوجات الكرسي بقا كايتقاتل باش مايجيش وسط الما حتى حسات بيديه كايترخفو عاد رجعاتو لبلاصتو
أصلان : غاااانندمك على الساعة لي حطيتي فيها رجليك فهاد القصر
ريماس : عمي اصلان علاش تقلقتي؟ كان كايسحابلي قشابتك واسعة .. تسمع ضوت من موراهم
سي إيتان : اش كاديري مع بابا هنا؟؟؟؟
ريماس : والو ا عمي إيتان غير بغا يشم شوية ديال الهوا داكشي لاش طلب مني نجيبو لهنا
سي إيتان : بابا واش هادشي بصح؟ ... بقا كايشوف فيها أصلان و عاود ضار لعند ايتان و ابتسامة مصطنعة مرسومة فوجهو
أصلان : وي ا ولدي و نيت كنت باغي نعطي شي نصائح لعروسة حفيدي باش دير بيهم بحال مثلا هاد النهار كامل ماتخرجش من بيتها باش يبقا النور فوجهها و ماتشوف ارسلان حتى لغدا و حتى هي بارك الرب فيها سمعات لهضرتي و واعداتني ماغاتخرجش منها .. عروستي كاتسمع للهضرة
ريماس : وي فعلا هادشي لي قاليا و انا زدت ليه إضافات بلي هادشي غادي نديرو حتى للوقيتة لي يوصل العرس باش يزيد النور نورين و عمي الحبيب وافقني فالرأي و قاليا نأجلها حتى لمن بعد ولا لا ا عمي اصلان ... بقا كايشوف فيها بغضب
سي إيتان : كايبان لي بابا حط ثقتو فيك و تفاهمتو نتمنى تقدري هادشي حيت هو صعيب باش يتقبل شي حد من غير ديننا فعائلتنا
ريماس : وي تفاهمنا و بزاف كاع ياك
سي أصلان : بطبيعة الحال غا نتفاهم مع عروسة حفيدي
ريماس : تبغي نرجعك لبيتك و نطلعك فالدروج؟؟
سي أصلان : ( بريبة ) لا كاين لي غايطلعوني
ريماس : على راحتك ... مشات من تما و خلاتو متبع لها العين .. غير دخلات للداخل تلقات لها جوليانا
جوليانا : فين كنتي؟؟ ماما من الصباح و هي كاتقلب عليك بغات توريك شي فساتين على ود الخطبة راه مابقاش بزاف غدا الخطبة و نتي مزال ماوجدتي اش غا تلبسي
ريماس : واخا واخا .. مشاو لجناح اديرة و ايتان لقاوها جالسة و حداها جالسة مرا كبيرة شوية أنيقة كاتوريها واحد الكاطالوغ و حداها 3 ديال البنات خرين لابسين نفس اللبسة
أديرة : فين كنتي؟؟؟
ريماس : غير هنا و صافي
أديرة : ( كاتهضر مع المرا لي حداها ) هادي عروسة ولدي أرسلان المستقبلية .. ريماس هادي من اشهر المصممات ففرنسا و عيطت لها خصيصا ليك
ريماس : متشرفين
أديرة : قربي قربي بغيت نوريك شي فساتين غايعجبوك
ريماس : ا نشوف ... بداو كايوريها و فكل مرة كايوريها شي واحد كاتعيبو لهم .. لا هدا الوانو غامقة بزاف .. لا هدا الوانو فاتحة بزاف .. لا هدا سامبل كتر من القياس .. لا هدا مزوق بزااف .. لا هدا قصير بزاف .. لا هدا تقليدي بزاف... الخ .. سالات الكاطالوغ و مالقاتش لي يعجبها حتى شافت واحد و طاحت لها فبالها فكرة خرا
ريماس : بلاتي بلاتي بغيت هدا
جوليانا : متأكدة باغا هدا؟؟ ولكن راه خويا..
ريماس : هدا لي بغيت و هدا لي غانلبس غدا
أديرة : نوضي ياخدو المقاس ديالك ..

خداو المقاس ديالها و ختارت المكياج و الإكسسوارات لي غاتلبس .. بقات مع اديرة شوية و من بعد خرجات هي و جوليانا
ريماس : فين أرسلان؟؟؟
جوليانا : راه خارج
ريماس : و مالك و أبراهام؟؟؟
جوليانا : حتى هما واقيلا
ريماس : ماعرفتيش ايمتا غايرجعو؟؟؟
جوليانا : على ما اظن فالعشية
ريماس : اسوار يكون فبيتو دابا ياك؟
جوليانا : وي ولكن علاش؟؟؟
ريماس : بغيت نطلب منك طلب
جوليانا : مرحبا شنو هو؟؟؟
ريماس : تقدري تعيطي لي على أسوار و تقولي ليه يطلاقاني فالجردة اللورانية
جوليانا : علاش؟؟
ريماس : غير قوليها لو مي تأكدي بلي راه بوحدو و ماكاين حد
جوليانا : غاتجبدي على راسك و على خويا صداع ا ريماس .. خويا ارسلان ماكايعجبوش هاد اللعب
ريماس : نتي غير تأكدي بلي ماكاين حد و ديري اش قلت لك
جوليانا : يطلاقاك دابا؟
ريماس : وي دابا نيت
جوليانا : الله يخرج هادشي على خير ... كانت غادا و وقفاتها ريماس
ريماس : بلاتي عاودي اش قلتي؟؟
جوليانا : قلت لك الله يخرج هادشي على خير
ريماس : نتي مسلمة؟؟؟؟ ... بقات جوليانا كاتفتف و مشات كاتجري خلات ريماس مستغربة من هضرتها و من ردة فعلها .. قررات تبحث فهادشي من بعد و مشات للجردة .. ماكاملاش 15 دقيقة لقات أسوار جاي و هو مبتاسم
أسوار : ريماس لاباس عليك؟؟
ريماس : وي صافا و نتا كي بقيتي؟
أسوار : ماشي بيخير ولكن الحمد الله
ريماس : اسوار محتاجة لمساعدتك فواحد الموضوع ضرووري تقدر تعاوني؟؟
أسوار : ماتسولينيش .. غير طلبي ديريكت نتي عارفاني ماكانرفض لك والو
ريماس : محتاجة ******************
أسوار : اش غادي ديري بيها؟؟
ريماس : ضروري
أسوار : صافي غير هادشي؟؟
ريماس : و فصراحة ****************** ... بقا كايشوف فيها بتردد
أسوار : نتي عارفة خطورة هادشي؟؟
ريماس : ماكاين بو خطورة انا نتحمل المسؤولية ولكن ماتقولها لحد
أسوار : ( بإبتسامة حب ) غدا يكون كلشي واجد
ريماس : نعول عليك؟
أسوار : ديما ... شكراتو و ودعاتو و مشات و هي تقريبا تايقة بلي هاد البلان غاينجح ... دوزات النهار مع جوليانا و أديرة حتى للعشية عاد رجعو خوتها من القرايا مخصص لهم أرسلان شخص كايديهم باليخت و كايرجعهم
♔ جالسة فبيتها و هي متأكدة ان أرسلان غايدوز لعندها 100% .. بقات كاتتسنا نص ساعة .. ساعة .. ساعة و نص و والو ماجاش ستغربات و مشات تشوف فالجناح ديالو واش كاين ولا لا .. يلاه بغات تمشي تسنط شوية تحلات الباب ديال الجناح دخلات بزربة للبيت باش ماتبانش بلي راه كانت كاتسنط هبط مع دروج بدون مايدوز عندها حسات بالبلان تضرب فزيرو .. ماموالفاش ليه مايجيش يطل عليها .. نسات الموضوع او بالأحرى تجاهلاتو وصل وقت العشا و هبطات تتعشا عادي سالات و طلعات سدات عليها الباب و نعسات
• صبح صباح جديد القصر مرون بالتجهيزات و هاد المرة ماشي غير اديرة لي واقفة عليهم .. بل حتى جوليانا .. بيان سيغ ماشي فكاع القصر ... غير القصر الوسطاني .. حيت كي ذكرت سابقا القصر كايتكون من 3 قصور مجموعين .. واحد كبير جاي الوسط و 2 فالجنب .. خلات اديرة بنتها تقابل التجهيزات و طلعات لعند ريماس باش تفيقها زعما .. غير دخلات لقاتها فاقت و دوشات بيان سيغ غاتفيق بكري و هي كاتفيق مع الفجر .. دخلات للداخل و تبعاتها ديك المصممة هي و البنات لي كانو معاها البارح و هاد المرة تزادو معاهم 2 اخرين
أديرة : ( مبتسمة ) كان يسحابلي غاتكوني ناعسة دابا
ريماس : هههه لا راني كانفيق مع ل5 ديال صباح
أديرة : ( بإستغراب ) علاش؟؟؟
ريماس : على ود صلاتي .. بدات اديرة كاتبدل فالموضوع حيت ماعجبهاش .. خلات معاها دوك البنات و هبطات باش توجد راسها حتى هي ...

بغاو يعاودو لها الدوش و مابغاتش حيت ماشي بزاف باش دوزات ... تفرقو البنات و كل وحدة تكلفات بحاجة .. وحدة تكلفات بالمكياج و وحدة بظفران ديال اليدين و وحدة ديال الرجلين و كالعادة ضروري ماتعلق لهم على أي حاجة .. هاد المرة ختارت مكياج تقيل و فنفس الوقت راقي .. هما كايقادو و هي كاتعلق لهم هادي اه هادي لا حتى سالاوه و كان على ذوقها .. ناضت تشوف الكسوة لي ختارت و الإبتسامة تعلو ملامحها .. لبسو لها الكسوة لي كانت فاللون الأزرق مغلوق جايا طويلة و لاصقة بالكمام توب خفيف كايبين اللحم و فالجهة التحتية فيها ثوب شفاف و جهة الصدر محلولة على شكل شقة و قادو لها شعرها بوكلي و ما طويل و قوي جا شي حاجة كتر من روعة .. لحد الساعة أرسلان مزال ما جا لعندها و ما هم الا دقائق حتى دخلات عندها جوليانا لي مع الدخلة لي دخلات بقات كاطلعها من لتحت للفوق و بدات كاضور راسها للجهتين بمعنى لا
جوليانا : لا لا لا ماكانش عليك تلبسيها عرفتي ايلا شافك خويا بيها؟؟؟؟
المصممة : ( بإنبهار ) لا بالعكس جاتك مفصلة عليك و ما شاء الله زادتك جمال على جمال ولا لا؟ ... وافقوها البنات الرأي و بقاو كايمدحو بجمال ريماس
ريماس : ( شافت فجوليانا ) واش جات خايبة؟؟؟
جوليانا : هنااا فين كاين المشكل و هادشي لي غايجبد لك اليوم الصداع و للحضور الصداع مابانش ليا هاد الخطبة غادوز بيخير
ريماس : ماغايوقع والو
جوليانا : نتمنى ولكن عرفتي كي جيتي ولا لا؟؟؟ مالقيتش الكلمات باش نوصف ( ضحكات ) ههه تسالاو لي والله
ريماس : هدا هو المهم .. بدات كاترش البارفان ديالها شوية سمعات صوتو حدا الباب هزات طالون فيديها و مشات كاتجري للدوش .. دخل للداخل كايقلب عليها بعينيه شاف فجوليانا
أرسلان : فينها ريماس!!
جوليانا : راها فالدوش ا خويا
أرسلان : فالدوش؟!
جوليانا : وي خويا .. شاف فساعتو و هضر
أرسلان : مزال ما سالات!
جوليانا : ( بإبتسامة ) لا ا خويا راها سالات
أرسلان : و اش باقا كادير لداخل؟
جوليانا : بسبب..
ريماس : غير سبقوني دابا نهبط .. عطاهم الإشارة باش يخرجو جمعو الماطريال ديالهم و خرجو .. غير حسات بالباب تسدات حطات يديها على البواني ديال الباب .. يلاه بغات تحلو و هي تتفكر بلي أرسلان صاحب المفاجئات ... حيدات يديها على البواني و بقات كاطل من ثقب ديال الساروت و فعلا لقاتو واقف كايتسناها .. رجعات جلسات كاتتسناه يخرج حيت عارفة ايلا شافها بيه ما غايبقا لا بلان لا خطة لا هم يحزنون .. بقات كاتلعب بضفرانها و هو كايتسنا برا عند بالو ماشافتوش حتى عيا و هو يهضر
أرسلان : غا تباتي تما؟
ريماس : وقعات لي شي حاجة كاتخص البنات و خاصني خالتي أديرة حيت هي لي كاتفهم فهاد الأمور كتر منا
أرسلان : غا نعيط لك على الفرملية
ريماس : بغيت خالتي أديرة
أرسلان : خرجي نشوفك
ريماس : مابغيتش نشوفك عاقل البارح؟؟؟ نهار كامل ماسولتي .. بتاسم ابتسامة خفيفة و حك ذقنو
أرسلان : كنت كانتسناك نتي تجي
ريماس : و علاش لي غانجي انا
أرسلان : حلي الباب باش تعرفي
ريماس : ماغانحلهاش و بغيت خالتي أديرة ... تسمع الدقان فالباب دخلات الخدامة و هي حادرة راسها
الخدامة : سي أرسلان راه لالة أديرة كاتسول على انسة ريماس
أرسلان : ها هي كاتسول عليك خرجي
ريماس : لا مانقدرش
أرسلان : ( موجه هضرتو للخدامة ) عيطي لها تجي
الخدامة : واخا ا سي أرسلان
أرسلان : عموما فاش نشوف شي حاجة ماعجباتنيش غانجمع لك القديم مع الجديد غير بقاي لداخل فاللخر غاتخرجي غاتخرجي .. خرج من تما و مع ذلك ماخرجاتش حتى جات أديرة ..

جات أديرة و ريناد و عيطو لها عاد خرجات من الدوش و هي كاترجع شعرها اللور .. شافتها أديرة و بتاسمات إبتسامة فخر
أديرة : جيتي غزاااااالة
ريماس : عويناتك ا خالتي .. حتى نتي جيتي قمة الأناقة
ريناد : ختي جيتي زوينة بزاااف ههههه اليوم نسيبي يتبهض
ريماس : و كون تشوفي نتي .. جيتي سووو كيوت
أديرة : ايوا اليوم نوريهم عروسة ولدي لي كايشدو فيها الهضرة و نسد لهم فامهم .. خرجو من البيت ب3 و هما كايضحكو .. يلاه جات تدخل للبلاصة لي فيها حفل الخطوبة .. حسات بشي يد جراتها
أديرة : ولدي أرسلان
أرسلان : سبقونا .. مشاو سبقوهم و خلاوهم بجوج .. أرسلان بدا الدم ديالو كايغلي و هو كايشوف هادشي لي لابسة بقدر ما جات فااتنة بقدر ما هو معصب حيت كانت على شوية غاتخرج لبرا و فنظرو غايتسما بحالا عارض خطيبتو كلوحة تشكيلية كلشي يشوفها و كلشي ينهشها بعينيه فحين ريماس كانت كاتلعن الحظ حيت ماخلاهاش دخل و شافها قبل الوقت لي المفروض خاصو يشوفها فيه هاد المرة تقلبو الأدوار .. أرسلان لي كان باين فيه كايفور و ريماس هي لي مثلات البرود و الهدوء
أرسلان : طلقي الكسوة نشوفها
ريماس : ها هي قدامك ها نتا راها بالكم و هابطة حتى للتحت
أرسلان : طلقيه و ماتخلينيش نقطعو لك من فوق اللحم ديالك .. طلقات ديك الجهة لي كانت شفافة و خلاتو يشوف الفستان كاامل .. قلب وجهو و بدا كايدوز يديه عليه
أرسلان : اش هادشي لابسة؟ ... اش هاد حوايج الدعارة لي لابسة؟؟؟؟؟؟؟
ريماس : راه ماعريانش راه كاينا من لتحت طبقة
أرسلان : ( بنفاذ صبر ) طلعي بدليه ا ريماس
ريماس : راه ماكاينش من غيرو هادشي لي ختاريت
أرسلان : ( بحدة ) واش غاتطلعي تبدليه ولا نخلي عشتك!!! ... بدا عقلها كايفصل و يخيط تقريبا وصلات لنص الخطة و مابقاش بزاف مايمكنش تخلي هادشي يضيع غير هكاك و يتضرب لها كلشي فالزيرو .. طاح لها بلان فبالها بقات تفمر واش تزعم ولا ماتزعمش ديرها ولا ماديرهاش قررات قرار اخير غاديرها .. زادت تعلات شوية بطالون و حطات يديها من مور عنقو و باستو فخدو و عاودات هبطات
ريماس : ( بهدوء ) ماكاينش لي غايشوف فيا و انا معاك .. صغر عينيه و ميل راسو
أرسلان : كاتحاولي تلعبي عليا!!
ريماس : وا صافي .. واش بغيتيني حتى فخطبتي نتشوه؟؟؟؟ ياك قبلت بالخطبة بخاطري وا خليني نلبس فخاطري
أرسلان : يعني غا نطلعو و ما بقات خطبة
ريماس : ( بعصبية ) ايلا مابقات خطبة ما بقا زواج و ماتعاودش تقرب ليا و ماتعاودش تهضر معايا بصفة نهائية
أرسلان : ماتزيديش تغوتي قبل مانحيد لك الحلاقم ديالك
ريماس : وا صافي واش هادشي على ود كسوة ... حول النظر ديالو لجهة شعرها بحالا فكراتو
أرسلان : رجعنا لنفس النقطة!!!!
ريماس : انا لي غانطلع دابا و مابقيت باغا لا خطبة لا وااالو ... بغات تمشي و رجعها
أرسلان : عندي شروط
ريماس : شنو هما؟؟؟
أرسلان : ماغاتسلمي على حد
ريماس : ماكانعرف حتى واحد تما
أرسلان : يدك فيدي و ماتزعزعيش من حدايا
ريماس : امم
أرسلان : ماسمعتش؟!
ريماس : فهمت
أرسلان : فحالة وقعات شي حاجة و تشغلت .. ماتبقايش واقفة بوحدك كلامي واضح؟
ريماس : ( بنرفزة ) واضح .. زفر بعصبية و مد لها يديه باش تشدها بقات كاتشوف فيها مدة و عاودات زفرات حتى هي و دخلو امام انظار الضيوف .. لي كانو علامات الإستغراب باينا فوجوههم حيت ريماس كيف ذكرت سابقا جمالها برازيلي ثاني حاجة حتى واحد من الحضور ماكان كايعرفها لا منين هي ولا شكون هي .. و بيان سيغ كانو علامات الإعجاب فعيونهم و كلمات المديح فجمالها دخلات لمسامع أرسلان .. مشا وقف حدا فطبلة بوحدهم عاد جات اديرة و ايتان و اصلان لجهتهم ...

هزات جوليانا طيلي ديالها و صورات أرسلان و ريماس على غفلة
أديرة : وريني نشوف
جوليانا : شوفي ا ماما .. جاو مواتيين ياك؟
أديرة : ( بصوت خافت ) زيدي زيدي صوريهم بلا مايشوفوك .. صوراتهم صور خرين
سي إيتان : كانظن هاد المرة زواجك غايكون عن إقتناع
أرسلان : حاجة طبيعية
أصلان : حفيدي ماكايدير حتى حاجة ايلا ماكانش مقتانع بيها .. جا بنجامين هو و مرتو و بنتو
بنجامين : مبروك ا سي أرسلان ختاريتي و عرفتي اش تختار .. سلم عليه و جا يسلم على ريماس .. بقات كاتشوف فيه و كاتشوف فبنتو خلاتو بلاكة و جمع يديه عندو مع ابتسامة صفراء .. قربات فيوليت لعند اصلان سلمات عليه و شافت فيه بواحد النظرة لي حتى هو بادلها بيها و سلمات واليدين ارسلان .. وصلات لأرسلان و مدات يديها
فيوليت : ( بصوت أنوثي ) مبروك ما درتي .. سلم عليها قدام عينين ريماس لي كانت كاتسكانيها بنظراتها .. مشات لجهة ريماس و سلمات عليها حتى هي
فيوليت : مبروك ا حبيبة
ريماس : ( بإبتسامة صفراء ) الله يبارك فيك ا حبيبتي
بنجامين : كالعادة ا سي أرسلان راك ذواق و من ديما ذوقك ماكاينش بحالو زدت تأكدت غير من هاد الجوهرة لي قدامي
أرسلان : ( بإبتسامة ) نعتابرها مغازلة فحضوري؟!
بنجامين : حتى واحد مايبغي لي يتغزل ليه بشريكة حياتو .. كان مدح للذوق ديالك
سي أصلان : حتى بنتك جذاابة و ماكاينش لي ينافسها فجمالها
بنجامين : الجمال كايختالف .. فمثلا الأنسة؟
أرسلان : ( بهدوء ) مدام روتشيلد
بنجامين : وي مدام روتشيلد .. جمالها.. ... هز أرسلان كاس فيديه و قاطعو
أرسلان : مزال ما سالينا من المدح ديالك ا بنجامين؟ ... سكت بنجامين و مابقاش
سي أصلان : نرجعو لموضوع بنتك
بنجامين : اكيد
سي أصلان : كي كاتعرف علاقة العائلتين علاقة قديمة و قوية و فصالح العائلتين نزيدو نقويوها .. انا عارف بلي عندك بنات خرين و ولاد خرين ولكن مزوجين و عندهم الاحفاد و بقات فيوليت هي الصغيرة فيهم و لي عزيزة عليك .. كانظن خاصك تفكر مزيان قبل ماتزوجها لأي واحد حتى تعرف واش يستاهلها
بنجامين : صراحة مؤخرا ولاو كايجيو لبنتي عروض زواج بزاف ولكن ماكانقبلهمش حيت فنظري ماكاينش لي يستاهل لؤلؤتي
سي أصلان : كاين شخص و ماكانظنش غاتلقا بحالو
بنجامين : شكون هو ... كانت ريماس هازة فيديها كاس ديال الما كاتشرب فيه و عينيها كايقلبو على اسوار مع سمعات اش قال اصلان و هي توحل ليها
سي أصلان : حفيدي ارسلان حيت كي كاتعرف من قواعد العائلة عندنا كايتزوجو ب3 نساء اللولة طلقها و الثانية غايتزوج بيها و الثالثة تكون بنتك علاش لا
ريماس : كح كح كح كححح
بنجامين : ليا الش..
أرسلان : ( بهدوء ) ولا أسوار علاش لا؟
فيوليت : هدا ماشي وقت هاد الموضوع حيت حنا حاليا فحفل ديال خطوبة أرسلان نخليو هاد شي للوقت شكون عرف اش يقدر يوقع ولا لا ا أرسلان
أرسلان : كلشي ممكن
فيوليت : ( شافت فريماس ) ماعرفتينيش على راسك
ريماس : وي كنت كانتسناك تبداي
فيوليت : ( بضحكة أنثوية ) شكون مايعرفنيش و سميتي متصدرة جميع المجلات .. ماشي مشكل نعرفك على راسي تقدري تكوني ماعندكش دراية بهاد العالم ..

فيوليت : معك فيوليت روكفلر بنت ثاني اغنى شخص فالعالم .. دارسة إدارة الاعمال و فالوقت الحالي انا هي الوجه الإعلاني ديال 2 شركات تابعين لينا هادشي بلا مانهضر على إدارتي لوحدة من الشركات الكبار ديالنا و نتي
ريماس : ريماس .. السمية باراكا عليك حيت مع الوقت ماغاتتنساش ليك .. ماغانهضرش ليك على حياتي ولكن غا نخلي الوقت يهضر لك عليا
فيوليت : ذاكرتي شوية ضعيفة ولكن غانحاول نعقل على سميتك
ريماس : غاتعقلي عليها
أسوار : مبروك عليكم
ريماس : ( بإبتسامة ) الله يبارك فيك
فيوليت : اوو أسوار نتا هنا
أسوار : فيوليت نورتي
فيوليت : بطبيعة الحال غا ننور الحفل
أسوار : ( عينيه فريماس ) و كيفاش الحفل ماغايتنورش و هو تقام على شرف القمر
فيوليت : ( بإبتسامة انوثية ) حشمتيني باراكا ههه
أسوار : علاش غاتحشمي؟
فيوليت : مهم .. سمعت مؤخرا بلي ولاو كايتقامو سباقات غير قانونية فإسرائيل مابقيتوش كاتشاركو؟؟؟
أرسلان : ماكاينش الوقت
فيوليت : عاقلة بلي عاودتي لي ا أسوار بلي كاديرو سباقات خاصين بيكم نتا و أرسلان الصراحة ماكرهتش شي نهار نجرب معاكم
أرسلان : ماكاندخلوش العيالات فداكشي
فيوليت : بففف خسارة ... شافت ريماس فيها
ريماس : ( بنظرة مكر ) ولكن انا فايتا شاركت مع أرسلان و أسوار
فيوليت : ياك عاد قلتو لي بلي العيالات ماكايشاركوش؟
أرسلان : مراتي حالة خاصة
ريماس : ماكانظنش واش عندك الصحة ليهم
أسوار : داكشي خطير عليك ا فيوليت
فيوليت : منين خطيبة ارسلان شاركات فحاجة طبيعية حتى انا نقدر نشارك و مايوقع لي والو
أسوار : ماغاتقدريش
فيوليت : غانقدر
ريماس : خليك فالمظهر الأنوثي السباقات شي حاجة ماكانتوقعش منك غاتخرجي منها سالمة
فيوليت : كايعجبوني و كايعجبني نغامر
ريماس : إذا بداي بالسباقات العادية
فيوليت : ( بإبتسامة جانبية ) السباقات العادية ماكاينش لي شاركت فيهم و ماربحتش فيهم
أسوار : وي هاد القضية بشهادتي و انا شاهد عليها
ريماس : امم يعني موالفا تشاركي فالسباقات
فيوليت : موالفة فالعاديين و ماكانخرج منهم حتى كانقلب كاع لي مورايا ولكن بغيت نجرب السباق الدموي ديال ارسلان و أسوار
سي أصلان : علاياش كاتهضرو؟؟
فيوليت : غير فأمور السباقات
سي أصلان : اممم ... دخل مورغان و شافو أرسلان من بعيد .. طلق من ريماس و توجه لعندو بنظرات شر عاود تبعت بنجامين و اسوار .. بقات غير ريماس مع فيوليت و خلاص اديرة و سي ايتان و اصلان كانو كايهضرو بوحدهم
فيوليت : أرسلان رجل مثالي
ريماس : وي عارفة
فيوليت : اي بنت كاتنجاذب ليه ولكن ماشي اي وحدة كاتولي مرتو
ريماس : حتى هادي حاجة عارفاها طلقي ديك الهضرة لي واحلة ليك .. تقابلات فيوليت مع ريماس
فيوليت : عرفتي من فوقاش و انا حاطة عليه العين؟
ريماس : ماكايهمنيش واش حاطة ولا ما حاطاش
فيوليت : ولكن كايهمك ايلا وليت مرتو ولا لا
ريماس : هادشي ماغايوقع ايلا فحالة كنتي ناعسة
فيوليت : لحد الساعة ماكاتعرفينيش مزيان
ريماس : من النظرة اللولة عرفتك من اينا نوع
فيوليت : خاصك تعرفي الحاجة لي كانحط عليها العين كاتولي ديالي
ريماس : إلا أرسلان لي ما شدش فيه المفعول ديالك
فيوليت : غادي تشوفي مع الوقت واش غايشد ولا لا و خاصة ان سي أصلان فصفي
ريماس : ولكن قلبو عندي انا يعني هضرتك خليها عندك و هضرة جدو حتى هي خليها عندك
فيوليت : باش نتهناو من هادشي كامل .. عندي إقتراح ليك
ريماس : واخا مامهتماش ولكن حاولي
فيوليت : نديرو سباق
ريماس : و اس غانستفاد؟
فيوليت : ايلا ربحتي نتي انا غانخوي الساحة و ايلا ربحت انا نتي غاتخوي الساحة
ريماس : سباقك خليه عندك حيت بدون داكشي انا لي رابحة
فيوليت : علاش خفتي؟؟ واش خفتي نربحك
ريماس : داك الوقت لي غانضيعو معاك زايد فيا
فيوليت : جبانة
ريماس : علاش عزيز عليكم تتمرمد كرامتكم يا جنس ليهود؟ ضروري نحطم لك معنوياتك عاد تتأكدي؟؟
فيوليت : فهاد الوقت نتي لي غادي يتحطمو لك ا حبيبة
ريماس : تجربي؟؟
فيوليت : يعني موافقة؟؟؟
ريماس : موافقة ...

فيوليت : وجدي..
ريماس : ( هزات يديها و وقفاتها ) .. وافقت ماشي حيت خايفة منك و ماشي حيت عاطياك قيمة كبييرة ولكن وافقت باش نزيد حتى هاد الإنجاز فإنجازاتي .. قلتي عمرك خسرتي فالسباقات الغير قانونية العادية؟ ... غايكون مزيان الى بديتي تعودي راسك على الخسارة لي كاتتسناك
فيوليت : الثقة فالنفس خايبة بزاف
ريماس : حتى ايلا تقت فراسي عندي علاش
فيوليت : هادشي كامل غادي يبان نهار السباق ...حطات يديها على الطبلة و قربات ليها
ريماس : عارفة بلي حضورك ماكانش بالصدفة و حتى إقتراحك ماكانش صدفة و هادشي من موراه شي حاجة ماتقوليش بلي راك درتيها بيا
فيوليت : ماتكونيش تايقة فراسك لهاد الدرجة حيت ماكاتعرفيش الخصم ديالك و لحد الساعة ماكاتعرفينيش مزيان فساعة قادرة ندمرك
ريماس : ( بمكر ) ماغانستغرقش داك الوقت كامل ايلا فكرت نديرها
فيوليت : حاولي تنقصي من هاد الثقة
ريماس : الوقت لي غايوريك
فيوليت : و غايوريك حتى نتي
ريماس : الوقت
فيوليت : غدا
ريماس : بعد غدا
فيوليت : موافقة
ريماس : البلاصة
فيوليت : ( بإبتسامة خبث ) حتى نطلاقاو و غاتعرفي
أبراهام : ممكن نعرف اش واقع هنا؟؟؟
ريماس : ( باقيين عينيها على فيوليت ) كانتعرف انا و فيوليت هدا ما كان .. شاف أبراهام فأرسلان لي كان مع مورغان و فنفس الوقت عينيه على فيوليت و ريماس أومأ ليه براسو بمعنى اه .. رجع نظرو لمورغان بينما أبراهام بقا حدا ريماس
فيوليت : مهم ا حبيبة ها الرقم ديالي باش نزيدو نتعرفو كتر .. شداتو من عندها ريماس موراها مشات من تما فيوليت و عينيها على اصلان لي تبعها بالكرسي المتحرك
أبراهام : فين خشيتي راسك عاوتاني؟؟
ريماس : و نتا مالك؟؟؟
أبراهام : تسناي حتى يعرف ميستر أرسلان
ريماس : التابعة
أبراهام : ( بجدية ) ماعنديش معاك و ماغاننافقكش باش نكسب الرضى ديال ميستر أرسلان ولكن اي حاجة كاتخص ميستر أرسلان واجب عليا نرد لها البال .. نتي عارفة هادشي غايوصل لو
ريماس : وصلها ليه ايلا بغيتي نكشف السر الصغير ديالك .. تبارك الله العائلة كل واحد فيكم عندو سر خاص بيه
أبراهام : لاياش كاتلمحي؟؟
ريماس : واااالو شوف نتا اشمن اسرار مخبع مثلا علاقتك بجوليانا ... بقا كايشوف فيها بصدمة و كايشوف واش سمعها شي حد
أبراهام : هههه اش كاتخربقي عارفة علاياش هاضرة
ريماس : عارفة و عارفة مزيان عنداك تحاول تحيمرني راني فاهمة و عارفة اش واقع
أبراهام : منين كاتجيبي بحال هاد الهضرة؟؟؟؟
ريماس : من اللقائات السرية ديالكم مثلا .. شنو غايكون رد الفعل ديال ارسلان ايلا عرف
أبراهام : حقييرة
ريماس : غير معاك و مع أمثالك .. سير قول ليه على إتفاقي مع فيوليت ايلا بغيتي نفضحك
أبراهام : كان عليا نقتلك النهار اللول لي تعطاتني فيه الفرصة
ريماس : ( بإبتسامة عريضة ) و مادرتيهاش .. سير قولها لو اش كاتتسنا ولا عرفتي تسناه راه جاي .. جا أرسلان و مشا لحدا ريماس ، حاوط ضهرها بيديه و عينيه عليها
أرسلان : قنطتي
ريماس : لا ماشي بزاف .. فيوليت و أبراهام ماخلاونيش نقنط
أرسلان : همم
سي إيتان : أرسلان ماغاتركبوش الخواتم؟
أرسلان : مشا مالك يجيبهم
ريماس : علاش واش شريتيهم ايمتا؟؟؟
أرسلان : ( بإبتسامة خفيفة ) مؤخرا
ريماس : و علاش ما خليتينيش نختار و ايلا ماعجبنيش؟؟؟ ... ماجاوبهاش و كتافى انه يشوف القدام .. كان جاي مالك و هاز فيديه شي حاجة ...

بقات ريماس كاتشوف فأبراهام و أبراهام كايشوف فريماس .. واحد كايتسنا لاخر يهضر و يشريها للثاني معاه .. جا مالك و وقف حدا ارسلان
سي إيتان : تسناو شوية نمشي نعيط لعمامك
أديرة : بنتي ريماس اجي بغيت نهضر معاك
ريماس : تسنا هاني راجعة
أرسلان : ماتعطليش ... مشات عند أديرة و بعدو شوية عليهم
أديرة : ( بجدية ) سمعيني مزيان و عقلي على هادشي لي غانقولك حيت لمصلحتك ... نتي عارفة مزيان بلي عاداتنا ماشي بحال عاداتكم .. انا شفت طبعك ولكن هادشي ماغايسلككش مع ولدي
ريماس : علاش مالو؟
أديرة : الخطبة ا بنتي عندنا حنا ماكانفسخوهاش إلا ايلا كانو اسباب خطيرة حيت كاتتسما الوعد بالزواج و حنا اليهود ماكانخلفوش الوعود بيناتنا
ريماس : ماعنديش سبب حاليا لي يخليني نفسخها
أديرة : كاتبغي ولدي؟
ريماس : الصمت
أديرة : شنو لي خلاك تقبلي واخا الديانات مختلفة؟؟؟
ريماس : حيت هدا ماشي العرس غير الخطبة .. شكون عرف شنو غايوقع من هنا للعرس
أديرة : عارفة بلي من مور الخطبة ممنوع على البنت تشوف الرجال ولا تخرج ياك؟
ريماس : علاش؟؟
أديرة : هادو من طقوسنا
ريماس : ( بنبرة إستهزاء ) و ايمتا المفروض نخرج؟
أديرة : نهار العرس لي كايكون من مور 8 اسابيع يعني شهرين بحسب العادات و التقاليد ديالنا
ريماس : بلاتي بلاتي ... علاش واش العرس من هنا شهراين؟؟؟؟
أديرة : هادو من عاداتنا و كايتأجل إلا فحالة وقعات شي حاجة
ريماس : دابا نهضر مع أرسلان فهادشي
أديرة : هادو كايبقاو من عاداتنا ماكاينا لا هضرة لا نقاش ... ماعجبهاش الحال فهادشي لعدة اسباب و اهمهم كاتحس بلي عاوتاني العادات و التقاليد غادي يدخلو فحياتها و هي لي من اللول ناوية يكون العرس مغربي ولكن شهراين واش غاتكفي باش تقنعو يسلم؟؟؟ وي كاتبغيه و موافقة تتزوج بيه ولكن مرة أخرى الديانة واقفة فالطريق
ريماس : يكون خير
أبراهام : تكلمو لميستر أرسلان العائلة كاتتسناكم
ريماس : ها حنا جايين .. توجهات ريماس لفين واقف أرسلان و باين فيها ماعاجبهاش الحال عكس أديرة .. وقفات حداه بينما العائلة و الضيوف وقفو بعاد شوية
أرسلان : مالك مغيرة
ريماس : والو
أرسلان : قلقاتك بشي هضرة.!
ريماس : ( بإبتسامة ) لا بالعكس غير نصحاتني
أرسلان : بان ليا تفاهمتو
ريماس : ضروري .. غاتكون حماتي المستقبلية .. جا مالك و عطاه الخواتم فصينية فضية مفرش فيها توب فضي
أرسلان : مزال باغي نهضر معاك
ريماس : فإينا موضوع؟
أرسلان : مور الخطبة .. أري يدك ... هز الخاتم و شد لها يديها برقة .. دخلو لها و هو مبتاسم ابتسامة جانبية ... هزات يديها كاتشوف فالخاتم كان عبارة على خاتم من الذهب الأبيض على شكل تاج و مرصع بألماسات بيضة صغار .. عاودات شافت فأرسلان نهار على نهار كايصدمها بقات كاتتسأل لهاد الدرجة هي كتاب مفتوح بالنسبة ليه و عارف حتى من ذوقها كي داير
ريماس : ( بنظرات اعجاب ) زوين بزاف عجبني
أرسلان : توقعت ... قربو لها الصينية و هزات الخاتم لي غاتركب لأرسلان .. كان خاتم من الذهب الأبيض و مطبوع فيه نفس الجمجمة لي منقوشة فالخاتم ديال العائلة .. بقات كاتشوف فيه باش يمد لها يديه
أرسلان : كاتسناي شي حاجة!! ... بقات كاتشوف فيه بغيظ ضروري كايبغي يعصبها .. ركبات ليه الخاتم من مور ما مد يديه ليها جات تحيد يديها ولكن قبل ماتحيدهم شدهم بين يديه و باس لها الرحا ديال يديها قدام جميع الحاضرين .. بقا قلبها كايضرب و عجباتها الحركة لي دار اما واحد سي أصلان غاياكل جنابو بالاعصاب .. طلق يديها و جرها لعندو
أرسلان : مابقاش بزاف و غاتولي ليا .. قاطعهم أسوار لي جا
أسوار : ( شاف فأرسلان ) خويا ( شاف فريماس ) و خطيبة خويا .. مبروك
ريماس : الله يبارك فيك ا .. حسات بيديه زيرو على الخصر ديالها
أسوار : ( شاف فريماس ) جيت غير باش نعطيك الكادو ديال الخطوبة الصراحة عندي 2 كادوات واحد ليك و واحد للعائلة ...

شاف فجهة الضيوف
أسوار : جدي .. بابا .. خويا .. ختي .. و عمامي و جميع الحضور عندي خبار بغيت نشارككم بيه كاملين ... بقا كلشي كايشوف لجهتو و كايتسناه اش غايقول
أسوار : هادي مدة تعرفت على واحد البنت ماشي بحال كاع البنات .. بنت لي قدرات تغيرني و تغير لي ضايرين بيها تغيير جذري .. بنت لي على قبلها كنت مستعد ندير اي حاجة تقدر طيح لكم على البال ولكن من سوء الحظ ( شاف فخوه ) ماكانتش مكتابة ليا و جا لي خداها ليا ماعلينا ماشي هدا هو موضوعنا .. حيت الخبار لي بغيت نشارككم بيه كايخصني .. بفضل ديك الإنسانة قدرت نعرف الطريق الصحيح و بفضلها تحلو عينيا و بفضلها عرفت شحال من حاجة .. الإعلان لي بغيت نشاركو مع الجميع إبتداء من اليوم مابقاتش عندي علاقة بالديانة اليهودية و ديانتي هي الإسلام لي هو الدين الوحيد لي حسيت براسي فيه متبعو ماشي حيت ملزوم عليا ولكن حيت مقتانع بيه .. ماشي اليوم هو اول يوم ليا و انا مسلم ولكن اليوم هو أول يوم كانعلن فيه بلي راني مسلم ... تقطعات الهضرة و كلشي سكت كانت صدمة كبيرة بالنسبة لكلشي .. باش يدخل واحد من عائلة روتشيلد للإسلام و يبدل ديانتو فهادي حاجة لي ماكانتش متوقعة نهائيا .. هما كايحاولو يفسدو الأديان لاخرين و ماشايفينش اش واقع فالقصر لداخل؟ و اش واقع وسط العائلة .. ما كانش غير شخص واحد لي تصدم .. حيت الصدمة غلبات على كلشي ما عدا ريماس .. حتى من ارسلان بقا مستغرب و فهاد اللحظة حقد على خوه حيت كايلفت انتباه ريماس بهاد الطريقة كتر من انه حقد عليه حيت عتانق الاسلام .. حول نظرو لجهة ريماس باش يشوف رد فعلها لقاها كاتشوف فأسوار و هي مبتسمة على شجاعتو فأنه قدر يواجه العائلة و جميع الحضور
أرسلان : ( بحدة ) جمعي عينيك و شوفي قدامك
ريماس : ( بإبتسامة ) نعم؟؟
أرسلان : فين كاتشوفي؟!
ريماس : ماشفتيش أسوار و الخطوة لي دار؟؟ الصراحة زاد كبر لي فعيني ماكنتش كانتوقعو كايهضر من نيتو ديك المرة .. كنت كانظن غير كايكدب و..
أرسلان : حبسيي ماتزيديش تهضري عليه ... شافت فيه و عاودات رجعات عينيها على أسوار هي فعلا ماكانتش حاطة فبالها هاد الخطة ولكن الخطوة لي دارها أسوار غادي تساعدها بزاااف و ختاصرات عليها طريق طويلة و الدليل هو رد فعل ارسلان ... كانت هضرتو و اعلانو بهاد الشكل بحال القنبلة لي شوشات على كلشي و صدماتهم ... أصلان مابقاش عارف فين يرد بوجهو كايحس بقلبو غايوقف عيط لجوج رجال باض يطلعوه لجناحو مابقاش قادر يبقا هنا و الاكيد هو هادشي ماغايدوزش بالساهل .. توجه سي إيتان بخطوات ثابتة لجهة أسوار
أسوار : بابا ... هز يدو و نزل عليه بتصرفيقة ... عطا أرسلان إشارة لرجالو باش يعلمو الضيوف بلي صافي سالاو حفل الخطوبة ... بدا القصر كايخوا شوية بشوية حتى بقاو غير العائلة
سي إيتان : هادشي لي خرج منك؟؟؟؟؟؟؟ باغي تشوهنا فأخر يامنا؟؟؟؟؟؟ فأخر يامنا بغيتي تشكك فينا الناس فأصلنا؟؟؟؟؟ دويييي مالك سكتتي ... واش انا والد ولد ولا حمار بالودنين؟؟؟؟؟؟؟ لاياش باغي توصل بهاد الفعل؟؟؟؟؟ باغي توصل لهم بلي حنا ماتايقينش فديننا؟؟؟؟؟ باغي توصل لهم بلي عائلتنا شي كايشرق شي كايغرب؟؟؟؟؟
أسوار : انا ماجيتش و دخلت ليه غير هكاك .. قتانعت بيه ا بابا .. شاف ايتان بحقد و مشا عاودات تبعاتو أديرة
إليانا : أسوار شنو هاد..
أسوار : بعدي مني حتى نتي .. نتي لي بقيتي ناقصاني .. مشا لجهة ريماس و أرسلان
أرسلان : فين باغي توصل
أسوار : لداكشي لي وصلتي ليه
أرسلان : حاول
أسوار : مزال باقي كادو .. عيط على وحدة من الخدم و جابت ليه علبة كبيرة فالبيض
ريماس : ماكانش عليك تعدب راسك
أسوار : هادي اقل حاجة نجيبها لك على المعروف لي قدمتي ليا
أرسلان : بلاصة ماتعطيه لمرتي .. عطيه لمرتك حسن مايعطيه لها شي حد اخر شكون عرف
أسوار : كادو بسيط ماشي شي حاجة ..

عطاها العلبة و شداتها فيديها .. حلاتها و جبدات اش فيها ... كان فستان طويل بالأكمام فاللون الأزرق السماوي مامزيرش و مرخوف من لتحت شكلو أنيق
أسوار : ( بخيبة امل ) كون كنتي خطيبتي و كون كنت انا لي بلاصة أرسلان ماكنتش غانخليك تخرجي بهاد الفستان .. انا عارف بلي المسلمات حرام يخرجو بهاد الشكل و حرام يوريو لحمهم و رجال المسلمين المفروض مايخليوش النسا ديالهم يخرجو بهاد الشكل و.. ... سكتو أرسلان بكروشية رعفو بيها .. رجع اللور .. كان غايزيد يهضر ولكن قاطعاتهم ريماس
ريماس : علاش ضربتيه؟؟؟؟؟
أرسلان : ( هز صبعو ) اخر إنذار عندك ا ولد إيتان ماتخلينيش نزطم على رابط الدم لي جامعنا
أسوار : قلت الحقيقة .. كون كانت ريماس خطيبتي كنت غانخليها تلبس داك الفستان لي وريتك
أرسلان : نتا الهضرة ماكاتنفعش معاك .. جبد سلاحو و وجهو فإتجاه راس أسوار .. بقات كاتنعل راسها و تنعل اسوار لي مامشاش فالخطة كيفما قالت ليه .. شرا الفستان بالمواصفات لي طلبات و جابو كادو ليها كيفما وصاتو ولكن الهضرة لي قالت ليه يقولها ماقالهاش و قال حاجة خرا لي حاجة طبيعية تعصب أرسلان و هاد المرة موحال يدوزها ليه .. وقفات وسطهم و هزات يديها باش تمنعو .. كلشي بدا كايحزرو و كلشي تصدم منين شافو باغي يتيري فخوه على ودها العيالات هربو من تما و بقاو غير الرجال
غابريال : ارسلان راك غاتقتارف اكبر غلط
إيلام : شي واحد يعيط لإيتان .. سربيي نتا وياه اش كاتسنااااو
أرون : ارسلان راه الموضوع مايستاهلش نزل سلاحك عليه راه خووك
ريماس : علاش غاتيري فيه؟؟؟؟؟ واش باغي تخصر حتى حفل الخطوبة؟؟؟؟؟؟؟
أرسلان : بعدي لهيه
ريماس : ماغانبعدش و ماغانخلييكش تقتلو .. ديما دييما ديييما كاتخليني نحس بالذنب هو ما قااال والو
أرسلان : بعدي لهيه ولا غانتيري فيك و مانترددش فأنني نخليك شادة للأرض
أسوار : ريماس خليه يقتلني خليييه .. من ديما كان شخص اناني اي حاجة بغيتها فحياتي خداها لي هو
ريماس : سكت حتى نتاااا واش انا كانفك و نتا كاتزيييد
أرسلان : 3
ريماس : ديالاش 3؟
أرسلان : 2
ريماس : ارسلان راه الموضوع مايستاهلش
أرسلان : 1 .. تيرا حدا رجليها الشيئ لي خلاها ترجع باللور بالزربة مع رجعات برجليها تعوجات رجليها و كانت غاطيح .. مشاو لجهتها بجوج بيهم باش يشدوها .. هز أرسلان راسو فأسوار لقاه حتى هو ماد يديه باش ماطيحش
ريماس : عجبكم الحال دابا؟؟؟؟؟ ها رجلي كانت غاتتفدع
إيلام : ولايني ماكاتحشمش
غابريال : قلت لكم فاش دخلات للقصر بلي غادي يترون و ماسمعتونيش .. وقفها و رجع شاف فأسوار
أرسلان : رد البال لراسك هاد الايام .. شكون عرف الموت تزورك فأي لحظة ... بغا يمشي و وقفاتو ريماس هزات الكسوة لي جاب اسوار
ريماس : صافي دابا نقدرو نمشيو
أرسلان : طلقي ديك شرويطة
ريماس : لا ماغانطلقهاش ... نطرها لها من يديها و بدا كايقطع فيها
أرسلان : هادي لي عاجباك ياك؟ .. شدي لبسيها دابا .. زاوطها و عاود شد فيد ريماس مشاو فإتجاه الدروج و هضرة أسوار كاتتعاود ليه فالدماغ اما بالنسبة لحالة جميع افراد العائلة كلهم كانو مصدومين و الشوهة لي وقعات لهم اليوم موحال تنسا لهم ... دخلها لبيتها و خرج بدون ماينطق بحتى كلمة
ريماس : ( كاتضرب فالباب ) حل الباااااب أرسلان حل الباب
أرسلان : حسابي معاك حتى نرجع ...

بقات غادا جايا فالبيت عصبها داك طالون و زفات بيه جهة الباب ... هي ماقالتش ليه يزيد دوك الاضافات ديال تكون خطيبتو كانت ناوية غير تفيق أرسلان بلي الإسلام كايستر المرا و يخلي لحمها غالي ولكن أسوار زاد خصرها كاع حيت الفكرة وصلها بطريقة غالطة .. وصل ليه فكرة الحجاب و فنفس الوقت دار حاجة محرمة فالدين و لي هي حاط عينو على مرت خوه فكيفاش بغا أرسلان يقتنع بالدين؟؟؟ من غير ايلا كان دار هادشي عن قصد

• عند أصلان
كان جالس فالجناح و كايهضر فطيلي و هو فقمة الغضب ديالو الدافع ديالو فأنه يتهنا منها تضاعف و ولا باغي يتهنا منها فأقرب فرصة باش ماتزيدش تدمر ليه داكشي لي بناه فسنين
أصلان : اش درتي فداكشي؟؟؟؟
فيوليت : كلشي غادي كيفما بغينا
أصلان : وافقات؟؟؟
فيوليت : وافقات ا عمي اصلان مابقاش بزاف
أصلان : ماعندي مايتسالك ... إختياري ليك ماكانش غالط
♚ كان غادي لجهة البيت ديال أسوار حتى وقفو أبراهام
أبراهام : ميستر أرسلان
أرسلان : طلب من ربك يكون هادشي لي وقفتيني عليه يستاهل ... بقا أبراهام كايفكر فهادشي لي غايدير و فنفس الوقت كايفكر فرد فعل أرسلان ايلا مشات ريماس وصلات ليه الهضرة على علاقتو بجوليانا .. ولكن فاللخر قرر يقولها ليه و لي بغا يوقع يوقع
أبراهام : ميستر ارسلان الموضوع كايخص أنسة ريماس
أرسلان : مالها ريماس؟!!
أبراهام : كاتخطط دير واحد الحاجة ... غمض عينيه بنفاذ صبر على هاد المتاعب لي كايجيو وحدة من مور وحدة مايمكنش يدوز نهار هادئ
أرسلان : كانسمع
أبراهام : فصراحة ا ميستر أرسلان أنسة ريماس كاتفكر تدخل فسباق غير قانوني مع الأنسة فيوليت و فحفل الخطبة ديالكم كانت كاتهضر عليه هي وياها و.. ... قبل مايكمل أبراهام اش بغا يقول رجع أرسلان أدراجو نحو البيت ديال ريماس حل الباب لقاها واقفة
ريماس : ممكن نعرف علاش سديتي عليا؟؟؟؟ .. زدح الباب و مشا لجهتها
أرسلان : اش وصلك لبنت بنجامين؟!!
ريماس : وصلها لك الكلب .. ديييما كايبغي يجبد لي المشاكيل
أرسلان : غانعاود نسولك اش وصلك ليها؟!!
ريماس : واالو
أرسلان : ماتكدبيش فوجهي
ريماس : هي لي ستفزاتني
أرسلان : ستفزتك اجي لعندي انا نتصرف .. انا حيط؟!!!
ريماس : ياك قلتي لي ماندخلكش فالأمور لي كاتخص بالنسا عاقل ولا ماعاقلش راني ماكاننساش هضرتك
أرسلان : كاتعقلي على لي بغيتي و تنساي لي بغيتي ياك؟!!! ... الشعر و العرا الهضرة كادخل لك من ودن و تخرج لك من ودن
ريماس : ماكاننسا والو ولكن كانتعامل بالمنطق .. ماعندكش الحق تتحكم لي فلباسي و فشعري
أرسلان : ولفتي تكوني فرجة! ... عاجبك الحال تخشاي وسط الرجال و يعريوك بعينيهم ياك؟!!
ريماس : ماكانهتمش لنظراتهم و ماكانهتمش لهضرتهم و حتى واحد فيهم ماغادي يأثر عليا و يخليني ندير داكشي لي باغي هو
أرسلان : ماكاتهتميش بهادشي و كاتهتمي بهضرة أسوار؟!! ... بلا نقاش بلا زيادة الهضرة
ريماس : ايوا هو جاب ليا الفستان مستور بكل نية طيبة مسكين .. ضور وجهو و حك ذقنو و بدا كايضحك بسخرية
أرسلان : مسكين! ... ختاصر الخطوات فخطوتين ووصل لعندها شدها من دراعها بجوج و بدا كايزعزعها و تعابير الغضب طاغية على وجهو
أرسلان : و انا كانقولك تعراي؟!!!! ... كانقولك وري فخاضك للكلاب؟!!! ... كانقولك طلقي شعرك و متعيهم ( طلق منها بجهد ) واش باغا تحمقيني؟!!! ... باغاني نقتلك و نهني راسي من مشاكلك لي ماكايتقاضاوش .. كل نهار خارجة ليا ببلان جديد ...

ريماس : ( بإنفعال ) و علاش كاتغوت عليا دابا؟؟؟ ياك ماشي انا لي عطيتو ليه هو لي عطاه لي
أرسلان : كون ماشافكش بداك اللبس ماكانش غايزعم و يحاول يطيح بيا
ريماس : علاش غايطيح بيك؟؟
أرسلان : ( بالضغط على الكلمات ) أنـا مـااشـيي ديـوثـييي باش نعرض مـررتـي .. سواء تكون معايا ولا ماشي معايا
ريماس : ( بصوت هادئ ) حتى واحد ماقال عليك هاد الهضرة
أرسلان : غير قطعي الحس .. نتي أخر شخص نبغي نسمع صوتو فهاد اللحظة
ريماس : الصمت .. خشا صبعانو فشعرو بأعصاب .. قربات لعندو بخطوات و عنقاتو ، بقاو ساكتين بجوج بينما هو بقا محافض على وقفتو شافتو ماهزش يديه و عنقها بحال لي موالف و بدات كاطلق منو و هي ماراضياش ماجات فين تبعد حتى رجعها لعندو و زير عليها .. نطق بهدوء
أرسلان : ( بتعب ) ماكانبغيش نأذيك ا ريماس
ريماس : الصمت
أرسلان : علاياش تافقتي نتي وياها!!
ريماس : ( بهدوء ) على سباق عادي و صافي
أرسلان : علاش ماشاورتينيش و جيتي هضرتي معايا
ريماس : عارفاك ماغاتبغيش و انا مافيا مانبقا نتجابد فالهضرة
أرسلان : سمعتيها من عندي؟!
ريماس : توقعتها حيت باينا .. سكتو بجوج واحد المدة ولكن مادامش داك الصمت
أرسلان : موافق .. هزات عينيه فيها بصدمة كأنها مامستوعباش اش قال ماكانتش متوقعاه غايقبل بهاد البساطة .. زادت زيرات عليه كتر بالفرحة ديالها
ريماس : صافي وافقتي؟؟؟؟
أرسلان : عرفتي علاش وافقت
ريماس : علاش؟؟
أرسلان : مابغيتش نجردك من شخصيتك .. ماتحسيش بلي راني حابسك عندي راني ماناسيش بلي عندك طموحاتك و اهدافك ( شد لها نيفها بصباعو ) و ماناسيش بلي عزيز عليك المشاكل و التحديات .. بقات كاتشوف فيه بصدمة ماكانتش متوقعة هاد ردة الفعل و ماكانتش متوقعة هضرتو حيت من اللول كان فنظرها غايحاول يحبسها و يدفنها فالقصر بحال لي داير الاب ديالو و جميع رجال عائلة روتشيلد ولكن وقع العكس تماما .. خشات راسها فصدرو و ترسمات على وجهها ابتسامة الرضى حسات بواحد الشعور فهاد اللحظة شي حاجة كتر من الفرحة نقدرو نقولو بلي بدات كاتفهم شخصية ارسلان و شنو باغي و شنو ماباغيش
ريماس : ماغانشكركش حيت عارفا بلي مابيناتناش الشكر ولكن ماعرفتش باش غانعوضها
أرسلان : غاتعوضيها بديري عقلك و ماتبقايش تعصبيني
ريماس : دابا صافي واش بصح وافقتي؟؟؟؟
أرسلان : وافقت ولكن بشرط
ريماس : شنو هو؟؟
أرسلان : مانعاودش نشوف شعرك مطلوق
ريماس : صافي كلمة وحدة
أرسلان : متأكدة!!
ريماس : راه حتى انا فاش كانعطي الكلمة ماكانعاودش نرجع فيها ولكن السباق راه مابقاش ليه بزاف
أرسلان : ؟؟
ريماس : بعد غدا ولكن مابغيت حتى شي مساعدة فيه .. بغيت نشارك فيه بعدل باش ايلا ربحتها نربح بعدل .. رجع ارسلان كايفكر بلي عندو السفر غدا
أرسلان : همم ماقلتيش ليا
ريماس : اش غا نقولك؟؟
أرسلان : شنو هي الجائزة لي باغا تغامري براسك عليها
ريماس : الصمت
أرسلان : ماكايناش؟!
ريماس : غير سباق عادي و صافي
أرسلان : هادي ربع ساعة قلتي ستافزاتك
ريماس : غير على ود هادشي و صافي
أرسلان : رجعنا للكدوب
ريماس : وا صافي ا أرسلان
أرسلان : دابا نعرف .. هبطو عينيه لشفايفها و يلاه قرب باش يلامسهم هزات يديها و وقفاتو
ريماس : عندي طلب
أرسلان : طلبي ... شافت ليه فعينيه مباشرة
ريماس : بغيتك ماتعاودش تقرب لي حتى تبحث فالإسلام ( جا يهضر و قاطعاتو ) ماقلتش لك سلم و بدل دينك قلت لك غير قلب غير بحث و تيق بيا من مور هادشي غادي نسد الموضوع فمرة و مانبقاش نجبدو .. كيفما انا ندامجت مع عائلتك و تقبلتهم و مابقيتش حاقدة على الديانة اليهودية .. ماترفضش ليا هاد الطلب ...

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.